ಅಕ್ಷಯ ತೃತೀಯಕ್ಕೆ ಸಿಗುತ್ತೆ ರಾಮನ ಕಾಯಿನ್
– ಈ ಬಾರಿ ಮನೆಗೆ ಬರಲಿದ್ದಾನೆ ಬೆಳ್ಳಿ-ಬಂಗಾರದ ಬಾಲರಾಮ
– ಚಿನ್ನದ ಅಂಗಡಿಗಳಲ್ಲಿ ರಾಮನ ಕಾಯಿನ್ ಡಿಮ್ಯಾಂಡ್!
NAMMUR EXPRESS NEWS
ಅಕ್ಷಯ ತೃತೀಯದಂದು ಅಯೋಧ್ಯೆಯ ಬಾಲರಾಮ ಬೆಳ್ಳಿ, ಬಂಗಾರದ ರೂಪದಲ್ಲಿ ಮನೆಗೆ ಅಡಿ ಇರಿಸಲಿದ್ದಾನೆ. ಇದಕ್ಕಾಗಿ ಆಭರಣ ತಯಾರಕರು ಭರದ ಸಿದ್ಧತೆ ನಡೆಸಿದ್ದಾರೆ. ಅಕ್ಷಯ ತೃತೀಯ (ಮೇ 10) ದಂದು ಗ್ರಾಹಕರಿಗೆ ಅಯೋಧ್ಯೆಯ ಬಾಲರಾಮನ ಮಾದರಿಯ ಕಾಯಿನ್‌ಗಳನ್ನು ನೀಡಲು ಆಭರಣ ಮಾಲೀಕರು ನಿರ್ಧರಿಸಿದ್ದಾರೆ. ಈ ಬಾರಿ ಚಿನ್ನದ ದರ ದುಬಾರಿಯಾಗಿದೆ. ಆದರೂ, ಗ್ರಾಹಕರ ಉತ್ಸಾಹ ಕುಂದಿಲ್ಲ. ಈಗಾಗಲೇ ಮುಂಗಡ ಬುಕಿಂಗ್‌ ಕೂಡ ಆರಂಭಿಸಿದ್ದಾರೆ. ಜತೆಗೆ, ಸಾಕಷ್ಟು ಮಂದಿ ಅಕ್ಷಯ ತೃತೀಯದಂದು ಖರೀದಿಸಲೆಂದೇ ಒಂದು ವರ್ಷದಿಂದ ಚೀಟಿ ಹಾಕಿದ್ದರು. ಈ ಬಾರಿ ಲೋಕಸಭೆ ಚುನಾವಣೆ ಹಿನ್ನೆಲೆಯಲ್ಲಿ ಜನರ ಬಳಿ ಹಣದ ಚಲಾವಣೆ ಹೆಚ್ಚಾಗಿದೆ. ಹೀಗಾಗಿ, ಅಕ್ಷಯ ತೃತೀಯದಂದು ಒಡವೆ ಖರೀದಿಯೂ ನಿರೀಕ್ಷಿತ ಮಟ್ಟದಲ್ಲಿಯೇ ನಡೆಯಲಿದೆ. ಅಂದು ಒಂದೇ ದಿನ ಸಹಸ್ರಾರು ಕೆಜಿ ಚಿನ್ನ-ಬೆಳ್ಳಿ ಮಾರಾಟದೊಂದಿಗೆ ನೂರಾರು ಕೋಟಿ ರೂ. ವಹಿವಾಟು ನಡೆಯುತ್ತದೆ.
ಅಕ್ಷಯ ತೃತೀಯ ಶುಭ
ಅಕ್ಷಯ ತೃತೀಯದಂದು ಚಿನ್ನ, ವಜ್ರ, ಬೆಳ್ಳಿ ಖರೀದಿಸಿದರೆ ವೃದ್ಧಿಯಾಗುತ್ತದೆ ಎಂಬ ನಂಬಿಕೆಯೊಂದಿಗೆ ರಾಜ್ಯದ ಅನೇಕ ಮಂದಿ ತಮ್ಮ ಇಷ್ಟದ ಚಿನ್ನಾಭರಣಗಳನ್ನು ಖರೀದಿಸುತ್ತಾರೆ. ವೈಶಾಖ ಶುದ್ಧ ತದಿಗೆಯಾದ ಅಕ್ಷಯ ತೃತೀಯದಂದು ಚಿನ್ನ, ವಜ್ರಾಭರಣಗಳ ಖರೀದಿಗೆ ಮಾತ್ರ ಸುದಿನ, ಈ ದಿನ ಯಾವುದೇ ಶುಭ ಕಾರ್ಯ ಆರಂಭಿಸಿದರೂ ಯಶಸ್ಸು ದಿಟ. ಇತರ ಯಾವುದೇ ವಸ್ತು ಖರೀದಿಸಿದರೂ ಶ್ರೇಯಸ್ಸು ಎಂಬ ನಂಬಿಕೆ ಭಾರತೀಯರಲ್ಲಿದೆ. ಮುಂದಿನ ಕೆಲವು ವರ್ಷಗಳಲ್ಲಿ ಚಿನ್ನದ ದರ ಒಂದು ಗ್ರಾಂಗೆ 10 ಸಾವಿರ ರೂ. ತಲುಪುವ ಸಾಧ್ಯತೆಗಳಿವೆ ಎಂದು ಕರ್ನಾಟಕ ರಾಜ್ಯ ಆಭರಣ ವರ್ತಕರ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಡಾ. ಬಿ. ರಾಮಾಚಾರಿ ತಿಳಿಸಿದರು.
ಬಾಲರಾಮನ ಬೆಳ್ಳಿ ಕಾಯಿನ್‌ಗಳ ಉಡುಗೊರೆ
50 ಸಾವಿರ ರೂ. ಮೇಲ್ಪಟ್ಟು ಆಭರಣ ಖರೀದಿಸಿದವರಿಗೆ ಹಾಗೂ 2 ಲಕ್ಷ ರೂ. ಮೌಲ್ಯದ ಆಭರಣಗಳನ್ನು ಖರೀದಿಸಿದ ಗ್ರಾಹಕರಿಗೆ ಪ್ರತ್ಯೇಕವಾಗಿ ಬಾಲರಾಮನ ನಾಣ್ಯಗಳನ್ನು ನೀಡಲಾಗುವುದು. ಅಯೋಧ್ಯೆಯಲ್ಲಿ ರಾಮನ ದೇಗುಲದಲ್ಲಿ ಕಾಯಿನ್‌ಗಳನ್ನು ಇಟ್ಟು, ಪೂಜೆ ಮಾಡಿಸಿ ತಂದು ನಮ್ಮ ಎಲ್ಲಾ ಮಳಿಗೆಗಳಲ್ಲಿ ಅಕ್ಷತೆಯೊಂದಿಗೆ ಗ್ರಾಹಕರಿಗೆ ಬಾಲರಾಮನ ಕಾಯಿನ್‌ಗಳನ್ನು ಉಡುಗೊರೆಯಾಗಿ ನೀಡಲಾಗುವುದು ಎಂದು ಶ್ರೀ ಸಾಯಿ ಗೋಲ್ಡ್‌ ಪ್ಯಾಲೇಸ್‌ನ ಮಾಲೀಕರೂ ಆದ ವಿಧಾನ ಪರಿಷತ್‌ ಸದಸ್ಯ ಡಾ ಟಿ ಎ ಶರವಣ ತಿಳಿಸಿದರು. ಚಿನ್ನದ ದರ ಹೆಚ್ಚಾದರೂ ಖರೀದಿ ಪ್ರಮಾಣದಲ್ಲಿ ಸ್ವಲ್ಪ ಮಟ್ಟಿಗೆ ಇಳಿಕೆಯಾಗಬಹುದು. ಆದರೆ, ಖರೀದಿದಾರರ ಸಂಖ್ಯೆಯಲ್ಲಿ ಯಾವುದೇ ಇಳಿಕೆಯಾಗುವುದಿಲ್ಲ. ಇದೀಗ ಮದುವೆ ಸೀಸನ್‌ಗಳಿವೆ. ಕಳೆದ ವರ್ಷಕ್ಕಿಂತ ಈ ಬಾರಿ ಶೇ 10ರಷ್ಟು ಹೆಚ್ಚು ಆಭರಣ ಖರೀದಿ ನಡೆಯಬಹುದು ಎಂದು ನಿರೀಕ್ಷಿಸಲಾಗಿದೆ ಎಂದು ಬಿ ರಾಮಚಾರಿ ತಿಳಿಸಿದ್ದಾರೆ.
