ಸಿದ್ದರಾಮಯ್ಯನವರೇ.. ಏನಿಲ್ಲ.. ಏನಿಲ್ಲ..!!
– ಸಿಎಂ ಟ್ರೊಲ್ ವಿಡಿಯೋ ಸಖತ್ ವೈರಲ್
NAMMUR EXPRESS NEWS
ಬೆಂಗಳೂರು: 1999ರಲ್ಲಿ ಬಿಡುಗಡೆಯಾಗಿದ್ದ ಸೂಪರ್ ಸ್ಟಾರ್ ಉಪೇಂದ್ರ ನಿರ್ದೇಶನ ಹಾಗೂ ನಾಯಕ ನಟನಾಗಿ ಸೂಪರ್ ಹಿಟ್ ಕಂಡ ‘ಉಪೇಂದ್ರ ಚಿತ್ರದ ಏನಿಲ್ಲ ಏನಿಲ್ಲ ಹಾಡು ಈಗ ಸಾಮಾಜಿಕ ಮಾಧ್ಯಮದಲ್ಲಿ ಭಾರೀ ವೈರಲ್ ಆಗಿದ್ದು, ಭರ್ಜರಿ ರಿಮಿಕ್ಸ್ ಮಾಡಲಾಗುತ್ತಿದೆ. ಇದೀಗ ಈ ಹಾಡು ರಾಜಕೀಯ ಟೀಕೆಗಳಿಗೂ ಬಳಕೆಯಾಗುತ್ತಿದೆ. ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ವಿಡಿಯೋವೊಂದು ರಾಜಕೀಯ ವಲಯದಲ್ಲಿ ಭಾರೀ ಸದ್ದು ಮಾಡಿದೆ. ರಾಜ್ಯ ವಿಧಾನಸಭಾ ಚುನಾವಣೆ ವೇಳೆ ಗ್ಯಾರಂಟಿಗಳ ಬಗ್ಗೆ ಭಾಷಣ ಸಿಎಂ ಸಿದ್ದರಾಮಯ್ಯ ಅವರನ್ನು ಈ ವಿಡಿಯೋಗಳಲ್ಲಿ ‘ಸುಳ್ಳು ರಾಮಯ್ಯ’ ಎಂದು ಬಿಂಬಿಸಲಾಗಿದೆ. ಸಿದ್ದರಾಮಯ್ಯ ಅವರು ಕರೆಂಟ್ ಫ್ರೀ, ಬಸ್ ಫ್ರೀ, ಹತ್ತು ಕೆಜಿ ಅಕ್ಕಿ ಫ್ರೀ ಎಂದು ಹೇಳಿರುವ ಮಾತುಗಳನ್ನು ಈ ವಿಡಿಯೋದಲ್ಲಿ ತೋರಿಸಲಾಗಿದ್ದು, ಇದೆಲ್ಲ ಸುಳ್ಳು ಎಂಬಂತೆ ಏನಿಲ್ಲ ಏನಿಲ್ಲ ಹಾಡನ್ನು ಜೋಡಿಸಲಾಗಿದೆ.
ಹೀಗೆ ಟ್ರೆಂಡ್ ಮೂಲಕ ಸಿಎಂ ಟ್ರೋಲ್ ಆಗಿದ್ದಾರೆ. ಅಲ್ಲದೆ, “ರೈತರು ಸಾಕಷ್ಟು ಕಷ್ಟದಲ್ಲಿದ್ದೇವೆ. ಆದಷ್ಟು ಬೇಗ ಪರಿಹಾರದ ಹಣ ಬಿಡುಗಡೆ ಮಾಡಿ” ಎಂದು ರೈತನೊಬ್ಬ ಮನವಿ ಮಾಡುವಂತೆ ತೋರಿಸಲಾಗಿದ್ದು, ಇದಕ್ಕೆ ಉತ್ತರವೆಂಬಂತೆ, ಬೆಳಗಾವಿ ಅಧಿವೇಶನದಲ್ಲಿ ‘ನಾನೇನು ಪ್ರಿಂಟಿಂಗ್ ಮೆಷಿನ್ ಇಟ್ಟಿದಿನಾ?” ಎಂಬ ಮಾತನ್ನು ಜೋಡಿಸಲಾಗಿದೆ. ಹಾಗೆಯೇ, ಅಲ್ಪಸಂಖ್ಯಾತರಿಗೆ 10 ಸಾವಿರ ಕೋಟಿ ಬಿಡುಗಡೆ ಮಾಡಿದ್ದನ್ನು ಈ ವಿಡಿಯೋದಲ್ಲಿ ತೋರಿಸಲಾಗಿದ್ದು, ಹಿಗ್ಗಾಮುಗ್ಗಾ ಟೀಕೆ ಮಾಡಲಾಗಿದೆ. ಲೋಕಸಭಾ ಚುನಾವಣೆ ಸಮೀಪಿಸುತ್ತಿದ್ದಂತೆ ಟ್ರೆಂಡ್ ಳಿಗೆ ತಕ್ಕಂತೆ ಟೀಕೆ, ಟಿಪ್ಪಣಿಗಳನ್ನು ಮಾಡಲಾಗುತ್ತಿದೆ. ಈ ಮೂಲಕ ಕಾಂಗ್ರೆಸ್ ಅನ್ನು ಮಣ್ಣುಮುಕ್ಕಿಸುವ ಬಿಜೆಪಿ ಪ್ರಯತ್ನ ಜೋರಾಗಿಯೇ ನಡೆಯುತ್ತಿದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ಸಖತ್ ವೈರಲ್ ಆಗುತ್ತಿದೆ.
