ಭಾಗ್ಯಲಕ್ಷ್ಮೀ ಬಾಂಡ್ ಹಣ ಪಡೆಯೋದು ಸುಲಭ ಅಲ್ಲ!
– ಪುನಃ ದಾಖಲೆ ಸಲ್ಲಿಸಬೇಕಿದೆ: ಬಡ ಕುಟುಂಬಗಳಿಗೆ ಪರದಾಟ
– ಏನಿದು ಯೋಜನೆ… ಎಷ್ಟು ಹಣ ಸಿಗುತ್ತೆ..?
NAMMUR EXPRESS NEWS
ಬೆಂಗಳೂರು: ಬಡ ಕುಟುಂಬಗಳ ಹೆಣ್ಣುಮಕ್ಕಳು ವಯಸ್ಕರಾದ ನಂತರ ಅವರಿಗೆ ಆರ್ಥಿಕ ನೆರವು ದೊರಕುವಂತೆ ಮಾಡುವ ಉದ್ದೇಶದಿಂದ ರೂಪಿಸಲಾದ ಭಾಗ್ಯಲಕ್ಷ್ಮೀ ಬಾಂಡ್ ಯೋಜನೆಯ ಹಣ ಪಡೆಯುವುದು ಸಾಹಸದ ಕೆಲಸವಾಗಿದೆ. ಬಾಂಡ್‌ಗೆ ಅರ್ಜಿ ಸಲ್ಲಿಸುವಾಗ ದಾಖಲೆಗಳನ್ನು ನೀಡಿದ್ದರೂ, ಅದರ ಹಣ ಪಡೆಯಲು ಮತ್ತೆ ದಾಖಲೆಗಳನ್ನು ಒದಗಿಸಬೇಕಾಗಿದೆ. ಇದು ಬಡ ಕುಟುಂಬಗಳ ಸಂಕಷ್ಟ ಹೆಚ್ಚಿಸಿದೆ.
ಬಡ ಕುಟುಂಬದ ಹೆಣ್ಣು ಮಗು ವಯಸ್ಕಳಾದ ನಂತರ ಸರಕಾರದ ಭಾಗ್ಯಲಕ್ಷ್ಮೀ ಯೋಜನೆಯಡಿ ಆರ್ಥಿಕ ನೆರವು ಪಡೆಯುವುದು ಈಗ ಅಷ್ಟು ಸುಲಭವಲ್ಲ. ಷರತ್ತಿನ ದಾಖಲೆಗಳನ್ನು ಸರಕಾರಕ್ಕೆ ಪೂರ್ಣ ಸಲ್ಲಿಸಿದರೆ ಮಾತ್ರ ನಿಗದಿತ ಬಾಂಡ್ ಮೊತ್ತ ಪಡೆಯಲು ಅವಕಾಶ ಇದೆ.
ಬಡ ಕುಟುಂಬದ ಹೆಣ್ಣು ಮಗುವಿಗೆ ಆರ್ಥಿಕ ನೆರವು ನೀಡಿ ವಯಸ್ಕ ಅವಧಿಯಲ್ಲಿ ಸ್ವಾವಲಂಬಿ ಜೀವನ ಒದಗಿಸುವ ಉದ್ದೇಶದಿಂದ ರಾಜ್ಯ ಸರಕಾರ 2006ರಲ್ಲಿ ಭಾಗ್ಯಲಕ್ಷ್ಮೀ ಕಲ್ಯಾಣ ಯೋಜನೆ ಜಾರಿಗೊಳಿಸಿದೆ. ಅಗತ್ಯ ದಾಖಲೆಗಳೊಂದಿಗೆ ಅಂದು ಯೋಜನೆಯಡಿ ಅರ್ಜಿ ಸಲ್ಲಿಸಿದ ಅರ್ಹರು ಈಗ ಹಣ ಪಡೆಯಲು ಪುನಃ ದಾಖಲೆ ಸಲ್ಲಿಸಬೇಕಿದೆ.
ಏನೇನು ದಾಖಲೆ ಕಡ್ಡಾಯವಾಗಿ ನೀಡಬೇಕು?
2ನೇ ಹೆರಿಗೆ ಸಂದರ್ಭ ತ್ರಿವಳಿ ಜನನ ಹೊರತುಪಡಿಸಿ 2 ಮಕ್ಕಳಿದ್ದರೆ ಮಾತ್ರ ಯೋಜನೆಯಡಿ ನೆರವು ಸಿಗುತ್ತದೆ. ಶಾಶ್ವತ ಕುಟುಂಬ ನಿಯಂತ್ರಣ ಯೋಜನೆಯಡಿ ತಾಯಿ ಆಪರೇಷನ್‌ ಕಾರ್ಡ್‌, ಬಿಪಿಎಲ್‌ ಕಾರ್ಡ್‌ ಸೇರಿದಂತೆ ಅನೇಕ ದಾಖಲೆ ಸಲ್ಲಿಸುವುದು ಕಡ್ಡಾಯವಾಗಿದೆ. 8ನೇ ತರಗತಿ ವ್ಯಾಸಂಗ ಮಾಡಿರಲೇಬೇಕು. ವಿಶೇಷಚೇತನ ಹೆಣ್ಣು ಮಕ್ಕಳು 1ರಿಂದ 5ನೇ ತರಗತಿವರೆಗೆ ವ್ಯಾಸಂಗ ಮಾಡಬೇಕು. ಈ ಬಗ್ಗೆ ಶಾಲೆಯ ಮುಖ್ಯಶಿಕ್ಷಕರಿಂದ ಪ್ರಮಾಣ ಪತ್ರ ಪಡೆದು ಸಲ್ಲಿಸಬೇಕು. ತೀವ್ರ ತರಹ ವಿಶೇಷಚೇತನ ಹೆಣ್ಣು ಮಕ್ಕಳ ಕುರಿತಂತೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಉಪನಿರ್ದೇಶಕರು ವಾಸ್ತವ ವರದಿ ಸಲ್ಲಿಸಬೇಕು. ಸರಕಾರಿ ನೌಕರಿ ದೊರೆತ ಹೆಣ್ಣು ಮಕ್ಕಳಿಗೆ ಭಾಗ್ಯಲಕ್ಷ್ಮೀ ಯೋಜನೆಯ ಆರ್ಥಿಕ ನೆರವು ಸಿಗುವುದಿಲ್ಲ. ಹೀಗೆ ಅನೇಕ ಷರತ್ತುಗಳನ್ನು ಸರಕಾರ ಈಗ ವಿಧಿಸಿದ್ದು, ಅರ್ಜಿಯೊಂದಿಗೆ ಹಿಂದೆ ಸಲ್ಲಿಸಿದ ದಾಖಲೆಗಳನ್ನು ಪುನಃ ಸಲ್ಲಿಸುವ ಅನಿವಾರ್ಯತೆ ಪೋಷಕರಿಗೆ ಎದುರಾಗಿದೆ. ಭಾಗ್ಯಲಕ್ಷ್ಮೀ ಯೋಜನೆ ಅನುಷ್ಠಾನ ಸಂಬಂಧ ಸರಕಾರ ಸುಮಾರು 13 ಬಾರಿ ತಿದ್ದುಪಡಿ ಆದೇಶಗಳನ್ನು ಮಾಡಿದೆ. ಷರತ್ತುಗಳ ಅನ್ವಯ ದಾಖಲೆಗಳನ್ನು ಪುನಃ ಒಟ್ಟುಗೂಡಿಸುವುದು ಫಲಾನುಭವಿಗಳ ಕುಟುಂಬಗಳನ್ನು ಪ್ರಸ್ತುತ ಅವಧಿಯಲ್ಲಿ ತಲೆಕೆಡಿಸುವಂತೆ ಮಾಡಿದೆ.
2006 ಏಪ್ರಿಲ್‌ 1ರಿಂದ 2008 ಜುಲೈ 31ರ ವರೆಗೆ ನಿಯಮಾವಳಿ ಅನ್ವಯ ಯೋಜನೆಯ ಪ್ರಥಮ ಹಂತದಲ್ಲಿ ರಾಜ್ಯದಲ್ಲಿ ಒಟ್ಟು 6,47,953 ಹೆಣ್ಣು ಮಕ್ಕಳ ಹೆಸರಲ್ಲಿ ತಲಾ 10 ಸಾವಿರ ರೂ. ಮೌಲ್ಯದ ಠೇವಣಿ ಹಣವನ್ನು ಸರಕಾರ ಭಾರತೀಯ ಜೀವವಿಮಾ ನಿಗಮದಲ್ಲಿ ಹೂಡಿಕೆ ಮಾಡಿದೆ. 2024 ಏಪ್ರಿಲ್‌ ನಂತರ ಈ ಹೆಣ್ಣು ಮಕ್ಕಳಿಗೆ ನಿಗಮ ತಲಾ 50 ಸಾವಿರ ರೂ. ಪರಿಪಕ್ವ ಮೊತ್ತವನ್ನು ವಿತರಿಸುವ ಜವಾಬ್ದಾರಿ ಹೊಂದಿದೆ. ಸರಕಾರ ಈಗ ಹಣ ಪಾವತಿ ಸಂಬಂಧ ಸಲ್ಲಿಸಬೇಕಾದ ದಾಖಲೆಗಳ ಕುರಿತಂತೆ 2024 ಮಾರ್ಚ್ 22ರಂದು ಉಲ್ಲೇಖಿತ ಅಂಶಗಳ ಆದೇಶ ಹೊರಡಿಸಿದೆ. ಇದನ್ನು ಕೆಲವು ಕುಟುಂಬಗಳಿಗೆ ಪಾಲಿಸುವುದು ಬಹಳ ಕಷ್ಟಕರವಾಗಿದೆ. ಅನೇಕ ಫಲಾನುಭವಿ ಕುಟುಂಬಗಳು ಶಾಶ್ವತ ಕುಟುಂಬ ಯೋಜನೆ ಆಪರೇಷನ್‌ ಕಾರ್ಡ್‌ ಕಳೆದುಕೊಂಡಿದ್ದಾರೆ. ಯೋಜನೆಯಡಿ ಅರ್ಜಿ ಸಲ್ಲಿಸುವ ಸಂದರ್ಭ ಬಿಪಿಎಲ್‌ ಕಾರ್ಡ್‌ ಹೊಂದಿದ್ದು, ಈಗ ಎಪಿಎಲ್‌ ಕಾರ್ಡ್‌ ಪಡೆದ ಕುಟುಂಬಗಳು ಇವೆ. ಜೀವವಿಮಾ ಪಾಲಿಸಿ ಬಾಂಡ್ ಕಳೆದುಕೊಂಡಿವೆ. ವಿಮಾ ಬಾಂಡ್ ಕಳೆದುಕೊಂಡರೆ ಪೊಲೀಸ್‌ ದೂರು ನೀಡಿ ಎಫ್‌ಐಆರ್‌ ಪ್ರತಿ ನೀಡಲು ಸರಕಾರ ಸೂಚಿಸಿದೆ. ಆದರೆ, ಶಾಶ್ವತ ಕುಟುಂಬ ಯೋಜನೆಯಡಿ ತಾಯಿ ಆಪರೇಷನ್‌ ಕಾರ್ಡ್‌ ಕಳೆದುಕೊಂಡರೆ ಪಾಲಿಸಬೇಕಾದ ಕ್ರಮದ ಕುರಿತು ಸೂಚನೆ ನೀಡಿಲ್ಲ.
ಭಾಗ್ಯಲಕ್ಷ್ಮೀ ಯೋಜನೆ ಬಾಂಡ್ ಪರಿಪಕ್ವಗೊಂಡ ಕುರಿತಂತೆ ಅನೇಕ ಫಲಾನುಭವಿಗಳ ಕುಟುಂಬಕ್ಕೆ ಇನ್ನೂ ಗೊತ್ತಿಲ್ಲ. ಗೊತ್ತಿರುವ ಕುಟುಂಬಗಳು ದಾಖಲೆಗಳನ್ನು ಸಲ್ಲಿಸಲು ಕಚೇರಿ ಅಲೆಯುತ್ತಿವೆ. ತಂದೆ, ತಾಯಿ ಇಬ್ಬರು ಮೃತಪಟ್ಟ ಕುಟುಂಬಗಳ ಹೆಣ್ಣು ಮಕ್ಕಳ ಪರಿಸ್ಥಿತಿಯಂತೂ ಹೇಳತೀರದಾಗಿದೆ. ಭಾಗ್ಯಲಕ್ಷ್ಮೀ ಯೋಜನೆಯ ಪರಿಪಕ್ವ ಬಾಂಡ್‌ಗಳ ಕುರಿತಂತೆ ಇರುವ ಗೊಂದಲ ಬಗೆಹರಿಸಲು ಸರಕಾರ ಗಂಭೀರವಾಗಿ ಗಮನಿಸಬೇಕಿದ್ದು, ಯೋಜನೆ ಇನ್ನಷ್ಟು ಸರಳ ಮಾರ್ಗದಲ್ಲಿ ಅನುಷ್ಠಾನ ಮಾಡಬೇಕಾದ ಅನಿವಾರ್ಯತೆ ಇದೆ.
