ಕನ್ನಡ ಪುಸ್ತಕ ಲೋಕಕ್ಕೆ ಕ್ರಿಯೇಟಿವ್ ಪುಸ್ತಕ ಮನೆಯ 15 ಪುಸ್ತಕ ಬಿಡುಗಡೆ
– ಪುಸ್ತಕ ಬಿಡುಗಡೆ ಮಾಡಿ ಬೆಸ್ಟ್ ಆಫ್ ಲಕ್ ಹೇಳಿದ ಜೋಗಿ!
– ಪುಸ್ತಕ ಪ್ರಕಟಣೆ ಸಾಹಸ ಮಾಡಿದ ರಾಜ್ಯದ ಮೊದಲ ಶಿಕ್ಷಣ ಸಂಸ್ಥೆ
NAMMUR EXPRESS NEWS
ಕಾರ್ಕಳ: ಕ್ರಿಯೇಟಿವ್ ಪುಸ್ತಕ ಮನೆ ಪ್ರಕಾಶನದ ವತಿಯಿಂದ ನಾಡಿನ ಹೆಸರಾಂತ ಸಾಹಿತಿಗಳ 15 ಪುಸ್ತಕಗಳನ್ನು ಖ್ಯಾತ ಬರಹಗಾರ ಜೋಗಿ ನಾಮಾಂಕಿತ ಗಿರೀಶ್ ರಾವ್ ಹತ್ವಾರ್ ರವರ ಅಮೃತ ಹಸ್ತದಿಂದ
ಬಿಡುಗಡೆಗೊಳಿಸಲಾಯಿತು. ಈ ಮೂಲಕ ರಾಜ್ಯ ಪುಸ್ತಕ ಹಾಗೂ ಸಾಹಿತ್ಯ ಲೋಕಕ್ಕೆ ಪುಸ್ತಕ ಮನೆ ತನ್ನ ವಿಶೇಷ ಕೊಡುಗೆ ನೀಡುವ ಕಾರ್ಯಕ್ರಮಕ್ಕೆ ಕಾರ್ಕಳದ ಕ್ರಿಯೇಟಿವ್ ಕಾಲೇಜು ಸಾಕ್ಷಿಯಾಯಿತು.
ಪುಸ್ತಕ ಬಿಡುಗಡೆ ಮಾಡಿ ಬೆಸ್ಟ್ ಆಫ್ ಲಕ್ ಹೇಳಿದ ಜೋಗಿ!
15 ಲೇಖಕರ ಪುಸ್ತಕ ಬಿಡುಗಡೆ ಮಾಡಿ ತಮ್ಮ ಪುಸ್ತಕ ಪಯಣದ ಜತೆಗೆ ಕ್ರಿಯೇಟಿವ್ ಪುಸ್ತಕ ಮನೆಯ ಈ ಸೇವೆ ಬಗ್ಗೆ ಜೋಗಿ ಬಣ್ಣಿಸಿದರು. ಅಲ್ಲದೆ ರಾಜ್ಯದಲ್ಲೇ ಮೊದಲ ಶಿಕ್ಷಣ ಸಂಸ್ಥೆ ಇಂತಹ ಮಾದರಿ ಕಾರ್ಯಕ್ರಮ ಮಾಡಿದೆ. ಪುಸ್ತಕ ಮನೆಯ ಎಲ್ಲಾ ಸಂಸ್ಥಾಪಕರಿಗೆ ಧನ್ಯವಾದ ಅರ್ಪಿಸಿದರು.
ಶಿಕ್ಷಣವು ಮನುಷ್ಯನ ಜೀವನಕ್ಕೆ ಸಂಪಾದನೆಯ ದಾರಿ ತೋರಿಸಿದರೆ, ಸಾಹಿತ್ಯವು ಆತನನ್ನು ಪರಿಪೂರ್ಣ ಮನುಷ್ಯನನ್ನಾಗಿ ರೂಪಿಸುತ್ತದೆ. ಪುಸ್ತಕಗಳಿಂದ ಜೀವನದ ಪಥವನ್ನು ಬದಲಿಸಲು ಹಾಗೂ ಭಾವ ಜಗತ್ತನ್ನು ವಿಸ್ತರಿಸಲು ಸಾಧ್ಯವಿದೆ. ಹಿಂದಿನ ಕಾಲದಲ್ಲಿ ಅನ್ನದ ಹಸಿವಿತ್ತು. ನಂತರ ಸಮಾನತೆ ಬಳಿಕ ಜ್ಞಾನದ ಹಸಿವು ಆರಂಭವಾಯಿತು. ಆದರೆ ಇಂದಿನ ಕಾಲದಲ್ಲಿ ತಂತ್ರಜ್ಞಾನ ಹಸಿವು ಯುವ ಸಮುದಾಯವನ್ನು ಕಾಡುತ್ತಿದೆ. ಸಾಹಿತ್ಯ ಕೂಡ ತಂತ್ರಜ್ಞಾನಕ್ಕೆ ಹೊಂದಿಕೊಂಡು ಓದುಗರ ಸಂಖ್ಯೆ ಹೆಚ್ಚಿಸಿದೆ. ಪಠ್ಯ ಪುಸ್ತಕಗಳ ಜೊತೆ ಸಾಹಿತ್ಯದ ಓದಿಗೂ ಅವಕಾಶ ನೀಡುತ್ತಿರುವ ಕ್ರಿಯೇಟಿವ್ ಕಾಲೇಜು ಸಂಸ್ಥಾಪಕರು ಅಭಿನಂದನಾರ್ಹರು ಎಂದು ಜೋಗಿ ಹೇಳಿದರು, ಜೋಗಿ ಅವರನ್ನು ಸನ್ಮಾನಿಸಲಾಯಿತು.ಮುಖ್ಯ ಅತಿಥಿ ಕಾರ್ಕಳ ಶಾಸಕ ಸುನಿಲ್ ಕುಮಾರ್, ಪುಸ್ತಕಮನೆಯ ಪರಿಕಲ್ಪನೆಯೊಂದಿಗೆ ಕ್ರಿಯೇಟಿವ್ ಕಾಲೇಜು ಶಿಕ್ಷಣದೊಂದಿಗೆ ಸಾಹಿತ್ಯ ಬೆಳವಣಿಗೆಗೆ ಪ್ರೇರಣೆಯಾಗಿದೆ ಎಂದರು.
ಇನ್ನೊಬ್ಬ ಮುಖ್ಯ ಅತಿಥಿ ಕಾರ್ಕಳ ಕ.ಸಾ.ಪ ಅಧ್ಯಕ್ಷ ಕೊಂಡಳ್ಳಿ ಪ್ರಭಾಕರ ಶೆಟ್ಟಿ, ಸೃಜನಶೀಲತೆ, ಹೃದಯ ಶ್ರೀಮಂತಿಕೆಯನ್ನು ಹೆಚ್ಚಿಸಲು ಸಾಹಿತ್ಯ ಪುಸ್ತಕಗಳು ಸಹಕಾರಿಯಾಗಿವೆ ಎಂದರು. ಕ್ರಿಯೇಟಿವ್ ಕಾಲೇಜಿನ ಸಂಸ್ಥಾಪಕ ಅಶ್ವಥ್ ಎಸ್.ಎಲ್. ಸ್ವಾಗತಿಸಿ, ಪ್ರಾಸ್ತಾವಿಕ ಮಾತುಗಳನ್ನಾಡಿ, ಪುಸ್ತಕ ಮನೆಯು ಮೊಬೈಲ್ ಬಿಡಿ, ಪುಸ್ತಕ ಹಿಡಿ ಯೋಜನೆಯಲ್ಲಿ ದಾನಿಗಳ ಸಹಾಯದಿಂದ ಗ್ರಾಮೀಣ ಶಾಲಾ ವಿದ್ಯಾರ್ಥಿಗಳಿಗೆ ಸಾಹಿತ್ಯ ಪುಸ್ತಕಗಳನ್ನು ಹಂಚಿ ಸಾಹಿತ್ಯದ ಬೆಳವಣಿಗೆಗೆ ಪ್ರೇರಣೆ ನೀಡುವ ಕೆಲಸ ಮಾಡುತ್ತಿದೆ ಎಂದರು. ಕಾಲೇಜು ಸಂಸ್ಥಾಪಕರಾದ ವಿದ್ವಾನ್ ಗಣಪತಿ ಭಟ್, ಡಾ. ಗಣನಾಥ ಶೆಟ್ಟಿ, ಅಮೃತ್ ರೈ, ಆದರ್ಶ ಎಂ.ಕೆ., ವಿಮಲ್ ರಾಜ್ ಜಿ. ಗಣಪತಿ ಭಟ್ ಕೆ.ಎಸ್. ಉಪಸ್ಥಿತರಿದ್ದರು. ಉಪನ್ಯಾಸಕರಾದ ಲೋಹಿತ್ ಎಸ್.ಕೆ. ಮತ್ತು ಪ್ರಿಯಾ ನಿರೂಪಿಸಿದರು.
15 ಪುಸ್ತಕಗಳ ಲೇಖಕರಿಗೆ ಸನ್ಮಾನ!
ಲೇಖಕರಾದ ನರೇಂದ್ರ ಪೈಯವರ ‘ಸಾವಿರದೊಂದು ಪುಸ್ತಕ’, ಯಶೋದಾ ಮೋಹನ್ ಅವರ ‘ಇಳಿ ಹಗಲಿನ ತೇವಗಳು’, ಸುಧಾ ನಾಗೇಶ್ ಅವರ ‘ಹೊಂಬೆಳಕು’, ವಾಣಿರಾಜ್‌ ರವರ ‘ಸವಿನೆನಪುಗಳ ಹಂದರ’, ಡಾ. ಸುಬ್ರಹ್ಮಣ್ಯ ಸಿ. ಕುಂದೂರು ಅವರ ‘ಜೀವನಯಾನ’, ಅನುಬೆಳ್ಳೆ ಅವರ ‘ನಗುವ ನಯನ ಮಧುರ ಮೌನ’, ರಾಮಕೃಷ್ಣ ಹೆಗಡೆಯವರ ‘ಒಲವಧಾರೆ’, ಲಕ್ಷ್ಮಣ ಬಜಿಲರ ‘ನಿರ್ವಾಣ”, ಅಶ್ವತ್ಥ ಎಸ್.ಎಲ್.ರ ‘ಅರಿವಿನ ದಾರಿ’, ರಾಜೇಂದ್ರ ಭಟ್‌ರ ‘ರಾಜಪಥ’, ಕೊಂಡಳ್ಳಿ ಪ್ರಭಾಕರ ಶೆಟ್ಟಿಯವರ ‘ಸಾರ್ಥಕ ಜೀವನಕ್ಕೆ ಕಗ್ಗೋಪದೇಶ’, ಲಲಿತಾ ಮುದ್ರಾಡಿಯವರ ‘ಅರ್ಥವಾಗದವರು’, ದಿಗಂತ್ ಬಿಂಬೈಲ್‌ರ ‘ಕೊಂದ್ ಪಾಪ ತಿಂದ್ ಪರಿಹಾರ’, ಡಾ.ರಾಜಶೇಖರ್‌ಹಳೆಮನೆ ಯವರ ‘ಒಡಲುಗೊಂಡವರು’, ಮಹೇಶ್ ಪುತ್ತೂರು ಬರೆದ ‘ವರ್ಣ ಪುಸ್ತಕಗಳು’ ಬಿಡುಗಡೆ ಮಾಡಲಾಯಿತು. ಹಾಗೆಯೇ ಲೇಖಕರಿಗೆ ಸನ್ಮಾನ ಮಾಡಲಾಯಿತು.
