BREAKING NEWS
ಕೊಪ್ಪದ ಜಯಪುರದಲ್ಲಿ ನಕ್ಸಲ್ ಗ್ಯಾಂಗ್ ಪತ್ತೆ!?
– ಜಯಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಗನ್, ಮದ್ದುಗುಂಡು ವಶ
– ಮುಂಡಗಾರು ಲತಾ, ಜಯಣ್ಣ ತಂಡ ಅಡಗಿರುವ ಶಂಕೆ
NAMMUR EXPRESS NEWS
ಕೊಪ್ಪ: ನಕ್ಸಲ್ ನಿಗ್ರಹ ದಳದ ಅಧಿಕಾರಿಯೊಬ್ಬರು ನೀಡಿದ ದೂರಿನ ಮೇರೆಗೆ ಜಯಪುರ ಪೊಲೀಸ್ ಠಾಣಾ ವ್ಯಾಪ್ತಿಯ ಕಡೇಗುಂದಿ ಗ್ರಾಮದ ಅರಣ್ಯ ವ್ಯಾಪ್ತಿಯ ಸುಬ್ಬಗೌಡ ಎಂಬುವರ ಒಂಟಿಮನೆಯಲ್ಲಿ ನಕ್ಸಲರಾದ ಮುಂಡಗಾರು ಲತಾ, ಜಯಣ್ಣ ಹಾಗೂ ಇತರರ ಅನುಮಾನಾಸ್ಪದ ಚಲನವಲನ ಕಂಡುಬಂದ ಮೇರೆಗೆ ಪಿರ್ಯಾದುದಾರರು ನೀಡಿದ ದೂರಿನನ್ವಯ ಜಯಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಲಾಗಿದೆ.ಪೊಲೀಸ್ ಉಪಾಧೀಕ್ಷಕರು ಕೊಪ್ಪ ಉಪ ವಿಭಾಗ ಪ್ರಕರಣದ ತನಿಖೆಯನ್ನು ಕೈಗೊಂಡಿದ್ದಾರೆ. ಈ ಸಂಬಂಧ ನಕ್ಸಲರು ಪರಾರಿಯಾಗಿ ಹೋಗಿದ್ದ ಸ್ಥಳದಲ್ಲಿ ದೊರೆತ ಮೂರು ಎಸ್ ಬಿ ಎಂ ಎಲ್ ಬಂದೂಕುಗಳು ಹಾಗೂ ಅದಕ್ಕೆ ಸಂಬಂದಿಸಿದ ಮದ್ದು ಗುಂಡುಗಳನ್ನು ವಶಪಡಿಸಿಕೊಂಡು ಮುಂದಿನ ಕಾನೂನುಪ್ರಕ್ರಿಯೆ ಕೈಗೊಳ್ಳಲಾಗಿದೆ. ದೂರುದಾರರ ಖಚಿತ ಮಾಹಿತಿಯ ಮೇರೆಗೆ ಘಟನೆ ನಡೆದ ಸ್ಥಳವಾದ ಕಡೆಗುಂದಿ ಗ್ರಾಮದ ಸುಬ್ಬೆಗೌಡರ ಮನೆಯ ವ್ಯಾಪ್ತಿಯ ಪ್ರದೇಶದಲ್ಲಿ ಪರಾರಿಯಾಗಿರುವ ನಕ್ಸಲರಾದ ಮುಂಡಗಾರು ಲತಾ, ಜಯಣ್ಣ ಹಾಗೂ ಇನ್ನಿತರರ ಬಂಧನಕ್ಕಾಗಿ ನಕ್ಸಲ್ ನಿಗ್ರಹದಳದ ವಿಶೇಷ ತಂಡದಿಂದ ತೀವ್ರ ಶೋಧಕಾರ್ಯ ಹಮ್ಮಿಕೊಳ್ಳಲಾಗಿದೆ. ಸದರಿ ಕಾರ್ಯಾಚರಣೆಗೆ ಸ್ಥಳೀಯ ಪೊಲೀಸರು ಸಹಕಾರ ನೀಡಿದ್ದಾರೆ. ಈ ಮೂಲಕ ಮಲೆನಾಡು ಮತ್ತೆ ನಕ್ಸಲ್ ತಾಣವಾಗುವ ಅಪಾಯ ಎದುರಾಗಿದೆ. ಇತ್ತೀಚಿಗೆ ಕಾರ್ಕಳದ ಈದು ಪರಿಸರದಲ್ಲಿ ಪತ್ತೆಯಾಗಿದ್ದ ನಕ್ಸಲ್ ತಂಡ ಶೃಂಗೇರಿ ತಾಲೂಕಿನಲ್ಲಿ ಪತ್ತೆಯಾಗಿತ್ತು. ಇದೀಗ ಕೊಪ್ಪ ತಾಲೂಕಿನಲ್ಲಿ ಪತ್ತೆಯಾಗಿದೆ.
