ಅಡಿಕೆ ಬೆಲೆ ದಾಖಲೆ: ಹಸಿ ಕಾಯಿಗೂ ಡಿಮ್ಯಾಂಡ್!
– ಎಲೆಚುಕ್ಕಿ ರೋಗ, ಕೊಳೆ ರೋಗದಿಂದ ಬೆಲೆ ಏರಿಕೆ
– ಹಸಿ ಕಾಯಿ ಕೊಳ್ಳೋಕೆ ಚೇಣಿದಾರರ ಕ್ಯೂ!
NAMMUR EXPRESS NEWS
ಶಿವಮೊಗ್ಗ/ ದಾವಣಗೆರೆ / ಉಡುಪಿ: ಈ ವರ್ಷ ಸರಕು ಅಡಿಕೆ ಬೆಲೆಯು ದಾಖಲೆ ಮಟ್ಟಕ್ಕೆ ಏರಿಕೆಯಾಗಿದೆ. ಶಿವಮೊಗ್ಗ ಎಪಿಎಂಸಿಯಲ್ಲಿ ಸರಕು (ಹಸ) ಅಡಿಕೆ ದರ ಕ್ವಿಂಟಲ್ಗೆ ₹ 99,999, ಬೆಟ್ಟೆ ಕ್ವಿಂಟಲ್ಗೆ ₹ 77,770 ಹಾಗೂ ರಾಶಿ ಅಡಿಕೆ ಕ್ವಿಂಟಲ್ಗೆ ₹ 66,899ಕ್ಕೆ ಮಾರಾಟವಾಗಿದೆ. ಮೇ 13ರಂದು ಸರಕು ಅಡಿಕೆ ಕ್ವಿಂಟಲ್ಗೆ ₹ 98,896 ದಾಖಲೆಯ ಮೊತ್ತಕ್ಕೆ ಮಾರಾಟವಾಗಿತ್ತು. ಇನ್ನು ರಾಶಿ ಕೂಡ ಸರಾಸರಿ 65 ಸಾವಿರ ದಾಟಿದೆ. ಇದು ಅಡಿಕೆಗೆ ಉತ್ತಮ ಬೆಲೆ. ಈಗ ಮಲೆನಾಡು, ಕರಾವಳಿ, ಮಧ್ಯ ಕರ್ನಾಟಕ ಭಾಗದಲ್ಲಿ ಅಡಿಕೆ ಈಗ ರೈತರ ಕೈ ಹಿಡಿದಿದೆ.
ಹಸಿ ಅಡಿಕೆಗೂ ಭರ್ಜರಿ ಬೆಲೆ
ಮಾರುಕಟ್ಟೆಯಲ್ಲಿ ಬೆಲೆ ಹೆಚ್ಚಳದ ಕಾರಣ ಚೇಣಿದಾರರು ಬೆಳೆಗಾರರ ಮನೆ ಬಾಗಿಲಿಗೆ ಬಂದು ಹಸಿ ಅಡಿಕೆ ಖರೀದಿ ಮಾಡುತ್ತಿದ್ದಾರೆ. ಹಸಿ ಅಡಿಕೆ ಭದ್ರಾವತಿ ತಾಲ್ಲೂಕಿನ ಹೊಳೆಹೊನ್ನೂರಿನಲ್ಲಿ ಕ್ವಿಂಟಲ್ಗೆ ₹ 7,500, ಚಿತ್ರದುರ್ಗ ಜಿಲ್ಲೆಯ ಭೀಮಸಮುದ್ರ ಮಾರುಕಟ್ಟೆಯಲ್ಲಿ ಕ್ವಿಂಟಲ್ಗೆ ₹ 8,500 ಹಾಗೂ ದಾವಣಗೆರೆಯಲ್ಲಿ ಕ್ವಿಂಟಲ್ಗೆ ₹ 8,300ಕ್ಕೆ ಮಾರಾಟವಾಗಿದೆ. ಮಲೆನಾಡು ಭಾಗದ ತೀರ್ಥಹಳ್ಳಿ, ಕೊಪ್ಪ, ಹೊಸನಗರ ಕಡೆ 8500/- ಇದೆ.
ದೀಪಾವಳಿ ಸಂದರ್ಭದಲ್ಲಿ ಗುಟ್ಕಾ, ಪಾನ್ ಮಸಾಲ ಕಂಪನಿಯವರು ಉತ್ಪಾದನೆ ಹೆಚ್ಚಿಸುತ್ತಾರೆ. ಇದರಿಂದ ಅಡಿಕೆಗೆ ಬೇಡಿಕೆ ಹೆಚ್ಚಾಗಿದೆ. ಈಗ ಬೆಳೆಗಾರರ ಬಳಿ ಹಳೆಯ ಅಡಿಕೆ ದಾಸ್ತಾನು ಇಲ್ಲ. ವಿಪರೀತ ಮಳೆಯಿಂದ ಬಯಲು ಸೀಮೆಯಲ್ಲಿ ಶೇ 30ರಷ್ಟು ಹಾಗೂ ಮಲೆನಾಡಿನಲ್ಲಿ ಶೇ 50ರಷ್ಟು ಇಳುವರಿ ಕಡಿಮೆಯಾಗಿದೆ. ಬೇಡಿಕೆಯಷ್ಟು ಅಡಿಕೆ ಸಿಗದ ಕಾರಣ ಬೆಲೆ ಸಹಜವಾಗಿ ಹೆಚ್ಚಳವಾಗಿದೆ.
ಅಡಿಕೆ ಬೆಲೆ ಇದೆ ಇರುತ್ತೆ ಅನ್ನೋದು ಡೌಟು!
ಅಡಿಕೆ ಫಸಲು ಕಡಿಮೆ ಇದೆ. ಜತೆಗೆ ಇನ್ನು ಹೊಸ ಅಡಿಕೆ ಮಾರುಕಟ್ಟೆಗೆ ಬಂದಿಲ್ಲ. ಸತತವಾಗಿ ಸುರಿಯುತ್ತಿರುವ ಮಳೆ ಕಾರಣ ಇನ್ನು ಅಡಿಕೆ ಕೊಯ್ಲು ಶುರುವಾಗಿಲ್ಲ. ಆದ್ದರಿಂದ ಉತ್ತಮ ದರ ಇದೆ. ಮುಂದೆ ಇದೆ ದರ ಇರುತ್ತೆ ಅನ್ನೋದು ಡೌಟು.
