ಅಪೆಕ್ಸ್‌ ಬ್ಯಾಂಕ್‌ ಅಧ್ಯಕ್ಷ ಸ್ಥಾನ ‘ಕೈ’ವಶಕ್ಕೆ ತಂತ್ರ
* ಬ್ಯಾಂಕ್‌ನ ಹಾಲಿ ಅಧ್ಯಕ್ಷ ಬೆಳ್ಳಿ ಪ್ರಕಾಶ್‌ ವಿರುದ್ಧ ಅವಿಶ್ವಾಸ ನೋಟಿಸ್‌
* ಅಪೆಕ್ಸ್‌ ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕರಿಗೆ ನೋಟಿಸ್‌ ನೀಡಿದ ಎಸ್ ರವಿ, ಲಕ್ಷ್ಮಣ ಸವದಿ
* ಸೋದರ ಸಂಬಂಧಿ ಕರೆತರಲು ಡಿಕೆಶಿ ಪ್ರಯತ್ನ
NAMMUR EXPRESS NEWS
ಬೆಂಗಳೂರು:ಅಪೆಕ್ಸ್‌ ಬ್ಯಾಂಕ್‌ ಅಧ್ಯಕ್ಷಗಾದಿ ‘ಕೈ’ ವಶಕ್ಕೆ ಆಡಳಿತಾರೂಢ ಕಾಂಗ್ರೆಸ್‌ ಹೆಜ್ಜೆ ಇಟ್ಟಿದ್ದು, ಹಾಲಿ ಅಧ್ಯಕ್ಷ ಬೆಳ್ಳಿ ಪ್ರಕಾಶ್‌ ವಿರುದ್ಧ ಅವಿಶ್ವಾಸ ನೋಟಿಸ್‌ ನೀಡಲಾಗಿದೆ.
ಸಹಕಾರಿಗಳೂ ಆದ ಮೇಲ್ಮನೆ ಸದಸ್ಯ ಎಸ್.ರವಿ ಹಾಗೂ ಲಕ್ಷ್ಮಣ ಸವದಿ ಅವರು ಶನಿವಾರ ಅಪೆಕ್ಸ್‌ ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕರಿಗೆ ನೋಟಿಸ್‌ ನೀಡಿದ್ದಾರೆ. ಹಾಲಿ ಅಧ್ಯಕ್ಷರ ಅವಧಿ ಇನ್ನು ಸುಮಾರು 6 ತಿಂಗಳಷ್ಟೇ ಇದ್ದರೂ, ಬೆಳ್ಳಿ ಪ್ರಕಾಶ್‌ ಅವರನ್ನು ಬದಲಿಸಿ ಆಡಳಿತ ಪಕ್ಷದವರನ್ನು ಈ ಹುದ್ದೆಗೆ ತರುವ ಬಹುದಿನಗಳ ಯೊಚನೆಯಂತೆ ಈ ಪ್ರಯತ್ನ ಆರಂಭವಾಗಿದೆ.
ನೋಟಿಸ್‌ ಹಿನ್ನೆಲೆಯಲ್ಲಿ ಸದ್ಯದಲ್ಲೇ ನಿರ್ದೇಶಕರ ಮಂಡಳಿ ಸಭೆ ನಡೆಯಲಿದೆ, ಸಭೆಯಲ್ಲಿ ಅಧ್ಯಕ್ಷರು ಬಹುಮತ ಸಾಬೀತು ಪಡಿಸಬೇಕಾಗುತ್ತದೆ. ಆದರೆ, ಬಹುಮತ ಇಲ್ಲದ ಕಾರಣ ಅದಕ್ಕೆ ಮುನ್ನವೇ ಬೆಳ್ಳಿ ಪ್ರಕಾಶ್‌ ಅವರು ಹುದ್ದೆ ತೊರೆಯುತ್ತಾರಾ ಎಂಬುದು ಕುತೂಹಲ ಮೂಡಿಸಿದೆ.
* ನೋಟಿಸ್‌ ನೀಡಿರುವ ಬಗ್ಗೆ ಖಚಿತಪಡಿಸಿದ ಎಸ್.ರವಿ
”ಆಡಳಿತ ಪಕ್ಷದವರೇ ಕೆ.ಎಂ.ಎಫ್‌ ಮತ್ತು ಅಪೆಕ್ಸ್‌ ಬ್ಯಾಂಕ್‌ ಅಧ್ಯಕ್ಷರಾಗುವ ಸಂಪ್ರದಾಯವಿದ್ದು, ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದು 2 ವರ್ಷಗಳು ಕಳೆಯುತ್ತಿದ್ದರೂ ಬೆಳ್ಳಿ ಪ್ರಕಾಶ್‌ ಅವರು ನಾನಾ ನೆಪವೊಡ್ಡಿ ಅಧ್ಯಕ್ಷರಾಗಿ ಮುಂದುವರೆದಿದ್ದಾರೆ, ನಿರಂತರ ಅವ್ಯವಹಾರದಿಂದ ಬ್ಯಾಂಕ್‌ ಮುಚ್ಚುವ ಸ್ಥಿತಿ ತಲುಪಿದೆ. ಸರಕಾರದ ಮಧ್ಯಪ್ರವೇಶ ಮತ್ತು ನೆರವು ಅಪೇಕ್ಷಿತವಾಗಿದೆ. ಹಾಗಾಗಿ, ಹಾಲಿ ಅಧ್ಯಕ್ಷರ ವಿರುದ್ಧ ಅವಿಶ್ವಾಸ ನೋಟಿಸ್‌ ನೀಡಲಾಗಿದೆ,” ಎಂದು ಎಸ್.ರವಿ ತಿಳಿಸಿದರು.
* ಸೋದರ ಸಂಬಂಧಿ ಕರೆತರಲು ಡಿಕೆಶಿ ಪ್ರಯತ್ನ
ಅಪೆಕ್ಸ್‌ ಬ್ಯಾಂಕ್‌ ಅಧ್ಯಕ್ಷ ಸ್ಥಾನಕ್ಕೆ ಸೋದರ ಸಂಬಂಧಿ ಹಾಗೂ ಮೇಲ್ಮನೆ ಸದಸ್ಯ ಎಸ್.ರವಿ ಅವರನ್ನು ತರಲು ಡಿಸಿಎಂ ಡಿಕೆ ಶಿವಕುಮಾರ್‌ ಅವರು ಶತ ಪ್ರಯತ್ನ ನಡೆಸಿದ್ದಾರೆ. ಇದರ ಅಂಗವಾಗಿ ಈ ಹಿಂದೆ ಸಹಕಾರ ಸಚಿವ ಕೆ.ಎನ್‌ ರಾಜಣ್ಣ ಅವರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳುವ ಪ್ರಯತ್ನ ನಡೆಸಿದ್ದರು.
ವಿಧಾನಸಭೆಯಲ್ಲೇ ರಾಜಣ್ಣ ಅವರನ್ನು ಭೇಟಿ ಮಾಡಿ ಡಿ.ಕೆ.ಶಿ ಸುಮಾರು ಅರ್ಧ ತಾಸು ಮಾತುಕತೆ ನಡೆಸಿದ್ದರು. ರಾಜಣ್ಣ ಜತೆ ಲಕ್ಷ್ಮಣ ಸವದಿ ಅವರನ್ನೂ ಕರೆದು ಕೂರಿಸಿಕೊಂಡ ಶಿವಕುಮಾರ್‌ ಸುಮಾರು ಹೊತ್ತು ಗಂಭೀರ ಸಮಾಲೋಚನೆ ನಡೆಸಿದ್ದರು. ಇದೇ ಸವದಿ ಇದೀಗ ಅವಿಶ್ವಾಸ ನಿರ್ಣಯದ ನೋಟಿಸ್‌ ನೀಡಿದ್ದಾರೆ.
