Categories
ಉಡುಪಿ ಯಶಸ್ಸಿನ ಕಥೆಗಳು

ಆಳ್ವಾಸ್ ಪ್ರಗತಿ 2026: ಸೂಪರ್…ಸೂಪರ್…! – 20 ಸಾವಿರಕ್ಕೂ ಹೆಚ್ಚು ಉದ್ಯೋಗಾಂಕ್ಷಿಗಳ ಸಮಾಗಮ – 2000 ಸ್ವಯಂ ಸೇವಕರ ಸೇವೆ: ಅಚ್ಚುಕಟ್ಟು ಆಯೋಜನೆ – 350ಕ್ಕೂ ಹೆಚ್ಚು ಕಂಪನಿಗಳಿಂದ ನೇರ ಸಂದರ್ಶನ

ಮೂಡಬಿದರೆ: ವಿದ್ಯಾಕಾಶಿ ಮೂಡಬಿದಿರೆಯ ಆಳ್ವಾಸ್ ಕಾಲೇಜು ಕ್ಯಾಂಪಸ್ ಎರಡು ದಿನ ಸಾವಿರ ಸಾವಿರ ವಿದ್ಯಾರ್ಥಿಗಳ ಭವಿಷ್ಯಕ್ಕೆ ಹೊಸ ಬೆಳಕು ನೀಡಿತು.
ಆಳ್ವಾಸ್ ಪ್ರಗತಿ-2026ರಲ್ಲಿ 350ಕ್ಕೂ ಹೆಚ್ಚು ಕಂಪನಿಗಳು ಪಾಲ್ಗೊಂಡಿದ್ದು, 20,000ಕ್ಕೂ ಅಧಿಕ ಉದ್ಯೋಗಾವಕಾಶ ನೀಡಿದವು.
ಭೋರ್ಗರೆದು ಸುರಿವ ಮಳೆಯಲ್ಲೇ ಉದ್ಯೋಗಕ್ಕಾಗಿ ಸಾವಿರ ಸಾವಿರ ಯುವ ಜನರು ಕ್ಯೂ ಅಲ್ಲಿ ನಿಂತು ಸಂದರ್ಶನದಲ್ಲಿ ಭಾಗಿಯಾದರು.

20 ಸಾವಿರ ಯುವ ಜನರು ಭಾಗಿ!

ದೇಶ ವಿದೇಶ ರಾಜ್ಯದ 350ಕ್ಕೂ ಹೆಚ್ಚು ವಿವಿಧ ಕ್ಷೇತ್ರದ ಕಂಪನಿಗಳು ಆಗಮಿಸಿದ್ದವು. 2 ದಿನಗಳ ಕಾಲ ಸುಮಾರು 20 ಸಾವಿರ ವಿದ್ಯಾರ್ಥಿಗಳು ಉದ್ಯೋಗ ಮೇಳದಲ್ಲಿ ಭಾಗಿಯಾದರು. ಉದ್ಯೋಗ ಮೇಳದಲ್ಲಿ ಭಾಗವಹಿಸುವ ಅಭ್ಯರ್ಥಿಗಳಿಗಾಗಿ ಕರಾವಳಿ ಭಾಗದಾದ್ಯಂತ ಉಚಿತ ಬಸ್ ಸೇವೆಯನ್ನು ಸಹ ಕಲ್ಪಿಸಲಾಗಿತ್ತು. ಹಾಗೆಯೇ ಕರ್ನಾಟಕದ ವಿವಿಧ ಭಾಗದಿಂದ ಬಂದ ವಿದ್ಯಾರ್ಥಿಗಳಿಗೆ ಹಾಸ್ಟೆಲ್ ಸೌಲಭ್ಯ ಕೂಡ ನೀಡಲಾಗಿತ್ತು.

2000ಕ್ಕೂ ಹೆಚ್ಚು ಸ್ವಯಂ ಸೇವಕರು!

ಆಳ್ವಾಸ್ ಸಂಸ್ಥೆ ಅಂದರೆ ಅಲ್ಲಿ ಶಿಸ್ತು. ಅಚ್ಚುಕಟ್ಟು.. ಸುಮಾರು 2000 ಮಂದಿ ಸ್ವಯಂ ಸೇವಕರು ಈ ಉದ್ಯೋಗ ಮೇಳಕ್ಕೆ ಸಹಕಾರ ನೀಡಿದರು. ಉಪನ್ಯಾಸಕರು, ಸಿಬ್ಬಂದಿ, ಕಾಲೇಜು ವಿದ್ಯಾರ್ಥಿಗಳು ಶ್ರಮಿಸಿದರು.

ಉದ್ಯೋಗ ಮೇಳದ ಬಗ್ಗೆ ಡಾ.ಎಂ.ಮೋಹನ್ ಆಳ್ವಾ ಹೇಳಿದ್ದೇನು?

ಆಳ್ವಾಸ್ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷರಾದ ಡಾ.ಎಂ.ಮೋಹನ್ ಆಳ್ವಾ ಅವರು ಮಾತನಾಡಿ “ನಾವು ಯಾವುದೇ ರೀತಿಯ ಶುಲ್ಕವನ್ನು ನಿಗದಿಪಡಿಸದೆ, ಸಂಪೂರ್ಣ ಉಚಿತವಾಗಿ ಉದ್ಯೋಗ ಮೇಳವನ್ನು ಆಯೋಜಿಸಿದ್ದೇವೆ. ದೇಶದ ಇತರೆ ಶಿಕ್ಷಣ ಸಂಸ್ಥೆಗಳು ಇಂತಹ ಉದ್ಯೋಗ ಮೇಳಗಳನ್ನು ಆಯೋಜಿಸಿದರೆ ನಿರುದ್ಯೋಗ ಸಮಸ್ಯೆ ನಿವಾರಣೆಗೆ ದೊಡ್ಡ ಮಟ್ಟದ ನೆರವಾಗಲಿದೆ. ಹೀಗಾಗಿ ಪ್ರತಿ ವರ್ಷ ಸಾವಿರಾರು ಯುವಕರಿಗೆ ಉದ್ಯೋಗ ದೊರಕುವಂತೆ ನಮ್ಮ ಶಿಕ್ಷಣ ಸಂಸ್ಥೆಯು ನಿರಂತರವಾಗಿ ಪ್ರಯತ್ನಿಸುತ್ತಿದೆ ಎಂದರು.

ವಿವೇಕ್ ಆಳ್ವಾ ಉದ್ಯೋಗ ಮೇಳದ ರೂವಾರಿ!

ಆಳ್ವಾಸ್ ಶಿಕ್ಷಣ ಸಂಸ್ಥೆಯ ಮ್ಯಾನೇಜಿಂಗ್ ಟ್ರಸ್ಟಿ ವಿವೇಕ್ ಆಳ್ವಾ ಕಳೆದ 3 ತಿಂಗಳಿಂದ ಈ ಆಳ್ವಾಸ್ ಪ್ರಗತಿ -2026ಕ್ಕಾಗಿ ಶ್ರಮಿಸುತ್ತಿದ್ದಾರೆ. ರಾಜ್ಯದ ಕಾರ್ಪೋರೇಟ್ ಕಂಪನಿಗಳ ಜತೆ ಎಲ್ಲಾ ಕ್ಷೇತ್ರದ 350ಕ್ಕೂ ಹೆಚ್ಚು ಕಂಪನಿ ಕರೆ ತರುವಲ್ಲಿ ಯಶಸ್ಸು ಗಳಿಸಿದ್ದಾರೆ. ಖುದ್ದು ಎಲ್ಲಾ ವ್ಯವಸ್ಥೆ ಮಾಡುವ ಜತೆಗೆ ವಿದ್ಯಾರ್ಥಿಗಳಿಗೆ ಅವರೇ ಮಾಹಿತಿ ಕೂಡ ನೀಡಿದ್ದಾರೆ. ಆಳ್ವಾಸ್ ಪ್ರಗತಿ -2026ಕ್ಕೆ ಆಗಮಿಸಿದ ಕಂಪನಿಗಳ ಮುಖ್ಯಸ್ಥರು, ಎಲ್ಲಾ ಸಿಬ್ಬಂದಿ, ಸ್ವಯಂ ಸೇವಕರು, ಸಹಕಾರ ಸರ್ವರಿಗೂ ವಿವೇಕ್ ಆಳ್ವಾ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ.

ಉದ್ಯೋಗ ಮೇಳದಲ್ಲಿ ಉದ್ಯೋಗದಾತರಿಗೆ ಸನ್ಮಾನ!

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವರಾದ ಯು.ಟಿ.ಖಾದರ್ ಅವರು ವಿದ್ಯಾಗಿರಿಯ ಡಾ.ವಿ.ಎಸ್.ಆಚಾರ್ಯ ಸಭಾಂಗಣದಲ್ಲಿ ನಡೆದ ಆಳ್ವಾಸ್ ಪ್ರಗತಿ- 2026ಕ್ಕೆ ಚಾಲನೆ ನೀಡಿದರು.
ಉದ್ಯೋಗ ಮತ್ತು ಕೈಗಾರಿಕಾ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡಿದ ಶ್ರೀಕ್ಷೇತ್ರ ಧರ್ಮಸ್ಥಳ ಸಿರಿ ಗ್ರಾಮೋದ್ಯೋಗ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕರಾದ ಕೆ.ಎನ್.ಜನಾರ್ಧನ್, ಎಂಆರ್ ಜಿ ಗ್ರೂಪ್ ನ ಡಾ.ಕೆ.ಪ್ರಕಾಶ್ ಶೆಟ್ಟಿ, ಭವಾನಿ ಶಿಫ್ಟಿಂಗ್ ಗ್ರೂಪ್ ನ ಕುಸುಮೋದರ ಡಿ.ಶೆಟ್ಟಿ, ಪ್ರೊವಿಟ್ ಫುಡ್ಸ್ ಪ್ರೈವೇಟ್ ಲಿಮಿಟೆಡ್ ನ ವಿನ್ಸೆಂಟ್ ಕುಟಿನ್ಹ ಮತ್ತು ಎಕ್ಸ್ ಪರ್ಟೈಸ್ ಕಾಂಟ್ರಾಕ್ಟಿಂಗ್ ಕಂಪನಿಯ ಮೊಹಮ್ಮದ್ ಅಶ್ಫಾಕ್ ಅವರನ್ನು ಸನ್ಮಾನಿಸಿ ಗೌರವಿಸಲಾಯಿತು. ದಕ್ಷಿಣ ಕನ್ನಡ ಸಂಸದ ಬ್ರಿಜೇಶ್ ಚೌಟ, ಶಾಸಕ ಉಮಾನಾಥ್ ಎ ಕೊಟ್ಯಾನ್, ಮಾಜಿ ಸಚಿವ ಅಭಯ ಚಂದ್ರ ಜೈನ್, ಶಾಸಕ ಹರೀಶ್ ಪೂಂಜಾ, ಎಸ್ ಡಿಎಂ ಶಿಕ್ಷಣ ಸಂಸ್ಥೆಗಳ ಹಾಸ್ಟೆಲ್ ಹಾಗೂ ಐಟಿ ವಿಭಾಗದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಪೂರಣ್ ವರ್ಮಾ, ಭಾರತ ಸ್ಕೌಟ್ಸ್ ಮತ್ತು ಗೈಡ್ಸ್ ರಾಜ್ಯ ಮುಖ್ಯ ಆಯುಕ್ತ ಪಿಜಿಆರ್ ಸಿಂಧಿಯಾ, ಆಳ್ವಾಸ್ ಶಿಕ್ಷಣ ಸಂಸ್ಥೆಯ ಮುಖ್ಯಸ್ಥರಾದ ವಿವೇಕ್ ಆಳ್ವಾ ಮೊದಲಾದವರು ಉಪಸ್ಥಿತರಿದ್ದರು

Categories
inspiration ಚಿಕ್ಕಮಗಳೂರು ಮಲ್ನಾಡ್ ಯಶಸ್ಸಿನ ಕಥೆಗಳು ರಾಜ್ಯ ಶೃಂಗೇರಿ

ಸ್ವಂತ ಉದ್ಯಮ ತೆರೆದು ಯಶಸ್ವಿಯಾದ ಪ್ರಜ್ಞಾ ಭಟ್!

ಸ್ವಂತ ಉದ್ಯಮ ತೆರೆದು ಯಶಸ್ವಿಯಾದ ಪ್ರಜ್ಞಾ ಭಟ್!
– ಸೀರಿಯಲ್, ಸಿನಿಮಾ, ಮಾಡೆಲಿಂಗ್ ಅಲ್ಲಿ ಸಾಧನೆ
– ಶೃಂಗೇರಿ ಮೂಲದ ನಟಿಯ ಉದ್ಯಮ ಪಯಣ ಸೂಪರ್

ರೂಪದರ್ಶಿ, ನಟಿ, ಕಲಾವಿದೆ ಪ್ರಜ್ಞಾ ಭಟ್ ನಟನೆ ಜತೆ ಜತೆಗೆ ಸ್ವಂತ ಉದ್ಯಮ ತೆರೆದು ಹತ್ತಾರು ಮಂದಿಗೆ ಉದ್ಯೋಗ ಕೊಡುವ ಮೂಲಕ ಮಾದರಿ ಆಗಿದ್ದಾರೆ. ಈಕೆ ಮೂಲತಃ ಚಿಕ್ಕಮಗಳೂರು ಜಿಲ್ಲೆಯ ಶೃಂಗೇರಿ ತಾಲ್ಲೂಕಿನ ಪ್ರತಿಭೆ. ಬಾಲ್ಯದಲ್ಲಿ ಶಿಕ್ಷಕಿಯಾಗಬೇಕೆಂದು ಬಯಸಿದ್ದವರು, ಅಭಿನಯ ಕ್ಷೇತ್ರಕ್ಕೆ ಪ್ರವೇಶ ಪಡೆದಿದ್ದು ಆಕಸ್ಮಿಕ ಎನ್ನುತ್ತಾರೆ ಪ್ರಜ್ಞಾ ಭಟ್.

ಕಾಲೇಜು ದಿನಗಳಲ್ಲೇ ಮಾಡೆಲಿಂಗ್ ಎಂಟ್ರಿ!

ಕಾಲೇಜು ವಿದ್ಯಾರ್ಥಿನಿಯಾಗಿರುವಾಗಲೇ ರೂಪದರ್ಶಿಯಾಗಿದ್ದ ಇವರು, 2015ರಲ್ಲಿ ಮಿಸ್ ಚಿಕ್ಕಮಗಳೂರು ರನ್ನರ್ ಅಪ್ ಹಾಗೂ 2016ರ ಮಿಸ್ ಕ್ವೀನ್ ಕರ್ನಾಟಕ ಎನ್ನುವ ಕಿರೀಟವನ್ನು ತಮ್ಮ ಮುಡಿಗೇರಿಸಿಕೊಂಡರು. ಸ್ನೇಹಿತರಾದ ವಿದ್ಯಾಭೂಷಣ್, ಅಮರ್ ಮತ್ತು ಕೌಶಿಕ್ ಅವರು ತಮ್ಮ ಫೋಟೋಶೂಟ್ ಗೆ ಪ್ರಜ್ಞಾ ಭಟ್ ಅವರನ್ನು ರೂಪದರ್ಶಿಯಾಗಿ ಕರೆಯುತ್ತಿದ್ದರು. ಬಳಿಕ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದರು. ಪ್ರಜ್ಞಾ ಭಟ್ ಅವರ ಫೋಟೋವನ್ನು ಗುರುತಿಸಿದ ರಘು ಚರಣ್ ತಿಪಟೂರು ಅವರು ಧಾರಾವಾಹಿಯಲ್ಲಿ ಅಭಿನಯಿಸಲು ಆಡಿಶನ್ ಗೆ ಅವಕಾಶ ಮಾಡಿಕೊಟ್ಟರು.‌

ಪ್ರಾರಂಭದಲ್ಲಿ ತಂದೆತಾಯಿಗಳು ಮಗಳು ಅಭಿನಯ ಮಾಡುವುದನ್ನು ನಿರಾಕರಿಸಿದರು. ಬಾಳೆಹೊನ್ನೂರಿನಲ್ಲಿ ಪ್ರಜ್ಞಾಭಟ್ ಅವರು ಅಕೌಂಟೆಂಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಮದುವೆಯಾಗುವ ತನಕ ಅದನ್ನೇ ಮುಂದುವರಿಸಲಿ ಎನ್ನುವುದು ಅವರ ಬಯಕೆಯಾಗಿತ್ತು. ಆದರೆ ಪ್ರಜ್ಞಾ ಭಟ್ ಅವರು ಒಮ್ಮೆ ಪ್ರಯತ್ನಿಸುವ ನೋಡುವ ಸಲುವಾಗಿ ಆಡಿಷನ್ ನೀಡಲು ಬೆಂಗಳೂರಿಗೆ ತೆರಳಿದರು. ಸಾಮಾನ್ಯವಾಗಿ ಆಡಿಶನ್ ನೀಡುವುದು ವಾಹಿನಿಯ ಕಛೇರಿಯಲ್ಲಿ ಅಥವಾ ಚಿತ್ರೀಕರಣದ ಸ್ಥಳದಲ್ಲಿ. ಆದರೆ ಪ್ರಜ್ಞಾ ಭಟ್ ಆಡಿಷನ್ ನೀಡಿದ ಸ್ಥಳ ಕನ್ನಡಿಗರ ಕಣ್ಮಣಿ, ವರನಟ ಡಾ.ರಾಜಕುಮಾರ್ ಅವರ ಪುಣ್ಯಭೂಮಿಯಲ್ಲಿ. ಧಾರಾವಾಹಿಗೆ ಸಂಬಂಧಿಸಿದ ಸ್ಕ್ರಿಪ್ಟ್ ಕೂಡ ಅಲ್ಲಿಯೇ ಲಭ್ಯವಾಯಿತು. ಸರಳ ಉಡುಗೆ, ಪ್ರಸಾಧನರಹಿತವಾಗಿ ಆಡಿಶನ್ ನೀಡಿದರೂ ಕೂಡ ಪ್ರಜ್ಞಾ ಭಟ್ ತಮ್ಮ ಪ್ರತಿಭೆಯ ಮೂಲಕ ಆಯ್ಕೆಯಾದರು.

ಧಾರಾವಾಹಿ ಮೂಲಕ ಕಿರುತೆರೆ ನಾಯಕಿ

ಪ್ರಜ್ಞಾ ನಟನಾ ಶಾಲೆಗೆ ಹೋಗಿ ತರಬೇತಿ ಪಡೆದುಕೊಂಡವರಲ್ಲ. ಗುರುಗಳಾದ ಸುಧೀಂದ್ರ ಭಾರದ್ವಾಜ್ ಮತ್ತು ಕೆಲ ನಿರ್ದೇಶಕರ ಮಾರ್ಗದರ್ಶನದಿಂದ ಅಭಿನಯ, ಮಾತುಗಾರಿಕೆಯಲ್ಲಿ ಆತ್ಮಸ್ಥೈರ್ಯವನ್ನು ಕಂಡುಕೊಂಡರು. ಹೀಗೆ ಕಿರುತೆರೆಯನ್ನು ಪ್ರವೇಶಿಸಿದ ಪ್ರಜ್ಞಾ ಭಟ್ ಅಭಿನಯಿಸಿದ ಮೊದಲ ಧಾರಾವಾಹಿ ಕಲರ್ಸ್ ಕನ್ನಡ ವಾಹಿನಿಯ ‘ಮಾಂಗಲ್ಯಂ ತಂತುನಾನೇನಾ’. ಇದರಲ್ಲಿ ನಾಯಕಿಯ ತಂಗಿಯ ಪಾತ್ರವನ್ನು ನಿರ್ವಹಿಸಿದರು. ಬಳಿಕ ಸುವರ್ಣ ವಾಹಿನಿಯ ಪ್ರೇಮಲೋಕ ಮೊದಲಾದ ಧಾರಾವಾಹಿಗಳಲ್ಲಿ ಅಭಿನಯಿಸಿರುವ ಪ್ರಜ್ಞಾ ಭಟ್ ಅವರು ಪ್ರಸ್ತುತ ಝೀ ಕನ್ನಡ ವಾಹಿನಿಯ ಶ್ರಾವಣಿ ಸುಬ್ರಹ್ಮಣ್ಯ ಧಾರವಾಹಿಯಲ್ಲಿ ಸುಬ್ಬುವಿನ ತಂಗಿ ವರಲಕ್ಷ್ಮೀ‌ ಪಾತ್ರದ ಮೂಲಕ ಕನ್ನಡಿಗರ ಮನಗೆದ್ದಿದ್ದಾರೆ. ಇದರಿಂದಾಗಿ ಅಭಿಮಾನಿಗಳ ಸಂಖ್ಯೆ ಕೂಡ ಹೆಚ್ಚಳವಾಗಿದೆ.

ಪ್ರಜ್ಞಾ ಮೇಕಪ್ ಮತ್ತು ಹೇರ್ ಅಕಾಡೆಮಿ ಸ್ಥಾಪನೆ

ಇತ್ತೀಚೆಗೆ ಉದ್ಯಮ ಕ್ಷೇತ್ರಕ್ಕೂ ಕಾಲಿರಿಸಿರುವ ಪ್ರಜ್ಞಾ ಭಟ್ ಅವರು ತಮ್ಮ ಹುಟ್ಟೂರಾದ ಶೃಂಗೇರಿಯಲ್ಲಿ ಪ್ರಜ್ಞಾ ಮೇಕಪ್ ಮತ್ತು ಹೇರ್ ಅಕಾಡೆಮಿ ಸ್ಥಾಪಿಸಿ ಸ್ಥಳೀಯರಿಗೆ ಉದ್ಯೋಗಾವಕಾಶವನ್ನು ಕಲ್ಪಿಸಿ ಕೊಡುತ್ತಿದ್ದಾರೆ.‌ ಉದ್ಯಮವನ್ನು ಪ್ರಾರಂಭಿಸಲು ತಂದೆ ತಾಯಿಯೇ ಪ್ರೇರಣೆ ಎನ್ನುವ ಪ್ರಜ್ಞಾ ಭಟ್ ಅವರು “ಜಯಪುರದಲ್ಲಿ ನಮ್ಮದು ಪ್ರಜ್ಞಾ ಹೋಟೆಲ್ ಇದ್ದು, ಅಪ್ಪ ಅಮ್ಮ ಅದನ್ನು ನಡೆಸಿಕೊಂಡು ಬರುತ್ತಿರುವುದನ್ನು ಕಂಡು ಉದ್ಯಮವನ್ನು ಕೈಗೊಳ್ಳಲು ಧೈರ್ಯ ನೀಡಿದೆ” ಎಂದು ಹೇಳಿಕೊಂಡಿದ್ದಾರೆ.

ಜೊತೆಗೆ ಪತಿ ನಾಗಶ್ರಿತ್ ಅವರು ನೀಡಿದ ಆರ್ಥಿಕ ಮತ್ತು ಮಾನಸಿಕ ಸಹಕಾರ ಅವರಿಗೆ ಮತ್ತಷ್ಟು ಉತ್ತೇಜನವನ್ನು ನೀಡಿತು. ಸ್ಥಳೀಯರು ಬೆಂಗಳೂರಿನಂತಹ ಮಹಾನಗರಗಳಿಗೆ ಹೋಗಿ ದುಪ್ಪಟ್ಟು ಬೆಲೆತೆತ್ತು ಇದಕ್ಕೆ ಸಂಬಂಧಿಸಿದಂತೆ ತರಬೇತಿಯನ್ನು ಪಡೆಯುತ್ತಾರೆ. ಬೆಂಗಳೂರಿನಲ್ಲಿ ಹೆಚ್ಚಿನ ಅಕಾಡೆಮಿಗಳಿರುವುದರಿಂದ ಕಲಿತವರು ಕೂಡ ಸುಮ್ಮನೆ ಕೂರಬೇಕಾಗಿದೆ. ಬದಲಿಗೆ ಕಡಿಮೆ ಶುಲ್ಕದಲ್ಲಿ ಸುಲಭವಾಗಿ ಕಲಿತು ಅವಶ್ಯಕತೆ ಇರುವ ಸ್ಥಳದಲ್ಲೇ ತಮ್ಮದೇ ಆದ ಉದ್ಯಮವನ್ನು ಕೈಗೊಳ್ಳುವಂತಾಗಲಿ ಎನ್ನುವುದು ಉದ್ಯಮದ ಹಿಂದಿನ ಉದ್ದೇಶವಾಗಿದೆ. ಪ್ರಜ್ಞಾ ಭಟ್ ಕೇವಲ ಧಾರಾವಾಹಿಗಳಲ್ಲಿ ಮಾತ್ರವಲ್ಲದೆ ಒಲವೇ ಮಂದಾರ-2 ಚಿತ್ರದಲ್ಲಿ ನಾಯಕಿಯಾಗಿ, ಮನದರಸಿ ಎನ್ನುವ ಚಿತ್ರದಲ್ಲೂ ಕೂಡ ಅಭಿನಯಿಸಿದ್ದಾರೆ.

Categories
ಪ್ರತಿಭೆಗಳು ಮಲ್ನಾಡ್ ಯಶಸ್ಸಿನ ಕಥೆಗಳು ರಾಜ್ಯ ಹೊಸನಗರ

ಸಂಗೀತ ಕವಿ ಕವಿರಾಜ್

ಸಂಗೀತ ಕವಿ ಕವಿರಾಜ್
ಹೊಸನಗರ-ತೀರ್ಥಹಳ್ಳಿ ಗಡಿಯ ಯಡೂರಿನ ಕವಿರಾಜ್ ಎವರ್ ಗ್ರೀನ್ ಸಂಗೀತ ರಚನೆಕಾರ
ಕಂಕಣ ಟೀಂ ಕಟ್ಟಿ ಸಮಾಜ ಸೇವೆಯಲ್ಲೂ ಮುಂಚೂಣಿ

ಕನ್ನಡ ಸಿನಿಮಾ ರಂಗದ ಎವರ್ ಗ್ರೀನ್ ಚಿತ್ರಗೀತ ರಚನೆಕಾರರಾದ ಕವಿರಾಜ್ ಮಲೆನಾಡಿನ ಹೆಮ್ಮೆಯ ಪ್ರತಿಭೆ. ಹೊಸನಗರ ತಾಲ್ಲೂಕಿಗೆ ಸೇರಿದ ತೀರ್ಥಹಳ್ಳಿ ತಾಲ್ಲೂಕಿಗೆ ಹೊಂದಿಕೊಂಡಿರುವ ಯಡೂರು ಎಂಬ ಗ್ರಾಮದಲ್ಲಿ ಜನಿಸಿದರು. ಕವಿರಾಜ್ ಎಂಬುದು ತಂದೆ ತಾಯಿ ಇಟ್ಟ ಹೆಸರೇ ಆಗಿದೆ. ತಂದೆ ಹರಿಯಪ್ಪ ನಾಯಕ ನೇರ ನಡೆ ನುಡಿಯ ವ್ಯಕ್ತಿತ್ವದವರಾಗಿದ್ದು ಕವಿರಾಜ್ ಅವರಿಗೂ ಈ ಗುಣಗಳು ಅಡಕವಾಗಿದೆ ಎಂದು ಸ್ವತಃ ಕವಿರಾಜ್ ಅವರೇ ಹೇಳಿಕೊಂಡಿದ್ದಾರೆ.
ತನಗೆ ತಂದೆ ತಾಯಿಗಳು ಇಟ್ಟ ಹೆಸರು, ಬಾಲ್ಯದಲ್ಲಿ ಇದ್ದ ದಿನಪತ್ರಿಕೆಗಳನ್ನು ಓದುವ ಹವ್ಯಾಸ, ತಾಯಿ ತರಂಗ, ಸುಧಾ ಮೊದಲಾದ ನಿಯತಕಾಲಿಕೆಗಳಲ್ಲಿ ಓದುತ್ತಿದ್ದ ಕಥೆ, ಕಾದಂಬರಿಗಳು, ಹುಟ್ಟೂರಿನ ವಾತಾವರಣ ನನ್ನನ್ನು ಕವಿಯಾಗಿಸಿತು ಎನ್ನುವುದು ಕವಿರಾಜ್ ಅವರ ಅಂತರಂಗದ ಮಾತು. ತರಂಗಕ್ಕೆ ಕವನ ಬರೆದು ಕಳುಹಿಸುತ್ತಿದ್ದರು ಮತ್ತು ಪ್ರಾಥಮಿಕ ಶಾಲೆಯಲ್ಲೇ ವಾಚಕರ ವಾಣಿ ವಿಭಾಗಕ್ಕೆ ಬರೆದು ಕಳುಹಿಸುತ್ತಿದ್ದರು. ತೀರ್ಥಹಳ್ಳಿ, ಶಿವಮೊಗ್ಗಗಳಲ್ಲಿ ವಿದ್ಯಾಭ್ಯಾಸ ಮುಗಿಸಿದ ಕವಿರಾಜ್ ಅವರು ದೊರೆತ ಸರ್ಕಾರಿ ಕ್ಲರ್ಕ್ ಹುದ್ದೆಯನ್ನು ತ್ಯಜಿಸಿ, ಬೆಂಗಳೂರಿನತ್ತ ಪಯಣ ಬೆಳೆಸಿದರು. ಒಂದೂವರೆ ವರ್ಷಗಳ ಕಾಲ ಮೆಡಿಕಲ್ ರೆಪ್ರೆಸೆಂಟೇಟಿವ್ ಆಗಿ ಕೆಲಸ ನಿರ್ವಹಿಸಿದ ಕವಿರಾಜ್ ಅವರು ತಮ್ಮ ಬರವಣಿಗೆಯನ್ನೇ ಬಂಡವಾಳ ಮಾಡಿಕೊಂಡು ಏನಾದರೂ ಸಾಧಿಸಬೇಕೆಂಬ ಛಲ ತೊಟ್ಟರು.

ಕರಿಯ ಚಿತ್ರದ ಮೂಲಕ ಭರ್ಜರಿ ಎಂಟ್ರಿ!
ಗುರುಕಿರಣ್ ಅವರಿಗೆ ‘ಅಮ್ಮಂಗೇನು ಗೊತ್ತು’ ಎಂಬ ತಾವು ಬರೆದ ಕವಿತೆಯನ್ನು ತೋರಿಸುವ ಮೂಲಕ ಕನ್ನಡ ಚಲನಚಿತ್ರರಂಗದಲ್ಲಿ ಅವಕಾಶ ಗಿಟ್ಟಿಸಿಕೊಂಡರು. ಕರಿಯ ಚಿತ್ರದ ನನ್ನಲಿ ನಾನಿಲ್ಲ ಇವರ ಮೊದಲ ಗೀತೆ. 2003ರಲ್ಲಿ ಕರಿಯ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪ್ರವೇಶ ಪಡೆದರು. ಬಳಿಕ ಅವರು ಹಿಂತಿರುಗಿ ನೋಡಿಲ್ಲ..!.

ಗೋಕರ್ಣ, ಕುಟುಂಬ, ಆಪ್ತಮಿತ್ರ ಮೊದಲಾದ ಸಾಲು ಸಾಲು ಚಿತ್ರಗಳಿಗೆ ಗೀತರಚನೆ ಮಾಡುವ ಮೂಲಕ ಬರವಣಿಗೆಯನ್ನೇ ವೃತ್ತಿಯನ್ನಾಗಿಸಿಕೊಂಡರು. ಸರ್ಕಾರಿ ಕೆಲಸ ಮತ್ತು ಮೆಡಿಕಲ್ ಕೆಲಸವನ್ನು ತೊರೆದ ಪರಿಣಾಮ ತಂದೆಯಿಂದ ತೀವ್ರ ವಿರೋಧ ವ್ಯಕ್ತವಾಯಿತು. ಗುರುಕಿರಣ್ ಸಂಗೀತ ನಿರ್ದೇಶನ ಇರುವ ಚಿತ್ರಗಳಿಗೆ ಹೆಚ್ಚು ಸಾಹಿತ್ಯವನ್ನು ರಚಿಸಿದ್ದಾರೆ. ಪಾರ್ಥ ಚಿತ್ರದ ‘ಈ ಪ್ರೀತಿ ಒಂಥರ ಕಚಗುಳಿ’ ತಕ್ಷಣಕ್ಕೆ ಬರೆದ ಹಾಡಾದರೆ, ಕಂಠಿ ಚಿತ್ರದ ‘ಬಾನಿಂದ ಬಾ ಚಂದಿರ’ ಅತಿ ಹೆಚ್ಚು ತಲೆಕೆಡಿಸಿಕೊಂಡು ರಚಿಸಿದ ಗೀತೆಯಾಗಿದೆ.

23 ವರ್ಷಗಳ ಚಿತ್ರ ರಂಗದ ಪಯಣ!
ಇಪ್ಪತ್ತಮೂರು ವರ್ಷಗಳಿಂದ ಚಿತ್ರರಂಗದಲ್ಲಿ ಗೀತರಚನಾಕಾರರಾಗಿ ತೊಡಗಿಸಿಕೊಂಡಿರುವ ಕವಿರಾಜ್ ಅವರು 2016ರಲ್ಲಿ ‘ಮದುವೆಯ ಮಮತೆಯ ಕರೆಯೋಲೆ’ ಚಿತ್ರದ ಮೂಲಕ ನಿರ್ದೇಶನಕ್ಕೆ ಇಳಿದರು. 2019ರಲ್ಲಿ ತೆರೆಕಂಡ ಇವರ ನಿರ್ದೇಶನದ ‘ಕಾಳಿದಾಸ ಕನ್ನಡ ಮೇಷ್ಟ್ರು’ ಯಶಸ್ಸನ್ನು ಪಡೆಯಿತು.
ಸಂಜು ವೆಡ್ಸ್ ಗೀತಾ ಚಿತ್ರದ ‘ಗಗನವೇ ಬಾಗಿ’ ಗೀತೆಗೆ 2011ರಲ್ಲಿ ಅತ್ಯುತ್ತಮ ಗೀತರಚನೆಕಾರ ಪ್ರಶಸ್ತಿ, 2009, 2011, 2013 ಮತ್ತು 2015ರಲ್ಲಿ ನಾಲ್ಕು ಬಾರಿ ಮಿರ್ಚಿ ಸಂಗೀತ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದಾರೆ. 2010 ರಲ್ಲಿ ತೆರೆಕಂಡ ಆಪ್ತರಕ್ಷಕ ಮತ್ತು 2011ರಲ್ಲಿ ತೆರೆಕಂಡ ಸಂಜು ವೆಡ್ಸ್ ಗೀತಾ ಚಿತ್ರಗಳಿಗೆ ಫಿಲ್ಮಫೇರ್ ಪ್ರಶಸ್ತಿಗಳನ್ನು ಪಡೆದಿದ್ದಾರೆ.

ಕಂಕಣ ಟೀಂ ಕಟ್ಟಿ ಸಮಾಜ ಸೇವೆಯಲ್ಲೂ ಮುಂಚೂಣಿ
ಕಂಕಣ ಕನ್ನಡ ಪರ ಸಂಘಟನೆ ಕಟ್ಟಿ ಬೆಂಗಳೂರಲ್ಲಿ ಕನ್ನಡದ ಕಾಯಕದಲ್ಲಿ ತೊಡಗಿರುವ ಕವಿರಾಜ್ ಕರೋನಾ ಸಮಯದಲ್ಲಿ ನೂರಾರು ಮಂದಿಗೆ ಆಕ್ಸಿಜೆನ್ ಮಿಷನ್ ನೀಡುವ ಮೂಲಕ ಸಮಾಜ ಸೇವೆಯಲ್ಲಿ ಮಾದರಿ ಆಗಿದ್ದಾರೆ. ತಮ್ಮದೇ ಆದ ಸ್ನೇಹಿತರ ಬಳಗ ಕಟ್ಟಿಕೊಂಡಿರುವ ಕವಿರಾಜ್ ಮಲೆನಾಡಿನ ಹೆಮ್ಮೆಯಚಿತ್ರ ಗೀತರಚನೆಕಾರ ಆಗಿದ್ದಾರೆ.

Categories
ಕರಾವಳಿ ದಕ್ಷಿಣ ಕನ್ನಡ ಪ್ರತಿಭೆಗಳು ಮಂಗಳೂರು ಯಶಸ್ಸಿನ ಕಥೆಗಳು ರಾಜ್ಯ

ನೃತ್ಯ ಲೋಕದ ಸಾಧಕಿ ವಿದುಷಿ ದೀಕ್ಷಾ..!

ನೃತ್ಯ ಲೋಕದ ಸಾಧಕಿ ವಿದುಷಿ ದೀಕ್ಷಾ..!

  • ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಸಾಧನೆ
  • ಸತತ ಪರಿಶ್ರಮ, ಪ್ರಾಮಾಣಿಕತೆ, ಛಲ ಸಾಧನೆಗೆ ಶಕ್ತಿ

ಸಾಧನೆಗೆ ಬಡತನ, ಸಮಯ ಯಾವುದು ಅಡ್ಡಿ ಅಲ್ಲ. ಸತತ ಪರಿಶ್ರಮ, ಛಲದಿಂದ ಏನು ಬೇಕಾದರೂ ಸಾಧಿಸಬಹುದು ಎಂಬುದಕ್ಕೆ ಸಾಕ್ಷಿ ಬ್ರಹ್ಮಾವರ ಮೂಲದ ವಿಶ್ವ ವಿಖ್ಯಾತ ಭರತನಾಟ್ಯ ಪಟು ವಿದುಷಿ ದೀಕ್ಷಾ. ಉಡುಪಿ ಜಿಲ್ಲೆಯ ಬ್ರಹ್ಮಾವರ ತಾಲ್ಲೂಕಿನ ದೀಕ್ಷಾ ಅವರು ಬಡ ಕುಟುಂಬದ ಮಗಳು. ತಂದೆ ದೀಕ್ಷಾ ಅವರು ಕಲಿಯುತ್ತಿದ್ದ ಲಿಟಲ್ ರಾಕ್ ಶಾಲೆಯ ವಾಹನದ ಡ್ರೈವರ್ ಆಗಿ ಕಾರ್ಯನಿರ್ವಹಿಸಿದರೆ, ತಾಯಿ ಅದೇ ಶಾಲೆಯ ಹಾಸ್ಟೆಲ್ ನಲ್ಲಿ ಕೆಲಸ ಮಾಡಿಕೊಂಡಿದ್ದರು. ಕಲೆಯಲ್ಲಿ ಆಸಕ್ತಿ ಇರುವ ದೀಕ್ಷಾ ಅವರ ತಾಯಿ ಮಗಳನ್ನು ಮೂರನೇ ವಯಸ್ಸಿಗೇ ನೃತ್ಯ ತರಬೇತಿ ಶಾಲೆಗೆ ಸೇರಿಸಲು ಹೋದಾಗ “ಮಗು ತುಂಬಾ ಸಣ್ಣದು, ಅದರ ಕಾಲುಗಳಿಗೆ ನೃತ್ಯ ಮಾಡುವಷ್ಟು ಸಾಮರ್ಥ್ಯ ಬಂದಿರುವುದಿಲ್ಲ” ಎಂದು ಗುರುಗಳು ಮರಳಿ ಕಳುಹಿಸಿದ್ದರು. ದೀಕ್ಷಾ ಅವರ ತಾಯಿ ಪ್ರಯತ್ನ ಬಿಡಲಿಲ್ಲ. ಮಗಳ ಯುಕೆಜಿ ಕಲಿಕೆಯ ನಂತರ ಪುನಃ ಅದೇ ಗುರುಗಳ ಬಳಿಗೆ ನೃತ್ಯ ತರಬೇತಿಗೆ ದಾಖಲಿಸಿದರು. ಹೀಗೆ ಆರಂಭಗೊಂಡಿತು ದೀಕ್ಷಾ ಅವರ ನೃತ್ಯ ಕಲಿಕೆ.

ಉಮಾ ಅವರು ಕಲಿಸುತ್ತಿದ್ದಾಗ ದೀಕ್ಷಾ ಅವರಿಗೆ ನೃತ್ಯದ ಬಗ್ಗೆ ಆಸಕ್ತಿ ಇರಲಿಲ್ಲ. ತಂದೆ ತಾಯಿಯ ಒಬ್ಬಳೇ ಮಗಳಾದ ದೀಕ್ಷಾ ಏಕಾಂಗಿಯಾಗಿ ಆಡಿಕೊಳ್ಳುವುದರಲ್ಲೇ ಹೆಚ್ಚು ಸುಖವನ್ನು ಅನುಭವಿಸುತ್ತಿದ್ದಳು. ಮನುಷ್ಯರೊಂದಿಗೆ ಹೆಚ್ಚು ಬೆರೆಯದ ಈಕೆಗೆ ನಾಯಿ ಬೆಕ್ಕುಗಳೇ ಸಂಗಾತಿಗಳು. ಹೀಗಾಗಿ ಆಕೆಗೆ ನೃತ್ಯದ ಕುರಿತಾಗಲಿ, ಹೊರಗಡೆ ಹೋಗಿ ಕಲಿಯುವುದಾಗಲಿ ಆಗುತ್ತಿರಲಿಲ್ಲ. ಪರಿಣಾಮ ಐದು ತಿಂಗಳ ಕಾಲ ನೃತ್ಯಾಭ್ಯಾಸ ಸ್ಥಗಿತಗೊಂಡಿತು. ಆದರೆ ದೀಕ್ಷಾ ಅವರ ತಾಯಿ ಹಠ ಬಿಡದೆ ಶೃತಿ ರಾಘವೇಂದ್ರ ಭಟ್ ಎನ್ನುವ ಗುರುಗಳ ಬಳಿ ಮತ್ತೆ ದೀಕ್ಷಾಳನ್ನು ನೃತ್ಯ ಕಲಿಕೆಗೆ ಸೇರಿಸಿದರು. ಗುರುಗಳ ಪ್ರೇರಣೆಯೋ, ದೈವಕೃಪೆಯೋ ಎನ್ನುವಂತೆ ದೀಕ್ಷಾಳಲ್ಲಿ ನೃತ್ಯದ ಬಗ್ಗೆ ನಿಧಾನವಾಗಿ ಆಸಕ್ತಿ ಮೂಡತೊಡಗಿತು.

ನೃತ್ಯದ ಜೊತೆಗೆ ಶೈಕ್ಷಣಿಕ ಅಭ್ಯಾಸ ಕೂಡ ಮುಂದುವರಿಯಿತು. ದೀಕ್ಷಾ ಅವರು ಪದವಿ ಪೂರ್ವ ಶಿಕ್ಷಣವನ್ನು ಹೆಬ್ರಿಯ ಅಮೃತ ಭಾರತಿಯಲ್ಲಿ, ಬಿಎಸ್ ಸಿ ಪದವಿಯನ್ನು ಉಡುಪಿ ಅಜ್ಜರಕಾಡಿನ ಜಿ.ಶಂಕರ್ ಸರ್ಕಾರಿ ಕಾಲೇಜಿನಲ್ಲಿ ಪಡೆದುಕೊಂಡರು. ಪದವಿ ಶಿಕ್ಷಣ ಪಡೆಯುವಾಗ ದೀಕ್ಷಾ ಅವರು ಸಮಾಜಕ್ಕೆ ತೆರೆದುಕೊಂಡರು. ಮನುಷ್ಯ ಸಂಬಂಧದ ಮಹತ್ವ ಏನೆಂಬುದನ್ನು ಅವರ ಸ್ನೇಹಿತೆಯರು ತೋರಿಸಿದರು. ಅಲ್ಲಿಂದ ದೀಕ್ಷಾ ಅವರು ಜನರೊಂದಿಗೆ ಬೆರೆಯುವುದನ್ನು ಕಲಿತರು. ಪದವಿ ಶಿಕ್ಷಣದ ಬಳಿಕ ಟಿಎಂಎಪೈ ಸಂಸ್ಥೆಯಲ್ಲಿ ಬಿಎಡ್ ಅಭ್ಯಸಿಸುತ್ತಿದ್ದಾಗ ಕಾಲೇಜಿಗೆ ಆಗಮಿಸಿದ ಗಾಯಕರಾದ ಯಶವಂತ್ ಎಂ.ಜಿ ಅವರು ದೀಕ್ಷಾ ಅವರಿಗೆ ಪ್ರೇರಣೆಯಾದರು.

ಅವರು ಸತತ 24 ಗಂಟೆಗಳ ಕಾಲ ಎಸ್.ಪಿ.ಬಾಲಸುಬ್ರಹ್ಮಣ್ಯಂ ಅವರ ಗೀತೆಗಳನ್ನು ಹಾಡಿ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ನಲ್ಲಿ ಹೆಸರನ್ನು ದಾಖಲಿಸಿದಂತೆ, ನೃತ್ಯದಲ್ಲಿ ತಾನೇನಾದರೂ ಮಾಡಬೇಕೆಂದು ಅವರಲ್ಲಿ ಹೇಳಿಕೊಂಡರು. ಅದಕ್ಕೆ ಯಶವಂತ್ ಅವರು ತಾನು ಸಂಪೂರ್ಣವಾಗಿ ಸಹಕಾರ ನೀಡುವುದಾಗಿ ಭರವಸೆ ನೀಡಿದರು. ಆದರೆ ದೀಕ್ಷಾ ಅವರಿಗೆ ಆಗ ಸಮಯವಿರಲಿಲ್ಲ. ಒಂದೆಡೆ ನೃತ್ಯದಲ್ಲಿ ವಿದ್ವತ್ ಗೆ ತಯಾರಿ, ಮತ್ತೊಂದೆಡೆ ಬಿಎಡ್ ಕಲಿಕೆ ನಿರಂತರವಾಗಿ ನಡೆಯುತ್ತಿತ್ತು. ಗುರುಗಳಾದ ಶ್ರೀಧರ್ ಬನ್ನಂಜೆ ಅವರು ಕೂಡ ಒಂದಾದ ಮೇಲೆ ಒಂದು ಮಾಡಿಕೊಳ್ಳು ಎಂದು ಸಲಹೆ ನೀಡಿದರು. ವಿದ್ವತ್ ಪರೀಕ್ಷೆಯನ್ನು ಪೂರೈಸಿದ ಬಳಿಕ ದೀಕ್ಷಾ ಅವರು ಬಿಎಡ್ ನ ಮೂರು ಮತ್ತು ನಾಲ್ಕನೇ ಸೆಮಿಸ್ಟರ್ ನಡುವೆ ಒಂದು ತಿಂಗಳ ಕಾಲ ಬಿಡುವು ದೊರೆತಾಗ ದೈಹಿಕವಾಗಿ ಮತ್ತು ಮಾನಸಿಕವಾಗಿ ಸಿದ್ಧರಾಗಿ, ಭರತನಾಟ್ಯವನ್ನು ಸತತ 216 ಗಂಟೆ, ಒಂಭತ್ತು ದಿನಗಳ ಕಾಲ ಮಾಡುವ ಮೂಲಕ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ನಲ್ಲಿ ತಮ್ಮ ಹೆಸರನ್ನು ದಾಖಲಿಸಿದರು.

ತಂದೆ ತಾಯಿಯ ಜೊತೆಗೆ ಪತಿ ರಾಕೇಶ್ ಅವರ ಉತ್ತೇಜನ ಈ ಸಂದರ್ಭದಲ್ಲಿ ದೀಕ್ಷಾ ಅವರಿಗೆ ಬಹುಮುಖ್ಯವಾಗಿ ದೊರೆಯಿತು. ತನ್ನ ಪ್ರತಿಭೆಗೆ ಸದಾ ಬೆನ್ನೆಲುಬಾಗಿದ್ದ ಅಜ್ಜನನ್ನು (ತಾಯಿಯ ತಂದೆ) ಕಳೆದುಕೊಂಡಿದ್ದ ದೀಕ್ಷಾ ಅವರಿಗೆ ತಮ್ಮ ಪತಿಯ ರೂಪದಲ್ಲಿ ಅಜ್ಜ ಬಂದು ನನ್ನನ್ನು ಸಾಧಕಿಯನ್ನಾಗಿಸಿದ್ದಾರೆ ಎನ್ನಿಸಿತು. ಜೊತೆಗೆ 100ರೂಪಾಯಿ ದುಡಿದರೆ ಅದರಲ್ಲಿ 75ರೂಪಾಯಿಯನ್ನು ತನ್ನ ನೃತ್ಯಭ್ಯಾಸಕ್ಕೆ ಮೀಸಲಿಟ್ಟು ಉಳಿದ 25ರೂಪಾಯಿಯಲ್ಲಿ ಕುಟುಂಬವನ್ನು ನಿರ್ವಹಿಸಿದ ತಂದೆ ತಾಯಿಗಳ ಶ್ರಮ ಮತ್ತು ತ್ಯಾಗಕ್ಕೆ ತಾನು ತಕ್ಕ ಪ್ರತಿಫಲ ನೀಡಿದ್ದೇನೆ ಎನ್ನುವ ಸಾರ್ಥಕತೆ ದೀಕ್ಷಾ ಅವರಲ್ಲಿ ಮೂಡಿತು. ಹೀಗಾಗಿ ತನ್ನ ಸಾಧನೆ ಆಗಿರುವುದು ತನ್ನಿಂದಲ್ಲ. ದೇವರು ಮಾಡಿಸಿರುವುದು ಎನ್ನುವುದು ದೀಕ್ಷಾ ಅವರ ವಿನಯದ ಮಾತು.

Categories
agumbe ತೀರ್ಥಹಳ್ಳಿ ಮಲ್ನಾಡ್ ಯಶಸ್ಸಿನ ಕಥೆಗಳು

ಹುಟ್ಟು ಊರಿನ ಬಾಲ್ಯ ನೆನೆದ ಮಂಗಳೂರು ಉಪ ಪೋಲಿಸ್ ಆಯುಕ್ತ ಮಿಥುನ್!

ಹುಟ್ಟು ಊರಿನ ಬಾಲ್ಯ ನೆನೆದ ಮಂಗಳೂರು ಉಪ ಪೋಲಿಸ್ ಆಯುಕ್ತ ಮಿಥುನ್!

– ಮೇಗರವಳ್ಳಿಯಲ್ಲಿ ಲಲಿತಮ್ಮ ಚಾರಿಟೇಬಲ್ ಟ್ರಸ್ಟ್ ಹಾಗೂ ಬಾಲಾಜಿ ಸ್ಪೋರ್ಟ್ಸ್ ಕ್ಲಬ್ ಗೌರವ ಅವಿಸ್ಮರಣೀಯ ಕ್ಷಣ
– ವಿಜೇತ್ ಶೆಟ್ಟಿ ಅವರ ಕಾರ್ಯ ವೈಖರಿ, ಸಮಾಜ ಸೇವೆಗೆ ಮೆಚ್ಚುಗೆ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ತೀರ್ಥಹಳ್ಳಿ: ತೀರ್ಥಹಳ್ಳಿ ತಾಲ್ಲೂಕಿನ ಮೇಗರವಳ್ಳಿ ಗ್ರಾಮದಲ್ಲಿ, ಲಲಿತಮ್ಮ ಚಾರಿಟೇಬಲ್ ಟ್ರಸ್ಟ್ ಹಾಗೂ ಬಾಲಾಜಿ ಸ್ಪೋರ್ಟ್ಸ್ ಕ್ಲಬ್ ವತಿಯಿಂದ ದಿ.ಲಲಿತಮ್ಮ ಅವರ 75 ನೇ ಹುಟ್ಟು ಹಬ್ಬದ ಸಂಭ್ರಮ ಹಾಗೂ ಲಲಿತಮ್ಮ ಚಾರಿಟೇಬಲ್ ಟ್ರಸ್ಟ್ ನ 15 ನೇ ವಾರ್ಷಿಕೋತ್ಸವದ ಸಂದರ್ಭದಲ್ಲಿ ಕ್ರೀಡಾ ಸಮಾರೋಪ ಸಮಾರಂಭದಲ್ಲಿ ಉದ್ಘಾಟಕರಾಗಿ ಆಗಮಿಸಿ, ಮೇಗರವಳ್ಳಿಯ ಮಣ್ಣಿನಲ್ಲಿ, ತಮ್ಮ ಬಂಧುಗಳು,ತಂದೆ, ಶ್ರೀ ನಾಗರಾಜ್ ಎಂ ಪಿ, ತಾಯಿ, ಶ್ರೀಮತಿ ಗಾಯಿತ್ರಿ, ಸಂಬಂಧಿಗಳು ಸ್ನೇಹಿತರ ಸಮಕ್ಷಮದಲ್ಲಿ ಗೌರವ ಸನ್ಮಾನ ಸ್ವೀಕಾರ ಮಾಡಿ ಪ್ರೀತಿ ಪಾತ್ರರ ಖುಷಿಯನ್ನು ನೂರ್ಮಡಿಗೊಳಿಸಿದರು.
ನಂತರ ಮಾತಾನಾಡಿದ ಮಿಥುನ್‌ ಹೆಚ್ ಎನ್ ಅವರು ಲಲಿತಮ್ಮ ಚಾರಿಟೇಬಲ್ ಟ್ರಸ್ಟ್ ಹಾಗೂ ಬಾಲಾಜಿ ಸ್ಪೋರ್ಟ್ಸ್ ಕ್ಲಬ್ ನ ಈ ಕ್ರೀಡಾಕೂಟ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮ ಹಾಗೂ ಲಲಿತಮ್ಮ ಪ್ರಶಸ್ತಿ ಬಗ್ಗೆ ಮೆಚ್ಚುಗೆ ಮಾತಾನಾಡಿ ಎಲ್ಲಾ ಯುವಕರು, ಹಾಗೂ ವಿಜೇತ್ ಶೆಟ್ಟಿ ಅವರ ಕಾರ್ಯ ವೈಖರಿ, ಸೇವಾ ಕೈಂಕರ್ಯವನ್ನು ಮುಕ್ತ ಕಂಠದಿಂದ ಶ್ಲಾಘಿಸಿದರು, ನಂತರ ತಮ್ಮ ಬಾಲ್ಯದ ದಿನಗಳನ್ನು ಮೆಲಕು ಹಾಕುತ್ತಾ, ಬೇಸಿಗೆ ರಜೆಗೆ ಬಂದಾಗ ಆಡುತ್ತಿದ್ದ ಕ್ರಿಕೆಟ್ ಆಟ, ಕೆ ಇ ಬಿ ಕಛೇರಿಯ ಗಣಪತಿ ಸಡಗರ, ಹೊಳೆಯಲ್ಲಿನ ಈಜು, ತೋಟದ ಭೇಟಿ, ಅಂದಿನ ಕಾಲದ ಸ್ನೇಹಿತರನ್ನು ನೆನಪಿಸಿಕೊಂಡರು.
ನಂತರ ಮಲೆನಾಡಿನ ಸಾಂಸ್ಕೃತಿಕ ಸಾಹಿತ್ಯದ ವೈಭವ, ಇಲ್ಲಿನ ಸಂಸ್ಕೃತಿ ಆಚರಣೆ, ಕುವೆಂಪು, ಅನಂತ ಮೂರ್ತಿ ಬರಹಗಳ ಬಗ್ಗೆ ತೀರ್ಥಹಳ್ಳಿಯ ಮಣ್ಣಿನ ಬಗ್ಗೆ ಅಭಿಮಾನದಿಂದ ಮಾತಾನಾಡಿದರು.
ಯುವಕರು, ಕ್ರೀಡಾಕೂಟದಲ್ಲಿ ಭಾಗವಹಿಸುವುದರ ಜೊತೆಗೆ, ದುಶ್ಚಟಗಳಿಂದ ದೂರವಿರಬೇಕು,ಒಬ್ಬ ಕ್ರೀಡಾ ಪಟು ಉತ್ತಮ ದೈಹಿಕ ಸಾಮರ್ಥ್ಯವನ್ನು ಹೊಂದಿರಬೇಕು, ಜೊತೆಗೆ ಆನ್ ಲೈನ್ ಬೆಟ್ಟಿಂಗ್, ಗಾಜಾ, ಮಾದಕ ದ್ರವ್ಯಗಳ ಚಟಗಳಿಂದ ಮುಕ್ತರಾಗಿ ಉತ್ತಮ ಸಮಾಜಕ್ಕೆ ಮಾದರಿ ಕ್ರೀಡಾಪಟು ಹಾಗೂ ಸತ್ಪ್ರಜೆಗಳಾಗಿ ರೂಪಗೊಳ್ಳಬೇಕು ಎಂದು ಅಭಿಪ್ರಾಯ ಪಟ್ಟರು.
ಈ ವರ್ಷದ ಲಲಿತಮ್ಮ ಸೇವಾ ಪ್ರಶಸ್ತಿ ಪುರಸ್ಕೃತರಾದ ಆರೋಗ್ಯ ಇಲಾಖೆಯ ಶ್ರೀಮತಿ ವೀಣಾ ಎಂ ಪಿ ಅವರ ಸೇವಾ ಕೈಂಕರ್ಯ ವನ್ನು ಶ್ಲಾಘಿಸಿದರು, ನಂತರ ಹಲವು ವರ್ಷಗಳ ಕಾಲ ಹೊಸೂರು ಗುಡ್ಡೇಕೇರಿ ಸರ್ಕಾರಿ ಪ್ರೌಢಶಾಲೆಯಲ್ಲಿ ಮುಖ್ಯ ಶಿಕ್ಷಕರಾಗಿ ಅತ್ಯುತ್ತಮವಾಗಿ ಸೇವೆ ಸಲ್ಲಿಸಿದ ಮಂಜು ಬಾಬು ಅವರಿಗೆ ವಿಜೇತ ಶೆಟ್ಟಿ ಮತ್ತು ಅವರ ಸ್ನೇಹ ಬಳಗ  ” ಬೆಳ್ಳಿ ಗದೆ ” ನೀಡಿ ಗೌರವಿಸಿದರು ಅವರ ಸಾಧನೆಯನ್ನು ಸಹ ತುಂಬಾ ಅಭಿಮಾನದಿಂದ ಮುಕ್ತ ಕಂಠದಿಂದ ಶ್ಲಾಘಿಸಿದರು.
ತಮ್ಮ 7 ತಿಂಗಳ ಸೇವಾ ಅವಧಿಯಲ್ಲಿ ಮೊದಲ ಬಾರಿಗೆ ರಜೆ ಹಾಕಿ ಬಂದಿದ್ದೇನೆ ಅದು ನನ್ನ ಊರಿನ ಸನ್ಮಾನ ಎಂದು ಹೇಳಿ, ಜೊತೆಗೆ ತಮ್ಮ ಅತ್ಯಂತ ಬ್ಯುಸಿ ಟೈಂ ನಲ್ಲೂ ನನ್ನನ್ನು ಮೇಗರವಳ್ಳಿ ಗೆ ಬರಲು ಕಾರಣರಾದ ಬಾವಿಕೆರೆ ಸುಧೀರ್, ಅವರ ಪೋಷಕರು ಹಾಗೂ ವಿಜೇತ ಶೆಟ್ಟಿ ಅವರ ಪ್ರೀತಿಯ ಆಹ್ವಾನವನ್ನು ಅತ್ಯಂತ ಆಪ್ತತೆಯಿಂದ ಸ್ಮರಿಸಿದರು.
ಕೊನೆಯದಾಗಿ, ಕ್ರೀಡಾಕೂಟದ ವಿಜೇತ ತಂಡಗಳಿಗೆ ಬಹುಮಾನ ವಿತರಣೆ ಮಾಡಿ, ಅತ್ಯಂತ ಖುಷಿಯಿಂದ ಕಾರ್ಯಕ್ರಮದಿಂದ ನಿರ್ಗಮಿಸಿದರು.

Categories
inspiration ಜಿಲ್ಲಾ ವಾರ್ತೆ ಮಂಗಳೂರು ಯಶಸ್ಸಿನ ಕಥೆಗಳು ರಾಜ್ಯ

ಭಾರತದಲ್ಲೇ ಮಂಗಳೂರಿನ ಅರ್ಜುನ್ ಸಾಧನೆ!

ಭಾರತದಲ್ಲೇ ಮಂಗಳೂರಿನ ಅರ್ಜುನ್ ಸಾಧನೆ!
– ನೀಟ್‌ ಪರೀಕ್ಷೆಯಲ್ಲಿ ಮಂಗಳೂರಿನ ಅರ್ಜುನ್‌ ದೇಶಕ್ಕೆ ಮೊದಲ ರ‍್ಯಾಂಕ್
– ಮಂಗಳೂರಿನ ಎಕ್ಸ್‌ಪರ್ಟ್‌ ಕಾಲೇಜಿನ ಅರ್ಜುನ್‌ ಕಿಶೋರ್‌ 720ರಲ್ಲಿ 720 ಅಂಕ ಸಾಧನೆ

NAMMUR EXPRESS NEWS
ಮಂಗಳೂರು: ನೀಟ್‌ ಫಲಿತಾಂಶ ಹೊರಬಿದ್ದಿದ್ದು ಮಂಗಳೂರಿನ ಎಕ್ಸ್‌ಪರ್ಟ್‌ ಕಾಲೇಜಿನ ಅರ್ಜುನ್‌ ಕಿಶೋರ್‌ 720ರಲ್ಲಿ 720 ಅಂಕಗಳೊಂದಿಗೆ ದೇಶ ಹಾಗೂ ರಾಜ್ಯಕ್ಕೆ ಮೊದಲ ರ‍್ಯಾಂಕ್ ಪಡೆಯುವ ಮೂಲಕ ಅಮೋಘ ಸಾಧನೆ ಮಾಡಿದ್ದಾರೆ.
ಮೈಸೂರು ಮೂಲದ ಅರ್ಜುನ್‌ ಮಂಗಳೂರಿನ ವಳಚ್ಚಿಲ್‌ನಲ್ಲಿರುವ ಎಕ್ಸ್‌ಪರ್ಟ್‌ ಕಾಲೇಜಿನ ವಿದ್ಯಾರ್ಥಿಯಾಗಿದ್ದಾರೆ. ಇನ್ನು ಅರ್ಜುನ್‌ ಅವರ ಹೆತ್ತವರು ಕೂಡ ವೈದ್ಯರಾಗಿದ್ದಾರೆ.

ನಿರಂತರ ಸಾಧನೆಯ ಫಲ

ನಿರಂತರ ಪ್ರಯತ್ನ ಹಾಗೂ ಕಠಿಣ ಪರಿಶ್ರಮದಿಂದ ಈ ಸಾಧನೆ ಸಾಧ್ಯವಾಗಿದೆ. ಎಕ್ಸ್‌ಪರ್ಟ್‌ ಕಾಲೇಜಿನ ಬೋಧಕ ವೃಂದ, ಪೋಷಕರಿಂದ ಪ್ರೋತ್ಸಾಹ ಸಿಕ್ಕಿದೆ. ಮುಂದೆ ಸರ್ಜನ್‌ ಆಗುವ ಆಸೆ ಹೊಂದಿರುವುದಾಗಿ ತಮ್ಮ ಫಲಿತಾಂಶದಲ್ಲಿನ ಸಾಧನೆ ಬಗ್ಗೆ ಅರ್ಜುನ್‌ ಹೇಳಿದ್ದಾರೆ.

ರಾಜ್ಯದ ಮೂವರು ವಿದ್ಯಾರ್ಥಿಗಳ ಸಾಧನೆ!

ಅರ್ಜುನ್‌ ಕಿಶೋರ್‌ ಸೇರಿದಂತೆ ರಾಜ್ಯದ ಮೂವರು ನೀಟ್‌ನಲ್ಲಿ ದೇಶಕ್ಕೆ ಅಗ್ರ ರ‍್ಯಾಂಕ್ ಪಡೆದುಕೊಂಡಿದ್ದಾರೆ. ಬೆಂಗಳೂರಿನ ವಿ. ಕಲ್ಯಾಣ್‌, ಶ್ರೇಯಸ್‌ ಜೋಸೆಫ್‌ ಈ ಸಾಧನೆ ಮಾಡಿರುವ ಕರ್ನಾಟಕದ ಮತ್ತಿಬ್ಬರು ವಿದ್ಯಾರ್ಥಿಗಳು. ದೇಶದಲ್ಲಿ 14 ವಿದ್ಯಾರ್ಥಿನಿಯರ ಸಹಿತ ಒಟ್ಟು 67 ವಿದ್ಯಾರ್ಥಿಗಳು ಮೊದಲ ರ‍್ಯಾಂಕ್ ಹಂಚಿಕೊಂಡಿದ್ದಾರೆ.

ಕರಾವಳಿ ಕಾಲೇಜುಗಳ ಸಾಧನೆ

ಕರಾವಳಿಯ ಎಕ್ಸ್ಪರ್ಟ್, ಕಾರ್ಕಳದ ಕ್ರಿಯೇಟಿವ್, ಮೂಡುಬಿದಿರೆಯ ಆಳ್ವಾಸ್, ವೈಬ್ರ್ಯಾಂಟ್, ಗುರುವಾಯನಕೆರೆ ಎಕ್ಸಲ್, ಮೂಡುಬಿದಿರೆ ಎಕ್ಸಲೆಂಟ್ ಸೇರಿ ಕರಾವಳಿಯ ಹತ್ತಾರು ಕಾಲೇಜುಗಳ ವಿದ್ಯಾರ್ಥಿಗಳು ನೀಟ್ ಹಾಗೂ ಸಿಇಟಿಯಲ್ಲಿ ಸಾಧನೆ ಮಾಡಿದ್ದಾರೆ

Categories
inspiration ಜಿಲ್ಲಾ ವಾರ್ತೆ ಪ್ರತಿಭೆಗಳು ಮಂಗಳೂರು ಮಲ್ನಾಡ್ ಯಶಸ್ಸಿನ ಕಥೆಗಳು ರಾಜ್ಯ

ಎಕ್ಸೆಲ್ ನೀಟ್ ಟಾಪರ್ ಪ್ರಜ್ವಲ್..!

ಎಕ್ಸೆಲ್ ನೀಟ್ ಟಾಪರ್ ಪ್ರಜ್ವಲ್..!
– 720 ಅಂಕಗಳ ಪೈಕಿ 710 ಪಡೆದ ಸಾಧಕ ವಿದ್ಯಾರ್ಥಿ
– 10 ಲಕ್ಷ ರೂಪಾಯಿ ಕ್ಯಾಶ್ ಪ್ರೈಜ್ ಜೊತೆಗೆ ಗೌರವಾರ್ಪಣೆ

NAMMUR EXPRESS NEWS
ಬೆಳ್ತಂಗಡಿ: ರಾಷ್ಟ್ರೀಯ ವೈದ್ಯಕೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆಯಾದ ನೀಟ್ ನಲ್ಲಿ 720 ಅಂಕಗಳ ಪೈಕಿ 710ಅಂಕ ಪಡೆದ ಗುರುವಾಯನಕೆರೆ ಎಕ್ಸೆಲ್ ಪದವಿ ಪೂರ್ವ ಕಾಲೇಜಿನ ವಿದ್ಯಾರ್ಥಿಯಾದ ಪ್ರಜ್ವಲ್ ಎಚ್.ಎಂ ಗೆ ಕಾಲೇಜು ಆಡಳಿತ ಮಂಡಳಿಯ ಅಧ್ಯಕ್ಷರಾದ ಸುಮಂತ್ ಕುಮಾರ್ ಜೈನ್ ಅವರು 10 ಲಕ್ಷ ರೂಪಾಯಿ ಕ್ಯಾಶ್ ಪ್ರೈಜ್ ನ ಜೊತೆಗೆ ಗೌರವಾರ್ಪಣೆ ಸಲ್ಲಿಸಿದರು. ಎಕ್ಸೆಲ್ ಆವರಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಪ್ರಜ್ವಲ್ ಎಚ್.ಎಂ, ಹೆತ್ತವರಾದ ಮರಿಸ್ವಾಮಿ ಎಚ್.ಎಂ., ಸೌಮ್ಯ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.

ಆಡಳಿತ ಮಂಡಳಿಯ ಅಧ್ಯಕ್ಷರಾದ ಸುಮಂತ್ ಕುಮಾರ್ ಜೈನ್, ಕಾರ್ಯದರ್ಶಿ ಅಭಿರಾಮ್, ಪ್ರಾಂಶುಪಾಲ ಡಾ.ನವೀನ್ ಕುಮಾರ್ ಎಂ, ಆಡಳಿತ ಮಂಡಳಿಯ ಸಹನಾ ಜೈನ್, ಆಡಳಿತಾಧಿಕಾರಿ ಕೀರ್ತಿನಿಧಿ, ಶಾಂತಿರಾಜ್ ಜೈನ್, ಪ್ರಾಧ್ಯಾಪಕರಾದ ಶ್ರೀನಿಧಿ ರಾಜ್, ನಿಶಾ ಪೂಜಾರಿ, ವಿಲ್ಸನ್ ತಳ್ತೊಟ್ಟಿ, ಕೇಶವ್ ರಾವ್, ಡಾ.ಸತ್ಯನಾರಾಯಣ್ ಭಟ್, ಈಶ್ವರ್ ಶರ್ಮಾ, ಜೈಸ ಆಂಟನಿ, ಚಿಗುರು ಪ್ರಕಾಶ್, ಗ್ರಿಷಿನ್ ಡಿಸೋಜ, ಡಾ. ಆಸ್ಟಿನ್ ಡಿಸೋಜ, ಸಾರ್ವಜನಿಕ ಸಂಪರ್ಕಾಧಿಕಾರಿ ರಿಚರ್ಡ್ ಜೀವನ್ ಮೊರಾಸ್ ಮತ್ತಿತರ ಪ್ರಾಧ್ಯಾಪಕರು, ವಿದ್ಯಾರ್ಥಿಗಳು ಮೊದಲಾದವರು ಉಪಸ್ಥಿತರಿದ್ದರು

 

 

 

Categories
ಕೊಪ್ಪ ಮಲ್ನಾಡ್ ಯಶಸ್ಸಿನ ಕಥೆಗಳು ರಾಜ್ಯ

ಚಿನ್ನದ ಪದಕ ಗೆದ್ದ ಕೊಪ್ಪದ ಸ್ನೇಹಾ!

ಚಿನ್ನದ ಪದಕ ಗೆದ್ದ ಕೊಪ್ಪದ ಸ್ನೇಹಾ!
– 27 ನೇ ರಾಷ್ಟ್ರೀಯ ಫೆಡರೇಶನ್ ಹಿರಿಯರ ಅಥ್ಲೆಟಿಕ್ಸ್ ಸ್ಪರ್ಧೆ
– ಓಡಿಶಾದಲ್ಲಿ ನಡೆದ ಅಥ್ಲೆಟಿಕ್ಸ್ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆದ್ದ ಸ್ನೇಹಾ
– ಮಂಗಳೂರಿನಲ್ಲಿ ಆದಾಯ ತೆರಿಗೆ ಇಲಾಖೆಯಲ್ಲಿ ಕರ್ತವ್ಯ

NAMMUR EXPRESS NEWS
ಕೊಪ್ಪ: ಓಡಿಶಾದಲ್ಲಿ ನಡೆದ 27 ನೇ ರಾಷ್ಟ್ರೀಯ ಫೆಡರೇಶನ್ ಹಿರಿಯರ ಅಥ್ಲೆಟಿಕ್ಸ್ ಸ್ಪರ್ಧೆಯಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸಿದ ಚಿಕ್ಕಮಗಳೂರು ಜಿಲ್ಲೆಯ ಸ್ನೇಹಾ 100 ಮೀಟರ್ ಓಟದ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆದ್ದು ಮಲೆನಾಡಿಗೆ ಕೀರ್ತಿ ತಂದಿದ್ದಾರೆ. ಒಡಿಶಾದ ಭುವನೇಶ್ವರದಲ್ಲಿ ನಡೆದ ಅಥ್ಲೆಟಿಕ್ ಚಾಂಪಿಯನ್ ಶಿಪ್ 100 ಮೀಟರ್ ಓಟದಲ್ಲಿ 11 ಸೆಕೆಂಡ್ ನಲ್ಲಿ ಗುರಿ ತಲುಪಿ ಚಿನ್ನದ ಪದಕವನ್ನು ಗೆದ್ದಿದ್ದಾರೆ. ಮೂಲತಃ ಚಿಕ್ಕಮಗಳೂರು ಜಿಲ್ಲೆಯ ಕೊಪ್ಪ ತಾಲೂಕಿನ ಶಾನುವಳ್ಳಿ ಪಂಚಾಯಿತಿಯ ಸತ್ಯನಾರಾಯಣ ಎಸ್.ಎಸ್ ಹಾಗೂ ಶಾಲಿನಿ ಕೆ.ಎ ಅವರ ಪುತ್ರಿಯಾಗಿರುವ ಸ್ನೇಹಾ ಮಂಗಳೂರಿನಲ್ಲಿ ಆದಾಯ ತೆರಿಗೆ ಇಲಾಖೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

ರಾಷ್ಟ್ರ ಮಟ್ಟದಲ್ಲಿ ಹಲವು ಪ್ರಶಸ್ತಿ

ರಾಷ್ಟ್ರೀಯ ಕ್ರೀಡಾಕೂಟ 2023 ಗೋವಾದಲ್ಲಿ 100 ಮೀಟರ್ ಓಟದಲ್ಲಿ ಚಿನ್ನದ ಪದಕ ಮತ್ತು 4×100 ಮೀಟರ್ ರಿಲೇಯಲ್ಲಿ ಕಂಚು, ರಾಷ್ಟ್ರೀಯ ಮುಕ್ತ ಅಥ್ಲೆಟಿಕ್ ಚಾಂಪಿಯನ್ ಶಿಪ್ 2023-ಬೆಂಗಳೂರಿನಲ್ಲಿ 100 ಮೀಟರ್ ಓಟದಲ್ಲಿ ಬೆಳ್ಳಿ ಪದಕ, ದಸರಾ ಸಿಎಂ ಕಪ್ 2023-ಮೈಸೂರಿನಲ್ಲಿ 100 ಮೀಟರ್ ಓಟದಲ್ಲಿ ಚಿನ್ನದ ಪದಕ, ಆಲ್ ಇಂಡಿಯಾ ಇಂಟರ್ ಯೂನಿವರ್ಸಿಟಿ -ತಮಿಳುನಾಡು ಅಥ್ಲೆಟಿಕ್ಸ್ ನಲ್ಲಿ 100 ಮೀಟರ್ ಮತ್ತು 4×100 ಮೀಟರ್ ರಿಲೇಯಲ್ಲಿ ಬೆಳ್ಳಿ ಪದಕ, ದಕ್ಷಿಣ ವಲಯದ ಅಥ್ಲೆಟಿಕ್ ಚಾಂಪಿಯನ್ ಶಿಪ್ – ಚೆನ್ನೈ ನಲ್ಲಿ 100 ಮೀಟರ್ ಮತ್ತು 4×100 ಮೀಟರ್ ರಿಲೇಯಲ್ಲಿ ಚಿನ್ನದ ಪದಕವನ್ನು ಕಳೆದ ವರ್ಷ ಪಡೆದಿದ್ದಾರೆ. ಬೆಂಗಳೂರು, ತಮಿಳುನಾಡು, ಗೋವಾ ಸೇರಿದಂತೆ ಅನೇಕ ಕಡೆಗಳಲ್ಲಿ ನಡೆದ ಕ್ರೀಡಾಕೂಟದಲ್ಲಿ ಭಾಗವಹಿಸಿ ಚಿನ್ನ, ಬೆಳ್ಳಿ ಪದಕಗಳನ್ನು ಗೆದ್ದು ಮಲೆನಾಡಿಗೆ ಹೆಸರು ತಂದಿದ್ದಾರೆ.

Categories
ಉಡುಪಿ ಕರಾವಳಿ ಯಶಸ್ಸಿನ ಕಥೆಗಳು ರಾಷ್ಟ್ರೀಯ ವಾರ್ತೆ

ಉಡುಪಿ ಹುಡುಗ ಈಗ ಅಮೇರಿಕಾದಲ್ಲಿ ಬಾಸ್!

ಉಡುಪಿ ಹುಡುಗ ಈಗ ಅಮೇರಿಕಾದಲ್ಲಿ ಬಾಸ್!
– ಅಮೆರಿಕದಲ್ಲಿ ಜನಿಸಿ ಸ್ಕ್ಯಾನ್ ಫರ್ಡ್ ವಿವಿಯಿಂದ ಎಂಎಸ್ ಪದವಿ ಪಡೆದಿರುವ ಕನ್ನಡಿಗ
– ಕರಾವಳಿ ಮೂಲದ ಕಾರ್ತಿಕ್ ಕಂಟೆಂಟ್‌ಫುಲ್ ಎಂಬ ಕಂಪೆನಿಯ ಸಿಇಒ

NAMMUR EXPRESS NEWS
ಉಡುಪಿ: ಕನ್ನಡದ ಮಣ್ಣು ಅನೇಕ ಸಾಧಕರನ್ನು ವಿಶ್ವಕ್ಕೆ ಕೊಟ್ಟಿದೆ. ಅದರಲ್ಲೂ ಕರಾವಳಿ ಪ್ರತಿಭೆಗಳ ಕಣಜ. ಇದೀಗ ಅಮೆರಿಕದ ಕಂಟೆಂಟ್‌ಫುಲ್ ಎಂಬ ಕಂಪೆನಿಯ ಸಿಇಒ ಆಗಿ ಉಡುಪಿ ಮೂಲದ ಕಾರ್ತಿಕ್ ರಾವ್ ಇತ್ತೀಚೆಗೆ ನೇಮಕಗೊಂಡಿದ್ದಾರೆ. ಉಡುಪಿ ತಾಲೂಕು ಅಲೆವೂರು ಮೂಲದವರಾದ ಅಮೆರಿಕ ನಿವಾಸಿ ದಿವಂಗತ ಡಾ. ಸುಬ್ರಹ್ಮಣ್ಯ ರಾವ್ ಅವರ ಮಗನಾಗಿರುವ ಕಾರ್ತಿಕ್, ಉನ್ನತ ಹುದ್ದೆಗೇರಿರುವುದು ನಾಡಿನ ಹೆಮ್ಮೆಯಾಗಿದೆ. ಮೈಕ್ರೋಸಾಫ್ಟ್, ಆಲ್ಬಾ ಬೆಟ್, ನೊವಾರ್ಟಿಸ್, ಎಡೋಬ್, ಐಬಿಎಂ ಸಹಿತ 30ಕ್ಕೂ ಅಧಿಕ ಜಾಗತಿಕ ಕಂಪನಿಗಳಿಗೆ ಭಾರತೀಯರು ಯಶಸ್ವಿಸಿ ಇಒಗಳಾಗಿದ್ದು, ಈಗ ಉಡುಪಿ ಮೂಲದ ಕಾರ್ತಿಕ್ ರಾವ್ ಸಾಧಕರ ಸಾಲಿಗೆ ಸೇರಿದ್ದಾರೆ. ಅಮೆರಿಕದ ಕಂಟೆಂಟ್‌ಫುಲ್ (ಡೆನ್ವರ್ ಆಂಡ್ ಸಾನ್ ಫ್ರಾನ್ಸಿಸ್ಕೊ ಆಂಡ್ ಬರ್ಲಿನ್) ಕಂಪನಿಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಯಾಗಿ ಕಾರ್ತಿಕ್ ಅಧಿಕಾರ ವಹಿಸಿಕೊಂಡಿದ್ದಾರೆ. 2019ರಿಂದ ಸಿಇಒ ಆಗಿದ್ದ ಸ್ಟೀವ್ ಫ್ಲೋವನ್ ಬದಲಿಗೆ ಅವರು ಕಂಪನಿಯನ್ನು ಮುನ್ನಡೆಸಲಿದ್ದಾರೆ.

ಹಲವು ಪ್ರಮುಖ ಹುದ್ದೆ ಅಲಂಕರಿಸಿದ್ದ ಕಾರ್ತಿಕ್

ಉಡುಪಿ ತಾಲೂಕು ಅಲೆವೂರು ಮೂಲದ ಅಮೆರಿಕ ನಿವಾಸಿ ದಿ. ಡಾ. ಸುಬ್ರಹ್ಮಣ್ಯ ರಾವ್ ಅವರ ಪುತ್ರ ಕಾರ್ತಿಕ್ ರಾವ್ (46) ಅಮೆರಿಕದಲ್ಲಿ ಹುಟ್ಟಿ ಎಂಎಸ್ (ಸ್ಕ್ಯಾನ್ ಫರ್ಡ್ ವಿವಿಯಿಂದ ಇಂಡಸ್ಟ್ರಿಯಲ್ ಎಂಜಿನಿಯರಿಂಗ್ ) ಪೂರೈಸಿದ್ದಾರೆ. 20 ವರ್ಷಗಳಿಂದ ನಾಯಕತ್ವದ ಅನುಭವದೊಂದಿಗೆ ಕಂಪನಿಯ ಸ್ಥಾಪಕ, ನಿರ್ವಹಣಾ ಕಾರ್ಯನಿರ್ವಾಹಕನಾಗಿ ಕಾರ್ಯನಿರ್ವಹಿಸಿದ ಅನುಭವ ಹೊಂದಿದ್ದಾರೆ. ಕಾರ್ತಿಕ್ ಸಂಸ್ಥಾಪಕ ಮತ್ತು ಸಿಇಒ ಆಗಿದ್ದ ಕ್ಲೋಡ್ ಮಾನಿಟರಿಂಗ್‌ಗೆ ಸಂಬಂಧಿಸಿದ ಸಿಗ್ನಲ್ ಎಫ್ ಎಕ್ಸ್ ಕಂಪನಿಯನ್ನು ಇತ್ತೀಚೆಗೆ ಸ್ಪ್ಲಂಕ್ ಕಂಪನಿಯು 1.05 ಬಿಲಿಯನ್ ಡಾಲರ್ ಮೊತ್ತಕ್ಕೆ ಸ್ವಾಧೀನಪಡಿಸಿಕೊಂಡಿದೆ. ವಿಎಂವೇರ್ ಸಂಸ್ಥೆಯ ಪ್ರೊಡಕ್ಟ್ ಮ್ಯಾನೇಜ್‌ಮೆಂಟ್ ಮತ್ತು ವರ್ಲ್ಡ್ ವೈಡ್ ಮಾರ್ಕೆಟಿಂಗ್ ವಿಭಾಗದ ಉಪಾಧ್ಯಕ್ಷರಾಗಿದ್ದ ಕಾರ್ತಿಕ್, ಕಂಪನಿಯ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಅಪ್ಪ, ಅಜ್ಜನೂ ಪ್ರತಿಭಾವಂತರು!

ತಂದೆ, ಉಡುಪಿ ಅಲೆವೂರಿನ ದಿವಂಗತ ಡಾ. ಎಲ್. ಸುಬ್ರಹ್ಮಣ್ಯ ರಾವ್ ಚೆನ್ನೈನ ಸ್ಪ್ಯಾನ್ಸಿ ಮೆಡಿಕಲ್ ಕಾಲೇಜಿನಿಂದ ಚಿನ್ನದ ಪದಕ ಪಡೆದಿದ್ದು, ಕ್ಯಾನ್ಸರ್ ಸ್ಪೆಷಲಿಸ್ಟ್ ಆಗಿದ್ದರು. ತಾಯಿ ರಜಿ ರಾವ್ ಹಿರಿಯ ಚಲನಚಿತ್ರ ನಿರ್ದೇಶಕ ಬಿ. ವಿಠಲ ಆಚಾರ್ಯರ ಪುತ್ರಿ. ಅಜ್ಜ ದಿವಂಗತ ಜಿ. ಲಕ್ಷ್ಮೀನಾರಾಯಣ್, ಇಂಡಿಯನ್ ಬ್ಯಾಂಕ್ ಚೇರ್ ಮೆನ್ ಮತ್ತು ಎಂಡಿಯಾಗಿದ್ದರು.

Categories
ಮಲ್ನಾಡ್ ಯಶಸ್ಸಿನ ಕಥೆಗಳು

ಹಳ್ಳಿ ಔಷಧಿ ಕೊಟ್ಟು ನೂರಾರು ಮಂದಿ ಜೀವ ಉಳಿಸಿದರು!

ಹಳ್ಳಿ ಔಷಧಿ ಕೊಟ್ಟು ನೂರಾರು ಮಂದಿ ಜೀವ ಉಳಿಸಿದರು!
– ತೀರ್ಥಹಳ್ಳಿ ತಾಲೂಕು ಮೃಗವಧೆ ಪುರುಷೋತ್ತಮ್ ವೈದ್ಯ ಸೇವೆ
– ಆಯುರ್ವೇದ ಪಂಡಿತನ ಸೇವೆಗೆ ನಮ್ಮ ಅಕ್ಷರ ನಮನ

ಸಂದರ್ಶನ: ಮನಿಷಾ
ಮಲೆನಾಡು ಪ್ರಕೃತಿಯ ತವರೂರು, ಇಲ್ಲಿನ ಪ್ರಕೃತಿ ಸಹಾಯದಿಂದ ದೊರಕುವ ಸಸ್ಯ ಮೂಲಿಕೆಗಳಿಂದ ತಮಗೆ ತಿಳಿದ ಆಯುರ್ವೇದ ಔಷಧಿ ಮೂಲಕ ನೂರಾರು ಜನ ಜೀವ ಉಳಿಸುವ ಕಾರ್ಯದಲ್ಲಿ ತೊಡಗಿರುವ ಮಲೆನಾಡಿನ ಆಯುರ್ವೇದ ತಜ್ಞ ಮೃಗವಧೆ ಮೂಲದ ಪುರುಷೋತ್ತಮ್.

ನೂರಾರು ಜನರಿಗೆ ಸೇವೆ

ತೀರ್ಥಹಳ್ಳಿ ತಾಲೂಕಿನ ಮೃಗವಧೆ ಗ್ರಾಮದ ಕಾನುಕೊಪ್ಪ ವಾಸಿಯಾದ ಪುರುಷೋತ್ತಮ್ ಅವರ ತಂದೆ ಹಿರಿಯಣ್ಣ ಹಾಗೂ ತಾಯಿ ಶಾರದಮ್ಮ ಅವರ ಕೊನೆಯ ಪುತ್ರ, ಪುರುಷೋತ್ತಮ್ ಅವರ ತಂದೆ ಸಹ ಆಯುರ್ವೇದವನ್ನು ಕಲಿತಿದ್ದು ಸುತ್ತಮುತ್ತದ ಹಳ್ಳಿಗಳಲ್ಲಿನ ಜನರ ಹತ್ತು ಹಲವು ಖಾಯಿಲೆಗಳಿಗೆ ಚಿಕಿತ್ಸೆ ನೀಡುತ್ತಿದ್ದರು. ತಂದೆಯಿಂದ ಆಯುರ್ವೇದ ವಿದ್ಯೆಯನ್ನು ಕಲಿತು ತಂದೆಯಂತೆ ಹಲವು ಜನರ ಜೀವವನ್ನು ಉಳಿಸಿ ತಂದೆಗೆ ತಕ್ಕ ಮಗ ಎನಿಸಿಕೊಂಡಿದ್ದಾರೆ ಪುರುಷೋತ್ತಮ್.

– ಎಲೆ ಮರೆ ಕಾಯಿಯಂತೆ ಯಾರಿಗೂ ತಿಳಿಯದೆ ಜನರ ಸೇವೆ..!

ಪುರುಷೋತ್ತಮ್ ಅವರು ಮೂಲತಃ ಪ್ರಗತಿಪರ ಕೃಷಿಕರು ಆಗಿದ್ದು ತಮ್ಮ ಬಿಡುವಿನ ವೇಳೆಯಲ್ಲಿ ತಂದೆಯಿಂದ ತಿಳಿದ ವಿದ್ಯೆಯನ್ನು ಯಾವುದೇ ಪ್ರತಿಫಲಾಪೇಕ್ಷೆ ಇಲ್ಲದೆ ಜನ ಸೇವೆ ಮಾಡುತ್ತಿದ್ದಾರೆ. ಪುರುಷೋತ್ತಮ್ ಅವರು ಪ್ರಮುಖವಾಗಿ ಯಾವುದೆ ತರಹದ ವಿಷಪೂರಿತ ಹಾವು ಕಚ್ಚಿದರೂ ಚಿಕಿತ್ಸೆಯನ್ನು ನೀಡಿ ಸೈ ಎನಿಸಿಕೊಂಡಿದ್ದಾರೆ. ಇದರಿಂದ ನೂರಾರು ಮಂದಿಯ ಜೀವವನ್ನು ರಕ್ಷಿಸಿದ್ದಾರೆ.

ಸರ್ಪಸುತ್ತು, ಅಗ್ನಿಸುತ್ತು, ಚರ್ಮ ರೋಗಕ್ಕೆ ಮದ್ದು

ಸರ್ಪಸುತ್ತು ಅಥವಾ ಅಗ್ನಿಸುತ್ತು , ಎಂತದೇ ಚರ್ಮ ಸಂಬಂಧಿ ಕಾಯಿಲೆಗೂ ಸಹ ಪರಿಹಾರವನ್ನು ನೀಡುತ್ತಾರೆ. ಮಕ್ಕಳು ಇಲ್ಲದ ದಂಪತಿಗೆ ತಮ್ಮ ಆಯುರ್ವೇದ ವಿದ್ಯೆಯಿಂದ ಸಂತಾನ ಭಾಗ್ಯವನ್ನು ಕಲ್ಪಿಸಿದರೆ, ಮಹಿಳೆಯರ ಅನೇಕ ಆರೋಗ್ಯ ಸಂಬಂಧಿ ಕಾಯಿಲೆಗಳಿಗೂ ಮದ್ದು ನೀಡುತ್ತಾರೆ, ಹೊಟ್ಟೆಗೆ ಹಾಕಿದ ಮದ್ದು ತೆಗೆಯುತ್ತಾರೆ, ಅಷ್ಟೇ ಅಲ್ಲದೆ ತಲೆನೋವು, ಮೈ ಕೈ ನೋವು, ಮಂಡಿ ನೋವು ಹೀಗೆ ನಾನಾ ರೀತಿಯ ಕಾಯಿಲೆಗಳಿಗೆ ಪರಿಹಾರವನ್ನು ನೀಡುತ್ತಾರೆ. ಇವರಿಂದ ಚಿಕಿತ್ಸೆಯನ್ನು ಪಡೆಯಲು ಅಕ್ಕ- ಪಕ್ಕದ ಹಳ್ಳಿಯಿಂದ ಹಿಡಿದು ನಾನಾ ಜಿಲ್ಲೆಗಳಿಂದ ಜನರೂ ಬರುತ್ತಾರೆ. ಇವರನ್ನು ಆರಿಸಿ ಬಂದವರಿಗೆ ಅವರ ಸಮಸ್ಯೆಯನ್ನು ಪರಿಹರಿಸುತ್ತಾರೆ.

ಈಗಿನ ಕಾಲದಲ್ಲಿ ಹತ್ತು ರೂಪಾಯಿ ಕೊಟ್ಟರೂ ನೂರು ಜನರ ಬಳಿ ಹೇಳಿ ತಿರುಗುವ ಜನರ ಮದ್ಯೆ ಇಷ್ಟೆಲ್ಲಾ ವಿದ್ಯೆಯಿದ್ದರೂ ಸಹ ಯಾವುದನ್ನೂ ಪ್ರಚಾರ ಮಾಡದೆ ತಮ್ಮ ಸೇವೆಯನ್ನು ದೇವರ ಸೇವೆ ಎಂದು ಭಾವಿಸಿ ಸಹಾಯ ಮಾಡುತ್ತಿರುವ ಇವರು ಎಲ್ಲರಿಗೂ ಸ್ಫೂರ್ತಿಯಾಗಿದ್ದಾರೆ.

ತಮ್ಮ ಆಯುರ್ವೇದ ವಿದ್ಯೆ ಧಾರೆ ಎರೆಯುವುದ್ದಕ್ಕೆ ಸಿದ್ದ

ಹಿಂದಿನ ಕಾಲದಲ್ಲಿ ಆಯುರ್ವೇದಕ್ಕೇ ಬಳಸುತ್ತಿದ್ದ ಗಿಡ ಮೂಲಿಕೆಗಳನ್ನು ಯಾರಿಗೂ ಹೇಳುತ್ತಿರಲಿಲ್ಲ. ಯಾರಿಗಾದರೂ ಹೇಳಿದರೆ ಕೊಟ್ಟ ಔಷಧಿ ಸರಿಯಾಗಿ ಕೆಲಸ ಮಾಡುವುದಿಲ್ಲ ಎಂದು ಹೆದರಿಸಿ ಆಯುರ್ವೇದ ಎನ್ನುವುದು ಕೆಲವರ ಕೈ ಮುಷ್ಟಿಯಲ್ಲಿ ಇರುವಂತೆ ಮಾಡಿದ್ದರು. ಆದರೆ ಪುರುಷೋತ್ತಮ್ ಅವರು ತಾವು ಕಲಿತ ವಿದ್ಯೆಯನ್ನು ಅರ್ಹ ಮತ್ತೂ ಸಮರ್ಥ ವ್ಯಕ್ತಿಗೆ ಧಾರೆ ಎರೆಯುದಕ್ಕೆ ಸಿದ್ದವಿದ್ದಾರೆ. ಇವರು ಈಗಲೇ ಅತಿ ತುರ್ತು ಸಂದರ್ಭದಲ್ಲಿ ಬಳಸುವ ಔಷಧಿಯ ಬಗ್ಗೆ ತಮ್ಮ ಹೆಂಡತಿ ಮತ್ತು ಮಗನಿಗೆ ಹೇಳಿಕೊಟ್ಟಿದ್ದಾರೆ. ಅವರು ಸಹ ತುಂಬಾ ಶ್ರದ್ಧೆಯಿಂದ ಕಲಿತಿದ್ದಾರೆ.

ಪುರುಷೋತ್ತಮ್ ಅವರ ಸಾಧನೆಯನ್ನು ಗುರುತಿಸಿ ಅನೇಕ ಗೌರವ ಸಂದಿವೆ. 2007ರ ಆಸುಪಾಸಿನಲ್ಲಿ ಆಕಾಶವಾಣಿ ಭದ್ರಾವತಿಯಲ್ಲಿ ಎರಡು ಬಾರಿ ಸಂದರ್ಶನವನ್ನು ನೀಡಿದ್ದಾರೆ. ಆಯುರ್ವೇದ ಔಷಧದ ಈ ಸಾಧನೆಯನ್ನು ಗುರುತಿಸಿ ಮೃಗವಧೆ ಶಂಕರ ಯುವಕ ಸಂಘದ ವತಿಯಿಂದ ಅಂದಿನ ಗೃಹ ಸಚಿವರಾದ ಆರಗ ಜ್ಞಾನೇಂದ್ರ ಅವರಿಂದ ಸನ್ಮಾನವನ್ನೂ ಪಡೆದಿದ್ದಾರೆ.

ಗಿಡ ಮೂಲಿಕೆಗಳ ವಿನಾಶ: ಬೇಸರ

ಜನ ಆಧುನಿಕ ನಾಗರಿಕತೆಯ ಕಡೆ ಪದಾರ್ಪಣೆ ಮಾಡಿದಂತೆ ತನಗೆ ತಿಳಿಯದೆ ಪ್ರಕೃತಿಯ ನಾಶವನ್ನು ಮಾಡುತ್ತಾ ಹೋಗುತ್ತಾನೆ ಅದರ ಫಲವಾಗಿ ಆಯುರ್ವೇದ ಗಿಡ ಮೂಲಿಕೆಗಳ ಪ್ರಮಾಣ ಕಡಿಮೆ ಆಗುತ್ತಿದೆ. ಆದರೂ ಹಳ್ಳಿಯ ಕಡೆ ಸ್ವಲ್ಪ ಮಟ್ಟಿಗೆ ಗಿಡ ಮೂಲಿಕೆಗಳು ಇನ್ನೂ ಸಹ ಜೀವಂತವಾಗಿವೆ. ಗಿಡ ಮರ ಉಳಿಸಬೇಕು ಎನ್ನುತ್ತಾರೆ ಪುರುಷೋತ್ತಮ್.

ನಮ್ಮಲ್ಲೇ ಇದೆ ಔಷಧ!

ನಮ್ಮ ಸುತ್ತಮುತ್ತ ಇರುವ ಎಷ್ಟೋ ಗಿಡಗಳೂ ಔಷಧಿಯ ಗುಣವನ್ನು ಹೊಂದಿರುತ್ತದೆ ಆದರೆ ಇದರ ಬಗ್ಗೆ ಯಾರಿಗೂ ಸಹ ತಿಳಿದಿಲ್ಲ. ಉದಾಹರಣೆಗೆ
*ಒಂದಲಗ ಗಿಡ: ಇದು ತಲೆ ಕೂದಲು ಉದುರುವ ಸಮಸ್ಯೆಯನ್ನು ಪರಿಹಾರ ಮಾಡುತ್ತದೆ, ಬುದ್ದಿ ಮಟ್ಟವನ್ನು ಹೆಚ್ಚಿಸುತ್ತದೆ.
*ಗಾಂಧಾರಿ ಮೆಣಸು (ಜೀರಿಗೆ ಮೆಣಸು): ವಾಯು ಸಮಸ್ಯೆಯನ್ನು ಪರಿಹಾರ ಮಾಡುತ್ತದೆ, ದೇಹಕ್ಕೆ ತಂಪು ನೀಡುತ್ತದೆ, ಹಾವು ಕಚ್ಚಿದ ಔಷಧಿಗೆ ಬಳಸುತ್ತಾರೆ,
*ಗರಕೆ ಕುಡಿ: ಇದು ಸಣ್ಣ ಹೊಟ್ಟೆ ನೋವನ್ನು ಕಡಿಮೆ ಮಾಡುತ್ತದೆ , ತಲೆ ಕೂದಲು ಉದುರುವದನ್ನು ಕಡಿಮೆ ಮಾಡುತ್ತದೆ .
*ನಾಚಿಕೆಗಿಡ (ಮುಟ್ಟಿದರೆ ಮುನಿ):ಇದು ಕೂಡ ಒಂದು ಗಿಡ ಮೂಲಿಕೆ ನಂಜು ಕಡಿಮೆಮಾಡುತ್ತದೆ, ನೋವಿನ ಎಣ್ಣೆ ಮಾಡಲೂ ಬಳಸುತ್ತಾರೆ.

ಸುಖಿ ಕುಟುಂಬದ ಎಲ್ಲರ ಸಹಕಾರ

ಪ್ರಸ್ತುತ ಪುರುಷೋತ್ತಮ್ ಅವರ ಹೆಂಡತಿ ಗೀತಾ ಮತ್ತೂ ಮಗ ನಾಗಭರಣ ಅವರ ಜೊತೆ ತಮ್ಮ ಸುಖ ಜೀವನವನ್ನು ನಡೆಸುತ್ತಿದ್ದಾರೆ. ಇವರ ಸಾಧನೆ ಬರೀ ಹಳ್ಳಿಗೆ ಸೀಮಿತವಾಗದೆ ಎಲ್ಲಾ ಕಡೆ ಹರಡಬೇಕು. ಇವರು ಕಲಿತ ವಿದ್ಯೆ ಪ್ರತಿಫಲವನ್ನು ಅನೇಕರೂ ಪಡೆಯಬೇಕು ಎಂಬುದೂ ಪುರುಷೋತ್ತಮ್ ಅವರ ಆಸೆ.

ಯಾವುದೆ ತರಹದ ಆರೋಗ್ಯದ ಸಮಸ್ಯೆಯಿದ್ದಲ್ಲಿ ಇವರನ್ನು ಸಂಪರ್ಕಿಸಬಹುದು, ತಮ್ಮ ಸಮಸ್ಯೆಯನ್ನು ಪರಿಹರಿಸಿಕೊಳ್ಳಿ..

ಪುರುಷೋತ್ತಮ್ ಮೃಗವಧೆ
ಆಯುರ್ವೇದ ಗಿಡಮೂಲಿಕೆ ತಜ್ಞರು

-9449793274
-9449593274