Month: November 2023

ಲೋಕೇಶ್ ಕರಕುಚ್ಚಿ ಅವರಿಗೆ ಪ್ರಶಸ್ತಿ
– ಮಹಾತ್ಮ ಜೋತಿಬಾ ಪುಲೆ ರಾಷ್ಟ್ರೀಯ ಸಧ್ಬಾವನ ಪುರಸ್ಕಾರ
– ಸಹಕಾರಿ ಕ್ಷೇತ್ರದ ಸಾಧನೆ: ಡಿ.10ಕ್ಕೆ ಪ್ರಶಸ್ತಿ ಪ್ರದಾನ

NAMMUR EXPRESS NEWS
ತೀರ್ಥಹಳ್ಳಿ: ಯುವ ಸಹಕಾರಿ ಲೋಕೇಶ ಕರಕುಚ್ಚಿ ಅವರು ಮಹಾತ್ಮ ಜೋತಿಬಾ ಪುಲೆ ರಾಷ್ಟ್ರೀಯ ಸಧ್ಬಾವನ ಪುರಸ್ಕಾರಕ್ಕೆ ಭಾಜನರಾಗಿದ್ದಾರೆ. ಹಾಲು ಉತ್ಪಾದಕರ ಸಂಘ ಕಲ್ಲುಕೊಪ್ಪ, ಮಾಜಿ ಅಧ್ಯಕ್ಷರಾಗಿ ಹಣಗೆರೆ ಗ್ರಾಮ ಪಂಚಾಯತಿಯಲ್ಲಿ ಸಲ್ಲಿಸಿದ ಸೇವೆ, ಸಾಮಾಜಿಕ ಕೆಲಸ ಪರಿಗಣಿಸಿ ಈ ಪ್ರಶಸ್ತಿ ನೀಡಲಾಗಿದೆ. ರಾಜಕೀಯ ಮತ್ತು ಪರಿಸರ ಸಂರಕ್ಷಣೆ ಮತ್ತು ಸಹಕಾರ ಕ್ಷೇತ್ರದ ಸೇವೆಗೆ ಪ್ರಸ್ತುತ ವರ್ಷದ “ಮಹಾತ್ಮ ಜೋತಿಬಾ ಪುಲೆ ರಾಷ್ಟ್ರೀಯ ಸಧ್ಬಾವನ ಪುರಸ್ಕಾರ – 2023 ಪ್ರಶಸ್ತಿ ಲಭಿಸಿದೆ. ಡಿಸೆಂಬರ್ 10 ನೇ ತಾರೀಖು ದೆಹಲಿಯ ಕಾರ್ಯಕ್ರಮದ ಬಗ್ಗೆ ದೆಹಲಿಯ ರಾಷ್ಟ್ರೀಯ ಕಾರ್ಯದರ್ಶಿಗಳು ಪತ್ರದ ಮೂಲಕ ಮಾಹಿತಿ ರವಾನಿಸುತ್ತಾರೆ. ಸಹಕಾರಿ ನಾಯಕ ಮಂಜುನಾಥ ಗೌಡ ಶಿಷ್ಯರಾಗಿದ್ದಾರೆ.

ತೀರ್ಥಹಳ್ಳಿ ಸಾಧಕರಿಗೆ ಸನ್ಮಾನದ ಹಿರಿಮೆ!
– ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಸಾಧಕರಿಗೆ ಗೌರವ
– 13 ಮಂದಿಯ ಸಾಧನೆಗೆ ತಲೆದೂಗಿದ ತೀರ್ಥಹಳ್ಳಿ ಜನ

NAMMUR EXPRESS NEWS
ತೀರ್ಥಹಳ್ಳಿ: ತೀರ್ಥಹಳ್ಳಿ ತಾಲೂಕು 10ನೇ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ತೀರ್ಥಹಳ್ಳಿ ಮೂಲದ 13 ಮಂದಿ ಸಾಧಕರನ್ನು ಸನ್ಮಾನಿಸಿ ಗೌರವಿಸಲಾಯಿತು. ತೀರ್ಥಹಳ್ಳಿಯ ವಿವಿಧ ಕ್ಷೇತ್ರಗಳ 13 ಸಾಧಕರಿಗೆ ಗೌರವಾರ್ಪಣೆ ಇಡೀ ಸಮ್ಮೇಳನದ ಗೌರವ ಹೆಚ್ಚಿಸಿತು. ಪ್ರಗತಿಪರ ಕೃಷಿಕ ಕೂಳೂರು ಸತ್ಯನಾರಾಯರಾವ್, ಆರಗದ ಸಮಾಜ ಸೇವಕಿ ನೈಜಲ ಪಟಮಕ್ಕಿ ರತ್ನಾಕರ್, ಪರಿಸರವಾದಿ ತೀರ್ಥಹಳ್ಳಿ ಕೆ ಜಿ.ಶ್ರೀಧರ್, ಇಂಡಸ್ ಹರ್ಬ್ ಆಡಳಿತ ನಿರ್ದೇಶಕ ರವೀಂದ್ರ ತುಂಬರಮನೆ, ಸಮಾಜ ಸೇವಕಿ ಸುಚರಿತ ಚಂದ್ರ, ವಿಟೆಕ್ ಸಮೂಹ ಸಂಸ್ಥೆಗಳ ಮುಖ್ಯಸ್ಥ ವಿಶ್ವನಾಥ ಕುಂಟುವಳ್ಳಿ, ಉಡುಪಿ ಹೈಟೆಕ್‌ ಆಸ್ಪತ್ರೆಯ ನರರೋಗ ತಜ್ಞ ವಿನೋದ್ ಕುಮಾರ್, ಮುಖ್ಯಮಂತ್ರಿಗಳ ಚಿನ್ನದ ಪದಕ ಪುರಸ್ಕೃತರಾದ ಗಸ್ತು ವನಪಾಲಕ ರಾಮಚಂದ್ರ (ಅಣ್ಣಯ್ಯ), ಸಮಾಜ ಸೇವಕ ಕೋಣಂದೂರು ಅಶೋಕ್ ಕೆ.ಇ, ಕಸಾಪ ಸದಸ್ಯರು, ಕೃಷಿಕ ಸರುವಿನಕೊಪ್ಪ ಸತೀಶ್, ರಾಷ್ಟ್ರೀಯ ವಾಲಿಬಾಲ್ ಆಟಗಾರ ಆರ್ಯನ್ ಅನಿಲ್ ಕುರುವಳ್ಳಿ, ರಾಷ್ಟ್ರೀಯ ಚೆಸ್ ಆಟಗಾರ್ತಿ ಸಾನ್ವಿತಾ ಇವರನ್ನು ಸನ್ಮಾನಿಸಲಾಯಿತು. ಇಡೀ ಸಭೆ ಎಲ್ಲರ ಸಾಧನೆಗೆ ಚಪ್ಪಾಳೆ ತಟ್ಟಿತು.

ರಾಷ್ಟ್ರ ಮಟ್ಟದಲ್ಲಿ ಸಾಧನೆ ಮಾಡಿದ ರಜತ!
– ತೀರ್ಥಹಳ್ಳಿ ಹುಡುಗಿ ಯೋಗಾಸನದಲ್ಲಿ ಆರನೇ ಸ್ಥಾನ
– ಡಿ.1ಕ್ಕೆ ತೀರ್ಥಹಳ್ಳಿಯಲ್ಲಿ ಅದ್ದೂರಿ ಸ್ವಾಗತ
– ಮಲೆನಾಡ ಸಾಧಕಿ ರಜತಗೆ ಅಭಿನಂದನೆಗಳು

NAMMUR EXPRESS NEWS
ತೀರ್ಥಹಳ್ಳಿ: ಸರ್ಕಾರಿ ಬಾಲಿಕಾ ಪದವಿ ಪೂರ್ವ ಕಾಲೇಜಿನ ಪ್ರೌಢ ಶಾಲಾ ವಿಭಾಗದ 10ನೇ ತರಗತಿಯಲ್ಲಿ ಓದುತ್ತಿರುವ ರಜತ ಡಿ. ತ್ರಿಪುರಾ ರಾಜ್ಯದ ಅಗರ್ತಲಾದಲ್ಲಿ ನ.22ರಿಂದ 27ರವರೆಗೆ ಸ್ಕೂಲ್ ಗೇಮ್ಸ್ ಫೆಡರೇಷನ್ ಆಫ್ ಇಂಡಿಯಾ ವತಿಯಿಂದ ನಡೆದ ರಾಷ್ಟ್ರಮಟ್ಟದ ಯೋಗಾಸನದಲ್ಲಿ ಭಾಗವಹಿಸಿ ಆರನೇ ಸ್ಥಾನ ಪಡೆದು ಸಾಧನೆ ಮಾಡಿದ್ದಾಳೆ. ಡಿಸೆಂಬರ್ 1ರಂದು ತೀರ್ಥಹಳ್ಳಿ ನಗರಕ್ಕೆ ಆಗಮಿಸುತ್ತಿರುವ ಈ ವಿದ್ಯಾರ್ಥಿನಿಯನ್ನು ತೀರ್ಥಹಳ್ಳಿಯ ಕ್ಷೇತ್ರ ಶಿಕ್ಷಣಾಧಿಕಾರಿಗಳು, ತಾಲೂಕು ದೈಹಿಕ ಪರಿವೀಕ್ಷಕರು, ಶಾಲೆಯ ಉಪಪ್ರಾಂಶುಪಾಲರು, ಶಿಕ್ಷಕರು, ಎಸ್ ಡಿ ಎಂ ಸಿ ಅಧ್ಯಕ್ಷರು ಹಾಗೂ ಸದಸ್ಯರು ಹಾಗೂ ಶಾಲೆಯ ಎಲ್ಲಾ ಸಿಬ್ಬಂದಿ ವರ್ಗದವರು ಅಭಿನಂದಿಸಿದ್ದಾರೆ.

ಸಾಧನೆಯ ಹಾದಿಯಲ್ಲಿ ರಜತ

ವಿದ್ಯಾರ್ಥಿನಿಯು 2022 – 23ನೇ ಸಾಲಿನ SGFI ಯೋಗಾಸನದಲ್ಲಿಯೂ ರಾಷ್ಟ್ರಮಟ್ಟಕ್ಕೆ ಆಯ್ಕೆಯಾಗಿದ್ದು ಆ ಸಾಲಿನಲ್ಲಿ ರಾಷ್ಟ್ರ ಮಟ್ಟದ ಸ್ಪರ್ಧೆಗಳು ನಡೆದಿರಲಿಲ್ಲ, ಇದೇ ಸಾಲಿನಲ್ಲಿ ರಾಷ್ಟ್ರಮಟ್ಟದ ಯೋಗ ಒಲಂಪಿಯಾಡ್ ನಲ್ಲಿಯೂ ಭಾಗವಹಿಸಿ ಅತ್ಯುತ್ತಮ ಪ್ರದರ್ಶನ ನೀಡಿರುವುದು ಹೆಮ್ಮೆಯ ವಿಷಯ. ಎಡಗೈ ಮತ್ತು ಬಲಗೈ ಎರಡು ಕೈಗಳಲ್ಲಿಯು ಸುಲಲಿತವಾಗಿ ಬರೆಯಬಲ್ಲ ಈ ವಿದ್ಯಾರ್ಥಿನಿಯು ಶೈಕ್ಷಣಿಕವಾಗಿಯೂ ಉತ್ತಮ ಫಲಿತಾಂಶ ಪಡೆಯುವಂತಾಗಲಿ.

ಮಲೆನಾಡಿನಲ್ಲಿ ಅಡಿಕೆ ಕೊಯ್ಲು ಚುರುಕು.!
– ಮಳೆ ನಡುವೆ ಆತಂಕದ ಅಡಿಕೆ ಕೊಯ್ಲು
– ಭತ್ತದ ಗದ್ದೆಗಳು ಕೂಡ ಫಸಲಿನತ್ತ…

NAMMUR EXPRESS NEWS
ತೀರ್ಥಹಳ್ಳಿ: ತೀರ್ಥಹಳ್ಳಿ ಸೇರಿದಂತೆ ಮಲೆನಾಡಿನಲ್ಲಿ ಅಡಿಕೆ ಕೊಯ್ಲು ಇದೀಗ ಚುರುಕುಗೊಂಡಿದ್ದು ಎಲ್ಲೆಡೆ ಅಡಿಕೆ ಕೊಯ್ಲು ಶುರುವಾಗಿದೆ. ಇನ್ನು ಅಡಿಕೆ ಕೊಯ್ಲಿನ ನಡುವೆ ಕಳೆದೆರಡು ದಿನಗಳಿಂದ ಮಳೆ ಸುರಿಯುತ್ತಿದ್ದು ಆತಂಕ ಕೂಡ ಎದುರಾಗಿದೆ. ಇನ್ನು ಬುಧವಾರ ರಾತ್ರಿ ಅತಿ ಹೆಚ್ಚು ಮಂಜು ಕಂಡುಬಂದಿದ್ದು ಚಳಿ ಹೆಚ್ಚಾಗುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಅಡಿಕೆ ಕೊಯ್ಲಿನ ಸಂಭ್ರಮ ಎಲ್ಲಾ ಕಳೆಗಟ್ಟಿದೆ. ಅಡಿಕೆ ಕೊನೆ ತೆಗೆಯುವ ಕೆಲಸ, ಕೊಯ್ಲು, ಒಣಗಿಸುವ ಕೆಲಸ ನಡೆಯುತ್ತಿದೆ. ಒಂದು ಕಡೆ ಮಳೆ ಎಲ್ಲದಕ್ಕೂ ಅಡ್ಡಿ ಮಾಡುತ್ತಿದೆ.

ವ್ಯಾಪಾರ ವಹಿವಾಟು ಕಡಿಮೆ!

ಇನ್ನು ಕೃಷಿ ಚಟುವಟಿಕೆ ಗರಿಗೆದರಿರುವುದರಿಂದ ಪಟ್ಟಣದಲ್ಲಿ ಜನಸಂಖ್ಯೆ ಕಡಿಮೆಯಾಗಿದೆ. ವ್ಯಾಪಾರ ವಹಿವಾಟಿನಲ್ಲೂ ಕೂಡ ಕಡಿಮೆಯಾಗಿದೆ. ಹೀಗಾಗಿ ಇನ್ನೊಂದೆರಡು ತಿಂಗಳುಗಳ ಕಾಲ ವಹಿವಾಟು ಕೂಡ ನಿಧಾನಗತಿಯಲ್ಲಿ ಸಾಗಲಿದೆ. ಇನ್ನು ಕೃಷಿ ಚಟುವಟಿಕೆಗಳು ಜೋರಾಗಿರುವುದರಿಂದ ಕಾರ್ಮಿಕರಿಗೆ ಡಿಮ್ಯಾಂಡ್ ಸೃಷ್ಟಿಯಾಗಿದೆ. ಆದರೆ ಮಲೆನಾಡಿನಲ್ಲಿ ಕಾರ್ಮಿಕರ ಕೊರತೆ ಕಂಡುಬರುತ್ತದೆ.

ಸಾಹಿತ್ಯ ಸಮ್ಮೇಳನದಲ್ಲಿ ಫೋಟೋಗ್ರಫಿ ಪ್ರದರ್ಶನ
– ಮಂಡಗದ್ದೆ ನಟರಾಜ್, ವಿನಾಯಕ ಗುಜ್ಜಾರ್ ಅವರ ಫೋಟೋಗಳ ಪ್ರದರ್ಶನ
– ಮಲೆನಾಡ ಪ್ರಾಣಿ, ಪರಿಸರ, ಜೀವನದ ಫೋಟೋ

NAMMUR EXPRESS NEWS
ತೀರ್ಥಹಳ್ಳಿ: ತೀರ್ಥಹಳ್ಳಿ ತಾಲೂಕು ಸಾಹಿತ್ಯ ಸಮ್ಮೇಳನದಲ್ಲಿ ಫೋಟೋಗ್ರಫಿ ಪ್ರದರ್ಶನ ಜನರ ಮನ ಸೆಳೆಯುತ್ತಿದೆ.
ತೀರ್ಥಹಳ್ಳಿಯ ಖ್ಯಾತ ಪರಿಸರ ಛಾಯಾಗ್ರಾಹಕರಾದ ಮಂಡಗದ್ದೆ ನಟರಾಜ್, ವಿನಾಯಕ ಗುಜ್ಜಾರ್ ಅವರ ಫೋಟೋಗಳ ಪ್ರದರ್ಶನ ನಡೆಯುತ್ತಿದೆ. ಮಲೆನಾಡ ಪ್ರಾಣಿ, ಪರಿಸರ, ಜೀವನದ ಫೋಟೋ, ಅಪರೂಪದ ಪ್ರಾಣಿಗಳನ್ನು ನೀವು ನೋಡಬಹುದು.

ಸಾಹಿತ್ಯ ಸಮ್ಮೇಳನದಲ್ಲಿ ಪುಸ್ತಕಗಳ ಪ್ರದರ್ಶನ
– ಓದುಗರ ಸ್ಪಂದನೆ: ಕರ್ಣಾಟಕ ಬ್ಯಾಂಕ್ ಇಂದ ಗ್ರಾಹಕರಿಗೆ ಮಾಹಿತಿ
– ಹೊಸ ಬರಹಗಾರರ ಪುಸ್ತಕ ಪ್ರದರ್ಶನ

NAMMUR EXPRESS NEWS
ತೀರ್ಥಹಳ್ಳಿ: ತೀರ್ಥಹಳ್ಳಿಯಲ್ಲಿ ನಡೆಯುತ್ತಿರುವ ತೀರ್ಥಹಳ್ಳಿ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಅನೇಕ ಪುಸ್ತಕ ಮಳಿಗೆಗಳು ಪ್ರದರ್ಶನದಲ್ಲಿವೆ. ಜೊತೆಗೆ ಕರ್ನಾಟಕ ಬ್ಯಾಂಕ್, ಶೈಲಿ ಸ್ವದೇಸಿ ವಸ್ತ್ರ ಮಳಿಗೆಇವೆ. ರಾಜ್ಯದ ಪ್ರಸಿದ್ಧ ಪುಸ್ತಕ ಮಳಿಗೆಗಳಾದ ಪುಸ್ತಕ ಮನೆ ಕಾರ್ಕಳ, ಸಿರಿಗನ್ನಡ ಪ್ರಕಾಶನ, ಅಹರ್ನಿಶಿ ಪ್ರಕಾಶನ, ಕರ್ನಾಟಕ ಬ್ಯಾಂಕ್ ಸೇರಿದಂತೆ ಅನೇಕ ಮಳಿಗೆಗಳು ಪ್ರದರ್ಶನ ನೀಡುತ್ತಿದ್ದು ಸಾರ್ವಜನಿಕರು ಪುಸ್ತಕಗಳನ್ನು ಖರೀದಿಸುತ್ತಿದ್ದಾರೆ. ಕರ್ಣಾಟಕ ಬ್ಯಾಂಕ್ ವ್ಯವಸ್ಥಾಪಕರಾದ ರಾಘವೇಂದ್ರ ಕಾಮತ್ ಮತ್ತು ಸಿಬ್ಬಂದಿ ಇದ್ದರು.

ಅಂಬಿಕಾ ಗೌಡ, ಹುಣಸವಳ್ಳಿ ಶಾಲೆ ಶಿಕ್ಷಕರಾದ ಸುರೇಶ್ ಮಲ್ಲಿಗೆಮನೆ, ಅಕ್ಷತಾ ಹುಂಚದಕಟ್ಟೆ ಸೇರಿ ಅನೇಕರ ಪುಸ್ತಕಗಳು ಮಾರಾಟಕ್ಕಿವೆ.

ಪುಸ್ತಕ ಮಳಿಗೆಗಳು ಓದುಗರಿಗೆ ರಿಯಾಯಿತಿ ದರದಲ್ಲಿ ಪುಸ್ತಕ ನೀಡುತ್ತಿವೆ.