Category: ರಾಷ್ಟ್ರೀಯ ವಾರ್ತೆ

Categories
ಮೈಸೂರು ರಾಜಕೀಯ ರಾಷ್ಟ್ರೀಯ ವಾರ್ತೆ

ಬರಲಿದೆ ಮನೆ ಮನೆಗೂ ಜಾತಿ ಪ್ರಮಾಣ ಪತ್ರ – ಪಿಎಂ ಕಿಸಾನ್ ಇನ್ನೂ 5ವರ್ಷಕ್ಕೆ ವಿಸ್ತರಣೆ – ಲಂಚ ಸ್ವೀಕರಿಸುತ್ತಿದ್ದಾಗ ಲೋಕಾಯುಕ್ತರ ಬಲೆಗೆ ಬಿದ್ದ ಎಸಿ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್

ಬೆಂಗಳೂರು: ಮತದಾರರಿಗೆ ದಾಖಲೆಗಳನ್ನು ಸಲ್ಲಿಸಲು ಅನುಕೂಲವಾಗಲೆಂದು ಮತದಾರರ ಪಟ್ಟಿ ವಿಶೇಷ ತೀವ್ರ ಪರಿಷ್ಕರಣೆಯ ಸಂದರ್ಭದಲ್ಲಿ, ಮನೆಮನೆಗೂ ಜಾತಿ ಪ್ರಮಾಣಪತ್ರವನ್ನು ತಲುಪಿಸುವ ಕುರಿತು ಸರ್ಕಾರವು ನಿರ್ಧಾರವನ್ನು ಕೈಗೊಂಡಿದೆ.
ಹಿಂದಿನ ಮತದಾರರ ಪಟ್ಟಿ ವಿಶೇಷ ತೀವ್ರ ಪರಿಷ್ಕರಣೆಯಲ್ಲಿ ಮತದಾರರ ಹೆಸರು ಮತ್ತು ಸಂಬಂಧಪಟ್ಟ ಕುಟುಂಬದ ಸದಸ್ಯರ ವಿವರಗಳು ಲಭ್ಯವಾಗದಿದ್ದಲ್ಲಿ ಅಥವಾ ಈಗಾಗಲೇ ಡೇಟಾ ಬೇಸ್ ನಲ್ಲಿ ಇರುವ ಮಾಹಿತಿಗೆ ಹೋಲಿಕೆ ಕಂಡುಬಾರದಿದ್ದಲ್ಲಿ, ಮತದಾರರ ಅರ್ಹತೆಯನ್ನು ಸಾಬೀತುಪಡಿಸುವ ಸಲುವಾಗಿ ಚುನಾವಣಾ ಆಯೋಗವು 11 ದಾಖಲೆಗಳಲ್ಲಿ ಒಂದನ್ನು ಒದಗಿಸುವಂತೆ ಸೂಚನೆಯನ್ನು ನೀಡಿದೆ. ಅವುಗಳಲ್ಲಿ ಜಾತಿ ಪ್ರಮಾಣಪತ್ರ ಕೂಡ ಒಂದಾಗಿದೆ ಎನ್ನುವ ಮಾಹಿತಿ ಲಭಿಸಿದೆ.‌
ಜಾತಿ ಪ್ರಮಾಣಪತ್ರದೊಂದಿಗೆ ಸಾರ್ವಜನಿಕರಿಗೆ ಶಾಶ್ವತ ನಿವಾಸ ಪ್ರಮಾಣಪತ್ರಗಳನ್ನು ಕೂಡ ವಿತರಿಸುವಂತೆ ಸರ್ಕಾರವು ಕಂದಾಯ ಇಲಾಖೆಯ ಜಿಲ್ಲಾಧಿಕಾರಿಗಳಿಗೆ ಸೂಚನೆಯನ್ನು ನೀಡಿದೆ. ಅವುಗಳನ್ನು ಪಡೆದುಕೊಳ್ಳಲು ಸಾರ್ವಜನಿಕರು ಸರ್ಕಾರದ ದಾಖಲೆಯಲ್ಲಿರುವಂತಹ ಮೊಬೈಲ್ ಸಂಖ್ಯೆಗೆ ಲಿಂಕ್ ಅನ್ನು ಕಳುಹಿಸಿ ಡೌನ್ ಲೋಡ್ ಮಾಡಿಕೊಳ್ಳಲು ಅವಕಾಶವನ್ನು ಕೂಡ ಕಲ್ಪಿಸಲಾಗಿದೆ.
ಕಂದಾಯ ಇಲಾಖೆಯ ಡಾಟಾ ಬೇಸ್ ಮಾಹಿತಿಯ ಪ್ರಕಾರ 4.81ಕೋಟಿ ಜಾತಿ ಪ್ರಮಾಣ ಪತ್ರಗಳ ಪಿಡಿಎಫ್ ಗಳನ್ನು ಜಿಲ್ಲಾವಾರು, ತಾಲ್ಲೂಕುವಾರು ಮತ್ತು ಗ್ರಾಮವಾರು ವಿಂಗಡಣೆಯನ್ನು ಮಾಡಿ, ಬಳಿಕ ಅವುಗಳನ್ನು ಅಟಲ್ ಜೀ ಜನಸ್ನೇಹಿ ನಿರ್ದೇಶನಾಲಯದಿಂದ ಜಿಲ್ಲಾಧಿಕಾರಿಗಳಿಗೆ ನೀಡುವಂತಿದ್ದು, ಬಳಿಕ ಅವುಗಳನ್ನು ಮುದ್ರಿಸುವಂತೆ ಆದೇಶವನ್ನು ನೀಡಿದ್ದಾರೆ. ಇದರೊಂದಿಗೆ ಮುದ್ರಣಗಳ ಪ್ರತಿಗಳಿಗೆ 2.22ರೂಪಾಯಿಗಳಷ್ಟು ದರವನ್ನು ನಿಗದಿಪಡಿಸುವಂತೆ ಕಂದಾಯ ಇಲಾಖೆಯು ಷರತ್ತನ್ನು ವಿಧಿಸಿದೆ. ಜಾತಿ ಪ್ರಮಾಣಪತ್ರದೊಂದಿಗೆ ಮುಖ್ಯಮಂತ್ರಿಗಳಾದ ಡಿ.ಕೆ.ಶಿವಕುಮಾರ್ ಅವರು ನೀಡಿರುವ ಜಾಗೃತಿ ಸಂದೇಶ ಹಾಗೂ ದಾಖಲಾತಿಗಳ ಪಟ್ಟಿಯನ್ನು ಮುದ್ರಿಸಿ ಹಂಚಿಕೆ ಮಾಡಲು ಕಂದಾಯ ಇಲಾಖೆಯು ನಿರ್ಧರಿಸಿದ್ದು, ಸಾರ್ವಜನಿಕರಿಗೆ ಜಾತಿ ಪ್ರಮಾಣಪತ್ರಗಳನ್ನು ವಿತರಿಸಿದ ಬಳಿಕ, ಅವುಗಳ ಸ್ವೀಕೃತಿಯನ್ನು ಪಡೆಯಲು ಮೊಬೈಲ್ ಆ್ಯಪ್ ಅನ್ನು ಅಭಿವೃದ್ಧಿಪಡಿಸಲಾಗುವುದು. ಆ್ಯಪ್ ನಲ್ಲಿ ಮೊಬೈಲ್ ಅಥವಾ ಆಧಾರ್ ಸಂಖ್ಯೆಯನ್ನು ನಮೂದಿಸುವ ಮೂಲಕ ಜಾತಿ ಪ್ರಮಾಣ ಪತ್ರವನ್ನು ವಿತರಿಸಿರುವ ಕುರಿತು ಖಚಿತ ಮಾಹಿತಿಯನ್ನು ಸಂಬಂಧಿತ ಅಧಿಕಾರಿಗಳು ನೀಡಬೇಕೆಂದು ಸರ್ಕಾರವು ಆದೇಶ ಹೊರಡಿಸಿದೆ.

ಪಿಎಂ ಕಿಸಾನ್ ಇನ್ನೂ 5ವರ್ಷಕ್ಕೆ ವಿಸ್ತರಣೆ

ನವದೆಹಲಿ: ದೇಶದ ಕೃಷಿ ಚಟುವಟಿಕೆಗಳಿಗೆ ಅನುಕೂಲವಾಗಲೆಂದು, ರೈತರಿಗೆ ಪ್ರತಿ ವರ್ಷ 6.000ರೂಪಾಯಿ ನೀಡುವಂತಹ ಕೇಂದ್ರ ಸರ್ಕಾರ ರೂಪಿತ ‘ಪಿಎಂ ಕಿಸಾನ್’ ಯೋಜನೆಯನ್ನು ಇನ್ನೂ 5 ವರ್ಷಗಳ ಕಾಲ ಮುಂದುವರಿಸುವ ಕುರಿತು ನಿರ್ಧಾರಿಸಲಾಗಿದೆ. ಇತ್ತೀಚಿಗೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ ಈ ನಿರ್ಣಯವನ್ನು ಕೈಗೊಳ್ಳಲಾಯಿತು. ಪಿಎಂ ಕಿಸಾನ್ ಯೋಜನೆಯನ್ನು 2030-31ರವರೆಗೂ ಜಾರಿಗೊಳಿಸುವ ನಿಟ್ಟಿನಲ್ಲಿ 3.15.೦೦.೦೦೦ ರೂಪಾಯಿಗಳಷ್ಟು ವಿನಿಯೋಗಿಸಲು ಸರ್ಕಾರವು ತೀರ್ಮಾನಿಸಿದೆ. ಬರಗಾಲ ಸೇರಿದಂತೆ ಅನೇಕ ಪ್ರಾಕೃತಿಕ ವೈಪರೀತ್ಯದ ಕಾರಣದಿಂದ ಈಗಾಗಲೇ ಚಿಂತೆಗೊಳಗಾಗಿರುವ ರೈತರಿಗೆ ಈ ನಿರ್ಣಯವು ಕೊಂಚ ಮಟ್ಟಿಗೆ ನಿರಾಳತೆಯನ್ನುಂಟು ಮಾಡಿದೆ.

ಲಂಚ ಸ್ವೀಕರಿಸುತ್ತಿದ್ದಾಗ ಲೋಕಾಯುಕ್ತರ ಬಲೆಗೆ ಬಿದ್ದ ಎಸಿ!

ಮೈಸೂರು: ಕಂದಾಯ ಮೇಲ್ಮನವಿಯನ್ನು ಇತ್ಯರ್ಥಪಡಿಸಲು ಲಂಚವನ್ನು ಪಡೆಯುತ್ತಿದ್ದ ಸಂದರ್ಭದಲ್ಲಿ ಹುಣಸೂರು ಉಪವಿಭಾಗಾಧಿಕಾರಿ ಲೋಕಾಯುಕ್ತರ ಎದುರಿನಲ್ಲಿ ಸಿಲುಕಿಕೊಂಡ ಘಟನೆ, ಸೋಮವಾರದಂದು ನಡೆದಿದೆ. ಎಚ್.ಡಿ.ಕೋಟೆ ತಾಲ್ಲೂಕಿನ ಸರ್ವೇ ನಂಬರ್ 17/26ರಲ್ಲಿರುವ 4ಎಕರೆ 20 ಗುಂಟೆ ಭೂಮಿಗೆ ಸಂಬಂಧಿಸಿದಂತೆ ಕಂದಾಯ ಮೇಲ್ಮನವಿಯನ್ನು ಇತ್ಯರ್ಥಪಡಿಸಲು ನ್ಯಾಯಾಲಯದಿಂದ ಆದೇಶವಿದ್ದು, ಕಾವ್ಯಾರಾಣಿ 10ಲಕ್ಷ ರೂಪಾಯಿ ಬೇಡಿಕೆ ಇಟ್ಟಿದ್ದರು ಎನ್ನಲಾಗಿದೆ. ಅದರಂತೆ ಡಾ.ರೂಪಾ ಎನ್ನುವವರು ಮೊದಲ ಕಂತಿನಲ್ಲಿ 5.00.000ರೂಪಾಯಿ ನೀಡಿದ್ದರು. ಬಳಿಕ ರೂಪ ಅವರು ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಿದ್ದು, ಎರಡನೇ ಕಂತಿನ 5.50ಲಕ್ಷ ರೂಪಾಯಿ ಹಣವನ್ನು, ರೂಪಾ ಅವರಿಂದ ಕಾವ್ಯಾರಾಣಿ ಸ್ವೀಕರಿಸುತ್ತಿದ್ದ ಸಮಯದಲ್ಲಿ ಲೋಕಾಯುಕ್ತ ಪೊಲೀಸರು ದಾಳಿ ನಡೆಸಿದ್ದಾರೆ. ಈ ಸಂದರ್ಭದಲ್ಲಿ ಪೊಲೀಸರು ಕಾವ್ಯಾರಾಣಿ ಅವರನ್ನು ಬಂಧಿಸಿದ್ದಾರೆ ಎನ್ನುವ ಸಂಗತಿ ತಿಳಿದುಬಂದಿದೆ.

Categories
ರಾಜ್ಯ ರಾಷ್ಟ್ರೀಯ ವಾರ್ತೆ ವಿಶೇಷ ಸುದ್ದಿ

ಭಾರತದಲ್ಲಿ ಈಗ ಎಲೆಕ್ಟ್ರಿಕಲ್ ವಾಹನ ಹವಾ!

ಭಾರತದಲ್ಲಿ ಈಗ ಎಲೆಕ್ಟ್ರಿಕಲ್ ವಾಹನ ಹವಾ!
– ಕಾರು, ಬೈಕ್, ಆಟೋ, ಬಸ್, ಗೂಡ್ಸ್ ವಾಹನವೂ ಇವಿ
– ಪೆಟ್ರೋಲ್, ಡೀಸೆಲ್ ನಂಬೋದು ಕಷ್ಟ: ಇವಿ ಇಷ್ಟ..!

ಭಾರತದಲ್ಲಿ ಈಗ ಇವಿ ವಾಹನಗಳ ಹವಾ ಶುರುವಾಗಿದೆ. 2026ರ ಹೊತ್ತಿಗೆ ಭಾರತೀಯ ಎಲೆಕ್ಟ್ರಿಕ್ ವಾಹನ (EV) ಮಾರುಕಟ್ಟೆಯು ಅತ್ಯಂತ ವೇಗವಾಗಿ ಬೆಳೆಯುತ್ತಿದ್ದು, ಪ್ರಮುಖ ಬ್ರ್ಯಾಂಡ್‌ಗಳು ತಮ್ಮ ಹೊಸ ಮಾದರಿಗಳನ್ನು ಬಿಡುಗಡೆ ಮಾಡಿವೆ. ಭಾರತೀಯರು ಎಲೆಕ್ಟ್ರಿಕ್ ವಾಹನಗಳ ಬಳಕೆಗೆ ಹೆಚ್ಚಿನ ಆಸಕ್ತಿ ತೋರಿದ್ದಾರೆ. ಕಳೆದ ಕೆಲವು ವರ್ಷಗಳಿಂದ ವಿದ್ಯುತ್ ಚಾಲಿತ ವಾಹನಗಳು ಜನಪ್ರಿಯತೆಯನ್ನು ಪಡೆದುಕೊಳ್ಳುತ್ತಿದ್ದು, ಒಮ್ಮೆ ಚಾರ್ಜ್ ಮಾಡಿದರೆ ಅದಕ್ಕೆ ಅನುಗುಣವಾಗಿ ಕೆಲವು ಕಿಲೋಮೀಟರ್ ವರೆಗೂ ಪ್ರಯಾಣಿಸುವ ಅವಕಾಶವಿದೆ. ಅಂದರೆ ವಾಹನಗಳ ಬೆಲೆಗೆ ತಕ್ಕಂತೆ ಚಾರ್ಜ್ ಮತ್ತು ಚಲಾಯಿಸುವ ಅಂತರ ಹೆಚ್ಚು ಕಡಿಮೆಯಾಗುತ್ತದೆ. ಕೆಲವೊಮ್ಮೆ ಸಾರ್ವಜನಿಕ ಚಾರ್ಜಿಂಗ್ ಕೇಂದ್ರಗಳಲ್ಲೂ ಚಾರ್ಜ್ ಮಾಡಿಕೊಂಡು ಮುಂದೆ ಪ್ರಯಾಣಿಸುವ ಅವಕಾಶ ಕೂಡ ಇದೆ.

ಎಲೆಕ್ಟ್ರಿಕ್ ಕಾರಿಗೆ ಡಿಮ್ಯಾಂಡ್ ಡಿಮ್ಯಾಂಡ್!

ಎಲೆಕ್ಟ್ರಿಕ್ ಕಾರುಗಳ ಬೆಲೆ 6.31 ಲಕ್ಷದಿಂದ 89.99 ಲಕ್ಷದವರೆಗೆ ಲಭ್ಯವಿದೆ. ಪರಿಸರ ಸ್ನೇಹಿಯಾಗಿರುವ ಇದನ್ನು ಈಗಾಗಲೇ ಭಾರತದಲ್ಲಿ ಸಾಕಷ್ಟು ಜನರು ಬಳಸುತ್ತಿದ್ದು, ಮುಂಬರುವ ದಿನಗಳಲ್ಲಿ ಈ ರೀತಿ ಪೆಟ್ರೋಲ್ ಮತ್ತು ಡೀಸೆಲ್ ಗಗನ ಕುಸುಮವಾದರೆ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಎಲೆಕ್ಟ್ರಿಕ್ ವಾಹನಗಳು ಬಳಕೆಗೆ ಬರಲಿದೆ ಎಂದು ಅಂದಾಜಿಸಲಾಗುತ್ತಿದೆ. ಭಾರತದಲ್ಲಿಯೂ ಕೂಡ ಎಲೆಕ್ಟ್ರಿಕ್ ವಾಹನಗಳ ಮಾರುಕಟ್ಟೆಯು ಅತ್ಯಂತ ವೇಗವಾಗಿ ಬೆಳೆಯುತ್ತಿದ್ದು, 2024 ರಲ್ಲೇ ಸುಮಾರು ಎರಡು ದಶಲಕ್ಷಕ್ಕೂ ಹೆಚ್ಚು ಎಲೆಕ್ಟ್ರಿಕ್ ವಾಹನಗಳು ಮಾರಾಟ ಕಂಡಿದೆ. ಅದರಲ್ಲೂ ದ್ವಿಚಕ್ರ ಮತ್ತು ಮೂರು ಚಕ್ರದ ವಾಹನಗಳ ವಿಭಾಗದಲ್ಲಿ ಹೆಚ್ಚಿನ ಬೇಡಿಕೆ ಇದೆ ಎನ್ನಲಾಗಿದ್ದು, ಆಟೋಮೊಬೈಲ್ ಮಾರಾಟದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಪಾಲು ಶೇಕಡ ಏಳರಿಂದ ಎಂಟರಷ್ಟಿದೆ.

ಸರ್ಕಾರದಿಂದಲೂ ಇವಿಗೆ ಬೆಂಬಲ!

ಫೇಮ್, ಇಎಂಪಿಎಸ್ ನಂತಹ ಸಬ್ಸಿಡಿಗಳು ಮತ್ತು ಚಾರ್ಜಿಂಗ್ ಸ್ಟೇಷನ್ ಗಳ ಹೆಚ್ಚಳ ಹಾಗೂ ಕಡಿಮೆ ನಿರ್ವಹಣಾ ವೆಚ್ಚದಿಂದಾಗಿ ಎಲೆಕ್ಟ್ರಾನಿಕ್ ವಾಹನಗಳ ಅಳವಡಿಕೆಯ ದರ ಕೂಡ ಹೆಚ್ಚಳವಾಗುತ್ತಿದೆ. ಈಗಾಗಲೇ ಸರ್ಕಾರವೂ ಕೂಡ 2030ರ ಒಳಗಾಗಿ ಮಾರಾಟವಾಗುವ ವಾಹನಗಳಲ್ಲಿ ಶೇಕಡ 30ರಷ್ಟು ಎಲೆಕ್ಟ್ರಾನಿಕ್ ವಾಹನಗಳು ಇರಬೇಕೆಂಬ ಗುರಿಯನ್ನು ಹೊಂದಿದೆ. ಕೇವಲ 2025 ಜುಲೈ ತಿಂಗಳೊಂದರಲ್ಲೇ 29.೦೦೦ಕ್ಕೂ ಹೆಚ್ಚಿನ ಸಾರ್ವಜನಿಕ ಚಾರ್ಜಿಂಗ್ ಕೇಂದ್ರಗಳನ್ನು ತೆರೆದಿರುವುದು ಎಲೆಕ್ಟ್ರಿಕ್ ವಾಹನಗಳಿಗಿರುವ ಬೇಡಿಕೆಗೆ ಸಾಕ್ಷಿಯಾಗಿದೆ.

ಕರ್ನಾಟಕ ಮುಂಚೂಣಿಯಲ್ಲಿದೆ…!

ಕರ್ನಾಟಕ, ತಮಿಳುನಾಡು ದೆಹಲಿ ಮತ್ತು ಉತ್ತರ ಪ್ರದೇಶದಂತಹ ರಾಜ್ಯಗಳು ಎಲೆಕ್ಟ್ರಾನಿಕ್ ವಾಹನಗಳ ಅಳವಡಿಕೆಯಲ್ಲಿ ಮುಂಚೂಣಿಯಲ್ಲಿದ್ದು, ಪೆಟ್ರೋಲ್ ಮತ್ತು ಡೀಸೆಲ್ ನ ಪೂರೈಕೆಯಲ್ಲಿನ ವ್ಯತ್ಯಯ, ಬೆಲೆ ಏರಿಕೆಯಿಂದಾಗಿ ಇನ್ನು ಹೆಚ್ಚಿನ ಜನರು ಎಲೆಕ್ಟ್ರಾನಿಕ್ ವಾಹನಗಳನ್ನು ಖರೀದಿಸಿ ಬಳಸುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ಇದರಿಂದ ಪರಿಸರ ಮಾಲಿನ್ಯವನ್ನು ಕೂಡ ತಡೆಗಟ್ಟುವ ಒಂದು ಉತ್ತಮ ಕಾರ್ಯವನ್ನು ಕೂಡ ನಿರ್ವಹಿಸಿದಂತಾಗುತ್ತದೆ.

ಯಾವ ಯಾವ ಬ್ರಾಂಡ್ ಇವಿ ಇದೆ?

ದೇಶದ ಪ್ರತಿಷ್ಠಿತ ಕಾರು ಬ್ರಾಂಡ್ ಗಳಾದ ಟಾಟಾ, ಮಾರುತಿ, ಹೋಂಡಾಯಿ, ಕಿಯಾ, ಟೊಯೋಟಾ, ವೊಲ್ಸ್ ವಾಗನ್, ಎಂ ಜಿ, ಮಹೇಂದ್ರ, ರೇನಾಲ್ಟ್, ಬೆಂಜ್ ಸೇರಿ ಎಲ್ಲಾ ಕಂಪನಿಗಳು ಇವಿ ಕಾರು ಮಾರುಕಟ್ಟೆಯಲ್ಲಿ ಭಾರೀ ಪೈಪೋಟಿ ನೀಡುತ್ತಿವೆ. ಇವಿಗಳಲ್ಲಿ ದ್ವಿಚಕ್ರ ಮತ್ತು ತ್ರಿಚಕ್ರ ವಾಹನಗಳ ಪಾಲು ಅತಿ ಹೆಚ್ಚಿದೆ. ​ದ್ವಿಚಕ್ರ ವಾಹನಗಳು (e-2W) ಇವಿಗಳಲ್ಲಿ ಸುಮಾರು 55-60% ರಷ್ಟು ಪಾಲನ್ನು ಹೊಂದಿವೆ., ಓಲಾ, ಟಿವಿಎಸ್ ಮತ್ತು ಬಜಾಜ್ ಕಂಪನಿಗಳು ಇಲ್ಲಿ ಮುಂಚೂಣಿಯಲ್ಲಿವೆ. ​ತ್ರಿಚಕ್ರ ವಾಹನಗಳ ಸುಮಾರು 30-35% ಪಾಲು ಹೊಂದಿದ್ದು, ಸರಕು ಸಾಗಣೆ ಮತ್ತು ಆಟೋ ರಿಕ್ಷಾಗಳಲ್ಲಿ ಇವು ಅತಿ ಹೆಚ್ಚು ಬಳಕೆಯಲ್ಲಿವೆ. ಇವಿ ​ನಾಲ್ಕು ಚಕ್ರದ ವಾಹನಗಳು ಮಾರುಕಟ್ಟೆಯಲ್ಲಿ ಸುಮಾರು 5% ರಷ್ಟು ಪಾಲನ್ನು ಹೊಂದಿವೆ. ಟಾಟಾ ಮೋಟಾರ್ಸ್ ಈ ವಿಭಾಗದಲ್ಲಿ 43% ಕ್ಕಿಂತ ಹೆಚ್ಚು ಮಾರುಕಟ್ಟೆ ಪಾಲು ಹೊಂದಿದೆ. ಎಲೆಕ್ಟ್ರಿಕ್ ಬಸ್‌ಗಳು ಕೂಡ ಭಾರತದಲ್ಲಿವೆ. ಸಾರ್ವಜನಿಕ ಸಾರಿಗೆಯಲ್ಲಿ ಇವುಗಳ ಸಂಖ್ಯೆ ವೇಗವಾಗಿ ಹೆಚ್ಚುತ್ತಿದ್ದು, ಈಗ ಸಾವಿರಾರು ಸಂಖ್ಯೆಯಲ್ಲಿವೆ. ಸಾಗಾಣಿಕೆ ವಾಹನ ಕೂಡ ಎಲೆಕ್ಟ್ರಿಕ್ ಬರುತ್ತಿದೆ.

Categories
inspiration ಪ್ರತಿಭೆಗಳು ಪ್ರಶಸ್ತಿ ಮಂಗಳೂರು ರಾಜ್ಯ ರಾಷ್ಟ್ರೀಯ ವಾರ್ತೆ

ಭರತ ನಾಟ್ಯದ ನಾಟ್ಯ ರಾಣಿ ರೆಮೋನಾ!

ಭರತ ನಾಟ್ಯದ ನಾಟ್ಯ ರಾಣಿ ರೆಮೋನಾ!
– ತಂದೆ ಕಳೆದುಕೊಂಡರೂ ಅಮ್ಮನ ನೆರಳಲ್ಲಿ ಬೆಳೆದು ಸಾಧನೆ
– ಯುವ ಜನತೆಗೆ ಮಾದರಿ ಆದಳು ಮಂಗಳೂರು ಹುಡುಗಿ

ರೆಮೋನಾ ಪೆರೆರ ಕರಾವಳಿ ಭಾಗದಲ್ಲಿ ಮಾತ್ರವಲ್ಲ ಇಡೀ ರಾಜ್ಯದಲ್ಲಿ ತನ್ನ ಕಲೆ ಮೂಲಕವೇ ಗುರುತಿಸಿಕೊಂಡ ಪ್ರತಿಭಾವಂತೆ. ಈಕೆ ಸತತ 170 ಗಂಟೆಗಳ ಕಾಲ ನೃತ್ಯವನ್ನು ಪ್ರದರ್ಶಿಸುವ ಮೂಲಕ, ವಿಶ್ವ ದಾಖಲೆ ನಿರ್ಮಿಸಿದ ಸಾಧಕಿ.

ತಂದೆಯ ಕಳೆದುಕೊಂಡವಳಿಗೆ ತಾಯಿಯೇ ಪ್ರೇರಣೆ!

ರೆಮೋನಾ ಪೆರೆರ ಅವರು 2005ರ ನವೆಂಬರ್ 4ರಂದು ಜನಿಸಿದರು. ತಾಯಿಯ ಗರ್ಭದಲ್ಲಿರುವಾಗಲೇ ತಂದೆಯನ್ನು ಕಳೆದುಕೊಂಡ ರೆಮೋನಾಗೆ ಆ ಕೊರತೆ ಬಾರದಂತೆ ತಂದೆ ತಾಯಿ ಎರಡೂ ಆಗಿ ಬೆಳೆಸಿದವರು ಅಮ್ಮ.‌ ಎರಡೂವರೆ ವರ್ಷದ ಪುಟ್ಟ ಕಂದಮ್ಮನಿರುವಾಗಲೇ ನೃತ್ಯದ ಮೇಲೆ ಒಲವು ಮೂಡಿತು. ತನ್ನ ಮೂರನೇ ವರ್ಷದಿಂದಲೇ ಸೌರಭಾ ಕಲಾ ಪರಿಷತ್ತಿನ ಡಾ.ಶ್ರೀವಿದ್ಯಾ ಅವರ ಬಳಿ ಭರತನಾಟ್ಯ ಅಭ್ಯಾಸಕ್ಕೆ ತೊಡಗಿಕೊಂಡರು ರೆಮೋನಾ. ಪ್ರಾರಂಭಿಕ ಅಂತ ತುಂಬಾ ಕಠಿಣವಾಗಿತ್ತು. ಸಾಕಷ್ಟು ಅವಮಾನಗಳನ್ನು ಎದುರಿಸಿದರು. ತನಗೆ ಇದು ಯಾಕೆ ಸಾಧ್ಯವಿಲ್ಲ ನೋಡಿಯೇ ಬಿಡೋಣ ಎಂದು ಛಲ ತೊಟ್ಟರು. ಇದಕ್ಕೆ ಮೂಲ ಪ್ರೇರಣೆ ತಾಯಿ. ನೃತ್ಯ ಕಲೆಯನ್ನು ಪರಿಚಯಿಸುವ ಮೂಲಕ ತಾಯಿಯು ತನ್ನ ಮಗಳು ನೃತ್ಯಗಾರ್ತಿಯಾಗುವಂತೆ, ಜೊತೆಗೆ ರೆಮೋನಾಗೆ ಭಾರತದ ಕಲೆ ಸಂಸ್ಕೃತಿ ಬಗ್ಗೆ ವಿಶೇಷ ಆಸಕ್ತಿ ಮತ್ತು ಅಭಿಮಾನವಿದ್ದುದು, ಕಲೆಯ ಪ್ರಕಾರಗಳಲ್ಲಿ ಒಂದಾದ ನೃತ್ಯದ ಕಡೆ ಗಮನಹರಿಸುವಂತೆ ಮಾಡಿತು.

ಸತತ ಅಭ್ಯಾಸ..

2019ರಲ್ಲಿ ರಂಗಪ್ರವೇಶವನ್ನು ಮಾಡಿದ ರೆಮೋನಾ ದಿನಕ್ಕೆ ಐದರಿಂದ ಆರು ಗಂಟೆಗಳ ಕಾಲ ನೃತ್ಯಾಭ್ಯಾಸವನ್ನು ಮಾಡುತ್ತಾರೆ. ಬೆಳಿಗ್ಗೆ ಆರರಿಂದ ಏಳರವರೆಗೆ ನೃತ್ಯಾಭ್ಯಾಸದ ಬಳಿಕ ಕಾಲೇಜು ತರಗತಿಗಳನ್ನು ಮುಗಿಸಿ ಮರಳಿ ಮನೆಗೆ ಬಂದ ನಂತರ ಸಂಜೆ ಆರರಿಂದ, ರಾತ್ರಿ ಒಂಭತ್ತರವರೆಗೆ ಅಭ್ಯಾಸವನ್ನು ಮುಂದುವರಿಸುತ್ತಾರೆ.‌ ಇದೇ ಅವರ ಯಶಸ್ಸಿನ ಗುಟ್ಟಾಗಿದೆ. ಕೇವಲ ಭರತನಾಟ್ಯವಷ್ಟೇ ಅಲ್ಲದೆ ಯಕ್ಷಗಾನ, ಹುಲಿವೇಷ, ಪಾಶ್ಚಾತ್ಯ ನೃತ್ಯ ಮತ್ತು ಸಾಹಸಿ ನೃತ್ಯಗಳಲ್ಲೂ ಸಹ ತೊಡಗಿಸಿಕೊಂಡಿದ್ದಾರೆ. ತಾಯಿಯು ತನ್ನ ಕನಸನ್ನು ಮಗಳ ಮೂಲಕ ಸಾಕಾರಗೊಳಿಸಿಕೊಂಡಿದ್ದಾರೆ.

ಅಣ್ಣನ ಆಸರೆ: ಡಿಗ್ರಿ ವಿದ್ಯಾಭ್ಯಾಸ

ರೆಮೋನಾಳ ಕೇಶವಿನ್ಯಾಸ, ವಸ್ತ್ರವಿನ್ಯಾಸ, ಕಾರ್ಯಕ್ರಮಗಳನ್ನು ನಿಗದಿಪಡಿಸುವುದು ತಾಯಿಯಾದರೆ, ಲಂಡನ್ ನಲ್ಲಿ ಪ್ರಮುಖ ಬಾಣಸಿಗರಾಗಿ ಕಾರ್ಯನಿರ್ವಹಿಸುತ್ತಿರುವ ಅಣ್ಣ ಈಕೆಯ ನ್ಯೂಟ್ರಿಷಿಯನ್ ಆಗಿದ್ದಾರೆ. ಮಂಗಳೂರಿನ ಸಂತ ಅಲೋಷಿಯಸ್ ಕಾಲೇಜಿನಲ್ಲಿ ಅಂತಿಮ ವರ್ಷದ ಬಿಎ ವ್ಯಾಸಂಗ ಮಾಡುತ್ತಿರುವ ರೆಮೋನಾ ವಿದ್ಯಾಭ್ಯಾಸದ ಜೊತೆಗೆ, ನೃತ್ಯಭ್ಯಾಸವನ್ನು ಸರಿದೂಗಿಸಿಕೊಂಡು ಹೋಗುತ್ತಿದ್ದಾರೆ. ಮನುಷ್ಯ ಮನಸ್ಸು ಮಾಡಿದರೆ ಏನನ್ನು ಬೇಕಾದರೂ ಸಾಧಿಸಬಹುದು ಎನ್ನುವುದಕ್ಕೆ ಇದೊಂದು ಉತ್ತಮ ನಿದರ್ಶನ.

ದೇಶದ ಎಲ್ಲೆಡೆ ನೂರಾರು ಪ್ರದರ್ಶನ

ರೆಮೋನಾ ಬೇರೆ ಬೇರೆ ರಾಜ್ಯಗಳಲ್ಲಿ ಮತ್ತು ದೇಶಗಳಲ್ಲಿ ಸಾವಿರಾರು ನೃತ್ಯ ಪ್ರದರ್ಶನಗಳನ್ನು ನೀಡಿದ್ದು, 2015ರಲ್ಲಿ ಇಂಡಿಯಾ ಬುಕ್ ಆಫ್ ರೆಕಾರ್ಡ್, 2017ರಲ್ಲಿ ಗೋಲ್ಡನ್ ಬುಕ್ ಆಫ್ ರೆಕಾರ್ಡ್ ಲಂಡನ್, ಭಾರತ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್, ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ, 2021 ರಲ್ಲಿ ರಾಜ್ಯ ಸರ್ಕಾರದ ಬಾಲ ಪುರಸ್ಕಾರ ಮತ್ತು 2022 ರಲ್ಲಿ ಪ್ರಧಾನಮಂತ್ರಿ ಅತ್ಯುತ್ತಮ ಬಾಲ ಪುರಸ್ಕಾರ ಇನ್ನು ಹಲವಾರು ಪ್ರಶಸ್ತಿ ಪುರಸ್ಕಾರಗಳಿಗೆ ಭಾಜನರಾಗಿದ್ದಾರೆ. ಇದಕ್ಕೆ ಕಳಶಪ್ರಾಯವೆಂಬಂತೆ ಇದೇ ವರ್ಷದ ಜುಲೈ 21 ರಿಂದ 28ರ ವರೆಗೆ ಸತತ ಏಳು ದಿನಗಳ ಕಾಲ 170 ಗಂಟೆ ನೃತ್ಯ ಮಾಡುವ ಮೂಲಕ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ನಲ್ಲಿ ತಮ್ಮ ಹೆಸರನ್ನು ದಾಖಲಿಸಿದ್ದಾರೆ.

ನೃತ್ಯವೇ ತನ್ನ ಉಸಿರಾಗಿರುವ ರೆಮೋನಾಗೆ ತನ್ನ ಎರಡನೇ ತಾಯಿಯಂತಿರುವ ನೃತ್ಯ ಗುರುಗಳಾದ ಶ್ರೀ ವಿದ್ಯಾ ಅವರಂತೆ ನಾಟ್ಯದಲ್ಲಿ ಪಿಎಚ್ಡಿ ಮಾಡಬೇಕೆಂಬ ಮಹತ್ತರ ಉದ್ದೇಶವಿದೆ. ತಾನು ಕಾರ್ಯಕ್ರಮಗಳನ್ನು ನೀಡುವ ಸಂದರ್ಭದಲ್ಲಿ ತರಗತಿಗಳಿಗೆ ಹಾಜರಾಗದೆ, ರಜೆ ಹಾಕುವ ಸನ್ನಿವೇಶಗಳು ಬಹಳಷ್ಟು ಸಲ ಎದುರಾದಾಗಲೂ ಕಾಲೇಜಿನ ಉಪನ್ಯಾಸಕರು ಮತ್ತು ಸಿಬ್ಬಂದಿಗಳು ಸಹಕಾರ ನೀಡುವುದು, ಸ್ನೇಹಿತರು ಅಂದಿನ ದಿನ ನಡೆದ ತರಗತಿಯ ನೋಟ್ಸ್ ಗಳನ್ನು ಕಳುಹಿಸುವ ಮೂಲಕ ನೆರವಾಗುವುದನ್ನು ರೆಮೋನಾ ಮನಸಾರೆ ನೆನೆದು, ಅವರಿಗೆ ಕೃತಜ್ಞತೆಯನ್ನು ಸಲ್ಲಿಸುತ್ತಾರೆ. ಪರಿಶ್ರಮ ಪಟ್ಟಲ್ಲಿ ಮುಂದೆ ಫಲ ಸಿಗುವುದು ಖಚಿತ ಎನ್ನುವುದಕ್ಕೆ ರೆಮೋನಾ ಯುವಜನತೆಗೆ ಮಾದರಿಯಾಗಿದ್ದಾರೆ.

ಏನಿದು ಸಾಧನೆ?

ನಿರಂತರ 7 ದಿನಗಳ ಕಾಲ ನೃತ್ಯದ ಮೂಲಕ, ಮಂಗಳೂರು ಅಲೋಶಿಯಸ್ ಕಾಲೇಜಿನ ವಿದ್ಯಾರ್ಥಿನಿ ರೆಮೋನಾ ಎವೆಟ್ ಪಿರೇರಾ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಸಾಧನೆ ಮಾಡಿದ್ದಾರೆ. ಏಳೂ ದಿನವೂ 170 ಗಂಟೆ ಭರತನಾಟ್ಯದಲ್ಲಿ ಪ್ರತೀ ಮೂರು ಗಮಟೆಗೊಮ್ಮೆ ಕೇವಲ 15 ನಿಮಿಷ ವಿಶ್ರಾಂತಿ ಪಡೆದು ನಿರಂತರವಾಗಿ ನೃತ್ಯ ಮಾಡಿದ್ದಾರೆ ರೆಮೋನಾ.

Categories
ಮಾಹಿತಿ ಸುದ್ದಿ ರಾಜ್ಯ ರಾಷ್ಟ್ರೀಯ ವಾರ್ತೆ

ಕಂಟೆಂಟ್ ಕ್ರಿಯೇಟರ್ ಗಳ ಮೇಲೆ ಸರ್ಕಾರದ ಕಣ್ಣು!

ಕಂಟೆಂಟ್ ಕ್ರಿಯೇಟರ್ ಗಳ ಮೇಲೆ ಸರ್ಕಾರದ ಕಣ್ಣು!
– ಇನ್ನು ಸೋಷಿಯಲ್ ಮೀಡಿಯಾದಲ್ಲಿ ಒಟ್ರಾಸಿ ಹಾಕಿದ್ರೆ ಕೇಸ್
– ಸಾಮಾಜಿಕ ಜಾಲತಾಣಗಳಲ್ಲಿ ಮಾಹಿತಿ ಹಂಚಿಕೊಳ್ಳಲು ನಿಯಮ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ನವದೆಹಲಿ: ಇಲ್ಲಿಯವರೆಗೆ ವೃತ್ತಿಪರ ಸುದ್ಧಿ ಸಂಸ್ಥೆಗಳಿಗೆ ಮಾತ್ರ ಸೀಮಿತವಾಗಿದ್ದ ಮತ್ತು ಅನ್ವಯಗೊಳ್ಳುತ್ತಿದ್ದ ನಿಯಮಗಳು, ಇನ್ನು ಮುಂದೆ ಸಾಮಾಜಿಕ ಜಾಲತಾಣಗಳಾದ ಯೂಟ್ಯೂಬ್, ಇನ್ಸ್ಟಾಗ್ರಾಂ ಮತ್ತು ಎಕ್ಸ್ ಗಳಲ್ಲಿ ವಿಚಾರಗಳನ್ನು ಹಂಚಿಕೊಳ್ಳುವ ಸ್ವತಂತ್ರ ಕ್ರಿಯೇಟರ್ ಗಳಿಗೂ ಅನ್ವಯಿಸಲು ಕೇಂದ್ರ ಸರ್ಕಾರವು ಮುಂದಾಗಿದೆ. ನಿಯಂತ್ರಣದ ವ್ಯಾಪ್ತಿಗೆ ತರುವ ನಿಟ್ಟಿನಲ್ಲಿ ಸರ್ಕಾರವು ಈ ಕ್ರಮವನ್ನು ಕೈಗೊಂಡಿದ್ದು, ಇದಕ್ಕೆ ಸಂಬಂಧಿಸಿದಂತೆ ಅಭಿವ್ಯಕ್ತಿ ಸ್ವಾತಂತ್ರ್ಯದ ಕುರಿತಾಗಿ ಹೊಸ ರೀತಿಯ ಚರ್ಚೆಗಳು ಪ್ರಾರಂಭಗೊಳ್ಳಲು ಕಾರಣವಾಗಿದೆ. ಮಾಹಿತಿ ತಂತ್ರಜ್ಞಾನ ನಿಯಮಗಳಲ್ಲಿ ಕೆಲವೊಂದು ತಿದ್ದುಪಡಿಗಳನ್ನು ತರುವ ಮೂಲಕ, ವೈಯಕ್ತಿಕವಾಗಿ ತಮ್ಮ ಸಾಮಾಜಿಕ ಜಾಲತಾಣಗಳ ಖಾತೆಗಳಲ್ಲಿ ಮಾಹಿತಿಗಳನ್ನು ಹಂಚಿಕೊಳ್ಳುವವರಿಗೂ ನಿಯಂತ್ರಣದ ಚೌಕಟ್ಟನ್ನು ವಿಸ್ತರಿಸುವ ಪ್ರಯತ್ನ ನಡೆಸಲಾಗಿದೆ.

ಕೇಂದ್ರ ಸರ್ಕಾರದ ನಿರ್ಧಾರದಂತೆ ಹೊಸ ತಿದ್ದುಪಡಿ ಜಾರಿಗೆ ಬಂದಲ್ಲಿ ಸುದ್ಧಿ ಮತ್ತು ಪ್ರಚಲಿತ ವಿದ್ಯಮಾನಗಳ ಕುರಿತು ನಿರಂತರವಾಗಿ ಮಾಹಿತಿಗಳನ್ನು ಹಂಚಿಕೊಳ್ಳುವ ವ್ಯಕ್ತಿಗಳ ಅಭಿಪ್ರಾಯ ಮತ್ತು ಮಾಹಿತಿಗಳು ಕೇಂದ್ರ ಪ್ರಸಾರ ಸಚಿವಾಲಯದ ವ್ಯಾಪ್ತಿಗೆ ಒಳಪಡುತ್ತದೆ. ಒಂದು ವೇಳೆ ಸಂಬಂಧಿತ ವ್ಯಕ್ತಿಗಳು ನಿಯಮಗಳನ್ನು ಉಲ್ಲಂಘಿಸಿದ್ದಾದಲ್ಲಿ ಅಂತಹ ಕಂಟೆಂಟ್ ಗಳನ್ನು ತೆಗೆದು ಹಾಕುವ ಮತ್ತು ತಿದ್ದುಪಡಿ ಮಾಡುವ ಅಧಿಕಾರವು ಸಚಿವಾಲಯಕ್ಕೆ ಇರುತ್ತದೆ ಎಂದು ಹೇಳಲಾಗಿದೆ. ಜೊತೆಗೆ ಕೇಂದ್ರ ಸರ್ಕಾರವು ಸಿದ್ಧಪಡಿಸುತ್ತಿರುವ ‘ಬ್ರಾಡ್ ಕಾಸ್ಟಿಂಗ್ ಸೇವೆಗಳ ನಿಯಂತ್ರಣ ವಿಧೇಯಕ 2024’ರ ಮೂಲಕ ಡಿಜಿಟಲ್ ಮಾಧ್ಯಮಗಳನ್ನು ಟೆಲಿವಿಷನ್ ಮಾಧ್ಯಮಗಳಂತೆ ನಿಯಂತ್ರಿಸುವ ದಿಕ್ಕಿನತ್ತ ಗಮನಹರಿಸಿದೆ.‌

ಆದರೆ ಇದು ಅಭಿವ್ಯಕ್ತಿ ಸ್ವಾತಂತ್ರ್ಯದ ವ್ಯಾಪ್ತಿಯನ್ನು ಸೀಮಿತಗೊಳಿಸುವ, ಆ ಮೂಲಕ ಡಿಜಿಟಲ್ ವೇದಿಕೆಗಳಲ್ಲಿ ಭಯದ ವಾತಾವರಣ ನಿರ್ಮಾಣ ಮಾಡುವ ಸಾಧ್ಯತೆಯಿದ್ದು, ಇದರಿಂದಾಗಿ ಸ್ವತಂತ್ರ ಧ್ವನಿಗಳು ಕುಂಠಿತವಾಗುವ ಪರಿಸ್ಥಿತಿ ಎದುರಾಗಲಿದೆ ಎನ್ನುವ ಅಭಿಪ್ರಾಯಗಳು ಅಲ್ಲಲ್ಲಿ ಕೇಳಿ ಬರುತ್ತಿದೆ. ತಪ್ಪು ಮಾಹಿತಿ ಮತ್ತು ದ್ವೇಷದ ಭಾಷಣವನ್ನು ತಡೆಯುವುದು ಸರ್ಕಾರದ ಉದ್ದೇಶವಾಗಿದ್ದರೂ ಅದೇ ಸಂದರ್ಭದಲ್ಲಿ ನಿರ್ಭೀತ ವಾಕ್ ಸ್ವಾತಂತ್ರ್ಯವನ್ನು ಕಾಪಾಡುವುದು ಹೇಗೆ ಎನ್ನುವುದು ಒಂದು ಮಹತ್ವದ ಪ್ರಶ್ನೆಯಾಗಿ ಸರ್ಕಾರ ಮತ್ತು ಸಾರ್ವಜನಿಕರನ್ನು ಕಾಡುತ್ತಿದೆ.

Categories
ರಾಷ್ಟ್ರೀಯ ವಾರ್ತೆ

ಯುದ್ಧ ಮುಗಿಯಲ್ಲ.. ಬದುಕು ಉಳಿಯಲ್ಲ..!

ಯುದ್ಧ ಮುಗಿಯಲ್ಲ.. ಬದುಕು ಉಳಿಯಲ್ಲ..!
– ಭಾರತದಲ್ಲಿ ಯುದ್ಧದ ಎಫೆಕ್ಟ್: ಉದ್ಯಮ ತಳಮಳ
– ಇನ್ನು ಭಾರತ ಗಟ್ಟಿ ಆಗದಿದ್ದರೆ ಭವಿಷ್ಯ ಕತ್ತಲು!
– ಲಕ್ಷ ಲಕ್ಷ ಉದ್ಯೋಗ ಕಡಿತ: ಉದ್ಯಮಗಳಿಗೆ ನಷ್ಟ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಅಮೇರಿಕಾ ಇರಾನ್ ಯುದ್ಧ ಇದೀಗ ಜಗತ್ತಿನ ಎಲ್ಲೆಡೆ ಸಮಸ್ಯೆ ತಂದಿಟ್ಟಿದೆ. ಎರಡು ಮೂರು ವಾರಗಳಲ್ಲಿ ಭೀಕರ ದಾಳಿ ಮಾಡುವುದಾಗಿ ಅಮೇರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿಕೆ ನೀಡಿದ್ದಾರೆ. ಇರಾನ್ ನೊಂದಿಗಿನ ಯುದ್ಧವನ್ನು ಇನ್ನು ಕೆಲವೇ ದಿನಗಳಲ್ಲಿ ಕೊನೆಗೊಳಿಸಲಿದ್ದೇವೆ ಎಂದು ಅಮೇರಿಕಾದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿರುವ ಬೆನ್ನಲ್ಲೇ, ಇನ್ನು ಎರಡು ಮೂರು ವಾರಗಳಲ್ಲಿ ಇರಾನ್ ಮೇಲೆ ಉಗ್ರ ದಾಳಿಯೊಂದನ್ನು ನಡೆಸಲಿದ್ದೇವೆ ಎಂದಿದ್ದಾರೆ. ಈಗಾಗಲೇ ಹಲವಾರು ದಿನಗಳಿಂದ ನಡೆಸಿದ ಯುದ್ಧದಲ್ಲಿ ಇರಾನ್ ನ ನೌಕಾಪಡೆ ವಾಯುಪಡೆಗಳನ್ನು ಧ್ವಂಸಗೊಳಿಸಿದ್ದೇವೆ. ಇರಾನ್ ಒಪ್ಪಂದಕ್ಕೆ ಒಪ್ಪಿದರೆ ಯುದ್ಧವನ್ನು ನಿಲ್ಲಿಸುತ್ತೇವೆ. ಇಲ್ಲವೆಂದಾದಲ್ಲಿ ಅದರ ವಿದ್ಯುತ್ ಘಟಕಗಳನ್ನು ಗುರಿಯಾಗಿಸಿಕೊಂಡು ದಾಳಿಯನ್ನು ನಡೆಸುತ್ತೇವೆ ಎಂದು ತಿಳಿಸಿದ್ದಾರೆ.

ಹಾರ್ಮಜ್ ನಿಂದ ನಮಗೆ ಇಂಧನದ ಅವಶ್ಯಕತೆ ಇಲ್ಲ ಒಂದು ವೇಳೆ ಜಗತ್ತಿನ ಇತರ ರಾಷ್ಟ್ರಗಳು ಅದನ್ನು ಬಯಸಿದರೆ ಅವರೇ ತೆಗೆದುಕೊಂಡು ಹೋಗಲಿ ಎಂದು ತಮ್ಮ ಹೇಳಿಕೆಯಲ್ಲಿ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ. ಇತ್ತ ಭಾರತ ಸೇರಿ ಅನೇಕ ದೇಶಗಳು ಯುದ್ಧದ ಎಫೆಕ್ಟ್ ಇಂದ ಕಂಗಾಲಾಗಿವೆ. ದಿನ ನಿತ್ಯ ಬಳಕೆ ವಸ್ತುಗಳು ಸೇರಿ ಎಲ್ಲಾ ವಸ್ತುಗಳ ಬೆಲೆ ಗಗನಕ್ಕೆ ಏರಿದೆ. ಗ್ಯಾಸ್, ಕಬ್ಬಿಣ, ಅಗತ್ಯ ವಸ್ತುಗಳ ಬೆಲೆ ಹೆಚ್ಚಾಗಿದ್ದು ಬಡವರ ಬದುಕು ಬೀದಿಗೆ ಬಂದಿದೆ. ಇನ್ನು ಯುದ್ಧ ಮುಂದುವರಿದಲ್ಲಿ ಭಾರತಕ್ಕೆ ಭಾರೀ ತೊಂದರೆ ಅಗಲಿದೆ. ಗ್ಯಾಸ್ ಸಿಗದೆ ಹೋಟೆಲ್, ಕಾರ್ಖಾನೆ, ಸಣ್ಣ ಉದ್ಯಮಗಳು ನೆಲ ಕಚ್ಚುತ್ತಿವೆ. ಸಾವಿರಾರು ಉದ್ಯೋಗ ನಷ್ಟ ಆಗುತ್ತಿದೆ. ಭಾರತ ಎಲ್ಲದಕ್ಕೂ ಅವಲಂಬನೆ ಆಗಿರುವುದು ದೊಡ್ಡ ಹೊಡೆತಕ್ಕೆ ಕಾರಣವಾಗಿದೆ.

Categories
ಮಾಹಿತಿ ಸುದ್ದಿ ರಾಜ್ಯ ರಾಷ್ಟ್ರೀಯ ವಾರ್ತೆ

ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರ ವಿಸರ್ಜನೆ, ಕಸ ಎಸೆದರೆ ದಂಡ!

ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರ ವಿಸರ್ಜನೆ, ಕಸ ಎಸೆದರೆ ದಂಡ!
– ದೆಹಲಿಯಲ್ಲಿ ಹೊಸ ನಿಯಮ: ಮುಂದೆ ಎಲ್ಲಾ ಕಡೆ ಇದೇ ನಿಯಮ ಸಾಧ್ಯತೆ
– ಕರ್ಕಶ ಹಾರ್ನ್, ಶಬ್ದ ಮಾಡಿದರೂ ದಂಡ!

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ನವದೆಹಲಿ: ಇನ್ನು ಮುಂದೆ ದೇಶದ ರಾಜಧಾನಿ ನವ ದೆಹಲಿಯಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರ ವಿಸರ್ಜನೆ ಮಾಡಿದರೆ, ಕಸ ಎಸೆದರೆ 500ರೂಪಾಯಿ ದಂಡ ವಿಧಿಸುವ ಮಸೂದೆಯನ್ನು ಲೋಕಸಭೆಯು ಅಂಗೀಕರಿಸಿದೆ. ಪ್ರಸ್ತುತ ದೆಹಲಿಯ ಮುನ್ಸಿಪಲ್ ಕಾರ್ಪೊರೇಷನ್ ಕಾಯ್ದೆ 1957ರ ಅನ್ವಯ ಈ ರೀತಿಯ ಕೃತ್ಯಕ್ಕೆ 50 ರೂಪಾಯಿ ದಂಡ ವಿಧಿಸಲಾಗುತ್ತಿತ್ತು, ಜನ್ ವಿಶ್ವಾಸ್ ಬಿಲ್ 2025 ಕಾಯ್ದೆಯು ಜಾರಿಗೆ ಬಂದಲ್ಲಿ ಇದರ ಮೊತ್ತ 10 ಪಟ್ಟು ಹೆಚ್ಚಲಿದೆ ಎನ್ನುವ ಮಾಹಿತಿ ಲಭಿಸಿದೆ. ಜನರಲ್ಲಿ ನಾಗರಿಕ ಪ್ರಜ್ಞೆಯನ್ನು ಬೆಳೆಸುವ ನಿಟ್ಟಿನಲ್ಲಿ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವರಾದ ಜಿತಿನ್ ಪ್ರಸಾದ್ ಅವರು ಈ ತಿದ್ದುಪಡಿಯನ್ನು ಮಂಡಿಸಿ, ಲೋಕಸಭೆಯಿಂದ ಅಂಗೀಕಾರವನ್ನು ಸ್ವೀಕರಿಸಿದ್ದಾರೆ ಎನ್ನಲಾಗಿದೆ.

ಕೇವಲ ಮೂತ್ರ ವಿಸರ್ಜನೆ ಮತ್ತು ಕಸ ಎಸೆಯುವುದು ಅಷ್ಟೇ ಅಲ್ಲದೆ, ಕರ್ಕಶ ಶಬ್ದ ಮಾಡುವ ಮೂಲಕ ಶಾಂತಿಯನ್ನು ಕದಡುವ, ಮಾನವ ತ್ಯಾಜ್ಯ ಎಸೆಯುವ, ಸಗಣಿ ಅಥವಾ ಗೊಬ್ಬರ ಶೇಖರಿಸಿಡುವುದಕ್ಕೂ ದಂಡವು ಅನ್ವಯಗೊಳ್ಳುತ್ತದೆ ಎಂದು ಹೇಳಲಾಗಿದೆ. ಇದರೊಂದಿಗೆ ಕೊರಳಿಗೆ ಬೆಲ್ಟ್ ಹಾಕಿರದ ಸಾಕು ನಾಯಿಯನ್ನು ರಸ್ತೆಯಲ್ಲಿ ತಿರುಗಾಡಲು ಬಿಟ್ಟರೆ 50 ರಿಂದ 1.000 ರೂಪಾಯಿ ದಂಡ, ಸಾರ್ವಜನಿಕ ಸ್ಥಳಗಳಲ್ಲಿ ದನಗಳನ್ನು ಕಟ್ಟಿದರೆ, ಮನೆ ಸಂಖ್ಯೆಗೆ ಹಾನಿ ಮಾಡಿದರೆ 1.000 ರೂಪಾಯಿ ದಂಡ, ಮನೆಯ ಸುತ್ತಮುತ್ತಲಿರುವ ಹೊಲಸನ್ನು ಸ್ವಚ್ಛಗೊಳಿಸದಿದ್ದಲ್ಲಿ 50 ರೂಪಾಯಿ ಬದಲಿಗೆ 500 ರೂಪಾಯಿ ದಂಡ, ಅಪಾಯಕಾರಿ ಪಟಾಕಿ ಹೊಡೆದರೆ 50 ರೂಪಾಯಿ ಬದಲಿಗೆ 500 ರೂಪಾಯಿ ದಂಡ, ರಸ್ತೆಗೆ ಕಸ ಎಸೆದರೆ 50 ರೂಪಾಯಿ ಬದಲು 200 ರೂಪಾಯಿ ದಂಡ, ಕಸ ಗುಡಿಸುವ ಪುರಸಭೆಯ ಸಿಬ್ಬಂದಿಯು ಅನುಮತಿ ಇಲ್ಲದೆ ರಜೆ ಹಾಕಿದ್ದಲ್ಲಿ ಒಂದು ತಿಂಗಳ ಸೆರೆಮನೆ ವಾಸದೊಂದಿಗೆ 500 ರೂಪಾಯಿ ದಂಡ ವಿಧಿಸಲಾಗುತ್ತದೆ.

Categories
ಉದ್ಯೋಗ ಸುದ್ದಿ ರಾಜ್ಯ ರಾಷ್ಟ್ರೀಯ ವಾರ್ತೆ

ವಿಶ್ವದಲ್ಲಿ ಉದ್ಯೋಗ ಕಡಿತ ಶುರುವಾಗಿದೆ!

ವಿಶ್ವದಲ್ಲಿ ಉದ್ಯೋಗ ಕಡಿತ ಶುರುವಾಗಿದೆ!
– ಒರಾಕಲ್ ಕಂಪನಿಯಿಂದ 1.6 ಲಕ್ಷ ಉದ್ಯೋಗಿಗಳ ವಜಾ
– ಬೆಂಗಳೂರು ಸೇರಿ ಎಲ್ಲೆಡೆ ಉದ್ಯೋಗ ಕಡಿತ ಹೆಚ್ಚಳ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ನ್ಯೂಯಾರ್ಕ್: ಪ್ರಸಿದ್ಧ ತಂತ್ರಜ್ಞಾನ ಸಂಸ್ಥೆಯಾದ ಒರಾಕಲ್ ಮಂಗಳವಾರದಂದು ದಿಢೀರ್ ಆಗಿ ಭಾರಿ ಪ್ರಮಾಣದ ಲೇಆಫ್ ಗೆ ಚಾಲನೆ ನೀಡಿದ್ದು, ಪರಿಣಾಮವಾಗಿ ಸುಮಾರು 30,000 ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಲಾಗಿದೆ. ಈ ಸಂಕಷ್ಟಕ್ಕೆ ಅತಿಹೆಚ್ಚಿನ ಸಂಖ್ಯೆಯಲ್ಲಿ ಭಾರತೀಯರು ಒಳಗಾಗಿದ್ದಾರೆ ಎನ್ನುವುದು ಮತ್ತಷ್ಟು ಆತಂಕವನ್ನು ಸೃಷ್ಟಿಸಿದೆ.

ಒರಾಕಲ್ ಸುಮಾರು 1.62 ಲಕ್ಷದಷ್ಟು ಸಿಬ್ಬಂದಿಗಳನ್ನು ಹೊಂದಿದ್ದು, ಶೇಕಡಾ 18ರಷ್ಟು ಉದ್ಯೋಗಿಗಳನ್ನು ಮಂಗಳವಾರದಂದು ವಜಗೊಳಿಸಿದೆ. ಇದರಲ್ಲಿ ಸುಮಾರು 12.೦೦೦ ಮಂದಿ ಭಾರತೀಯರಿದ್ದಾರೆ ಎನ್ನುವುದು ಆಘಾತಕಾರಿ ಸಂಗತಿಯಾಗಿದೆ. ಮಾರ್ಚ್ 31 ಕೊನೆಯ ಕೆಲಸದ ದಿನವಾಗಿರುವುದರಿಂದ ತಕ್ಷಣ ಕಂಪನಿಯು ಲೇಆಫ್ ಇ-ಮೇಲ್ ಕಳುಹಿಸಿದ್ದು, ಅದರಲ್ಲಿ ಕಂಪನಿಯ ಪುನರ್ವ್ಯವಸ್ಥಿಕರಣದ ಭಾಗವಾಗಿ ನಿಮ್ಮನ್ನು ಕೆಲಸದಿಂದ ವಜಾಗೊಳಿಸಿದ್ದು, ಇನ್ನು ಮುಂದೆ ನಿಮ್ಮ ಕೆಲಸದ ಅಗತ್ಯ ಕಂಪನಿಗೆ ಇಲ್ಲ ಎಂದು ತಿಳಿಸಿದೆ.

ಬಳಿಕ ಲ್ಯಾಪ್ ಟಾಪ್ ಹಾಗೂ ಸಿಸ್ಟಮ್ ಗಳ ಆ್ಯಕ್ಸೆಸ್ ಅನ್ನು ತಕ್ಷಣ ಸ್ಥಗಿತಗೊಳಿಸಿರುವುದು ಉದ್ಯೋಗಿಗಳಲ್ಲಿ ಚಿಂತೆಯನ್ನುಂಟು ಮಾಡಿದೆ. ನಿಜಾಂಶವೆಂದರೆ ಒರಾಕಲ್ ಯಾವುದೇ ರೀತಿಯ ನಷ್ಟವನ್ನು ಅನುಭವಿಸುತ್ತಿಲ್ಲ. ಬದಲಿಗೆ ಕಳೆದ ತ್ರೈಮಾಸಿಕದಲ್ಲಿ ಇದರ ಲಾಭವು ಶೇಕಡಾ 95 ರಷ್ಟು ಹೆಚ್ಚಳಗೊಂಡಿದ್ದು, 6.13 ಬಿಲಿಯನ್ ಡಾಲರ್ ಗೆ ತಲುಪಿದೆ ಎನ್ನಲಾಗಿದೆ. ಆದರೆ ಕಂಪನಿಯು ಕೃತಕ ಬುದ್ಧಿಮತ್ತೆ ಡೇಟಾ ಸೆಂಟರ್ ಕ್ಷೇತ್ರದಲ್ಲಿ ಹೂಡಿಕೆ ಮಾಡಲು ಮುಂದಾಗಿದ್ದು, ಇದಕ್ಕೆ ಸಂಬಂಧಿಸಿದಂತೆ 156 ಬಿಲಿಯನ್ ಡಾಲರ್ ವೆಚ್ಚದ ಈ ಯೋಜನೆಗಾಗಿ ಕಂಪನಿಯು ಈಗಾಗಲೇ 50 ಬಿಲಿಯನ್ ಡಾಲರ್ ನಷ್ಟು ಸಾಲ ಮಾಡಿದ್ದು, ಅದರ ವೆಚ್ಚವನ್ನು ಸರಿದೂಗಿಸಲು ಈ ಕಠಿಣ ಕ್ರಮವನ್ನು ಕೈಗೊಂಡಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಕಂಪನಿಯು ವಜಾಗೊಂಡ ಉದ್ಯೋಗಿಗಳಿಗೆ ಮೂರು ತಿಂಗಳ ಸಂಬಳ ಮತ್ತು ಮಾಡಿರುವ ಕೆಲಸಕ್ಕೆ ಅನುಗುಣವಾಗಿ ಪ್ರತಿ ವರ್ಷಕ್ಕೆ 15 ದಿನಗಳ ವೇತನ, ಗ್ರಾಚ್ಯೂಟಿ ಸೇರಿದಂತೆ ಇನ್ನೂ ಅನೇಕ ಬಗೆಯ ಪರಿಹಾರ ಪ್ಯಾಕೇಜ್ ಗಳನ್ನು ಘೋಷಿಸಿದೆ ಎನ್ನುವ ಮಾಹಿತಿ ಲಭಿಸಿದೆ. ಆದರೂ ಕೂಡ ಭಾರತ ಮತ್ತು ಅಮೆರಿಕಾದಲ್ಲಿನ ಸಾವಿರಾರು ಕುಟುಂಬಗಳು ಕಂಪನಿಯ ಈ ಅನಿರೀಕ್ಷಿತ ನಿರ್ಧಾರದಿಂದಾಗಿ ಆರ್ಥಿಕ ಅನಿಶ್ಚಿತತೆಗೆ ಒಳಗಾಗುವಂತಾಗಿದೆ ಎನ್ನುವ ಸಂಗತಿ ತಿಳಿದುಬಂದಿದೆ. ಬೆಂಗಳೂರು ಸೇರಿ ಎಲ್ಲೆಡೆ ಉದ್ಯೋಗ ಕಡಿತ ಹೆಚ್ಚಳ ಆಗುವ ಸಾಧ್ಯತೆ ಇದೆ.

Categories
ಮಾಹಿತಿ ಸುದ್ದಿ ರಾಜ್ಯ ರಾಷ್ಟ್ರೀಯ ವಾರ್ತೆ

ಯುದ್ಧ ಮುಂದುವರಿದರೆ ಸೀಮೆ ಎಣ್ಣೆ ಬುಡ್ಡಿಯೇ ಗತಿ?!

ಯುದ್ಧ ಮುಂದುವರಿದರೆ ಸೀಮೆ ಎಣ್ಣೆ ಬುಡ್ಡಿಯೇ ಗತಿ?!
– ಪಡಿತರ ಅಂಗಡಿಗಳಲ್ಲಿ ಇನ್ನು ಮುಂದೆ ಸೀಮೆ ಎಣ್ಣೆ ಲಭ್ಯ
– ಗ್ಯಾಸ್ ಮುಂದೆ ಕಷ್ಟ ಆಗುತ್ತಾ? ಕೇಂದ್ರದ ನಿಯಮ ಏನು?

ನವದೆಹಲಿ: ಮಧ್ಯಪ್ರಾಚ್ಯದ ಯುದ್ಧದಿಂದಾಗಿ ಭಾರತದಲ್ಲಿ ತಲೆದೋರಬಹುದಾದ ಸಿಲಿಂಡರ್ ಪುರೈಕೆಯಲ್ಲಿನ ವ್ಯತ್ಯಯಕ್ಕೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರವು ಒಂದು ಮಹತ್ವದ ನಿರ್ಧಾರವನ್ನು ಕೈಗೊಂಡಿದೆ. ಪರಿಣಾಮವಾಗಿ ಇನ್ನು ಮುಂದೆ ಮನೆಯಲ್ಲಿ ಅಡುಗೆಗೆ ಸಿಲಿಂಡರ್ ಬದಲಾಗಿ ಸೀಮೆಎಣ್ಣೆಯನ್ನು ಬಳಸಲು ಅವಕಾಶ ಕಲ್ಪಿಸಿದೆ.‌ ಇದಕ್ಕೆ ಸಂಬಂಧಿಸಿದಂತೆ ಆದೇಶವನ್ನು ಹೊರಡಿಸಿರುವ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು ದೇಶದ ಎಲ್ಲಾ ರಾಜ್ಯಗಳ ಪಡಿತರ ಅಂಗಡಿಗಳಿಗೆ 1 ಲಕ್ಷ ಕಿಲೋಲೀಟರ್ ನಷ್ಟು, ನಿಯಮಿತ ಕೋಟಾದ ಜೊತೆಗೆ, ಇನ್ನೂ ಹೆಚ್ಚುವರಿಯಾಗಿ 48,000 ಕಿಲೋಲೀಟರ್ ಸೀಮೆಎಣ್ಣೆಯನ್ನು ಹಂಚಿಕೆ ಮಾಡಿದೆ. ಮೊದಲಿಗೆ ಬಡ ಕುಟುಂಬಗಳಿಗೆ ಇದನ್ನು ಅಡುಗೆಯ ಇಂಧನವಾಗಿ ವಿತರಿಸಲಾಗುತ್ತದೆ ಎನ್ನುವ ಮಾಹಿತಿ ಲಭಿಸಿದೆ.

ಹೊಟೇಲ್ ಮತ್ತು ರೆಸ್ಟೋರೆಂಟ್ ಗಳಿಗೆ ಸಿಲಿಂಡರ್ ಗೆ ಪರ್ಯಾಯ ಇಂಧನವಾಗಿ ಬಯೋಮಾಸ್, ಆರ್ ಡಿಎಫ್ ಪೆಲೆಟ್ ಮತ್ತು ಕಲ್ಲಿದ್ದಲನ್ನು ಒಂದು ತಿಂಗಳ ಕಾಲ ಬಳಸಲು ಅವಕಾಶ ಕಲ್ಪಿಸುವಂತೆ, ಕೇಂದ್ರ ಸರ್ಕಾರವು ಪರಿಸರ ಸಂಸ್ಥೆಗಳಿಗೆ ಮನವಿ ಮಾಡಿಕೊಂಡಿದೆ ಎನ್ನಲಾಗಿದೆ. ಅಲ್ಲದೆ ಇದು ಎಲ್ ಪಿಜಿ ಮೇಲಿನ ಒತ್ತಡವನ್ನು ಕೂಡ ಕಡಿಮೆ ಮಾಡುವ ಸಾಧ್ಯತೆ ಇದೆ ಎನ್ನುವ ಉದ್ದೇಶದಿಂದ ಈ ನಿರ್ಧಾರವನ್ನು ಕೈಗೊಳ್ಳಲಾಗಿದೆ.

ಎಲ್ ಪಿಜಿ ಸಿಲಿಂಡರ್ ಪೂರೈಕೆಯ ಸಮಸ್ಯೆಯು ಮುಖ್ಯವಾಗಿ ಗ್ರಾಮೀಣ ಭಾಗದ ಜನರಿಗೆ ಹೆಚ್ಚು ಪರಿಣಾಮ ಬೀರಿದ್ದು, ಸಿಲಿಂಡರ್ ಬುಕ್ಕಿಂಗ್ ಅವಧಿಯನ್ನು ಹೆಚ್ಚಿಸಿರುವುದೇ ಇದಕ್ಕೆ ಕಾರಣವಾಗಿದೆ. ಮೊದಲಿಗೆ ಗ್ರಾಹಕರು 25 ದಿನಕ್ಕೊಮ್ಮೆ ಸಿಲಿಂಡರ್ ಅನ್ನು ಪಡೆಯಬಹುದಿತ್ತು. ಆದರೆ ಪೂರೈಕೆಯ ವ್ಯತ್ಯಯದಿಂದಾಗಿ 45 ದಿನಗಳಿಗೆ ಹೆಚ್ಚಿಸಲಾಗಿದೆ. ಅಂದರೆ ಗ್ರಾಮೀಣ ಭಾಗದ ಜನರು 25 ದಿನಗಳಿಗೆ ಬದಲಾಗಿ 45 ದಿನಗಳಿಗೊಮ್ಮೆ ಸಿಲಿಂಡರ್ ಅನ್ನು ಬುಕ್ಕಿಂಗ್ ಮಾಡಿ, ಪಡೆಯಬೇಕು ಎನ್ನುವ ಆದೇಶವನ್ನು ಹೊರಡಿಸಲಾಗಿದೆ.

ಇದಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ ಜಂಟಿ ಕಾರ್ಯದರ್ಶಿಗಳಾದ ಸುಜಾತ ಶರ್ಮಾ ಅವರು “ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಿದ ನಂತರ ದೇಶಿಯ ಸರಬರಾಜುಗಳ ಮೇಲೆ ತೀವ್ರ ಪರಿಣಾಮ ಬೀರಿದೆ. ದೇಶವು ಹಿಂದೆಂದೂ ಈ ರೀತಿಯ ಪರಿಸ್ಥಿತಿಯನ್ನು ಎದುರಿಸಿರಲಿಲ್ಲ. ಗ್ರಾಮೀಣ ಭಾಗದ ಗ್ರಾಹಕರು 45 ದಿನಗಳ ನಂತರ ಮಾತ್ರ ಸಿಲಿಂಡರ್ ಗಳನ್ನು ಬುಕ್ ಮಾಡಲು ಸಾಧ್ಯವಾಗುತ್ತಿರುವುದು ನಿಜಕ್ಕೂ ಕಷ್ಟಕರವಾದ ಸಂಗತಿಯಾಗಿದೆ” ಎಂದು ವಿಷಾದ ವ್ಯಕ್ತಪಡಿಸಿದ್ದಾರೆ.

2012ರಲ್ಲಿ ಎಲ್‌ಪಿಜಿ ಅಡುಗೆ ಅನಿಲ ಬಳಸುವ ಅಭಿಯಾನವನ್ನು ಪ್ರಾರಂಭಿಸಲಾಗಿತ್ತು, ಇದರ ಮೂಲಕ ಉಜ್ವಲ ಯೋಜನೆಯನ್ನು ಪ್ರಾರಂಭಿಸಿ, ಈ ಯೋಜನೆಯ ಅಡಿಯಲ್ಲಿ ಬಡ ಕುಟುಂಬಗಳಿಗೆ ಕೇಂದ್ರ ಸರ್ಕಾರವು ಸಬ್ಸಿಡಿ ದರದಲ್ಲಿ ಸಿಲಿಂಡರ್ ಅನ್ನು ನೀಡುತ್ತಿತ್ತು. ಆದರೆ ಈಗಿನ ಪರಿಸ್ಥಿತಿಗೆ ಅದು ಸಾಧ್ಯವಾಗದಿರುವ ಕಾರಣ ಕೇಂದ್ರ ಸರ್ಕಾರವು ಸೀಮೆಎಣ್ಣೆ ಬಳಕೆಗೆ ಅನುಮತಿ ನೀಡುವ ಮೂಲಕ ಪ್ರಸ್ತುತ ಎದುರಾಗಿರುವ ಸಮಸ್ಯೆಗೆ ಸಧ್ಯಕ್ಕೆ ಪರಿಹಾರ ಒದಗಿಸಿದೆ ಎನ್ನಲಾಗಿದೆ.

Categories
ರಾಜ್ಯ ರಾಷ್ಟ್ರೀಯ ವಾರ್ತೆ ಹಬ್ಬಗಳು

ಮನುಕುಲಕ್ಕೆ ಮಾದರಿ ಶ್ರೀರಾಮ..!

ಮನುಕುಲಕ್ಕೆ ಮಾದರಿ ಶ್ರೀರಾಮ..!
– ಸಮಸ್ತ ಜನತೆಗೆ ರಾಮ ನವಮಿ ಶುಭಾಶಯಗಳು

ತ್ರೇತಾಯುಗದಲ್ಲಿ ಇಕ್ಷ್ವಾಕು ವಂಶದ ರಾಜ ದಶರಥನ ಪಟ್ಟದರಸಿ ಕೌಸಲ್ಯೆಯ ಗರ್ಭದಲ್ಲಿ ಜನಿಸಿದ ಶ್ರೀರಾಮನು ತನ್ನ ಸಾಮರ್ಥ್ಯ, ವ್ಯಕ್ತಿತ್ವ, ಉತ್ತಮ ಗುಣಗಳಿಂದಾಗಿ ‘ಪುರುಷೋತ್ತಮ’ ಎನಿಸಿಕೊಂಡು ಮನುಕುಲಕ್ಕೆ ಮಾದರಿಯಾದವನು. ರಾಜ ವೈಭೋಗವನ್ನು ತ್ಯಜಿಸಿ ತಂದೆಯ ಮಾತನ್ನು ನಡೆಸಿಕೊಡುವ ಸಲುವಾಗಿ ಪತ್ನಿ, ಸಹೋದರ ಸಹಿತನಾಗಿ ನಾರುಮಡಿಯುಟ್ಟು ಹದಿನಾಲ್ಕು ವರ್ಷಗಳ ಕಾಲ ವನವಾಸವನ್ನು ಅನುಭವಿಸಿ, ಮಗನೆಂದರೆ ಹೀಗಿರಬೇಕು ಎಂದು ಜಗತ್ತಿಗೆ ತೋರಿಸಿಕೊಟ್ಟ ‘ಪಿತೃ ವಾಕ್ಯ ಪರಿಪಾಲಕ‘.

ಹೆಣ್ಣು ಮಕ್ಕಳಿಗೆ “ನಿನ್ನ ಗಂಡನಾಗುವವನು ಹೇಗಿರಬೇಕು” ಎಂದು ಕೇಳಿದರೆ ಎಲ್ಲರಿಂದ ಬರುವ ಉತ್ತರ “ಶ್ರೀರಾಮನಚಂದ್ರನ ತರ ಇರಬೇಕು” ಎನ್ನುವುದೇ ಆಗಿದೆ.ಕಾರಣ ಸೀತೆಯನ್ನು ಹೊರತು ಪರಸ್ತ್ರೀಯರನ್ನು ತಾಯಿಯಂತೆ, ಸಹೋದರಿಯರಂತೆ ಕಂಡು ‘ಏಕಪತ್ನಿವೃತಸ್ತ‘ ಎನ್ನುವ ಹೆಸರನ್ನು ಗಳಿಸಿದ ಆದರ್ಶ ಪತಿ ಶ್ರೀರಾಮ.

ಪತ್ನಿ ಸೀತೆಯ ಮೇಲೆ ಸಂಪೂರ್ಣ ನಂಬಿಕೆಯಿದ್ದರೂ ಕೂಡ ಓರ್ವ ರಾಜನಾಗಿ ಯೋಚಿಸಿ, ರಾಜ್ಯದ ಒಬ್ಬ ಸಾಮಾನ್ಯ ಪ್ರಜೆಯಾಗಿದ್ದ ಅಗಸನ ಮಾತಿಗೆ ಬೆಲೆ ಕೊಟ್ಟು ವೈದೇಹಿಯನ್ನು ಅಗ್ನಿಪರೀಕ್ಷೆಗೆ ಒಳಪಡಿಸಿ, ತನ್ನ ಪತ್ನಿ ಎಂದಿಗೂ ಪತಿವೃತೆಯೇ, ಭೂಮಿತೂಕದ ಅವಳು ಯಾವಾಗಲೂ ಪವಿತ್ರಳಾಗಿಯೇ ಇರುತ್ತಾಳೆ ಎನ್ನುವ ಅಂಶವನ್ನು ಪ್ರತ್ಯಕ್ಷವಾಗಿ ಬಿಂಬಿಸಿದ್ದಷ್ಟೇ ಅಲ್ಲದೆ, ರಾಜ್ಯವನ್ನು ಆಳುವವರು ಯಾವ ರೀತಿ ನಡೆದುಕೊಳ್ಳಬೇಕು ಎನ್ನುವ ಸಂದೇಶವನ್ನು ಲೋಕಕ್ಕೆ ನೀಡಿದನು.

ಸ್ರ್ತೀಲೋಲುಪನಾದ ರಾವಣನಂತಹ ದುಷ್ಟರನ್ನು ಸಂಹರಿಸಿದ ಪರಾಕ್ರಮಿ. ಹನುಮಂತನಂತಹ ಭಕ್ತನ ಪ್ರೀತಿಗೆ ಸೋತು ಶರಣಾದ ಭಕ್ತಪ್ರಿಯ. ಶಬರಿಗೆ ಕೊನೆಗಾಲದಲ್ಲಿ ತನ್ನ ದರ್ಶನ ಭಾಗ್ಯ ಕರುಣಿಸಿ, ಸಂತೃಪ್ತ ಮರಣ ಲಭಿಸುವಂತೆ ಮಾಡುವ ಮೂಲಕ, ಮುಕ್ತಿ ನೀಡಿದವನು. ಯಾವುದೇ ತಪ್ಪು ಮಾಡದೆ ಪತಿಯ ಕೋಪಕ್ಕೆ ತುತ್ತಾಗಿ, ಶಾಪಗ್ರಸ್ತಳಾಗಿ ಕಲ್ಲಾಗಿದ್ದ ಅಹಲ್ಯೆಗೆ ಕೇವಲ ಪಾದಸ್ಪರ್ಶದಿಂದ ಶಾಪವಿಮೋಚನೆ ಮಾಡಿ, ಪತಿ ಗೌತಮ ಋಷಿಯೊಂದಿಗೆ ದಾಂಪತ್ಯ ಜೀವನವನ್ನು ನಡೆಸಲು ಅನುವು ಮಾಡಿಕೊಟ್ಟವನು.

ಶ್ರೀರಾಮನನ್ನು ನೋಡಲು ಸರಳ ಮತ್ತು ಸುಂದರ. ಆದರೆ ಆತನ ಮಹಿಮೆ ಅಪಾರ. ಎಲ್ಲಾ ವಿಚಾರಗಳಲ್ಲೂ ಮನುಕುಲಕ್ಕೆ ಮಾದರಿಯಾಗಿರುವ ಶ್ರೀರಾಮನ ಜನ್ಮ ದಿನವಾದ ರಾಮನವಮಿಯನ್ನು ಅದ್ಧೂರಿಯಾಗಿ ಆಚರಿಸಿ, ಅವನ ಆದರ್ಶ ಗುಣಗಳನ್ನು ತಕ್ಕಮಟ್ಟಿಗೆ ಅಳವಡಿಸಿಕೊಂಡು, ನಾವು ಮುಂದಿನ ಪೀಳಿಗೆಗೆ ಮಾದರಿ ವ್ಯಕ್ತಿಗಳಾಗಿ ರೂಪುಗೊಂಡು ಸಾರ್ಥಕ ಜೀವನ ನಡೆಸೋಣ.

Categories
ಮಾಹಿತಿ ಸುದ್ದಿ ರಾಜ್ಯ ರಾಷ್ಟ್ರೀಯ ವಾರ್ತೆ

114 ದೇಶಗಳಲ್ಲಿ ಶಾಲಾ ಮಕ್ಕಳಿಗೆ ಮೊಬೈಲ್ ಬ್ಯಾನ್!

114 ದೇಶಗಳಲ್ಲಿ ಶಾಲಾ ಮಕ್ಕಳಿಗೆ ಮೊಬೈಲ್ ಬ್ಯಾನ್!
– ಮೊಬೈಲ್ ಇಂದ ಅನಾರೋಗ್ಯ, ಶಿಕ್ಷಣ ಹಿನ್ನಡೆ
– ಯುವ ಜನರ ಬದುಕು ಮೊಬೈಲ್ ಚಟಕ್ಕೆ ಬಲಿ!

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ನವದೆಹಲಿ: ಇಂದಿನ ತಲೆಮಾರಿನ ಮಕ್ಕಳು ಮೊಬೈಲ್ ಚಟಕ್ಕೆ ಒಳಗಾಗುತ್ತಿರುವ ಹಿನ್ನೆಲೆಯಲ್ಲಿ ಅದರಿಂದ ಮಕ್ಕಳನ್ನು ಹೊರತರುವ ನಿಟ್ಟಿನಲ್ಲಿ ಸುಮಾರು 114 ದೇಶಗಳು ಶಾಲಾ ಮಕ್ಕಳು ಮೊಬೈಲ್ ಬಳಸುವುದನ್ನು ನಿಷೇಧಿಸಿದೆ.‌ ಮಕ್ಕಳು ಮೊಬೈಲ್ ಚಟಕ್ಕೆ ದಾಸರಾಗಿರುವ ಕಾರಣ ವಿದ್ಯಾಭ್ಯಾಸದಲ್ಲಿ ಹಿನ್ನಡೆ, ಸೈಬರ್ ಬುಲ್ಲಿಂಗ್ ಎಲ್ಲಕ್ಕಿಂತ ಹೆಚ್ಚಾಗಿ ಮಾನಸಿಕ ಅನಾರೋಗ್ಯಕ್ಕೆ ಒಳಗಾಗುವಂತಹ ಸಮಸ್ಯೆಗಳನ್ನು ಎದುರಿಸುತ್ತಿರುವ ಕಾರಣ ಈ ನಿರ್ಣಯವನ್ನು ಕೈಗೊಳ್ಳಲಾಗಿದೆ.‌ ಕರ್ನಾಟಕ ಸೇರಿ ಈಗಾಗಲೇ ಜಗತ್ತಿನ ಶೇಕಡ 58 ರಷ್ಟು ದೇಶಗಳು ಶಾಲೆಗಳಲ್ಲಿ ಮಕ್ಕಳು ಮೊಬೈಲ್ ಬಳಸುವುದನ್ನು ನಿಷೇಧಿಸಿದೆ ಎಂದು ಯುನೆಸ್ಕೊದ ಜಾಗತಿಕ ಶಿಕ್ಷಣ ನಿಗಾ ಸಮಿತಿಯು ವರದಿಯನ್ನು ಪ್ರಕಟಿಸಿದೆ.

ಕರ್ನಾಟಕದಲ್ಲೂ 14 ವರ್ಷದ ಮಕ್ಕಳಿಗೆ ಮೊಬೈಲ್ ನಿಷೇಧ

ಕರ್ನಾಟಕ ಸರ್ಕಾರವು ಕೂಡ 14 ವರ್ಷದೊಳಗಿನ ಮಕ್ಕಳು ಸಾಮಾಜಿಕ ಜಾಲತಾಣಗಳನ್ನು ಬಳಸುವುದನ್ನು ಸಂಪೂರ್ಣವಾಗಿ ನಿಷೇಧಿಸುವ ಕುರಿತು ಚರ್ಚೆ ನಡೆಸಿದ್ದು, ಬಜೆಟ್ ಸಂದರ್ಭದಲ್ಲಿ ಈ ವಿಚಾರದ ಕುರಿತು ಪ್ರಸ್ತಾಪಿಸಿದೆ. ಸಂಪೂರ್ಣವಾಗಿ ಮೊಬೈಲ್ ಬಳಕೆಯನ್ನು ನಿಷೇಧಿಸಲು ಕಷ್ಟಸಾಧ್ಯವಾಗುವುದರಿಂದ ಕೇವಲ ಸಾಮಾಜಿಕ ಜಾಲತಾಣಗಳ ಬಳಕೆಯನ್ನು ನಿಷೇಧಿಸಲು ಘೋಷಿಸಿದೆ. ಇದರ ಪರಿಣಾಮವಾಗಿ ಇಂತಹ ನಿರ್ಣಯವನ್ನು ಕೈಗೊಂಡಿರುವ ದೇಶದ ಮೊದಲ ರಾಜ್ಯ ಎನ್ನುವ ಹೆಗ್ಗಳಿಕೆಗೆ ಕರ್ನಾಟಕವು ಪಾತ್ರವಾಗಿದೆ. ಕರ್ನಾಟಕವನ್ನು ಮಾದರಿಯಾಗಿಸಿಕೊಂಡ ತೆಲಂಗಾಣ ಸರ್ಕಾರವೂ ಕೂಡ ಇಂತಹದೇ ಘೋಷಣೆಯನ್ನು ಹೊರಡಿಸಿದೆ ಎನ್ನುವ ಮಾಹಿತಿ ಲಭಿಸಿದೆ.

ಯುವ ಜನರ ಬದುಕು ಮೊಬೈಲ್ ಚಟಕ್ಕೆ ಬಲಿ!

ಯುವ ಜನತೆ ಕೂಡ ಮೊಬೈಲ್ ಚಟಕ್ಕೆ ಬಲಿ ಆಗುತ್ತಿದ್ದಾರೆ. ಅತಿಯಾದ ಮೊಬೈಲ್ ಬಳಕೆ ಬದುಕನ್ನು ಹಾಳು ಮಾಡುತ್ತಿದೆ. ಉದ್ಯೋಗ, ಶಿಕ್ಷಣ, ಕೌಶಲ್ಯ ಮರೆಯಾಗುತ್ತಿದೆ. ಮೊಬೈಲ್ ಗೀಳು ವಯುಕ್ತಿಕ ಜೀವನವನ್ನು ಹಾಳು ಮಾಡುತ್ತಿದೆ.