ಹೂವಿನ ದರ ಭಾರೀ ಇಳಿಕೆ: ಜನರು ಖುಷ್!
– ಹಬ್ಬದ ಸೀಸನ್‌ನಲ್ಲೂ ಈ ಸಲ ಹೂವು ಬೆಲೆ ಕಡಿಮೆ
– ಸ್ಥಳೀಯ ಮಾರುಕಟ್ಟೆಯಲ್ಲಿ ಮನಸಿಗೆ ಬಂದ ದರ?!
NAMMUR EXPRESS NEWS
ಬೆಂಗಳೂರು: ರಾಜ್ಯಾದ್ಯಂತ ಬರಗಾಲದಿಂದ ಕೃಷಿ ಉತ್ಪನ್ನ ಇಳುವರಿ ಕುಂಠಿತಗೊಂಡಿದೆ. ಆದರೆ, ಹೂವಿನ ಬೆಳೆ ವಿಚಾರದಲ್ಲಿ ಇದು ತದ್ವಿರುದ್ಧವಾಗಿದೆ. ಭಾರಿ ಪ್ರಮಾಣದಲ್ಲಿ ಹೂವು ಮಾರುಕಟ್ಟೆಗೆ ಬರುತ್ತಿರುವುದರಿಂದ ಬೆಲೆ ಇಳಿಕೆಯಾಗಿದೆ. ಹಬ್ಬದ ಸೀಸನ್‌ನಲ್ಲೂ ಉತ್ತಮ ಬೆಲೆ ಸಿಗದಂತಾಗಿದೆ. ಆದರೆ, ಕಡಿಮೆ ಬೆಲೆಗೆ ಹೂವು ಸಿಗುತ್ತಿರುವುದರಿಂದ ಗ್ರಾಹಕರ ಮೊಗದಲ್ಲಿ ಸಂತಸ ಮೂಡಿದೆ. ತರಕಾರಿ ಬೆಳೆಯುತ್ತಿದ್ದ ಹಲವು ಬೆಳೆಗಾರರು ಈ ಭಾರಿ ಹೂವಿನ ಬೆಳೆಯತ್ತ ತಿರುಗಿದ್ದಾರೆ. ಹೀಗಾಗಿ ಯಥೇಚ್ಛ ಪ್ರಮಾಣದ ಹೂವು ಮಾರುಕಟ್ಟೆಗೆ ಬರುತ್ತಿದೆ. ಹೀಗಾಗಿ, ಹೂವಿನ ಬೆಲೆ ಸಗಟು ದರದಲ್ಲಿ ಇಳಿಕೆಯಾಗಿದೆ.
ಹೆಚ್ಚಿನ ಗ್ರಾಹಕರು ಬಳಸುವ ಸೇವಂತಿಗೆ ಹೂವು ದರ ಭಾರೀ ಪ್ರಮಾಣದಲ್ಲಿ ಕುಸಿದಿದೆ. ಸಗಟು ದರದಲ್ಲಿ ಕೆ.ಜಿ. ಹೂವಿಗೆ ಕೇವಲ 30-50 ರೂ. ಇದೆ. ಉಳಿದಂತೆ ಕನಕಾಂಬರ, ಮಲ್ಲಿಗೆ ಹೂವು, ಕಾಕಡ ಹೂವಿನ ಬೆಲೆ ಸ್ವಲ್ಪ ಏರಿಕೆಯಾಗಿದೆ. ಈ ಹಿಂದೆ ಚಿಕ್ಕಬಳ್ಳಾಪುರ, ಆನೇಕಲ್‌, ತುಮಕೂರು, ಬೆಂಗಳೂರು ಸುತ್ತಮುತ್ತಲಿನಿಂದ ಕೆ.ಆರ್‌. ಮಾರುಕಟ್ಟೆಗೆ ಹೆಚ್ಚಿನ ಪ್ರಮಾಣದ ಹೂವು ಬರುತ್ತಿತ್ತು. ಈಗ ಚಿತ್ರದುರ್ಗ, ಗೌರಿಬಿದನೂರು, ಚಾಮರಾಜನಗರ ಮತ್ತಿತರ ಜಿಲ್ಲೆಗಳಿಂದಲೂ ಹೂವು ಬರುತ್ತಿದೆ. ಆಂಧ್ರ, ತಮಿಳುನಾಡಿನಿಂದಲೂ ಹೂವು ಬರುತ್ತಿದೆ.
ಹೂವಿನ ಬೆಳೆಗೆ ಪೂರಕವಾದ ವಾತಾವರಣ ಇರುವುದರಿಂದ ಇಳುವರಿಯೂ ಚೆನ್ನಾಗಿದೆ. ಹೀಗಾಗಿ, ಬೆಲೆಗಳು ಇಳಿಕೆಯಾಗಿವೆ ಎನ್ನುತ್ತಾರೆ ಕೆ.ಆರ್‌. ಮಾರುಕಟ್ಟೆ ಸಗಟು ಹೂವಿನ ವ್ಯಾಪಾರಿಗಳ ಸಂಘದ ಅಧ್ಯಕ್ಷ ಎಂ. ದಿವಾಕರ್‌. ಶುಕ್ರವಾರದವರೆಗೆ ಹೂವಿನ ದರ ಕಡಿಮೆಯಾಗಿತ್ತು. ಶನಿವಾರದ ನಂತರ ಮಂಗಳವಾರದವರೆಗೆ ಹಬ್ಬದ ಆಚರಣೆಯಿರುವುದರಿಂದ ಹೂವಿನ ದರ ಸ್ವಲ್ಪ ಏರಿಕೆಯಾಗುವ ಸಾಧ್ಯತೆಯಿದೆ,” ಎನ್ನುತ್ತಾರೆ ದಿವಾಕರ್‌. ಆದರೆ, ಚಿಲ್ಲರೆ ಮಾರಾಟಗಾರರು 30 ರೂ. ಇರುವ ಸೇವಂತಿಗೆ ಹೂವನ್ನು 200-250 ರೂ.ವರೆಗೆ ಮಾರಾಟ ಮಾಡುತ್ತಿದ್ದಾರೆ.
ಹಬ್ಬದ ಹಿನ್ನೆಲೆಯಲ್ಲಿ ಮಾರುಕಟ್ಟೆಗಳಲ್ಲಿ ಖರೀದಿಗೆ ಶುಕ್ರವಾರ ಎಲ್ಲೆಡೆ ಜನಸಂದಣಿ ಕಂಡು ಬಂತು. ಪೂಜೆಗೆ ಬೇಕಾದ ಹೂವು, ಹಣ್ಣು, ಬೂದುಗುಂಬಳ ಜತೆಗೆ, ಪಟಾಕಿ, ಬಟ್ಟೆಗಳ ಖರೀದಿಗಾಗಿ ಮಾರುಕಟ್ಟೆಗಳಲ್ಲಿ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಕಂಡು ಬಂದರು.
