ಕರಾವಳಿಯ ಅಡಕೆ ಹಾಳೆ ತಟ್ಟೆಗೆ ಅಮೇರಿಕಾದಲ್ಲಿ ಡಿಮ್ಯಾಂಡ್!

ಕರಾವಳಿಯ ಅಡಕೆ ಹಾಳೆ ತಟ್ಟೆಗೆ ಅಮೇರಿಕಾದಲ್ಲಿ ಡಿಮ್ಯಾಂಡ್!
– ಭಾರತದ ಉತ್ಪನ್ನಗಳಿಗೆ ಹೆಚ್ಚಿನ ಅವಕಾಶ ಸಿಗಲು ಆರಂಭ
– ಒಂದೂವರೆ ತಿಂಗಳಲ್ಲಿ 1 ಕೋಟಿ ರೂ. ಮೌಲ್ಯದ ಹಾಳೆ ತಟ್ಟೆ ರಫ್ತು
– ಚೀನಾ ಸೇರಿ ಹಲವು ದೇಶಗಳಲ್ಲಿ ಹೆಚ್ಚಿದ ಬೇಡಿಕೆ

NAMMUR EXPRESS NEWS
ಅಮೆರಿಕದಲ್ಲಿ ಟ್ರಂಪ್‌ ಅಧಿಕಾರಕ್ಕೆ ಬಂದಾಕ್ಷಣ ಭಾರತಕ್ಕೆ ಅದರಲ್ಲೂ ಕರಾವಳಿಯ ಅಡಕೆ ಹಾಳೆ ತಟ್ಟೆಗೆ ಅಮೆರಿಕದಲ್ಲಿ ಡಿಮ್ಯಾಂಡ್‌ ಹೆಚ್ಚಾಗಿದೆ. ಕಳೆದ ಒಂದೂವರೆ ತಿಂಗಳಲ್ಲಿ 1 ಕೋಟಿ ರೂ. ಮೌಲ್ಯದ ಅಡಕೆ ಹಾಳೆ ತಟ್ಟೆಗಳನ್ನು ಕರಾವಳಿಯಿಂದ ರಫ್ತು ಮಾಡಲಾಗಿದೆ. ಕಳೆದ ಕೆಲವು ವರ್ಷಗಳಿಂದ ಚೀನಾದಿಂದ ಅಡಕೆ ಹಾಳೆ ತಟ್ಟೆಗಳನ್ನು ಖರೀದಿ ಮಾಡುತ್ತಿದ್ದ ಅಮೆರಿಕ, ಡೊನಾಲ್ಡ್‌ ಟ್ರಂಪ್‌ ಅಧಿಕಾರಕ್ಕೆ ಬಂದ ಬಳಿಕ ಚೀನಾ ಪ್ಲಸ್‌-1 ಎನ್ನುವ ಯೋಜನೆಯ ಮೂಲಕ ಚೀನಾ ಬಿಟ್ಟು ಉಳಿದ ರಾಷ್ಟ್ರಗಳ ಉತ್ಪನ್ನಗಳಿಗೆ ಆದ್ಯತೆ ನೀಡಲಾರಂಭಿಸಿದೆ.
ಚೀನಾ ಬಿಟ್ಟರೆ ಭಾರತದ ಕಡೆಗೆ ವ್ಯಾಪಾರಿ ಒಲವು ಹೆಚ್ಚಾಗಿದ್ದು, ಭಾರತದ ಉತ್ಪನ್ನಗಳಿಗೆ ಹೆಚ್ಚಿನ ಅವಕಾಶ ಸಿಗಲು ಆರಂಭವಾಗಿದೆ. ಇದರ ಪರಿಣಾಮ ಕರಾವಳಿಯ ಅಡಕೆ ಹಾಳೆ ತಟ್ಟೆಗಳು ಅಮೆರಿಕದ ಮಾರುಕಟ್ಟೆಯಲ್ಲಿ ಜಾಗ ಪಡೆದುಕೊಳ್ಳುತ್ತಿವೆ ಎನ್ನುವುದು ಸಂತಸದ ವಿಚಾರ.

– ಪ್ರತಿ ತಿಂಗಳು 40 ಕೋಟಿ ವ್ಯವಹಾರ

ಚೀನಾಕ್ಕೆ ಹೆಚ್ಚು ಲಾಭ ತಂದುಕೊಡುತ್ತಿದ್ದ ಅಡಕೆ ಹಾಳೆ ತಟ್ಟೆಗಳು ಈಗ ಭಾರತದ ರಫ್ತುದಾರರಿಗೆ ಹೊಸ ಅವಕಾಶ ತೆರೆದಿವೆ. ಕಳೆದ ಒಂದೂವರೆ ತಿಂಗಳಲ್ಲಿ1 ಕೋಟಿಗೂ ಅಧಿಕ ಅಡಕೆ ಹಾಳೆ ತಟ್ಟೆಗಳನ್ನು ಅಮೆರಿಕದ ಗ್ರಾಹಕರು ಖರೀದಿ ಮಾಡಿದ್ದಾರೆ. ಸುಮಾರು 40 ಕೋಟಿ ರೂ.ಗೂ ಅಧಿಕ ಆದಾಯ ಭಾರತಕ್ಕೆ ಈ ಮೂಲಕ ಹರಿದು ಬಂದಿದೆ. ಮುಖ್ಯವಾಗಿ ಕೇರಳ ಹಾಗೂ ಕರ್ನಾಟಕದ ಶಿವಮೊಗ್ಗ, ದಕ್ಷಿಣ ಕನ್ನಡದಿಂದ ಈ ಹಾಳೆತಟ್ಟೆಗಳನ್ನು ತರಿಸಿಕೊಳ್ಳಲಾಗುತ್ತಿದೆ. ಚೀನಾ ಮಾಲಿಗೆ ಹೆಚ್ಚಿನ ತೆರಿಗೆ ಅಮೆರಿಕ ಹಾಗೂ ಐರೋಪ್ಯ ರಾಷ್ಟ್ರಗಳು ಚೀನಾದಿಂದ ವಸ್ತುಗಳನ್ನು ಖರೀದಿಸುವಾಗ ಹೆಚ್ಚಿನ ತೆರಿಗೆ ವಿಧಿಸಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಚೀನಾ ಮಾಲುಗಳ ಬದಲು ಬೇರೆ ದೇಶಗಳ ವಸ್ತುಗಳನ್ನು ಖರೀದಿಸಲು ಆದ್ಯತೆ ನೀಡಲಾಗುತ್ತಿದೆ. ಇದು ಚೀನಾ ಬಿಟ್ಟು ಉಳಿದ ರಾಷ್ಟ್ರಗಳಿಗೆ ಐರೋಪ್ಯ ಮಾರುಕಟ್ಟೆಯಲ್ಲಿ ಹಿಡಿತ ಸಾಧಿಸಲು ಸಹಕಾರಿಯಾಗುತ್ತದೆ. ಕೇಂದ್ರ ಸರಕಾರ ಕೂಡ ಎಸ್‌ಎಂಇ ಉದ್ದಿಮೆಗಳಿಗೆ ಹೆಚ್ಚಿನ ಅದ್ಯತೆ ನೀಡುತ್ತಿದೆ. ಐರೋಪ್ಯ ರಾಷ್ಟ್ರಗಳಲ್ಲಿ ಭಾರತದ ಕಂಪನಿಗಳು ಅವಕಾಶ ಗಿಟ್ಟಿಸಿಕೊಳ್ಳುತ್ತಾರೆ ಎನ್ನುತ್ತಾರೆ ಟ್ರೇಡ್‌ ಇಂಡಿಯಾ ರಫ್ತು ಕಂಪನಿಯ ರವಿಕುಮಾರ್‌ ಜೈನ್‌. ಜಿಯೋ ಪಾಲಿಟಿಕಲ್‌ ವಿಚಾರಗಳು ಮುಖ್ಯವಾಗಿ ಅಮೆರಿಕ ವರ್ಸಸ್‌ ಚೀನಾ, ರಷ್ಯಾ ವರ್ಸಸ್‌ ಚೀನಾ ನಡುವೆ ನಡೆಯುವ ವಿಚಾರದಿಂದಾಗಿ ಭಾರತದ ಮಾರುಕಟ್ಟೆಗೆ ಹೆಚ್ಚಿನ ಲಾಭವಾಗುತ್ತಿದೆ. ಭಾರತದ ಎಸ್‌ಎಂಇಗಳಿಗೆ ವಿದೇಶಗಳಲ್ಲಿ ಹೆಚ್ಚಿನ ಅವಕಾಶ ಸಿಗುತ್ತಿದೆ. ಇಂತಹ ಅವಕಾಶ ಬಾಚಿಕೊಳ್ಳುವ ಕೆಲಸವಾಗಬೇಕು. ಅಡಕೆ ಹಾಳೆ ತಟ್ಟೆಗಳನ್ನು ಅಮೆರಿಕ ಸೇರಿದಂತೆ ಐರೋಪ್ಯ, ಮಧ್ಯಪ್ರಾಚ್ಯ ರಾಷ್ಟ್ರಗಳು ಖರೀದಿಗೆ ಹೆಚ್ಚಿನ ಒಲವು ತೋರಿಸುತ್ತಿದೆ ಎಂದು ಅವಿನಾಶ್‌ ರಾವ್‌, ಸಿಇಒ, ಅಗ್ರಿಲೀಫ್‌ ಸಂಸ್ಥೆ ಹೇಳಿದ್ದಾರೆ.