ಲೋಕಲ್ ನ್ಯೂಸ್: ತೀರ್ಥಹಳ್ಳಿ
ಕುಪ್ಪಳಿ ಸರ್ಕಲ್ ಈಗ ಕಸದ ಕೊಂಪೆ!
– ಪಾರ್ಟಿ ಮಾಡುವ ಜಾಗ ಆಗ್ತಿದೆ ಬಸ್ ನಿಲ್ದಾಣ…
ದೇವಂಗಿಯಲ್ಲಿ ಬಿಜೆಪಿ ಕಾರ್ಯಕರ್ತರು ಹಿತೈಷಿಗಳ ಸಭೆ
– ಕುಪ್ಪಳ್ಳಿ ಮಹಾಶಕ್ತಿ ಕೇಂದ್ರದ ವತಿಯಿಂದ ವಿಕಸಿತಾ ಭಾರತದ ಸಂಕಲ್ಪ ಸಭೆ
ಆರಗ ಎಮ್ ಐ ಓ ಕ್ಯಾನ್ಸರ್ ಆಸ್ಪತ್ರೆಯಲ್ಲಿ ಆರೋಗ್ಯ ವಿಮೆಗೆ ಚಾಲನೆ
– ತಾಲೂಕು ಮೊಗವೀರ ಮಹಾಜನ ಸಂಘದ ಸದಸ್ಯರಿಗೆ ಅನುಕೂಲ
NAMMUR EXPRESS NEWS
ನರೇಂದ್ರ ಮೋದಿ ಸರ್ಕಾರಕ್ಕೆ 11 ವರ್ಷ ಪೂರೈಸಿದ ಹಿನ್ನಲೆಯಲ್ಲಿ ಗಾಜನೂರಿನಲ್ಲಿ ಭಾನುವಾರ ಬೆಳ್ಳಿಗೆ 9 ಘಂಟೆಗೆ ಬಿಜೆಪಿ ಕಾರ್ಯಕರ್ತರು ಹಿತೈಷಿಗಳ ಸಭೆ ನಡೆಯಿತು. ಸಭೆಯನ್ನು ಉದ್ದೇಶಿಸಿ ಶಾಸಕ ಆರಗ ಜ್ಞಾನೇಂದ್ರವರು, ಮಂಡಲ ಬಿಜೆಪಿ ಅಧ್ಯಕ್ಷರಾದ ಹೆದ್ದೂರು ನವೀನ್ ಅವರು,ಜಿಲ್ಲಾ ಪ್ರದಾನ್ ಕಾರ್ಯದರ್ಶಿ ಹರಿಕೃಷ್ಣರವರು, ಮಾಜಿ ಜಿಲ್ಲಾ ಪಂಚಾಯತ್ ಅಧ್ಯಕ್ಷರಾದ ಅಶೋಕ್ ಮೂರ್ತಿಯವರು ಮಾತನಾಡಿದರು, ಸಭೆಯ ಅಧ್ಯಕ್ಷತೆಯನ್ನು ಕಡೇಕಲ್ಲು ಅಜೇಯ್ ವಹಿಸಿದ್ದರು, ಶಿವಾನಂಜಪ್ಪ, ರವೀಂದ್ರ, ಗಾಜಾನೂರು ಹೊಸಳ್ಳಿ, ಮತ್ತೂರು ಪಂಚಾಯತ್ ಅಧ್ಯಕ್ಷರು ಹಾಜರಿದ್ದರು.
ಬಿಜೆಪಿ ಕುಪ್ಪಳ್ಳಿ ಮಹಾಶಕ್ತಿ ಕೇಂದ್ರದ ವತಿಯಿಂದ ನಡೆದ ವಿಕಸಿತಾ ಭಾರತದ ಸಂಕಲ್ಪ ಸಭೆ ದೇವಂಗಿಯಲ್ಲಿ ನಡೆಯಿತು.ಶಾಸಕರಾದ ಆರಗ ಜ್ಞಾನೇಂದ್ರ, ಬಿಜೆಪಿ ಮಾಜಿ ಜಿಲ್ಲಾಧ್ಯಕ್ಷರಾದ ಮೇಘರಾಜ್, ಬಿಜೆಪಿ ತಾಲೂಕ್ ಅಧ್ಯಕ್ಷರಾದ ಹೆದ್ದೂರು ನವೀನ್ ಸಭೆ ಉದ್ದೇಶಿಸಿ ಮಾತನಾಡಿದರು, ಸುಮಾರು 300 ಜನ ಪ್ರಮುಖ ಕಾರ್ಯಕರ್ತರು ಸೇರಿದ್ದ ಸಭೆ ಅಧ್ಯಕ್ಷತೆಯನ್ನು ಹಾರೋಗೋಳಿಗೆ ವಾಸು ವಹಿಸಿದ್ದರು, ಸಭೆಯಲ್ಲಿ ದೇವಂಗಿ ಪಂಚಾಯತ್ ಅಧ್ಯಕ್ಷರಾದ ಗಿರಿಜಾ, ಚಂದವಳ್ಳಿ ಸೋಮಶೇಖರ್, ಕಾಸರವಳ್ಳಿ ಶ್ರೀನಿವಾಸ್, ಕುಕ್ಕೆ ಪ್ರಶಾಂತ್, ಮೋಹನ್ ಭಟ್, ರಕ್ಷಿತ್ ಮೇಗರವಳ್ಳಿ, ಸಂತೋಷ್ ದೇವಾಡಿಗ, ಪ್ರದೀಪ್ ಈ ಸಭೆಯಲ್ಲಿ ಉಪಸ್ಥಿತರಿದ್ದರು.
ಆರಗ ಎಮ್ ಐ ಓ ಕ್ಯಾನ್ಸರ್ ಆಸ್ಪತ್ರೆಯಲ್ಲಿ ಆರೋಗ್ಯ ವಿಮೆಗೆ ಚಾಲನೆ
– ತಾಲೂಕು ಮೊಗವೀರ ಮಹಾಜನ ಸಂಘದ ಸದಸ್ಯರಿಗೆ ಅನುಕೂಲ
ತೀರ್ಥಹಳ್ಳಿ: ತಾಲೂಕು ಮೊಗವೀರ ಮಹಾಜನ ಸಂಘ (ರಿ) ತೀರ್ಥಹಳ್ಳಿ ಇವರು ಕಳೆದ ಒಂದು ದಶಕಗಳಿಂದ ಜಿ. ಶಂಕರ್ ಫ್ಯಾಮಿಲಿ ಟ್ರಸ್ಟ್(ರಿ) ಅಂಬಲಪಾಡಿ – ಉಡುಪಿ ಇದರ ಪ್ರವರ್ತಕರಾದ ಮೊಗವೀರ ಕುಲರತ್ನ ನಾಡೋಜ ಡಾ.ಜಿ.ಶಂಕರ್ ರವರ ಮಾಹಿತಿ, ಮಾರ್ಗದರ್ಶನ ಸಹಕಾರಗಳೊಂದಿಗೆ ಸಮಾಜ ಭಾಂದವರ ಆರೋಗ್ಯ ಸುಧಾರಣೆಗಾಗಿ ಮಣಿಪಾಲ ಆರೋಗ್ಯ ಕಾರ್ಡು ಹಾಗೂ ರಕ್ತದಾನ ಶಿಬಿರಗಳಂತಹ ಸಮಾಜಮುಖಿ ಕಾರ್ಯಗಳನ್ನು ನೆರವೇರಿಸಿಕೊಂಡು ಬರುತ್ತಿದ್ದಾರೆ. ಈ ವರ್ಷ ಮೊಗವೀರ ಮಹಾಜನ ಸಂಘದ ಅಧ್ಯಕ್ಷ ಸೊಪ್ಪುಗುಡ್ಡೆ ರಾಘವೇಂದ್ರರವರು ಸರ್ವ ಸದಸ್ಯರ ಅಭಿಮತದಿಂದ ಸಮಾಜ ಭಾಂದವರ ಇನ್ನು ಹೆಚ್ಚಿನ ಆರೋಗ್ಯ ಸುಧಾರಣೆಗಾಗಿ ನೂತನ ಆರೋಗ್ಯ ವಿಮೆಗೆ ಚಾಲನೆ ನೀಡಿರುತ್ತಾರೆ. ದಿನಾಂಕ 22 -6- 2025 ರ ಭಾನುವಾರ ತೀರ್ಥಹಳ್ಳಿಯ ಮಾಧವ ಮಂಗಲ ಸಭಾಭವನದಲ್ಲಿ ನಡೆದ ನೂತನವಾಗಿ ನಿರ್ಮಾಣಗೊಂಡ ಶ್ರೀ ಮಹಾಲಕ್ಷ್ಮೀ ಸಭಾಭವನದ ಲೋಕಾರ್ಪಣೆ ‘ವಾರ್ಷಿಕ ಮಹಾಸಭೆ, ಸಮಾಜದ ಶಾಲಾ ವಿದ್ಯಾರ್ಥಿ ಸಮೂಹಕ್ಕೆ ಉಚಿತ ನೋಟ್ ಬುಕ್ ವಿತರಣೆ ಹಾಗೂ ವಿದ್ಯಾರ್ಥಿ ವೇತನ ನೀಡುವ ಕಾರ್ಯಕ್ರಮದಲ್ಲಿ ಸಮಾಜದ ಹಲವಾರು ಜನರ ಕ್ಯಾನ್ಸರ್ ಕಾಯಿಲೆಗೆ ಉಚಿತ ಆರೋಗ್ಯ ಸುಧಾರಿಸುವ ಸಲುವಾಗಿ ಆರಗದಲ್ಲಿರುವ ಮಂಗಳೂರು ಆಂಕೋಲಾಜಿ ಕ್ಯಾನ್ಸರ್ ಆಸ್ಪತ್ರೆಯಲ್ಲಿ (ಎಮ್ ಐ ಒ) ಓರ್ವ ಸದಸ್ಯರಿಗೆ 3 ಲಕ್ಷ ರೂಗಳ ಉಚಿತ ಚಿಕಿತ್ಸೆಗಾಗಿ ಆರೋಗ್ಯ ವಿಮೆ ಒಪ್ಪಂದದ ಮಹತ್ಕಾರ್ಯಕ್ಕೆ ಚಾಲನೆ ನೀಡಲಾಯಿತು. ಈ ಬಗ್ಗೆ ಮಂಗಳೂರು ಸಂಜೀವಿನಿ ಕ್ಯಾನ್ಸರ್ ಸೇವಾ ಟ್ರಸ್ಟ್ ನವರಿಗೆ 1 ಲಕ್ಷ 5 ಸಾವಿರದ ಚೆಕ್ ಅನ್ನು ಸಮಾಜ ಭಾಂದವರ ಪರವಾಗಿ ನೀಡಲಾಯಿತು. ಕ್ಯಾನ್ಸರ್ ರೋಗಕ್ಕೆ ಚಿಕಿತ್ಸೆ ಪಡೆಯಲು ಈ ಆಸ್ಪತ್ರೆಗೆ ಹೋಗುವವರು ತೀರ್ಥಹಳ್ಳಿಯ ಮಾಧವ ಮಂಗಲ ಸಭಾಭವನದ ಕಛೇರಿಯಲ್ಲಿ ಕ್ಯಾನ್ಸರ್ ಆಸ್ಪತ್ರೆಗೆ ನೀಡುವ ಆರೋಗ್ಯ ವಿಮಾ ಪತ್ರವನ್ನು ತೆಗೆದುಕೊಂಡು ಹೋಗಬೇಕಾಗಿದೆ. ತೀರ್ಥಹಳ್ಳಿ ತಾಲೂಕು ಮೊಗವೀರ ಮಹಾಜನ ಸಂಘದ ಅಧ್ಯಕ್ಷ ಸೊಪ್ಪುಗುಡ್ಡೆ ರಾಘವೇಂದ್ರರವರ ಅಧ್ಯಕ್ಷತೆಯಲ್ಲಿ ನಡೆದ ಸಮಾರಂಭದಲ್ಲಿ ಜಿ.ಶಂಕರ್ ಫ್ಯಾಮಿಲಿ ಟ್ರಸ್ಟ್ (ರಿ) ಅಂಬಲಪಾಡಿ-ಉಡುಪಿ ಇದರ ಪ್ರವರ್ತಕರಾದ ನಾಡೋಜ ಡಾ.ಜಿ.ಶಂಕರ್, ದಕ್ಷಿಣ ಕನ್ನಡ ಮೊಗವೀರ ಮಹಾಜನ ಸಂಘದ ಅಧ್ಯಕ್ಷ ಜಯ ಸಿ ಕೋಟ್ಯಾನ್, ಉಡುಪಿ ಜಿಲ್ಲಾ ಮೊಗವೀರ ಯುವ ಸಂಘಟನೆ ಅಧ್ಯಕ್ಷ ಜಯಂತ್ ಅಮೀನ್, ನಿಕಟಪೂರ್ವ ಅಧ್ಯಕ್ಷ ಶಿವರಾಮ್ ಕೋಟ, ತೀರ್ಥಹಳ್ಳಿ ತಾಲೂಕು ಮೊಗವೀರ ಮಹಾಜನ ಸಂಘದ ನೂತನ ಅಧ್ಯಕ್ಷ ಶ್ರೀನಿವಾಸ್ ಬಾಳೆಬೈಲು, ಶಿವಮೊಗ್ಗ ಮೊಗವೀರ ಸಂಘದ ಅಧ್ಯಕ್ಷ ಕೆ.ವಿ. ಅಣ್ಣಪ್ಪ, ಶೃಂಗೇರಿ ಮೊಗವೀರ ಸಂಘದ ಅಧ್ಯಕ್ಷ ನವೀನ್ ಹೊಳೆಗದ್ದೆ, ಧಾರ್ಮಿಕ ಪ್ರವರ್ಚನಕಾರ ದಾಮೋದರ ಶರ್ಮ, ಆರಗ ಎಮ್ ಐ ಒ ಕ್ಯಾನ್ಸರ್ ಆಸ್ಪತ್ರೆಯ ವೈದ್ಯರುಗಳಾದ ಡಾ|| ಸುರೇಶ್ ಡಾII ದಿವ್ಯ ಜ್ಯೋತಿ ಡಾ|| ಸುಹಾಸ್ ಹಾಗೂ ಮೊಗವೀರ ಮಹಾಜನ ಸಂಘದ ಪದಾಧಿಕಾರಿಗಳು ಉಪಸ್ಥಿತರಿದ್ದರು.
ಕುಪ್ಪಳಿ ಸರ್ಕಲ್ ಈಗ ಕಸದ ಕೊಂಪೆ!
ತೀರ್ಥಹಳ್ಳಿ: ರಾಷ್ಟ್ರಕವಿ ಕುವೆಂಪುರವರ ಕವಿಮನೆಗೆ ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ 169ರ ಕುಪ್ಪಳಿ ಬಸ್ ನಿಲ್ದಾಣದ ಸರ್ಕಲ್ ಇದೀಗ ಕಸದ ಕೊಂಪೆಯಾಗಿದೆ. ಈ ಹಿಂದೆ ಕುಪ್ಪಳಿ ಪರಿಸರ ಹಾಳಾಗುತ್ತದೆ ಎಂಬ ಕಾರಣವನ್ನು ನೀಡಿ ಕವಿಮನೆ ಪಕ್ಕದಲ್ಲಿದ್ದ ಕ್ಯಾಂಟೀನ್ ಕ್ಲೋಸ್ ಮಾಡಿರುವುದು ಎಲ್ಲರಿಗೂ ಗೊತ್ತಿರುವ ವಿಷಯ. ಆದರೆ ಇದೀಗ ಎಲ್ಲೆಂದರಲ್ಲಿ ಪ್ಲಾಸ್ಟಿಕ್ ಬಾಟಲಿಗಳು, ಜೋಳದ ಸಿಪ್ಪೆ, ಪ್ಲಾಸ್ಟಿಕ್ ಲೋಟ, ಐಸ್ ಕ್ರೀಂ ಕವರ್ ಗಳನ್ನು ಬಿಸಾಕಿ ಪರಿಸರವನ್ನು ಹಾಳು ಮಾಡುತ್ತಿದ್ದರೂ ಸಹ ದೇವಂಗಿ ಗ್ರಾಮ ಪಂಚಾಯಿತಿಯಾಗಲಿ ರಾಷ್ಟ್ರಕವಿ ಕುವೆಂಪು ಪ್ರತಿಷ್ಠಾನವಾಗಲಿ ಯಾವುದೇ ರೀತಿಯ ಕ್ರಮ ಕೈಗೊಳ್ಳದೇ ಇರುವುದು ಪ್ರತಿನಿತ್ಯ ಇಲ್ಲಿಗೆ ರಾಜ್ಯ ಹಾಗೂ ದೇಶದ ವಿವಿಧ ಭಾಗಗಳಿಂದ ಆಗಮಿಸುವ ಪ್ರವಾಸಿಗರ ಮುಂದೆ ಊರಿನ ಮಾನ ಹರಾಜು ಹಾಕಿದಂತಾಗಿದೆ. ಕೂಡಲೇ ಕ್ರಮ ಕೈಗೊಳ್ಳಬೇಕು ಎಂದು ಜನತೆ ಅಗ್ರಹಿಸಿದ್ದಾರೆ.
