ಅ.6ರಂದು ರಾಜಧಾನಿಯಲ್ಲಿ ಯಕ್ಷಗಾನದ ಕಲರವ!
– ವಿದ್ಯುನ್ಮತಿ ಕಲ್ಯಾಣ” “ರಾಜ ಯಯಾತಿ” “ಶ್ವೇತಕುಮಾರ ಚರಿತ್ರೆ” ಮೂರು ಪೌರಾಣಿಕ ಪ್ರಸಂಗ ಪ್ರದರ್ಶನ
– ಮಲೆನಾಡು, ಕರಾವಳಿ ಖ್ಯಾತ ಕಲಾವಿದರ ಸಮಾಗಮ
NAMMUR EXPRESS NEWS
ಬೆಂಗಳೂರು: ತೆಂಕು ತಿಟ್ಟು ಹಾಗೂ ಬಡಗು ತಿಟ್ಟಿನ ಹೆಸರಾಂತ ಮೇಳಗಾದ ಪಾವಂಜೆ ಮೇಳ ಹಾಗೂ ಜಲವಳ್ಳಿ ಮೇಳದ ಸಮಾಗಮದಲ್ಲಿ ಅಕ್ಟೋಬರ್ 6 ರಂದು ರಾತ್ರಿ 9.30ರಿಂದ ರವೀಂದ್ರ ಕಲಾಕ್ಷೇತ್ರದಲ್ಲಿ ಅಪರೂಪದ ಪ್ರಸಂಗಗಳೊಂದಿಗೆ ವಿಶೇಷ ಸಂಯೋಜನೆ ಮೂಲಕ ವಿದ್ಯುನ್ಮತಿ ಕಲ್ಯಾಣ, ರಾಜ ಯಯಾತಿ” “ಶ್ವೇತಕುಮಾರ ಚರಿತ್ರೆ ಮೂರು ಪೌರಾಣಿಕ ಪ್ರಸಂಗಗಳು ಪ್ರದರ್ಶನಗೊಳ್ಳುತ್ತಿದೆ.
ಖ್ಯಾತ ಕಲಾವಿದರ ಸಮಾಗಮ
ಹಿಮ್ಮೇಳದಲ್ಲಿ ಭಾಗವತರುಗಳಾದ “ಪಟ್ಲ ಸತೀಶ ಶೆಟ್ಟಿ, ಜನ್ಸಾಲೆ ರಾಘವೇಂದ್ರ ಆಚಾರ್ಯ, ಬ್ರಹ್ಮೂರು ಶಂಕರ್ ಭಟ್, ಚಂದ್ರಕಾಂತ ರಾವ್ ಮೂಡುಬೆಳ್ಳೆ, ಪ್ರಪುಲ್ಲ ಚಂದ್ರ ನೆಲ್ಯಾಡಿ, ಚಂಡೆ ಮದ್ದಳೆಯಲ್ಲಿ ಗುರುಪ್ರಸಾದ್ ಬೊಳಿಂಜಡ್ಕ, ಪ್ರಶಾಂತ ಶೆಟ್ಟಿ ವಗೆನಾಡು, ಅನಿರುದ್ಧ ಹೆಗಡೆ, ಶಶಾಂಕ್ ಆಚಾರ್ ಕಿರಿಮಂಜೇಶ್ವರ, ಸುಜನ್ ಹಾಲಾಡಿ, ಅರುಣ ಸಾಗರ, ಚಕ್ರತಾಳದಲ್ಲಿ ಪೂರ್ಣೇಶ್ ಆಚಾರ್ ಸ್ಟಾರ್ ಕಲಾವಿದರುಗಳ ಸಂಗಮ ಕಲಾಕ್ಷೇತ್ರದಲ್ಲಿ ಕಾಣಿಸಿಕೊಳ್ಳುತ್ತಿದೆ.
ತೆಂಕುತಿಟ್ಟಿನಲ್ಲಿ ವಿದ್ಯುನ್ಮತಿ ಕಲ್ಯಾಣ ಪ್ರಸಂಗ ಪ್ರದರ್ಶನಗೊಳ್ಳುತ್ತಿದ್ದು, ಜಯಂತನಾಗಿ ರಾಕೇಶ್ ರೈ ಅಡ್ಕ, ಸುಲೋಚನನಾಗಿ ಮಾನ್ಯ ಸಂತೋಷ, ವಿದ್ಯುನ್ಮತಿಯಾಗಿ ಅಕ್ಷಯ್ ಮಾರ್ನಾಡ್, ಕಾಲಜಂಘ ನಾಗಿ ರಾಧಾಕೃಷ್ಣ ನಾವುಡ, ಕುಶನಾಗಿ ದಿನೇಶ್ ಕಾವಳಕಟ್ಟೆ, ಚಿತ್ರವಾಹನನಾಗಿ ಲೋಕಶ್ ಮಚ್ಚೂರು ಅವರು ಪಾತ್ರನಿರ್ವಹಿಸುತ್ತಾ ಇದ್ದಾರೆ.
ರವೀಂದ್ರ ಕಲಾಕ್ಷೇತ್ರದಲ್ಲಿ ಪ್ರಪ್ರಥಮ ಬಾರಿಗೆ ತೆಂಕು ತಿಟ್ಟಿನಲ್ಲಿ ‘ವಿದ್ಯುನ್ಮತಿ ಕಲ್ಯಾಣ’ ಪ್ರಸಂಗ ಪ್ರದರ್ಶನಗೊಳ್ಳುತ್ತಿದ್ದು, ಶೃಂಗಾರ ಪ್ರಧಾನವಾದ ಈ ಪ್ರಸಂಗದಲ್ಲಿ ಪಟ್ಲರವರ ಗಾನಸಾರಥ್ಯ ಹಾಗೂ ಶ್ರೇಷ್ಠ ಕಲಾವಿದರ ಪಾತ್ರ ನಿರ್ವಹಣೆ ಕಣ್ತುಂಬಿಕೊಳ್ಳಲು ಕಲಾಭಿಮಾನಿಗಳಲ್ಲಿ ನಿರೀಕ್ಷೆಗಳು ಸಂತೋಷ ಮೂಡಿಸಿದೆ.
ಬಡಗು ತಿಟ್ಟಿನಲ್ಲಿ “ರಾಜ ಯಯಾತಿ” ಪ್ರಸಂಗ ಪ್ರದರ್ಶನಗೊಳ್ಳುತ್ತಿದ್ದು ಯಯಾತಿಯಾಗಿ ವಿದ್ಯಾಧರ ಜಲವಳ್ಳಿ, ದೇವಯಾನಿಯಾಗಿ ಶಶಿಕಾಂತ್ ಶೆಟ್ಟಿ, ಶರ್ಮಿಷ್ಠೆಯಾಗಿ ನೀಲ್ಕೋಡು, ವೃಷಪರ್ವನಾಗಿ ತೀರ್ಥಹಳ್ಳಿ, ಶುಕ್ರಾಚಾರ್ಯನಾಗಿ ಪ್ರಸನ್ನ ಶೆಟ್ಟಿಗಾರ್, ವೃದ್ದ ಯಯಾತಿಯಾಗಿ ರಮೇಶ ಭಂಡಾರಿಯವರು ಪಾತ್ರ ನಿರ್ವಹಿಸುತ್ತಿದ್ದು, ಕಾರ್ಕಳ ನೀಲ್ಕೋಡು ಇವರ ಮುಖಾಮುಖಿ, ಒಂದೇ ಪ್ರಸಂಗದಲ್ಲಿ ಜಲವಳ್ಳಿ ತೀರ್ಥಹಳ್ಳಿಯವರ ಪಾತ್ರ ನಿರ್ವಹಣೆ ಅಪರೂಪದ ಪಾತ್ರದಲ್ಲಿ ರಮೇಶ ಭಂಡಾರಿಯವರು ಎಲ್ಲಾ ವಿಶೇಷತೆಗಳು ಕಲಾಸಕ್ತರಲ್ಲಿ ನಿರೀಕ್ಷೆಗಳು ಕುತೂಹಲ ಮೂಡಿಸಿವೆ.
ಹೆಸರಾಂತ ಯುವ ಕಲಾವಿದರ ಸಮಾಗಮದಲ್ಲಿ ಶ್ವೇತಕುಮಾರ ಮೂರನೆ ಪ್ರಸಂಗವಾಗಿ ಪ್ರದರ್ಶನಗೊಳ್ಳುತ್ತಿದ್ದು, ಶ್ವೇತಕುಮಾರನಾಗಿ ಕಿರಾಡಿ, ತ್ರಿಲೋಕ ಸುಂದರಿಯಾಗಿ ಹಿಲಿಯಾಣ, ದುರ್ಜಯನಾಗಿ ಹೆನ್ನಾಬೈಲ್, ಯಮನಾಗಿ ಮಂಕಿ, ಚಿತ್ರಗುಪ್ತನಾಗಿ ಶ್ರೀಧರ ಕಾಸರಕೋಡು, ಪ್ರೇತನಾಗಿ ಜಾರ್ಕಳ, ಕರಾಳನೇತ್ರೆಯಾಗಿ ಲೋಹಿತ್ ಶೆಟ್ಟಿಗಾರ್ ಪರ್ಕಳ, ಈಶ್ವರನಾಗಿ ನಾಗರಾಜ್ ಭಂಡಾರಿ, ಸಿತಕೇತನಾಗಿ ಕಾರ್ತಿಕ್ ಕಣ್ಣಿ, ಲೋಹಿತನೇತ್ರನಾಗಿ ರಾಜೇಶ್ ಭಂಡಾರಿ, ಶಿವೆಯಾಗಿ ರಟ್ಟಾಡಿ, ರಂಬೆಯಾಗಿ ದೇವಲ್ಕುಂದ ಪಾಲ್ಗೊಳ್ಳುತ್ತಿದ್ದು, ಹಾಸ್ಯ ಶೃಂಗಾರ ವೀರರಸ ಸಮ್ಮಿಳಿತದ ಈ ಪ್ರಸಂಗ ಬೆಳಗಿನ ಜಾವದ ರಂಗದ ಕಾವನ್ನು ಹೆಚ್ಚಿಸುವಲ್ಲಿ ಈ ಪ್ರಸಂಗದ ಆಯ್ಕೆ ಕಲಾವಿದರ ಪಾತ್ರ ಹಂಚಿಕೆ ಎಲ್ಲವೂ ಪರಿಣಾಮ ಬೀರುವಲ್ಲಿ ಯಾವ ಸಂಶಯ ಕೂಡ ಇಲ್ಲ. ಜಾರ್ಕಳರ ಪ್ರೇತ, ಕಾಸರಕೋಡು ಇವರ ಚಿತ್ರಗುಪ್ತ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸುವುದರೊಂದಿಗೆ ಮಂಕಿಯವರ ಅಪರೂಪದ ಯಮ ಕುತೂಹಲ ಮೂಡಿಸಿದೆ. ಪ್ರಪ್ರಥಮವಾಗಿ ಕಿರಾಡಿ ಹಿಲಿಯಾಣ ಇವರು ಶೃಂಗಾರ ರಸದಲ್ಲಿ ಜೊತೆಯಾಗಲಿದ್ದು, ರಾಜೇಶ್ ಭಂಡಾರಿ, ಹೆನ್ನಾಬೈಲ್, ಕಾರ್ತಿಕ್ ಕಣ್ಣಿಯವರ ವೀರರಸದ ಮುಖಾಮುಖಿ ರಂಗದ ರಂಗನ್ನು ಹೆಚ್ಚಿಸುವಲ್ಲಿ ಯಶಸ್ವಿಯಾಗುವುದು ನಿಶ್ಚಿತ.
ಇಷ್ಟೆಲ್ಲ ವಿಶೇಷತೆಗಳನ್ನು ಒಳಗೊಂಡಿರುವ ಮುಮ್ಮೇಳಕ್ಕೆ ಬಡಗಿನ ಸ್ಟಾರ್ ಕಲಾವಿದರಾದ ಜನ್ಸಾಲೆ ಬ್ರಹ್ಮೂರು ಮೂಡುಬೆಳ್ಳೆಯವರ ಗಾನ ಸಾರಥ್ಯ ಜೊತೆಯಾದರೆ ಕಲಾಕ್ಷೇತ್ರದಲ್ಲಿ ಯಕ್ಷ ಲೋಕ ಸೃಷ್ಠಿಯಾಗುವುದರಲ್ಲಿ ಯಾವುದೆ ಅನುಮಾನ ಇಲ್ಲ.
ಕಲಾವಿದರುಗಳ ದಂಡೆ ಇದ್ದಾಗ ಸಂಯೋಜನೆ ಮಾಡುವುದು ಬಹಳ ಕಷ್ಟ, ಆ ಕಷ್ಟವನ್ನು ಸವಾಲಾಗಿ ಸ್ವೀಕರಿಸಿ ಆತ್ಮೀಯರ ಸಲಹೆ ಸಹಕಾರದೊಂದಿಗೆ ಈ ವಿಶೇಷವಾದ ಸಂಯೋಜನೆ ಮಾಡಿದವರು ಮಾನಸ ಉಪಾಧ್ಯ ಅವರು.
ಮಲೆನಾಡಿನ ಹೆಸರಾಂತ ಯಕ್ಷಗಾನ ಸಂಯೋಜಕ ಹಾಗೂ ಆಯೋಜಕರಾದ ದರಲಗೋಡು ನಾಗೇಂದ್ರ ಜೋಯ್ಸ್ ಅವರ ಸಾರಥ್ಯದಲ್ಲಿ ಮಾನಸ ಉಪಾಧ್ಯ ಅವರ ಸಂಯೋಜನೆಯಲ್ಲಿ ಮೂಡಿಬರುತ್ತಿರುವ ಯಕ್ಷ ಮಾನಸ ಕಾರ್ಯಕ್ರಮ ಯಶಸ್ವಿಯಾಗುವಲ್ಲಿ ಕಲಾಸಕ್ತರಾದ ನಾವೆಲ್ಲ ಭಾಗಿಯಾಗುವುದರೊಂದಿಗೆ ಕಾರ್ಯಕ್ರಮದ ಯಶಸ್ಸಿನಲ್ಲಿ ಪಾಲುದಾರರಾಗೋಣ.
ಸಂಪರ್ಕ: 7483148947