ಕರಾವಳಿಯ ಈ ಹುಡುಗ ಇದ್ದಾಗ ಭಾರತ ತಂಡ ಚಾಂಪಿಯನ್!
– ಭಾರತ ಕ್ರಿಕೆಟ್ ತಂಡದ ಕಾಯಕಯೋಗಿ ರಾಘವೇಂದ್ರ ದಿವಗಿ
– ಸ್ಟಾರ್ ಆಟಗಾರರಿಗೆ ನೆಟ್ ಸಾಥ್ ನೀಡುವ ರಿಯಲ್ ಹೀರೋ
NAMMUR EXPRESS NEWS
ನವ ದೆಹಲಿ: ಭಾರತ ಚಾಂಪಿಯನ್ ಟ್ರೊಫಿ ಗೆದ್ದಿದೆ. ಇಡೀ ವಿಶ್ವದಲ್ಲಿ ರೋಹಿತ್ ಪಡೆ ತನ್ನ ಪರಾಕ್ರಮ ಮೆರೆದಿದೆ. ಇದೀಗ ಭಾರತದ ತಂಡದ ರಿಯಲ್ ಹೀರೋ ಆಗಿ ಕರಾವಳಿ ಯ ರಾಘವೇಂದ್ರ ದಿವಗಿ ಬಗ್ಗೆಯೂ ಎಲ್ಲೆಡೆ ಮೆಚ್ಚುಗೆ ಮಾತು ಕೇಳಿ ಬರುತ್ತಿವೆ.
ಅಷ್ಟಕ್ಕೂ ಯಾರು ಈ ರಾಘವೇಂದ್ರ ದಿವಗಿ ಭಾರತ ತಂಡಕ್ಕೆ ಯಾರು? ಬೌಲರ್, ಬ್ಯಾಟ್ಸಮನ್, ಕೋಚ್… ಖಂಡಿತಾ ಅಲ್ಲ. ಆದ್ರೂ ಈತ ಇಡೀ ತಂಡಕ್ಕೆ ಪ್ರೇರಣೆ.
ಕಳೆದ 14 ವರ್ಷಗಳಲ್ಲಿ ಭಾರತ ತಂಡಕ್ಕೆ ರಕ್ತವನ್ನೇ ಬಸಿದ ಶ್ರಮಜೀವಿ ಅವನು. ಬ್ಯಾಟ್ಸ್’ಮನ್’ಗಳನ್ನು ಜಗತ್ತು ಮೆಚ್ಚಿದ ಪರಾಕ್ರಮಿಗಳನ್ನಾಗಿ ಮಾಡಿದ ಪರಿಶ್ರಮಿ ಅವನು. ಹೌದು. ಸುದರ್ಶನ್ ಎಂಬ ಅವರ ಸ್ನೇಹಿತ ಹೇಳುವಂತೆ ರಾಘವೇಂದ್ರ ಅವರು ಮೊದಲು ಕರ್ನಾಟಕ ರಣಜಿ ಕ್ರಿಕೆಟ್ ಅಲ್ಲಿ ಬ್ಯಾಟ್ಸಮನ್ ಪ್ರಾಕ್ಟೀಸ್ ವೇಳೆ ಬಾಲ್ ಎಸೆಯುವ ಕೆಲಸ ಮಾಡು ತ್ತಿದ್ದರು. ಅದೂ ಸ್ಯಾಲರಿ ಇಲ್ಲದೆ..!. ಬಳಿಕ ಅವರ ಪ್ರಾಮಾಣಿಕತೆ ಮೆಚ್ಚಿ ನ್ಯಾಷನಲ್ ಕ್ರಿಕೆಟ್ ಅಕಾಡೆಮಿಯು ಭಾರತ ತಂಡಕ್ಕೆ ನೆಟ್ ಪ್ರಾಕ್ಟೀಸ್ ಕೆಲಸಕ್ಕೆ ನಿಯೋಜನೆ ಮಾಡುತ್ತದೆ. ಅಲ್ಲಿಂದ ಇಲ್ಲಿವರೆಗೂ ಭಾರತದ ಸ್ಟಾರ್ ಬ್ಯಾಟ್ಸ್ ಮನ್ ಗಳ ನೆಚ್ಚಿನ ವ್ಯಕ್ತಿ ರಾಘು.
ಚಾಂಪಿಯನ್ಸ್ ಟ್ರೋಫಿ ಗೆದ್ದ ಬೆನ್ನಲ್ಲೇ ಭಾರತ ತಂಡದ ಆಟಗಾರರೆಲ್ಲಾ ಅವನ ಜೊತೆ ಫೋಟೋ ಕ್ಲಿಕ್ಕಿಸಿಕೊಂಡಿದ್ದಾರೆ. ಕೆ.ಎಲ್ ರಾಹುಲ್ ಅಂತೂ ಚಾಂಪಿಯನ್ಸ್’ಗೆ ಐಸಿಸಿ ಕೊಟ್ಟ ಬ್ಲೇಸರ್ ಅನ್ನು ಅವನಿಗೆ ತೊಡಿಸಿ ಗೌರವ ಸಲ್ಲಿಸಿದ್ದಾನೆ. ವಿರಾಟ್ ಕೊಹ್ಲಿ ಪತ್ನಿಯನ್ನೂ ಜೊತೆಗೆ ನಿಲ್ಲಿಸಿ ಫೋಟೋಗೆ ಪೋಸ್ ಕೊಟ್ಟಿದ್ದಾನೆ.ಸಾಮಾನ್ಯವಾಗಿ ಇನ್ನೊಬ್ಬರ ಬಗ್ಗೆ ಅಷ್ಟಾಗಿ ತಲೆ ಕೆಡಿಸಿಕೊಳ್ಳದ ಕ್ರಿಕೆಟಿಗರು ಆ ವ್ಯಕ್ತಿಯನ್ನು ಅತ್ಯಂತ ಗೌರವದಿಂದ ಕಾಣುತ್ತಾರೆ. ಪ್ರೀತಿ, ಅಭಿಮಾನದ ಕಣ್ಣುಗಳಿಂದ ನೋಡುತ್ತಾರೆ.
ಭಾರತ ಕ್ರಿಕೆಟ್ ತಂಡದ ಬೆನ್ನೆಲುಬು. ಅವರು ಭಾರತ ಕ್ರಿಕೆಟ್ ತಂಡದ ಆಧಾರಸ್ಥಂಭ ಎಂದಿದ್ದರು ರವಿ ಶಾಸ್ತ್ರಿ. ‘’ಅವನು ಭಾರತ ಕ್ರಿಕೆಟ್ ತಂಡದ ಪಾಲಿಗೆ ಉಸಿರು’’ ಎಂದಿದ್ದರು ಸುನಿಲ್ ಗವಾಸ್ಕರ್.
ನಿಜ.. ಅವನಿಲ್ಲದೆ ಭಾರತ ಕ್ರಿಕೆಟ್ ತಂಡವೇ ಇಲ್ಲ ಎನ್ನುವಷ್ಟರ ಮಟ್ಟಿಗೆ ತಂಡಕ್ಕೆ ಎಲ್ಲವೂ ಆಗಿ ಹೋಗಿದ್ದಾನೆ. ಹೆಸರು ರಾಘವೇಂದ್ರ ದಿವಗಿ.
ರಾಘವೇಂದ್ರ ಕಳೆದ 14 ವರ್ಷಗಳಿಂದ ಭಾರತ ತಂಡದ ಉಸಿರೇ ಆಗಿ ಹೋಗಿದ್ದಾನೆ. ಅವನು ತಂಡದ ಥ್ರೋಡೌನ್ ಸ್ಪೆಷಲಿಸ್ಟ್. ಅವನ ಕಾರಣಕ್ಕೆ ಭಾರತ ತಂಡದ ಬ್ಯಾಟ್ಸ್’ಮನ್’ಗಳಿಗೆ ಗುಣಮಟ್ಟದ ಅಭ್ಯಾಸ ಸಿಗುತ್ತಿದೆ. ವಿರಾಟ್ ಕೊಹ್ಲಿಯಂಥಾ ದಿಗ್ಗಜನೇ ರಾಘು ಬಗ್ಗೆ ಅಂತರಾಷ್ಟ್ರೀಯ ವೇದಿಕೆಗಳಲ್ಲಿ ಹತ್ತಾರು ಬಾರಿ ಮಾತನಾಡಿದ್ದಾರೆ.
ಆಸ್ಟ್ರೇಲಿಯಾ, ನ್ಯೂಜಿಲೆಂಡ್, ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾದ ಕ್ರಿಕೆಟಿಗರು, ಕೋಚ್’ಗಳು ರಾಘವೇಂದ್ರನನ್ನು ‘ಲೆಜೆಂಡ್’ ಎಂದೇ ಮಾತನಾಡಿಸುತ್ತಾರೆ.
ಹೋಟೆಲ್ ಬಾಗಿಲಲ್ಲೇ ನಿಲ್ಲಿಸಿದ್ದ ಪೊಲೀಸ್ ಪಡೆ!
ಚಾಂಪಿಯನ್ಸ್ ಟ್ರೋಫಿಗೂ ಮುನ್ನ ಭಾರತ ತಂಡ ಇಂಗ್ಲೆಂಡ್ ವಿರುದ್ಧ ಏಕದಿನ ಸರಣಿಯನ್ನಾಡಿತ್ತು. ಸರಣಿಯ ಮೊದಲ ಪಂದ್ಯಕ್ಕಾಗಿ ನಾಗ್ಪುರಕ್ಕೆ ಬಂದಿಳಿದಾಗ ನಾಗ್ಪುರದಲ್ಲಿ ತಂಡದ ಜೊತೆ ಹೋಟೆಲ್’ಗೆ ತೆರಳುತ್ತಿದ್ದಾಗ.. ಇವನ್ಯಾರೋ ಆಗಂತುಕನೆಂದು ಹೋಟೆಲ್ ಬಾಗಿಲಲ್ಲೇ ಪೊಲೀಸ್ ಅಧಿಕಾರಿಯೊಬ್ಬ ರಾಘವೇಂದ್ರನನ್ನು ತಡೆಯುತ್ತಾನೆ. ಬೇರೆಯವರಾಗಿದ್ದರೆ ಆ ಅಧಿಕಾರಿಗೆ ದಬಾಯಿಸುತ್ತಿದ್ದರೋ ಏನೋ..
ರಾಘವೇಂದ್ರ ಒಂದು ಮಾತೂ ಆಡದೆ ಸುಮ್ಮನೆ ನಿಂತಿದ್ದ.. ಕೊನೆಗೆ ಅವರೇ ಸತ್ಯ ಅರಿತು ಕಳುಹಿಸಿ ಕೊಟ್ಟಿದ್ದರು. ನಂತರ ಆ ಪೊಲೀಸ್ ಅಧಿಕಾರಿಗೆ ಅದೇನನ್ನಿಸಿತೋ ಏನೋ.. ರಾಘವೇಂದ್ರನನ್ನು ಹೊಟೇಲ್’ನಲ್ಲಿ ವೈಯಕ್ತಿಕವಾಗಿ ಭೇಟಿ ಮಾಡಿ ‘ನನ್ನನ್ನು ಕ್ಷಮಿಸಿ’ ಎಂದಿದ್ದ. ತನ್ನನ್ನು ತಡೆದಾಗಲೂ ಸಹನೆಯಿಂದ ನಿಂತಿದ್ದ ರಾಘವೇಂದ್ರನ ನಡವಳಿಕೆ ಆ ಅಧಿಕಾರಿಗೆ ಅಚ್ಚರಿ ತರಿಸಿತ್ತು. ಹಾಗಾಗಿಯೇ ಹೇಳಿದ್ದು ರಾಘು ಓರ್ವ ಕಾಯಕಯೋಗಿ ಅಂತ.
ಸಚಿನ್ ತೆಂಡೂಲ್ಕರ್ ಅವರ ಮೆಚ್ಚಿನ ಹುಡುಗ ಈ ಕುಮುಟಾ ಪ್ರತಿಭೆ!
ಭಾರತ ತಂಡಕ್ಕೆ ಕಳೆದ 14 ವರ್ಷ ಗಳಿಂದ ಸೇವೆ ಸಲ್ಲಿಸುತ್ತಿರುವ ರಾಘು ಅನ್ನು ಸಚಿನ್, ಕೊಯ್ಲಿ, ದ್ರಾವಿಡ್, ರೋಹಿತ್ ಸೇರಿ ತಂಡದ ಎಲ್ಲರೂ ಇಷ್ಟಪಡುತ್ತಾರೆ. T20 ವರ್ಲ್ಡ್ ಕಪ್ ಗೆಲುವಲ್ಲಿ ರಾಘವೇಂದ್ರ ಅವರ ಸೇವೆ ಕೂಡ ಇದೆ. ಕರ್ನಾಟಕದ ಉತ್ತರ ಕನ್ನಡ ಜಿಲ್ಲೆ ಕುಮಟಾ ಮೂಲದ ರಾಘು ಮನೆ ಬಿಟ್ಟಾಗ ಇದ್ದಿದ್ದು ಕೇವಲ 19 ರೂ. ಇಂದು ದೇಶದ ಹೆಮ್ಮೆಯ ವ್ಯಕ್ತಿ ಆಗಿದ್ದಾನೆ.



