Categories
ಹುಬ್ಬಳ್ಳಿ

ಕೊಲೆ: ಸಾಕ್ಷ್ಯ ನಾಶಕ್ಕೆ ಕೋಟಿ-ಕೋಟಿ ಹಣ!

  • ಸಚಿವರಾಗಿದ್ದ ಕುಲಕರ್ಣಿಗೆ ಸಾಥ್ ನೀಡಿದ್ದ ಅಧಿಕಾರಿಗಳು….

ಹುಬ್ಬಳ್ಳಿ: ಜಿಲ್ಲಾ ಪಂಚಾಯತಿ ಸದಸ್ಯ ಯೋಗೇಶ ಗೌಡ ಕೊಲೆ ಪ್ರಕರಣದ ತನಿಖೆ ಈಗ ಮತ್ತೊಂದ ಹಂತಕ್ಕೆ ತಲುಪಿದ್ದು, ಸಾಕ್ಷಿ ನಾಶಕ್ಕೆ ಮಾಜಿ ಸಚಿವ ವಿನಯ ಕುಲಕರ್ಣಿ ಕೋಟಿ-ಕೋಟಿ ಹಣ ಸುರಿದಿದ್ದಾರೆ ಎಂಬ ಮಾಹಿತಿಯನ್ನು ಸಿಬಿಐ ಅಧಿಕಾರಿಗಳು ಕಲೆ ಹಾಕಿದ್ದಾರೆ. ಬ್ಯಾಂಕ್ ಖಾತೆಯಿಂದ ಹಣ ವರ್ಗಾವಣೆ ಆರೋಪದ ಹಿನ್ನೆಲೆಯಲ್ಲಿ ಕೆಎಎಸ್ ಅಧಿಕಾರಿ ಸೋಮಶೇಖರ ನ್ಯಾಮಗೌಡರ ವಿಚಾರಣೆಯನ್ನು ಸಿಬಿಐ ಭಾನುವಾರವೂ ಮುಂದುವರೆಸಿದೆ.


ಸಚಿವರ ಆಪ್ತರಾಗಿದ್ದರು…: ವಿನಯ ಆಪ್ತ ಕಾರ್ಯದರ್ಶಿಯಾಗಿದ್ದ ಸೋಮಲಿಂಗ ನ್ಯಾಮಗೌಡ, ವಿನಯ ಕುಲಕರ್ಣಿ ಸಚಿವರಾಗಿದ್ದ ವೇಳೆ ಆಪ್ತ ಕಾರ್ಯದರ್ಶಿಯಾಗಿದ್ದರು. ಸೋಮಲಿಂಗ ನ್ಯಾಮಗೌಡ ಅವರನ್ನು ಕಳೆದ ಮೂರು ದಿನಗಳಿಂದ ಸಿಬಿಐನಿಂದ ವಿಚಾರಣೆ ನಡೆಸಲಾಗಿದೆ. ವಿನಯ ಹಾಗೂ ಸೋಮಲಿಂಗ ಇಬ್ಬರನ್ನೂ ಮುಖಾಮುಖಿ ವಿಚಾರಣೆ ಮಾಡಿದ್ದ ಸಿಬಿಐ ಅಧಿಕಾರಿಗಳು ಮತ್ತೇ ವಿಚಾರಣೆಗಾಗಿ ಸಿಎಆರ್ ಮೈದಾನಕ್ಕೆ ಕರೆಸಿಕೊಂಡು ವಿಚಾರಣೆ ನಡೆಸಿದ್ದಾರೆ.


2 ಕೋಟಿ ರೂ. ಹಣ: ಸಾಕ್ಷ ನಾಶಪಡಿಸಲು ದೊಡ್ಡ ಮಟ್ಟದ ಹಣ ನೀಡಿದ ಆರೋಪದ ಹಿನ್ನೆಲೆಯಲ್ಲಿ ನ್ಯಾಮಗೌಡ ವಿಚಾರಣೆ ನಡೆಸಲಾಗುತ್ತಿದೆ. ಒಂದೇ ದಿನ 2 ಕೋಟಿ ರೂ. ವರ್ಗಾವಣೆಯಾಗಿದ್ದು ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ. ಹೀಗಾಗಿ ಸದ್ಯ ನ್ಯಾಮಗೌಡ ಅವರನ್ನು ವಿಚಾರಣೆಗೊಳಪಡಿಸಲಾಗಿದ್ದು ಯಾರ್ಯಾರಿಗೆ ಹಣ ಸಂದಾಯವಾಗಿದೆ ಮತ್ತು ಯಾವ ಕಾರಣಕ್ಕೆ ದುಡ್ಡು ನೀಡಲಾಗಿತ್ತು ಎಂಬ ಮಾಹಿತಿಯನ್ನು ಸಿಬಿಐ ಕೆದಕುತ್ತಿದೆ.


ಯಾರು ಈ ಸೋಮಶೇಖರ ?: ಸೋಮಶೇಖರ ನ್ಯಾಮಗೌಡ ಕೆಎಎಸ್ ಅಧಿಕಾರಿ. ವಿನಯ ಕುಲಕರ್ಣಿಯವರ ಕಾಲೇಜು ದಿನಗಳ ಸಹಪಾಠಿಯೂ ಹೌದು. ಸದ್ಯ ಹಾವೇರಿ ಜಿಲ್ಲೆಯ ಬ್ಯಾಡಗಿ ಎಪಿಎಂಸಿ ಕಾರ್ಯದರ್ಶಿ. ಅಲ್ಲದೇ, ವಿನಯ ಸಚಿವರಾಗಿದ್ದಾಗ ಹುಬ್ಬಳ್ಳಿ ಎಪಿಎಂಸಿ ಜಂಟಿ ಕಾರ್ಯದರ್ಶಿಯಾಗಿದ್ದ ಈ ನ್ಯಾಮಗೌಡನನ್ನು ತಮ್ಮ ಆಪ್ತ ಕಾರ್ಯದರ್ಶಿಯಾಗಿ ವಿನಯ ನೇಮಕ ಮಾಡಿಕೊಂಡಿದ್ದರು.


2 ಕೋಟಿ ರೂ. ಹಣದಲ್ಲಿ ರೂಮ್ ಬುಕ್ಕಿಂಗ್, ಟಿಕೆಟ್ ಬುಕ್ಕಿಂಗ್ ಯಾವೆಲ್ಲ ಕಡೆ ಹಣ ಸಾಗಣೆಯಾಗಿದೆ ಎಂಬುದರ ಬಗ್ಗೆ ಅಧಿಕಾರಿಗಳು ಮಾಹಿತಿ ಕಲೆ ಹಾಕುತ್ತಿದ್ದಾರೆ. ಅಲ್ಲದೇ, ಸೋಮಶೇಖರ ನ್ಯಾಮಗೌಡನ ವಾಹನ ಚಾಲಕನಾಗಿದ್ದ ಪುಂಡಲೀಕ ಮೊರಬದ ಎಂಬುವನನ್ನು ಸಿಬಿಐ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.


ಜಿಪಂ ಎಇಇ ಸಹಾ ವಿಚಾರಣೆಗೆ : ಸಿಬಿಐ ತನಿಖಾಧಿಕಾರಿ ರಾಕೇಶ ರಂಜನ್ ನೇತೃತ್ವದ ತಂಡ ಧಾರವಾಡ ಜಿಪಂ ಎಇಇ ಆಗಿರುವ ಎಸ್.ಎನ್. ಗೌಡರನ್ನು ಸಹಾ ವಿಚಾರಣೆಗೊಳಪಡಿಸಿದೆ. ಈ ಎಸ್.ಎನ್. ಗೌಡರ್ ಹೆಬ್ಬಳ್ಳಿ ಜಿಲ್ಲಾ ಪಂಚಾಯತಿ ಚುನಾವಣೆ ವೇಳೆ ಫ್ಲೈಯಿಂಗ್ ಸ್ಕ್ಯಾಡ್ ಆಗಿದ್ದರು. ಚುನಾವಣೆ ವೇಳೆ ನಡೆದ ವಿಷಯಗಳ ಕುರಿತು ಮತ್ತು ಈ ಸಮಯದಲ್ಲಿ ಯೋಗೇಶಗೌಡ ವಿರುದ್ಧ ನೀತಿ ಸಂಹಿತೆ ಪ್ರಕರಣ ದಾಖಲಿಸಿದ್ದರ ಬಗ್ಗೆ, ವಿನಯ ಕುಲಕರ್ಣಿ ಒತ್ತಡದ ಹಿನ್ನೆಲೆಯನ್ನೂ ಸಿಬಿಐ ಅಧಿಕಾರಿಗಳು ಸಂಗ್ರಹಿಸಿದ್ದಾರೆ.
ಸಿಬಿಐ ಇನ್ನೂ ಯಾರ್ಯಾರಿಗೆ ಗಾಳ ಹಾಕುತ್ತದೆ ಎಂಬುದನ್ನು ಕಾದುನೋಡಬೇಕಿದೆ.

Categories
ಹುಬ್ಬಳ್ಳಿ

ಸಿಬಿಐ ಇಕ್ಕಳದಿಂದ ವಿನಯ್ ಬಚಾವ್?

  • ಪಂಚಮಸಾಲಿ ಕೆಲಮಠಾಧೀಶರಿಂದ ಗೌಪ್ಯ ಸಭೆ..?

ಹುಬ್ಬಳ್ಳಿ: ಧರ್ಮದೊಂದಿಗೆ ಯಾವುದೇ ಕಾರಣಕ್ಕೂ ರಾಜಕೀಯ ವಿಲೀನಗೊಳಿಸಬಾರದು. ಒಂದೊಮ್ಮೆ ರಾಜಕೀಯದೊಂದಿಗೆ ಧರ್ಮ ವಿಲೀನಗೊಂಡರೇ ಸಮಾಜ ಅಧೋಗತಿಗೆ ಇಳಿಯುವುದು ಶತಃಸಿದ್ಧ ಎಂಬುದು ಮತ್ತೇ ಸಾಬೀತಾಗುವ ಸಾಧ್ಯತೆಗಳು ಮಾಜಿ ಸಚಿವ ವಿನಯ ಕುಲಕರ್ಣಿಯವರ ಬಂಧನದಿಂದ ಸಾಬೀತಾಗತೊಡಗಿದೆಯೇ..?


ಇಂತಹದೊಂದು ಚರ್ಚೆ ಇದೀಗ ಇಡೀ ರಾಜ್ಯದಲ್ಲೇ ಆರಂಭಗೊಂಡಿದ್ದು ಸುಳ್ಳಲ್ಲ. ಕಾವಿತೊಟ್ಟ ಸಾಧುಗಳು ಜಗದ ಸುಖಃ, ಶಾಂತಿಗಾಗಿ ದೇವರನ್ನು ಪ್ರಾರ್ಥಿಸಿ ಜಾತಿ, ಭೇದ ಮಾಡದೇ ಸಕಲರಿಗೂ ಒಳಿತನ್ನೇ ಬಯಸುವುದು ಶ್ರೀಗಳ ಕರ್ಮ. ಆದರೆ, ಯೋಗೇಶಗೌಡ ಕೊಲೆ ಪ್ರಕರಣದಲ್ಲಿ ಸಿಲುಕಿ ಹಾಕಿಕೊಂಡಿರುವ ಪಂಚಸಾಲಿ ಸಮಾಜದ ಮುಖಂಡ ಹಾಗೂ ಮಾಜಿ ಸಚಿವ ವಿನಯ ಕುಲಕರ್ಣಿಯವರನ್ನು ಬಂಧನದಿಂದ ಮುಕ್ತಗೊಳಿಸಲು ಸ್ವಾಮೀಜಿಗಳು ನಡೆಸುತ್ತಿರುವ ಯತ್ನ ನಿಜಕ್ಕೂ ಭಕ್ತ ಸಮೂಹವನ್ನು ವಿಚಲಿತಗೊಳಿಸುವಂತೆ ಮಾಡಿದ್ದು ಸುಳ್ಳಲ್ಲ.


ಕೆಲ ಕಾವಿಧಾರಿಗಳ ರಾಜಕೀಯ ಬುದ್ಧಿಯಿಂದ ಅದೇ ಮಠಾಧೀಶರು ಸಮುದಾಯದ ಜನ ಕೈ ಕೈ ಹಿಸುಕಿಕೊಳ್ಳುವಂತಾಗಿದೆ.
ಪ್ರಸಿದ್ಧ ಮಠದಲ್ಲಿ ಸಭೆ?: ಒಂದೆಡೆ ಮಾಜಿ ಸಚಿವ ವಿನಯ ಕುಲಕರ್ಣಿಗೆ, ಯೋಗೇಶಗೌಡ ಕೊಲೆ ಪ್ರಕರಣದಲ್ಲಿ ಸಿಬಿಐ ಅಧಿಕಾರಿಗಳು ಡ್ರಿಲ್ ನಡೆಸುತ್ತಿದ್ದಾರೆ. ಮತ್ತೊಂದೆಡೆ ಈ ಇಡೀ ಪ್ರಕರಣದಿಂದ ವಿನಯ ಕುಲಕರ್ಣಿ ಅವರನ್ನು ಖುಲಾಸೆಗೊಳಿಸಬೇಕೆಂದು ಪಂಚಮಸಾಲಿ ಮಠಾಧೀಶರು ಧಾರವಾಡದ ಸುಪ್ರಸಿದ್ಧ ಪಂಚಮಸಾಲಿ ಸಮುದಾಯದ ಮಠದಲ್ಲಿ ಸುದೀರ್ಘ ಚರ್ಚೆ ನಡೆಸಿದ್ದಾರೆ. ಅಲ್ಲದೇ, ಕೇಂದ್ರ ಹಾಗೂ ರಾಜ್ಯದ ಬಿಜೆಪಿ ಮತ್ತು ಕಾಂಗ್ರೆಸ್ ಹಿರಿಯ ಮುಖಂಡರಿಗೆ ಪೆÇೀನಾಯಿಸಿ ಪ್ರಕರಣವನ್ನು ಇಲ್ಲಿಗೆ ಕೈಬಿಡುವಂತೆ ಒತ್ತಡ ಹೇರಿದ್ದಾರಂತೆ. ಇಷ್ಟಕ್ಕೆ ಮಾತ್ರ ಸುಮ್ಮನಾಗದ ಒಬ್ಬ ಮಠಾಧೀಶರು, ನಮ್ಮ ಆರ್ಶೀವಾದ ನಿಮ್ಮ ಮೇಲೆ ಇರಬೇಕು ಅಂದರೆ ತನಿಖೆಯನ್ನು ನಿಲ್ಲಿಸಿ ಅಂತಲೂ ಆಗ್ರಹಿಸಿದ್ದಾರೆ ಎಂದು ಗೊತ್ತಾಗಿದೆ.


ಪಾಠ ಕಲಿಸುವುದಾಗಿ ಗುಟುರು: ವಿನಯ ಕುಲಕರ್ಣಿಯನ್ನು ಸಿಬಿಐ ಇಕ್ಕಳದಿಂದ ಶೀಘ್ರ ಬಿಡುಗಡೆಗೊಳಿಸದಿದ್ದರೆ ಮುಂದಿನ ದಿನಗಳಲ್ಲಿ ಸಮುದಾಯದ ಜನ ಒಕ್ಕಟ್ಟಾಗಿ ಪಾಠ ಕಲಿಸಬೇಕಾಗುತ್ತದೆ ಎಂದು ಕೆಲ ಕಾವಿಧಾರಿಗಳು ಗುಟುರು ಹಾಕಿದ್ದಾರಂತೆ. ಇದಕ್ಕೆ ಪ್ರತಿಕ್ರಿಯಿಸಿದ ಹಿರಿಯ ರಾಜಕೀಯ ನಾಯಕರು, ಮೃತ ಯೋಗೇಶಗೌಡ ಕುಟುಂಬವೂ ಪಂಚಮಸಾಲಿ ಸಮುದಾಯಕ್ಕೆ ಸೇರಿದ್ದು. ಅವರಿಗೆ ನ್ಯಾಯ ಸಿಗುವುದು ಬೇಡವೇ ಎಂದು ಪ್ರಶ್ನಿಸಿದ್ದಾರೆ ಎಂದು ಹೆಸರು ಹೇಳಲು ಇಚ್ಛಿಸದ ಭಕ್ತರೊಬ್ಬರು ತಿಳಿಸಿದ್ದಾರೆ.
ಅಲ್ಲದೇ, ಪ್ರಕರಣವು ನ್ಯಾಯಾಲಯದಲ್ಲಿ ಇರುವುದರಿಂದ ನಾವು ಹಸ್ತಕ್ಷೇಪ ಮಾಡಲು ಬರುವುದಿಲ್ಲ ಎಂಬ ಸಬೂಬು ನೀಡಿದ್ದಾರೆ ಎಂದು ಗೊತ್ತಾಗಿದೆ. ಅಲ್ಲದೇ, ಪ್ರಕರಣವನ್ನು ಸಿಬಿಐಗೆ ವಹಿಸುವಂತೆ ಮೃತ ಯೋಗೇಶಗೌಡನ ಕುಟುಂಬಸ್ಥರೇ ಹೇಳಿದ್ದರಿಂದ ರಾಜ್ಯ ಸರ್ಕಾರ ಪ್ರಕರಣವನ್ನು ಸಿಬಿಐಗೆ ನೀಡಿದೆ ಇದರಲ್ಲಿ ರಾಜಕೀಯ ಏನೂ ಇಲ್ಲ ಎಂದು ಹೇಳಿ ಫೆÇೀನ್ ಕಟ್ ಮಾಡಿದ್ದಾರಂತೆ.


ತೋಂಟದಾರ್ಯ ಮಠಕ್ಕೆ ಶಿಫ್ಟ್!: ಇಷ್ಟಕ್ಕೆ ಸುಮ್ಮನಾಗದ ಕೆಲ ಸ್ವಾಮೀಜಿಗಳು ಕೇಂದ್ರದಲ್ಲೂ ನಿಮ್ಮದೇ ಸರ್ಕಾರ ಇದೆ. ಹೀಗಾಗಿ ಸಿಬಿಐ ಮೇಲೆ ಒತ್ತಡ ಹಾಕಿ ಪ್ರಕರಣವನ್ನು ಇಲ್ಲಿಯೇ ನಿಲ್ಲಿಸಿ ಅಂತ ಅನೇಕ ಕರೆ ಮಾಡಿದ್ದಾರೆ ಎಂದು ಗೊತ್ತಾಗಿದೆ. ಈ ಸುದ್ದಿ ಬಹಿರಂಗಗೊಳ್ಳುತ್ತಿದಂತೆಯೇ ಎಚ್ಚತ್ತುಕೊಂಡ ಸ್ವಾಮೀಜಿಗಳು, ಧಾರವಾಡದಿಂದ ಗದಗ ಜಿಲ್ಲೆಯ ತೋಂಟದಾರ್ಯ ಮಠಕ್ಕೆ ಮಿಟಿಂಗ್ ಶಿಫ್ಟ್ ಮಾಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

Categories
ಹುಬ್ಬಳ್ಳಿ

ವಿನಯ್ ಕುಲಕರ್ಣಿಗೆ ಖಡಕ್ ಅಧಿಕಾರಿ ಉರುಳು?!

  • ಜಿಪಂ ಸದಸ್ಯ ಯೋಗೇಶಗೌಡ ಕೊಲೆ ಕೇಸಿಗೆ ಟ್ವಿಸ್ಟ್?

ಹುಬ್ಬಳ್ಳಿ: ರಾಜ್ಯಾದ್ಯಂತ ಕುತೂಹಲ ಕೆರಳಿಸಿರುವ ಯೋಗೇಶ ಗೌಡ ಕೊಲೆ ಪ್ರಕರಣದ ತನಿಖೆ ಹೊಣೆಹೊತ್ತ ಸಿಬಿಐ ಅಧಿಕಾರ ರಾಕೇಶ ರಂಜನ್ ಸಾಮಾನ್ಯದವರಲ್ಲ!
ಹೌದು, ಕರ್ನಾಟಕದ ಜನತೆಗೆ ನೆನಪಿರಬಹುದು, ಮಾಜಿ ಸಚಿವ ಜನಾರ್ಧನ ರೆಡ್ಡಿಯ ಗಣಿಯನ್ನು ಅಗೆದು-ಬಗೆದು ಜೈಲಿಗೆ ಅಟ್ಟಿದ ಅಧಿಕಾರಿ ಇವರೇ. ಇದೀಗ ಮತ್ತೊಬ್ಬ ಮಾಜಿ ಸಚಿವ ವಿನಯ ಕುಲಕರ್ಣಿ ಅವರನ್ನು ಬಂಧಿಸಿ ವಿಚಾರಣೆ ನಡೆಸುತ್ತಿದ್ದಾರೆ. 2019 ಸೆಪ್ಟೆಂಬರ್‍ನಲ್ಲಿ ಯೋಗೇಶಗೌಡ ಕೊಲೆ ಪ್ರಕರಣವನ್ನು ಸಿಬಿಐಗೆ ವಹಿಸಿದಾಗ ತನಿಖಾಧಿಕಾರಿಯಾಗಿ ನಿಯುಕ್ತಿಗೊಂಡಿದ್ದ ಇದೇ ರಾಕೇಶ ರಂಜನ್.
ಯೋಗೇಶಗೌಡ ಕೊಲೆಯಾದ 48 ಗಂಟೆಯಲ್ಲಿ 6 ಆರೋಪಿಗಳು ಪೆÇಲೀಸರಿಗೆ ಶರಣಾಗಿ , ತಾವೇ ಕೊಲೆ ಆರೋಪಿಗಳು ಎಂದು ಹೇಳಿಕೊಂಡಾಗ ಈ ಪ್ರಕರಣ ಮುಗಿದೇ ಹೋಯಿತು ಎಂದು ಭಾವಿಸಿದವರೇ ಹೆಚ್ಚು. ಸರ್ಕಾರ ಸಿಬಿಐಗೆ ಪ್ರಕರಣ ಹಸ್ತಾಂತರಿಸಿದ ನಂತರ ತನಿಖೆಯ ಜವಾಬ್ದಾರಿ ಹೊತ್ತುಕೊಂಡವರು ರಾಕೇಶ ರಂಜನ್.
ಯೋಗೇಶಗೌಡನನ್ನು ಕೊಲೆಗೈದ ಶೂಟರ್‍ಗಳು ಸ್ಥಳೀಯರಲ್ಲ. ಬದಲಾಗಿ ತಮಿಳುನಾಡು, ಬೆಂಗಳೂರು ಮೂಲದವರು. ಇವರು ಸುಪಾರಿ ಹಂತಕರು ಎಂಬ ಸತ್ಯ ಸಂಗತಿಯನ್ನು ಬಹಿರಂಗಗೊಳಿಸಿದವರು ಇದೇ ಅಧಿಕಾರಿ.
ನಂತರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹಲವರನ್ನು ವಿಚಾರಣೆ ನಡೆಸಿ, ಕೆಲವರನ್ನು ಬಂಧಿಸುವ ಮೂಲಕ ತನಿಖೆಯ ಗತಿಯನ್ನೇ ಬದಲಾಯಿಸಿ ಎಲ್ಲರೂ ಹುಬ್ಬೇರುವಂತೆ ಮಾಡಿದರು.


ರಾಕೇಶ ರಂಜನ್ ತನಿಖೆಯೇ ವಿಭಿನ್ನ, ನೋಟಿಸ್ ಕೊಟ್ಟು ವಿಚಾರಣೆ ಕರೆಯಿಸುವ ಪೂರ್ವ ಎಲ್ಲ ದಾಖಲೆಗಳನ್ನು ಗೌಪ್ಯವಾಗಿ ಅಷ್ಟೇ ನಿಖರವಾಗಿ ಸಂಗ್ರಹಿಸುವುದು ಇವರ ವಿಶೇಷತೆ. ಈಗ ಇದೇ ನೋಡಿ ವಿನಯ ಕುಲಕರ್ಣಿ ಪ್ರಕರಣ. ಯಾವ ದಿನಾಂಕದಂದು ಇವರು ಎಲ್ಲಿದ್ದರು? ಏನೇನು ಮಾತನಾಡಿದರು? ಯಾವ ಹೊಟೇಲ್‍ನಲ್ಲಿ ತಂಗಿದ್ದರು? ಯಾವ ವಿಮಾನಕ್ಕೆ ಹೋದರು? ಯಾರೊಂದಿಗೆ ಎಷ್ಟು ಸಮಯ ಮಾತನಾಡಿದರು? ಇಂತಹ ಹಲವಾರು ಮಾಹಿತಿಯ ಜಾಲವನ್ನು ಭೇದಿಸಿ, ಈಗ ವಿಚಾರಣಾಧೀನ ಕೈದಿ ವಿನಯ ಕುಲಕರ್ಣಿ ಅವರನ್ನು ಹಿಗ್ಗಾಮಗ್ಗಾ ಜಾಲಾಡಿಸುತ್ತಿದ್ದಾರೆ. ಇದೇ ರಂಜನ್ ವಿಶೇಷತೆ.


ಮಹತ್ವದ ಸಂಗತಿಯೆಂದರೆ, ರಾಕೇಶ ರಂಜನ್‍ಗೆ ಸಿಟ್ಟು ಬರುವುದಿಲ್ಲ. ಇವರು ಯಾವುದೇ ಪರಿಸ್ಥಿತಿಯಲ್ಲಿ ಸಂಯಮ ಕಳೆದುಕೊಳ್ಳುವುದಿಲ್ಲ. ಯಾರಿಗೂ ಬೇಸರ ಮಾಡುವುದಿಲ್ಲ. ಆದರೆ ಬಾಯಿ ಬಿಡಿಸುವ ಕಲೆ ಕರಗತ. ವಿಚಾರಣೆ ಶೈಲಿ, ತನಿಖೆ ವೈಖರಿ ವಿಭಿನ್ನ, ಮೂಲತಃ ಬಿಹಾರದವರಾದ ರಾಜೇಶ ರಂಜನ್, ಸಾಮಾನ್ಯ ರೈತನೊಬ್ಬನ ಮಗ. ಪದವಿ ಅಧ್ಯಯನ ನಂತರ ಬಿಎಸ್‍ಎಫ್ ಸೇರಿಕೊಂಡರು. ಅಲ್ಲಿಂದ ಅವರು ಏರಿದ ಹುದ್ದೆಗಳು, ಸ್ಥಾನಮಾನ ಎಲ್ಲವೂ ನಿಷ್ಠೆ, ಪ್ರಾಮಾಣಿಕತೆಯಿಂದಲೇ ಬಂದಿದ್ದು, ವೃತ್ತಿ ಬದುಕಿನಲ್ಲಿ ಈವರೆಗೆ ನಡೆಸಿದ 14 ಪ್ರಕರಣಗಳ ತನಿಖೆಯಲ್ಲಿ 12ರಲ್ಲಿ ಅಪರಾಧಿಗಳಿಗೆ ಶಿಕ್ಷೆಯಾಗಿದೆ. ಇನ್ನೆರಡು ಪ್ರಕರಣಗಳು ವಿಚಾರಣೆ ಹಂತದಲ್ಲಿವೆ. 15ನೇ ಪ್ರಕರಣವೇ ಯೋಗೇಶಗೌಡ ಕೊಲೆಗೆ ಸಂಬಂಧಿಸಿದ್ದು.


ಸಿಬಿಐ ಭ್ರಷ್ಟಾಚಾರ ನಿಗ್ರಹ ದಳದ ಇನ್ಸ್‍ಸ್ಪೆಕ್ಟರ್ ರಾಕೇಶ ರಂಜನ್ ಮೂಲತಃ ಗಡಿಭದ್ರತಾ ಪಡೆಯ ಇಂಟೆಲಿಜೆನ್ಸ್ ವಿಂಗ್‍ನಲ್ಲಿ 5 ವರ್ಷ ನಿರ್ವಹಿಸಿದ ಕಾರ್ಯವೈಖರಿ ಇವರ ತನಿಖಾಶೈಲಿಯನ್ನು ಒರೆಗೆ ಹಚ್ಚಿತು. ಅವರನ್ನು ಸಿಬಿಐಗೆ ಕರೆಯಿಸಿಕೊಂಡಿದ್ದು ನ್ಯಾಷನಲ್ ಸೆಕ್ಯುರಿಟಿ ಗ್ರೂಪ್‍ನ ಮುಖ್ಯಸ್ಥರಾಗಿದ್ದ ಕರ್ನಾಟಕದ ಹಿರಿಯ ಐಪಿಎಸ್ ಅಧಿಕಾರಿಯಾದ ಟಿ. ಮಡಿಯಾಳ್ ಅವರು. ಅಲ್ಲಿಂದ ರಾಕೇಶ ಅವರು ಸಿಬಿಐನಲ್ಲಿ ತಮಗೆ ವಹಿಸಿದ ಪ್ರಕರಣಗಳೆನ್ನಲ್ಲ ಭೇದಿಸುತ್ತ ಅಪರಾಧಿಗಳನ್ನು ಕಂಬಿ ಹಿಂದೆ ಅಟ್ಟಿದರು. ಇವರ ಚಾಕಚಕ್ಯತೆಯ ಕಾರ್ಯವೈಖರಿಗೆ ಕಳೆದ ಆ.15ರಂದು ಕೇಂದ್ರ ಗೃಹ ಸಚಿವರ ಮೆಡಲ್ ಪುರಸ್ಕಾರ ಲಭಿಸಿದೆ.

Categories
ಬೆಂಗಳೂರು ಹುಬ್ಬಳ್ಳಿ

ಕಪಿಮುಷ್ಠಿಯಲ್ಲಿ ನಾಯಕನ ಪತ್ನಿ ಅತಂತ್ರ!

ಹತ್ಯೆಯಾದ ಯೋಗೇಶಗೌಡ ಪತ್ನಿ ಮಲ್ಲಮ್ಮನ ಶೋಚನೀಯ ಸ್ಥಿತಿ

ರಿಯಲ್ ಸ್ಟೋರಿ: ನಮ್ಮೂರ್ ಎಕ್ಸ್‍ಪ್ರೆಸ್: ಬಿ.ಕೆ.ಮಹೇಂದ್ರ
ಹುಬ್ಬಳ್ಳಿ: ಅತ್ತ ಪತಿಯನ್ನೂ ಕಳೆದುಕೊಂಡು ಇತ್ತ ಗಂಡನ ಕುಟುಂಬಸ್ಥರ ವಿಶ್ವಾಸವನ್ನೂ ಕಳೆದುಕೊಂಡಿರುವ ಕೊಲೆಯಾದ ಜಿಪಂ ಸದಸ್ಯ ಯೋಗೇಶ ಗೌಡ ಗೌಡನ ಪತ್ನಿ ಮಲ್ಲಮ್ಮ ಗೌಡರ್, ರಾಜಕಾರಣಿಗಳ ಕಪಿಮುಷ್ಠಿಯಲ್ಲಿ ಸಿಲುಕಿ ಹಾಕಿಕೊಂಡು ಇಡೀ ಬದುಕು ನರಕವನ್ನಾಗಿಸಿಕೊಂಡರೇ..?
ಇಂತಹದೊಂದು ಯಕ್ಷ ಪ್ರಶ್ನೆ ಧಾರವಾಡ ಜಿಲ್ಲೆಯಾದ್ಯಂತ ಶ್ರೀಸಾಮಾನ್ಯರ ಬಾಯಿಯಿಂದ ಕೇಳಿ ಬರಲಾರಂಭಿಸಿದೆ. ಇದಕ್ಕೆ ಕಾರಣವೂ ಇಲ್ಲದ್ದಿಲ್ಲ. ಪತಿಯ ಕೊಲೆಯಾದ ಸಂದರ್ಭದಲ್ಲಿ ಆಗ ಸಚಿವರಾಗಿದ್ದ ವಿನಯ ಕುಲಕರ್ಣಿ ಸೇರಿದಂತೆ ಕಾಂಗ್ರೆಸ್ ವಿರುದ್ಧ ಬಿಜೆಪಿಯ ನಾಯಕರೊಂದಿಗೆ ತೊಡೆ ತಟ್ಟಿದ್ದ ಮಲ್ಲಮ್ಮ, ಬದಲಾದ ಸನ್ನಿವೇಶದಲ್ಲಿ ಕಾಂಗ್ರೆಸ್ ಜತೆ ಗುರುತಿಸಿಕೊಳ್ಳುವ ಮೂಲಕ ಇತ್ತ ಬಿಜೆಪಿ ಹಾಗೂ ಅತ್ತ ಗಂಡನ ಮನೆಯವರ ಆಕ್ರೋಶಕ್ಕೆ ಕಾರಣವಾಗಿದ್ದಳು.


ಅತಂತ್ರ ಸ್ಥಿತಿಯಲ್ಲಿ ಮಲ್ಲಮ್ಮ!: 2015ರಲ್ಲಿ ತನ್ನ ಪತಿಯನ್ನು ಹಾಡಹಗಲೇ ಕೊಲೆಯಾಗಿದ್ದಾರೆಂಬ ಸುದ್ದಿ ತಿಳಿದು ಗರಬಡಿದಂತೆ ಮಲ್ಲಮ್ಮ ಬಿದ್ದುಕೊಂಡಿದ್ದಳು. ಇಡೀ ಪ್ರಕರಣದಲ್ಲಿ ರಾಜಕೀಯ ಹಾಸುಹೊಕ್ಕಾಗಿದೆ ಎಂಬ ವಿಷಯ ತಿಳಿಯುತ್ತಲೇ ಆಗ ಪ್ರತಿಪಕ್ಷ ಸ್ಥಾನದಲ್ಲಿದ್ದ ಬಿಜೆಪಿಗರು, ಯೋಗೇಶಗೌಡನ ಮನೆಗೆ ತೆರಳಿ ಸಂತಾಪದ ಹೊಳೆಯನ್ನೇ ಹರಿಸಿದ್ದರು. ಮಾತ್ರವಲ್ಲದೇ, ಇಡೀ ಪ್ರಕರಣ ಸಮರ್ಥವಾಗಿ ಬಳಸಿಕೊಳ್ಳಲು ಹವಣಿಸಿದ್ದರು.


ಆದರೆ, ರಾಜಕೀಯದ ಗಂಧಗಾಳಿಯೂ ಅರಿಯದ ಮುಗ್ದ ಮಲ್ಲಮ್ಮ, ಮೊದ-ಮೊದಲು ಬಿಜೆಪಿಗರ ಪ್ರತಿಯೊಂದು ಮಾತಿಗೆ ತಲೆ ಅಲ್ಲಾಡಿಸಿದ್ದಳು. ಇದು ಸಹಜವಾಗಿಯೂ ಆಗಿನ ಆಡಳಿತ ಪಕ್ಷದ ನಾಯಕರು ಸೇರಿದಂತೆ ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದ ವಿನಯ ಕುಲಕರ್ಣಿ ಹಾಗೂ ಅವರ ಬೆಂಬಲಿಗರ ಕಣ್ಣು ಕೆಂಪಾಗಿಸಿತ್ತು. ಇಲ್ಲಿಂದ ಆರಂಭಗೊಂಡ ಈ ಕೊಲೆ ರಾಜಕಾರಣದಲ್ಲಿ ಮೈಕಾಸಿಕೊಳ್ಳಲು ರಾಜಕೀಯ ಪಕ್ಷಗಳು ಮಾತ್ರವಲ್ಲದೇ, ಅಧಿಕಾರಿಗಳು ಸಹಾ ರಾಜಕೀಯ ಮುಖಂಡರ ಕೃಪಾಕಟಾಕ್ಷೆ ಗಿಟ್ಟಿಸಿಕೊಳ್ಳು ಮಾಡಿದ ಹರಸಾಹಸ ಅಷ್ಟಿಷ್ಟಲ್ಲ.!


ಬಿಜೆಪಿಯಿಂದ ಸ್ಪರ್ಧೆ: ಪತಿ ಯೋಗೇಶ ಗೌಡನ ಕೊಲೆಯಾದ ನಂತರ, ನಡೆದ ರಾಜಕೀಯ ವಿದ್ಯಮಾನಗಳನ್ನು ಗ್ರಹಿಸದ ಮಲ್ಲಮ್ಮ, ಬಿಜೆಪಿಯಿಂದ ಜಿಲ್ಲಾ ಪಂಚಾಯ್ತಿಗೆ ಸ್ಪರ್ಧಿಸಿದ್ದರು. ಆದರೆ, ಈ ಚುನಾವಣೆಯಲ್ಲಿ ಸೋಲುಂಡರು. ಯೋಗೇಶ ಗೌಡನ ಕೊಲೆಯಿಂದಾಗಿ ಸಹಜವಾಗಿಯೇ ಅನುಕಂಪದ ಅಲೆಯಲ್ಲಿ ಮಲ್ಲಮ್ಮ ತೇಲಿ ಬರುತ್ತಾಳೆ ಎಂಬ ಬಿಜೆಪಿಗರ ಕನಸು ಇಲ್ಲಿಗೆ ನುಚ್ಚುನೂರಾಗಲಿಕ್ಕೆ ಸಾಕು. ದಿನಕಳೆದಂತೆ ಬಿಜೆಪಿ ಮಲ್ಲಮ್ಮಳ ಕಡೆಗಣಿಸಲಾರಂಭಿಸಿತು.


ಕಾಂಗ್ರೆಸ್ ಸೇರ್ಪಡೆ: ಈ ಮಧ್ಯೆ, ಎದುರಾದ 2018 ವಿಧಾನಸಭೆ ಚುನಾವಣೆಯಲ್ಲಿ ಮತ್ತೇ ಯೋಗೇಶ ಗೌಡನ ಕೊಲೆ ಪ್ರಕರಣವನ್ನು ಬಿಜೆಪಿಗರು ಧಾಳವನ್ನಾಗಿ ಪರಿವರ್ತಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಂತೆಯೇ ಎಚ್ಚತ್ತುಕೊಂಡ ಕಾಂಗ್ರೆಸ್ ಶತಾಯ-ಗತಾಯ ಮಲ್ಲಮ್ಮಳ ಮನವೊಲಿಸಿ ಕಾಂಗ್ರೆಸ್ ಪಕ್ಷಕ್ಕೆ ಸೇರಿಸಿಕೊಂಡರು. ತನ್ನ ಪತಿಯ ಕೊಲೆಯಲ್ಲಿ ಕಾಂಗ್ರೆಸ್‍ನ ಹಿರಿಯ ನಾಯಕರ ಕೈವಾಡವಿದೆ ಎಂದು ಆರೋಪಿಸುತ್ತಲೇ ಬಂದಿದ್ದ ಮಲ್ಲಮ್ಮ, ಏಕಾಏಕಿ ಕಾಂಗ್ರೆಸ್ ಪಕ್ಷ ಸೇರ್ಪಡೆಯಾಗಿದ್ದು ಆಕೆಯ ಮನೆತನಕ್ಕೆ ಮಾತ್ರವಲ್ಲದೇ ಕ್ಷೇತ್ರ ಜನತೆಯಲ್ಲೂ ಸಾಕಷ್ಟು ಸಂಶಯ ಹುಟ್ಟು ಹಾಕಿತ್ತು ಎಂಬುದನ್ನು ಇಲ್ಲಿ ಉಲ್ಲೇಖಿಸಬಹುದು.


ಆದರೆ, ಈ ಸಂದರ್ಭದಲ್ಲಿ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದ ಮಲ್ಲಮ್ಮ, ತಾನು ಯಾವುದೇ ಆಮಿಷಕ್ಕೊಳಗಾಗಿ ಕಾಂಗ್ರೆಸ್ ಸೇರಿಲ್ಲ. ತನ್ನ ಮಕ್ಕಳ ಸುರಕ್ಷತೆಗಾಗಿ ಸೇರಿದ್ದೆ ಎಂದು ಹೇಳಿಕೊಂಡಿದ್ದಳು. ಇದೀಗ ಯೋಗೇಶ ಗೌಡನ ಕೊಲೆ ಪ್ರಕರಣದಲ್ಲಿ ಸೋಮವಾರವಷ್ಟೇ ಸಿಬಿಐ ಅಧಿಕಾರಿಗಳು ಮಾಜಿ ಸಚಿವ ವಿನಯ ಕುಲಕರ್ಣಿ ಅವರನ್ನು ವಶಕ್ಕೆ ಪಡೆದುಕೊಂಡು ವಿಚಾರಣೆ ನಡೆಸುತ್ತಿದ್ದರೇ, ಅವರ ಸಹೋದರ ವಿಜಯ ಕುಲಕರ್ಣಿ ಹಾಗೂ ಕುಟುಂಬದ ಮತ್ತಿತರ ಸದಸ್ಯರನ್ನು ವಿಚಾರಣೆಗೊಳಪಡಿಸಿದ್ದನ್ನು ಮಲ್ಲಮ್ಮ, ಸ್ವಾಗತಿಸಿದ್ದಾರಲ್ಲದೇ ಈ ಕ್ರಮ ತಮಗೆ ಸಂತಸ ತಂದುಕೊಟ್ಟಿದೆ ಎಂದು ಹೇಳಿಕೊಂಡಿದ್ದು ಸಹಜವಾಗಿಯೇ ಕೈ ನಾಯಕರನ್ನು ಆಕ್ರೋಶಕ್ಕೀಡು ಮಾಡಿದೆ. ಕಾಂಗ್ರೆಸ್, ಬಿಜೆಪಿ ಹಾಗೂ ಕುಟುಂಬಸ್ಥರಿಂದ ದೂರವಾಗಿರುವ ಮಲ್ಲಮ್ಮ, ಅಕ್ಷರಶಃ ಅತಂತ್ರಳಾಗಿದ್ದಾಳೆ.

Categories
ಹುಬ್ಬಳ್ಳಿ

ವಾಣಿಜ್ಯ ನಗರಿಯಲ್ಲಿ ಚಾಕು ಇರಿತ

  • ಗುಪ್ತಾಂಗಕ್ಕೆ ಚಾಕು ಇರಿದ ಆಗಂತುಕರು
  • ಹುಬ್ಬಳ್ಳಿಯ ಎರಡು ಕಡೆ ಘಟನೆ: ಆತಂಕ

ಹುಬ್ಬಳ್ಳಿ: ವಾಣಿಜ್ಯ ನಗರಿ ಹುಬ್ಬಳ್ಳಿಯಲ್ಲಿ ಸೋಮವಾರ ರಾತ್ರಿ ಮತ್ತೇ ಚಾಕು ಇರಿತ ಪ್ರಕರಣ ಸದ್ದು ಮಾಡಿದ್ದು ಶಾಂತಿಪ್ರೀಯ ಜನತೆಯ ಮನದಲ್ಲಿ ಆತಂಕ ಮಡಗುಟ್ಟುವಂತೆ ಮಾಡಿದೆ.
ಎರಡು ಪ್ರತ್ಯೇಕ ಕಡೆಗಳಲ್ಲಿ ನಡೆದ ಎರಡು ಪ್ರಕರಣಗಳಲ್ಲಿ ಇಬ್ಬರು ಚಾಕುವಿನ ಇರಿತಕ್ಕೆ ಮಾರಣಾಂತಿಕ ಗಾಯಗೊಂಡಿದ್ದು ಸಾವು-ಬದುಕಿನ ಮಧ್ಯೆ ಜೂಜಾಟ ನಡೆಸಿದ್ದಾರೆ. ಗಾಯಾಳುಗಳಿಬ್ಬರನ್ನು ಚಿಕಿತ್ಸೆಗಾಗಿ ಕಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.


ಟಿಪ್ಪುನಗರ ನಿವಾಸಿ ಶೋಯಬ್ ಅಬ್ಬನ್ನವರ ಹಾಗೂ ಮಾಧವ ನಗರ ನಿವಾಸಿ ರಮೇಶ ಕಟ್ಟಿಮನಿ ಎಂಬಿಬ್ಬರು ಗಂಭೀರ ಗಾಯಗೊಂಡಿದ್ದಾರೆ. ಚಾಕು ಇರಿತ ಪ್ರಕರಣಕ್ಕೆ ನಿಖರವಾಗಿ ಕಾರಣವೇನು ಎಂಬುದು ಗೊತ್ತಾಗಿಲ್ಲ. ಆದರೆ, ಘಟನೆ ನಂತರ ಹಳೆ ಹುಬ್ಬಳ್ಳಿ ಪೆÇಲೀಸ್ ಠಾಣೆ ವ್ಯಾಪ್ತಿಯ ಟಿಪ್ಪುನಗರ ಹಾಗೂ ಅಶೋಕನಗರ ಪೆÇಲೀಸ್ ಠಾಣೆ ವ್ಯಾಪ್ತಿಯ ಮಾಧವ ನಗರದಲ್ಲಿ ಆತಂಕದ ವಾತಾವರಣ ನಿರ್ಮಾಣಗೊಂಡಿತ್ತು.


ನಿರ್ಗಮಿತ ಪೆÇಲೀಸ್ ಆಯುಕ್ತ ಆರ್.ದಿಲೀಪ್ ಅವರ ಅಧಿಕಾರವಧಿಯಲ್ಲಿ ಅತಿ ಹೆಚ್ಚು ಚಾಕು ಇರಿತ ಪ್ರಕರಣಗಳು ನಡೆದು ಅವಳಿ ನಗರದಲ್ಲಿ ಪೆÇಲೀಸ್ ವ್ಯವಸ್ಥೆ ಇದೆಯೋ ಎಲ್ಲವೋ ಎಂದು ಜನತೆ ಪ್ರಶ್ನಿಸಿಕೊಳ್ಳುವಂತಾಗಿತ್ತು. ಚಾಕು ಇರಿತ ಪ್ರಕರಣಗಳಿಂದ ಬೇಸತ್ತು ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಅವರು ಸಹಾ ತಪ್ಪಿತಸ್ಥರನ್ನು ತಕ್ಷಣ ಬಂಧಿಸಿ ಪೆÇಲೀಸ್ ಇಲಾಖೆ ಖದರು ತೋರ್ಪಡಿಸಬೇಕು ಎಂದು ಇಲಾಖೆಗೆ ತಾಕಿತ್ತು ಮಾಡಿದ್ದರು ಎಂಬುದನ್ನು ಇಲ್ಲಿ ಸ್ಮರಿಸಬಹುದು.


ಇದೀಗ ಮಹಾನಗರ ಪೆÇಲೀಸ್ ಇಲಾಖೆಯ ಚುಕ್ಕಾಣಿ ಹಿಡಿದಿರುವ ಲಾಭುರಾಮ, ಕಟ್ಟುನಿಟ್ಟಿನ ಅಧಿಕಾರಿಯಾಗಿದ್ದು ಈ ಚಾಕು ಇರಿತ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ ಅವಳಿನಗರದಲ್ಲಿ ಶಾಂತಿ ಸುವ್ಯವಸ್ಥೆ ಕಾಪಾಡಿಕೊಂಡು ಬರಲು ಯಾವ ರೀತಿಯ ಕ್ರಮಕೈಗೊಳ್ಳಿದ್ದಾರೆ ಎಂಬುದನ್ನು ಅವಳಿ ನಗರದ ಜನತೆ ಎದುರು ನೋಡುವಂತೆ ಮಾಡಿದ್ದು ಸುಳ್ಳಲ್ಲ.


ದೀಪಗಳ ಹಬ್ಬ ದೀಪಾವಳಿ ಸಮೀಪಿಸುತ್ತಿರುವ ಈ ಸಂದರ್ಭದಲ್ಲಿ ಚಾಕು ಇರಿತ ಪ್ರಕರಣ ನಡೆದಿದ್ದು ಸಹಜವಾಗಿಯೇ ಮಹಾನಗರದ ಜನತೆಯಲ್ಲಿ ಮನದಲ್ಲಿ ಅಶಾಂತಿ ಮೂಡಿಸಿದೆ. ಸಣ್ಣಪುಟ್ಟ ಘಟನೆಗಳಿಗೂ ಚಾಕು, ಮಚ್ಚು, ಲಾಂಗ್‍ನಿಂದ ಹಲ್ಲೆ ನಡೆಸುವ ಮೂಲಕ ಸಾರ್ವಜನಿಕ ಶಾಂತಿಗೆ ಭಂಗ ತರಲು ಯತ್ನಿಸುವ ಆರೋಪಿಗಳಿಗೆ ಪೆÇಲೀಸ್ ಇಲಾಖೆ ಖಾಕಿ ಖದೀರಿಸುವ ತೋರಿಸಬೇಕಾದ ಕಾಲ ಕೂಡಿ ಬಂದಿದೆ ಎಂದರೇ ತಪ್ಪಾಗಲಾರದು. ಈ ಎರಡು ಪ್ರತ್ಯೇಕ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಹಳೇ ಹುಬ್ಬಳ್ಳಿ ಹಾಗೂ ಅಶೋಕ ನಗರ ಪೆÇಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

Categories
ಹುಬ್ಬಳ್ಳಿ

ಕರೋನಾ ಸಂಕಷ್ಟದಲ್ಲಿ ಜೀವವೋ…ಶಿಕ್ಷಣವೋ…?

  • ಆನ್‍ಲೈನ್ ಶಿಕ್ಷಣ, ಹೋಂ ವರ್ಕ್‍ಗೆ ವಿದ್ಯಾರ್ಥಿಗಳು ಹೈರಾಣ
  • ಹೋಂ ವರ್ಕ್ ತೋರಿಸಲು 35 ಕಿಲೋ ಮೀಟರ್ ಪಯಣ

ಹುಬ್ಬಳ್ಳಿ: ಬೆಕ್ಕಿಗೆ ಚೆಲ್ಲಾಟ…ಇಲಿಗೆ ಪ್ರಾಣ ಸಂಕಟ…ಎಂಬ ಮಾತು ಕರೋನಾದಂತಹ ಸಂಕಷ್ಟ ಕಾಲದಲ್ಲಿ ಪ್ರತಿಯೊಬ್ಬ ಪಾಲಕರು ನೆನಪಿಸಿಕೊಳ್ಳುವಂತೆ ಮಾಡಿದೆ..!
ಹೌದು, ಒಂದೆಡೆ ಪ್ರಾಣ ಹೀರುವ ಕರೋನಾ ರಾಜ್ಯ ಮಾತ್ರವಲ್ಲದೇ ಇಡೀ ದೇಶದಲ್ಲೇ ತನ್ನ ಅಟ್ಟಹಾಸ ಮರೆಯುತ್ತಿದೆ. ಈ ಮಧ್ಯೆ, ಶಾಲೆಗಳ ಆರಂಭಕ್ಕೆ ಸಂಬಂಧಿಸಿದಂತೆ ರಾಜ್ಯ ಸರ್ಕಾರ ಪ್ರತಿನಿತ್ಯವೂ ಪ್ರಕಟಿಸುತ್ತಿರುವ ಮಾರ್ಗಸೂಚಿಗಳು ನಿಜಕ್ಕೂ ಪಾಲಕ ವರ್ಗವನ್ನು ಹೈರಾಣಾಗಿಸಿವೆ ಎಂದರೇ ಅತಿಶೋಕ್ತಿ ಆಗಲಿಕ್ಕಿಲ್ಲ.


35 ಕಿಲೋ ಮೀಟರ್‍ನಿಂದ: ಧಾರವಾಡ ಜಿಲ್ಲೆಯ ಕುಂದಗೋಳ ತಾಲೂಕಿನ ಯರೀಬೂದಿಹಾಳ ಗ್ರಾಮದ 8 ವರ್ಷದ ಬಾಲಕ ಪವನ್, ಶಿಕ್ಷಕಿ ನೀಡಿದ ಹೋಂ ವರ್ಕ್ ತೋರಿಸಲು 35 ಕಿಲೋ ಮೀಟರ್ ಪಯಣವನ್ನು ತನ್ನ ತಾಯಿಯೊಂದಿಗೆ ಕೈಗೊಂಡ ಕಥೆ ಇದು.


ವಿದ್ಯಾರ್ಥಿ ಪವನ್ ತಂದೆ-ತಾಯಿ ಕೂಲಿ-ನಾಲಿ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದಾರೆ. ಮಗನ ವಿದ್ಯಾಭ್ಯಾಸಕ್ಕೆ ಯಾವುದೇ ರೀತಿಯ ತೊಂದರೆಯಾಗಬಾರದೆಂಬ ಉದ್ದೇಶದಿಂದ ಹುಬ್ಬಳ್ಳಿಯ ವಸತಿ ನಿಲಯದಲ್ಲಿಟ್ಟು ವಿದ್ಯಾಭ್ಯಾಸ ನೀಡುತ್ತಿದ್ದರು. ಕರೋನಾ ಹಿನ್ನೆಲೆಯಲ್ಲಿ ಕಳೆದ ತಿಂಗಳು ತನ್ನ ತಾಯಿಯೊಂದಿಗೆ ಶಾಲೆಗೆ ಭೇಟಿ ನೀಡಿದ್ದ ಪವನ್, ಅದೇ ಸಂದರ್ಭದಲ್ಲಿ ಆತನ ಟೀಚರ್ ತಿಂಗಳಿಗಾಗುವಷ್ಟು ಹೋಂ ವರ್ಕ್ ನೀಡಿದ್ದರು.
ಅದೆಲ್ಲವನ್ನೂ ಕಂಪ್ಲೀಟ್ ಮಾಡಿದ್ದ ಪವನ್, ಟೀಚರ್ ಬಳಿ ತೆರಳು ಹಠ ಹಿಡಿದಿದ್ದ. ಆತನ ಮನದಾಸೆ ಪೂರೈಸಲು ವಿದ್ಯಾರ್ಥಿಯ ತಾಯಿ 35 ಕಿಲೋ ಮೀಟರ್ ಪಯಣಿಸಿ ಟೀಚರ್‍ಗೆ ಭೇಟಿ ಮಾಡಿಸಲು ಕರೆತಂದಿದ್ದರು. ವಿದ್ಯಾರ್ಥಿಯ ವಿದ್ಯಾಸಕ್ತಿಗೆ ಟೀಚರ್ ಹೃದಯತುಂಬ ಕೊಂಡಾಡಿದರು.


ಆನ್‍ಲೈನ್ ಕ್ಲಾಸ್ ಸೌಲಭ್ಯವಿಲ್ಲದೇ ಪರದಾಡಿದ ವಿದ್ಯಾರ್ಥಿ ಪವನ್: ವಿದ್ಯಾರ್ಥಿಯಲ್ಲಿನ ಕಲಿಕೆ ಆಸಕ್ತಿ ಕಂಡು ಟೀಚರ್ ವಿದ್ಯಾರ್ಥಿಗೆ ನೋಟ್‍ಬುಕ್, ಪುಸ್ತಕ ಸೇರಿದಂತೆ ಮತ್ತಿತರ ಪರಿಕರಣಗಳನ್ನು ನೀಡಿ ಧೈರ್ಯ ತುಂಬಿ ಕಳುಹಿಸಿದರು.
ವಿದ್ಯಾರ್ಥಿಯಲ್ಲಿನ ಕಲಿಕೆಯ ಉತ್ಸಾಹ ಕಂಡು ಟೀಚರ್ ಮಾಡಿದ್ದ ಕ್ರಮ ನಿಜಕ್ಕೂ ಪ್ರಶಂಸನಾರ್ಹವೇ ಸರಿ. ಆದರೆ, ಕರೋನಾದಂತಹ ಇಂತಹ ಸಂಕಷ್ಟದ ಸಂದರ್ಭದಲ್ಲಿ ಆನ್‍ಲೈನ್ ಕ್ಲಾಸ್ ಅಥವಾ ಮತ್ತಿತರ ರೀತಿಯ ಕಲೆ ಅನಿವಾರ್ಯವೇ ಎಂಬ ಪ್ರಶ್ನೆ ಪಾಲಕರಲ್ಲಿ ಹುಟ್ಟು ಹಾಕಿದೆ. ಕರೋನಾ ಸಂಕಷ್ಟ ಎದುರಾದ ಸಂದರ್ಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ, ಜಾನ್ ಹೈ ತೋಥೋ ಜಹಾನ್ ಹೈ ಎಂದು ಸಾರಿ ಲಾಕ್‍ಡೌನ್ ಮಂತ್ರಕ್ಕೆ ಶರಣಾಗಿದ್ದರು ಎಂಬುದನ್ನು ಇಲ್ಲಿ ಸ್ಮರಿಸಬಹುದು.
ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ಹೋಂ ವರ್ಕ್ ನೀಡುವ ಅವಶ್ಯಕತೆ ಇತ್ತಾ ಎಂಬುದು ಮಾತ್ರ ಯಕ್ಷ ಪ್ರಶ್ನೆಯಾಗಿದೆ. ಇದಕ್ಕೆ ಶಿಕ್ಷಣ ಸಚಿವ ಸುರೇಶ ಕುಮಾರ ಅವರೇ ಉತ್ತರಿಸಬೇಕು.

Categories
ಹುಬ್ಬಳ್ಳಿ

ಹುಬ್ಬಳ್ಳಿಯಲ್ಲಿ ವಾಟಾಳ್ ಹೋರಾಟ!

  • ವಿತ್ತ ಸಚಿವೆ 5 ರೂ. ಹರಾಜು… ಜೋಶಿ ಬಿಕರಿಯಾಗದೇ ಉಳಿದರು..

ಹುಬ್ಬಳ್ಳಿ: ಲೋಕಸಭಾ ಸದಸ್ಯ ಒಂದು ರೂ.ಗೆ ಹರಾಜಾದರೆ, ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಸೇರಿದಂತೆ ರಾಜ್ಯದ ಮತ್ತಿತರ ಲೋಕಸಭಾ ಸದಸ್ಯರು ಬಿಕರಿಯಾಗದೇ ಉಳಿದರು…
ಇದೇನಿದು ತಮಾಸೆ ಎಂದು ಹುಬ್ಬೇರಿಸಬೇಡಿ. ಈ ಹರಾಜು ಪ್ರಕ್ರಿಯೆ ನಡೆದಿದ್ದು ವಾಣಿಜ್ಯನಗರಿ ಹೃದಯ ಭಾಗವಾಗಿರುವ ಕಿತ್ತೂರ ಚೆನ್ನಮ್ಮ ಸರ್ಕಲ್‍ನಲ್ಲಿ. ಹರಾಜು ಪ್ರಕ್ರಿಯೆ ನಡೆಸಿಕೊಟ್ಟವರು ವಾಟಾಳ್ ನಾಗರಾಜ್.
ಹೌದು, ಕರ್ನಾಟಕದಿಂದ ಆಯ್ಕೆಗೊಂಡ ಲೋಕಸಭಾ ಸದಸ್ಯರಿಂದ ರಾಜ್ಯದ ಅಭಿವೃದ್ಧಿ ಆಗುತ್ತಿಲ್ಲ ಎಂದು ಆರೋಪಿ, ಲೋಕಸಭಾ ಸದಸ್ಯರನ್ನು ಹರಾಜು ಹಾಕುವ ಮೂಲಕ ವಾಟಾಳ್ ನಾಗರಾಜ್ ನಡೆಸಿದ ವಿನೂತನ ಪ್ರತಿಭಟನೆಯಿದು.

ಉತ್ತರ ಕರ್ನಾಟಕ ಪ್ರವಾಹ, ಅತಿವೃಷ್ಠಿ, ಅನಾವೃಷ್ಠಿಯಿಂದ ತತ್ತರಿಸಿದೆ. ಉತ್ತರ ಕರ್ನಾಟಕ ಹಾಗೂ ಸಮಸ್ತ ಕರ್ನಾಟಕವನ್ನು ಲೋಕಸಭಾ ಸದಸ್ಯರು ಅಭಿವೃದ್ಧಿಪಡಿಸುತ್ತಿಲ್ಲ ಎಂದು ಆರೋಪಿಸಿದರು. ಕರ್ನಾಟಕದಿಂದ ಆಯ್ಕೆಯಾದ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮರನ್ನು ಒಂದು ರೂಪಾಯಿಗೆ ಹರಾಜು ಪ್ರಕ್ರಿಯೆ ಆರಂಭಿಸಿದ ವಾಟಾಳ್, ಐದು ರೂಪಾಯಿಗೆ ಎನ್.ಎಚ್. ಪಾಟೀಲ್ ಖರೀದಿಸಿದರು. ಒಂದು ರೂಪಾಯಿಗೆ ಕರಡಿ ಸಂಗಣ್ಣರನ್ನು ಬಾಲಕನೊಬ್ಬ ಖರೀದಿಸಿದ. ಹರಾಜಿನಲ್ಲಿ ಬಿಕರಿಯಾಗದ ಧಾರವಾಡದ ಸಂಸದ ಹಾಗೂ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ, ಸದಾನಂದಗೌಡ, ಜಿ.ಎಂ. ಸಿದ್ದೇಶ್ವರ, ಅನಂತಕುಮಾರ ಹೆಗಡೆ, ಬಿ.ವೈ. ರಾಘವೇಂದ್ರ, ತೇಜಸ್ವಿ ಸೂರ್ಯ, ದೇವೇಂದ್ರಪ್ಪ, ಅಣ್ಣಾ ಸಾಹೇಬ್ ಜೊಲ್ಲೆ, ಪ್ರತಾಪ್ ಸಿಂಹ, ತುಮಕೂರ ಸಂಸದ ಬಸವರಾಜು, ಬಿ.ಡಿ. ನಾಯಕ, ಬಿದರ ಸಂಸದ ಭಗವಂತ ಕೂಬಾ, ಡಿ.ಕೆ. ಸುರೇಶ, ಪಿಸಿ ಗದ್ದಿಗೌಡರ, ಸುಮಲತಾ ಅಂಬರೀಶ, ಶಿವಕುಮಾರ ಉದಾಸಿ, ಪ್ರಜ್ವಲ ರೇವಣ್ಣ, ನಳೀನಕುಮಾರ್ ಕಟೀಲ್, ಪಿಸಿ ಮೋಹನ, ಬಿ.ಎನ್. ಬಚ್ಚೇಗೌಡ, ಶ್ರೀನಿವಾಸ ಪ್ರಸಾದ, ಶೋಭಾ ಕರಂದ್ಲಾಜೆ, ರಮೇಶ ಜಿಗಜಣಗಿ, ನಾರಾಯಣ ಸ್ವಾಮಿ ಇವರೆಲ್ಲ ಛಾಯಾಚಿತ್ರವನ್ನು ಹರಾಜು ಹಾಕುವುದರ ಮೂಲಕ ವಿಭಿನ್ನ ರೀತಿಯಲ್ಲಿ ವಾಟಾಳ್ ಪ್ರತಿಭಟನೆ ನಡೆಸಿದ್ದು ಗಮನ ಸೆಳೆಯಿತು. ಕರವೇ ಜಿಲ್ಲಾಧ್ಯಕ್ಷ ಅಮೃತ ಇಜಾರಿ ಸೇರಿದಂತೆ ಮತ್ತಿತರರು ಪಾಲ್ಗೊಂಡಿದ್ದರು.

Categories
ಹುಬ್ಬಳ್ಳಿ

ನಡುಬೀದಿಯಲ್ಲೇ ರೌಡಿ ಶೀಟರ್ ಮರ್ಡರ್!

  • ಬೆಳಗಾವಿತಲ್ಲಿ ಘಟನೆ: ಲಘು ಲಾಠಿ ಪ್ರಹಾರ

ನಮ್ಮೂರ್ ಎಕ್ಸ್‍ಪ್ರೆಸ್ ನ್ಯೂಸ್ ನೆಟ್‍ವರ್ಕ್
ಬೆಳಗಾವಿ: ರಸ್ತೆಯಲ್ಲಿ ಒಂಟಿಯಾಗಿ ನಿಂತಿದ್ದ ರೌಡಿ ಶೀಟರ್‍ಗೆ ಹತ್ತಕ್ಕೂ ಹೆಚ್ಚು ದುಷ್ಕರ್ಮಿಗಳ ತಂಡ ಮಾರಕಾಸ್ತ್ರಗಳಿಂದ ಹಿಗ್ಗಾಮಗ್ಗಾ ಹೊಡೆದು ಕೊಲೆಗೈದ ಘಟನೆ ನಗರದಲ್ಲಿ ಸೋಮವಾರ ಸಂಭವಿಸಿದೆ.


ರೌಡಿಶೀಟರ್ ಶಹಬಾಜ್ ಎಂಬುವನೇ ಹತ್ಯೆಯಾದವ. ರಸ್ತೆಯಲ್ಲಿ ಒಂಟಿಯಾಗಿ ನಿಂತಿದ್ದ ಶಹಬಾಜನ ಮೇಲೆ ಹತ್ತಕ್ಕೂ ಹೆಚ್ಚು ದುಷ್ಕರ್ಮಿಗಳು ಮಾರಕಾಸ್ತ್ರಗಳಿಂದ ಏಕಾಏಕಿ ದಾಳಿ ನಡೆಸಿದ್ದರಿಂದ ಆತ ಕ್ಷಣಾರ್ಧದಲ್ಲಿ ರಕ್ತದ ಮಡವಿನಲ್ಲಿ ಬಿದ್ದುಕೊಂಡಿದ್ದ. ಸುದ್ದಿ ತಿಳಿಯುತ್ತಿದ್ದಂತೆಯೇ ಘಟನಾ ಸ್ಥಳಕ್ಕೆ ಧಾವಿಸಿದ ಪೆÇಲೀಸರು ಮಾರಣಾಂತಿಕ ಗಾಯಗೊಂಡಿದ್ದ ರೌಡಿಶೀಟರ್‍ನನ್ನು ಜಿಲ್ಲಾ ಆಸ್ಪತ್ರೆಗೆ ಸಾಗಿಸುವ ಮಾರ್ಗದಲ್ಲಿ ಸಾವನ್ನಪ್ಪಿದ್ದಾನೆ. ಸುದ್ದಿ ಕಾಡ್ಗಿಚ್ಚಿನಂತೆ ಹರಡುತ್ತಿದ್ದಂತೆಯೇ ನೂರಾರು ಸಂಖ್ಯೆಯಲ್ಲಿ ಯುವಕರ ತಂಡ ಜಿಲ್ಲಾ ಆಸ್ಪತ್ರೆ ಬಳಿ ಜಮಾಯಿಸಿತು. ಯುವಕರನ್ನು ಚದುರಿಸಲು ಪೆÇಲೀಸರು ಲಘು ಲಾಠಿ ಪ್ರಹಾರ ನಡೆಸಿದ ಪ್ರಸಂಗವೂ ನಡೆಯಿತು.


ಕೊಲೆಗೆ ನಿಖರವಾದ ಕಾರಣ ಏನು ಎಂಬುದು ಗೊತ್ತಾಗಿಲ್ಲ. ಹತ್ಯೆಯಾದ ರೌಡಿಶೀಟರ್ ಹಲವರೊಂದಿಗೆ ದ್ವೇಷಕಟ್ಟಿಕೊಂಡಿದ್ದನಲ್ಲದೆ, ಸಣ್ಣಪುಟ್ಟ ಪ್ರಕರಣಗಳು ಭಾಗಿಯಾಗಿ ದುಂಡಾರ್ವತನೆ ಪ್ರದರ್ಶಿಸುತ್ತಿದ್ದ ಎಂದು ಹೇಳಲಾಗಿದೆ.

Categories
ಹುಬ್ಬಳ್ಳಿ

6 ಕೋಟಿ ಮೌಲ್ಯದ ಕಂಪನಿ ಬೆಂಕಿಗೆ ಆಹುತಿ!

  • ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಪತ್ನಿಯ ಕಂಪನಿ
  • ಹುಬ್ಬಳ್ಳಿಯಲ್ಲಿ ನಡೆದ ಘಟನೆ: ಕಾರ್ಮಿಕರು ಪಾರು!

ನಮ್ಮೂರ್ ಎಕ್ಸ್‍ಪ್ರೆಸ್ ನ್ಯೂಸ್ ನೆಟ್‍ವರ್ಕ್
ಹುಬ್ಬಳ್ಳಿ: ಕೇಂದ್ರ ಸಚಿವ ಪ್ರಹ್ಲಾದ ಜೋಶಿಯವರ ಪತ್ನಿ ಸೇರಿದಂತೆ ನಾಲ್ವರು ಪಾಲುದಾರಿಕೆಯ ಹುಬ್ಬಳ್ಳಿಯ ವಿಭವ ಇಂಡಸ್ಟ್ರಿಯಲ್ಲಿ ಬೆಂಕಿ ಅವಘಡ ಸಂಭವಿಸಿದ್ದು ಸುಮಾರು 3 ಕೋಟಿ ರೂ. ಹೆಚ್ಚು ಮೌಲ್ಯದ ನಷ್ಟ ಉಂಟಾಗಿದೆ.
ಹುಬ್ಬಳ್ಳಿ ತಾಲೂಕಿನ ಶೆರೆವಾಡ ಗ್ರಾಮದಲ್ಲಿರುವ ವಿಭವ ಇಂಡಸ್ಟ್ರಿಯಲ್ಲಿ ಬೆಂಕಿ ಅವಘಡ ಸಂಭವಿಸಿದೆ. ಅದೃಷ್ಟವಶಾತ್ ಯಾವುದೇ ರೀತಿಯ ಸಾವು-ನೋವು ಸಂಭವಿಸಿಲ್ಲ.


ಕೇಂದ್ರದ ಸಚಿವರಾಗಿದ್ದ ದಿ.ಅನಂತಕುಮಾರ್ ಅವರ ಸಹೋದರ ನಂದಕುಮಾರ್, ಅಚುತ್ ಲಿಮ್ಹೆ, ಉದಯ ಬಾಡಕ ಸೇರಿದಂತೆ ಕೇಂದ್ರ ಸಚಿವ ಜೋಶಿಯವರ ಪತ್ನಿ ಜ್ಯೋತಿ ಜೋಶಿಯವರು ಈ ಸಂಸ್ಥೆಯ ಪಾಲುದಾರರಾಗಿದ್ದಾರೆ. ಅಂದಾಜು 10 ಸಾವಿರ ಚದರ ಅಡಿಯಲ್ಲಿ ಹಬ್ಬಿರುವ ಈ ಕಾರ್ಖಾನೆಯ ಗೋದಾಮಿನಲ್ಲೇ ಸಂಭವಿಸಿದ್ದ ಬೆಂಕಿ ಅನಾಹುತದಲ್ಲಿ ಕಚ್ಚಾ ವಸ್ತುಗಳಿಗೆ ಮೊದಲು ಬೆಂಕಿ ತಗುಲಿ ಕ್ಷಣಾರ್ಧದಲ್ಲಿ ಬೆಂಕಿಯ ಕೆನ್ನಾಲಿಗೆಗಳು ಬೃಹತ್ ಪ್ರಮಾಣದ ಪಸರಿಸಿಕೊಂಡು ಭಾರಿ ಪ್ರಮಾಣದ ನಷ್ಟವನ್ನುಂಟು ಮಾಡಿದೆ.


ಕಸಬರಗಿ, ಫಿನಾಯಲ್ ಸೇರಿದಂತೆ ಮತ್ತಿತರ ವಸ್ತುಗಳು ಸಂಪೂರ್ಣ ಸುಟ್ಟು ಹೋಗಿವೆ. ಕಾರ್ಖಾನೆಯಲ್ಲಿ ಬೆಂಕಿ ಹತ್ತಿಕೊಂಡ ಸುದ್ದಿ ತಕ್ಷಣವೇ ಗಮನಕ್ಕೆ ಬಾರದೇ ಇರುವ ಹಿನ್ನೆಲೆಯಲ್ಲಿ ಕೆಲವೇ ಹೊತ್ತಿನಲ್ಲಿ ಇಡೀ ಕಾರ್ಖಾನೆಯಲ್ಲಿ ಬೆಂಕಿ ಹಬ್ಬಿಕೊಳ್ಳಲು ಕಾರಣವಾಯಿತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.


ಸುದ್ದಿ ತಿಳಿಯುತ್ತಿದ್ದಂತೆಯೇ ಅಗ್ನಿಶಾಮಕ ಹಾಗೂ ಪೊಲೀಸ್ ಬೆಂಕಿ ನಂದಿಸಲು 10 ಗಂಟೆಗೂ ಹೆಚ್ಚು ಕಾಲ ಹರಸಾಹಸ ಪಡುವಂತಾಯಿತು. ಬೆಂಕಿ ಕೆನ್ನಾಲೆ ಬಹಳ ದೂರದವರೆಗೂ ಹಬ್ಬಿದ್ದರಿಂದ ಕೆಲಕಾಲ ಆತಂಕ ಸೃಷ್ಟಿಯಾಗಿತ್ತು. ಕೇಂದ್ರ ಸಚಿವ ಜೋಶಿ ಭೇಟಿ: ಕಾರ್ಖಾನೆಗೆ ಬೆಂಕಿ ಹತ್ತಿಕೊಂಡ ಸುದ್ದಿ ತಿಳಿದು ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ, ಪೆÇಲೀಸ್ ಹಾಗೂ ಹೆಸ್ಕಾಂನ ಹಿರಿಯ ಅಧಿಕಾರಿಗಳೊಂದಿಗೆ ಮಂಗಳವಾರ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ನಂತರ, ಮಾತನಾಡಿದ ಜೋಶಿ, ಈ ಕಾರ್ಖಾನೆಯಲ್ಲಿ 555 ಮಂಕಿ ಪೆÇರಕೆ ಹಾಗೂ ಫೀನಾಯಿಲ್ ಉತ್ಪಾದನೆ ಮಾಡಲಾಗುತ್ತದೆ. ಘಟನೆಗೆ ಸಂಬಂಧಿಸಿದಂತೆ ಸೂಕ್ತ ತನಿಖೆ ನಡೆಸಿ ವರದಿ ಸಲ್ಲಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿರುವುದಾಗಿ ತಿಳಿಸಿದರು. ಘಟನೆ ಬಗ್ಗೆ ಯಾರನ್ನೂ ದೂಷಿಸುವುದಿಲ್ಲ ಎಂದ ಅವರು, ಇಂತಹ ಅವಘಡಗಳು ಮರುಕಳಿಸದಂತೆ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳುವಂತೆ ಸೂಚಿಸಿದ್ದೇನೆ ಎಂದರು.