ಕಾಫಿ ಧಾರಣೆ ದಿಢೀರ್ ಜಿಗಿತ..!
– ಕಾಫಿ ಬೆಳೆದ ರೈತರ ಮೊಗದಲ್ಲಿ ಸಂತಸ
– ಅರೆಬಿಕಾಕ್ಕೆ 29450 ರೂ., ರೊಬಸ್ಟಾಕ್ಕೆ 19000 ರೂ.
NAMMUR EXPRESS NEWS
ಚಿಕ್ಕಮಗಳೂರು: ಕಳೆದ ಮೂರು ತಿಂಗಳಿಂದ ಕುಸಿಯುತ್ತಿದ್ದ ಕಾಫಿ ಧಾರಣೆಯು ಒಂದು ವಾರದಿಂದ ಏರಿಕೆಯಾಗಿದ್ದು, ಬೆಳೆಗಾರರಲ್ಲಿ ಸಮಾಧಾನ ತರಿಸಿದೆ.
ಅರೆಬಿಕಾಕ್ಕೆ 29450 ರೂ., ರೊಬಸ್ಟಾಕ್ಕೆ 19000 ರೂ. ಬೆಲೆ ಏರಿಕೆಯಾಗಿದೆ. ಬ್ರೆಜಿಲ್ನಲ್ಲಿನ ಹವಾಮಾನ ವೈಪರೀತ್ಯ ಮತ್ತು ರಫ್ತು ನೀತಿಗಳ ಕಾರಣದಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಾಫಿ ಕೊರತೆ ಉಂಟಾಗಿದ್ದು, ಭಾರತದ ಮಾರುಕಟ್ಟೆಯಲ್ಲಿ ಧಾರಣೆ ಏರಿಕೆಗೆ ಕಾರಣವಾಗಿದೆ.
ಮೇ ತಿಂಗಳ ಆರಂಭದಲ್ಲಿ ಅರೆಬಿಕಾ ಪಾರ್ಚ್ಮೆಂಟ್ 50 ಕೆಜಿ ಚೀಲಕ್ಕೆ 27,550 ರೂ. ಧಾರಣೆ ಇದ್ದರೆ, ರೊಬೆಸ್ಟಾಕ್ಕೆ 22,150 ರೂ. ಗರಿಷ್ಠ ಬೆಲೆ ಮಾರುಕಟ್ಟೆಯಲ್ಲಿತ್ತು. ಮೇ 15ರಲ್ಲಿ 26,500ಕ್ಕೆ ಕುಸಿಯಿತು. ಮೇ ಅಂತ್ಯದಲ್ಲಿ 25,500ಕ್ಕೆ ಬಂದು ನಿಂತಿತ್ತು. ಹೀಗೆ ಮೇ ತಿಂಗಳಲ್ಲಿ ಇಳಿಮುಖವಾಗುತ್ತಲೇ ಬಂದ ಕಾಫಿ ಧಾರಣೆ ಜೂನ್ನಲ್ಲಿಯೂ ಕೂಡ 25 ಸಾವಿರದ ಆಸುಪಾಸಿನಲ್ಲೇ ಬೆಲೆ ಗಿರಕಿ ಹೊಡೆಯಿತು
ಜುಲೈ ತಿಂಗಳಲ್ಲಿ ಇದ್ದಕ್ಕಿದ್ದಂತೆ ಬೆಲೆ ತೀವ್ರ ಕುಸಿದು 50 ಕಿಲೋ ಚೀಲಕ್ಕೆ 27 ಸಾವಿರ ರೂ. ಇದ್ದ ಬೆಲೆ 23,900ಕ್ಕೆ ಇಳಿಯಿತು. ಮತ್ತೆ ಆಗಸ್ಟ್ನಿಂದ ಚೇತರಿಕೆ ಕಂಡುಬಂದಿದ್ದು ಮೊದಲ ವಾರದಲ್ಲಿ 24 ಸಾವಿರ ರೂ. ಇದ್ದ ಅರೆಬಿಕಾ ಪಾರ್ಚ್ಮೆಂಟ್ ಧಾರಣೆ ಆ.3 ರಲ್ಲಿ 29700ಕ್ಕೆ ಜಿಗಿತವಾಗಿದೆ
ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅರೆಬಿಕಾ ಕಾಫಿ ಧಾರಣೆ ಶೇ.10ರಷ್ಟು ಏರಿಕೆ ಕಂಡುಬಂದಿದೆ. ರೊಬಸ್ಟಾ ಬೆಲೆ ಶೇ.18ರಷ್ಟು ಹೆಚ್ಚಾಗಿದೆ. ಇದರಿಂದ ದೇಶಿ ಮಾರುಕಟ್ಟೆಯಲ್ಲಿ ರೊಬಸ್ಟಾ ಕಾಫಿ ಕಿಲೋ 455, ಅರೆಬಿಕಾ 545 ರೂ.ನಂತೆ ಮಾರಾಟವಾಗುತ್ತಿದೆ.
ದಿಢೀರ್ ಏರಿಕೆ ಏಕೆ?
ಕಾಫಿ ಧಾರಣೆ ಏರಿಕೆಯಾಗಲು ಕೆಲವು ಕಾರಣಗಳಿವೆ ಎನ್ನಲಾಗಿದೆ. ಬ್ರೆಜಿಲ್ನಲ್ಲಿ ವಿಪರೀತ ಶೀತ ವಾತಾವರಣ, ಮಂಜು ಬೀಳುತ್ತಿರುವುದರಿಂದ ಕಾಫಿ ಬೆಳೆ ನಷ್ಟಕ್ಕೀಡಾಗುತ್ತಿದೆ. ಒಂದು ಅಂಕಿ ಅಂಶದ ಪ್ರಕಾರ ಬ್ರೆಜಿಲ್ನಲ್ಲಿ ಶೇ.20ಕ್ಕೂ ಕಡಿಮೆ ಪ್ರಮಾಣದಲ್ಲಿ ಕಾಫಿ ರಫ್ತು ಮಾಡಲಾಗಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಉಂಟಾದ ಕಾಫಿ ಕೊರತೆ ಕೂಡ ಈಗಿನ ಕಾಫಿ ಧಾರಣೆ ದಿಢೀರ್ ಏರಿಕೆಯಾಗಲು ಕಾರಣ ಎನ್ನಲಾಗುತ್ತಿದೆ.
ಇನ್ನೊಂದಡೆ ಬ್ರೆಜಿಲ್ನಿಂದ ಅಮೆರಿಕಕ್ಕೆ ರಫ್ತಾಗುವ ಕಾಫಿ ಮೇಲೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶೇ.50ರಷ್ಟು ಸುಂಕ ವಿಧಿಸಿದ್ದು ಇದರಿಂದಾಗಿ ರಫ್ತು ಮಾರುಕಟ್ಟೆಯಲ್ಲಿ ಸುಂಕದ ಬಗೆಗಿನ ಗೊಂದಲ ಕಾಫಿ ರಫ್ತು ಮತ್ತು ಬೆಲೆ ಮೇಲೆ ಗಮನಾರ್ಹ ಪರಿಣಾಮ ಬೀರಿದೆ ಎನ್ನಲಾಗುತ್ತಿದೆ.
ಲಂಡನ್ ಮತ್ತು ನ್ಯೂಯಾರ್ಕ್ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಾಫಿಗೆ ಉತ್ತಮ ಧಾರಣೆಯಿದ್ದು ಇಲ್ಲಿನ ಟ್ರೇಡರ್ಸ್ ಮತ್ತು ರಫ್ತುದಾರರು ಬೆಳೆಗಾರರಿಗೆ ಉತ್ತಮ ಧಾರಣೆ ನೀಡುತ್ತಿಲ್ಲ. ಕಾಫಿಯ ರಫ್ತು ಆರ್ಡರ್ಗಳು ಈಗ ಇಲ್ಲ, ನಾವು ಇಷ್ಟಕ್ಕೆ ಖರೀದಿ ಮಾಡುವುದು ಎಂದು ಹೇಳುತ್ತಿದ್ದಾರೆ. ಹೀಗಾಗಿ ಈ ಬಗ್ಗೆ ಕೊಡಗು ಮತ್ತು ಚಿಕ್ಕಮಗಳೂರಿನಲ್ಲಿ ಬೆಳೆಗಾರರ ಸಭೆ ಕರೆದು ಈ ಬಗ್ಗೆ ಚರ್ಚಿಸಿ ಪರಿಹಾರ ಕಂಡುಕೊಳ್ಳಲಾಗುವುದು ಎಂದಿದ್ದಾರೆ ಬಾಲಕೃಷ್ಣ, ಮೂಡಿಗೆರೆ ತಾಲೂಕು ಕಾಫಿ ಬೆಳೆಗಾರರ ಸಂಘದ ಅಧ್ಯಕ್ಷ.