ಮನೆಮನೆಗೆ ಪೊಲೀಸ್ ವಿನೂತನ ಕಾರ್ಯಕ್ರಮ
* ಅಪರಾಧ ತಡೆಗೆ ಸಾಥ್ ನೀಡಿ – ಪಿಎಸ್ಐ ಅಭಿಷೇಕ್.ಕೆ
* ಜನಸಾಮಾನ್ಯರಿಗೆ ಪೊಲೀಸ್ ಇಲಾಖೆ ಕುರಿತು ಆತಂಕ ಇರಬಾರದು
ಶೃಂಗೇರಿ: ರಾಜ್ಯ ಗೃಹ ಇಲಾಖೆಯಿಂದ ರಾಜ್ಯಾದ್ಯಂತ ನಡೆಯುತ್ತಿರುವ ಮನೆಮನೆಗೆ ಪೊಲೀಸ್ ವಿನೂತನ ಕಾರ್ಯಕ್ರಮಕ್ಕೆ ಶೃಂಗೇರಿ ತಾಲೂಕಿನಲ್ಲಿ ಶೃಂಗೇರಿ ಪೊಲೀಸ್ ಠಾಣೆ ಪಿಎಸ್ಐ ಅಭಿಷೇಕ್ ಕೆ ಯವರು ಚಾಲನೆ ನೀಡಿದರು.
ತಾಲೂಕಿನ ಕುಂಚೇಬೈಲಿನ ಭರತ್ ಗಿಣಕಲ್ ರವರ ಮನೆಗೆ ಭೇಟಿ ನೀಡುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಅವರು ಜನಸಾಮಾನ್ಯರಿಗೆ ಪೊಲೀಸ್ ಇಲಾಖೆಯ ಕುರಿತು ಆತಂಕ ಇರಬಾರದು,ಜನರಿಗೆ ಅತ್ಯುತ್ತಮ ಸೇವೆ ಒದಗಿಸುವುದು ಇಲಾಖೆಯ ಗುರಿ ಎಂದರು. ಶಾಂತಿ,ಅಪರಾಧ ತಡೆ,ಭದ್ರತೆ ಕಾಪಾಡೋ ನಿಟ್ಟಿನಲ್ಲಿ ಪೊಲೀಸ್ ಇಲಾಖೆಯಿಂದ ಈ ವಿನೂತನ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದ್ದು,ಈ ಯೋಜನೆಯಡಿ ಜನರು ಇಲಾಖೆಯೊಂದಿಗೆ ನಿರಂತರ ಸಂಪರ್ಕ ಇಟ್ಟುಕೊಳ್ಳಬೇಕು, ತುರ್ತು ಸಂದರ್ಭದಲ್ಲಿ 112 ಸಂಖ್ಯೆಗೆ ಕರೆ ಮಾಡಿ ಮಾಹಿತಿ ತಿಳಿಸುವಂತೆ ಹಾಗೂ ಅಪರಾಧ ತಡೆಗೆ ಸಾಥ್ ನೀಡುವಂತೆ ಮನವಿ ಮಾಡಿದರು.
ಈ ಸಂದರ್ಭದಲ್ಲಿ ಕ್ರೈಂ ಪಿಎಸ್ಐ ನಾಗರಾಜ್ ಹೆಚ್.ಆರ್,ಬೀಟ್ ಉಸ್ತುವಾರಿ ಎಎಸ್ಐ ಮೋಹನ್ ಕುಮಾರ್ ಸಿ.ಆರ್,ಸಿಬ್ಬಂದಿಗಳಾದ ಪ್ರವೀಣ್,ಗೋಪಾಲ್ ರೆಡ್ಡಿ ಹಾಜರಿದ್ದರು.
