ಏಡಿ ಹಿಡಿಯೋದೆ ರೋಚಕ ಸ್ಟೋರಿ!
– ಏಡಿ ಹಿಡಿಯುವುದರಲ್ಲಿ ಮಲೆನಾಡ ಮಂದಿ ಎತ್ತಿದ ಕೈ
– ಮಳೆಗಾಲ ಬಂತಂದ್ರೆ ಗದ್ದೆ-ತೋಟದಲ್ಲಿ ಏಡಿ ಬೇಟೆ!
NAMMUR EXPRESS NEWS
ಮೊದಲೇ ಮಲೆನಾಡು ಚಂದ. ಮಳೆಗಾಲದಲ್ಲಿ ಇನ್ನೂ ಅಂದ. ಸುತ್ತಲ ಹಚ್ಚ ಹಸಿರು, ದಟ್ಟವಾಗಿರುವ ಕಾಡು. ಮುಂಗಾರು ಮಳೆ. ಗದ್ದೆ, ತೋಟದ ಕೆಲಸ. ಒಂದಷ್ಟು ಶಿಕಾರಿ… ಅದರಲ್ಲೂ ಮಳೆಗಾಲದಲ್ಲಿ ಮಲೆನಾಡು ಜನರು ಏಡಿ, ಅಣಬೆ, ಕಳಲೆಗಾಗಿ ಹುಡುಕಾಟ ಶುರು ಮಾಡುತ್ತಾರೆ. ಈ ಆಹಾರ ಇಲ್ಲಿಯ ಜನರ ಫೆವರೇಟ್. ವರ್ಷಕ್ಕೊಮ್ಮೆಸಿಗುವ ಇವುಗಳನ್ನು ಹುಡುಕಿ ತಂದು ಸಾರು, ಪಲ್ಯ ಮಾಡಿ ಸವಿಯುವ ಸೊಗಸು ಒಂಥರ ಹಬ್ಬದ ಸಂಭ್ರಮ. ಅಣಬೆ, ಕಳಲೆಯನ್ನು ಹುಡುಕಿದ ನಂತರ ಅದನ್ನು ಕಿತ್ತು ತರುವುದು ಸುಲಭ. ಆದರೆ ಏಡಿ ಮಾತ್ರ ಕಿಲಾಡಿ. ಅವುಗಳನ್ನು ಹಿಡಿಯೋಕೆ ಹರಸಾಹಸ ಪಡಬೇಕು, ಆದ್ರೆ ನಮ್ಮ ಮಲೆನಾಡ ಮಂದಿ ಏಡಿ ಹಿಡಿಯೋದ್ರಲ್ಲಿ ಎತ್ತಿದ ಕೈ. ಎಲ್ಲರಿಗೂ ಹಿಡಿಯಲು ಆಗದಿದ್ದರೂ ಕೆಲವರು ಇದರಲ್ಲಿ ಪರಿಣತಿ ಹೊಂದಿರುತ್ತಾರೆ.
ಮಲೆನಾಡ ಪ್ರತಿಯೊಂದು ತೋಟಗಳಲ್ಲಿ ತೋಡು, ಗದ್ದೆ ಅಂಚಲ್ಲಿ, ಹಳ್ಳದಲ್ಲಿ, ನದಿ ಬದಿ ಕಾರೇಡಿ ಮತ್ತು ಇತರೆ ಏಡಿ ಇರುತ್ತವೆ. ಇನ್ನು ಗದ್ದೆಗಳಲ್ಲಿ ಈಗ ಬೆಳ್ಳೇಡಿ ಕಾಣೆ ಆಗಿವೆ. ಆದ್ರೂ ಈ ಬಾರಿ ಏಡಿ ಹೆಚ್ಚು ಸಿಕ್ಕಿವೆ. ಈಗಲೂ ಹಿಡಿಯುತ್ತಿದ್ದಾರೆ..!
ಏಡಿ ಹಿಡಿಯೋ ಐಡಿಯಾ ಸೂಪರ್!
ಮೊದಲು ಒಂದು ಹಗ್ಗದಲ್ಲಿ ಕೋಳಿ ಪಚ್ಚಿ ಸುತ್ತಿ ಸುತ್ತಿ ಕಟ್ಟಿಕೊಳ್ಳಬೇಕು. ನಂತರ ಒಂದು ಉದ್ದನೆಯ ಹಗ್ಗದಲ್ಲಿ ಕಲ್ಲನ್ನು ಕಟ್ಟಿಕೊಳ್ಳಬೇಕು. ನಂತರ ಕೋಳಿ ಪಚ್ಚಿ ಕಟ್ಟಿದ ಹಗ್ಗವನ್ನು ಕಲ್ಲು ಕಟ್ಟಿದ ಹಗ್ಗದ ಭಾಗದಲ್ಲಿ ಕಟ್ಟಬೇಕು. ಈಗ ಕಲ್ಲು-ಪಚ್ಚಿ ಒಂದೇ ಕಡೆ ಆಗುತ್ತದೆ. ನಂತರ ಈ ಉದ್ದನೆಯ ಕಲ್ಲು-ಪಚ್ಚಿ ಕಟ್ಟಿದ ಹಗ್ಗವನ್ನು ತೋಡಿನೊಳಗೆ ಬಿಡಬೇಕು. ತೋಡಿನೊಳಗೆ ಇರುವ ಕಲ್ಲುಗಳ ಅಡಿ ಅಥವಾ ತೋಡಿನ ಬದಿಯಲ್ಲಿನ ಸಂದುಗಳಲ್ಲಿ ಏಡಿ ಇರುತ್ತವೆ. ಇವು ಕೋಳಿ ಪಚ್ಚಿ ವಾಸನೆ ಹಿಡಿದು ಅದರ ಬಳಿ ಬರುತ್ತವೆ. ಹಗ್ಗವನ್ನು ಹಿಡಿದು ನಿಲ್ಲುವ ಬದಲು ಪಕ್ಕದಲ್ಲಿರುವ ಮರಗಳಿಗೆ ಕಟ್ಟಬಹುದು ಅಥವಾ ನಾವೇ ಒಂದು ಕಂಬ ಹುಗಿದು ಕಟ್ಟಬಹುದು.
ಹೀಗೆ ಸಿಕ್ಕ ಏಡಿಗಳನ್ನು ಮೇಲಕ್ಕೆತ್ತಿ ಒಂದು ದೊಡ್ಡ ಬಕೆಟ್ ಒಳಗೆ ಇಳಿಸಬೇಕು. ಮತ್ತೆ ಹಗ್ಗವನ್ನು ಬಿಡುತ್ತಾ ಹೀಗೆ ಐದೈದು ನಿಮಿಷ ಬಿಟ್ಟು ಹಗ್ಗ ಮೇಲಕ್ಕೆತ್ತುತ್ತಾ ಸಿಕ್ಕ ಏಡಿಗಳನ್ನು ಬಕೆಟ್ ಒಳಗೆ ಇಳಿ ಬಿಡುತ್ತಾ ಇರಬೇಕು. ಏಡಿಯನ್ನು ಕೈಯಲ್ಲಿ ಹೇಗೇಗೋ ಹಿಡಿಯಲು ಆಗುವುದಿಲ್ಲ. ಅದರ ಮುಂಭಾಗದ ಕೊಂಬುಗಳನ್ನು ಎರಡೂ ಕೈಯಲ್ಲಿ ಹಿಡಿಯಬೇಕು. ಅದನ್ನ ಸಾಯಿಸುವುದೂ ಕೂಡ ಈ ಕೊಂಬುಗಳನ್ನ ಮುರಿದೇ. ಕೊಂಬುಗಳನ್ನ ಮುರಿದರೂ ಏಡಿಯ ಉಳಿದ ಭಾಗದಲ್ಲಿ ಜೀವ ಇರುತ್ತದೆ. ಆದರೆ ಕೊಂಬು ಮುರಿದ ಕೆಲ ಸಮಯದಲ್ಲಿ ಅವು ಸಾಯುತ್ತವೆ.
ಅಡಗಿ ಕುಳಿತಿರುವ ಏಡಿಗಳು!
ತೋಟ-ಗದ್ದೆ-ಕೆರೆ ಮಾತ್ರ ಅಲ್ಲದೆ ಕೆರೆ ತುಂಬಿ ನೀರು ಹರಿದು ಹೋಗುವ ಇತರ ಜಾಗದಲ್ಲಿ ಕಲ್ಲು- ಬಂಡೆಗಳಿದ್ದರೆ ಅವುಗಳ ಅಡಿಯಲ್ಲಿಯೂ ಏಡಿಗಳು ಅಡಗಿ ಕುಳಿತಿರುತ್ತವೆ. ಅವುಗಳನ್ನ ಹಿಡಿಯುವ ವೇಳೆ ಕಲ್ಲು-ಬಂಡೆಗಳನ್ನು ಸರಿಸಿ ಕೊಂಬುಗಳನ್ನು ಎರಡೂ ಕೈಯಲ್ಲಿ ಹಿಡಿಯಬೇಕು. ತುಂಬಾ ದೊಡ್ಡ ಏಡಿ ಸಿಕ್ಕು ಅದರೊಳಗೆ ಹೆಚ್ಚು ಮಾಂಸವಿಲ್ಲವೆಂದರೆ ಅದು ಹಳೆಯ ಏಡಿ ಎಂದರ್ಥ, ಅಂದರೆ ಒಂದು ವರ್ಷದ ಹಿಂದಿನ ಏಡಿ ಅದಾಗಿರುತ್ತದೆ ಎಂದು ಬಲ್ಲವರು ಹೇಳುತ್ತಾರೆ.
ಕೊಂಬು ಮುರಿದು ಏಡಿ ಸತ್ತ ಮೇಲೆ ರುಚಿ ರುಚಿಯಾಗಿ ಏಡಿ ಸಾರು ಅಥವಾ ಸುಕ್ಕ ಮಾಡಿ ಸವಿಯುತ್ತಾರೆ. ಇದರ ರುಚಿ ಮತ್ತು ಇದನ್ನು ಸವಿಯುವ ಆನಂದವೇ ಮಲೆನಾಡು ಮಂದಿಗೆ ಸ್ವರ್ಗ.
ಹೊರ ಊರಲ್ಲಿರುವವರಿಗೆ ಏಡಿ ಇಷ್ಟ!
ಮಲೆನಾಡಿನಿಂದ ಹೊರಗೆ ಇರುವವರಿಗೆ ಏಡಿ ಸಿಕ್ಕರೆ ಸ್ವರ್ಗ. ಇಲ್ಲಿ ಹಿಡಿದು ಅಪ್ಪ ಅಮ್ಮ ತಮ್ಮ ಮಕ್ಕಳಿಗೆ ಪಾರ್ಸಲ್ ಕಳುಹಿಸುತ್ತಾರೆ. ಒಟ್ಟಿನಲ್ಲಿ ಏಡಿ ಖಾಧ್ಯ ಸೂಪರ್.
ಇದನ್ನೂ ಓದಿ : ತೀರ್ಥಹಳ್ಳಿಯಲ್ಲಿ ಗಾಂಜಾ ಹೊಡೆದವರು ಅರೆಸ್ಟ್!?
[embedyt] https://www.youtube.com/watch?v=6xcRyzTIs_U%5B/embedyt%5D
