Categories
ತೀರ್ಥಹಳ್ಳಿ ಪ್ರತಿಭೆಗಳು ಮಲ್ನಾಡ್ ಶಿಕ್ಷಣ ಶಿವಮೊಗ್ಗ

ದ್ವಿತೀಯ ಪಿಯುಸಿ ಫಲಿತಾಂಶದಲ್ಲಿ ವಾಗ್ದೇವಿ ವಿದ್ಯಾರ್ಥಿಗಳ ಸಾಧನೆ

ದ್ವಿತೀಯ ಪಿಯುಸಿ ಫಲಿತಾಂಶದಲ್ಲಿ ವಾಗ್ದೇವಿ ವಿದ್ಯಾರ್ಥಿಗಳ ಸಾಧನೆ
– ಮರು ಮೌಲ್ಯ ಮಾಪನದಲ್ಲಿ ಮತ್ತಿಬ್ಬರಿಗೆ ರಾಜ್ಯ ಮಟ್ಟದಲ್ಲಿ ರ‍್ಯಾಂಕ್‌
– ಸಂಜಯ್ ಎಸ್, ಸಮನ್ವಿತ ಎಸ್ ರಾವ್ ಅವರಿಗೆ ರ‍್ಯಾಂಕ್‌

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ತೀರ್ಥಹಳ್ಳಿ: ಇತ್ತೀಚಿಗೆ ಪ್ರಕಟಗೊಂಡ ದ್ವಿತೀಯ ಪಿಯುಸಿ ಫಲಿತಾಂಶದಲ್ಲಿ ತೀರ್ಥಹಳ್ಳಿಯ ವಾಗ್ದೇವಿ ಶಿಕ್ಷಣ ಸಂಸ್ಥೆಯ ಇಬ್ಬರು ವಿದ್ಯಾರ್ಥಿಗಳು ಮರು ಮೌಲ್ಯಮಾಪನದಲ್ಲಿ ಉತ್ತಮ ಅಂಕಗಳನ್ನು ಪಡೆದುಕೊಳ್ಳುವುದರ ಮೂಲಕ ರಾಜ್ಯ ಮಟ್ಟದಲ್ಲಿ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. 2025-26ನೇ ಸಾಲಿನ ದ್ವಿತೀಯ ಪಿಯುಸಿ ಮರು ಮೌಲ್ಯ ಮಾಪನದಲ್ಲಿ ವಾಗ್ದೇವಿ ಶಿಕ್ಷಣ ಸಂಸ್ಥೆಯ ವಾಣಿಜ್ಯ ವಿಭಾಗದ ವಿದ್ಯಾರ್ಥಿಯಾದ ಸಂಜಯ್ ಎಸ್ ಅವರು 600ಕ್ಕೆ 592 ಅಂಕಗಳನ್ನು ಪಡೆದುಕೊಳ್ಳುವುದರ ಮೂಲಕ ರಾಜ್ಯ ಮಟ್ಟದಲ್ಲಿ ಎಂಟನೇ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ಸಂಜಯ್ ಅವರು ಸೊಪ್ಪುಗುಡ್ಡೆಯ ಶ್ರೀಮತಿ ಶೋಭಾ ಮತ್ತು ಶ್ರೀಸತೀಶ್ ಇವರ ಪುತ್ರರಾಗಿದ್ದು ಶಿಕ್ಷಣದಲ್ಲಿ ಸಾಧನೆ ಮಾಡುವ ಮೂಲಕ ತಾಲ್ಲೂಕಿಗೆ ಹಾಗೂ ವ್ಯಾಸಂಗ ಮಾಡಿರುವ ಕಾಲೇಜಿಗೆ ಕೀರ್ತಿಯನ್ನು ತಂದಿದ್ದಾರೆ.

ಹಾಗೆಯೇ 2025-26 ನೇ ಸಾಲಿನ ದ್ವಿತೀಯ ಪಿಯುಸಿ ಪರೀಕ್ಷೆಯ ಮರು ಮೌಲ್ಯಮಾಪನದಲ್ಲಿ ವಾಗ್ದೇವಿ ಶಿಕ್ಷಣ ಸಂಸ್ಥೆಯ ಮತ್ತೋರ್ವ ವಿಜ್ಞಾನ ವಿಭಾಗದ ವಿದ್ಯಾರ್ಥಿನಿಯಾದ ಸಮನ್ವಿತ ಎಸ್ ರಾವ್ ಅವರು 600ಕ್ಕೆ 593 ಅಂಕಗಳನ್ನು ಗಳಿಸುವುದರ ಮೂಲಕ ರಾಜ್ಯ ಮಟ್ಟದಲ್ಲಿ ಏಳನೇ ಸ್ಥಾನ, ಜಿಲ್ಲಾ ಮಟ್ಟದಲ್ಲಿ ಮೂರನೇ ಸ್ಥಾನ ಮತ್ತು ತಾಲ್ಲೂಕು ಮಟ್ಟದಲ್ಲಿ ಪ್ರಥಮ ಸ್ಥಾನವನ್ನು ಪಡೆದುಕೊಳ್ಳುವುದರ ಮೂಲಕ ಶಿಕ್ಷಣ ಸಂಸ್ಥೆಗೆ ಮತ್ತು ಪೋಷಕರಿಗೆ ಕೀರ್ತಿಯನ್ನು ತಂದಿದ್ದಾರೆ. ಸಮನ್ವಿತ ಎಸ್ ರಾವ್ ಅವರು ಹಾದಿಗಲ್ಲಿನ ಶ್ರೀಮತಿ ರಮ್ಯಾ ಮತ್ತು ಶ್ರೀಸುಧೀರ್ ದಂಪತಿಗಳ ಪುತ್ರಿಯಾಗಿದ್ದಾರೆ. ವಿದ್ಯಾರ್ಥಿಗಳ ಈ ಶೈಕ್ಷಣಿಕ ಸಾಧನೆಗೆ ವಾಗ್ದೇವಿ ಸಮೂಹ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷರು, ಸದಸ್ಯರು, ಉಪನ್ಯಾಸಕ ವೃಂದ ಮತ್ತು ಪೋಷಕರು ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ.

Categories
inspiration ತೀರ್ಥಹಳ್ಳಿ ಪ್ರತಿಭೆಗಳು ಮಲ್ನಾಡ್ ರಾಜ್ಯ

ಅತೀ ಕಿರಿಯ ವಯಸ್ಸಲ್ಲಿ ರೋಲ್ಸ್ ರಾಯ್ಸ್ ಕಂಪನಿ ಉದ್ಯೋಗಿ ಮಂಗಳೂರು ಹುಡುಗಿ ರಿತುಪರ್ಣ

ಅತೀ ಕಿರಿಯ ವಯಸ್ಸಲ್ಲಿ ರೋಲ್ಸ್ ರಾಯ್ಸ್ ಕಂಪನಿ ಉದ್ಯೋಗಿ ಮಂಗಳೂರು ಹುಡುಗಿ ರಿತುಪರ್ಣ

– ಓದುತ್ತಲೇ ಕೆಲಸ ಮಾಡಿ ಅಮೇರಿಕಾದಲ್ಲಿ ಕೆಲಸ ಗಿಟ್ಟಿಸಿದಳು

ವಿದ್ಯಾರ್ಥಿನಿಯಾಗಿದ್ದಾಗಲೇ ಪ್ರತಿಷ್ಠಿತ ಕಂಪನಿಯೊಂದರಲ್ಲಿ, ಲಕ್ಷಾಂತರ ರೂಪಾಯಿ ವೇತನವನ್ನು ಪಡೆಯುವ ಉದ್ಯೋಗವನ್ನು ಗಿಟ್ಟಿಸಿಕೊಳ್ಳುವ ಮೂಲಕ, ಈ ಉದ್ಯೋಗವನ್ನು ಪಡೆದ ಅತ್ಯಂತ ಕಿರಿಯ ಅಭ್ಯರ್ಥಿ ಮತ್ತು ಮೊದಲ ಕನ್ನಡತಿ ಎಂಬ ಹೆಗ್ಗಳಿಕೆಗೆ ಮಂಗಳೂರಿನ ಸಹ್ಯಾದ್ರಿ ಇನ್ಸ್ಟಿಟ್ಯೂಟ್ ಆಫ್ ಇಂಜಿನಿಯರಿಂಗ್ ಕಾಲೇಜಿನ ರಿತುಪರ್ಣ ಪಾತ್ರರಾಗಿದ್ದಾರೆ. ಆಂಗ್ಲ ಮಾಧ್ಯಮದಲ್ಲಿ ಕಲಿತು, ವಿದೇಶಿ ಕಂಪನಿಯಲ್ಲಿ ಉದ್ಯೋಗವನ್ನು ಪಡೆದಿದ್ದರೂ, ಮಂಗಳೂರು ಶೈಲಿಯ ಶುದ್ಧ ಕನ್ನಡದಲ್ಲಿ ಆಡುವ ಮಾತುಗಳನ್ನು ಕೇಳುತ್ತಿದ್ದರೆ ಕನ್ನಡಿಗರಿಗೆ ಮತ್ತೊಂದು ರೀತಿಯ ಹೆಮ್ಮೆಯನ್ನು ಮೂಡಿಸುತ್ತಿದೆ.

ರಿತುಪರ್ಣ ಅವರು ಮಂಗಳೂರಿನ ವಾಸಿಯಾಗಿದ್ದು, ಮೂಲತಃ ಶಿವಮೊಗ್ಗ ಜಿಲ್ಲೆಯ ತೀರ್ಥಹಳ್ಳಿ ತಾಲೂಕಿನ ಕೋದೂರಿನವರು. ತಮ್ಮ ಇಪ್ಪತ್ತನೇ ವಯಸ್ಸಿನಲ್ಲಿ ಪ್ರಸಿದ್ಧ ಕಾರ್ ಕಂಪನಿಯಾದ ರೋಲ್ಸ್ ರಾಯ್ಸ್ ನಲ್ಲಿ ಹುದ್ದೆಯನ್ನು ಪಡೆದುಕೊಂಡಿದ್ದಾರೆ. ಮಂಗಳೂರಿನ ಸಹ್ಯಾದ್ರಿ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಆಟೋಮೊಬೈಲ್ ವಿಭಾಗದಲ್ಲಿ ವ್ಯಾಸಂಗ ಮಾಡುತ್ತಿರುವ ಇವರು, ವ್ಯಾಸಂಗಕ್ಕೆ ಸಂಬಂಧಿಸಿದಂತೆ ಪ್ರಥಮ ವರ್ಷದಿಂದಲೂ ಕಠಿಣ ಪರಿಶ್ರಮವನ್ನು ಹಾಕುತ್ತಲೇ ಬಂದಿದ್ದಾರೆ. ಕಲಿಯುವ ಪ್ರತಿಯೊಂದು ವಿಷಯವನ್ನು, ತಮ್ಮದೇ ಆಗ ಕೌಶಲ್ಯದ ಮೂಲಕ ಪ್ರಾಯೋಗಿಕವಾಗಿ ಅಭ್ಯಾಸ ನಡೆಸುತ್ತಿದ್ದರು. ಇನ್ನು ಪ್ರಾಜೆಕ್ಟ್ ವರ್ಕ್ ಗಳಲ್ಲಿ ತಮ್ಮದೇ ಆದ ಛಾಪನ್ನು ಮೂಡಿಸುತ್ತಿದ್ದರು. ಇದೇ ಅವರ ಯಶಸ್ಸಿನ ಗುಟ್ಟು.

ಕಾರುಗಳ ಬಗ್ಗೆ ವಿಶೇಷ ಆಸಕ್ತಿಯುಳ್ಳ ರಿತುಪರ್ಣ ಅವರು, ಸದಾ ಅವುಗಳ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಮಾಹಿತಿಗಳನ್ನು ಸಂಗ್ರಹಿಸುವುದು, ಅವುಗಳನ್ನು ತಯಾರಿಸಿರುವ ಬಗೆಯ ಕುರಿತು ಕುತೂಹಲದಿಂದ ನೋಡುವುದು ನಿರಂತರವಾಗಿತ್ತು. ಮರ್ಸಿಡೀಸ್ ಕಾರ್ ಬಗ್ಗೆ ತಿಳಿದುಕೊಂಡಿದ್ದು, ಆ ಕಂಪನಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕೆಲವರ ಪರಿಚಯ ಕೂಡ ಇತ್ತು. ಆದರೆ ರೋಲ್ಸ್ ರಾಯ್ಸ್ ಇವರಿಗೆ ಹೊಸದು. ಹೀಗೆ ಒಮ್ಮೆ ಈ ಕಾರ್ ಗಳ ಕುರಿತು ಅದರ ಕಂಪನಿಯ ವೆಬ್ ಸೈಟ್ ನಲ್ಲಿ ನೋಡುತ್ತಿರುವಾಗ, ಕಂಪನಿಯಲ್ಲಿ ತರಬೇತಿ ಪಡೆಯಲು ಅರ್ಜಿಯನ್ನು ಪ್ರಕಟಿಸಿದ್ದರು. ಆಗ ರಿತುಪರ್ಣ ಅವರು ಒಮ್ಮೆ ಪ್ರಯತ್ನಿಸಿ ನೋಡೋಣ, ತರಬೇತಿ ಪಡೆದುಕೊಂಡರೆ, ಸಿಗುವ ಪ್ರಮಾಣ ಪತ್ರದ ಆಧಾರದ ಮೇಲೆ ಬೇರೆಡೆ ಉತ್ತಮ ಉದ್ಯೋಗವನ್ನು ಪಡೆದುಕೊಳ್ಳಬಹುದು ಎಂದು ಯೋಚಿಸಿದರು. ಅರ್ಜಿ ಸಲ್ಲಿಸಿದ ಬಳಿಕ ಅವಕಾಶ ದೊರೆಯಿತು. ರೋಲ್ಸ್ ರಾಯ್ಸ್ ಕಂಪನಿಯವರು ತರಬೇತಿಯ ಸಮಯದಲ್ಲಿ ಅನೇಕ ಟಾಸ್ಕ್ ಗಳನ್ನು ನೀಡಿದರು. ಇನ್ನು ವಿದ್ಯಾರ್ಥಿನಿಯಾಗಿದ್ದ ರಿತುಪರ್ಣ ಅವರಿಗೆ ಇದು ಕೊಂಚ ಕಷ್ಟವಾಯಿತು. ಆದರೂ ಎದೆಗುಂದಲಿಲ್ಲ.‌

ಅನುಭವಸ್ಥರ ಸಲಹೆ, ಹಲವಾರು ಪುಸ್ತಕಗಳ ಪರಾಮರ್ಶನದಿಂದ ಮಾಹಿತಿಗಳನ್ನು ಸಂಗ್ರಹಿಸಿ, ಟಾಸ್ಕ್ ಗಳನ್ನು ಸಮಯದ ಮಿತಿಯೊಳಗೆ ಬೇಗನೆ ಮುಗಿಸಿ ಬಿಡುತ್ತಿದ್ದರು. ಕೇವಲ ತರಬೇತಿಗಾಗಿ ಅರ್ಜಿ ಸಲ್ಲಿಸಿದ ರಿತುಪರ್ಣ ಅವರ ಪರಿಶ್ರಮಕ್ಕೆ ತಕ್ಕ ಫಲ ಆ ಸಂದರ್ಭದಲ್ಲಿ ದೊರೆಯಿತು. ಇವರ ಕಾರ್ಯವೈಖರಿ, ಸಮರ್ಪಣಾ ಭಾವ ಮತ್ತು ಕೌಶಲ್ಯವನ್ನು ಸೂಕ್ಷ್ಮವಾಗಿ ಗಮನಿಸಿದ ಕಂಪನಿಯವರು, ಇವರನ್ನು ತಮ್ಮ ಉದ್ಯೋಗಿಯಾಗಿ ಆರಿಸಿಕೊಂಡರು. ಪ್ರಾರಂಭದಲ್ಲಿ ವಾರ್ಷಿಕ 39.05 ಲಕ್ಷ ವೇತನವನ್ನು ನಿಗದಿಪಡಿಸಿದ್ದರು, ಆದರೆ ಇವರ ಸಾಮರ್ಥ್ಯವನ್ನು ಮನಗಂಡು 72.03 ಲಕ್ಷ ನೀಡಲು ನಿರ್ಧರಿಸಿದರು. ನಿಜವಾಗಿ ನೋಡುವುದಾದರೆ ರಿತುಪರ್ಣ ಅವರ ಶ್ರಮಕ್ಕೆ ಬೆಲೆ ಕಟ್ಟಲು ಸಾಧ್ಯವಿಲ್ಲ.

ಕಾರಣ ರಾತ್ರಿ ಹನ್ನೆರಡರಿಂದ ಬೆಳಗಿನ ಜಾವ ಆರುವರೆ ತನಕ ಕಾರ್ಯವನ್ನು ನಿರ್ವಹಿಸುತ್ತಿದ್ದರು. ಬೆಳಿಗ್ಗೆ ಎಂಟು ವರೆಗೆ ಕಾಲೇಜಿನ ತರಗತಿಗಳಿಗೆ ಹಾಜರಾಗುತ್ತಿದ್ದರು. ಕಾಲೇಜ್ ಮುಗಿಸಿ ಬರುವುದು ಸಂಜೆ ಐದು ಗಂಟೆಗೆ. ಕೆಲವೇ ಗಂಟೆ ನಿದ್ದೆ ಮಾಡಿ ಮತ್ತೆ ರಾತ್ರಿಯ ಕರ್ತವ್ಯಕ್ಕೆ ಸಿದ್ಧರಾಗುತ್ತಿದ್ದರು. ಆ ಶ್ರಮದ ಪ್ರತಿಫಲವೇ ಇದು ಎನ್ನುವುದು ಎಲ್ಲರ ಅಭಿಪ್ರಾಯ. ಕೆಲವೊಮ್ಮೆ ಬೆಳಗ್ಗಿನ ಎರಡು ತರಗತಿಗಳಿಗೆ ಹಾಜರಾಗಲು ಸಾಧ್ಯವಾಗುತ್ತಿರಲಿಲ್ಲ. ಅಂತಹ ಸಂದರ್ಭದಲ್ಲಿ ಕಾಲೇಜಿನ ಸಿಬ್ಬಂದಿಗಳು ಸಹಕಾರ ನೀಡುತ್ತಿದ್ದರು ಎಂದು ರಿತುಪರ್ಣ ಅವರು ಕೃತಜ್ಞತೆಯನ್ನು ಸಲ್ಲಿಸುತ್ತಾರೆ.

ತಂದೆ ಸೇವೆಯೇ ದೊಡ್ಡ ಸಾಧನೆಗೆ ಪ್ರೇರಣೆ

ತಂದೆ ಸರೇಶ್ ಕೂಡ ಮಂಗಳೂರಲ್ಲಿ ಸೇವೆ ಮೂಲಕವೇ ಹೆಸರಾದವರು. ತಂದೆಯ ಕಷ್ಟ ನೋಡುತ್ತಲೇ ಬೆಳೆದ ಮಗಳು ರಿತುಪರ್ಣ. ವೈದ್ಯೆಯಾಗಬೇಕೆಂಬ ಬಯಕೆಯನ್ನು ಹೊಂದಿದ್ದ ರಿತುಪರ್ಣ ತಂದೆಗೆ ಆರ್ಥಿಕವಾಗಿ ಹೊರೆಯಾಗಬಾರದು ಎಂದು, ಇಂಜಿನಿಯರಿಂಗ್ ಸೇರಿಕೊಂಡರು. ಇದರಲ್ಲಿ ಮತ್ತೊಂದು ರೀತಿ ಸಾಧಿಸಿದರು. ಮೂಲತಃ ಮಲೆನಾಡಿನವರಾದ ಕಾರಣ ಸಹಜವಾಗಿ ಸಾಹಿತ್ಯದ ಆಸಕ್ತಿ ಅಧಿಕವಾಗಿದೆ. ಅಜ್ಜಿಯ ಮನೆ ತೀರ್ಥಹಳ್ಳಿಯಾದ ಕಾರಣ ಇವರ ಮೆಚ್ಚಿನ ಕವಿ ಕುವೆಂಪು. ರಿತುಪರ್ಣ ಅವರು ಶಾಲಾ ಕಾಲೇಜು ದಿನಗಳಲ್ಲಿ ಕವಿತೆಗಳನ್ನು ರಚಿಸಿ, ಅಲ್ಲಿನ ನಿಯತಕಾಲಿಕೆಗಳಲ್ಲಿ ಪ್ರಕಟಿಸಿದ್ದಾರೆ. ಜೊತೆಗೆ ಸಮಾಜ ಸೇವೆಯಲ್ಲೂ ಆಸಕ್ತಿ ಇರುವ ಇವರು, ಅನೇಕ ಸಮಾಜಮುಖಿ ಚಟುವಟಿಕೆಗಳನ್ನು ನಡೆಸಿದ್ದಾರೆ.
ತಾಯಿ…..

ಸಂಶೋಧನೆ ಮಾಡಿ ಸೈ ಎನಿಸಿಕೊಂಡರು!

ಅಡಿಕೆ ಮರ ಹತ್ತಿ, ಔಷಧಿಗಳನ್ನು ಹೊಡೆಯಲು ಹೊಸ ಯಂತ್ರವನ್ನು ತಮ್ಮ ಸಹಪಾಠಿಗಳೊಂದಿಗೆ ತಯಾರಿಸಿ, ಗೋವಾದಲ್ಲಿ ನಡೆದ ಸ್ಪರ್ಧೆಯಲ್ಲಿ ಪ್ರದರ್ಶಿಸುವ ಮೂಲಕ ಚಿನ್ನ ಮತ್ತು ಬೆಳ್ಳಿಯ ಪದಕಗಳನ್ನು ಕಾಲೇಜಿನ ಗುಂಪಿನೊಂದಿಗೆ ಪಡೆದುಕೊಂಡಿದ್ದಾರೆ. ಮತ್ತು ಕಸದ ವಿಲೇವಾರಿಗೆ ಸಂಬಂಧಿಸಿದಂತೆ ಮಂಗಳೂರಿನಲ್ಲಿ ವಾಹನಗಳಿಗೆ ಯಾವುದೇ ಹಾಡುಗಳು ಬಾರದ ಕಾರಣ, ಕಸವನ್ನು ಗಾಡಿಗೆ ಹಾಕುವಲ್ಲಿ ವ್ಯತ್ಯಾಸವಾಗುತ್ತಿತ್ತು.

ಹೀಗಾಗಿ ಕೆಲವರೊಂದಿಗೆ ಸೇರಿಕೊಂಡು ಒಂದು ಆ್ಯಪ್ ಪ್ರಾರಂಭಿಸುವ ಮೂಲಕ, ಮನೆಯ ಹತ್ತಿರ ಗಾಡಿ ಬಂದೊಡನೆ ಸಂದೇಶ ಬಂದು ಮನೆಯೊಳಗಿರುವವರು, ಕಸವನ್ನು ತಂದು ಗಾಡಿಗೆ ಹಾಕುವ ವ್ಯವಸ್ಥೆಯನ್ನು ಮಾಡಿದ್ದಾರೆ. ಮನೆಯಲ್ಲಿ ಸದಸ್ಯರು ಇಲ್ಲದ ವೇಳೆಯಲ್ಲಿ ಅಥವಾ ಕಸದ ಗಾಡಿ ಬಾರದ ದಿನ ಕೂಡ ಮೊಬೈಲ್ ಗಳಿಗೆ ಸಂದೇಶ ಬರುವಂತೆ ವ್ಯವಸ್ಥೆ ಮಾಡಲಾಗಿದೆ. ಇದರಿಂದ ಬೀದಿ ನಾಯಿಗಳು ಮನೆಯ ಮುಂದೆ ಇರಿಸಿರುವ ಕಸದ ರಾಶಿಯನ್ನು, ರಸ್ತೆಯ ತುಂಬೆಲ್ಲ ಹರಡಿ ಕಲುಷಿತಗೊಳಿಸುವುದನ್ನು ತಡೆಹಿಡಿಯಲಾಗಿದೆ.

ಭಾರತಕ್ಕೆ ಬಂದು ಸ್ಟಾರ್ಟ್ ಅಪ್ ಮಾಡುವಾಸೆ!

ರೋಲ್ಸ್ ರಾಯ್ಸ್ ಯುಎಸ್ಎ ಕಂಪನಿಯಲ್ಲಿ ಉದ್ಯೋಗಿಯಾಗಿ ಹೊರಟಿರುವ ರಿತುಪರ್ಣ ಅವರು, ಎರಡು ವರ್ಷಗಳ ಕಾಲ ಅಲ್ಲಿ ಕಾರ್ಯನಿರ್ವಹಿಸಿ, ಮರಳಿ ಭಾರತಕ್ಕೆ ಬಂದು, ಇಲ್ಲಿನ ರೈತರಿಗೆ ನೆರವಾಗುವಂತಹ ಹೊಸತನ್ನೇನಾದರೂ ತಯಾರಿಸಿ, ನಮ್ಮವರ ಸೇವೆ ಮಾಡಬೇಕೆಂಬ ಬಲವಾದ ಉದ್ದೇಶವನ್ನು ಹೊಂದಿದ್ದಾರೆ. ಇತ್ತೀಚಿಗೆ ಅವರ ಮೋಟಿವೇಷನ್ ಮಾತು ಕೂಡ ಗಮನ ಸೆಳೆದಿದೆ. ಯುವ ಜನತೆ ಮೊಬೈಲ್, ಸೋಷಿಯಲ್ ಮೀಡಿಯಾ, ಬೇಡದ ಫ್ಯಾಷನ್ ನಡುವೆ ಈಕೆ ಎಲ್ಲರಿಗೂ ಮಾದರಿಯಾಗಿದ್ದಾರೆ.

Categories
ತೀರ್ಥಹಳ್ಳಿ ಬೆಂಗಳೂರು ಮಲ್ನಾಡ್ ರಾಜ್ಯ

ದಕ್ಷ ಪೊಲೀಸ್ ಅಧಿಕಾರಿ ಕಾಶಿಗೆ ಬೀಳ್ಕೊಡುಗೆ ಸಂಭ್ರಮ!

ದಕ್ಷ ಪೊಲೀಸ್ ಅಧಿಕಾರಿ ಕಾಶಿಗೆ ಬೀಳ್ಕೊಡುಗೆ ಸಂಭ್ರಮ!
– ತೀರ್ಥಹಳ್ಳಿ ಮೂಲದ ಹೆಮ್ಮೆಯ ಪೊಲೀಸ್ ಅಧಿಕಾರಿ
– ವಕೀಲರಾಗಿ ಮತ್ತೆ ಸೇವೆ ಮಾಡಲು ಸಿದ್ಧತೆ

ತೀರ್ಥಹಳ್ಳಿ/ ಬೆಂಗಳೂರು: ತೀರ್ಥಹಳ್ಳಿ ಮೂಲದ ಪೊಲೀಸ್ ಅಧಿಕಾರಿ ಎಸ್‌ಪಿ ಎಸ್‌ಎಸ್‌ ಕಾಶಿ ಸೇವೆಯಿಂದ ನಿವೃತ್ತರಾಗಿದ್ದಾರೆ. ಅವರಿಗೆ ಪೊಲೀಸ್ ಇಲಾಖೆಯಿಂದ ಹಾಗೂ ಸಿಬ್ಬಂದಿ ಮತ್ತು ಅವರ ಆತ್ಮೀಯರು ಬೀಳ್ಕೊಡುಗೆ ನೀಡಿದ್ದಾರೆ. ಬೆಂಗಳೂರಿನ ರೆಸಿಡೆನ್ಸಿ ರಸ್ತೆಯಲ್ಲಿರುವ ತಾಜ್ ವಿವಾಂತ ಹೋಟೆಲ್‌ನಲ್ಲಿ ಏಪ್ರಿಲ್ 30 ರಂದು ಕಾಶಿ ಅವರ ಸ್ನೇಹಿತರು, ಹಿತೈಷಿಗಳು ಪುಟ್ಟ ಕಾರ್ಯಕ್ರಮ ಹಮ್ಮಿಕೊಂಡಿದ್ದರು. ಸಬ್‌ಇನ್ಸ್‌ಪೆಕ್ಟರ್‍ ಆಗಿ ಇಲಾಖೆಗೆ ಕಾಲಿಟ್ಟ ಕಾಶಿ ಎಸ್ಪಿ ಹಂತಕ್ಕೆ ಬೆಳೆದರಾದರೂ, ಐಪಿಎಸ್‌ ಲಾಬಿಯ ಎದೆ ಒಡ್ಡಿಕೊಂಡೇ ಇಲಾಖೆಯೊಳಗೆ ಒಗ್ಗಿಕೊಂಡವರು. ಕಳೆದ ಒಂದೂವರೆ ದಶಕಗಳ ಕಾಲ, ಸರಕಾರಗಳು ಬದಲಾದರೂ ಕಾಶಿ ಅವರ ಕಾರ್ಯಕ್ಷೇತ್ರದಲ್ಲಿ ಯಾವುದೇ ಬದಲಾವಣೆಗಳಾಗಲಿಲ್ಲ.

ನಡುವೆ ರಾಜೀನಾಮೆಯನ್ನು ನೀಡುವ ಮೂಲಕ ಸುದ್ದಿಯಾದರೂ, ಅಂತಿಮವಾಗಿ; ಯಾವುದೇ ಅಡೆತಡೆಗಳಿಲ್ಲದೆ ನಾನ್‌ ಎಗ್ಸೆಕೆಟಿವ್‌ ಹುದ್ದೆಯಲ್ಲೇ ನಿವೃತ್ತರಾದರು. ಅದರ ನೆಪದಲ್ಲಿ ಹಮ್ಮಿಕೊಂಡ ಖಾಸಗಿ ಕಾರ್ಯಕ್ರಮದ ಉದ್ದಕ್ಕೂ ಇಲಾಖೆಯ ಒಳಗೆ ಕಾಶಿ ನಡೆಸಿದ ಹೋರಾಟಗಳ ಕತೆಯನ್ನು ಮೆಲುಕು ಹಾಕಲಾಯಿತು. ಕಾಶಿ, ಇಲಾಖೆಯ ಸಿಬ್ಬಂದಿಗಳು ಹಾಗೂ ಅಧಿಕಾರಿಗಳ ಪಾಲಿಗೆ ಆಶಾಕಿರಣವೂ ಅಗಿದ್ದಾರೆ ಎಂಬುದನ್ನು ‘ಸೆಂಡ್ ಆಫ್’ ಕೋರಿ ಮಾತನಾಡಿದ ಬಹುತೇಕರು ನಿರೂಪಿಸಿದರು. ವಿ. ಮುರಳೀಧರ್, ನಿವೃತ್ತ ಅಧಿಕಾರಿ ಕೆ. ಎನ್. ನಾರಾಯಣ ಸ್ವಾಮಿ ಸೇರಿದಂತೆ ಎಲ್ಲರೂ ಕಾಶಿ ಅವರ ಸೇವೆ ಕೊಂಡಾಡಿದರು. ಮುಖ್ಯಮಂತ್ರಿ ಪದಕ ಪಡೆದುಕೊಂಡಿದ್ದು ಕಾಶಿ ಅವರು ರಾಯಚೂರು ಜಿಲ್ಲೆಯಲ್ಲಿ ನಡೆದ ನಕ್ಸಲ್‌ ಎನ್‌ಕೌಂಟರ್‍ ಕಾರ್ಯಾಚರಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ವಕೀಲರಾಗಿ ಮತ್ತೆ ಸೇವೆಗೆ…

“ಇಲಾಖೆಯ ನನ್ನ ಸಹಜೀವಿಗಳಿಗೆ ಕಾನೂನು ನೆರವು ನೀಡುವ ಕೆಲಸ ಮಾಡುತ್ತೇವೆ,’’ ಎಂದು ತಮ್ಮ ನಿವೃತ್ತ ಜೀವನದ ಯೋಜನೆಯನ್ನು ಮುಂದಿಟ್ಟ ಕಾಶಿ, ಇತ್ತೀಚಿಗೆ ಕಾನೂನು ಪದವಿಯನ್ನೂ ಮುಗಿಸಿದ್ದಾರೆ.

Categories
ಕರಾವಳಿ ದಕ್ಷಿಣ ಕನ್ನಡ ಬೆಳ್ತಂಗಡಿ ಮಂಗಳೂರು

ಕರಾವಳಿ ಟಾಪ್ ನ್ಯೂಸ್

ಕರಾವಳಿ ಟಾಪ್ ನ್ಯೂಸ್

• ಬೆಳ್ತಂಗಡಿ: ವ್ಯಕ್ತಿ ನಾಪತ್ತೆ; ದೂರು ದಾಖಲು
• ಮಂಗಳೂರು: ಅಪಾರ್ಟ್ ಮೆಂಟ್ ನಲ್ಲಿ ಬೆಂಕಿ ಅವಘಡ
• ಕಡಬ: ತ್ಯಾಜ್ಯ ವಿಲೇವಾರಿ ಘಟಕದ ಅವ್ಯವಸ್ಥೆ; ಸ್ಥಳೀಯರ ಪ್ರತಿಭಟನೆ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್

• ಬೆಳ್ತಂಗಡಿ: ವ್ಯಕ್ತಿ ನಾಪತ್ತೆ; ದೂರು ದಾಖಲು

ಬೆಳ್ತಂಗಡಿ: ಮದುವೆಗೆ ತೆರಳಿದ್ದ ವ್ಯಕ್ತಿಯೊಬ್ಬರು ನಾಪತ್ತೆಯಾಗಿರುವ ಘಟನೆ, ಧರ್ಮಸ್ಥಳದಲ್ಲಿ ನಡೆದಿದೆ. ಮಗಳ ಮದುವೆಗೆಂದು ಕುಟುಂಬ ಸಮೇತರಾಗಿ ಧರ್ಮಸ್ಥಳಕ್ಕೆ ತೆರಳಿದ್ದ ಶಿಕಾರಿಪುರ ಮೂಲದ ಮಂಜುನಾಥ ಎನ್ನುವ ವ್ಯಕ್ತಿಯು ಮದುವೆ ಮುಗಿದ ಬಳಿಕ ಕುಟುಂಬಸ್ಥರೊಂದಿಗೆ ಮನೆಗೆ ಮರಳಿಬಾರದೆ ಕಾಣೆಯಾಗಿದ್ದಾರೆ ಎನ್ನಲಾಗಿದೆ. ಇದಕ್ಕೆ ಸಂಬಂಧಿಸಿದಂತೆ ದಿನೇಶ್ ಪಿ ಎನ್ನುವವರು ಪೊಲೀಸರಿಗೆ ದೂರು ನೀಡಿದ್ದು, ದೂರಿನ ಆಧಾರದ ಮೇಲೆ ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

• ಮಂಗಳೂರು: ಅಪಾರ್ಟ್ ಮೆಂಟ್ ನಲ್ಲಿ ಬೆಂಕಿ ಅವಘಡ

ಮಂಗಳೂರು: ಅಪಾರ್ಟ್ ಮೆಂಟ್ ವೊಂದರಲ್ಲಿ ಬೆಂಕಿ ಅವಘಡ ಸಂಭವಿಸಿದ ಘಟನೆ, ನಂತೂರು ಜಂಕ್ಷನ್ ಬಳಿ ನಡೆದಿದೆ. ಪರಿಣಾಮವಾಗಿ ಕೊಠಡಿಯಲ್ಲಿ ಸಂಗ್ರಹಿಸಿಟ್ಟಿದ್ದ ವಿವಿಧ ಸ್ವತ್ತುಗಳು ಹಾನಿಗೀಡಾಗಿದೆ ಎನ್ನಲಾಗಿದೆ. ಮಾಹಿತಿ ಲಭಿಸುತ್ತಿದ್ದಂತೆ ಸ್ಥಳಕ್ಕೆ ಆಗಮಿಸಿದ ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಬೆಂಕಿಯನ್ನು ನಂದಿಸಿ ಎದುರಾಗಬಹುದಾಗಿದ್ದ ಭಾರಿ ಅನಾಹುತವನ್ನು ತಪ್ಪಿಸಿದ್ದಾರೆ. ಈ ಘಟನೆಯಿಂದಾಗಿ ಕೆಲವು ಕಾಲ ಆತಂಕದ ವಾತಾವರಣ ಸೃಷ್ಟಿಯಾಗಿತ್ತು ಎನ್ನುವ ಮಾಹಿತಿ ಲಭಿಸಿದೆ.

• ಕಡಬ: ತ್ಯಾಜ್ಯ ವಿಲೇವಾರಿ ಘಟಕದ ಅವ್ಯವಸ್ಥೆ; ಸ್ಥಳೀಯರ ಪ್ರತಿಭಟನೆ

•ಕಡಬ: ಪಟ್ಟಣ ಪಂಚಾಯತ್ ತ್ಯಾಜ್ಯ ವಿಲೇವರಿ ಘಟಕದ ಅವ್ಯವಸ್ಥೆಯ ವಿರುದ್ಧ ಸ್ಥಳೀಯರು ಆಕ್ರೋಶಗೊಂಡು ಗುರುವಾರದಂದು ಪ್ರತಿಭಟನೆ ನಡೆಸಿದ ಘಟನೆ ನಡೆದಿದೆ. ಈ ಸಂದರ್ಭದಲ್ಲಿ ಮಾತನಾಡಿದ ಕಡಬ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷರಾದ ನಾರಾಯಣ ಪೂಜಾರಿ ಪಾಲಪ್ಪೆ ಅವರು “ಪಟ್ಟಣ ಪಂಚಾಯತ್ ನ ಅಸಮರ್ಪಕ ಕಾರ್ಯನಿರ್ವಹಣೆಯ ಕಾರಣದಿಂದಾಗಿ ಘನ ತ್ಯಾಜ್ಯ ಘಟಕದಲ್ಲಿ ದೊಡ್ಡ ಪ್ರಮಾಣದಲ್ಲಿ ಸಂಗ್ರಹಗೊಂಡಿರುವ ತ್ಯಾಜ್ಯದ ರಾಶಿ ಗಬ್ಬೆದ್ದು ನಾರುತ್ತಿದೆ. ತ್ಯಾಜ್ಯ ವಿಲೇವರಿಗಾಗಿ ಖರೀದಿಸಿದ ಲಕ್ಷಾಂತರ ರೂಪಾಯಿ ಮೌಲ್ಯದ ಯಂತ್ರೋಪಕರಣಗಳು ಬಳಕೆಯಾಗದೆ ತುಕ್ಕು ಹಿಡಿದಿದೆ. ಇದುವರೆಗೂ ನಡೆದಿರುವ ಕಾಮಗಾರಿ ಕೂಡ ಕಳಪೆ ಗುಣಮಟ್ಟದ್ದಾಗಿದೆ. ಇದರಿಂದಾಗಿ ಪರಿಸರದಲ್ಲಿ ಸಾಂಕ್ರಮಿಕ ರೋಗ ಹರಡುವ ಭೀತಿ ಉಂಟಾಗಿದೆ. ಘಟಕದ ವ್ಯವಸ್ಥೆಯನ್ನು ಕೂಡಲೇ ಸರಿಪಡಿಸಲು ಸೂಕ್ತ ಕ್ರಮವನ್ನು ಕೈಗೊಳ್ಳಬೇಕಿದೆ. ತಪ್ಪಿದರೆ ಉಗ್ರ ರೀತಿಯಲ್ಲಿ ಪ್ರತಿಭಟನೆಯನ್ನು ಕೈಗೊಳ್ಳುಲಾಗುತ್ತದೆ” ಎಂದು ಎಚ್ಚರಿಕೆ ನೀಡಿದ್ದಾರೆ.

Categories
agumbe ಕರಾವಳಿ ಮಲ್ನಾಡ್ ಮಾಹಿತಿ ಸುದ್ದಿ ಶಿವಮೊಗ್ಗ

ಪದೇ ಪದೇ ಆಗುಂಬೆ ಟ್ರಾಫಿಕ್ ಜಾಮ್ ಕಿರಿಕಿರಿ!

ಪದೇ ಪದೇ ಆಗುಂಬೆ ಟ್ರಾಫಿಕ್ ಜಾಮ್ ಕಿರಿಕಿರಿ!
– ಕರಾವಳಿ – ಮಲೆನಾಡಿಗರ ಓಡಾಟಕ್ಕೆ ತೊಂದರೆ
– ಚಿಕಿತ್ಸೆಗಾಗಿ ಇದೇ ಮಾರ್ಗದಲ್ಲಿ ಓಡಾಡಬೇಕು!

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ತೀರ್ಥಹಳ್ಳಿ: ಪದೇ ಪದೇ ಆಗುಂಬೆ ಟ್ರಾಫಿಕ್ ಜಾಮ್ ಕಿರಿಕಿರಿ ಇದೀಗ ಕರಾವಳಿ – ಮಲೆನಾಡಿಗರ ಓಡಾಟಕ್ಕೆ ತೊಂದರೆಯಾಗಿದೆ. ಅಲ್ಲದೆ ಈ ಬಗ್ಗೆ ಎರಡು ಜಿಲ್ಲಾ ಆಡಳಿತ, ಪೊಲೀಸ್ ಇಲಾಖೆ ಗಮನ ಹರಿಸಬೇಕಿದೆ. ಇಲ್ಲವಾದಲ್ಲಿ ಸಾವಿರಾರು ಜನರಿಗೆ ತೊಂದರೆ ಜತೆಗೆ ಜೀವ ಹಾನಿ ಕೂಡ ಆಗಲಿದೆ. ಹೊಸನಗರ ಮತ್ತು ಕುಂದಾಪುರ ನಡುವಿನ ಹುಲಿಕಲ್ ಘಾಟಿಯ ಬಂದ್ ಕಾರಣದಿಂದಾಗಿ ಸಾಕಷ್ಟು ವಾಹನಗಳು ಆಗುಂಬೆ ಘಾಟಿಯ ಮಾರ್ಗವಾಗಿ ಸಂಚರಿಸುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದು ಈಗಲೂ ಮುಂದುವರಿದಿರುವ ಪರಿಣಾಮವಾಗಿ ಪ್ರಯಾಣಿಕರಿಗೆ ತೊಂದರೆಯುಂಟಾಗಿದೆ.

ಶನಿವಾರ ಮತ್ತು ಭಾನುವಾರಗಳಂದು ಈ ಸಮಸ್ಯೆ ಮತ್ತಷ್ಟು ಹೆಚ್ಚಳವಾಗುತ್ತಿದೆ. ಅಲ್ಲದೆ ಈಗ ಶುಭ ಸಮಾರಂಭ ಮತ್ತು ಶಾಲಾ ಕಾಲೇಜುಗಳ ರಜೆಯ ಕಾಲವಾಗಿರುವುದರಿಂದ ಪ್ರವಾಸಕ್ಕೆ ತೆರಳುವವರು, ಶುಭ ಸಮಾರಂಭಗಳಿಗೆ ತೆರಳುವವರ ಸಂಖ್ಯೆ ಮತ್ತಷ್ಟು ಅಧಿಕವಾಗಿರುತ್ತದೆ. ಅದಕ್ಕೆ ಅನುಗುಣವಾಗಿ ವಾಹನಗಳ ಓಡಾಟವೂ ಕೂಡ ದುಪ್ಪಟ್ಟು ಇರುತ್ತದೆ. ಅಲ್ಲದೆ ಸುತ್ತಿಬಳಸಿ ಹೋಗುವುದರಿಂದ ಸಮಯ ಕೂಡ ವ್ಯರ್ಥವಾಗುತ್ತಿದೆ.

ಚಿಕಿತ್ಸೆಗಾಗಿ ಇದೇ ಮಾರ್ಗದಲ್ಲಿ ಓಡಾಡಬೇಕು!

ಮಲೆನಾಡು ಮತ್ತು ಮಧ್ಯ ಕರ್ನಾಟಕದ ಭಾಗದ ಬಹುತೇಕ ಜನರು ಹೆಚ್ಚಿನ ಚಿಕಿತ್ಸೆಗಾಗಿ, ಇಲ್ಲದೆ ತೀವ್ರತರವಾದ ಅಪಘಾತ ಸಂಭವಿಸಿದಲ್ಲಿ ಮಣಿಪಾಲಕ್ಕೆ ತೆರಳುವುದು ಸಹಜ. ಆದರೆ ಹುಲಿಕಲ್ ಘಾಟಿಯ ಸ್ಥಗಿತದಿಂದಾಗಿ ಆಗುಂಬೆ ಘಾಟಿಯಲ್ಲಿ ವಾಹನಗಳ ದಟ್ಟಣೆ ಮತ್ತಷ್ಟು ಹೆಚ್ಚಾಗಿದ್ದು ಆ್ಯಂಬುಲೆನ್ಸ್ ಕೂಡ ಘಾಟಿಯಲ್ಲಿ ಸಿಲುಕಿಕೊಳ್ಳುವ ಪರಿಸ್ಥಿತಿ ಎದುರಾಗಿದೆ. ಇದರಿಂದಾಗಿ ರೋಗಿಗಳಿಗೆ ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ದೊರಕದೇ ಅನಾಹುತ ಸಂಭವಿಸುವ ಸಾಧ್ಯತೆ ಕೂಡ ಇದೆ. ಹೀಗಾಗಿ ಸಂಬಂಧಿತರು ಈ ತೊಂದರೆಗಳಿಗೆ ಸೂಕ್ತ ಪರಿಹಾರ ಕಲ್ಪಿಸಿ ಕೊಡಬೇಕಾಗಿ ಸ್ಥಳೀಯರು ಮನವಿ ಮಾಡಿಕೊಂಡಿದ್ದಾರೆ.
ಉಡುಪಿ ಮತ್ತು ಶಿವಮೊಗ್ಗ, ಚಿಕ್ಕಮಗಳೂರು ಅಧಿಕಾರಿಗಳು, ಪೊಲೀಸ್ ಅಧಿಕಾರಿಗಳು ಈ ಬಗ್ಗೆ ಗಮನಿಸಬೇಕು ಎಂಬ ಅಗ್ರಹ ವ್ಯಕ್ತವಾಗಿದೆ.

Categories
ಮಾಹಿತಿ ಸುದ್ದಿ ರಾಜ್ಯ

ಸೋಷಿಯಲ್ ಮೀಡಿಯಾ ಎಂಬ ಭೂತ!

ಸೋಷಿಯಲ್ ಮೀಡಿಯಾ ಎಂಬ ಭೂತ!
– ಯುವ ಜನರು, ಮಕ್ಕಳ ಜೀವನ, ಜಾಣ್ಮೆ, ಕೌಶಲ್ಯ ಮಾಯ
– ಬಾಂಧವ್ಯದ ಬೆಲೆ ಗೊತ್ತಿಲ್ಲ!.. ಜೀವನ ಮಾಡಲು ಬರಲ್ಲ…

ಸರ್ಕಾರ ನಿಷೇಧ ಮಾಡಿದ್ರೂ ಪೋಷಕರ ನಿರ್ಧಾರವೇ ಮುಖ್ಯ

ಸಾಮಾಜಿಕ ಜಾಲತಾಣಗಳ ಬಳಕೆಗೆ ಅಪ್ರಾಪ್ತರಿಗೆ ನಿರ್ಬಂಧವನ್ನು ವಿಧಿಸಿರುವ ಕರ್ನಾಟಕ ರಾಜ್ಯ ಸರ್ಕಾರದ ಉದ್ದೇಶ ಸ್ವಾಗತಾರ್ಹ. ಈಗಾಗಲೇ ಆಸ್ಟ್ರೇಲಿಯಾ ದೇಶದಲ್ಲಿ ಈ ನಿಯಮ ಜಾರಿಯಲ್ಲಿದ್ದು, ಸಾಮಾಜಿಕ ಜಾಲತಾಣಗಳ ಬಳಕೆಯ ಮೇಲೆ ವಯಸ್ಸಿನ ನಿರ್ಬಂಧವನ್ನು ವಿಧಿಸಿರುವ ದೇಶದ ಮೊದಲ ರಾಜ್ಯ ಎಂಬ ಹೆಗ್ಗಳಿಕೆಗೂ ಕರ್ನಾಟಕ ಪಾತ್ರವಾಗುತ್ತಿದೆ. ಆದರೆ ಈ ನಿಯಮ ಜಾರಿಗೆ ಪೋಷಕರ ಸಹಕಾರ ಕೂಡ ಬೇಕು. ಸಾಮಾಜಿಕ ಜಾಲತಾಣಗಳ ಹುಳುವಾಗಿರುವ ಇಂದಿನ ಯುವ ಸಮುದಾಯ ಮಾನಸಿಕವಾಗಿಯೂ ಮತ್ತು ದೈಹಿಕವಾಗಿಯೂ ದುರ್ಬಲರಾಗುತ್ತಿರುವುದಕ್ಕೆ ಸಾಮಾಜಿಕ ಜಾಲತಾಣಗಳ ನೇರ ಕಾರಣ. ಬಿದ್ದಲ್ಲೇ ಬಿದ್ದು ತುಕ್ಕು ಹಿಡಿಯುವ ಕಬ್ಬಿಣದಂತೆ ಕೂತಲ್ಲೇ ಕೂತು ಜಿಡ್ಡು ಹಿಡಿದ ಯಂತ್ರದಂತಾಗುತ್ತಿವೆ ಇಂದಿನ ಯುವಪೀಳಿಗೆ.

ಬಾಂಧವ್ಯದ ಬೆಲೆ ಗೊತ್ತಿಲ್ಲ!

ಒಂದೇ ಮನೆಯಲ್ಲಿದ್ದರು ಅಪರಿಚಿತರಂತೆ ಬದುಕುತ್ತಿದ್ದೇವೆ ಅದಕ್ಕೆ ಕಾರಣ ಸಾಮಾಜಿಕ ಜಾಲತಾಣಗಳೊಳಗೆ ಇಂದಿನ ಮಕ್ಕಳು ಸಿಲುಕಿರುವುದು, ಕೌಟುಂಬಿಕ ಬಾಂಧವ್ಯದ ಅರಿವು ಆಗದಂತೆ ನಮ್ಮನ್ನಾವರಿಸಿರುವ ಈ ಸಾಮಾಜಿಕ ಜಾಲತಾಣವೆಂಬ ಮಾಯ ಜಾಲ ನಮ್ಮ ದೇಶದ ಮಾನವ ಸಂಪನ್ಮೂಲದ ಅಪಬಳಕೆಗೂ ಕಾರಣವಾಗುತ್ತಿದೆ, ಓದುವ ಸಮಯದಲ್ಲಿ ಮಕ್ಕಳು ಮೊಬೈಲ್, ಸಾಮಾಜಿಕ ಜಾಲತಾಣಗಳ ಸುಳಿಯಲ್ಲಿ ಸಿಕ್ಕಿದ್ದರೆ ಯುವಜನತೆ ಕೆಲಸದ ಸಮಯದಲ್ಲಿಯೂ ಫೋನುಗಳಲ್ಲಿಯೇ ಮುಳುಗಿ ಹೋಗಿದ್ದಾರೆ. ವಿದ್ಯಾರ್ಥಿಗಳಿಗೆ ಪೋಷಕರು ಶಿಕ್ಷಣಕ್ಕೆ ಪೂರಕವಾಗಿರಲಿ ಎಂಬ ಕಾರಣಕ್ಕೆ ಫೋನ್ ನೀಡಿದರೆ ಅದೇ ಮಕ್ಕಳು ಇಂದು ಶಾಲಾ-ಕಾಲೇಜುಗಳಿಗೆ ಚಕ್ಕರ್ ಹಾಕಿ ಅಶ್ಲೀಲ ವಿಡಿಯೋಗಳನ್ನು ನೋಡುತ್ತಾ, ಹುಚ್ಚು ಆನ್ಲೈನ್ ಗೇಮಿಂಗ್ ಚಟಕ್ಕೆ ಬಿದ್ದು ಚಟ್ಟಕ್ಕೇರುತ್ತಿರುವ ಪ್ರಕರಣಗಳೇ ಹೆಚ್ಚುತ್ತಿವೆ.

ದೇಶದ ಮಾನವ ಸಂಪನ್ಮೂಲ ವ್ಯರ್ಥ!

ಮಕ್ಕಳ ಸಾಮಾಜಿಕ ಜಾಲತಾಣದ ಅವಲಂಬನೆಗೆ ಸಾಕ್ಷಿಯಾಗಿ ಇಂದು ಯಾವ ಶಿಕ್ಷಣ ಸಂಸ್ಥೆಗಳು ಎಷ್ಟೇ ಕಟ್ಟು ನಿಟ್ಟಾದ ನಿಯಮ ಜಾರಿಗೊಳಿಸಿದರೂ ಶಾಲಾ-ಕಾಲೇಜುಗಳಲ್ಲಿಯೂ ಸಾಮಾಜಿಕ ಜಾಲತಾಣಗಳನ್ನು ಬಳಸುವುದನ್ನು ತಡೆಗಟ್ಟಲು ಸಾಧ್ಯವಾಗುತ್ತಿಲ್ಲ. ಮಾನವ ಸಂಪನ್ಮೂಲದ ಅಪ ಬಳಕೆಗೆ ಕಾರಣವಾಗುತ್ತಿರುವುದು ಒಂದು ಕಡೆಯಾದರೆ ಇನ್ನೊಂದು ಕಡೆಗೆ ಸುಸ್ಥಿರ ಸಮಾಜ ನಿರ್ಮಾಣಕ್ಕೆ ಬೇಕಾದ ಯುವ ಸಮುದಾಯದ ಕ್ರಿಯಾತ್ಮಕ ಮತ್ತು ಸೃಜನಾತ್ಮಕ ವಿಚಾರಗಳಿಗೆ ಕೊಳ್ಳಿ ಇಡುತ್ತಿರುವುದು ಇದೇ ಸಾಮಾಜಿಕ ಜಾಲತಾಣಗಳು. ಇವುಗಳ ಬಳಕೆಯ ಮೇಲೆ ವಯಸ್ಸಿನ ನಿರ್ಬಂಧ ವಿಧಿಸಿರುವುದು ನಿಜಕ್ಕೂ ಉತ್ತಮ ಬೆಳವಣಿಗೆ. ಸಾಮಾಜಿಕ ಜಾಲತಾಣಗಳ ಅಡಿಕ್ಷನ್ ಕೂಸು ಹೆಜ್ಜೆ ಇಡುವುದಕ್ಕೂ ಮುಂಚೆ ಶುರುವಾದದ್ದು ಇಂದು ಬೆಳೆದು ದೊಡ್ಡವರಾದರೂ ಅಡಿಕ್ಷನ್ ಸಹ ಪೆಡಂಭೂತದಂತೆಯೇ ಬೆಳೆದು ನಿಂತಿದೆ ಇದಕ್ಕೆ ಪೋಷಕರು ಒಂದರ್ಥದಲ್ಲಿ ಕಾರಣವಾಗಿದ್ದಾರೆ.

ಇಂದಿಗೂ ಊಟ, ತಿಂಡಿ, ನಿದ್ದೆ, ಓದು, ಕೆಲಸ ಎಲ್ಲ ಬದಿಗೊತ್ತಿ ಫೇಸ್ಬುಕ್, ವಾಟ್ಸಪ್ ಇನ್ಸ್ಟಾಗ್ರಾಮ್, ಟ್ವಿಟ್ಟರ್, ಯೂಟ್ಯೂಬ್ಗಳಲ್ಲಿಯೇ ಮುಳುಗಿದ್ದಾರೆ.. ವಿಪರ್ಯಾಸವೆಂದರೆ ಮಕ್ಕಳ ಈ ಗೀಳನ್ನು ಬಿಡಿಸಲು ಪೋಷಕರು ಇಂದಿಗೂ ಒದ್ದಾಡುತ್ತಿದ್ದಾರೆ, ಶಿಕ್ಷಕರ ಪಾಲಿಗಂತು ದೊಡ್ಡ ತಲೆ ನೋವಾಗಿದೆ. ಈ ಹಿನ್ನೆಲೆಯಲ್ಲಿ ಅಶ್ಲೀಲ ದೃಶ್ಯಾವಳಿಗಳನ್ನು ಕಾಣುವುದು, ಆನ್ಲೈನ್ ಗೇಮಿಂಗ್‌ಗಳು, ಬೆಟ್ಟಿಂಗ್, ಮಾದಕ ವ್ಯಸನಗಳನ್ನು ಅಂಟಿಸಿಕೊಳ್ಳುವುದು, ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುವುದು ಮೊದಲಾದ ಸಮಾಜಕ್ಕೂ ಮತ್ತು ಮಗುವಿನ ಭವಿಷ್ಯಕ್ಕೂ ತೊಡಕಾದ ಅನೇಕ ಚಟುವಟಿಕೆಗಳಲ್ಲಿ ತೊಡಗಿರುವುದಕ್ಕೆ ಈ ಸಾಮಾಜಿಕ ಜಾಲತಾಣಗಳೆ ಬುನಾದಿಯನ್ನು ಹಾಕುತ್ತಿದ್ದು ಇದರ ಬಳಕೆಯ ವಿರುದ್ಧ ವಯಸ್ಸಿನ ನಿರ್ಬಂಧವನ್ನು ವಿಧಿಸಿರುವುದು ಸ್ವಾಗತಾರ್ಹ. ಆದರೆ ಎಷ್ಟರಮಟ್ಟಿಗೆ ಇದು ಪರಿಣಾಮಕಾರಿಯಾಗಿ ಜಾರಿಯಾಗುತ್ತದೆ ಎನ್ನುವುದರ ಮೇಲೆ ಇದರ ಸಾರ್ಥಕತೆ ನಿಂತಿದೆ ಅಷ್ಟೆ.

ಲೇಖನ: ಪೂಜಾ ತೀರ್ಥಹಳ್ಳಿ
ಉಪನ್ಯಾಸಕರು
ಪಿ ಇ ಎಸ್ ಪಿ ಯು ಕಾಲೇಜು
ಬೆಂಗಳೂರು

Categories
ಕ್ರಿಕೆಟ್ ತೀರ್ಥಹಳ್ಳಿ ಮಲ್ನಾಡ್ ಶಿವಮೊಗ್ಗ ಹೊಸನಗರ

ಮೇಕೇರಿ ಕವರಿಯಲ್ಲಿ ಕ್ರಿಕೆಟ್ ಹಬ್ಬ

ಮೇಕೇರಿ ಕವರಿಯಲ್ಲಿ ಕ್ರಿಕೆಟ್ ಹಬ್ಬ
ಮೇ 2 ರಿಂದ ‘ಎಂ.ಸಿ.ಎಲ್ ಸೀಸನ್-5’ ಅಬ್ಬರ; ಮೇ 3ಕ್ಕೆ ತೀರ್ಥಹಳ್ಳಿ ರಮೇಶ್ ತಂಡದಿಂದ ಸಂಗೀತ ರಸಸಂಜೆ!
– ವರಾಹಿ ಹಿನ್ನೀರಿನ ಮಡಿಲಲ್ಲಿ ಸತತ ಐದನೇ ವರ್ಷದ ಕ್ರೀಡಾ ಸಂಭ್ರಮ.
– ಕ್ರೀಡೆ ಮತ್ತು ಸಂಗೀತದ ಅದ್ಭುತ ಸಮ್ಮಿಲನಕ್ಕೆ ಸಾಕ್ಷಿಯಾಗಲಿದೆ ಸಿರಿಮನೆ ಮೈದಾನ.

ಮೇಕೇರಿ: ಮಲೆನಾಡಿನ ಸುಂದರ ಪರಿಸರ, ವರಾಹಿ ಹಿನ್ನೀರಿನ ಮಡಿಲಲ್ಲಿರುವ ಮೇಕೇರಿ ಕವರಿಯಲ್ಲಿ ಸತತ ಐದನೇ ವರ್ಷದ ‘ಮೇಕೇರಿ ಕ್ರಿಕೆಟ್ ಲೀಗ್ (MCL) – ಸೀಸನ್ 5’ ಕ್ರೀಡಾಕೂಟಕ್ಕೆ ವೇದಿಕೆ ಸಜ್ಜಾಗಿದೆ. ಕ್ರೀಡಾಭಿಮಾನಿಗಳ ಬಹುನಿರೀಕ್ಷಿತ ಈ ಟೂರ್ನಿಯು ಮೇ 2 ಮತ್ತು 3, 2026ರಂದು ಮೇಕೇರಿಯ ಸಿರಿಮನೆ ಮೈದಾನದಲ್ಲಿ ಅದ್ಧೂರಿಯಾಗಿ ನಡೆಯಲಿದೆ.

ಕಳೆದ ನಾಲ್ಕು ವರ್ಷಗಳಿಂದ ಯಶಸ್ವಿಯಾಗಿ ನಡೆದುಕೊಂಡು ಬರುತ್ತಿರುವ ಈ ಲೀಗ್, ಈ ಬಾರಿ ಮತ್ತಷ್ಟು ವಿಶೇಷತೆಗಳೊಂದಿಗೆ ಕ್ರೀಡಾ ಪ್ರೇಮಿಗಳನ್ನು ರಂಜಿಸಲು ಸಿದ್ಧವಾಗಿದೆ. ಕೇವಲ ಕ್ರಿಕೆಟ್ ಮಾತ್ರವಲ್ಲದೆ, ಸಾಂಸ್ಕೃತಿಕ ಸೊಗಡನ್ನೂ ಮೈಗೂಡಿಸಿಕೊಂಡಿರುವ ಈ ಕ್ರೀಡಾ ಹಬ್ಬಕ್ಕೆ ಮೇಕೇರಿ ಪರಿಸರ ಈಗಿನಿಂದಲೇ ಸಿಂಗಾರಗೊಂಡಿದೆ.

ವಿಶೇಷ ಆಕರ್ಷಣೆ: ಸಂಗೀತ ರಸಸಂಜೆ
ಈ ಬಾರಿಯ ಎಂ.ಸಿ.ಎಲ್‌ನ ಪ್ರಮುಖ ಆಕರ್ಷಣೆಯಾಗಿ ಮೇ 3ರಂದು ಸಂಜೆ ಅದ್ಧೂರಿ ಸಂಗೀತ ಕಾರ್ಯಕ್ರಮ ಆಯೋಜಿಸಲಾಗಿದೆ. ಖ್ಯಾತ ಗಾಯಕರಾದ ತೀರ್ಥಹಳ್ಳಿ ರಮೇಶ್ ಮತ್ತು ತಂಡದವರಿಂದ ಸಂಗೀತ ರಸಸಂಜೆ ನಡೆಯಲಿದ್ದು, ಗಾಯನ ಸುಧೆಯ ಮೂಲಕ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಲಿದ್ದಾರೆ “ಮಲೆನಾಡಿನ ಕ್ರೀಡಾ ಪ್ರತಿಭೆಗಳಿಗೆ ವೇದಿಕೆ ಕಲ್ಪಿಸುವ ಉದ್ದೇಶದಿಂದ ಈ ಲೀಗ್ ನಡೆಸಲಾಗುತ್ತಿದೆ. ಸತತ 5ನೇ ವರ್ಷದ ಈ ಸಂಭ್ರಮಕ್ಕೆ ಎಲ್ಲರೂ ಸಾಕ್ಷಿಯಾಗಬೇಕು” ಎಂದು ಟೀಮ್ ಎಂ.ಸಿ.ಎಲ್ (MCL) ಪ್ರಕಟಣೆಯಲ್ಲಿ ತಿಳಿಸಿದೆ. ಎರಡು ದಿನಗಳ ಕಾಲ ನಡೆಯುವ ಈ ಕ್ರೀಡಾ ಹಬ್ಬಕ್ಕೆ ಮಲೆನಾಡಿನ ಜನತೆಗೆ ತಂಡವು ಪ್ರೀತಿಯ ಆದರದ ಸುಸ್ವಾಗತವನ್ನು ಕೋರಿದೆ.

Categories
ರಾಜ್ಯ ಹವಾಮಾನ ಸುದ್ದಿ

ಮೇ 25ರಂದು ಮುಂಗಾರಿನ ಆಗಮನ..!

ಮೇ 25ರಂದು ಮುಂಗಾರಿನ ಆಗಮನ..!
– ಈ ವರ್ಷ ಭಾರೀ ಮಳೆ ನಿರೀಕ್ಷೆ: ವರದಿ ಏನು..?
– ಮೇ ಮೊದಲ ವಾರದಲ್ಲೇ ಮಳೆ ಸಾಧ್ಯತೆ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಕೇರಳ: ಕಳೆದ ವರ್ಷದಂತೆ ಈ ಬಾರಿಯೂ ಮುಂಗಾರು ಮಳೆ ಅವಧಿಗೂ ಮೊದಲೇ ಪ್ರಾರಂಭಗೊಳ್ಳುವ ಸಾಧ್ಯತೆ ಇದೆ. ಸಾಮಾನ್ಯವಾಗಿ ನೈರುತ್ಯ ಮುಂಗಾರು ಮಾರುತಗಳು ಕೇರಳ ಕರಾವಳಿಗೆ ಜೂನ್ ಒಂದಕ್ಕೆ ಆಗಮಿಸುವುದು ವಾಡಿಕೆ. ಆದರೆ, ಈ ಬಾರಿ ಮೇ ತಿಂಗಳ ಅಂತ್ಯದಲ್ಲಿ ಅಂದರೆ 25ನೇ ತಾರೀಖಿನ ಸುಮಾರಿಗೆ ಇದರ ಆಗಮನವಾಗುವ ನಿರೀಕ್ಷೆ ಇದೆ ಎಂದು ವಿದೇಶಿ ಹವಾಮಾನ ಮುನ್ಸೂಚನಾ ಸಂಸ್ಥೆಗಳು ವರದಿ ಮಾಡಿವೆ.

ಪ್ರಬಲ ಮುಂಗಾರು ಮಾರುತಗಳು ಅರಬ್ಬಿ ಸಮುದ್ರದ ದಕ್ಷಿಣ ಭಾಗದಲ್ಲಿ ರೂಪುಗೊಳ್ಳುವುದರಿಂದ ಕೇರಳ ರಾಜ್ಯ ಮತ್ತು ತಮಿಳುನಾಡಿನ ದಕ್ಷಿಣ ಭಾಗಗಳಿಗೆ ಹೆಚ್ಚಿನ ತೇವಾಂಶ ಉಂಟಾಗಲಿದೆ ಎನ್ನುವ ಮಾಹಿತಿ ಲಭಿಸಿದೆ.‌ ಇದರ ಪರಿಣಾಮವಾಗಿ ಮುಂಗಾರಿನ ಕೇರಳ ಪ್ರವೇಶ ಮೇ 25ರ ವೇಳೆಗಾಗಲೇ ನಡೆಯುವ ಅವಕಾಶವಿದೆ ಎಂದು ಇಸಿಎಂಡಬ್ಲ್ಯೂಎಫ್ ಹವಾಮಾನ ಮುನ್ಸೂಚನೆ ವರದಿಯನ್ನು ಪ್ರಕಟಿಸಿದೆ ಎನ್ನುವ ಸಂಗತಿ ತಿಳಿದುಬಂದಿದೆ. ಎಲ್ ನಿನೊ ಅಥವಾ ಸೂಪರ್ ಎಲ್ ನಿನೊ ಪ್ರಭಾವದಿಂದಾಗಿ ಈ ವರ್ಷ ಮುಂಗಾರಿನ ಅವಧಿಯಲ್ಲಿ ಶೇಕಡ 92ರಷ್ಟು ಸರಾಸರಿ ಮಳೆಯನ್ನು ನಿರೀಕ್ಷಿಸಬಹುದಾಗಿದೆ ಎಂದು ಭಾರತೀಯ ಹವಾಮಾನ ಇಲಾಖೆಯು ಸಹ ಅಭಿಪ್ರಾಯ ವ್ಯಕ್ತಪಡಿಸಿದೆ.

ಏಪ್ರಿಲ್ 13ರ ಮುನ್ನೋಟದ ಪ್ರಕಾರ ಮೇ ತಿಂಗಳಿನಿಂದ ಜುಲೈ ತಿಂಗಳವರೆಗೆ ಎಲ್ ನಿನೊ ಶೇಕಡ 61ರಷ್ಟು ಎದುರಾಗುವ ಸಾಧ್ಯತೆಗಳಿವೆ. ಕಳೆದ ವರ್ಷ ಅಂದರೆ 2025ರಲ್ಲಿ ಕೂಡ ಇದೇ ತೆರನಾಗಿ ಮುಂಗಾರು ಮಾರುತಗಳ ಆಗಮನದ ಕುರಿತು ಮುನ್ಸೂಚನಾ ವರದಿ ಪ್ರಕಟವಾಗಿತ್ತು. ಆದರೆ, ಹೇಳಿದ್ದಕ್ಕಿಂತ ಇನ್ನೂ ಮುಂಚಿತವಾಗಿಯೇ ಆಗಮನವಾಯಿತು. ಈ ವರ್ಷವೂ ಕೂಡ ಅದೇ ರೀತಿಯಾಗುವ ಸಾಧ್ಯತೆ ಇದೆ ಎಂದು ಮೌಸಮ್ ತಕ್ ನ ಸಂಸ್ಥಾಪಕರು ಹಾಗೂ ಹೆಸರಾಂತ ಹವಾಮಾನ ತಜ್ಞರಾದ ದೇವೇಂದ್ರ ತ್ರಿಪಾಠಿಯವರು ತಿಳಿಸಿದ್ದಾರೆ.

Categories
ಉಡುಪಿ ಕರಾವಳಿ ಕಾರ್ಕಳ ದಕ್ಷಿಣ ಕನ್ನಡ ಬೆಳ್ತಂಗಡಿ

ಕರಾವಳಿ ಟಾಪ್ ನ್ಯೂಸ್

ಕರಾವಳಿ ಟಾಪ್ ನ್ಯೂಸ್

• ಬೆಳ್ತಂಗಡಿ: ವಿಷ ಸೇವಿಸಿ ಯುವತಿ ಆತ್ಮಹತ್ಯೆ
• ಉಡುಪಿ: ಸ್ವಚ್ಛತೆಯ ಸಂದರ್ಭದಲ್ಲಿ ಬಾವಿಗೆ ಬಿದ್ದ ವ್ಯಕ್ತಿಯ ರಕ್ಷಣೆ
• ಧರ್ಮಸ್ಥಳ: ರಸ್ತೆ ಅಪಘಾತ; ಚಾಲಕರಿಗೆ ಗಾಯ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್

• ಬೆಳ್ತಂಗಡಿ: ವಿಷ ಸೇವಿಸಿ ಯುವತಿ ಆತ್ಮಹತ್ಯೆ

ಬೆಳ್ತಂಗಡಿ: ಯುವತಿಯೊಬ್ಬಳು ಪ್ರೀತಿಯ ಕಾರಣಕ್ಕಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದು, ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿರುವ ಘಟನೆ ನಡೆದಿದೆ. ಮೃತ ಯುವತಿಯನ್ನು ಬೆಳಾಲು ಗ್ರಾಮದ ಬಾಳೆಮಂಡಿಕಲ್ಲು ನಿವಾಸಿ ರಮಾ ಎಂದು ಗುರುತಿಸಲಾಗಿದೆ. ಏಪ್ರಿಲ್ 19ರಂದು ರಮಾ ಇಲಿಪಾಷಾಣ ಸೇವಿಸಿ ಅತ್ಮಹತ್ಯೆಗೆ ಪ್ರಯತ್ನಿಸಿದ್ದಳು. ತಕ್ಷಣ ಅವಳನ್ನು ಮಂಗಳೂರಿನ ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ಕೊಡಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಏಪ್ರಿಲ್ 29ರಂದು ಸಾವನ್ನಪ್ಪಿದ್ದಾಳೆ ಎನ್ನುವ ಸಂಗತಿ ತಿಳಿದುಬಂದಿದೆ. ಘಟನೆಗೆ ಸಂಬಂಧಿಸಿದಂತೆ ಏಪ್ರಿಲ್ 30ರಂದು ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ರಮಾ ವಾಮದಪದವು ಕಾಲೇಜ್ ನಲ್ಲಿ ಎರಡನೇ ವರ್ಷದ ಪದವಿ ವ್ಯಾಸಂಗ ಮಾಡುತ್ತಿದ್ದು, ಯುವಕನೊಬ್ಬನನ್ನು ಪ್ರೀತಿಸುತ್ತಿದ್ದಳು. ಈ ವಿಚಾರವಾಗಿ ಆಕೆ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎನ್ನುವ ಮಾಹಿತಿ ಲಭಿಸಿದೆ. ತನಿಖೆಯ ಬಳಿಕ ಇನ್ನಷ್ಟೇ ಹೆಚ್ಚಿನ ಮಾಹಿತಿ ಲಭಿಸಬೇಕಿದೆ.

• ಉಡುಪಿ: ಸ್ವಚ್ಛತೆಯ ಸಂದರ್ಭದಲ್ಲಿ ಬಾವಿಗೆ ಬಿದ್ದ ವ್ಯಕ್ತಿಯ ರಕ್ಷಣೆ

ಉಡುಪಿ: ಬಾವಿಯ ಸ್ವಚ್ಛತೆಗೆ ಇಳಿದಿದ್ದ ವ್ಯಕ್ತಿಯೊಬ್ಬರು ಕೆಲಸ ಮುಗಿಸಿ ಮೇಲೆ ಬರುತ್ತಿದ್ದ ಸಮಯದಲ್ಲಿ, ಆಯಾತಪ್ಪಿ ಕಾಲು ಜಾರಿ ಬಾವಿಗೆ ಬಿದ್ದ ಘಟನೆ, ಕೊರಂಗ್ರಪಾಡಿ ಎನ್ನುವಲ್ಲಿ ನಡೆದಿದೆ. ಶ್ರೀಶ ಎನ್ನುವವರು ಮನೆಯ ಸಮೀಪದಲ್ಲಿದ್ದ 35 ಅಡಿ ಆಳದ ಬಾವಿಯನ್ನು ಸ್ವಚ್ಛಗೊಳಿಸಲೆಂದು ಇಳಿದಿದ್ದರು ಎನ್ನಲಾಗಿದೆ. ಸ್ವಚ್ಛತೆಯನ್ನು ಮುಗಿಸಿ ಬಾವಿಯೊಳಗಿನಿಂದ ಮೇಲೆ ಬರುವ ಸಂದರ್ಭದಲ್ಲಿ ಕಾಲು ಜಾರಿ ಬಾವಿಗೆ ಬಿದ್ದು ನೀರಿನಲ್ಲಿ ಸಿಲುಕಿದ್ದರು.

ಆಗ ಶ್ರೀಶ ಅವರ ಮನೆಯವರು ಅಗ್ನಿಶಾಮಕ ದಳಕ್ಕೆ ಕರೆ ಮಾಡಿ ಮಾಹಿತಿ ತಿಳಿಸಿದ್ದಾರೆ. ವಿಚಾರ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಆಗಮಿಸಿದ ಅಗ್ನಿಶಾಮಕ ದಳದ ಸಿಬ್ಬಂದಿಗಳಾದ ಸತೀಶ್, ಅಶ್ವಿನ್ ಸನಿಲ್, ಮಹಾಬಲೇಶ್ವರ, ಹರಿಕಾಂತ್, ಭರತ್ ಎನ್, ಸಂತೋಷ್ ಶೆಟ್ಟಿ, ಅಮರ್ ಕಟ್ಟಿ ಮತ್ತು ರಾಕೇಶ್ ಅವರು ಕಾರ್ಯಾಚರಣೆ ನಡೆಸಿ ಶ್ರೀಶ ಅವರನ್ನು ರಕ್ಷಿಸಿದ್ದಾರೆ ಎನ್ನುವ ಸಂಗತಿ ತಿಳಿದುಬಂದಿದೆ.

• ಧರ್ಮಸ್ಥಳ: ರಸ್ತೆ ಅಪಘಾತ; ಚಾಲಕರಿಗೆ ಗಾಯ

ಧರ್ಮಸ್ಥಳ: ಎರಡು ಕಾರುಗಳ ನಡುವೆ ಅಪಘಾತ ಸಂಭವಿಸಿರುವ ಘಟನೆ, ಗುರುವಾರದಂದು ನೀರಚಿಲುಮೆ ಸಿದ್ದಾವಣ ನರ್ಸರಿ ಸಮೀಪದಲ್ಲಿ ನಡೆದಿದೆ. ಉಜಿರೆ ಕಡೆಯಿಂದ ಧರ್ಮಸ್ಥಳದ ಕಡೆಗೆ ಸಾಗುತ್ತಿದ್ದ ಮಂಡ್ಯ ಮೂಲದ ಕಾರು ಮತ್ತು ಧರ್ಮಸ್ಥಳದಿಂದ ಉಜಿರೆಯ ಕಡೆಗೆ ತೆರಳುತ್ತಿದ್ದ ಉಡುಪಿಯ ಕಾರಿನ ನಡುವೆ ಚಾಲಕರ ನಿಯಂತ್ರಣ ತಪ್ಪಿ ಪರಸ್ಪರ ಢಿಕ್ಕಿ ಸಂಭವಿಸಿದೆ. ಪರಿಣಾಮವಾಗಿ ಎರಡೂ ಕಾರಿನ ಚಾಲಕರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ತಕ್ಷಣ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎನ್ನುವ ಮಾಹಿತಿ ಲಭಿಸಿದೆ ಅಪಘಾತದ ರಭಸಕ್ಕೆ ಎರಡೂ ಕಾರುಗಳಿಗೂ ಹಾನಿಯಾಗಿದೆ ಎನ್ನಲಾಗಿದೆ. ಮಾಹಿತಿ ಲಭಿಸುತ್ತಿದಂತೆ ಸ್ಥಳಕ್ಕೆ ಆಗಮಿಸಿದ ಬೆಳ್ತಂಗಡಿ ಸಂಚಾರಿ ಠಾಣಾ ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ ಎನ್ನುವ ಸಂಗತಿ ತಿಳಿದುಬಂದಿದೆ.

Categories
ರಾಜ್ಯ ರಾಷ್ಟ್ರೀಯ ವಾರ್ತೆ ವಿಶೇಷ ಸುದ್ದಿ

ಭಾರತದಲ್ಲಿ ಈಗ ಎಲೆಕ್ಟ್ರಿಕಲ್ ವಾಹನ ಹವಾ!

ಭಾರತದಲ್ಲಿ ಈಗ ಎಲೆಕ್ಟ್ರಿಕಲ್ ವಾಹನ ಹವಾ!
– ಕಾರು, ಬೈಕ್, ಆಟೋ, ಬಸ್, ಗೂಡ್ಸ್ ವಾಹನವೂ ಇವಿ
– ಪೆಟ್ರೋಲ್, ಡೀಸೆಲ್ ನಂಬೋದು ಕಷ್ಟ: ಇವಿ ಇಷ್ಟ..!

ಭಾರತದಲ್ಲಿ ಈಗ ಇವಿ ವಾಹನಗಳ ಹವಾ ಶುರುವಾಗಿದೆ. 2026ರ ಹೊತ್ತಿಗೆ ಭಾರತೀಯ ಎಲೆಕ್ಟ್ರಿಕ್ ವಾಹನ (EV) ಮಾರುಕಟ್ಟೆಯು ಅತ್ಯಂತ ವೇಗವಾಗಿ ಬೆಳೆಯುತ್ತಿದ್ದು, ಪ್ರಮುಖ ಬ್ರ್ಯಾಂಡ್‌ಗಳು ತಮ್ಮ ಹೊಸ ಮಾದರಿಗಳನ್ನು ಬಿಡುಗಡೆ ಮಾಡಿವೆ. ಭಾರತೀಯರು ಎಲೆಕ್ಟ್ರಿಕ್ ವಾಹನಗಳ ಬಳಕೆಗೆ ಹೆಚ್ಚಿನ ಆಸಕ್ತಿ ತೋರಿದ್ದಾರೆ. ಕಳೆದ ಕೆಲವು ವರ್ಷಗಳಿಂದ ವಿದ್ಯುತ್ ಚಾಲಿತ ವಾಹನಗಳು ಜನಪ್ರಿಯತೆಯನ್ನು ಪಡೆದುಕೊಳ್ಳುತ್ತಿದ್ದು, ಒಮ್ಮೆ ಚಾರ್ಜ್ ಮಾಡಿದರೆ ಅದಕ್ಕೆ ಅನುಗುಣವಾಗಿ ಕೆಲವು ಕಿಲೋಮೀಟರ್ ವರೆಗೂ ಪ್ರಯಾಣಿಸುವ ಅವಕಾಶವಿದೆ. ಅಂದರೆ ವಾಹನಗಳ ಬೆಲೆಗೆ ತಕ್ಕಂತೆ ಚಾರ್ಜ್ ಮತ್ತು ಚಲಾಯಿಸುವ ಅಂತರ ಹೆಚ್ಚು ಕಡಿಮೆಯಾಗುತ್ತದೆ. ಕೆಲವೊಮ್ಮೆ ಸಾರ್ವಜನಿಕ ಚಾರ್ಜಿಂಗ್ ಕೇಂದ್ರಗಳಲ್ಲೂ ಚಾರ್ಜ್ ಮಾಡಿಕೊಂಡು ಮುಂದೆ ಪ್ರಯಾಣಿಸುವ ಅವಕಾಶ ಕೂಡ ಇದೆ.

ಎಲೆಕ್ಟ್ರಿಕ್ ಕಾರಿಗೆ ಡಿಮ್ಯಾಂಡ್ ಡಿಮ್ಯಾಂಡ್!

ಎಲೆಕ್ಟ್ರಿಕ್ ಕಾರುಗಳ ಬೆಲೆ 6.31 ಲಕ್ಷದಿಂದ 89.99 ಲಕ್ಷದವರೆಗೆ ಲಭ್ಯವಿದೆ. ಪರಿಸರ ಸ್ನೇಹಿಯಾಗಿರುವ ಇದನ್ನು ಈಗಾಗಲೇ ಭಾರತದಲ್ಲಿ ಸಾಕಷ್ಟು ಜನರು ಬಳಸುತ್ತಿದ್ದು, ಮುಂಬರುವ ದಿನಗಳಲ್ಲಿ ಈ ರೀತಿ ಪೆಟ್ರೋಲ್ ಮತ್ತು ಡೀಸೆಲ್ ಗಗನ ಕುಸುಮವಾದರೆ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಎಲೆಕ್ಟ್ರಿಕ್ ವಾಹನಗಳು ಬಳಕೆಗೆ ಬರಲಿದೆ ಎಂದು ಅಂದಾಜಿಸಲಾಗುತ್ತಿದೆ. ಭಾರತದಲ್ಲಿಯೂ ಕೂಡ ಎಲೆಕ್ಟ್ರಿಕ್ ವಾಹನಗಳ ಮಾರುಕಟ್ಟೆಯು ಅತ್ಯಂತ ವೇಗವಾಗಿ ಬೆಳೆಯುತ್ತಿದ್ದು, 2024 ರಲ್ಲೇ ಸುಮಾರು ಎರಡು ದಶಲಕ್ಷಕ್ಕೂ ಹೆಚ್ಚು ಎಲೆಕ್ಟ್ರಿಕ್ ವಾಹನಗಳು ಮಾರಾಟ ಕಂಡಿದೆ. ಅದರಲ್ಲೂ ದ್ವಿಚಕ್ರ ಮತ್ತು ಮೂರು ಚಕ್ರದ ವಾಹನಗಳ ವಿಭಾಗದಲ್ಲಿ ಹೆಚ್ಚಿನ ಬೇಡಿಕೆ ಇದೆ ಎನ್ನಲಾಗಿದ್ದು, ಆಟೋಮೊಬೈಲ್ ಮಾರಾಟದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಪಾಲು ಶೇಕಡ ಏಳರಿಂದ ಎಂಟರಷ್ಟಿದೆ.

ಸರ್ಕಾರದಿಂದಲೂ ಇವಿಗೆ ಬೆಂಬಲ!

ಫೇಮ್, ಇಎಂಪಿಎಸ್ ನಂತಹ ಸಬ್ಸಿಡಿಗಳು ಮತ್ತು ಚಾರ್ಜಿಂಗ್ ಸ್ಟೇಷನ್ ಗಳ ಹೆಚ್ಚಳ ಹಾಗೂ ಕಡಿಮೆ ನಿರ್ವಹಣಾ ವೆಚ್ಚದಿಂದಾಗಿ ಎಲೆಕ್ಟ್ರಾನಿಕ್ ವಾಹನಗಳ ಅಳವಡಿಕೆಯ ದರ ಕೂಡ ಹೆಚ್ಚಳವಾಗುತ್ತಿದೆ. ಈಗಾಗಲೇ ಸರ್ಕಾರವೂ ಕೂಡ 2030ರ ಒಳಗಾಗಿ ಮಾರಾಟವಾಗುವ ವಾಹನಗಳಲ್ಲಿ ಶೇಕಡ 30ರಷ್ಟು ಎಲೆಕ್ಟ್ರಾನಿಕ್ ವಾಹನಗಳು ಇರಬೇಕೆಂಬ ಗುರಿಯನ್ನು ಹೊಂದಿದೆ. ಕೇವಲ 2025 ಜುಲೈ ತಿಂಗಳೊಂದರಲ್ಲೇ 29.೦೦೦ಕ್ಕೂ ಹೆಚ್ಚಿನ ಸಾರ್ವಜನಿಕ ಚಾರ್ಜಿಂಗ್ ಕೇಂದ್ರಗಳನ್ನು ತೆರೆದಿರುವುದು ಎಲೆಕ್ಟ್ರಿಕ್ ವಾಹನಗಳಿಗಿರುವ ಬೇಡಿಕೆಗೆ ಸಾಕ್ಷಿಯಾಗಿದೆ.

ಕರ್ನಾಟಕ ಮುಂಚೂಣಿಯಲ್ಲಿದೆ…!

ಕರ್ನಾಟಕ, ತಮಿಳುನಾಡು ದೆಹಲಿ ಮತ್ತು ಉತ್ತರ ಪ್ರದೇಶದಂತಹ ರಾಜ್ಯಗಳು ಎಲೆಕ್ಟ್ರಾನಿಕ್ ವಾಹನಗಳ ಅಳವಡಿಕೆಯಲ್ಲಿ ಮುಂಚೂಣಿಯಲ್ಲಿದ್ದು, ಪೆಟ್ರೋಲ್ ಮತ್ತು ಡೀಸೆಲ್ ನ ಪೂರೈಕೆಯಲ್ಲಿನ ವ್ಯತ್ಯಯ, ಬೆಲೆ ಏರಿಕೆಯಿಂದಾಗಿ ಇನ್ನು ಹೆಚ್ಚಿನ ಜನರು ಎಲೆಕ್ಟ್ರಾನಿಕ್ ವಾಹನಗಳನ್ನು ಖರೀದಿಸಿ ಬಳಸುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ಇದರಿಂದ ಪರಿಸರ ಮಾಲಿನ್ಯವನ್ನು ಕೂಡ ತಡೆಗಟ್ಟುವ ಒಂದು ಉತ್ತಮ ಕಾರ್ಯವನ್ನು ಕೂಡ ನಿರ್ವಹಿಸಿದಂತಾಗುತ್ತದೆ.

ಯಾವ ಯಾವ ಬ್ರಾಂಡ್ ಇವಿ ಇದೆ?

ದೇಶದ ಪ್ರತಿಷ್ಠಿತ ಕಾರು ಬ್ರಾಂಡ್ ಗಳಾದ ಟಾಟಾ, ಮಾರುತಿ, ಹೋಂಡಾಯಿ, ಕಿಯಾ, ಟೊಯೋಟಾ, ವೊಲ್ಸ್ ವಾಗನ್, ಎಂ ಜಿ, ಮಹೇಂದ್ರ, ರೇನಾಲ್ಟ್, ಬೆಂಜ್ ಸೇರಿ ಎಲ್ಲಾ ಕಂಪನಿಗಳು ಇವಿ ಕಾರು ಮಾರುಕಟ್ಟೆಯಲ್ಲಿ ಭಾರೀ ಪೈಪೋಟಿ ನೀಡುತ್ತಿವೆ. ಇವಿಗಳಲ್ಲಿ ದ್ವಿಚಕ್ರ ಮತ್ತು ತ್ರಿಚಕ್ರ ವಾಹನಗಳ ಪಾಲು ಅತಿ ಹೆಚ್ಚಿದೆ. ​ದ್ವಿಚಕ್ರ ವಾಹನಗಳು (e-2W) ಇವಿಗಳಲ್ಲಿ ಸುಮಾರು 55-60% ರಷ್ಟು ಪಾಲನ್ನು ಹೊಂದಿವೆ., ಓಲಾ, ಟಿವಿಎಸ್ ಮತ್ತು ಬಜಾಜ್ ಕಂಪನಿಗಳು ಇಲ್ಲಿ ಮುಂಚೂಣಿಯಲ್ಲಿವೆ. ​ತ್ರಿಚಕ್ರ ವಾಹನಗಳ ಸುಮಾರು 30-35% ಪಾಲು ಹೊಂದಿದ್ದು, ಸರಕು ಸಾಗಣೆ ಮತ್ತು ಆಟೋ ರಿಕ್ಷಾಗಳಲ್ಲಿ ಇವು ಅತಿ ಹೆಚ್ಚು ಬಳಕೆಯಲ್ಲಿವೆ. ಇವಿ ​ನಾಲ್ಕು ಚಕ್ರದ ವಾಹನಗಳು ಮಾರುಕಟ್ಟೆಯಲ್ಲಿ ಸುಮಾರು 5% ರಷ್ಟು ಪಾಲನ್ನು ಹೊಂದಿವೆ. ಟಾಟಾ ಮೋಟಾರ್ಸ್ ಈ ವಿಭಾಗದಲ್ಲಿ 43% ಕ್ಕಿಂತ ಹೆಚ್ಚು ಮಾರುಕಟ್ಟೆ ಪಾಲು ಹೊಂದಿದೆ. ಎಲೆಕ್ಟ್ರಿಕ್ ಬಸ್‌ಗಳು ಕೂಡ ಭಾರತದಲ್ಲಿವೆ. ಸಾರ್ವಜನಿಕ ಸಾರಿಗೆಯಲ್ಲಿ ಇವುಗಳ ಸಂಖ್ಯೆ ವೇಗವಾಗಿ ಹೆಚ್ಚುತ್ತಿದ್ದು, ಈಗ ಸಾವಿರಾರು ಸಂಖ್ಯೆಯಲ್ಲಿವೆ. ಸಾಗಾಣಿಕೆ ವಾಹನ ಕೂಡ ಎಲೆಕ್ಟ್ರಿಕ್ ಬರುತ್ತಿದೆ.