ಅಂದು ಖ್ಯಾತ ಟೇಬಲ್ ಟೆನ್ನಿಸ್ ಕೋಚ್, ಇಂದು ಆಟೋ ಚಾಲಕ!
– ಸಮಾಜಕ್ಕೆ ಮಾದರಿಯಾಗಿರುವ ರಾಜ್ಯ ಮಟ್ಟದ ಟೆನ್ನಿಸ್ ಆಟಗಾರ!
– ಯಾವುದೇ ಹಿಂಜರಿಕೆ ಇಲ್ಲದ ಸ್ವಾಭಿಮಾನಿ ಉದ್ಯಮಿ ಗುರುಮೂರ್ತಿ ಎನ್
NAMMUR EXPRESS NEWS
ಬೆಂಗಳೂರು: ಬೆಂಗಳೂರಿನ ಆಟೋ ರಿಕ್ಷಾ ಚಾಲಕನ ಹಿಂದೆ ಈ ರೀತಿಯಾಗಿ ಬರೆದಿತ್ತು, “ನಾನು ವೃತ್ತಿಪರ ಟಿಟಿ ತರಬೇತುದಾರ, TT ತರಬೇತಿ ಪಡೆಯಲು ಬಯಸುವ ಯಾರಾದರು ನನ್ನ ಸಂಪರ್ಕಿಸಬಹುದು ಅಥವಾ ಆಸಕ್ತರಿಗೆ ನನ್ನ ಸಂಪರ್ಕವನ್ನು ಹಂಚಿಕೊಳ್ಳಬಹುದು.
ಗುರುಮೂರ್ತಿ ಎನ್ 7899210897”.
ಹೌದು ಅವರು ತಮ್ಮ ಆಟೋ ರಿಕ್ಷಾ ಕಾಯಕವನ್ನು ಶ್ರದ್ಧೆಯಿಂದ ನಿರ್ವಹಿಸುತ್ತಿದ್ದಾರೆ. ಈ ಆಟೋ ರಿಕ್ಷಾ ಚಾಲಕ ಬೇರೆ ಯಾರು ಅಲ್ಲ, ಕರ್ನಾಟಕ ಟೇಬಲ್ ಟೆನ್ನಿಸ್ ತಂಡದ ಮಾಜಿ ಕೋಚ್ ಗುರುಮೂರ್ತಿ ಎನ್.
ಗುರುಮೂರ್ತಿ ಅವರು ಕೋವಿಡ್-19 ಬರುವವರೆಗೂ ಕರ್ನಾಟಕ ಟೇಬಲ್ ಟೆನ್ನಿಸ್ ತಂಡದ ಕೋಚ್ ಆಗಿದ್ದರು. ಕೋವಿಡ್ ವೇಳೆ ಅದೆಷ್ಟೋ ಜನರ ಬದುಕು ಬೀದಿ ಬದಿಗೆ ಬಂದಿತ್ತು. ಗುರುಮೂರ್ತಿ ಅವರು ಕೂಡ ಕೋವಿಡ್ ಪರಿಣಾಮವನ್ನು ಎದುರಿಸಬೇಕಾಯಿತು.
ಬೆಂಗಳೂರಿನ ಮಲ್ಲೇಶ್ವರಂ ಮೂಲದವರಾದ ಗುರುಮೂರ್ತಿ ವೃತ್ತಿಪರ ಟೇಬಲ್ ಟೆನ್ನಿಸ್ ಆಟಗಾರ. ಜೊತೆಗೆ ಕೋವಿಡ್ ಸಂದರ್ಭದಲ್ಲಿ ಕರ್ನಾಟಕ ಟೇಬಲ್ ಟೆನ್ನಿಸ್ ತಂಡದ ಕೋಚ್ ಆಗಿದ್ದ ಅವರು ಕಾರಣಾಂತರಗಳಿಂದ ತಮ್ಮ ಹುದ್ದೆಯನ್ನು ಕಳೆದುಕೊಳ್ಳಬೇಕಾಯಿತು.
ಇದಾದ ನಂತರ ಧೈರ್ಯ ಕಳೆದುಕೊಳ್ಳದ ಗುರುಮೂರ್ತಿ ಸ್ವಂತ ಉದೋಗ್ಯ ಶುರು ಮಾಡಿದರು. ಯಾವುದೇ ಹಿಂಜರಿಕೆ ಇಲ್ಲದೆ ಗುರುಮೂರ್ತಿ ಸ್ವಾಭಿಮಾನಿ ಆಟೋ ರಿಕ್ಷಾ ಚಾಲಕರಾಗಿದ್ದಾರೆ. ಅಂದು ಖ್ಯಾತ ಟೇಬಲ್ ಟೆನ್ನಿಸ್ ಕೋಚ್ ಆಗಿದ್ದ ಗುರುಮೂರ್ತಿ ಇಂದು ಆಟೋ ರಿಕ್ಷಾ ಚಾಲಕರಾಗುವ ಮೂಲಕ ಸಮಾಜಕ್ಕೆ ಮಾದರಿಯಾಗಿದ್ದಾರೆ. ಗುರುಮೂರ್ತಿ ಅವರು ದಿನನಿತ್ಯ ಬೆಂಗಳೂರು ನಗರದಲ್ಲಿ ಆಟೋ ರಿಕ್ಷಾ ಓಡಿಸುವ ಮೂಲಕ ಜೀವನ ನಡೆಸುತ್ತಿದ್ದಾರೆ.
