Categories
ಬೆಂಗಳೂರು ರಾಜ್ಯ

ಅಯ್ಯೋ ಬಿಯರ್ ಭಾರ!

ಅಯ್ಯೋ ಬಿಯರ್ ಭಾರ!
– ಮದ್ಯ ಪ್ರಿಯರಿಗೆ ಶಾಕ್ ಕೊಟ್ಟ ರಾಜ್ಯ ಸರ್ಕಾರ!
– 3ನೇ ಬಾರಿಗೆ ಬಿಯರ್ ದರ ಏರಿಕೆ
– ಬಾಟಲ್‌ಗೆ 5 ರಿಂದ 12 ರೂ.ವರೆಗೆ ಹೆಚ್ಚಳ

NAMMUR EXPRESS NEWS
ಬೆಂಗಳೂರು: ಬಿಯರ್ ದರ ಫೆಬ್ರವರಿ 1 ರಿಂದ ಪ್ರತಿ ಬಾಟಲ್‌ಗೆ 5 ರೂಪಾಯಿಗಳಿಂದ 12 ರೂಪಾಯಿವರೆಗೂ ಹೆಚ್ಚಳವಾಗಲಿದೆ. ಸರ್ಕಾರ ಬಿಯ‌ರ್ ಮೇಲಿನ ಹೆಚ್ಚುವರಿ ಅಬಕಾರಿ ಸುಂಕವನ್ನು ಶೇ.185 ರಿಂದ 195 ಕ್ಕೆ ಹೆಚ್ಚಳ ಮಾಡಿರುವುದರಿಂದ ಬಿಯರ್ ಬೆಲೆ ಏರಿಕೆಯಾಗಿದೆ ಎಂದು ಮೂಲಗಳು ತಿಳಿಸಿವೆ. ಇನ್ನು ಅಬಕಾರಿ ಇಲಾಖೆ ಮೊದಲಿಗೆ ಸುಂಕ ಹೆಚ್ಚಳ ಕುರಿತಂತೆ ಕರಡನ್ನು ಪ್ರಕಟಿಸಿತ್ತು. ಬಳಿಕ ಸಲ್ಲಿಕೆಯಾದ ಆಕ್ಷೇಪಣೆ ಪರಿಗಣಿಸಿ ಇದೀಗ ಸುಂಕ ಏರಿಕೆಯ ಕುರಿತು ಬುಧವಾರ ಅಂತಿಮ ಆದೇಶ ಹೊರಡಿಸಿದೆ. ಅದರಂತೆ ಬಿಯರ್ ದರ ಹೆಚ್ಚಳವಾಗಲಿದೆ. ಬ್ರಾಂಡ್ ಆಧಾರದ ಮೇಲೆ ದರ ಏರಿಕೆ: ಬ್ರಾಂಡ್‌ಗಳ ಆಧಾರದ ಮೇಲೆ ದರ ಏರಿಕೆಯಾಗಲಿದೆ.

ಸಾಮಾನ್ಯ ಬ್ರಾಂಡ್‌ಗಳಿಂದ ಪ್ರೀಮಿಯಂ ಬ್ರಾಂಡ್‌ಗಳವರೆಗೆ ಎಲ್ಲಾ ಬಗೆಯ ಬಿಯರ್ ದರ ಹೆಚ್ಚಳವಾಗಲಿದೆ. ರಾಜ್ಯದಲ್ಲಿ ಬಿಯರ್ ದರ ಹೆಚ್ಚಳವಾಗುತ್ತಿರುವುದು ಕಳೆದ ಏಳು ತಿಂಗಳಲ್ಲಿ ಇದು ಮೂರನೇ ಬಾರಿ. 6 ತಿಂಗಳಲ್ಲಿ 40 ರೂಪಾಯಿ ಹೆಚ್ಚಳ: ರಾಜ್ಯದಲ್ಲಿ ವಿಧಾನಸಭಾ ಚುನಾವಣೆ ನಂತರ ಹೊಸದಾಗಿ ಅಸ್ತಿತ್ವಕ್ಕೆ ಬಂದ ಕಾಂಗ್ರೆಸ್ ಸರಕಾರ ಬಿಯ‌ರ್ ಮೇಲೆ ಶೇ.20 ರಷ್ಟು ಹೆಚ್ಚುವರಿ ಸುಂಕ ವಿಧಿಸಿತ್ತು. ಅದರಿಂದ ದರ ಏರಿಕೆಯಾಗಿತ್ತು. ಆ ನಂತರ ಬಿಯ‌ರ್ ಉತ್ಪಾದನಾ ಕಂಪನಿಗಳು ಹೆಚ್ಚುತ್ತಿರುವ ಉತ್ಪಾದನಾ ವೆಚ್ಚ ಸರಿದೂಗಿಸಿಕೊಳ್ಳಲು ಬಾಟಲ್ ಮೇಲೆ ಕನಿಷ್ಠ 10 ರೂ.ವರೆಗೆ ಏರಿಕೆ ಮಾಡಿದ್ದವು. ಅದರ ಬೆನ್ನಲ್ಲೇ ಇದೀಗ ಮತ್ತೆ ಬಿಯರ್ ದರ ಹೆಚ್ಚಳವಾಗಿದೆ. ಹಾಗಾಗಿ, ಆರೇಳು ತಿಂಗಳ ಅವಧಿಯಲ್ಲಿ ಬಿಯ‌ರ್ ಬೆಲೆ ಸುಮಾರು 40 ರೂ. ವರೆಗೆ ಹೆಚ್ಚಳವಾದಂತಾಗಿದೆ ಎನ್ನುತ್ತಾರೆ ಮದ್ಯ ಮಾರಾಟಗಾರರು.

Categories
ಮಲ್ನಾಡ್ ಹೊಸನಗರ

ಹುಂಚದಲ್ಲಿ ನೀರು ನಾಯಿಗಳ ಹಿಂಡು!

ಹುಂಚದಲ್ಲಿ ನೀರು ನಾಯಿಗಳ ಹಿಂಡು!
– ಮುತ್ತಿನಕೆರೆ ಬಳಿ ನೀರುನಾಯಿಗಳ ಹಿಂಡು ಪ್ರತ್ಯಕ್ಷ
– ಹೊಸನಗರ ತಾಲೂಕಿನ ಹುಂಚ: ಏನಿದು ವಿಶೇಷ?

NAMMUR EXPRESS NEWS
ಹೊಸನಗರ: ರಿಪ್ಪನ್‌ಪೇಟೆ ಸಮೀಪದ ಇತಿಹಾಸ ಪ್ರಸಿದ್ದ ಹುಂಚ ಮುತ್ತಿನಕೆರೆಯಲ್ಲಿ ನೀರು ನಾಯಿಗಳ ಹಿಂಡು ಏಕಾಏಕಿ ಪ್ರತ್ಯಕ್ಷವಾಗಿವೆ. ಪುರಾಣ ಪ್ರಸಿದ್ದವಾಗಿರುವ ಹುಂಚದ ಮುತ್ತಿನಕೆರೆಯು ಕೋಡೂರು – ನಾಗರಹಳ್ಳಿ ಮಾರ್ಗದಲ್ಲಿದ್ದು, ಈ ಕೆರೆಯಲ್ಲಿ ದಿಢೀರ್ ನೀರು ನಾಯಿಗಳು ಕೆರೆಯ ನೀರಿನಲ್ಲಿ ಗುಂಪು ಗುಂಪಾಗಿ ಕಾಣಿಸಿಕೊಂಡಿರುವುದು ರಸ್ತೆಯಲ್ಲಿ ಸಂಚರಿಸುವವರಲ್ಲಿ ಭಯ ಹುಟ್ಟಿಸಿವೆ. ಕಾಡಿನ ಕೆರೆಯಲ್ಲಿ ಕಾಣಸಿಗುವ ಈ ನೀರು ನಾಯಿಗಳು ನಾಡಿನಲ್ಲಿ ಕಂಡಿವೆ. ಕಳೆದ ವರ್ಷ ಮಳೆಯ ಕೊರತೆಯಿಂದಾಗಿ ಅಂತರ್ಜಲ ಸಹ ಕ್ಷೀಣಿಸಿ ಕೆರೆಕಟ್ಟೆಗಳು ಒಣಗಿ ಹೋಗಿದ್ದು ಬಿಸಿಲ ತಾಪದಿಂದಾಗಿ ಕಾಡುಪ್ರಾಣಿಗಳು ನಾಡಿಗೆ ಬರುತ್ತವೆ ಎಂಬುದಕ್ಕೆ ಸಾಕ್ಷಿಯಾಗಿದೆ.

Categories
ಮಲ್ನಾಡ್ ಶಿವಮೊಗ್ಗ

350 ಅಡಿಕೆ ಚೀಲವಿದ್ದ ಲಾರಿಗೆ ಬೆಂಕಿ!

350 ಅಡಿಕೆ ಚೀಲವಿದ್ದ ಲಾರಿಗೆ ಬೆಂಕಿ!
– ಸಾಗರದಿಂದ ಸೊರಬ ಕಡೆ ಹೋಗುತ್ತಿದ್ದ ಲಾರಿ
– ಶಿಕಾರಿಪುರ: ಡಿಸಿಸಿ ಬ್ಯಾಂಕ್ ಎದುರು ಆತ್ಮಹತ್ಯೆಗೆ ಯತ್ನಿಸಿದ ವ್ಯಕ್ತಿ!
– ಶಿವಮೊಗ್ಗ: ನಕ್ಸಲ್ ನಾಯಕ ಕೃಷ್ಣಮೂರ್ತಿಗೆ ತಾತ್ಕಾಲಿಕ ರಿಲೀಫ್!
– ಆಗುಂಬೆ ಬಳಿ ಬಸ್ಸಿಗೆ ಬೆಂಕಿ ಹಚ್ಚಿದ್ದ ಪ್ರಕರಣ: ವಿಚಾರಣೆ ಮುಂದೂಡಿಕೆ

NAMMUR EXPRESS NEWS
ಸೊರಬ: ಅಡಿಕೆ ತುಂಬಿದ ಲಾರಿಗೆ ಬೆಂಕಿ ಹೊತ್ತಿಕೊಂಡ ಘಟನೆ ಮಂಗಳವಾರ ತಡರಾತ್ರಿ ಚನ್ನಾಪುರ ಗ್ರಾಮದ ಬಳಿ ನಡೆದಿದೆ. ಸಾಗರ ತಾಲ್ಲೂಕು ಅನಂದಪುರ ಐಎಂಎ ಟ್ರೇಡರ್ಸ್‌ನ ಇಮ್ತಿಯಾಜ್ ಅಹಮ್ಮದ್ ಎಂಬವರು ಆನಂದಪುರದಿಂದ 70 ಕೆಜಿಯ 350 ಚಾಲಿ ಅಡಿಕೆ ಚೀಲ ತುಂಬಿಕೊಂಡು ಸೊರಬ-ಶಿರಾಳಕೊಪ್ಪ ರಸ್ತೆಯಲ್ಲಿ ದೆಹಲಿಗೆ ರವಾನಿಸುತ್ತಿದ್ದರು. ಈ ವೇಳೆ ಚಲಿಸುವ ಲಾರಿಗೆ ಬ್ಯಾಟರಿ ಶಾರ್ಟ್ ಸರ್ಕೀಟ್‌ನಿಂದ ಬೆಂಕಿ ಹೊತ್ತಿಕೊಂಡು ಲಾರಿ ಸುಟ್ಟು ಕರಕಲಾಗಿದೆ. ಅಡಿಕೆ ತುಂಬಿದ ಸುಮಾರು 20 ಚೀಲಗಳು ಬೆಂಕಿಯ ಕೆನ್ನಾಲಿಗೆಗೆ ಸುಟ್ಟು ಬೂದಿಯಾಗಿವೆ. ಸ್ಥಳಕ್ಕೆ ಸೊರಬ ಅಗ್ನಿಶಾಮಕ ಸಿಬ್ಬಂದಿ ಧಾವಿಸಿ ಬೆಂಕಿ ನಂದಿಸಿ ಹೆಚ್ಚಿನ ಅನಾಹುತ ತಡೆದಿದ್ದಾರೆ. ಚಾಲಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಸೊರಬ ಅಗ್ನಿಶಾಮಕ ಠಾಣೆಯಲ್ಲಿ ಪ್ರಕಾರಣ ದಾಖಲಾಗಿದೆ.

ಡಿಸಿಸಿ ಬ್ಯಾಂಕ್ ಎದುರು ಆತ್ಮಹತ್ಯೆಗೆ ಯತ್ನಿಸಿದ ವ್ಯಕ್ತಿ!

ಹಲವು ವರ್ಷಗಳ ಹಿಂದೆ ಡಿಸಿಸಿ ಬ್ಯಾಂಕ್ ಹರಾಜಿನಲ್ಲಿ ಪಡೆದ ಸತ್ತು ಇದುವರೆಗೂ ತನಗೆ ಹಸ್ತಾಂತರಿಸದ ಹಿನ್ನೆಲೆ ಸಾಲ ಸಮಸ್ಯೆಗೆ ಸಿಲುಕಿದ ವ್ಯಕ್ತಿಯೋರ್ವ ಶಿಕಾರಿಪುರ ಪೇಟೆಯಲ್ಲಿರುವ ಡಿಸಿಸಿ ಬ್ಯಾಂಕ್ ಎದುರು ಪೆಟ್ರೋಲ್ ಸುರಿದುಕೊಂಡು ಬೆಂಕಿ ಹಚ್ಚಿಕೊಳ್ಳಲು ಯತ್ನಿಸಿದ ಘಟನೆ ಬುಧವಾರ ನಡೆದಿದೆ. ಎಸ್.ಪಿ.ಸಂತೋಷಕುಮಾರ್‌ ಆತ್ಮಹತ್ಯೆಗೆ ಯತ್ನಿಸಿದ ವ್ಯಕ್ತಿ. ಪೆಟ್ರೋಲ್‌ ಸುರಿದುಕೊಂಡು ಬ್ಯಾಂಕ್ ಬಾಗಿಲಿನಲ್ಲಿಯೇ ಬೆಂಕಿ ಹಚ್ಚಿಕೊಳ್ಳಲು ಯತ್ನಿಸಿದರು. ಈ ವೇಳೆ ಸ್ಥಳದಲ್ಲಿದ್ದ ಸಾರ್ವಜನಿಕರು ಆತ್ಮಹತ್ಯೆ ಯತ್ನ ವಿಫಲ ಗೊಳಿಸಿದರು. ಸಂತೋಷಕುಮಾರ್ 2017ರಲ್ಲಿ ಡಿಸಿಸಿ ಬ್ಯಾಂಕ್ ನಡೆಸಿದ ಹರಾಜಿನಲ್ಲಿ ಚನ್ನಕೇಶವ ನಗರದ ಸುಸ್ತಿದಾರರೊಬ್ಬರಿಗೆ ಸೇರಿದ 30/50 ಅಳತೆಯಲ್ಲಿನ ಮೂರು ಅಂತಸ್ಥಿನ ಕಟ್ಟಡ, 4 ಗುಂಟೆ ಅಳತೆಯ ನಿವೇಶನ ಸ್ವತ್ತನ್ನು ₹76 ಲಕ್ಷಕ್ಕೆ ಯಶಸ್ವಿ ಬಿಡ್ಡುದಾರರಾಗಿ ಹರಾಜು ಪಡೆದಿದ್ದರು. 15 ದಿನಗಳಲ್ಲಿ ಬಿಡ್‌ನ ಪೂರ್ಣ ಮೊತ್ತ ಬ್ಯಾಂಕ್‌ಗೆ ಪಾವತಿಸಿದರು.

ಹರಾಜಿನ ನಂತರ ಸ್ವತ್ತು ಅಳತೆ ಮಾಡುವಾಗ ಮೂರು ಅಂತಸ್ಥಿನ ಕಟ್ಟಡದ ಕೇವಲ 5 ಅಡಿ ಮಾತ್ರ ಅಳತೆ ವ್ಯಾಪ್ತಿಗೆ ಬರುತ್ತದೆ ಎನ್ನುವುದು ಗೊತ್ತಾಗಿದೆ. ಅಲ್ಲಿಂದ ಇಲ್ಲಿಯವರೆಗೂ ನನಗೆ 4 ಗುಂಟೆ ನಿವೇಶನ ಮಾತ್ರ ನೀಡಿದ್ದು, ಕಟ್ಟಡ ಈವರೆಗೂ ಹಸ್ತಾಂತರಿಸಿಲ್ಲ ಎಂದು ಸಂತೋಷ್ ಆರೋಪಿಸಿದ್ದಾರೆ. ಈ ಕಾರಣಕ್ಕೆ ಡಿಸಿಸಿ ಬ್ಯಾಂಕ್ ವಿರುದ್ಧ ಪ್ರತಿಭಟಿಸಿ, ತಮ್ಮ ವ್ಯಾಪ್ತಿಗೆ ಬರುವ ಕಟ್ಟಡ ನೀಡಬೇಕು ಎಂದು ಆತ್ಮಹತ್ಯೆಗೆ ಯತ್ನಿಸಿದ್ದಾರೆ. ಸಾಲಕ್ಕಿಂತಲೂ 40 ಲಕ್ಷ ಹೆಚ್ಚು ಹಣ ಬ್ಯಾಂಕ್‌ಗೆ ಜಮೆ ಆಗಿತ್ತು ಎಂದರು.

ವಿವಾದ ಪರಿಹಾರ ಆಗುವವರೆಗೂ ಹೆಚ್ಚುವರಿ ಹಣ ಸ್ವತ್ತಿನ ಮಾಲೀಕರಿಗೆ ನೀಡ ಬೇಡಿ ಎಂದು ಮನವಿ ಮಾಡಿದ್ದರೂ, ಅವರೊಂದಿಗೆ ಬ್ಯಾಂಕ್ ಸಿಬ್ಬಂದಿ ಶಾಮೀಲಾಗಿ ಹಣವನ್ನೂ ವಾಪಸ್ ನೀಡಿದ್ದಾರೆ. ಹರಾಜಿ ನಲ್ಲಿ ಪಡೆದ ಸ್ವತ್ತು ಈವರೆಗೂ ನೀಡಿಲ್ಲ. ಹಣವೂ ಇಲ್ಲದಾಗಿದೆ. ಹರಾಜಿಗೆ ಪಡೆದ ಸಾಲ ಇದೀಗ ಶೂಲವಾಗಿ ಪರಿಣಮಿಸಿದ್ದು, ಸಾಯು ವುದೊಂದೇ ಮಾರ್ಗ ಎನ್ನುವಂತಾಗಿದೆ. ಎಂದು ಅಳಲು ತೋಡಿಕೊಂಡರು  ಇನ್ನೂ ಈ ಬಗ್ಗೆ ತಮಗೆ ಹೆಚ್ಚಿನ ಮಾಹಿತಿ ಇಲ್ಲ, ವಿವರವನ್ನು ಮುಖ್ಯ ಶಾಖೆಗೆ ಕಳುಹಿಸಲಾಗಿದ್ದು, ಅಲ್ಲಿಂದ ಯಾವುದೇ ನಿರ್ದೇಶನ ಬಂದಿಲ್ಲವೆಂದು ಶಿಕಾರಿಪುರದ ಡಿಸಿಸಿ ಬ್ಯಾಂಕ್ ಮ್ಯಾನೇಜರ್​ ಸ್ಥಳೀಯ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಆಗುಂಬೆ ಬಳಿ ಬಸ್ಸಿಗೆ ಬೆಂಕಿ ಹಚ್ಚಿದ್ದ ಪ್ರಕರಣ: ನಕ್ಸಲ್ ನಾಯಕನಿಗೆ ವಿಚಾರಣೆ ಮುಂದೂಡಿಕೆ

ಶಿವಮೊಗ್ಗ: ನಕ್ಸಲ್ ನಾಯಕ ಬಿ.ಜಿ ಕೃಷ್ಣಮೂರ್ತಿ ಅವರ ಮೇಲಿರುವ ಪ್ರಕರಣಗಳ ವಿಚಾರಣೆಗೆ ದಿನಾಂಕ ನಿಗದಿಯಾಗಿದೆ. ಬಸ್ ಸುಟ್ಟು ಹಾಕಿದ್ದ ಗೇಟ್ ಬ್ಲಾಸ್ಟ್ ಮಾಡಿದ ಹಾಗೂ ದರೋಡೆ ಪ್ರಕರಣಗಳನ್ನ ಫೆ.29 ರಂದು ವಿಚಾರಣೆ ನಡೆಸಲು ದಿನಾಂಕ ನಿಗದಿ ಪಡೆದಿದೆ. ಸಾಕ್ಷಿದಾರರನ್ನ ವಿಡಿಯೋ ಕಾನ್ಸೆರೆನ್ಸ್ ಮೂಲಕ ವಿಚಾರಿಸಲಾಗುತ್ತಿದೆ. ಆಗುಂಬೆ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ 2007 ಮತ್ತು 2009 ರಂದು ನಡೆದೆ ಹೊಸಗದ್ದೆಯಲ್ಲಿ ಬಸ್ ಗೆ ಬೆಂಕಿ ಹಚ್ಚಿದ ಪ್ರಕರಣ, ಆಗುಂಬೆ ಅರಣ್ಯ ಗೇಟನ್ನಬ್ಲಾಸ್ಟ್ ಮಾಡಿದ ಪ್ರಕರಣ ಮತ್ತು ಅರುಣ್ ಕುಮಾರ್ ನಲ್ಲಿ ನಡೆದ ದರೋಡೆ ಪ್ರಕರಣ ಕುರಿತಂತೆ ಬುಧವಾರ ಹಾಗೂ ಗುರುವಾರ ಶಿವಮೊಗ್ಗ ನ್ಯಾಯಾಲಯದಲ್ಲಿ ಆರೋಪಪಟ್ಟಿಯನ್ನ ಚಾರ್ಜ್ ಮಾಡಲಾಗಿದೆ. ಈ ಚಾರ್ಜನ್ನು ಸುಳ್ಳು ಎಂದು ಬಿಜಿಕೆ ನ್ಯಾಯಾಧೀಶರ ಮುಂದೆ ಹೇಳಿದ್ದರಿಂದ ಮೇಲೆ ಈ ಪ್ರಕರಣಗಳ ವಿಚಾರಣೆಗೆ ಶಿವಮೊಗ್ಗದ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಧೀಶರು ವಿಚಾರಣೆಗೆ ದಿನಾಂಕ ನೀಡಿದ್ದಾರೆ. ಇದರಿಂದ 14 ವರ್ಷ ಹಿಂದಿನ ಪ್ರಕರಣಗಳು ವಿಚಾರಣೆಗೆ ಸಿದ್ಧತೆಗೊಂಡತಾಗಿದೆ

Categories
ತೀರ್ಥಹಳ್ಳಿ

ಈಡಿಗರ ಸಂಘಕ್ಕೆ ಮತ್ತೆ ಸಾರಥಿ ಆಗ್ತಾರಾ ಮಟ್ಟಿನಮನೆ ರಾಮಚಂದ್ರ?

ಈಡಿಗರ ಸಂಘಕ್ಕೆ ಮತ್ತೆ ಸಾರಥಿ ಆಗ್ತಾರಾ ಮಟ್ಟಿನಮನೆ ರಾಮಚಂದ್ರ?
– ತಾಲೂಕಿನಲ್ಲೇ ಅತೀ ಹೆಚ್ಚು ಮತ ಪಡೆದ ಮುಡುಬ ರಾಘವೇಂದ್ರ
– ಉಮೇಶ್ ಹೊಸಮನೆ ಸೇರಿ ಅನೇಕರ ಆಗಮನ: ಹಿರಿ -ಕಿರಿಯರ ಸಮಾಗಮ
– ಸಂಘದ ಅಭಿವೃದ್ಧಿ, ಸರ್ವರಿಗೂ ಸದಸ್ಯತ್ವವೇ ಈಗಿನ ಅಜೆಂಡಾ!

NAMMUR EXPRESS NEWS
ತೀರ್ಥಹಳ್ಳಿ ತಾಲೂಕು ಆರ್ಯ ಈಡಿಗರ ಸಂಘದ ಆಡಳಿತ ಮಂಡಳಿಯ 21 ನಿರ್ದೇಶಕ ಸ್ಥಾನಕ್ಕೆ ಡಿಸೆಂಬರ್ 28ರಂದು ಚುನಾವಣೆ ನಡೆದಿದ್ದು ಭಾರೀ ಹಣಾಹಣಿ ನಡುವೆ 21 ಮಂದಿಯ ಆಯ್ಕೆ ನಡೆಯಿತು. ಈ ಬಾರಿ ಹಳೆಯ ನಿರ್ದೇಶಕರ ಜತೆಗೆ ಹೊಸಬರು ಕೂಡ ಗೆದ್ದಿದ್ದಾರೆ. ಬಹುತೇಕ 16ಕ್ಕೂ ಹೆಚ್ಚು ಮಂದಿ ನಿರ್ದೇಶಕರ ಬೆಂಬಲ ಇರುವ ಮಟ್ಟಿನಮನೆ ರಾಮಚಂದ್ರ ಅವರೇ ಮತ್ತೆ ಅಧ್ಯಕ್ಷರಾಗಲಿದ್ದಾರೆ ಎಂಬ ಚರ್ಚೆ ನಡೆಯುತ್ತಿದೆ. ಈಡಿಗ ಸಂಘದ ಜಾಗ, ಹಾಸ್ಟೆಲ್, ಕಟ್ಟಡ ಅಭಿವೃದ್ಧಿ, ಶಿಕ್ಷಣ ಸಂಸ್ಥೆ ಆರಂಭ, ಎಲ್ಲಾ ಹೋಬಳಿಯ ಸಮುದಾಯದ ಜನರಿಗೆ ಸದಸ್ಯತ್ವವೇ ಈಗಿನ ಅಜೆಂಡಾ ಆಗಲಿದೆ.

21 ಮಂದಿ ಗೆಲುವು ಸಾಧಿಸಿದವರ ಹೆಸರು

ಚಿಪ್ಪಿನಕೊಡಿಗೆ ವೆಂಕಟೇಶ್, ವಿನಯ್, ಗುರುಮೂರ್ತಿ, ಉಮೇಶ್ ಹೊಸಮನೆ, ಎಂ.ವಿ. ಚಂದ್ರಶೇಖ‌ರ್, ಷಣ್ಮುಖ ಬೀಡೆ, ಮುಡುಬ ರಾಘವೇಂದ್ರ, ಮಟ್ಟಿನಮನೆ ರಾಮಚಂದ್ರ, ಮಹೇಶ್ ನಾಯ್ಕ, ಮೋಹನ್ ಎಂ.ಸಿ., ಸಿ.ಆರ್.ಮಂಜುನಾಥ್, ಕಬಸೆ ವಿಕ್ರಮ್, ಪ್ರದೀಪ್ ಕೊರಣಕಟ್ಟೆ, ಹೆಚ್.ಪಿ.ಸುರೇಶ್, ಟಿ.ಎಲ್.ಸುಂದರೇಶ್, ಲಯನ್‌ ಪಾಂಡುರಂಗಪ್ಪ, ಶಿವಮೂರ್ತಿ ಹೊದಲ, ಡಿ.ಲಕ್ಷ್ಮಣ್, ಕುರುವಳ್ಳಿ ನಾಗರಾಜ್‌, ಜಾನಕಿ, ತ್ರಿವೇಣಿ ಬಾಲರಾಜ್.

ಆಗುಂಬೆ ಹೋಬಳಿಯಲ್ಲಿ ಫೈಟ್ ಇಲ್ಲ!

ಆಗುಂಬೆ ಹೋಬಳಿಯಲ್ಲಿ ಚುನಾವಣೆ ನಡೆದಿಲ್ಲ. ಹಿಂದಿನ ಅವಧಿಯಲ್ಲಿ ಕಾರ್ಯದರ್ಶಿ ಆಗಿದ್ದ ಚಿಪ್ಪಿನಕೊಡಿಗೆ ವೆಂಕಟೇಶ್, ಗುರು ಮೂರ್ತಿ, ವಿನಯ್ ಅವಿರೋಧ ಆಯ್ಕೆಗೊಂಡಿದ್ದಾರೆ. ಇಲ್ಲಿ ನಾಮಪತ್ರ ಸಲ್ಲಿಸಿದ್ದ ದಿಂಡ ಮಂಜುನಾಥ್ ವಾಪಾಸ್ ತೆಗೆದು ಬೆಂಬಲ ಘೋಷಣೆ ಮಾಡಿದ್ದರು.

ಅಗ್ರಹಾರ ಹೋಬಳಿಯಲ್ಲಿ ಅತೀ ಹೆಚ್ಚು ಮತ ಪಡೆದ ಉಮೇಶ್ ಹೊಸಮನೆ

ಪಡೆದ ಮತ:
ಅಗ್ರಹಾರ ಹೋಬಳಿಯಲ್ಲಿ ಬಿ.ಟಿ ಈಶ್ವರಪ್ಪ-85,
ಹೊಸಮನೆ ಉಮೇಶ್ – 186,
ಎಮ್.ವಿ ಚಂದ್ರಶೇಖರ್-146,
ಚೂಡಾಮಣಿ ಹಾಲೇಸರ-86,
ಷಣ್ಮುಖ ಬೀಡೆ-141,
ಹೊಸಮನೆ ಸೋಮಪ್ಪ-90

ಮತ ಪಡೆದಿದ್ದಾರೆ. ಇಲ್ಲಿ ಮರಹಳ್ಳಿ ಚಂದ್ರ ಶೇಖರ್ ಮರು ಆಯ್ಕೆ ಆಗಿದ್ದಾರೆ. ಹಿಂದಿನ ಅವಧಿಯಲ್ಲಿದ್ದ ಗಂಗಾಧರ ತಲವಡಗ ಈ ಬಾರಿ ಸ್ಪರ್ಧೆ ಮಾಡಿರಲಿಲ್ಲ. ಚೂಡಾಮಣಿ ಸೋಲು ಕಂಡಿದ್ದಾರೆ. ಯುವ ಮುಖಂಡ ಷಣ್ಮುಖ ಬೀಡೆ ಮೊದಲ ಬಾರಿಗೆ ಆಯ್ಕೆ ಆಗಿದ್ದಾರೆ. ಇನ್ನು ಬಿಜೆಪಿ ಮುಖಂಡ ಹೊಸಮನೆ ಉಮೇಶ್ ಅತೀ ಹೆಚ್ಚು ಮತ ಪಡೆದು ಮೊದಲ ಬಾರಿಗೆ ಪ್ರವೇಶ ಮಾಡಿದ್ದಾರೆ.

ಮಹಿಳಾ ಮೀಸಲು ಕ್ಷೇತ್ರದಲ್ಲಿ ಇಬ್ಬರು ಹೊಸಬರು!

ಪಡೆದ ಮತ:
ಕುಸುಮಾ ಕುಮಾರ್-472,
ಜಾನಕಿ-727,
ತ್ರಿವೇಣಿ ಬಾಲರಾಜ್-587,
ಕೆ.ಸಿ ರೂಪಾ-435,
ವಿನಂತಿ ಶಿವಾನಂದ-401.
ಈ ಗೆದ್ದವರ ಪೈಕಿ ಇಬ್ಬರೂ ಜಾನಕಿ ಮತ್ತು ತ್ರಿವೇಣಿ ಹೊಸಬರು. ವಿನಂತಿ ಹಿಂದಿನ ಅವಧಿಯಲ್ಲಿ ಇದ್ದು ಈಗ ಸೋಲು ಕಂಡಿದ್ದಾರೆ.
ಕಸಬಾ ಹೋಬಳಿಯಲ್ಲಿ ಹಿರಿಯರು -ಕಿರಿಯರ ಎಂಟ್ರಿ!

ಕಸಬಾ ಹೋಬಳಿಯಲ್ಲಿ ಈಡಿಗ ಸಮುದಾಯದ ಹಿರಿಯರಾದ ಲಕ್ಷ್ಮಣ್, ಲಯನ್ಸ್ ಪಾಂಡುರಂಗಪ್ಪ, ಸುಂದರೇಶ್ ಗೆದ್ದಿದ್ದು, ಯುವ ಮುಖಂಡರಾದ ಕುರುವಳ್ಳಿ ನಾಗರಾಜ್ ಮತ್ತು ಹೊದಲ ಶಿವು ಮರು ಆಯ್ಕೆ ಆಗಿದ್ದಾರೆ. ಇಲ್ಲಿ ಸುಂದರೇಶ್ ಅತೀ ಹೆಚ್ಚು ಮತ ಪಡೆದಿದ್ದಾರೆ.

ಪಡೆದ ಮತ:
ಮರಹಳ್ಳಿ ನಾಗಭೂಷಣ-75,
ಕುರುವಳ್ಳಿ ನಾಗರಾಜ್-154,
ಕೆ.ಬಿ ಪದ್ಮನಾಭ-134,
ಹೆಚ್ ಪಾಂಡು ರಂಗಪ್ಪ- 177,
ಡಿ.ಬಂಗಾರಪ್ಪ-98,
ಎಮ್.ಆರ್ ಮಂಜಪ್ಪ-144,
ರಾಜೇಂದ್ರತಲವಡಗ-83,
ಡಿ.ಲಕ್ಷ್ಮಣ್-157,
ಶಿವಮೂರ್ತಿ ಹೊದಲ-172,
ಟಿ.ಎಲ್ ಸುಂದರೇಶ್-205.

ಮುತ್ತೂರು ಹೋಬಳಿಯಲ್ಲಿ ಗಮನ ಸೆಳೆದ ಹೊಸಬರ ಪೈಪೋಟಿ

ಮುತ್ತೂರು ಹೋಬಳಿಯಲ್ಲಿ ವಿಕ್ರಮ್ ಹಾಗೂ ಪ್ರದೀಪ್ ಈ ಹಿಂದಿನ ಅವಧಿಯಲ್ಲಿದ್ದರು. ಸುರೇಶ ಹೆದ್ದೂರು ಮೊದಲ ಬಾರಿಗೆ ಆಗಮಿಸಿದ್ದಾರೆ. ಇಲ್ಲಿ ಹೊಸಬರಾದ ಸುಧಾಕರ್ ತಟ್ಟಾಪುರ, ಪ್ರಶಾಂತ್ ಕುಮಾರ್, ಗೋಪಾಲ ಕೃಷ್ಣ ಕಬಸೆ ಪ್ರಬಲ ಪೈಪೋಟಿ ನೀಡಿದ್ದರು.

ಪಡೆದ ಮತ:
ಗೋಪಾಲಕೃಷ್ಣಕೆ.ಜಿ-50,
ಕೂರಣಕಟ್ಟೆ – ಪ್ರದೀಪ್-84,
ಪ್ರಶಾಂತ್ ಕುಮಾರ್-58,
ಕಬಸ್, ವಿಕ್ರಮ್-93,
ಕುಪ್ಪಳಿ ಸುಧಾಕರ್ ಟಿ ಎಸ್ -58,
ಹೆಚ್ ಡಿ ಸುರೇಶ -69.

ಮಂಡಗದ್ದೆ ಹೋಬಳಿಯಲ್ಲಿ ರಾಮಚಂದ್ರ ಪ್ರಾಬಲ್ಯ!

ಮಂಡಗದ್ದೆ ಅತೀ ಹೆಚ್ಚು ಮತಗಳಿದ್ದ ಹೋಬಳಿ. ಇಲ್ಲಿಯೇ ಸುಮಾರು 900 ಮತಗಳಿದ್ದವು. ಇಲ್ಲಿ ಮುಡುಬ ರಾಘವೇಂದ್ರ ಅತೀ ಹೆಚ್ಚು 447 ಮತ ಪಡೆದಿದ್ದಾರೆ. ಬಳಿಕ ಮಾಜಿ ಅಧ್ಯಕ್ಷರಾದ ಮಟ್ಟಿನಮನೆ ರಾಮಚಂದ್ರ ಪಡೆದಿದ್ದಾರೆ. ರಾಮಚಂದ್ರ ಸಿಂಡಿಕೇಟ್ ಗೆಲುವು ಸಾಧಿಸಿದೆ. ಹಿರಿಯ ಸಹಕಾರಿ ಚಿಡುವ ಮಂಜುನಾಥ್ ಗೆಲುವು ಸಾಧಿಸಿದ್ದಾರೆ.

ಪಡೆದ ಮತ:
ಟಿ.ಅಣ್ಣಪ್ಪ-179,
ಎಸ್.ವಿ ದೀಪಕ್-243,
ಮಹೇಶ್ ನಾಯ್ಕ-355,
ಮೋಹನ್ ಎಂ.ಸಿ-336,
ಚಿಡುವ ಮಂಜುನಾಥ್-295,
ಮುಡುಬ ರಾಘವೇಂದ್ರ-449,
ಮಟ್ಟಿನಮನೆ ರಾಮಚಂದ್ರ- 447,
ಈ.ಎಸ್ ಶ್ರೀಧರಮೂರ್ತಿ-278,
ಕಲ್ಲುಕೊಪ್ಪ ಸುರೇಶ್-265,
ಈ ಎನ್ ಹರಿಯಪ್ಪ -171,
ಎಂ ಎಸ್ ಹರೀಶ್ -281.

ಮುಡುಬ ರಾಘವೇಂದ್ರಗೆ ತಾಲೂಕಿನಲ್ಲೇ ಅತೀ ಹೆಚ್ಚು ಮತ.!

ತೀರ್ಥಹಳ್ಳಿ ಆರ್ಯ ಈಡಿಗರ ಚುನಾವಣೆಯಲ್ಲಿ ಯುವ ಮುಖಂಡ ಹಾಗೂ ಎಲ್ಲರ ಕಷ್ಟ ಸುಖದಲ್ಲಿ ಜೊತೆಯಾಗಿರುವ ಮುಡುಬ ರಾಘವೇಂದ್ರ ಅವರು ಅತಿ ಹೆಚ್ಚು ಮತ ಗಳಿಸುವ ಮೂಲಕ ತಾಲೂಕಿನಲ್ಲಿಯೇ ಅತಿ ಹೆಚ್ಚು ಮತ ಗಳಿಸಿ ಗೆಲುವನ್ನು ಸಾಧಿಸಿದ್ದಾರೆ. ತೀರ್ಥಹಳ್ಳಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿರುವ ಮುಡುಬ ರಾಘವೇಂದ್ರ ಅವರು ಪಕ್ಷಾತೀತವಾಗಿ ಕೂಡ ಸೇವೆಯನ್ನು ಸಲ್ಲಿಸುತ್ತಿದ್ದಾರೆ. ಶ್ರೀ ನಾರಾಯಣ ಗುರು ವಿಚಾರ ವೇದಿಕೆಯ ರಾಜ್ಯ ಕಾರ್ಯಧ್ಯಕ್ಷರಾಗಿಯು ಕೆಲಸ ಮಾಡುತ್ತಿರುವ ರಾಘವೇಂದ್ರ ಅವರು ಮಂಡಗದ್ದೆ ಹೋಬಳಿಯಿಂದ ಸ್ಪರ್ಧೆ ಮಾಡಿದ್ದರು. ಮಂಡಗದ್ದೆ ಹೋಬಳಿಯಿಂದ ಸುಮಾರು 447 ಮತಗಳನ್ನು ಗಳಿಸುವ ಮೂಲಕ ಅತಿ ಹೆಚ್ಚು ಮತವನ್ನು ತೀರ್ಥಹಳ್ಳಿ ತಾಲೂಕಿನಿಂದಗಳಿಸಿ ಜಯಭೇರಿ ಭಾರಿಸಿದ್ದಾರೆ. ಅವರಿಗೆ ಶುಭಾಶಯಗಳ ಮಹಾಪೂರವೇ ಹರಿದು ಬರುತ್ತಿದೆ.

Categories
ಉಡುಪಿ ಮಂಗಳೂರು

ಕಂಬಳಕ್ಕೆ ಟೆಕ್ ಸ್ಪರ್ಶ: ಡಿಜಿಟಲ್ ಗೇಟ್!

ಕಂಬಳಕ್ಕೆ ಟೆಕ್ ಸ್ಪರ್ಶ: ಡಿಜಿಟಲ್ ಗೇಟ್!
– ಸ್ವಯಂಚಾಲಿತ ಗೇಟ್ ವ್ಯವಸ್ಥೆ
– ಸಮಯ ವ್ಯರ್ಥ ಆಗಲ್ಲ… ನಿಖರ ಫಲಿತಾಂಶ
– ಫೆ.3ರಿಂದಲೇ ಪ್ರಯೋಗ: ಏನಿದು ಹೊಸ ಯೋಜನೆ?

NAMMUR EXPRESS NEWS
ಮಂಗಳೂರು: ಕಂಬಳದಲ್ಲಿ ವ್ಯರ್ಥ ಆಗುವ ಸಮಯವನ್ನು ಉಳಿಸುವ ಹಾಗೂ ನಿಖರ ಫಲಿತಾಂಶ ನೀಡಲು ಪ್ರಥಮ ಬಾರಿಗೆ ಕಂಬಳ ಕ್ರೀಡೆಗೆ ಸ್ವಯಂ ಚಾಲಿತ ಸಮಯ ಗೇಟ್ ವ್ಯವಸ್ಥೆ ಮತ್ತು ಫೋಟೋ ಫಿನಿಶ್ ಫಲಿತಾಂಶ ಅಳವಡಿಸಲು ದಕ್ಷಿಣಕನ್ನಡ, ಉಡುಪಿ, ಕಾಸರಗೋಡು ಜಿಲ್ಲಾ ಕಂಬಳ ಸಮಿತಿ ತೀರ್ಮಾನಿಸಿದೆ. ದಕ್ಷಿಣ ಕನ್ನಡ ಜಿಲ್ಲಾ ಕಂಬಳ ಸಮಿತಿ ಅಧ್ಯಕ್ಷ ಡಾ। ದೇವಿಪ್ರಸಾದ್ ಶೆಟ್ಟಿ ಬೆಳಪು ಮಾಹಿತಿ ನೀಡಿ, ಫೆ. 3ರಂದು ನಡೆಯುವ ಐಕಳ ಬಾವ ಕಂಬಳದಲ್ಲಿ ಪ್ರಾಯೋಗಿಕವಾಗಿ ನಡೆಯಲಿದೆ.

ತಯಾರಿ ಹೇಗಿದೆ :

ಈ ಹೈಟೆಕ್ ಸ್ಪರ್ಶವನ್ನು ಮುಂದೆ ಎಲ್ಲ ಕಂಬಳ ಗಳಿಗೂ ಅಳವಡಿಸಿ ಕಂಬಳದ ಸಮಯವನ್ನು 30 ಗಂಟೆಗೆ ಸೀಮಿತಗೊಳಿಸಲಾಗುವುದು. ಈ ತಂತ್ರಜ್ಞಾನ ಅಳವಡಿಕೆಗೆ ಅದಾನಿ ಫೌಂಡೇಶನ್ 10 ಲಕ್ಷ ರೂ. ನೀಡಿದೆ. ಕಂಬಳ ಭವನ ನಿರ್ಮಾಣ ಸೇರಿದಂತೆ ಪೂರಕ ಕೆಲಸಗಳಿಗೆ ಸಂಬಂಧಿಸಿ ಪಿಲಿಕುಳದಲ್ಲಿ 2 ಎಕ್ರೆ ಜಾಗ ಮೀಸಲಿಡುವಂತೆ ಮತ್ತು ಪಿಲಿಕುಳದಲ್ಲಿ ಕಂಬಳ ಆಯೋಜನೆ ಮಾಡುವಂತೆ ಮುಖ್ಯಮಂತ್ರಿಗಳಿಗೆ ಮನವಿ ಮಾಡಿದ್ದೇವೆ ಎಂದರು.

ಚೆಕ್ ಅನ್ನು ಸಮಿತಿಗೆ ಹಸ್ತಾಂತರಿಸಿದ ಅದಾನಿ ಸಮೂಹ ಸಂಸ್ಥೆಯ ದಕ್ಷಿಣ ಭಾರತ ಅಧ್ಯಕ್ಷ ಕಿಶೋರ್ ಆಳ್ವ, ಕಂಬಳ ವಿಳಂಬ ಆಗುವುದನ್ನು ತಪ್ಪಿಸಲು ಈ ತಂತ್ರಜ್ಞಾನ ಬಳಸಲಾಗುತ್ತಿದೆ ಎಂದರು. ಸಮಿತಿ ಗೌರವಾಧ್ಯಕ್ಷ ರೋಹಿತ್ ಹೆಗ್ಡೆ ಎರ್ಮಾಳು, ಮಾಜಿ ಅಧ್ಯಕ್ಷ ಬಾರ್ಕೂರು ಶಾಂತಾರಾಮ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಲೋಕೇಶ್ ಶೆಟ್ಟಿ, ಕೋಶಾಧಿಕಾರಿ ಚಂದ್ರಹಾಸ್ ಸನಿಲ್, ತೀರ್ಪುಗಾರರ ಸಂಚಾಲಕ ವಿಜಯ ಕುಮಾರ್ ಕಂಗಿನಮನೆ, ಕೋಣಗಳ ಯಜಮಾನರಾದ ಶ್ರೀಕಾಂತ್ ಭಟ್, ಕಂಬಳ ವ್ಯವಸ್ಥಾಪಕ ಚಂದ್ರಹಾಸ್ ಶೆಟ್ಟಿ ಉಪಸ್ಥಿತರಿದ್ದರು.

ಹೇಗೆ ಕೆಲ್ಸ ಮಾಡಲಿದೆ ಈ ನೂತನ ತಂತ್ರಜ್ಞಾನ?

ನಿಗದಿ ಪಡಿಸಿದ ಸೀಮಿತ ಅವಧಿಯೊಳಗೆ ಕೋಣ ಬಿಡದಿದ್ದರೆ ಗೇಟ್ ಬೀಳುತ್ತದೆ. ಇದಾದ 100 ಸೆಕೆಂಡಿನಿಂದ 10 ಸೆಕೆಂಡ್‌ ವರೆಗೆ ಕೆಂಪು ದೀಪ, 10ರಿಂದ 1 ಸೆಕೆಂಡ್ ವರೆಗೆ ಹಳದಿ ದೀಪ ಬೆಳಗುತ್ತದೆ. 0 ಬಂದಾಕ್ಷಣ ಹಸಿರು ದೀಪ ಬೆಳಗಿ ಓಟಕ್ಕೆ ಗ್ರೀನ್ ಸಿಗ್ನಲ್ ಬೀಳುತ್ತದೆ. ಈ ಅವಧಿಯಲ್ಲಿ ಕೋಣ ಓಟ ಆರಂಭಿಸಬೇಕು. ಇಲ್ಲದಿದ್ದಲ್ಲಿ ಆ ಕೋಣ ಗಳನ್ನು ಸ್ಪರ್ಧೆಯಿಂದ ಹೊರಗಿಡಲಾಗುವುದು. ಸ್ಪರ್ಧೆಯಲ್ಲಿರುವ ಕೋಣಗಳ ಮುಖ ಸ್ಕ್ಯಾನ್ ಮೇಲೆ ನಿಖರ ಫಲಿತಾಂಶವನ್ನು ಫೋಟೋ ಫಿನಿಶಿಂಗ್ ತಂತ್ರಜ್ಞಾನ ನೀಡಲಿದೆ.

Categories
ಬೆಳಗಾವಿ ರಾಜ್ಯ

ನಿಮ್ಮೆಲ್ಲ ಅಸ್ತಿ ದಾಖಲೆ ಇನ್ನು ಡಿಜಿಟಲ್!

ನಿಮ್ಮೆಲ್ಲ ಅಸ್ತಿ ದಾಖಲೆ ಇನ್ನು ಡಿಜಿಟಲ್!
– ರಾಜ್ಯದ 31 ಜಿಲ್ಲೆಯಲ್ಲೂ ಪ್ರಾಯೋಗಿಕ ಪ್ಲಾನ್
– 2000 ಸರ್ವೇಯರ್ ನೇಮಕ: ಏನಿದು ಹೊಸ ಯೋಜನೆ?

NAMMUR EXPRESS NEWS
ಬೆಳಗಾವಿ: ರಾಜ್ಯದಲ್ಲಿ ಈ ವಾರದಲ್ಲಿ ಭೂ ಸುರಕ್ಷಾ ಯೋಜನೆ ಜಾರಿಗೆ ತರಲಿದ್ದೇವೆ. 31 ಜಿಲ್ಲೆಗಳಲ್ಲಿ 31 ತಾಲೂಕುಗಳನ್ನು ಆಯ್ಕೆ ಮಾಡಿಕೊಂಡು ಯೋಜನೆ ಅನುಷ್ಠಾನಗೊಳಿಸಲಾಗುವುದು. ಒಂದು ಜಿಲ್ಲೆಯಲ್ಲಿ ಒಂದು ತಾಲೂಕನ್ನು ಆಯ್ಕೆ ಮಾಡಿಕೊಂಡು ಮೂರು ತಿಂಗಳಲ್ಲಿ ಎಲ್ಲ ಹಳೆಯ ದಾಖಲೆಗಳನ್ನು ಡಿಜಿಟಲೀಕರಣಗೊಳಿಸಲಾಗುವುದು ಎಂದು ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಹೇಳಿದ್ದಾರೆ.

ಬೆಳಗಾವಿಯಲ್ಲಿ ಮಾತನಾಡಿದ ಅವರು, ಈ ಯೋಜನೆಗೆ ಬೇಕಾದ ಅನುದಾನವನ್ನು ಆಯಾ ಜಿಲ್ಲಾಧಿಕಾರಿಗಳಿಗೆ ಒದಗಿಸಲಾಗಿದೆ. ರಾಜ್ಯದ ಬಹುತೇಕ ಜಿಲ್ಲೆಗಳಲ್ಲಿ ಹಳೆಯ ದಾಖಲೆಗಳು ಶಿಥಿಲಾವಸ್ಥೆಯಲ್ಲಿವೆ. ಅವುಗಳನ್ನು ಸಂರಕ್ಷಿಸಿ ಡಿಜಿಟಲೀಕರಣಗೊಳಿಸುವದು ಈ ಯೋಜನೆಯ ಉದ್ದೇಶ ಎಂದರು. ಕಳೆದ ನಾಲ್ಕು ತಿಂಗಳ ಅವಧಿಯಲ್ಲಿ ತಹಸೀಲ್ದಾರ ಕಚೇರಿಗಳಲ್ಲಿ 95% ರಷ್ಟು ಪ್ರಕರಣಗಳನ್ನು ಇತ್ಯರ್ಥಗೊಳಿಸಲಾಗಿದೆ. ಎಸಿ ಕಚೇರಿ ನ್ಯಾಯಾಲಯದಲ್ಲಿ 35 ಸಾವಿರ ಪ್ರಕರಣಗಳನ್ನು ಇತ್ಯರ್ಥ ಮಾಡಲಾಗಿದೆ ಎಂದು ಸಚಿವರು ಹೇಳಿದರು.

2000 ಸರ್ವೇಯರ್ ನೇಮಕ ಶೀಘ್ರ

ಸರ್ವೇಯರ್ ಕೊರತೆ ಬಹಳ ದಿನಗಳಿಂದ ಇತ್ತು. ಪರಿಹಾರ ಕಂಡುಕೊಳ್ಳಲು 2000 ಸರ್ವೇಯರ್ ನೇಮಕಾತಿ ಮಾಡಿಕೊಳ್ಳುತ್ತಿದೆ. 750 ಪರವಾನಗಿ ಪಡೆದ ಸರ್ವೇಯರ್‌ಗಳನ್ನು ನೇಮಕ ಮಾಡಿಕೊಳ್ಳುತ್ತಿದ್ದು, ಯಾವ್ಯಾವ ತಾಲೂಕಿನಲ್ಲಿ ಸರ್ವೇ ಕಾರ್ಯ ಹೆಚ್ಚು ಬಾಕಿ ಇವೆಯೋ ಅಂತಹ ತಾಲೂಕಿಗೆ ಹಂಚಿಕೆ ಮಾಡಲಾಗುವುದು. ಇದರಿಂದ ತ್ವರಿತವಾಗಿ ಪ್ರಕರಣ ವಿಲೇವಾರಿಯಾಗಲು ಸಾಧ್ಯವಾಗಲಿದೆ ಎಂದರು.

Categories
ತೀರ್ಥಹಳ್ಳಿ

ತೀರ್ಥಹಳ್ಳಿ ಕಾಂಗ್ರೆಸ್ಸಿನಲ್ಲಿ ಭಿನ್ನಮತ ಸ್ಫೋಟ!?

ತೀರ್ಥಹಳ್ಳಿ ಕಾಂಗ್ರೆಸ್ಸಿನಲ್ಲಿ ಭಿನ್ನಮತ ಸ್ಫೋಟ!?
– ನಾಲ್ಕೈದು ಯುವ ನಾಯಕರು ಪಕ್ಷ ಬಿಡುವ ಸಾಧ್ಯತೆ
– ಪಕ್ಷದೊಳಗಿನ ಆಂತರಿಕ ಭಿನ್ನಮತದಿಂದ ಅಸಮಾಧಾನ?
– ಮತ್ತೆ ಬಿಜೆಪಿಗೆ ಪ್ಲಸ್ ಆಗುತ್ತಾ ಈ ಬೆಳವಣಿಗೆ!

NAMMUR EXPRESS EXCLUSIVE
ತೀರ್ಥಹಳ್ಳಿ : ತೀರ್ಥಹಳ್ಳಿ ಕಾಂಗ್ರೆಸ್ ಪಕ್ಷದಲ್ಲಿ ಭಿನ್ನಮತ ಶುರುವಾಗಿದೆ. ಹಳಬರು, ಹೊಸಬರು ಹಾಗೂ ಇನ್ನೊಂದು ಗುಂಪು ಹೀಗೆ ಅನೇಕ ಸಮಸ್ಯೆಗಳು ಎದುರಾಗುತ್ತಿವೆ. ಈ ನಡುವೆ ಅನೇಕ ಯುವ ಮುಖಂಡರು ಕೆಲವೊಂದು ಸಮಸ್ಯೆಗಳಿಂದ ಪಕ್ಷ ಬಿಡಲು ಈಗಾಗಲೆ ಸಿದ್ಧತೆಯನ್ನು ನಡೆಸಿದ್ದಾರೆ. ಈಗಾಗಲೇ ಮತ್ತೊಂದು ಪಕ್ಷದ ಕದ ಕೂಡ ತಟ್ಟಿದ್ದಾರೆ ಎಂದು ಮೂಲಗಳಿಂದ ತಿಳಿದುಬಂದಿದೆ. ಕಾಂಗ್ರೆಸ್ ಪಕ್ಷದಲ್ಲಿ ಪಕ್ಷಕ್ಕಾಗಿ ದುಡಿದವರನ್ನು ಕಡೆಗಣನೆ ಮಾಡುತ್ತಿರುವುದರಿಂದ ಇಂತಹ ಘಟನೆಗಳು ಕಳೆದ ಕೆಲವು ತಿಂಗಳಗಳಿಂದ ಘಟಿಸುತ್ತಿವೆ. ಹೀಗಾಗಿ ಕಾಂಗ್ರೆಸ್ ನಿಷ್ಠಾವಂತ ಕಾರ್ಯಕರ್ತರಾದ ಕೆಲವರು ಈ ಬಗ್ಗೆ ಬೇಸರವನ್ನ ಅನೇಕ ಸಂದರ್ಭಗಳಲ್ಲಿ ಹೊರ ಹಾಕಿದ್ದಾರೆ.

ಆದರೆ ಪಕ್ಷದ ಮುಖಂಡರುಗಳಾದ ಮಾಜಿ ಸಚಿವ ಕಿಮ್ಮನೆ ರತ್ನಾಕರ ಹಾಗೂ ಡಿಸಿಸಿ ಬ್ಯಾಂಕ್ ಅಧ್ಯಕ್ಷರಾದ ಆರ್ ಎಂ ಮಂಜುನಾಥ ಗೌಡ ಈ ಬಗ್ಗೆ ಕಾರ್ಯಕರ್ತರ ಸಮಸ್ಯೆ ಬಗ್ಗೆ ಗಮನ ವಹಿಸದೆ ಇರುವುದು, ಜೊತೆಗೆ ಪಕ್ಷದ ದುಡಿದ ಪ್ರಮುಖರ ಬಗ್ಗೆ ಆಸಕ್ತಿ ವಹಿಸದೆ ಇರುವುದು ಇದೀಗ ಅಸಮಾಧಾನಕ್ಕೆ ಕಾರಣವಾಗಿದೆ. ಈ ಹಿನ್ನೆಲೆಯಲ್ಲಿ ಪಕ್ಷದ ಕೆಲವು ಮುಖಂಡರು ಈಗಾಗಲೇ ಪಕ್ಷ ಬಿಡುವ ಸಿದ್ಧತೆ ನಡೆಸಿದ್ದಾರೆ. ಜೊತೆಗೆ ಮತ್ತೊಂದು ಪಕ್ಷದಿಂದ ಈ ಬಗ್ಗೆ ಅವರಿಗೆ ಕರೆ ಕೂಡ ಬಂದಿದೆ ಎಂದ ಮಾಹಿತಿ ಲಭ್ಯವಾಗಿದೆ.

ಪ್ರತಿ ಹೋಬಳಿಯಲ್ಲೂ ಅಸಮಾಧಾನ!

ತೀರ್ಥಹಳ್ಳಿ ವಿಧಾನ ಸಭಾ ಕ್ಷೇತ್ರದ ಪ್ರತಿ ಹೋಬಳಿ ಮಟ್ಟದಲ್ಲಿ ಇಂತಹ ಘಟನೆಗಳು ನಡೆಯುತ್ತಿದ್ದು, ಸರ್ಕಾರ ಇದ್ದರೂ ಇಲ್ಲಿ ಇಬ್ಬರು ನಾಯಕರಿದ್ದರೂ ಸಣ್ಣ ಪುಟ್ಟ ಕೆಲಸ ಕೂಡ ಆಗುತ್ತಿಲ್ಲ ಎಂದು ಹೆಸರು ಹೇಳಲು ಇಚ್ಚಿಸದ ಕೆಲವು ಕಾಂಗ್ರೆಸ್ ಕಾರ್ಯಕರ್ತರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಕಾಂಗ್ರೆಸ್ ನಲ್ಲಿ ಕೆಲವೇ ದಿನಗಳಲ್ಲಿ ಭಿನ್ನಮತ ಸ್ಪೋಟಗೊಳ್ಳಲಿದ್ದು ಅನೇಕರು ಪಕ್ಷ ಬಿಡುವತ್ತ ಗಮನ ವಹಿಸಿದ್ದಾರೆ ಎಂದು ಅನೇಕ ಮೂಲಗಳು ತಿಳಿದು ಬಂದಿದೆ.

ಪಕ್ಷದ ಅನೇಕ ಯುವ ಮುಖಂಡರುಗಳಿಗೆ ತೊಂದರೆಯಾದಲ್ಲಿ ಬೆನ್ನಿಗೆ ನಿಲ್ಲಬೇಕಾದ ನಾಯಕರಾದ ಕಿಮ್ಮನೆ ರತ್ನಾಕರ್ ಹಾಗೂ ಡಾ. ಆರ್ ಎಂ ಮಂಜುನಾಥ್ ಗೌಡ ಮತ್ತು ಪ್ರಮುಖ ಕಾಂಗ್ರೆಸ್ ಮುಖಂಡರು ಗಮನ ವಹಿಸುತ್ತಿಲ್ಲ. ಅದೇ ಆರಗ ಜ್ಞಾನೇಂದ್ರ ಈ ಸ್ಥಾನದಲ್ಲಿ ಇದ್ದಿದ್ದರೆ ಖಂಡಿತಾ ನಮಗೆ ಅನ್ಯಾಯ ಆಗುತ್ತಿರಲಿಲ್ಲ. ಅವರು ಪಕ್ಷದ ಕಾರ್ಯಕರ್ತರ ಬಗ್ಗೆ ಗಮನಿಸುತ್ತಾರೆ. ಕಾಂಗ್ರೆಸ್ ಪಕ್ಷದಲ್ಲಿ ಕಾರ್ಯಕರ್ತರಿಗೆ ಬೆಲೆ ಇಲ್ಲ. ಬರೀ ಹಿಂಬಾಲಕರಿಗೆ ನ್ಯಾಯ, ಸವಲತ್ತು ಸಿಗುತ್ತದೆ ಎಂಬ ಬೇಸರ ನೊಂದ ಕಾರ್ಯಕರ್ತರಿಂದ ವ್ಯಕ್ತವಾಗಿದೆ.

ಯುವಕರಿಗೆ ಸಿಗದ ಗೌರವ?

ಕಾಂಗ್ರೆಸ್ ಪಕ್ಷದಲ್ಲಿ ಯುವಕರಿಗೆ ಗೌರವ ಸಿಗುತ್ತಿಲ್ಲ, ಮಂಜುನಾಥ ಗೌಡ ಪಕ್ಷಕ್ಕೆ ಬಂದ ಮೇಲೆ ಒಂದಷ್ಟು ಯುವಕರ ದಂಡು ಪಕ್ಷಕ್ಕೆ ಬಂದು ಕಳೆದ ಚುನಾವಣೆಯಲ್ಲೂ ಪ್ರಮುಖ ಪಾತ್ರ ವಹಿಸಿತ್ತು. ಆದರೆ ಈಗ ಗೌರವ ಇಲ್ಲ, ಜತೆಗೆ ಸಣ್ಣ ಪುಟ್ಟ ಕೆಲಸ ಆಗುತ್ತಿಲ್ಲ. ಹೀಗಾಗಿ ಪಕ್ಷದಲ್ಲಿನ ಕೆಲವರಿಗೆ ಅಭದ್ರತೆ ಕಾಡುತ್ತಿದೆ ಎಂದು ಯುವ ಮುಖಂಡರೊಬ್ಬರು ತಿಳಿಸಿದ್ದಾರೆ.

ತಾಪಂ, ಜಿಪಂ, ಲೋಕಸಭಾ ಚುನಾವಣೆಗೆ ತೊಂದರೆ?

ಕಾಂಗ್ರೆಸ್ ಪಕ್ಷದಲ್ಲಿ ನ್ಯಾಯದ ಪರ ದನಿ ಇಲ್ಲದಾಗಿದೆ. ಹೀಗೆ ಕಾರ್ಯಕರ್ತರ ಕಡೆಗಣನೆ ಮುಂದಿನ ತಾಲೂಕು ಪಂಚಾಯತ್, ಜಿಲ್ಲಾ ಪಂಚಾಯತ್, ಲೋಕ ಸಭಾ ಚುನಾವಣೆಯಲ್ಲಿ ಪಕ್ಷಕ್ಕೆ ತೊಂದರೆಯಾಗುವ ಸಾಧ್ಯತೆ ಇದೆ.

ಸರ್ಕಾರ ಬಂದರೂ ಯಾವುದಕ್ಕೂ ನೇಮಕ ಆಗಿಲ್ಲ

ಕಾಂಗ್ರೆಸ್ ಸರ್ಕಾರ ಬಂದು ವರ್ಷ ಆಗುತ್ತಾ ಬಂದರೂ ಇನ್ನು ತಾಲೂಕಿನ ಆಡಳಿತ ಹುದ್ದೆಗೆ ನಾಮ ನಿರ್ದೇಶನ ಆಗಿಲ್ಲ. ಈ ಬಗ್ಗೆ ನಾಯಕರಿಗೂ ಒಲವು ಇದ್ದಂತಿಲ್ಲ ಎಂಬ ಆರೋಪ ಕೇಳಿ ಬಂದಿದೆ.

Categories
ರಾಷ್ಟ್ರೀಯ ವಾರ್ತೆ

ಕೇಂದ್ರದ ಬಜೆಟ್ ಕ್ಷಣಗಣನೆ ಶುರು!

ಕೇಂದ್ರದ ಬಜೆಟ್ ಕ್ಷಣಗಣನೆ ಶುರು!
– 11 ಗಂಟೆಯಿಂದ ಬಜೆಟ್ ಮಂಡನೆ ಮಾಡ್ತಾರೆ ನಿರ್ಮಲಾ ಮೇಡಂ
– ಕೃಷಿ, ಉದ್ಯೋಗ ಸೃಷ್ಟಿಗೆ ಒತ್ತು: ಹೊಸ ಯೋಜನೆ ಇಲ್ಲ
– ಸತತವಾಗಿ 6ನೇ ಬಜೆಟ್ ಮಂಡನೆ ಮಾಡುತ್ತಿರುವ ವಿತ್ತ ಸಚಿವೆ

NAMMUR EXPRESS NEWS
ನವ ದೆಹಲಿ: ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಗುರುವಾರ ಬೆಳಿಗ್ಗೆ 11 ಗಂಟೆಗೆ ಲೋಕಸಭೆಯಲ್ಲಿ 2024–25ನೇ ಹಣಕಾಸು ವರ್ಷದ ಕೇಂದ್ರದ ಮಧ್ಯಂತರ ಬಜೆಟ್‌ ಮಂಡಿಸಲಿದ್ದಾರೆ. ಈ ಬಜೆಟ್ ಅಲ್ಲಿ ಹೊಸ ಘೋಷಣೆ ಇರುವುದಿಲ್ಲ. ನಿರ್ಮಲಾ ಅವರು ಮಂಡಿಸುತ್ತಿರುವ ಆರನೇ ಬಜೆಟ್‌ ಇದಾಗಿದೆ. ಆ ಮೂಲಕ ಆರು ಬಾರಿ ಬಜೆಟ್‌ ಮಂಡಿಸಿರುವ ಮಾಜಿ ಪ್ರಧಾನಿ ದಿವಂಗತ ಮೊರಾರ್ಜಿ ದೇಸಾಯಿ ಅವರ ದಾಖಲೆಯನ್ನು ಸರಿಗಟ್ಟಲಿದ್ದಾರೆ.

ಮಧ್ಯಂತರ ಬಜೆಟ್‌ನಲ್ಲಿ ಯಾವುದೇ ಹೊಸ ಘೋಷಣೆಗಳನ್ನು ಪ್ರಕಟಿಸುವುದಿಲ್ಲ ಎಂದು ಈಗಾಗಲೇ ಅವರು ಹೇಳಿದ್ದಾರೆ. ಹಾಗಾಗಿ, ಹಳೆಯ ಹಾಗೂ ಹೊಸ ತೆರಿಗೆ ಪದ್ಧತಿಯಡಿ ತೆರಿಗೆದಾರರಿಗೆ ಯಾವುದೇ ವಿನಾಯಿತಿ ಪ್ರಕಟಿಸುವ ಸಾಧ್ಯತೆ ಇಲ್ಲ ಎಂದು ಮೂಲಗಳು ತಿಳಿಸಿವೆ. ಲೋಕಸಭೆ ಚುನಾವಣೆ ನಂತರ ಅಧಿಕಾರಕ್ಕೆ ಬರುವ ಹೊಸ ಸರ್ಕಾರವು ಪೂರ್ಣ ಬಜೆಟ್‌ ಮಂಡಿಸಲಿದೆ ಎಂದು ಆ ಮೂಲಗಳು ತಿಳಿಸಿವೆ.

Categories
ತೀರ್ಥಹಳ್ಳಿ

ಆಧಾರ್ ಕಾರ್ಡ್ ತಿದ್ದುಪಡಿಗೆ ತೀರ್ಥಹಳ್ಳಿಯಲ್ಲಿ ಅವಕಾಶ

ಆಧಾರ್ ಕಾರ್ಡ್ ತಿದ್ದುಪಡಿಗೆ ತೀರ್ಥಹಳ್ಳಿಯಲ್ಲಿ ಅವಕಾಶ
– ತೀರ್ಥಹಳ್ಳಿ ತಾಲ್ಲೂಕು ಕಚೇರಿಯಲ್ಲೇ ತಿದ್ದುಪಡಿ
– ಅಂಚೆ ಕಚೇರಿಯಲ್ಲೂ ತಿದ್ದು ಪಡಿ ಮಾಡಬಹುದು
– ಕರ್ನಾಟಕ ಒನ್ ಸೇವಾ ಕೇಂದ್ರದಲ್ಲಿ ಲಭ್ಯ

NAMMUR EXPRESS NEWS
ತೀರ್ಥಹಳ್ಳಿ: ಆಧಾರ್ ಕಾರ್ಡ್ ತಿದ್ದು ಪಡಿ ಈಗ ತಾಲೂಕು ಕಚೇರಿಯಲ್ಲಿಯೇ ಅವಕಾಶ ನೀಡಲಾಗಿದೆ. ತಾಲ್ಲೂಕು ಕಚೇರಿಯಲ್ಲಿ ಈ ಹಿಂದೆ ಕಾರ್ಯ ನಿರ್ವಹಿಸುತ್ತಿದ್ದ ಆಧಾ‌ರ್ ತಿದ್ದುಪಡಿ ಕೇಂದ್ರ ತಾಂತ್ರಿಕ ದೋಷಗಳಿಂದ ವರ್ಷಗಳಿಂದ ಸ್ಥಗಿತಗೊಂಡಿತ್ತು. ತಾಂತ್ರಿಕ ದೋಷಗಳನ್ನು ಸರಿಪಡಿಸಿಕೊಂಡಿದ್ದು ಇದೀಗ ತೀರ್ಥಹಳ್ಳಿಯ ಮುಖ್ಯ ಅಂಚೆ ಕಚೇರಿ ಅಲ್ಲದೇ ತಾಲ್ಲೂಕು ಕಚೇರಿಯಲ್ಲಿಯೂ ಆಧಾ‌ರ್ ತಿದ್ದುಪಡಿಗೆ ಅವಕಾಶ ಲಭ್ಯವಾಗಿದೆ. ಬಯೋಮೆಟ್ರಿಕ್, ಡೆಮೋಗ್ರಾಫಿಕ್ ಸೇವೆಗಳು ಕೂಡ ತಾಲ್ಲೂಕು ಕಚೇರಿಯಲ್ಲಿಯೇ ಆರಂಭಗೊಂಡಿದೆ. ಆಧಾರ್ ಕಾರ್ಡ್ ಫೋನ್ ನಂಬರ್ ಬದಲಾವಣೆ, ವಿಳಾಳ, ಹೆಸರು ಬದಲಾವಣೆ, ಮುಂತಾದವುಗಳು ತಾಲ್ಲೂಕು ಕಚೇರಿ ಸಮೀಪ ತೆರೆದಿರುವ ಕರ್ನಾಟಕ ಒನ್ ಸೇವಾ ಕೇಂದ್ರದಲ್ಲಿ ಲಭ್ಯವಿದೆ. ಆಧಾರ್ ಕಾರ್ಡ್ ತಿದ್ದುಪಡಿಮಾಡಿಸಿಕೊಳ್ಳುವವರಿಗೆ ಇದೀಗ ಉತ್ತಮ ಅವಕಾಶ ಲಭಿಸಿದ್ದು ಮೂರು ಸ್ಥಳಗಳ ಸೇವಾ ಕೇಂದ್ರ ಬಳಕೆ ಮಾಡಿಕೊಳ್ಳಬಹುದು.