Month: March 2025

ಕಾಫಿನಾಡಿನ ನಾಲ್ವರು ಪೊಲೀಸರಿಗೆ ಮುಖ್ಯಮಂತ್ರಿ ಪದಕ

* 2024 ನೇ ಸಾಲಿನ ಮುಖ್ಯಮಂತ್ರಿ ಪದಕ ಘೋಷಣೆ
* ಚಿಕ್ಕಮಗಳೂರು,ಶೃಂಗೇರಿ,ಕಳಸ ಪೊಲೀಸರಿಗೆ ಲಭಿಸಿದ ಗೌರವ

NAMMUR EXPRESS NEWS
ಚಿಕ್ಕಮಗಳೂರು: ಪೊಲೀಸ್ ಇಲಾಖೆಯಲ್ಲಿ ಉತ್ತಮ ಸೇವೆ ಸಲ್ಲಿಸುತ್ತಿರುವ ಅಧಿಕಾರಿಗಳಿಗೆ ನೀಡುವ ಮುಖ್ಯಮಂತ್ರಿ ಪದಕ ಗೌರವದ 2024ನೇ ಸಾಲಿನ ಪಟ್ಟಿ ಪ್ರಕರಟವಾಗಿದ್ದು ಇದರಲ್ಲಿ ಜಿಲ್ಲೆಯಲ್ಲಿ ಕಳೆದ ಇಪ್ಪತ್ತು ವರ್ಷಗಳಿಂದ ಪೊಲೀಸ್‌ ಇಲಾಖೆಯಲ್ಲಿ ಸೇವೆ ಸಲ್ಲಿಸುತ್ತಿರುವ ನಾಲ್ವರು ಪೊಲೀಸರಿಗೆ ಮುಖ್ಯಮಂತ್ರಿ ಪದಕ ಲಭಿಸಿದೆ.
ರಾಜ್ಯದಲ್ಲಿ ಒಟ್ಟು 219 ಪೊಲೀಸರು ಮುಖ್ಯಮಂತ್ರಿಗಳ ಪದಕಕ್ಕೆ ಭಾಜನರಾಗಿದ್ದಾರೆ.

ಜಿಲ್ಲೆಯಲ್ಲಿ ನಕ್ಸಲ್‌ರನ್ನು ಶಸ್ತ್ರಾಸ್ತ್ರ ತ್ಯಜಿಸಿ ಮುಖ್ಯವಾಹಿನಿಗೆ ತರುವಲ್ಲಿ ಶ್ರಮಿಸಿದ ಈ ಸಿಬ್ಬಂದಿಗಳು ಮುಖ್ಯಮಂತ್ರಿಗಳ ಪದಕ ಪಡೆದಿದ್ದು, ಚಿಕ್ಕಮಗಳೂರು ಜಿಲ್ಲೆಯ ಜಿಲ್ಲಾ ಪೊಲೀಸ್‌ ವರಿಷ್ಠಧಿಕಾರಿ ಕಛೇರಿಯ ಸಿ.ಬಿ.ಬ್ರಾಂಚ್ ನಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಶೇಷಾದ್ರಿ ಹೆಚ್ ಮತ್ತು ಬಸವರಾಜ್ ಕೆ.ಹೆಚ್ ಎಂಬುವವರಿಗೆ ಹಾಗೂ ಶೃಂಗೇರಿಯ ಗುಪ್ತಚರ ದಳದ ನವೀನ್ ಗೌಡ ಮತ್ತು ಕಳಸದ ಗುಪ್ತಚರ ದಳದ ಗೀರಿಶ್ ಎಂಬ ಪೊಲೀಸ್ ಅಧಿಕಾರಿಗಳಿಗೆ ಮುಖ್ಯಮಂತ್ರಿ ಪದಕ ಪಡೆದಿದ್ದಾರೆ.

ಚಿಕ್ಕಮಗಳೂರು: ಕಾಡಾನೆ ದಾಳಿಗೆ ರೈತ ಸಾವು!

– ಸೊಂಡಿಲಿನಿಂದ ರೈತನನ್ನು ಹಿಡಿದು ಮರಕ್ಕೆ ಹೊಡೆದ ಕಾಡಾನೆ
– ಸ್ಥಳಕ್ಕೆ ಅರಣ್ಯಾಧಿಕಾರಿಗಳು ಭೇಟಿ

NAMMUR EXPRESS NEWS
ಚಿಕ್ಕಮಗಳೂರು: ಕಾಡಾನೆ ದಾಳಿಯಿಂದಾಗಿ ರೈತ ಮೃಪಟ್ಟಿರುವ ಘಟನೆ ಚಿಕ್ಕಮಗಳೂರು ಜಿಲ್ಲೆಯ ತರೀಕೆರೆ ತಾಲೂಕಿನ ಗುರುಪುರ ಗ್ರಾಮದಲ್ಲಿ ಮಾ. 31( ಇಂದು) ಮುಂಜಾನೆ ನಡೆದಿದೆ.
ಮೃತ ರೈತನನ್ನು ವೆಂಕಟೇಶ್ (58) ಎಂದು ಗುರುತಿಸಲಾಗಿದೆ. ವೆಂಕಟೇಶ್ ಮುಂಜಾನೆ ಕತ್ತಲಿದ್ದ ಕಾರಣ ಅಲ್ಲಿ ಕಾಡಾನೆ ಇದ್ದ ವಿಚಾರ ತಿಳಿಯದೇ ಮನೆ ಮುಂದೆ ಹಸು ಕಟ್ಟುತ್ತಿದ್ದರು. ಈ ವೇಳೆ ಆನೆ ಉಸಿರಾಡುವ ಸದ್ದು ಕೇಳಿ ಮೊಬೈಲ್‌ನಿಂದ ಟಾರ್ಚ್ ಲೈಟ್ ಹಾಕಿದ್ದಾರೆ. ಲೈಟ್ ಹಾಕಿದ ತಕ್ಷಣ ಆನೆ ಸೊಂಡಿಲಿನಿಂದ ರೈತನನ್ನು ಹಿಡಿದು ತೆಂಗಿನ ಮರಕ್ಕೆ ಹೊಡೆದಿದೆ. ಪರಿಣಾಮ ರೈತ ಸ್ಥಳದಲ್ಲೇ ಮೃತಪಟ್ಟಿದ್ದಾನೆ. ಸ್ಥಳಕ್ಕೆ ಅರಣ್ಯಾಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಇಲಾಖೆಯ ವಿರುದ್ಧ ಗ್ರಾಮಸ್ಥರ ಆಕ್ರೋಶ
ನಿರಂತರ ಕಾಡಾನೆ ದಾಳಿಯಿಂದ ತತ್ತರಿಸಿದ ಜಿಲ್ಲೆಯ ಜನತೆ ಹಾಗೂ ಇಂದು ಕಾಡಾನೆ ದಾಳಿಗೆ ಮೃತಪಟ್ಟ ತರೀಕೆರೆ ತಾಲೂಕಿನ ಗುರುಪುರದ ರೈತನ ಗ್ರಾಮದ ಸ್ಥಳೀಯರು ಇಲಾಖೆಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದು,ಕಾಡು ಪ್ರಾಣಿಗಳ ಹಾವಳಿಗೆ ಶಾಶ್ವತ ಪರಿಹಾರ ಕಲ್ಪಿಸುವಂತೆ ಆಗ್ರಹಿಸಿದ್ದಾರೆ.

ಬಿ.ಎಸ್.ಎನ್.ಎಲ್ ಕ್ರಾಂತಿಗೆ ಮುಂದಾದ ಸಂಸದ ಕೋಟಾ

* 4 ಜಿ ಸೇವೆಗಾಗಿ ಕೇಂದ್ರ ಸಚಿವ ಹಾಗೂ ಅಧಿಕಾರಿಗಳ ಭೇಟಿ
* ಬಿ.ಎಸ್.ಎನ್.ಎಲ್ ಕ್ರಾಂತಿಯ ಬಗ್ಗೆ ಮಾಹಿತಿ ಹಂಚಿಕೊಂಡ ಸಂಸದ

NAMMUR EXPRESS NEWS
ಚಿಕ್ಕಮಗಳೂರು: ಜಿಲ್ಲೆಯಲ್ಲಿ ಬಿ.ಎಸ್‌.ಎನ್‌.ಎಲ್ ನೆಟ್ವರ್ಕ್ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುತ್ತಿರುವ ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಇದೀಗ ಚಿಕ್ಕಮಗಳೂರು ಜಿಲ್ಲೆಯಲ್ಲಿ 4ಜಿ ಸೇವೆಗೆ ದೂರ ಸಂಪರ್ಕ ಸಚಿವರಾದ ಜ್ಯೋತಿರಾದಿತ್ಯ ಸಿಂಧ್ಯಾರಿಗೆ ಮನವಿ ಮಾಡಿದ್ದು, ಕೂಡಲೇ 4ಜಿ ಸೇವೆ ಕಾರ್ಯಾರಂಭಕ್ಕೆ ಬಿ.ಎಸ್.ಎನ್. ಎಲ್ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.
ಈ ಬಗ್ಗೆ ಮಾಹಿತಿ ಹಂಚಿಕೊಂಡಿರುವ ಸಂಸದ ಕೋಟಾ ಶ್ರೀನಿವಾಸ ಪೂಜಾರಿಯವರು “ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಬಿ.ಎಸ್‌.ಎನ್.ಎಲ್ ಕ್ರಾಂತಿ ಮಾಡುವುದು ನಮ್ಮ ಉದ್ದೇಶ.ಇದಕ್ಕಾಗಿ ಸಕಲ ರೀತಿಯಲ್ಲೂ ಶ್ರಮಿಸುತ್ತಿದ್ದೇನೆ.
ಈ ಮೊದಲು ಬಿ.ಎಸ್.ಎನ್.ಎಲ್. ವತಿಯಿಂದ ಕೇವಲ 2ಜಿ ಮತ್ತು 3ಜಿ ಸೇವೆ ಮಾತ್ರ ದೊರೆಯುತ್ತಿದ್ದು,ಗ್ರಾಹಕರು ಸುಮಾರು ವರ್ಷಗಳಿಂದ 4ಜಿ ಸೇವೆಗೆ ಕಾಯುತ್ತಿದ್ದು ಈ ವಿಷಯವನ್ನು ತಿಳಿಯುತ್ತಲೇ ಕೇಂದ್ರ ಸರ್ಕಾರದ ದೂರ ಸಂಪರ್ಕ ಸಚಿವರಾದ ಶ್ರೀ ಜ್ಯೋತಿರಾದಿತ್ಯ ಸಿಂಧ್ಯಾ ಮತ್ತು ಬಿ.ಎಸ್.ಎನ್.ಎಲ್‌ನ ಕೇಂದ್ರ ಸರ್ಕಾರದ ಉನ್ನತ ಅಧಿಕಾರಿಗಳಾದ ಬಿ.ಎಸ್.ಎನ್.ಎಲ್ ಚೇರ್‌ಮನ್ ಎ.ರಾಬರ್ಟ್ ಜೆ. ರವಿ ರವರನ್ನು ಭೇಟಿ ಮಾಡಿ ಚಿಕ್ಕಮಗಳೂರಿನ ಎಲ್ಲಾ 217 ಟವರ್ ಗಳಿಗೂ 4ಜಿ ಸೇವೆಯನ್ನು ನೀಡುವಂತೆ ಮನವಿ ಮಾಡಿದ್ದೆ.ನನ್ನ ಮನವಿಯ ಪ್ರತಿಫಲವಾಗಿ ಇದೀಗ ಚಿಕ್ಕಮಗಳೂರಿನ 217 ಟವರ್‌ನಲ್ಲಿ 165 ಕ್ಕೂ ಹೆಚ್ಚು ಟವರ್‌ಗಳಲ್ಲಿ 4ಜಿ ಸೇವೆ ಕಾರ್ಯರಂಭ ಮಾಡಿದ್ದು ಉಳಿದ ಟವರ್‌ಗಳಿಗೂ ಉಪಕರಣ ಅಳವಡಿಕೆ ಕಾರ್ಯ ಪ್ರಗತಿಯಲ್ಲಿದೆ.
ಜಿಲ್ಲೆಯಲ್ಲಿ ಯಾವುದೇ ರೀತಿಯ ಸಂಪರ್ಕವಿರದ ಅನೇಕ ಹಳ್ಳಿಗಳಿಗೆ ಮೊಬೈಲ್ ಟವರ್‌ನ ಅಗತ್ಯತೆಯನ್ನು ಮನಗಂಡು 26 ಹಳ್ಳಿಗಳಿಗೆ ಹೊಸ 4ಜಿ ಟವರ್‌ನ ಕಾರ್ಯಕ್ಕೆ ಅಗತ್ಯವಿದ್ದ ಜಾಗವನ್ನು ಕಂದಾಯ ಮತ್ತು ಅರಣ್ಯ ಇಲಾಖೆಯಿಂದ ಮಂಜೂರಾತಿ ಮಾಡಿಸಿದ್ದಲ್ಲದೆ,ಕೇಂದ್ರ ಸರ್ಕಾರ ಮತ್ತು ಬಿ.ಎಸ್.ಎನ್.ಎಲ್ ಅಧಿಕಾರಿಗಳೊಂದಿಗೆ ನಿರಂತರ ಹತ್ತಾರು ಸಭೆಗಳನ್ನು ನಡೆಸಿದ್ದರ ಫಲವಾಗಿ ಈಗಾಗಲೇ 17 ಟವರ್‌ನಲ್ಲಿ 4ಜಿ ಸೇವೆ ಕಾರ್ಯಾರಂಭ ಆಗುವಂತೆ ಮಾಡಲಾಗಿದ್ದು,ಉಳಿದ 9 ಸ್ಥಳಗಳಲ್ಲಿ ಉಪಕರಣ ಅಳವಡಿಕೆ ಕಾರ್ಯ ಪ್ರಗತಿಯಲ್ಲಿದ್ದು,ಶೀಘ್ರದಲ್ಲಿ 4ಜಿ ಸೇವೆ ನೀಡಲಾಗುವುದು,4ಜಿ ಟವರ್ ಸಂಪರ್ಕಕ್ಕೆ ಅಗತ್ಯವಾದ ಓ.ಎಫ್.ಸಿ ಅಥವಾ ಮೈಕ್ರೋಲಿಂಕ್ ದೊರೆಯದಂತಹ ಹಳ್ಳಿಯಾದ ಮೂಡಿಗೆರೆ ತಾಲ್ಲೂಕಿನ,ಅಲೆಖಾನ್, ಹೊರಟ್ಟಿ ಗ್ರಾಮಕ್ಕೆ ಕೇಂದ್ರ ಸರ್ಕಾರದ ನೆರವಿನಿಂದ ಉಪಗ್ರಹ (ಸೆಟಲೈಟ್)ನ ಮೂಲಕ ಸಂಪರ್ಕ ಕಲ್ಪಿಸಿ ಗ್ರಾಹಕರಿಗೆ 4ಜಿ ಸೇವೆ ನೀಡಲಾಗಿದೆ.ಇದು ರಾಜ್ಯದಲ್ಲೇ ಪ್ರಥಮ ಉಪಗ್ರಹ ಸಂಪರ್ಕವೆಂದು ಪರಿಗಣಿಸಲಾಗಿದೆ.

ಬಿ.ಎಸ್.ಎನ್.ಎಲ್‌.ನ ಟವರ್‌ಗಳಿಗೆ ಅಗತ್ಯವಾದ ಬ್ಯಾಟರಿ ಇಲ್ಲದಿರುವುದನ್ನು ಅರ್ಥ ಮಾಡಿಕೊಂಡು ನವದೆಹಲಿಯಲ್ಲಿ ಬಿ.ಎಸ್.ಎನ್.ಎಲ್‌ನ ಉನ್ನತ ಅಧಿಕಾರಿಗಳನ್ನು ಭೇಟಿಮಾಡಿ,ಚಿಕ್ಕಮಗಳೂರು ಜಿಲ್ಲೆಗೆ ಮೊದಲ ಹಂತದಲ್ಲಿ ಸುಮಾರು 51 ಸ್ಥಳಕ್ಕೆ ಬ್ಯಾಟರಿ ಮಂಜೂರಾತಿ ಮಾಡಿಸಿದ್ದು ಈ ಎಲ್ಲಾ ಬ್ಯಾಟರಿಗಳು ಈಗ ಜಿಲ್ಲೆಗೆ ಪೂರೈಕೆಯಾಗಿ ಭರದಿಂದ ಅಳವಡಿಕೆ ಆಗುತ್ತಿದೆ ಮತ್ತು ರಾಜ್ಯಕ್ಕೆ ಒಟ್ಟು ಬಿಡುಗಡೆಯಾದ 92 ಬ್ಯಾಟರಿಗಳಲ್ಲಿ ಶೇ.50ಕ್ಕೂ ಹೆಚ್ಚು ಬ್ಯಾಟರಿಗಳು ಚಿಕ್ಕಮಗಳೂರು ಜಿಲ್ಲೆಗೆ ಬಂದಿದೆ ಎಂದು ತಿಳಿಸಿದ್ದಾರೆ.
ಇದಲ್ಲದೆ ಉಳಿದ ಸ್ಥಳಗಳಿಗೂ ಬ್ಯಾಟರಿ ಮತ್ತು ಇತರೆ ಉಪಕರಣಗಳ ಬೇಡಿಕೆ ಸಲ್ಲಿಸಲಾಗಿದೆ.ಇದರ ಜೊತೆಗೆ ಇನ್ನೂ 43 ಹಳ್ಳಿಗಳಿಗೆ ಹೊಸ 4ಜಿ ಟವರ್‌ನ ಬೇಡಿಕೆಯನ್ನು ಕೇಂದ್ರ ಸರ್ಕಾರಕ್ಕೆ ಸಲ್ಲಿಸಿದ್ದು ಸರ್ವೇ ಕಾರ್ಯ ಪ್ರಗತಿಯಲ್ಲಿದೆ.ಇಷ್ಟೆಲ್ಲಾ ಟವರ್‌ಗಳೂ ಬಂದರೂ ಇನ್ನೂ ಕೆಲವು ಕುಗ್ರಾಮದ ಗ್ರಾಹಕರಿಗೆ ಸಂಪರ್ಕ ಸಿಗದೇ ಇರಬಹುದೆಂಬ ಕಾರಣಕ್ಕೆ ಅಂತಹ ಗ್ರಾಹಕರಿಗೆ ನೇರವಾಗಿ ಉಪಗ್ರಹದ (ಸೆಟಲೈಟ್) ಮೂಲಕ ಸಂಪರ್ಕ ನೀಡುವ ಬಿ.ಎಸ್.ಎನ್.ಎಲ್‌ನ ಯೋಜನೆಯನ್ನು ಜಿಲ್ಲೆಗೂ ವಿಸ್ತರಿಸುವಂತೆ ಕೇಂದ್ರ ಸರ್ಕಾರದ ಮಂತ್ರಿಗಳು ಮತ್ತು ಬಿ.ಎಸ್.ಎನ್.ಎಲ್‌ನ ಅಧಿಕಾರಿಗಳಿಗೆ ನಿರಂತರವಾಗಿ ಮನವಿ ಸಲ್ಲಿಸಿದ್ದು ಆಶಾದಾಯಕ ಫಲಿತಾಂಶವನ್ನು ನೀರಿಕ್ಷಿಸಲಾಗುತ್ತಿದೆ.ಜಿಲ್ಲೆಗೆ ಮೂರು ಎಫ್.ಎಮ್ ರೇಡಿಯೊ ಕೇಂದ್ರ ಮಂಜೂರಾಗಿದ್ದು ಆದಷ್ಟು ಶೀಘ್ರವಾಗಿ ಸ್ಥಾಪನೆ ಮಾಡುವಂತೆ ಸಂಬಂಧಪಟ್ಟ ಕೇಂದ್ರ ಸರ್ಕಾರದ ಸಚಿವರಿಗೆ ಮನವಿ ಮಾಡಿದ್ದೇನೆ.
ಜಿಲ್ಲೆಯ ಮಲೆನಾಡು ಗ್ರಾಮಗಳಲ್ಲಿ ವಿದ್ಯುತ್ ಸಮಸ್ಯೆಯಿಂದ ಬಿ.ಎಸ್.ಎನ್.ಎಲ್‌ನ ಸೇವೆಯಲ್ಲಿ ವ್ಯತ್ಯಯವಾಗುತ್ತಿದ್ದು ಮೆಸ್ಕಾಂ ಇಲಾಖೆಯೊಂದಿಗೆ ಹಲವಾರು ಸಭೆಗಳನ್ನು ನಡೆಸಿದ್ದು ನಿರಂತರ ಜ್ಯೋತಿ ವಿದ್ಯುತ್‌ನ್ನು ಬಿ.ಎಸ್.ಎನ್.ಎಲ್‌ಗೂ ಕೊಡಬೇಕೆಂಬ ಪ್ರಸ್ತಾಪನೆ ರಾಜ್ಯ ಸರ್ಕಾರದ ಮುಂದಿದೆ.ರಸ್ತೆ ಅಭಿವೃದ್ಧಿ,ನೀರಿನ ಪೈಪ್ ಜೋಡಣೆ ಮತ್ತು ಮೆಸ್ಕಾಂ ಕಂಬಗಳ ದುರಸ್ತಿ ಸಮಯದಲ್ಲಿ ಬಿ.ಎಸ್.ಎನ್.ಎಲ್ ಮುಖ್ಯ ಓ.ಎಫ್.ಸಿ ಕೇಬಲ್ ಗಳಿಗೆ ಹಾನಿ ಆಗುತ್ತಿದ್ದು ಅದರಿಂದ ನೆಟ್‌ವರ್ಕ್ ಕಡಿತದ ಸಮಸ್ಯೆ ಆಗುತ್ತಿದ್ದು ಈ ಎಲ್ಲಾ ಇಲಾಖೆಯೊಂದಿಗೆ ಸಮನ್ವಯ ಸಭೆಗಳನ್ನು ನಡೆಸುವ ಮೂಲಕ ಸಮಸ್ಯೆಗಳನ್ನು ಪರಿಹರಿಸುವ ಪ್ರಾಮಾಣಿಕ ಪ್ರಯತ್ನವನ್ನು ಮಾಡಿದ್ದು ಮತ್ತು ಪೂರ್ವ ಸೂಚನೆಯಿಲ್ಲದೆ ಅಗೆದು ಕೇಬಲ್ ಕಡಿತ ಮಾಡಿದರೆ ಅಂತವರ ಮೇಲೆ ಕ್ರಿಮಿನಲ್ ಕೇಸ್ ದಾಖಲಿಸಲು ಸೂಚನೆ ನೀಡಲಾಗಿದೆ.ಬಿ.ಎಸ್.ಎನ್.ಎಲ್‌ನ ಪ್ರತಿ ಗ್ರಾಹಕರ ಮನವಿಗೆ ನಾನೇ ಖುದ್ದಾಗಿ ಸ್ಪಂದಿಸುತ್ತಿದ್ದು ನ್ಯೂನ್ಯತೆಗಳನ್ನು ಸರಿಪಡಿಸಲು ಸಂಬಂಧಪಟ್ಟ ಅಧಿಕಾರಿಗಳಿಗೆ ಆಗಾಗ ಸೂಚನೆ ನೀಡುತ್ತಿದ್ದು ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಬಿ.ಎಸ್.ಎನ್.ಎಲ್ ನ ಗ್ರಾಹಕರಿಗೆ ಉತ್ತಮ ಸೇವೆ ನೀಡುವ ಗುರಿ ಹೊಂದಿದ್ದು ಅದಕ್ಕೆ ಅವಶ್ಯವಿರುವ ಎಲ್ಲಾ ಕಾರ್ಯಗಳನ್ನು ನಿರಂತರವಾಗಿ ಮಾಡುತ್ತಿರುವುದು ಗಮನಿಸಬೇಕೆಂದು ವಿನಂತಿ.ಆದಾಗ್ಯೂ ಖಾಂಡ್ಯಾ ಹೋಬಳಿಯ ಬಿದಿರೆ ಗ್ರಾಮದ ಬಿ.ಎಸ್.ಎನ್.ಎಲ್ ಟವರ್ ಸೇರಿದಂತೆ ಜಿಲ್ಲೆಯ ಪ್ರತಿ ಟವರ್‌ನಿಂದಲೂ ಗುಣಮಟ್ಟದ ಸೇವೆ ನೀಡಲು ಇಲಾಖೆಯನ್ನು ಅಣಿಗೊಳಿಸುತ್ತಿದ್ದೇನೆ.ಸರಕಾರಿ ವ್ಯವಸ್ಥೆಯಲ್ಲಿ ಟೀಕೆಗಳು ಕರಗಿಹೋಗಿ ಕೆಲಸ ಉಳಿಯಬೇಕೆಂಬುದು ನನ್ನ ಆಶಯ.ಆದಾಗ್ಯೂ ಮುಂದೊಂದಿನ ಸ್ಟಾರ್ ಸಂಸ್ಥೆ ಭಾರತಕ್ಕೆ ಬಂದರೆ ಇತರ ಖಾಸಗಿ ನೆಟ್‌ವರ್ಕ್ ಗಿಂತ ಮೊದಲಾಗಿ ಬಿ.ಎಸ್.ಎನ್.ಎಲ್ ಒಪ್ಪಂದ ಮಾಡಿಕೊಳ್ಳಬೇಕೆಂದು ಕೇಂದ್ರ ದೂರ ಸಂಪರ್ಕದ ಮಂತ್ರಿಗಳಲ್ಲಿ ಕೋರಿಕೆ ಸಲ್ಲಿಸಿದ್ದು,ಯಾರೇ ನೀಡುವ ಯಾವುದೇ ಆರೋಗ್ಯಕರ ಸಲಹೆ ಸೂಚನೆಗಳನ್ನು ಸ್ವೀಕರಿಸುತ್ತೇನೆ.ಟೀಕಿಸುವವರು ನನ್ನ ಈ ಪರಿಶ್ರಮಕ್ಕೆ ಒಂದು ಮೆಚ್ಚುಗೆಯನ್ನಾದರೂ ನೀಡಿ ಎಂದು ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ