Category: ಕುಂದಾಪುರ

ಕುಂದಾಪುರ: ಸರಕಾರದ ಆಟಕ್ಕೆ, ಅಮಾಯಕರು ಬಲಿ! 

* ಹೇರಂಜಾಲು ಸೇರಿ 5 ಗ್ರಾಮಸ್ಥರು ಭೀಕರ ಪ್ರವಾಹಕ್ಕೆ ಸಿಕ್ಕಿ ಬಿದ್ದ ಘಟನೆ
* ಆಕಸ್ಮಿಕವಲ್ಲ, ಸರಕಾರದ ಅಜಾಗರೂಕತೆಯ ಫಲ!?

NAMMUR EXPRESS NEWS
ಕುಂದಾಪುರ: ಗುಡೇದೇವಸ್ಥಾನ ಎತಾ ನೀರಾವರಿ ಯೋಜನೆಯು ಹೇರಂಜಾಲು ಮತ್ತು ಸುತ್ತಲಿನ ಐದು ಗ್ರಾಮಗಳಿಗೆ ಜೀವದ ಬೆದರಿಕೆಯನ್ನು ಉಂಟು ಮಾಡಿದೆ.
ಹೌದು ಹೇರಂಜಾಲು ಮತ್ತು ಸುತ್ತಲಿನ ಗ್ರಾಮಗಳ ಜನತೆ ಇದು ಕೇವಲ ಪ್ರವಾಹವಲ್ಲ, ಇದು ಭದ್ರತೆಯ ಮೇಲೆ ನಡೆದ ರಾಜಕೀಯ ದಾಳಿ ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.
ಈವರೆಗೆ ಯಾವುದೇ ರೀತಿಯ ಪ್ರವಾಹದ ಸಮಸ್ಯೆಯನ್ನು ಅನುಭವಿಸದ ಹೇರಂಜಾಲು, ಹಳಗೇರಿ, ನೂಜಾಡಿ ಮುಂತಾದ ಹಳ್ಳಿಗಳು – ಭೀಕರ ಪ್ರವಾಹಕ್ಕೆ ಸಿಕ್ಕಿ ಬಿದ್ದ ಘಟನೆ ಉಂಟಾಗಿದೆ.
ಗುಡೇದೇವಸ್ಥಾನ ಎತಾ ನೀರಾವರಿ ಯೋಜನೆಯ ಅತಿವಿಸ್ತೃತ ತಡೆಗೋಡೆ ಮತ್ತು ಪಕ್ಕದ ಗೋಡೆಗಳ ತಪ್ಪಾದ ವಿನ್ಯಾಸವು ಇದಕ್ಕೆ ಅಗೋಚರ ಕಾರಣ.
ಬಲವಾದ RCC ತಡೆಗೋಡೆಗಳು, ಗೋಡೆಯ ಪಿಚಿಂಗ್ ಹಾಗೂ ಕಡುಕಂಬಗಳ ನಿರ್ಮಾಣದಿಂದ ನದಿಯ ಸಹಜ ಹರಿವು ಸಂಪೂರ್ಣವಾಗಿ ವ್ಯತ್ಯಯಗೊಂಡಿದೆ. ಈ ನದಿಯ ನೀರು ತನ್ನ ಸ್ವಭಾವಿಕ ಮಾರ್ಗದಲ್ಲಿ ಹರಿಯದ ಕಾರಣ ಅದು ಹಳ್ಳಿಗಳ ಕಡೆಗೆ ಒತ್ತಾಯಪೂರ್ವಕವಾಗಿ ಹರಿದು ಬಂದಿದೆ. ಇದು ಯೋಜನೆಯ ಹೆಸರಿನಲ್ಲಿ ವಿನಾಶ ಎಂದು ಮಾಹಿತಿ ನೀಡಿದ್ದಾರೆ.

* ಜನರ ಜೀವದಾಳದ ಜೊತೆ ಆಟ!

ಜನರ ಜೀವದಾಳದ ಜೊತೆ ಆಟವಾಡಿದ ಈ ಯೋಜನೆಯ ನಿರ್ಮಾಣದ ಮೊದಲು, ಯಾವುದೆ ಪ್ರಾಥಮಿಕ ಪರಿಸರ ಪರಿಣಾಮ ಅಧ್ಯಯನ (EIA) ನಡೆಯಲಿಲ್ಲ.
ತಡೆಗೋಡೆಯ ಪಕ್ಕಭಾಗಗಳಲ್ಲಿ ಕಟ್ಟಿದ ಶಕ್ತಿಯುತ ಬಲವರ್ಧನೆ ನೀರನ್ನು ಹಳ್ಳಿಗಳ ಕಡೆಗೆ ತಿರುಗಿಸಿತು.
ಯೋಜನೆಯ ಪೂರ್ವಭಾವಿ ಯೋಜನಾ ದಾಖಲೆಗಳಲ್ಲಿ ಗ್ರಾಮಸ್ಥರ ಅಭಿಪ್ರಾಯ, ಪರಿಸರ ಪರಿವೀಕ್ಷಣೆ, ಭೂ ವಿಜ್ಞಾನ ತಜ್ಞರ ವರದಿಗಳು ಎಲ್ಲವೂ ಕಾಣುತ್ತಿಲ್ಲ.
ಜಿಲ್ಲಾ ನೀರಾವರಿ ಇಲಾಖೆ, ಸ್ಥಳೀಯ ಪಂಚಾಯತ್, ಮತ್ತು ತಾಲೂಕು ಆಡಳಿತ ಜಿಲ್ಲಾ ಆಡಳಿತ– ಎಲ್ಲರೂ ಕೂಡ ಈ ಯೋಜನೆಯ ಜವಾಬ್ದಾರಿ ಎಂದು ಗ್ರಾಮಸ್ಥರು ಅಭಿಪ್ರಾಯಪಟ್ಟಿದ್ದಾರೆ.

* ಹಳ್ಳಿಗಳ ಪಾಡು ಹೇಳೋರಿಲ್ಲ ಕೇಳೋರಿಲ್ಲ!

ಈ ಪರಿಣಾಮವಾಗಿ ಮನೆಗಳು ಜಲಾವೃತಗೊಂಡವು, ಗೊಬ್ಬರದ ಕೊಟ್ಟಿಗೆಗಳು, ಹೊಲಗಳು ಮತ್ತು ದಿನಸಿ ಗೋದಾಮುಗಳು ನೀರಿನಿಂದ ಸಂಪೂರ್ಣ ನಾಶವಾಯಿತು. ಮಕ್ಕಳಿಗೆ ಶಾಲೆಗೆ ಹೋಗುವ ಮಾರ್ಗಗಳೇ ಮುಚ್ಚಿ ಹೋದವು. ಬಟ್ಟೆ, ಬಟ್ಟಲು, ಪತ್ರಿಕೆಗಳೊಂದಿಗೆ ಜನರು ಜಲದಡಿಯಲ್ಲಿ ಹೋರಾಡಿದ ದೃಶ್ಯಗಳು ಕೂಡ ಕಾಣಬಹುದಾಗಿದೆ ಎಂದು ಜನರು ದೂರು ನೀಡಿದ್ದಾರೆ.

ಆಕಸ್ಮಿಕವಲ್ಲ, ಸರಕಾರದ ಅಜಾಗರೂಕತೆಯ ಫಲ!?

ಈ ಯೋಜನೆಯು ರೈತರ ಮೇಲೆ, ಕಾರ್ಮಿಕರ ಮೇಲೆ, ನಿರ್ಗತಿಕರ ಮೇಲೆ ದಾಳಿ ನಡೆಸಿದಂತಾಗಿದೆ.
ಜೀವಿಸುವ ಹಕ್ಕಿಗೆ ಧಕ್ಕೆಯಾದಾಗ, ಸಾರ್ವಜನಿಕ ಹಿತಕ್ಕೆ ವಿರುದ್ಧವಾದ ಯೋಜನೆ ರದ್ದುಗೊಳಿಸಬಹುದಾಗಿದೆ.
ಯಾವುದೇ ಜಲವಾಯು ಮಾರ್ಗವನ್ನು ತಿರುಗಿಸಲು ಪೂರ್ವಭಾವಿ EIA ಇರಬೇಕು – ಇದು ಇಲ್ಲದೆ ಯೋಜನೆ ಹೇಗೆ ಆರಂಭವಾಯಿತು?
ಹಳ್ಳಿಗಳಲ್ಲಿರುವ ಅಂಗವಿಕಲರಿಗೆ ಪ್ರವಾಹದಿಂದ ಸಂಚಾರಿ ಹಕ್ಕುಗಳು ಕುಂದುಹೋಗಿವೆ. ಈ ದುರಂತವನ್ನು ಮೌನದಿಂದ ನೋಡಿ ಕೂತರೆ, ಮುಂದಿನ ಪ್ರವಾಹದಲ್ಲಿ ನಮ್ಮ ಗ್ರಾಮ ಸಂವಿಧಾನದಲ್ಲಿಯೇ ಮುಳುಗುವ ಸಾಧ್ಯತೆ ಇದೆ ಎಂದು ಜನರು ಈ ಮೂಲಕ ಆಗ್ರಹಿಸಿದ್ದಾರೆ.

ಆರ್.ಎನ್.ಶೆಟ್ಟಿ ಪಿಯು ಕಾಲೇಜು ವಿದ್ಯಾರ್ಥಿನಿ ಸಾಧನೆ!
– ಶೇ. 91.5 ಫಲಿತಾಂಶದೊಂದಿಗೆ ಉತ್ತೀರ್ಣ
– ಕಾಲೇಜು ಆಡಳಿತ ಮಂಡಳಿ, ಗ್ರಾಮಸ್ಥರ ಅಭಿನಂದನೆಗಳು

NAMMUR EXPRESS NEWS
ಕುಂದಾಪುರ: ಕುಮಾರಿ ಸಿಂಚನ 2024-25 ನೇ ಸಾಲಿನ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ 600ಕ್ಕೆ 549 ( ಶೇಕಡ 91.5) ಅಂಕವನ್ನು ಪಡೆದು ತೇರ್ಗಡೆ ಹೊಂದಿದ್ದಾರೆ.
ಆರ್ ಎನ್ ಶೆಟ್ಟಿ ಪಿಯು ಕಾಲೇಜು ಕುಂದಾಪುರ ವಿದ್ಯಾರ್ಥಿನಿ ಆಗಿದ್ದು,ಅಂಡರಕಟ್ಟೆ ನಾಗರತ್ನ ಮತ್ತು ಚಂದ್ರಶೇಖರ್ ಇವರ ಪುತ್ರಿ. ಇವರ ಮುಂದಿನ ವಿದ್ಯಾಭ್ಯಾಸ ಗಳಲ್ಲಿಯೂ ಸಹ ಉತ್ತಮ ಸಾಧನೆಗೈದು ಹೆತ್ತವರಿಗೆ ಹಾಗೆ ಊರಿಗೆ ಹೆಮ್ಮೆ ತರಲಿ ಭವಿಷ್ಯ ಉಜ್ವಲವಾಗಲಿ. ಹೃದಯಪೂರ್ವಕ ಅಭಿನಂದನೆಗಳು.

ಮದರ್ ತೆರೇಸಾ’ಸ್ ಪಿಯು ಕಾಲೇಜು ಕುಂದಾಪುರಕ್ಕೆ 100% ಫಲಿತಾಂಶ!

– ಅಕ್ಷಿತಾ ರಾಜ್ಯಮಟ್ಟದಲ್ಲಿ 10 ನೇ ರ‍್ಯಾಂಕ್‌!
– ನಿಶಾ ನಾರಾಯಣ್ ರಾಜ್ಯಮಟ್ಟಕ್ಕೆ 7 ನೇ ರ‍್ಯಾಂಕ್‌

NAMMUR EXPRESS NEWS
ಕುಂದಾಪುರ: ಶಂಕರನಾರಾಯಣದ ಮದರ್ ತೆರೇಸಾ’ಸ್ ಪಿಯು ಕಾಲೇಜಿನ ವಿಜ್ಞಾನ ವಿಭಾಗದಲ್ಲಿ 102 ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದು 101ವಿದ್ಯಾರ್ಥಿಗಳು ಉತ್ತೀರ್ಣರಾಗಿ ಶೇ. 99.01 ಫಲಿತಾಂಶ ಪಡೆದಿರುತ್ತಾರೆ.
ಕುಮಾರಿ ಅಕ್ಷಿತಾ 590 (ಶೇ. 98.3) ಅಂಕಗಳಿಸಿ ರಾಜ್ಯಮಟ್ಟದಲ್ಲಿ 10 ನೇ ರ‍್ಯಾಂಕ್‌ ಪಡೆದಿರುತ್ತಾರೆ.
49 ವಿದ್ಯಾರ್ಥಿಗಳು ವಿಶಿಷ್ಟ ಶ್ರೇಣಿಯಲ್ಲಿ ಮತ್ತು 52 ವಿದ್ಯಾರ್ಥಿಗಳು ಪ್ರಥಮ ದರ್ಜೆಗಳಲ್ಲಿ ಉತ್ತೀರ್ಣರಾಗಿರುತ್ತಾರೆ.
ವಾಣಿಜ್ಯ ವಿಭಾಗದಲ್ಲಿ 70 ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದು 70 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದು, ಶೇಕಡ 100ಕ್ಕೆ 100 ಫಲಿತಾಂಶ ದಾಖಲಿಸಿರುತ್ತಾರೆ ನಿಶಾ ನಾರಾಯಣ್ ತೋಳಾರ್ 593 (ಶೇ. 98.83) ಅಂಕಗಳೊಂದಿಗೆ ರಾಜ್ಯಮಟ್ಟದಲ್ಲಿ 7 ನೇ ರ‍್ಯಾಂಕ್‌ ಪಡೆದಿರುತ್ತಾರೆ 43 ವಿದ್ಯಾರ್ಥಿಗಳು ವಿಶಿಷ್ಟ ಶ್ರೇಣಿ ಮತ್ತು 27 ವಿದ್ಯಾರ್ಥಿಗಳು ಪ್ರಥಮ ದರ್ಜೆಯಲ್ಲಿ ಉತ್ತೀರ್ಣರಾಗಿರುತ್ತಾರೆ.

ಸೀತಾರಾಮ್ ಶೆಟ್ಟಿ ಕೇರಿ ಕೊಡ್ಲು ಅವರಿಗೆ ಅಂತಿಮ ನಮನ

– ಮುಳ್ಳಿಕಟ್ಟೆಯಲ್ಲಿ ಅಂಬಾ ಫ್ರೆಂಡ್ಸ್ ಗ್ರೂಪ್ ಹುಟ್ಟು ಹಾಕಿ ಅನೇಕರಿಗೆ ದಾರಿ ತೋರಿಸಿ ಕೊಟ್ಟ ವ್ಯಕ್ತಿ
– ಜಾತಿ ಮತ, ಪಕ್ಷ ಬದಿಗಿಟ್ಟು ಜನರ ಕರೆಗೆ ಸ್ಪಂದಿಸುತ್ತಿರುವ ಧೀಮಂತ ವ್ಯಕ್ತಿಗೆ ಅಂತಿಮ ನಮನ

NAMMUR EXPRESS NEWS
ಬೈಂದೂರು/ಕುಂದಾಪುರ: ಮುಳ್ಳಿಕಟ್ಟೆಯಲ್ಲಿ ಅಂಬಾ ಫ್ರೆಂಡ್ಸ್ ಗ್ರೂಪ್ ಹುಟ್ಟು ಹಾಕಿ ಅನೇಕರಿಗೆ ದಾರಿ ತೋರಿಸಿ ಕೊಟ್ಟ ವ್ಯಕ್ತಿ, ಜಾತಿ ಮತ, ಪಕ್ಷ ಬದಿಗಿಟ್ಟು ಜನರ ಕರೆಗೆ ಸ್ಪಂದಿಸುತ್ತಿದ್ದ ಧೀಮಂತ ವ್ಯಕ್ತಿತ್ವದ ಸೀತಾರಾಮ್ ಶೆಟ್ಟಿ ಕೇರಿ ಕೊಡ್ಲು ಅವರು ವಿಧಿವಶರಾಗಿದ್ದು, ಮುಳ್ಳಿಕಟ್ಟಿ ಪರಿಸರದ ಜನತೆಗೆ ಅತ್ಯಂತ ಆಘಾತದ ಸುದ್ದಿಯಾಗಿದೆ. ಉಲ್ಲಾಸದ ಬದುಕನ್ನು ಕಟ್ಟಿಕೊಂಡ ಇವರು ತಮ್ಮ ಸೇವಾ ಮನೋಭಾವದಿಂದ ಸಮಾಜದ ಆಸ್ತಿಯಾದವರು. ಸರಳ ಸಜ್ಜನಿಕೆ ನಿರಾಡಂಬರ ಪರೋಪಕಾರ ಇತ್ಯಾದಿ ಪದಗಳಿಗೆ ಅರ್ಥ ತಂದುಕೊಟ್ಟ ಮಹಾನ್ ವ್ಯಕ್ತಿ.ಜಾತಿ ಮತ ಪಕ್ಷ ಬದಿಗಿಟ್ಟು ಜನರ ಕರೆಗೆ ಓಗೊಟ್ಟು ಬಾಂಧವ್ಯದ ಬೆಸುಗೆಯಂತೆ ನೂರಾರು ಅಂತ್ಯ ಸಂಸ್ಕಾರಕ್ಕೆ ಜೊತೆಗೂಡಿ ಘನ ವ್ಯಕ್ತಿತ್ವವನ್ನು ಹೊಂದಿ ಅಪಾರ ಜನರ ಪ್ರೀತಿ ಗಳಿಸಿದವರಾಗಿದ್ದರು. ಮುಳ್ಳಿಕಟ್ಟೆಯಲ್ಲಿ ಅಂಬಾ ಫ್ರೆಂಡ್ಸ್ ಗ್ರೂಪ್ ಹುಟ್ಟು ಹಾಕಿ ಅನೇಕರಿಗೆ ಸಹಾಯವಾಗುವಂತೆ ದಾರಿ ತೋರಿಸಿ ಕೊಟ್ಟವರು. ಇವರ ಅಕಾಲಿಕ ನಿಧನ ತುಂಬಲಾರದ ನಷ್ಟ ಎಂದರೆ ತಪ್ಪಾಗಲಾರದು. ಹುಟ್ಟು ಆಕಸ್ಮಿಕ ಸಾವು ಅನಿವಾರ್ಯ ಆದರೆ ಹಣ, ಆಸ್ತಿ, ಅಂತಸ್ತು, ಕೀರ್ತಿಗಾಗಿ ಅದ್ವಾನ ಪಡುವವರು ಅನೇಕರು ಇದ್ಯಾವುದಕ್ಕೂ ಆಸೆ ಪಡದೆ ಅದರ್ಶ ಬದುಕನ್ನು ನಡೆಸಿ ಇತರರಿಗೆ ಮಾದರಿಯಾದವರು ಸೀತಾರಾಮ್ ಶೆಟ್ಟಿ. ಇನ್ನು ನಮಗೆ ನೆನಪು ಮಾತ್ರ! ತಮ್ಮ ಬದುಕಿನ ಕೊನೆಯ ಕ್ಷಣದವರೆಗೂ ಸಮಾಜಮುಖಿ ಚಿಂತನೆ ಹಾಗೂ ಸೇವೆಯಲ್ಲಿ ತೊಡಗಿಸಿಕೊಂಡು ಕೃತಾರ್ಥರಾದವರು.
ಅಗಲಿದ ಇವರ ದಿವ್ಯಾತ್ಮಕ್ಕೆ ಚಿರಶಾಂತಿಯನ್ನು ಹಾಗೂ ಇವರ ಬಂಧು ಬಳಗದವರಿಗೆ ಈ ಆಘಾತದ ನೋವನ್ನು ಸಹಿಸುವ ಶಕ್ತಿಯನ್ನು ಭಗವಂತನು ಕರುಣಿಸಲೆಂದು ಸಮಸ್ತ ಬಂಧುಗಳ ಪರವಾಗಿ ಪ್ರಾರ್ಥಿಸಲಾಗಿದೆ. ಕುಟುಂಬದವರು, ಗ್ರಾಮಸ್ಥರು ಸಂತಾಪ ಸೂಚಿಸಿದ್ದಾರೆ.

ಡಿ. 5ಕ್ಕೆ ಇಡೂರು ಕುಂಜ್ಞಾಡಿಯ ಸಾಂಪ್ರದಾಯಿಕ ಕಂಬಳ!

– ಕೋಣಗಳೊಂದಿಗೆ ಮನರಂಜನೆ ಕ್ರೀಡೆಯಾಗಿ ಕಂಬಳವನ್ನು ಆಚರಿಸುವ ಪದ್ದತಿ!
– ದೇವರ ಹೆಸರಿನೊಂದಿಗೆ ಆಚರಿಸುತ್ತಾ ಬಂದಿರುವ ಕ್ರೀಡೆ!

NAMMUR EXPRESS NEWS
ಕುಂದಾಪುರ: ಕರ್ನಾಟಕದ ಕರಾವಳಿಯಲ್ಲಿ ಕಂಬಳವು ದೈವಿಕ ಮತ್ತು ಐತಿಹಾಸಿಕ ಕ್ರೀಡೆ.ರೈತಾಪಿ ಜನರು ತಮ್ಮ ತಮ್ಮ ಗದ್ದೆಯ ಭತ್ತ ಕಟಾವು ನಂತರ ತಮ್ಮ ಕೋಣಗಳೊಂದಿಗೆ ಮನರಂಜನೆ ಕ್ರೀಡೆಯಾಗಿ ಕಂಬಳವನ್ನು ಆಚರಿಸುವ ಪದ್ದತಿಯನ್ನು ಪೂರ್ವಜರು ಶತಮಾನಗಳಿಂದ ಊರಿನ ದೇವರ ಹೆಸರಿನೊಂದಿಗೆ ಆಚರಿಸುತ್ತಾ ಬಂದಿರುತ್ತಾರೆ.
ಇಂತಹ ಒಂದು ಸಾಂಪ್ರದಾಯಿಕ ಕಂಬಳವು ಕುಂದಾಪುರ ತಾಲ್ಲೂಕಿನ ಇಡೂರು ಕುಂಜ್ಞಾಡಿ ಹಾಯ್ಗೂಳಿನಲ್ಲಿ ಮಧ್ಯಾಹ್ನ 12 ಗಂಟೆಗೆ ಕಂಬಳೋತ್ಸವವನ್ನು ಆಯೋಜಿಸಲಾಗಿದೆ. ಹಲವಾರು ವಿಭಾಗದ ಪ್ರಶಸ್ತಿಗಳು ಇದ್ದು,ಹೆಚ್ಚಿನ ಸಂಖ್ಯೆಯಲ್ಲಿ ತಮ್ಮ ತಮ್ಮ ಕೋಣಗಳೊಂದಿಗೆ ಆಗಮಿಸಿ ಈ ಕುಂಜ್ಞಾಡಿ ಕಂಬಳೋತ್ಸವವನ್ನು ವೈಭವಯುತವಾಗಿ ನಡೆಸಿಕೊಡಬೇಕೆಂದು ಇಡೂರು ಕುಂಜ್ಞಾಡಿ ಹಾಯ್ಗೂಳಿ ದೇವಸ್ಥಾನದ ಕಂಬಳ ಸಮಿತಿಯವರು,ಕಂಬಳಗದ್ದೆ ಮನೆಯವರು, ಕಂಬಳ ಪ್ರೋತ್ಸಾಹಕರು,ಇಡೂರು ಕುಂಜ್ಞಾಡಿ ಕಂಬಳ ಅಭಿಮಾನಿಗಳು ಈ ಮೂಲಕ ವಿನಂತಿಸಿಕೊಂಡಿದ್ದಾರೆ
ಉಚಿತ ಪ್ರವೇಶ ಇರುತ್ತದೆ.

ಇತಿಹಾಸ ಪ್ರಸಿದ್ಧ ಕುಂಭಾಸಿಯಲ್ಲಿ ನವ ರಾತ್ರಿ ಸಂಭ್ರಮ!

* ಶ್ರೀ ಬ್ರಾಹ್ಮೀ ದುರ್ಗಾಪರಮೇಶ್ವರೀ ಅಮ್ಮನಿಗೆ ಉಘೇ ಉಘೇ
* ಅ. 10ರಿಂದ ಯಾವ ಯಾವ ಕಾರ್ಯಕ್ರಮ?

NAMMUR EXPRESS NEWS
ಕುಂದಾಪುರ: ಉಡುಪಿ ಜಿಲ್ಲೆಯ ಕುಂದಾಪುರ ತಾಲೂಕಿನ ಇತಿಹಾಸ ಪ್ರಸಿದ್ಧ ಕುಂಭಾಸಿ ಶ್ರೀ ಚಂಡಿಕಾ ದುರ್ಗಾಪರಮೇಶ್ವರೀ ದೇವಸ್ಥಾನದಲ್ಲಿ ಶರನ್ನವರಾತ್ರಿ ಮಹೋತ್ಸವ ವಿಜೃಂಭಣೆಯಿಂದ ನಡೆಯುತ್ತಿದ್ದು, ಅ.12ರ ವರೆಗೆ ದೇವರ ಸನ್ನಿಧಿಯಲ್ಲಿ ನಡೆಯಲಿದೆ.
ಅ.09ರಂದು ತ್ರಿಕಾಲ ಪೂಜೆಯ ಜೊತೆಯಲ್ಲಿ ವಿಶೇಷ ಅಲಂಕಾರದೊಂದಿಗೆ ಚಂಡಮುಂಡಹಾ ದುರ್ಗಾ ಪೂಜೆ, ಸರಸ್ವತಿ ಹೋಮ. ಚಂಡಿಕಾ ಹೋಮ ಮೂಲಾ ನಕ್ಷತ್ರ- ದೇವಸ್ಥಾನದ ವತಿಯಿಂದ ಮಹಾಪೂಜೆ ಮತ್ತು ಅನ್ನಸಂತರ್ಪಣೆ,ರುದ್ರ ಪಾರಾಯಣ, ಲಲಿತಾ ಸಹಸ್ರನಾಮ ಪಾರಾಯಣ, ಚಂಡಿಕಾ ಪಾರಾಯಣ, ವೇದ ಪಾರಾಯಣ. ರಂಗ ಪೂಜೆ, ಮಹಾಮಂಗಳಾರತಿ, ಉತ್ಸವ, ಅಷ್ಟಾವಧಾನ ಸೇವೆ, ಕಷಾಯ ತೀರ್ಥ, ತೀರ್ಥ ಪ್ರಸಾದ ನಡೆಯಿತು.

ಅ. 10ರಿಂದ ಯಾವ ಯಾವ ಕಾರ್ಯಕ್ರಮ?

ಅ.10ರಂದು ತ್ರಿಕಾಲ ಪೂಜೆಯ ಜೊತೆಯಲ್ಲಿ ವಿಶೇಷ ಅಲಂಕಾರದೊಂದಿಗೆ ನಿಶುಂಭಹಾ ದುರ್ಗಾ ಪೂಜೆ, ದುರ್ಗಾ ಹೋಮ, ಚಂಡಿಕಾ ಹೋಮ – ಭಕ್ತರಿಂದ ಸೇವೆ ಜರುಗಿದೆ. ಮಹಾಪೂಜೆ ಮತ್ತು ಅನ್ನಸಂತರ್ಪಣೆ. ರುದ್ರ ಪಾರಾಯಣ, ಲಲಿತಾ ಸಹಸ್ರನಾಮ ಪಾರಾಯಣ, ಚಂಡಿಕಾ ಪಾರಾಯಣ, ವೇದ ಪಾರಾಯಣ. ರಂಗ ಪೂಜೆ, ಮಹಾಮಂಗಳಾರತಿ, ಉತ್ಸವ, ಅಷ್ಟಾವಧಾನ ಸೇವೆ, ಕಷಾಯ ತೀರ್ಥ, ತೀರ್ಥ ಪ್ರಸಾದ ಅಯೋಜಿಸಲಾಗಿದೆ.
ಅ.11 ತ್ರಿಕಾಲ ಪೂಜೆಯ ಜೊತೆಯಲ್ಲಿ ವಿಶೇಷ ಅಲಂಕಾರದೊಂದಿಗೆ ಶುಂಭಹಾ ದುರ್ಗಾ ಪೂಜೆ, ನವಾಕ್ಷರಿ ಹೋಮ, ಚಂಡಿಕಾ ಹೋಮ – ಭಕ್ತರಿಂದ ಸೇವೆ, ಮಹಾಪೂಜೆ ಮತ್ತು ಅನ್ನಸಂತರ್ಪಣೆ, ರುದ್ರ ಪಾರಾಯಣ, ಲಲಿತಾ ಸಹಸ್ರನಾಮ ಪಾರಾಯಣ, ಚಂಡಿಕಾ ಪಾರಾಯಣ, ವೇದ ಪಾರಾಯಣ. ರಂಗ ಪೂಜೆ, ಮಹಾಮಂಗಳಾರತಿ, ಉತ್ಸವ, ಅಷ್ಟಾವಧಾನ ಸೇವೆ, ಕಷಾಯ ತೀರ್ಥ, ತೀರ್ಥ ಪ್ರಸಾದ.
ಅ.12 ತ್ರಿಕಾಲ ಪೂಜೆಯ ಜೊತೆಯಲ್ಲಿ ವಿಶೇಷ ಅಲಂಕಾರದೊಂದಿಗೆ ಚಂಡಿಕಾ ದುರ್ಗಾಪರಮೇಶ್ವರಿ ಪೂಜೆ. ಸಾಮೂಹಿಕ ಚಂಡಿಕಾ ಹೋಮ ಭಕ್ತರಿಂದ, ಮಹಾಪೂಜೆ ಮತ್ತು ಅನ್ನಸಂತರ್ಪಣೆ, ರುದ್ರ ಪಾರಾಯಣ, ಲಲಿತಾ ಸಹಸ್ರನಾಮ ಪಾರಾಯಣ, ಚಂಡಿಕಾ ಪಾರಾಯಣ, ವೇದ ಪಾರಾಯಣ. ರಂಗ ಪೂಜೆ, ಮಹಾಮಂಗಳಾರತಿ, ಉತ್ಸವ, ನೃತ್ಯ ಬಲಿ, ಸ್ವರ್ಣ ಪಲ್ಲಕಿ ಉತ್ಸವ, ತೊಟ್ಟಿಲು ಸೇವೆ, ಅಷ್ಟಾವಧಾನ ಸೇವೆ, ಕಷಾಯ ತೀರ್ಥ, ತೀರ್ಥ ಪ್ರಸಾದ ನಡೆಯಲಿವೆ.
ಕುಂಭಾಸಿ ಶ್ರೀ ಚಂಡಿಕಾ ದುರ್ಗಾಪರಮೇಶ್ವರೀ ಅಮ್ಮನವರ ದಿವ್ಯ ಸನ್ನಿಧಿಯಲ್ಲಿ ಶರನ್ನವರಾತ್ರಿ ಮಹೋತ್ಸವ ಸತ್ಕರ್ಮಗಳು, ಸತ್ ಸಂಪ್ರದಾಯದಂತೆ ಸಂಪನ್ನಗೊಳ್ಳಲಿದೆ.

ಶ್ರೀ ಬ್ರಾಹ್ಮೀ ದುರ್ಗಾಪರಮೇಶ್ವರೀ ಅಮ್ಮ ಶರನ್ನವರಾತ್ರಿ ಮಹೋತ್ಸವ ವಿಜೃಂಭಣೆ!

ಉಡುಪಿ: ಉಡುಪಿ ಜಿಲ್ಲೆಯ ಕುಂದಾಪುರ ತಾಲೂಕಿನಲ್ಲಿ ಇರುವ ಶ್ರೀ ಕ್ಷೇತ್ರ ಕಮಲಶಿಲೆ ಶ್ರೀ ಬ್ರಾಹ್ಮೀ ದುರ್ಗಾಪರಮೇಶ್ವರೀ ಅಮ್ಮನವರ ದೇವಸ್ಥಾನದಲ್ಲಿ ಶರನ್ನವರಾತ್ರಿ ಮಹೋತ್ಸವ ವಿಜೃಂಭಣೆಯಿಂದ ನಡೆಯುತ್ತಿದ್ದು, ಅ.12 ರಂದು ವಿಜಯೋತ್ಸವ ನಡೆಯಲಿದೆ.
ಪ್ರತಿದಿನ ನವರಾತ್ರಿ ವಿಶೇಷ ಪೂಜೆ, ಮಹಾಪೂಜೆ, ಶ್ರೀಕಾಲ ಬಲಿ ಉತ್ಸವ ಮತ್ತು ಮಹೋತ್ಸವ ನಡೆಯುತ್ತಿದೆ.
ಅ.11 ನವಮಿಯಂದು ಮಧ್ಯಾಹ್ನ ಶ್ರೀ ಚಂಡಿಕಾ ಯಾಗ,ರಾತ್ರಿ ರಜತ ರಥೋತ್ಸವ ಮತ್ತು ಪುಷ್ಪಕವಾಹನದಲ್ಲಿ ಪುರಮೆರವಣಿಗೆ (ರಥಬೀದಿ ಮತ್ತು ರಾಜಬೀದಿ).
ಅ.12 ಉದಯಪೂರ್ವ 6-05 ಗಂಟೆಗೆ ಕದಿರು ಮುಹೂರ್ತ, ಧಾನ್ಯ ಸಂಗ್ರಹ ಕಣಜ ತುಂಬಿಸುವುದು, ಶಮೀ ಪೂಜೆ ಮತ್ತು ಸಂಜೆ ವಿಜಯೋತ್ಸವ.
ಮಹಾಮಂಗಳಾರತಿ, ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮ ಹಾಗೂ ವಿವಿಧ ಭಜನಾ ಮಂಡಳಿಯವರಿಂದ ಭಜನಾ ಕಾರ್ಯಕ್ರಮವಿರುತ್ತದೆ.
ಪ್ರತಿದಿನ ಮಧ್ಯಾಹ್ನ ಮತ್ತು ರಾತ್ರಿ ಬಂದ ಭಕ್ತರಿಗೆ ಊಟದ ವ್ಯವಸ್ಥೆ ಇದೆ ಹಾಗೂ ಪ್ರತಿದಿನ ರಾತ್ರಿ ಉತ್ಸವದ ನಂತರ ಸಿದ್ದಾಪುರ ಹಾಗೂ ಹಳ್ಳಿಹೊಳೆ ಕಡೆ ಹೋಗುವವರಿಗೆ ಬಸ್ಸಿನ ವ್ಯವಸ್ಥೆ ಮಾಡಲಾಗಿದೆ.
ಚಂಡಿಕಾ ಯಾಗ ಮತ್ತು ಸಂಜೆ ಶ್ರೀ ರಂಗ ಪೂಜಾ ಮತ್ತು ರಾತ್ರಿ ಬೆಳ್ಳಿ ರಥೋತ್ಸವ ಸೇವೆ ಹಾಗೂ ಅನ್ನ ಸಂತರ್ಪಣೆ ಸೇವೆ ಇರುವುದು.

ಉದ್ಯಮಿ ಗೋವಿಂದ ಬಾಬು ಪೂಜಾರಿಯವರ ಶಿಕ್ಷಣ ಸೇವೆ
– ತಾವು ಕಲಿತಿರುವ ಬಿಜೂರು ಶಾಲೆಗೆ ಸಮವಸ್ತ್ರ ವಿತರಣೆ
– ಸಮಾಜ, ಶೈಕ್ಷಣಿಕ ಕೆಲಸ, ದಾನ ಧರ್ಮದ ಕೆಲಸ ಕಾರ್ಯ

NAMMUR EXPRESS NEWS
ಬೈಂದೂರು: ಶಿಕ್ಷಣ ಪ್ರೇಮಿ, ಉದ್ಯಮಿ ಗೋವಿಂದ ಬಾಬು ಪೂಜಾರಿ ಸರ್ಕಾರಿ ಶಾಲೆ ಉಳಿವಿಗಾಗಿ ಹಾಗೂ ಗ್ರಾಮೀಣ ಪ್ರದೇಶದ ಬಡ ಮಕ್ಕಳು ಸಹ ಉತ್ತಮವಾದ ಸೌಕರ್ಯಗಳೊಂದಿಗೆ ವಿದ್ಯಾಭ್ಯಾಸ ಮಾಡುವಂತೆ ಆಗಬೇಕು ಎನ್ನುವ ಮಹತ್ವಾಕಾಂಕ್ಷೆಯಿಂದ ತಾವು ಕಲಿತಿರುವ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಬಿಜೂರು ಈ ಶಾಲೆಯನ್ನು ದತ್ತು ಸ್ವೀಕರಿಸಿ ಶಾಲೆಯ ಮಕ್ಕಳು ಬಂದು ಹೋಗುವುದಕ್ಕೆ ಅನುಕೂಲವಾಗುವಂತೆ ಶಾಲೆಗೆ ವಾಹನವನ್ನು ಒದಗಿಸುವುದರೊಂದಿಗೆ ಗೋವಿಂದ ಬಾಬು ಪೂಜಾರಿಯವರ ಶ್ರೀ ವರಲಕ್ಷ್ಮಿ ಚಾರಿ ಟ್ರಬಲ್ ಟ್ರಸ್ಟ್ ಉಪ್ಪುಂದ ಇದರ ವತಿಯಿಂದ ಶಾಲಾ ಮಕ್ಕಳಿಗೆ ಸಮವಸ್ತ್ರವನ್ನು ನೀಡಲಾಯಿತು. ಸಭಾ ಕಾರ್ಯಕ್ರಮದ ಅಂಗವಾಗಿ ದಾನಿಗಳಾದ ಗೋವಿಂದ ಪೂಜಾರಿ ದಂಪತಿಗಳು ಎಸ್ ಡಿ ಎಂ ಸಿ ಸದಸ್ಯರು ಹಳೇ ವಿದ್ಯಾರ್ಥಿಗಳು ಶಾಲಾ ಮುಖ್ಯೋಪಾಧ್ಯಾಯರು ಹಾಗೂ ಸ ಿಕ್ಷಕರು ಮಕ್ಕಳ ಪೋಷಕರು ಭಾಗವಹಿಸಿದ್ದರು. ಈಗಾಗಲೇ ಅನೇಕ ಶೈಕ್ಷಣಿಕ ಕೆಲಸ, ದಾನ ಧರ್ಮದ ಕೆಲಸದ ಮೂಲಕ ಗೋವಿಂದ ಬಾಬು ಪೂಜಾರಿ ತಮ್ಮದೇ ಹೆಸರು ಮಾಡಿದ್ದಾರೆ.