Categories
ಮಲ್ನಾಡ್

ಶೃಂಗೇರಿಯಲ್ಲಿ ಆ.23ಕ್ಕೆ ಬೃಹತ್ ಉದ್ಯೋಗ ಮೇಳ

ಶೃಂಗೇರಿಯಲ್ಲಿ ಆ.23ಕ್ಕೆ ಬೃಹತ್ ಉದ್ಯೋಗ ಮೇಳ
* ಸುಧಾಕರ್ ಶೆಟ್ಟಿ ನೇತೃತ್ವದ ಅಮ್ಮ ಫೌಂಡೇಷನ್‌ನಿಂದ ಉದ್ಯೋಗ ಮೇಳ
* ಅಮ್ಮ ಫೌಂಡೇಷನ್‌ನ 5ನೇ ಹಾಗೂ ಕ್ಷೇತ್ರದಲ್ಲಿ 2 ನೇ ಉದ್ಯೋಗ ಮೇಳ
* ಉದ್ಯೋಗ ಮೇಳದಲ್ಲಿ ಪಾಲ್ಗೊಳ್ಳಲಿವೆ ಪ್ರತಿಷ್ಠಿತ ಕಂಪನಿಗಳು
* ನೀವೂ ಭಾಗವಹಿಸಿ ನಿಮ್ಮ ಸ್ನೇಹಿತರಿಗೂ ಶೇರ್ ಮಾಡಿ.

NAMMMUR EXPRESS NEWS
ಶೃಂಗೇರಿ: ಶೃಂಗೇರಿ ಕ್ಷೇತ್ರ ಸೇರಿ ಮಲೆನಾಡಿನ ನಿರುದ್ಯೋಗ ಯುವಕ ಯುವತಿಯರಿಗೆ ಉದ್ಯೋಗ ಕಲ್ಪಿಸುವಲ್ಲಿ ಮಹತ್ತರ ಹೆಜ್ಜೆಯನ್ನು ಇಡುತ್ತಿರುವ ಉದ್ಯಮಿ ಡಾ.ಸುಧಾಕರ್ ಶೆಟ್ಟಿ ನೇತೃತ್ವದ ಅಮ್ಮ ಫೌಂಡೇಷನ್ 23:08:2025 ರ ಶನಿವಾರ ಶೃಂಗೇರಿಯ ಶ್ರೀಜೆಸಿಬಿಎಂ ಕಾಲೇಜಿನಲ್ಲಿ ತನ್ನ 5 ನೇ ಹಾಗೂ ಶೃಂಗೇರಿ ಕ್ಷೇತ್ರದ 2 ನೇ ಉದ್ಯೋಗ ಮೇಳವನ್ನು ಹಮ್ಮಿಕೊಂಡಿದೆ. ಈ ಮೂಲಕ ಉದ್ಯೋಗ ಸೃಷ್ಟಿಯ ಹೆಜ್ಜೆಯನ್ನು ಅವರು ಇಟ್ಟಿದ್ದಾರೆ.
ಉದ್ಯೋಗ ಮೇಳದಲ್ಲಿ ಬೆಂಗಳೂರಿನ ಹಲವಾರು ಪ್ರತಿಷ್ಠಿತ ಕಂಪನಿಗಳು ಪಾಲ್ಗೊಳ್ಳಲಿದ್ದು, ಸ್ಥಳೀಯ ಕಂಪನಿಗಳು ಕೂಡ ಭಾಗವಹಿಸಲಿವೆ. ಪದವಿಪೂರ್ವ,ಡಿಪ್ಲೋಮಾ( ಯಾವುದೇ ಪದವಿ/ಸ್ನಾತಕೋತ್ತರ ಪದವಿ,ಇಂಜಿನಿಯರಿಂಗ್ ಅಭ್ಯರ್ಥಿಗಳು ಹಾಜರಾಗಿ ಇದರ ಸದುಪಯೋಗ ಪಡೆಯಬಹುದಾಗಿದೆ.
ಆ.23ರ ಶನಿವಾರ ಶ್ರೀ ಜೆಸಿಬಿಎಂ ಕಾಲೇಜು,ಶೃಂಗೇರಿಯಲ್ಲಿ ನಡೆಯುವ ಉದ್ಯೋಗಮೇಳದಲ್ಲಿ ಬೆಳಿಗ್ಗೆ 9 ಗಂಟೆಯಿಂದ ನೋಂದಣಿ ಪ್ರಕ್ರಿಯೆ ಆರಂಭಗೊಳ್ಳಲಿದ್ದು, ಎಲ್ಲರಿಗೂ ಉಚಿತ ಪ್ರವೇಶವಿರುತ್ತದೆ.

* ಉದ್ಯೋಗಮೇಳದಲ್ಲಿ ಭಾಗವಹಿಸುವವರಿಗೆ ಮಾಹಿತಿ

ವಿದ್ಯಾರ್ಹತೆ : ಪದವಿಪೂರ್ವ,ಡಿಪ್ಲೋಮಾ (ಯಾವುದೇ ಪದವಿ/ಸ್ನಾತಕೋತ್ತರ ಪದವಿ,ಇಂಜಿನಿಯರಿಂಗ್ ಅಭ್ಯರ್ಥಿಗಳು ಹಾಜರಾಗಿ ಸದುಪಯೋಗ ಪಡೆದುಕೊಳ್ಳಬಹುದು)

ಅಭ್ಯರ್ಥಿಗಳು ತರಬೇಕಾದ ದಾಖಲೆಗಳೇನು?

ಅಭ್ಯರ್ಥಿಗಳ ಶೈಕ್ಷಣಿಕ ದಾಖಲೆಗಳ ಜೆರಾಕ್ಸ್ ಪ್ರತಿ,ಪಾಸ್‌ಪೋರ್ಟ್ ಫೋಟೋ,ಆಧಾರ್ ಕಾರ್ಡ್ ಹಾಗೂ ಸ್ವವಿವರ (ರೆಸ್ಯೂಮ್) ಅರ್ಜಿಗಳೊಂದಿಗೆ ಭಾಗವಹಿಸಿ. ಹೆಚ್ಚು ಜೆರಾಕ್ಸ್ ಪ್ರತಿ ರೆಸೂಮ್ ಇಟ್ಟುಕೊಳ್ಳಿ.
ಅಭ್ಯರ್ಥಿಗಳು ಕಡ್ಡಾಯವಾಗಿ QR ಕೋಡ್ ಸ್ಕ್ಯಾನ್ ಮಾಡಿ ಗೂಗಲ್ ಫಾರಂ ಭರ್ತಿ ಮಾಡಬೇಕು. ಹೆಚ್ಚಿನ ಸಂಖ್ಯೆಯಲ್ಲಿ ಅಭ್ಯರ್ಥಿಗಳು ಭಾಗವಹಿಸಿ ಕಾರ್ಯಕ್ರಮದ ಸದುಪಯೋಗ ಪಡೆದುಕೊಳ್ಳುವಂತೆ ಆಯೋಜಕರು ತಿಳಿಸಿದ್ದಾರೆ.

ಸುಧಾಕರ್ ಶೆಟ್ಟಿ ಅವರ ಕನಸಿನ ಕೂಸು

ರಾಜಕಾರಣಿ, ಉದ್ಯಮಿ, ಸಮಾಜ ಸೇವಕರಾಗಿರುವ ಡಾ.ಸುಧಾಕರ್ ಶೆಟ್ಟಿ ತಮ್ಮ ಕ್ಷೇತ್ರದ ಹಾಗೂ ಮಲೆನಾಡ ಯುವ ಜನತೆಗಾಗಿ ಈ ಉದ್ಯೋಗ ಮೇಳ ಆಯೋಜನೆ ಮಾಡಿದ್ದಾರೆ. ಕೊಪ್ಪದಲ್ಲಿ ಈ ಹಿಂದೆ ಉದ್ಯೋಗ ಮೇಳ ಮಾಡಿದ್ದರು.

Categories
ರಾಜ್ಯ

ಉಗ್ರರ ಅಟ್ಯಾಕ್ ಸಾಧ್ಯತೆ : ವಿಮಾನ ನಿಲ್ದಾಣಗಳಲ್ಲಿ ಹೈ ಅಲರ್ಟ್

ಉಗ್ರರ ಅಟ್ಯಾಕ್ ಸಾಧ್ಯತೆ : ವಿಮಾನ ನಿಲ್ದಾಣಗಳಲ್ಲಿ ಹೈ ಅಲರ್ಟ್
– ಪಾಕ್ ಉಗ್ರರ ಬೆದರಿಕೆ ಸಂದೇಶ
– 3 ತಿಂಗಳು ಕಾಲ ಭಾರತದಲ್ಲಿ ಅಲರ್ಟ್

NAMMUR EXPRESS NEWS
ಸಂಭಾವ್ಯ ಭಯೋತ್ಪಾದಕ ಬೆದರಿಕೆಯ ಎಚ್ಚರಿಕೆಯ ನಂತರ ಭಾರತದಾದ್ಯಂತ ವಿಮಾನ ನಿಲ್ದಾಣಗಳಲ್ಲಿ ಹೆಚ್ಚಿನ ಎಚ್ಚರಿಕೆ ವಹಿಸಲಾಗಿದೆ. ಸೆಪ್ಟೆಂಬರ್ 22 ಮತ್ತು ಅಕ್ಟೋಬರ್ 2, 2025 ರ ನಡುವೆ ಭಯೋತ್ಪಾದಕರು ಅಥವಾ “ಸಮಾಜ ವಿರೋಧಿ ಶಕ್ತಿಗಳಿಂದ” ಸಂಭಾವ್ಯ ಬೆದರಿಕೆಯಿಂದಾಗಿ ವಿಮಾನ ನಿಲ್ದಾಣಗಳಲ್ಲಿ ಭದ್ರತೆಯನ್ನು ಹೆಚ್ಚಿಸಲು ಬ್ಯೂರೋ ಆಫ್ ಸಿವಿಲ್ ಏವಿಯೇಷನ್ ಸೆಕ್ಯುರಿಟಿ (ಬಿಸಿಎಎಸ್) ಎಲ್ಲಾ ಮಧ್ಯಸ್ಥಗಾರರಿಗೆ ನಿರ್ದೇಶನ ನೀಡಿದೆ.

ನಾಗರಿಕ ವಿಮಾನಯಾನ ಸಚಿವಾಲಯದ ಭದ್ರತಾ ವಿಭಾಗವು ಆಗಸ್ಟ್ 4 ರಂದು ಸಲಹೆ ನೀಡಿದ್ದು, ಎಲ್ಲಾ ವಾಯುಯಾನ ಸೌಲಭ್ಯಗಳಲ್ಲಿ ಕಣ್ಗಾವಲು ತಕ್ಷಣ ಬಲಪಡಿಸಲು ಕರೆ ನೀಡಿದೆ. ಇದರಲ್ಲಿ ವಿಮಾನ ನಿಲ್ದಾಣಗಳು, ಏರ್ ಸ್ಟ್ರಿಪ್ ಗಳು, ಹೆಲಿಪ್ಯಾಡ್ ಗಳು, ಹಾರುವ ಶಾಲೆಗಳು ಮತ್ತು ತರಬೇತಿ ಸಂಸ್ಥೆಗಳು ಸೇರಿವೆ, ಅಲ್ಲಿ ಸುಧಾರಿತ ಭದ್ರತಾ ಕ್ರಮಗಳನ್ನು ವಿಳಂಬವಿಲ್ಲದೆ ಜಾರಿಗೆ ತರಬೇಕು.

ವಿಮಾನ ನಿಲ್ದಾಣಗಳಲ್ಲಿ ಹೈ ಅಲರ್ಟ್

“ಸೆಪ್ಟೆಂಬರ್ 22-ಅಕ್ಟೋಬರ್ 02, 2025 ರ ನಡುವೆ ಸಮಾಜ ವಿರೋಧಿ ಅಂಶಗಳು ಅಥವಾ ಭಯೋತ್ಪಾದಕ ಗುಂಪುಗಳಿಂದ ವಿಮಾನ ನಿಲ್ದಾಣಗಳಿಂದ ಸಂಭಾವ್ಯ ಬೆದರಿಕೆಯನ್ನು ಸೂಚಿಸುವ ಕೇಂದ್ರ ಭದ್ರತಾ ಸಂಸ್ಥೆಯಿಂದ ಇತ್ತೀಚೆಗೆ ಪಡೆದ ಒಳಹರಿವುಗಳನ್ನು ಗಮನದಲ್ಲಿಟ್ಟುಕೊಂಡು, ವಿಮಾನ ನಿಲ್ದಾಣಗಳು, ಏರ್ಸ್ಟ್ರಿಪ್ಗಳು, ವಾಯುನೆಲೆಗಳು, ವಾಯುಪಡೆ ನಿಲ್ದಾಣಗಳು, ಹೆಲಿಪ್ಯಾಡ್ಗಳಂತಹ ಎಲ್ಲಾ ನಾಗರಿಕ ವಿಮಾನಯಾನ ಸ್ಥಾಪನೆಗಳಲ್ಲಿ ಭದ್ರತಾ ಕ್ರಮಗಳನ್ನು ಹೆಚ್ಚಿಸಲು ಎಲ್ಲಾ ವಿಮಾನ ನಿಲ್ದಾಣಗಳಲ್ಲಿನ ಎಲ್ಲಾ ಮಧ್ಯಸ್ಥಗಾರರಿಗೆ ನಿರ್ದೇಶಿಸಲಾಗಿದೆ” ಎಂದು ಬಿಸಿಎಎಸ್ ಸಲಹೆಯಲ್ಲಿ ತಿಳಿಸಿದೆ.

ಸುದ್ದಿ ಸಂಸ್ಥೆ ಪಿಟಿಐ ಮೂಲಗಳ ಪ್ರಕಾರ, ಬಿಸಿಎಎಸ್ ಸಲಹೆಯು ಪಾಕಿಸ್ತಾನಿ ಭಯೋತ್ಪಾದಕ ಗುಂಪಿನ ಚಟುವಟಿಕೆಗಳಿಗೆ ಸಂಬಂಧಿಸಿದ ನಿರ್ದಿಷ್ಟ ಒಳಹರಿವನ್ನು ಆಧರಿಸಿದೆ. ಸ್ಥಳೀಯ ಪೊಲೀಸರು, ಕೇಂದ್ರ ಕೈಗಾರಿಕೆಗಳೊಂದಿಗೆ ನಿಕಟ ಸಮನ್ವಯವನ್ನು ಕಾಪಾಡಿಕೊಳ್ಳಲು ಬಿಎಎಸ್ಸಿ ಎಲ್ಲಾ ವಾಯುಯಾನ ಮಧ್ಯಸ್ಥಗಾರರಿಗೆ ನಿರ್ದೇಶನ ನೀಡಿದೆ.

Categories
ವಿಶೇಷ ಸುದ್ದಿ

ವರವ ಕೊಡೇ ವರಮಹಾಲಕ್ಷ್ಮಿ..!

ವರವ ಕೊಡೇ ವರಮಹಾಲಕ್ಷ್ಮಿ..!
– ವರಮಹಾಲಕ್ಷ್ಮೀ ಹಬ್ಬದ ಮಹತ್ವ ಏನು… ಆಚರಣೆ ಹೇಗೆ..?
– ಮುತ್ತೈದೆಯರ ಶ್ರಾವಣ ಮಾಸದ ಪ್ರಮುಖ ಹಬ್ಬ
– ಬಟ್ಟೆ, ಅಲಂಕಾರಿಕ ವಸ್ತು, ಚಿನ್ನದ ಅಂಗಡಿಗಳಲ್ಲಿ ಭರ್ಜರಿ ಖರೀದಿ

ನಮ್ಮೂರ್ ಎಕ್ಸ್ ಪ್ರೆಸ್: ವಿಶೇಷ ವರದಿ ರಚನಾ ಕಾಮತ್
ಶ್ರಾವಣ ಮಾಸ ಬಂತೆಂದರೆ ಭೂಮಿತಾಯಿ ಮಳೆಯ ನೀರಿನಲ್ಲಿ ಮಿಂದು, ಅದರ ಹನಿಗಳ ಆಭರಣ ತೊಟ್ಟು, ಹಸಿರು ಸೀರೆಯುಟ್ಟು ಸಂಭ್ರಮಿಸುವಂತೆ ಕಂಗೊಳಿಸುತ್ತಾಳೆ. ಇನ್ನು ಅದರ ಪ್ರತಿರೂಪವಾದ ಹೆಣ್ಣು ಹಬ್ಬದ ನೆಪದಲ್ಲಿ ಸಂಭ್ರಮಿಸಿ ಉತ್ಸಾಹದ ಚಿಲುಮೆಯಾಗಿರುತ್ತಾಳೆ. ಈ ಮಾಸವು ಮಹಿಳೆಯರ ಬಿಡುವಿಲ್ಲದ ಕಾಲದಂತಾಗಿರುತ್ತದೆ. ಏಕೆಂದರೆ ಹಬ್ಬಗಳ ಸಾಲು ಸಾಲು, ಅವುಗಳ ಆಚರಣೆಗೆ ಬೇಕಾದ ಪೂಜಾ ತಯಾರಿ, ಅಡುಗೆ ತಯಾರಿಯಲ್ಲಿ ನಿರತರಾಗಿರುತ್ತಾರೆ. ಶ್ರಾವಣ ಮಾಸದಲ್ಲಿ ಮಹಿಳೆಯರಿಗೆ ಅತ್ಯಂತ ಸಂತಸ ಮತ್ತು ಸಾರ್ಥಕತೆಯನ್ನು ತಂದುಕೊಡುವ ಮಹತ್ವದ ಹಬ್ಬವೆಂದರೆ ಅದು ವರಮಹಾಲಕ್ಷ್ಮೀ ವ್ರತ.
ಶ್ರಾವಣಮಾಸದ ಎರಡನೇ ಶುಕ್ರವಾರದಂದು ಆಗಮಿಸುವ ಮಹಾಲಕ್ಷ್ಮೀಯು ಮುತ್ತೈದೆತನದ ಸಂಕೇತವಾಗಿದ್ದಾಳೆ. ಸಾಮಾನ್ಯವಾಗಿ ವರಮಹಾಲಕ್ಷ್ಮೀ ವ್ರತದಂದು ಮುತ್ತೈದೆಯರು ಮುಂಜಾನೆಯೇ ಎದ್ದು ಶುಚಿರ್ಭೂತರಾಗಿ, ಇಡೀ ದಿನ ಉಪವಾಸವಿದ್ದು, ಸಂಜೆ ಗೋಧೂಳಿ ಸಮಯದಲ್ಲಿ, ಉತ್ತಮ ಸೀರೆ ಒಡವೆಗಳನ್ನು ಧರಿಸಿ, ಅಕ್ಕಪಕ್ಕದ ಮತ್ತು ಪರಿಚಯಸ್ತ ಮಹಿಳೆಯರನ್ನು ತನ್ನ ಮನೆಗೆ ಆಹ್ವಾನಿಸಿಕೊಂಡು , ವರಮಹಾಲಕ್ಷ್ಮೀ ಪೂಜೆಯನ್ನು ನೆರವೇರಿಸಿ, ಅರಿಶಿನ ಕುಂಕುಮ, ಪ್ರಸಾದವನ್ನು ವಿತರಿಸುವ ಮೂಲಕ ಹಬ್ಬವನ್ನು ಸಂಪೂರ್ಣಗೊಳಿಸುತ್ತಾಳೆ. ನಂತರವೇ ಆಕೆ ಆಹಾರವನ್ನು ಸೇವಿಸುವುದು ವಾಡಿಕೆ. ಆದರೆ ಇತ್ತೀಚಿನ ದಿನಗಳಲ್ಲಿ ಮಹಿಳೆಯರು ಹೊರಗಡೆ ದುಡಿಯುವ ಸನ್ನಿವೇಶ ಎದುರಾಗಿದ್ದು, ಇಡೀ ದಿನ ಉಪವಾಸವಿರಲು ಸಾಧ್ಯವಾಗದಿದ್ದಾಗ, ಮುಂಜಾನೆಯೇ ವರಮಹಾಲಕ್ಷ್ಮೀ ವ್ರತವನ್ನು ಕೈಗೊಂಡು, ಪೂಜೆಯ ನಂತರ ಆಹಾರವನ್ನು ಸೇವಿಸಿ ಪೂರ್ಣಗೊಳಿಸಿಬಿಡುತ್ತಾರೆ.‌ ಪ್ರತಿಯೊಂದು ಆಚರಣೆಯ ಹಿಂದೆಯೂ ಒಂದು ಪೌರಾಣಿಕ ಐತಿಹಾಸಿಕ ಮತ್ತು ಜನಪದ ಹಿನ್ನೆಲೆ ಇದ್ದೇ ಇರುತ್ತದೆ. ಅದು ನಮ್ಮ ಭಾರತೀಯ ಪರಂಪರೆಯ ವಿಶಿಷ್ಟತೆ.

ಧಾರ್ಮಿಕ ಕಥೆ ಏನು..?

ವರಮಹಾಲಕ್ಷ್ಮಿ ವ್ರತದ ಹಿಂದೆಯೂ ಒಂದು ಕಥೆಯಿದೆ. ಈ ವೃತದ ಮಹತ್ವವನ್ನು ಸ್ವತಃ ಪರಶಿವನೇ ತನ್ನ ಮಡದಿ ಪಾರ್ವತಿಗೆ ಹೇಳಿದ್ದಾನೆ ಎನ್ನಲಾಗಿದೆ. ಒಮ್ಮೆ ಶಿವ ಮತ್ತು ಪಾರ್ವತಿ ಏಕಾಂತದಲ್ಲಿ ಮಾತನಾಡುತ್ತಾ ಕುಳಿತಿರುವಾಗ, ಪಾರ್ವತಿಯು “ಭೂಲೋಕದಲ್ಲಿ ಮಹಿಳೆಯರು ತಮ್ಮ ಕುಟುಂಬದ ಒಳಿತಿಗಾಗಿ ಆಚರಿಸುವಂತಹ ಯಾವುದೇ ಹಬ್ಬ ಇಲ್ಲವೇ?” ಎಂದು ಪ್ರಶ್ನಿಸುತ್ತಾಳೆ. ಆಗ ಶಿವನು ಕೂಡಲೇ ವರಮಹಾಲಕ್ಷ್ಮಿ ವ್ರತ ಎಂದು ಹೇಳಿ, ಒಂದು ಕಥೆಯ ಮೂಲಕ ಅದರ ಮಹತ್ವವನ್ನು ಪಾರ್ವತಿಗೆ ತಿಳಿಯಪಡಿಸುತ್ತಾನೆ.‌ ಅಂದಿನ ಮಗಧ ದೇಶದಲ್ಲಿ ಚಾರುಮತಿ ಎಂಬ ಬಡ ಮಹಿಳೆಯು ಪತಿ, ಅತ್ತೆ, ಮಾವನ ಸೇವೆ ಮತ್ತು ಮಗುವಿನ ಆರೈಕೆಯಲ್ಲಿ ತಲ್ಲೀನಳಾಗುವ ಮೂಲಕ ಆದರ್ಶ ಪತ್ನಿ, ಒಳ್ಳೆಯ ಸೊಸೆ ಮತ್ತು ಉತ್ತಮ ತಾಯಿ ಎನಿಸಿಕೊಂಡಿರುತ್ತಾಳೆ. ಒಮ್ಮೆ ಆಕೆಯ ಕರ್ತವ್ಯ ನಿಷ್ಠೆಗೆ ಮೆಚ್ಚಿ, ಮಹಾಲಕ್ಷ್ಮೀಯು ಚಾರುಮತಿಯ ಕನಸಿನಲ್ಲಿ ಬಂದು, “ಶ್ರಾವಣ ಮಾಸದ ಎರಡನೇ ಶುಕ್ರವಾರದಂದು ನಾನು ಭೂಲೋಕಕ್ಕೆ ಆಗಮಿಸುತ್ತೇನೆ. ಆಗ ನೀನು ವ್ರತವನ್ನು ಕೈಗೊಳ್ಳಬೇಕು” ಎಂದು ತಿಳಿಸುತ್ತಾಳೆ. ಮರುದಿನ ಚಾರುಮತಿಯು ತಾನು ಕಂಡ ಕನಸಿನ ಕುರಿತು ಅಕ್ಕಪಕ್ಕದ ಮಹಿಳೆಯರಲ್ಲಿ ಮತ್ತು ಬಂಧುಬಳಗದವರಲ್ಲಿ ಹೇಳಿಕೊಳ್ಳುತ್ತಾಳೆ. ನಂತರ ಶ್ರಾವಣ ಮಾಸದ ಎರಡನೇ ಶುಕ್ರವಾರದಂದು ಎಲ್ಲಾ ಮುತ್ತೈದೆಯರೊಂದಿಗೆ ಕೂಡಿಕೊಂಡು ಮಹಾಲಕ್ಷ್ಮೀಯ ಆದೇಶದಂತೆ ವೃತವನ್ನು ಕೈಗೊಳ್ಳುತ್ತಾಳೆ. ಆಗ ಚಾರುಮತಿ ಮತ್ತು ಅವಳೊಂದಿಗೆ ವ್ರತದಲ್ಲಿ ಭಾಗವಹಿಸಿದ ಮುತ್ತೈದೆಯರಿಗೆ ಮಹಾಲಕ್ಷ್ಮೀಯು ಐಶ್ವರ್ಯವನ್ನು ಕರುಣಿಸಿ ಬಡತನವನ್ನು ನಿವಾರಿಸುತ್ತಾಳೆ. ಇದು ನಂಬಿಕೆ.

ಆಚರಣೆ ಹೇಗೆ..?

ಪ್ರತಿ ಮುತ್ತೈದೆಯರು ಶ್ರಾವಣ ಮಾಸದ ಎರಡನೇ ಶುಕ್ರವಾರದಂದು ವರಮಹಾಲಕ್ಷ್ಮೀ ವೃತವನ್ನು ನಡೆಸಿಕೊಂಡು ಬರುತ್ತಿದ್ದಾರೆ. ತಮ್ಮ ಆರ್ಥಿಕತೆಗೆ ಅನುಕೂಲವಾಗಿ, ಎಷ್ಟು ಸಾಧ್ಯವೊ ಅಷ್ಟರಮಟ್ಟಿಗೆ ತಯಾರಿ ನಡೆಸಿ, ನಿಯಮಬದ್ಧವಾಗಿ ಆಚರಿಸುವುದು ಈ ವ್ರತದ ವಿಶೇಷತೆ.‌ ಆಭರಣ ಪ್ರಿಯಳಾದ ಮಹಾಲಕ್ಷ್ಮೀಗೆ ರೇಷ್ಮೆ ಸೀರೆ, ಆಭರಣಗಳ ಮೂಲಕ ಸಿಂಗರಿಸುತ್ತಾರೆ. ಈ ಸಮಯದಲ್ಲಿ ಹೆಚ್ಚಾಗಿ ಅಷ್ಟದಳ ರಂಗೋಲಿಯನ್ನು ಹಾಕುವುದು ಸಾಮಾನ್ಯ ಸಂಗತಿ. ಜೊತೆಗೆ ಕಮಲದ ಹೂವು ಲಕ್ಷ್ಮೀಗೆ ಶ್ರೇಷ್ಠವಾದ ಕಾರಣ ಪೂಜೆಯಲ್ಲಿ ಅದನ್ನು ಬಳಸಲಾಗುತ್ತದೆ. ಮಹಾಲಕ್ಷ್ಮೀಗೆ ಕಡ್ಲೆಬೇಳೆ ಪ್ರಿಯವಾದ ಕಾರಣ ಅದರಿಂದ ತಯಾರಿಸಿದ ಹಯಗ್ರೀವ, ಪಾಯಸ ಇಲ್ಲವೆ ಹೋಳಿಗೆಯನ್ನು ತಯಾರಿಸಿ, ನೈವೇದ್ಯ ಮಾಡಿ ಪ್ರಸಾದದ ರೂಪದಲ್ಲಿ ವಿತರಿಸಲಾಗುತ್ತದೆ. ಇನ್ನು ಪ್ರತಿಯೊಬ್ಬ ಮುತ್ತೈದೆಯೂ ವ್ರತದ ನಿಯಮಕ್ಕೆ ಅನುಗುಣವಾಗಿ ಪೂಜಾ ವಿಧಾನವನ್ನು ನೆರವೇರಿಸುತ್ತಾಳೆ. ಎರಡನೇ ಶುಕ್ರವಾರದಂದು ಪೂಜೆಯನ್ನು ಕೈಗೊಳ್ಳಲು ಮಹಿಳೆಯರಿಗೆ ಸಾಧ್ಯವಾಗದಿದ್ದರೆ ಮುಂದಿನ ಶುಕ್ರವಾರ ಮಾಡಬಹುದಾಗಿದೆ. ಅದೂ ಕೂಡ ತಪ್ಪಿದರೆ, ನವರಾತ್ರಿಯ ಸಂದರ್ಭದಲ್ಲಿ ಶುಕ್ರವಾರದಂದು ಪೂಜೆಯನ್ನು ಕೈಗೊಳ್ಳಲು ಅವಕಾಶವಿದೆ.
ಬಟ್ಟೆ, ಅಲಂಕಾರಿಕ ವಸ್ತು, ಚಿನ್ನದ ಅಂಗಡಿಗಳಲ್ಲಿ ಭರ್ಜರಿ ಖರೀದಿ ಮಾಡಲಾಗುತ್ತದೆ. ಸಮಸ್ತ ಜನತೆಗೆ ಹಬ್ಬದ ಶುಭಾಶಯಗಳು.

Categories
ಚಿಕ್ಕಮಗಳೂರು

ಜೆಸಿಬಿಎಂ ಕಾಲೇಜಿನಲ್ಲಿ ಮಾದಕವಸ್ತು ವ್ಯಸನ ವಿರುದ್ಧ ಜಾಗೃತಿ ಬೀದಿ ನಾಟಕ

ಜೆಸಿಬಿಎಂ ಕಾಲೇಜಿನಲ್ಲಿ ಮಾದಕವಸ್ತು ವ್ಯಸನ ವಿರುದ್ಧ ಜಾಗೃತಿ ಬೀದಿ ನಾಟಕ

* ಪೊಲೀಸ್ ಅಧಿಕಾರಿ, ಸಿಬ್ಬಂದಿಗಳಿಂದ ಮಾದಕವಸ್ತುಗಳ ದುಷ್ಪರಿಣಾಮ ಕುರಿತು “ಬೀದಿ ನಾಟಕ”ಪ್ರದರ್ಶನ
* ವಿದ್ಯಾರ್ಥಿಗಳಿಗೆ ಪ್ರತಿಜ್ಞಾ ವಿಧಿ ಭೋಧಿಸಿದ ಎಎಸ್ಐ ಡಾ.ಮೋಹನ್ ರಾಜಣ್ಣ

NAMMMUR EXPRESS NEWS
ಶೃಂಗೇರಿ : ತಾಲೂಕಿನ ಶ್ರೀಜೆಸಿಬಿಎಂ ಕಾಲೇಜಿನಲ್ಲಿ ಮಾದಕ ದ್ರವ್ಯ ಸೇವನೆಯ ದುಷ್ಪರಿಣಾಮಗಳ ಕುರಿತು ವಿದ್ಯಾರ್ಥಿಗಳಿಗೆ ಬೀದಿ ನಾಟಕದ ಮೂಲಕ ಜಾಗೃತಿ ಮೂಡಿಸುವ ಕಾರ್ಯಕ್ರಮ ನಡೆಸಲಾಯಿತು. ನಾಟಕದ ನಿರ್ದೇಶನ ಮತ್ತು ರಚನೆಗಾರ ಹಾಗೂ ನಾಟಕ ಅಕಾಡಮಿ ಪ್ರಶಸ್ತಿ ಪುರಸ್ಕೃತ ಜಿ. ರವಿ ಕುಮಾರ್ ಮಾದಕ ವ್ಯಸನದ ದುಷ್ಪರಿಣಾಮಗಳ ಬಗ್ಗೆ ಮಾಹಿತಿ ನೀಡಿದರು.
ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ ಶೃಂಗೇರಿ ಪೊಲೀಸ್ ಠಾಣೆಯ ಸಹಾಯಕ ಪೊಲೀಸ್ ಉಪನಿರೀಕ್ಷಕ ಡಾ.ಸಿ.
ಆರ್.ಮೋಹನ್ ಕುಮಾರ್ ಮಾತನಾಡಿ ಮಾದಕ ದ್ರವ್ಯ ದುರುಪಯೋಗದ ಕಾನೂನಾತ್ಮಕ ಅಂಶಗಳು ಪರಿಣಾಮ ಹಾಗೂ ಅಕ್ರಮ ಸಾಗಣೆ ತಡೆಗಟ್ಟುವ ಕಾನೂನಿನ ಕುರಿತು ಮಾತನಾಡಿ ವಿದ್ಯಾರ್ಥಿಗಳು ಮುಂದೆ ಸಮಾಜದಲ್ಲಿ ಬದಲಾವಣೆಯ ರೂವಾರಿಗಳಾಗಬೇಕೆಂದು ಪ್ರೇರೇಪಿಸಿ ನಂತರ ವಿದ್ಯಾರ್ಥಿಗಳಿಗೆ ಪ್ರತಿಜ್ಞಾ ವಿಧಿ ಭೋದಿಸಿದರು.
ಜಾಗೃತಿ ನಾಟಕವನ್ನು ಕರ್ನಾಟಕ ಸರ್ಕಾರ,ಜಿಲ್ಲಾ ಪೊಲೀಸ್ ಚಿಕ್ಕಮಗಳೂರು,ಕೊಪ್ಪ ಉಪವಿಭಾಗ,ಶೃಂಗೇರಿ ಪೊಲೀಸ್ ಸಹಭಾಗಿತ್ವದಲ್ಲಿ ಕರ್ತವ್ಯ ನಿರತ ಪೊಲೀಸ್ ಅಧಿಕಾರಿ ಸಿಬ್ಬಂದಿಗಳಿಂದ ಮಾದಕವಸ್ತುಗಳ ದುಷ್ಪರಿಣಾಮ ಕುರಿತು “ಬೀದಿ ನಾಟಕ”ಪ್ರದರ್ಶಿಸಲಾಯಿತು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಕಾಲೇಜಿನ ಪ್ರಾಂಶುಪಾಲರಾದ ಡಾ.ಎಂ.ಸ್ವಾಮಿಯವರು ಮಾತನಾಡಿ ವಿದ್ಯಾರ್ಥಿಗಳು ಮಾದಕ ದ್ರವ್ಯ ಸೇವನೆ ತಡೆಗಟ್ಟುವಿಕೆ ಕ್ರಮಗಳು ವ್ಯಸನಿಗಳಿಗೆ ಚಟದಿಂದ ಹೊರ ಬರಲು ಈ ನಾಟಕ ಸಹಾಯ ಮಾಡುವ ಪ್ರಕ್ರಿಯೆಯಲ್ಲಿ ಭಾವನಾತ್ಮಕ ಸುಸ್ಥಿತಿ ಮಹತ್ವವನ್ನು ವಿವರಿಸಿದರು.
ಉಪನ್ಯಾಸಕ ಪ್ರಶಾಂತ್ ಹಾಗು ನಾಟಕ ನಿರ್ದೇಶಕ ಬಿ.ರವಿಕುಮಾರ್ ನಗರ ಪೊಲೀಸ್ ಠಾಣೆ,ಹಿನ್ನೆಲೆ ಸಂಗೀತ ಬ್ಯಾಂಡ್ – ಮೋಹನ್ ಕುಮಾರ್, ಅಣ್ಣನಾಯ್ಕ ಹಾಗೂ ಪಾತ್ರಧಾರಿಗಳಾಗಿ ದಿನೇಶ್,ಹೇಮರಾಜು,ಇಮ್ರಾನ್, ಮಂಜುನಾಥ್,ಶ್ರೀನಿಧಿಯವರುಗಳು ಭಾಗವಹಿಸಿದ್ದರು. ಕಾಲೇಜಿನ ಉಪನ್ಯಾಸಕ ವರ್ಗ ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.

Categories
ದಿನ ರಾಶಿ ಭವಿಷ್ಯ

ಈ ದಿನದ ರಾಶಿ ಭವಿಷ್ಯ ಹೇಗಿದೆ?

ಈ ದಿನದ ರಾಶಿ ಭವಿಷ್ಯ ಹೇಗಿದೆ?
– ವಿನಾಯಕ ಕೃಪೆಯಿಂದ ಯಾವ ರಾಶಿಯವರಿಗೆ ಲಾಭ? ಯಾವ ರಾಶಿಯವರಿಗೆ ನಷ್ಟ?

NAMMUR EXPRESS NEWS
ಗ್ರಹಗಳ ಸ್ಥಾನ ಬದಲಾವಣೆಯಿಂದ ಮೇಷದಿಂದ ಮೀನ ರಾಶಿವರೆಗಿನ ಎಲ್ಲಾ ರಾಶಿಯವರಿಗೆ ಇಂದಿನ ರಾಶಿ ಭವಿಷ್ಯ ಹೇಗಿರಲಿದೆ? ಯಾವ ರಾಶಿಯವರಿಗೆ ಅದೃಷ್ಟ? ಯಾವ ರಾಶಿಯವರು ಎಚ್ಚರದಿಂದಿರಬೇಕು?

** ಮೇಷ ರಾಶಿ :
ಇಂದು ನಿಮಗೆ ಶುಭ ದಿನವಾಗಿರುತ್ತದೆ. ಬಹಳ ದಿನಗಳಿಂದ ಅಂಟಿಕೊಂಡಿದ್ದ ಹಣ ವಾಪಸ್ ಬರುತ್ತದೆ. ವೃತ್ತಿ ಜೀವನದಲ್ಲಿ ಪ್ರಮುಖ ಬದಲಾವಣೆಗಳಾಗಲಿವೆ. ಕಚೇರಿಯಲ್ಲಿ ಬಡ್ತಿ ಅಥವಾ ಮೌಲ್ಯಮಾಪನದ ಸಾಧ್ಯತೆಗಳು ಹೆಚ್ಚಾಗುತ್ತವೆ. ಕೌಟುಂಬಿಕ ಜೀವನದಲ್ಲಿ ಸಂತೋಷ ಮತ್ತು ಶಾಂತಿ ಅಖಂಡವಾಗಿ ಉಳಿಯುತ್ತದೆ. ಪ್ರಯಾಣದ ಅವಕಾಶವಿರುತ್ತದೆ. ನಿಮ್ಮ ಆರೋಗ್ಯದ ಕಡೆ ಗಮನ ಕೊಡಿ. ವಿದ್ಯಾರ್ಥಿಗಳು ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಶ್ರಮಿಸಬೇಕು.

** ವೃಷಭ ರಾಶಿ :
ಇಂದು ವೃಷಭ ರಾಶಿಯವರ ವೃತ್ತಿ ಜೀವನದಲ್ಲಿ ಉನ್ನತ ಅಧಿಕಾರಿಗಳಿಂದ ಬೆಂಬಲ ಸಿಗಲಿದೆ. ನೀವು ಶೈಕ್ಷಣಿಕ ಕೆಲಸದಲ್ಲಿ ಉತ್ತಮ ಯಶಸ್ಸನ್ನು ಪಡೆಯುತ್ತೀರಿ. ಸಾಮಾಜಿಕ ಸ್ಥಾನಮಾನ ಮತ್ತು ಪ್ರತಿಷ್ಠೆ ಹೆಚ್ಚಾಗುತ್ತದೆ. ಹಳೆಯ ಸ್ನೇಹಿತರನ್ನು ಭೇಟಿ ಮಾಡುವ ಸಾಧ್ಯತೆಯಿದೆ. ಕಚೇರಿಯಲ್ಲಿ ನೆಟ್‌ವರ್ಕಿಂಗ್ ಹೆಚ್ಚಾಗಲಿದೆ. ಸಾಮಾಜಿಕ ಕಾರ್ಯಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವಿರಿ. ಮನೆಯಲ್ಲಿ ಶುಭ ಕಾರ್ಯಗಳನ್ನು ಆಯೋಜಿಸಲು ಸಾಧ್ಯವಿದೆ.

** ಮಿಥುನ ರಾಶಿ :
ಇಂದು ವಿದ್ಯಾರ್ಥಿಗಳಿಗೆ ಒಳ್ಳೆಯ ಸುದ್ದಿ ಸಿಗಲಿದೆ. ಉದ್ಯೋಗದಲ್ಲಿ ನಿಮ್ಮ ಕಾರ್ಯಕ್ಷಮತೆ ಉತ್ತಮವಾಗಿರುತ್ತದೆ. ವೃತ್ತಿ ಜೀವನದಲ್ಲಿ ದೊಡ್ಡ ಬದಲಾವಣೆಗಳಾಗಲಿವೆ. ಜನರು ನಿಮ್ಮ ಕಾರ್ಯಗಳನ್ನು ಹೊಗಳುತ್ತಾರೆ. ಇಂದು ಪೂರ್ವಿಕರ ಆಸ್ತಿಯಿಂದ ಆರ್ಥಿಕ ಲಾಭವಾಗಲಿದೆ. ಆಸ್ತಿ ಸಂಬಂಧಿತ ವಿವಾದಗಳಿಂದ ನೀವು ಪರಿಹಾರವನ್ನು ಪಡೆಯುತ್ತೀರಿ. ನಿಮ್ಮ ಆರೋಗ್ಯದ ಕಡೆ ಗಮನ ಕೊಡಿ. ಪ್ರತಿದಿನ ಯೋಗ ಮತ್ತು ಧ್ಯಾನ ಮಾಡಿ.

** ಕರ್ಕಾಟಕ ರಾಶಿ :
ಇಂದು ಸಹೋದ್ಯೋಗಿಗಳೊಂದಿಗೆ ಸಂಬಂಧ ಉತ್ತಮವಾಗಿರುತ್ತದೆ. ತಂಡದ ಕೆಲಸದಿಂದ ಎಲ್ಲಾ ಕಾರ್ಯಗಳು ಸುಲಭವಾಗಿ ಯಶಸ್ವಿಯಾಗುತ್ತವೆ. ಜೀವನದಲ್ಲಿ ಶಕ್ತಿ ಮತ್ತು ಉತ್ಸಾಹದ ಕೊರತೆ ಇರುವುದಿಲ್ಲ. ಕಚೇರಿಯಲ್ಲಿ ನೆಟ್‌ವರ್ಕಿಂಗ್ ಹೆಚ್ಚಾಗಲಿದೆ. ಇಂದು ನೀವು ಹೊಸ ಯೋಜನೆಯಲ್ಲಿ ಕೆಲಸ ಮಾಡುವ ಅವಕಾಶವನ್ನು ಪಡೆಯಬಹುದು. ದಾಂಪತ್ಯ ಜೀವನದಲ್ಲಿ ಸಂತಸದ ವಾತಾವರಣ ಇರುತ್ತದೆ.

** ಸಿಂಹ ರಾಶಿ :
ಇಂದು ಸಿಂಹ ರಾಶಿಯ ಜನರು ನೀವು ಸಾಮಾಜಿಕ ಕಾರ್ಯಗಳಲ್ಲಿ ಸಕ್ರಿಯವಾಗಿ ಭಾಗವಹಿಸುವಿರಿ. ಕಚೇರಿಯಲ್ಲಿ ಕೆಲವು ಪ್ರಮುಖ ಪ್ರಾಜೆಕ್ಟ್‌ಗಳ ಜವಾಬ್ದಾರಿಯನ್ನು ನೀವು ಪಡೆಯುತ್ತೀರಿ. ಹೂಡಿಕೆಗೆ ಸಂಬಂಧಿಸಿದ ನಿರ್ಧಾರಗಳನ್ನು ಬಹಳ ಚಿಂತನಶೀಲವಾಗಿ ತೆಗೆದುಕೊಳ್ಳಿ. ತರಾತುರಿಯಲ್ಲಿ ಹಣ ಖರ್ಚು ಮಾಡುವುದನ್ನು ತಪ್ಪಿಸಿ. ಇಂದು ನೀವು ನಿಮ್ಮ ಸಂಗಾತಿಯೊಂದಿಗೆ ವಿಹಾರವನ್ನು ಯೋಜಿಸಬಹುದು.

** ಕನ್ಯಾ ರಾಶಿ :
ಇಂದು ನಿಮಗೆ ತುಂಬಾ ಶುಭ ದಿನವಾಗಲಿದೆ. ವ್ಯಾಪಾರದಲ್ಲಿ ಆರ್ಥಿಕ ಲಾಭ ದೊರೆಯಲಿದೆ. ಉದ್ಯಮಿಗಳು ವ್ಯಾಪಾರದಲ್ಲಿ ಲಾಭ ಗಳಿಸುವರು. ಕೌಟುಂಬಿಕ ಜೀವನದಲ್ಲಿನ ಸಮಸ್ಯೆಗಳು ದೂರವಾಗುತ್ತವೆ. ಸಮಯವನ್ನು ಸರಿಯಾಗಿ ಬಳಸಿಕೊಳ್ಳಿ. ವೈಯಕ್ತಿಕ ಮತ್ತು ವೃತ್ತಿಪರ ಜೀವನದಲ್ಲಿ ಸಮತೋಲನವನ್ನು ಕಾಪಾಡಿಕೊಳ್ಳಿ. ಕೆಲಸದ ಕಾರಣದಿಂದ ಹೆಚ್ಚು ಒತ್ತಡವನ್ನು ತೆಗೆದುಕೊಳ್ಳಬೇಡಿ.

** ತುಲಾ ರಾಶಿ :
ಇಂದು ನಿಮ್ಮ ಸಂಗಾತಿಯೊಂದಿಗೆ ಹೆಚ್ಚು ಸಮಯ ಕಳೆಯಿರಿ. ನಿಮ್ಮ ದೀರ್ಘಾವಧಿಯ ಸಂಬಂಧದ ಗುರಿಗಳನ್ನು ಅವರೊಂದಿಗೆ ಹಂಚಿಕೊಳ್ಳಿ. ವಿದ್ಯಾರ್ಥಿಗಳು ಇಂದು ಪ್ರತಿಷ್ಠಿತ ಸಂಸ್ಥೆಯಲ್ಲಿ ಪ್ರವೇಶ ಪಡೆಯಬಹುದು. ಸರ್ಕಾರಿ ನೌಕರರಿಗೆ ಬಡ್ತಿ ಸಿಗಬಹುದು. ಗಡುವಿನ ಮೊದಲು ಎಲ್ಲಾ ಕಚೇರಿ ಕಾರ್ಯಗಳನ್ನು ಪೂರ್ಣಗೊಳಿಸಿ. ನಿಮ್ಮ ಫಿಟ್ನೆಸ್ ಬಗ್ಗೆ ಗಮನ ಕೊಡಿ. ಪ್ರತಿದಿನ ಯೋಗ ಮತ್ತು ಧ್ಯಾನ ಮಾಡಿ.

** ವೃಶ್ಚಿಕ ರಾಶಿ :
ಇಂದು ವೃತ್ತಿ ಜೀವನದ ಸಮಸ್ಯೆಗಳನ್ನು ಪರಿಹರಿಸಲು ಪ್ರಯತ್ನಿಸಿ. ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಸಮಯ ಕಳೆಯಿರಿ. ನೀವು ಇಂದು ಜಿಮ್ ಅನ್ನು ಪ್ರಾರಂಭಿಸಬಹುದು. ಇದರಿಂದ ನಿಮ್ಮ ಫಿಟ್ನೆಸ್ ಉತ್ತಮವಾಗಿರುತ್ತದೆ. ಇದಲ್ಲದೆ, ನಿಮ್ಮ ನೆಚ್ಚಿನ ಹವ್ಯಾಸಕ್ಕಾಗಿ ನೀವು ಸ್ವಲ್ಪ ಸಮಯವನ್ನು ತೆಗೆದುಕೊಳ್ಳಬಹುದು. ವಿದ್ಯಾರ್ಥಿಗಳು ತಮ್ಮ ಶ್ರಮದ ಫಲವನ್ನು ಪಡೆಯುತ್ತಾರೆ. ಪರೀಕ್ಷೆಯಲ್ಲಿ ಉತ್ತಮ ಅಂಕಗಳನ್ನು ಪಡೆಯುತ್ತೀರಿ.

** ಧನಸ್ಸು ರಾಶಿ :
ಇಂದು ಇಂದು ನಿಮ್ಮ ಕಚೇರಿಯ ಕಾರ್ಯಕ್ಷಮತೆ ಅತ್ಯುತ್ತಮವಾಗಿರುತ್ತದೆ. ಹೊಸ ಹೂಡಿಕೆ ಅವಕಾಶಗಳ ಮೇಲೆ ನಿಗಾ ಇರಿಸಿ. ಪ್ರತಿದಿನ ಯೋಗ ಮತ್ತು ವ್ಯಾಯಾಮ ಮಾಡಿ. ಇಂದು ನೀವು ಪ್ರವಾಸವನ್ನು ಯೋಜಿಸಬಹುದು. ಜೀವನದಲ್ಲಿ ಅನೇಕ ಪ್ರಮುಖ ಬದಲಾವಣೆಗಳಾಗುತ್ತವೆ. ಕೌಟುಂಬಿಕ ಜೀವನದಲ್ಲಿ ಸಂತಸದ ವಾತಾವರಣ ಇರುತ್ತದೆ. ಸಮಾಜದಲ್ಲಿ ಗೌರವ ಹೆಚ್ಚಾಗುತ್ತದೆ. ವೃತ್ತಿ ಜೀವನದಲ್ಲಿ ಪ್ರಗತಿ ಕಾಣುವಿರಿ.

** ಮಕರ ರಾಶಿ :
ಇಂದು ವೃತ್ತಿ ಜೀವನದಲ್ಲಿ ಇದ್ದ ಅಡೆತಡೆಗಳು ನಿವಾರಣೆಯಾಗುತ್ತವೆ. ಬಹಳ ದಿನಗಳಿಂದ ಬಾಕಿ ಉಳಿದಿರುವ ಹಣ ವಾಪಸ್ ಬರಲಿದೆ. ಆರ್ಥಿಕ ಪರಿಸ್ಥಿತಿ ಸುಧಾರಿಸಲಿದೆ. ಇಂದು ನೀವು ಆಸ್ತಿ ಸಂಬಂಧಿತ ವಿವಾದಗಳಿಂದ ಪರಿಹಾರವನ್ನು ಪಡೆಯುತ್ತೀರಿ. ಮನೆಯಲ್ಲಿ ಧಾರ್ಮಿಕ ಕಾರ್ಯಕ್ರಮಗಳನ್ನು ಆಯೋಜಿಸುವುದರಿಂದ ಆಹ್ಲಾದಕರ ವಾತಾವರಣ ನಿರ್ಮಾಣವಾಗುತ್ತದೆ. ಮಾನಸಿಕ ಒತ್ತಡದಿಂದ ಮುಕ್ತಿ ಪಡೆಯುತ್ತೀರಿ.

** ಕುಂಭ ರಾಶಿ :
ಇಂದು ಕುಂಭ ರಾಶಿಯ ಜನರ ಬಹುಕಾಲ ಬಾಕಿಯಿರುವ ಕೆಲಸಗಳು ಯಶಸ್ವಿಯಾಗಲಿವೆ. ಹೊಸ ಬದಲಾವಣೆಗಳಿಗೆ ಸಿದ್ಧರಾಗಿರಿ. ಕಚೇರಿ ರಾಜಕೀಯದಿಂದ ದೂರವಿರಿ. ಶೈಕ್ಷಣಿಕ ಕೆಲಸದಲ್ಲಿ ಏರುಪೇರು ಉಂಟಾಗುವುದು. ಇಂದು ನಿಮ್ಮ ಆರ್ಥಿಕ ಸ್ಥಿತಿ ಉತ್ತಮವಾಗಿರುತ್ತದೆ. ಕೌಟುಂಬಿಕ ಜೀವನದಲ್ಲಿ ಸಂತೋಷ ಮತ್ತು ಶಾಂತಿ ಅಖಂಡವಾಗಿ ಉಳಿಯುತ್ತದೆ. ಕುಟುಂಬದೊಂದಿಗೆ ಗುಣಮಟ್ಟದ ಸಮಯವನ್ನು ಕಳೆಯುವಿರಿ.

** ಮೀನ ರಾಶಿ :
ಇಂದು ಮನೆಯಲ್ಲಿ ಶುಭ ಕಾರ್ಯಗಳನ್ನು ಆಯೋಜಿಸಬಹುದು. ಈ ಕಾರಣದಿಂದಾಗಿ ಕುಟುಂಬ ಜೀವನದಲ್ಲಿ ಸಂತೋಷದ ವಾತಾವರಣ ಇರುತ್ತದೆ. ವೃತ್ತಿ ಜೀವನದಲ್ಲಿ ಹೊಸ ಸಾಧನೆಗಳನ್ನು ಸಾಧಿಸುವಿರಿ. ಶೈಕ್ಷಣಿಕ ಕೆಲಸದಲ್ಲಿ ಪ್ರಮುಖ ಬದಲಾವಣೆಗಳಾಗಲಿವೆ. ಇಂದು ನೀವು ಕುಟುಂಬದೊಂದಿಗೆ ಎಲ್ಲೋ ಹೋಗಬಹುದು. ಇದಲ್ಲದೆ, ನಿಮ್ಮ ಸಂಗಾತಿಯೊಂದಿಗೆ ಹೆಚ್ಚು ಸಮಯ ಕಳೆಯಿರಿ. ನಿಮ್ಮ ಭಾವನೆಗಳನ್ನು ಅವರೊಂದಿಗೆ ಹಂಚಿಕೊಳ್ಳಿ.

Categories
ಕಾರ್ಕಳ

ಕ್ರೈಸ್ಟ್ ಕಿಂಗ್ : ತಾಲೂಕು ಮಟ್ಟದ ಕುಸ್ತಿ ಪಂದ್ಯಾಟದಲ್ಲಿ ಉತ್ತಮ ಸಾಧನೆ

ಕ್ರೈಸ್ಟ್ ಕಿಂಗ್ : ತಾಲೂಕು ಮಟ್ಟದ ಕುಸ್ತಿ ಪಂದ್ಯಾಟದಲ್ಲಿ ಉತ್ತಮ ಸಾಧನೆ
– ಹದಿನಾಲ್ಕು ವಿದ್ಯಾರ್ಥಿಗಳು ಜಿಲ್ಲಾಮಟ್ಟಕ್ಕೆ ಆಯ್ಕೆ
– ಕುಸ್ತಿ ಸ್ಪರ್ಧೆಯಲ್ಲಿ ಚಿನ್ನ, ರಜತ ಪದಕಗಳೊಂದಿಗೆ ಕ್ರೈಸ್ಟ್ ಕಿಂಗ್ ವಿದ್ಯಾರ್ಥಿಗಳ ಪ್ರಾಬಲ್ಯ

NAMMUR EXPRESS NEWS
ಕಾರ್ಕಳ: ಶಾಲಾ ಶಿಕ್ಷಣ ಇಲಾಖೆ, ಕರ್ನಾಟಕ ಸರಕಾರ, ಮತ್ತು ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಛೇರಿ ಕಾರ್ಕಳ ಇವರ ಜಂಟಿ ಆಶ್ರಯದಲ್ಲಿ ನಡೆದ ಕಾರ್ಕಳ ತಾಲೂಕು ಮಟ್ಟದ ಪ್ರಾಥಮಿಕ ಹಾಗೂ ಪ್ರೌಢಶಾಲಾ ವಿಭಾಗದ ಕುಸ್ತಿ ಪಂದ್ಯಾಟದಲ್ಲಿ ಕ್ರೈಸ್ಟ್ ಕಿಂಗ್ ಆಂಗ್ಲಮಾಧ್ಯಮ ಪ್ರಾಥಮಿಕ ಮತ್ತು ಪ್ರೌಢಶಾಲೆಗಳ ವಿದ್ಯಾರ್ಥಿಗಳು ಗಮನಾರ್ಹ ಸಾಧನೆ ಮಾಡಿ ಒಟ್ಟು ಹದಿನಾಲ್ಕು ಮಂದಿ ಜಿಲ್ಲಾಮಟ್ಟಕ್ಕೆ ಆಯ್ಕೆಯಾಗಿದ್ದಾರೆ.

ಪ್ರಾಥಮಿಕ ವಿಭಾಗದ ವಿದ್ಯಾರ್ಥಿಗಳಿಂದ ಆಗಿರುವ ಹಾರಿಕೆ ಪಟ್ಟಿಯಲ್ಲಿ – 6ನೇ ತರಗತಿಯ ಮೊಹಮ್ಮದ್ ಅತಿಫ್, 7ನೇ ತರಗತಿಯ ಮಹಮ್ಮದ್ ಅಪ್ರಾಝ್, ಮೊಹಮ್ಮದ್ ಶಬಿತ್, ಮಾನಸ್, ಮೊಹಮ್ಮದ್ ಹಿಶಾಮ್ ಖಾನ್, 8ನೇ ತರಗತಿಯ ಸಾಕ್ಷಿತ್ ಪಿ. ಜೈನ್, ದೃವೀತ್ ಮತ್ತು ಬಾಲಕಿಯರ ವಿಭಾಗದಲ್ಲಿ 6ನೇ ತರಗತಿಯ ಪ್ರೀತಿ, 7ನೇ ತರಗತಿಯ ಸಾದ್ವಿ ನಾಯಕ್, 8ನೇ ತರಗತಿಯ ಸುಧೀಕ್ಷಾ ಸೇರಿದ್ದಾರೆ.

ಪ್ರೌಢಶಾಲಾ ವಿಭಾಗದಲ್ಲಿ 9ನೇ ತರಗತಿಯ ಕುರಿತು ಫ್ರಾನ್ಸಿಸ್, ಸಾನ್ವಿ ಎಂ ನಾಯಕ್, ಮತ್ತು 10ನೇ ತರಗತಿಯ ರೇಚಲ್ ಡಿ’ಸೋಜ, ಲೆನಿಷಾ ಮೆಂಡೋನ್ಸಾ ಚಿನ್ನದ ಪದಕ, 9ನೇ ತರಗತಿಯ ಅವನಿ ದ್ವಿತೀಯ ಸ್ಥಾನ ಪಡೆದುಕೊಂಡು ಸಾಧನೆ ಮಾಡಿದ್ದಾರೆ. ವಿದ್ಯಾರ್ಥಿಗಳಿಗೆ ತರಬೇತಿ ನೀಡಿದ್ದ ದೈಹಿಕ ಶಿಕ್ಷಣ ಶಿಕ್ಷಕಿ ಕು. ಲಾವಣ್ಯ ಶೆಟ್ಟಿಯವರ ಮಾರ್ಗದರ್ಶನವನ್ನು ಶ್ಲಾಘನೆ ಮಾಡಲಾಗಿದೆ.

Categories
ಬೆಂಗಳೂರು

ಸಾಧಕರ ಸಮಾಗಮಕ್ಕೆ ರಾಜಧಾನಿ ಸಾಕ್ಷಿ..!

ಸಾಧಕರ ಸಮಾಗಮಕ್ಕೆ ರಾಜಧಾನಿ ಸಾಕ್ಷಿ..!
– ಬೆಂಗಳೂರಲ್ಲಿ ಮಲೆನಾಡು ಮಿತ್ರ ವೃಂದದ ಕಾರ್ಯಕ್ರಮ
– ಸಚಿವರು, ಶಾಸಕರು ಹಾಜರ್: ಸಾಧಕರಿಗೆ ಸನ್ಮಾನದ ಗೌರವ

NAMMUR EXPRESS NEWS
ಬೆಂಗಳೂರು: ಮಲೆನಾಡು ಮೂಲದ ಬೆಂಗಳೂರಿಗರ ಹೆಮ್ಮೆಯ ಸಂಘಟನೆ ಮಲೆನಾಡು ಮಿತ್ರ ವೃಂದ (ರಿ.) ಬೆಂಗಳೂರು ವತಿಯಿಂದ 2025ನೇ ಸಾಲಿನ ಮಲೆನಾಡು ಮಿತ್ರ ಪ್ರಶಸ್ತಿ ಹಾಗೂ ಮಲೆನಾಡು ಸಾಧಕರು ಪ್ರಶಸ್ತಿ ಪ್ರಧಾನ ಸಮಾರಂಭ, ಮಲೆನಾಡು ಸಾಂಸ್ಕೃತಿಕ ಸಂಜೆ ಅದ್ದೂರಿಯಾಗಿ ನೆರವೇರಿತು. 600ಕ್ಕೂ ಹೆಚ್ಚು ಮಂದಿ ಮಲೆನಾಡಿಗರು ಭಾಗಿಯಾದರು.
ಮಹಾಲಕ್ಷ್ಮಿಪುರಂನ ಡಾ.ರಾಜಕುಮಾರ್ ಕಲಾಭವನದಲ್ಲಿ ನಡೆದ ಕಾರ್ಯಕ್ರಮವನ್ನು ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಉದ್ಘಾಟನೆ ಮಾಡಿದರು. ಮಾಜಿ ಗೃಹ ಸಚಿವ ತೀರ್ಥಹಳ್ಳಿ ಶಾಸಕ ಆರಗ ಜ್ಞಾನೇಂದ್ರ, ಮಹಾಲಕ್ಷ್ಮಿಪುರಂ ಶಾಸಕ ಗೋಪಾಲಯ್ಯ, ಮಲೆನಾಡು ಮಿತ್ರ ವೃಂದದ ಅಧ್ಯಕ್ಷ ಪ್ರದೀಪ್ ಹೆಗ್ಗೋಡು, ಖ್ಯಾತ ಗಾಯಕಿ ಬಿ. ಕೆ ಸುಮಿತ್ರಾ, ಉದ್ಯಮಿ ಅಚ್ಚುತ್ ಗೌಡ, ಕೃಷಿ ಸಾಧಕ ಮಹಮದ್ ಅಮಾನುಲ್ಲಾ, ಸಾಧಕಿ ರಿತುಪರ್ಣ ವೇದಿಕೆಯಲ್ಲಿದ್ದರು. ಸುಕೇಶ್ ದಾಸನಕೊಡಿಗೆ ಸ್ವಾಗತಿಸಿದರು.
ಪ್ರಾಸ್ತವಿಕ ಮಾತನಾಡಿದ ಮಲೆನಾಡು ಮಿತ್ರ ವೃಂದದ ನಿರ್ದೇಶಕರಾದ ಸಂದೇಶ್ ಹಂದಿಗೋಡು ನಮ್ಮ ಸಂಸ್ಥೆ 18 ವರ್ಷದ ಹಿಂದೆ ಕಟ್ಟಿದ ಸಂಸ್ಥೆ. ಮಲೆನಾಡಿನ ಬೆಂಗಳೂರಿಗರಿಗೆ ಸಹಾಯ ಮಾಡುವ ಸಂಸ್ಥೆ ಇದಾಗಿದೆ. ಮಲ್ನಾಡ್ ಭವನ ಕಟ್ಟಲು ಈ ವೇದಿಕೆ ಮನವಿ ಮಾಡುತ್ತದೆ ಎಂದರು. ಶಮಿತಾ ಮಲ್ನಾಡ್ ಅವರು ಮಾತನಾಡಿ, ಮಲೆನಾಡ ಕೋಗಿಲೆಯಾಗಿ ರಾಜ್ಯದ ಖ್ಯಾತ ಗಾಯಕಿಯಾಗಿ ಸುಮಿತ್ರಮ್ಮ ದೊಡ್ಡ ಸಾಧಕಿ. ಅವರಿಗೆ ಪ್ರಶಸ್ತಿ ನೀಡುತ್ತಿರುವುದು ಸಂಗೀತ ಕ್ಷೇತ್ರಕ್ಕೆ ನೀಡಿದ ಗೌರವ ಎಂದರು.

ಮಲೆನಾಡು ನನ್ನ ಉಸಿರು ಎಂದ ಮಧು ಬಂಗಾರಪ್ಪ

ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಮಾತನಾಡಿ, ಸಂಗೀತ ಕ್ಷೇತ್ರಕ್ಕೆ ಬಿ. ಕೆ.ಸುಮಿತ್ರ ಅವರ ಕೊಡುಗೆ ಅಪಾರ. ಅಡಿಕೆ ಜತೆಗೆ ಸಮಗ್ರ ಕೃಷಿ ಬಗ್ಗೆ ಗಮನ ಕೊಡಬೇಕು. ಇಂದಿನ ಪ್ರಶಸ್ತಿಗೆ ಭಾಜನರಾದ ಸಾಧಕರು ಮಲೆನಾಡಿಗೆ ಕೀರ್ತಿ ತಂದಿದ್ದೀರಿ. ಮಲೆನಾಡಲ್ಲಿ ಇದೊಂದು ಮಾದರಿ ಕಾರ್ಯಕ್ರಮ. ಅಧಿಕಾರ ಇರುತ್ತೆ ಹೋಗುತ್ತೆ ಮಲೆನಾಡಿಗರ ಜತೆಯಾಗಿದ್ದೇನೆ. ಆರಗ ಜ್ಞಾನೇಂದ್ರ ನಾವೆಲ್ಲರೂ ಸೇರಿ ಮಲೆನಾಡ ಅಭಿವೃದ್ಧಿಗೆ ಸದಾ ಜತೆ ಇದ್ದೇವೆ. ನಮ್ಮನ್ನು ಬಳಸಿಕೊಳ್ಳಿ ಎಂದರು
ಕವಲೆ ದುರ್ಗ ಮತ್ತು ನಗರ ಕೋಟೆಯಲ್ಲಿ ವಿಶೇಷ ಸಾಂಸ್ಕೃತಿಕ ಉತ್ಸವ ಮಾಡೋಣ. ರಾಜಕಾರಣ ಹೊಲಸು. ನಾವೆಲ್ಲರೂ ಸೇರಿ ಮಲೆನಾಡ ಅಭಿವೃದ್ಧಿಗೆ ಕೈ ಜೋಡಿಸೋಣ. ಇಂತಹ ಸಂಘಟನೆ ಎಲ್ಲರ ಸಂಘಟನೆ ಆಗಬೇಕು ಎಂದರು.

ಮಲೆನಾಡು ಸಾಧಕರ ತವರೂರು: ಗೋಪಾಲಯ್ಯ

ನಾಲ್ಕು ಮಂದಿ ಸಿಎಂ ಕೊಟ್ಟಿರುವ ಜಿಲ್ಲೆ ಶಿವಮೊಗ್ಗ, ರಾಜ್ಯಕ್ಕೆ ಅನೇಕ ಸಾಧಕರನ್ನು ನಾಡಿಗೆ ನೀಡಿದ ನಾಡು ಮಲೆನಾಡು. ಮಲೆನಾಡು ಸುಂದರ ಊರು ಎಂದು ಶಾಸಕ ಗೋಪಾಲಯ್ಯ ಹೇಳಿದರು.
ನೀವೂ ಜಾಗ ಕೊಟ್ಟರೆ ಮುಂದೆ ಜಾಗ ಸಿಗಲ್ಲ. ಕೃಷಿ ಜಮೀನು ಮಾರಬೇಡಿ. ಅತ್ಯುತ್ತಮ ಸಂಘಟನೆ ಮಾಡುವವರು ಮಲೆನಾಡಿಗರು. ಮಲೆನಾಡಿನ ಈ ಸಂಘಟನೆ ಎಲ್ಲಾ ರೀತಿಯಲ್ಲೂ ಸಾರ್ಥಕತೆ ಪಡೆದಿದೆ ಎಂದರು

ಸಂಘಟನೆ, ಕಾರ್ಯಕ್ರಮದ ಬಗ್ಗೆ ಸಾಧಕರ ಮೆಚ್ಚುಗೆ

ಖ್ಯಾತ ಗಾಯಕಿ ಬಿ.ಕೆ.ಸುಮಿತ್ರಾ ಮಾತನಾಡಿ, ನಾನೊಬ್ಬ ಗಾಯಕಿಯಾಗಿ ಸಾಧನೆ ಮಾಡಲು ಕಠಿಣ ಶ್ರಮ ಇತ್ತು. ಎಲ್ಲರ ಪ್ರೋತ್ಸಾಹ ಇತ್ತು. ಇಂತಹ ಸಂಘಟನೆಗಳು ಸಾಧನೆಯನ್ನು ಗುರುತಿಸಿ ಗೌರವಿಸಿರುವುದು ಸಂತಸ ತಂದಿದೆ ಎಂದರು.
ಉದ್ಯಮಿ ಅಚ್ಚುತ್ ಗೌಡ ಮಾತನಾಡಿ, ಇದು ನಮ್ಮದೇ ಪ್ರೋಗ್ರಾಮ್. 10 ವರ್ಷದಿಂದ ನಾನು ಎಲ್ಲದಕ್ಕೂ ಬೆಂಬಲಿಸಿದ್ದೇನೆ. ಮಲೆನಾಡು ನಮ್ಮ ಹೆಮ್ಮೆ ಎಂದರು.
ಸಾಧಕಿ ರಿತುಪರ್ಣ ಮಾತನಾಡಿ, ನನ್ನ ಇಷ್ಟ ಪಡುವ ಊರು ತೀರ್ಥಹಳ್ಳಿ. ವೈದ್ಯಳಾಗುವ ಕನಸು ಈಡೇರಲಿಲ್ಲ. ಇಂಜಿನಿಯರಿಂಗ್ ಅಲ್ಲಿ ಭಾರತದ ಕಿರಿಯ ಹೆಣ್ಣು ಮಗಳಾಗಿ ರೋಲ್ಸ್ ರಾಯ್ ಕಂಪನಿಗೆ ಆಯ್ಕೆ ಆಗಿದ್ದೇನೆ. ಮಲೆನಾಡು ನನಗೆ ಪ್ರೇರಣೆ. ಯಾವುದೇ ವಿದ್ಯಾರ್ಥಿ ಯಾವಾಗ ಕೂಡ ಶೈನ್ ಆಗಬಹುದು ಎಂದು ಸ್ಫೂರ್ತಿಯ ಮಾತನಾಡಿದರು.

ಮಾಜಿ ಗೃಹ ಸಚಿವ, ತೀರ್ಥಹಳ್ಳಿ ಆರಗ ಜ್ಞಾನೇಂದ್ರ ಮಾತನಾಡಿ, ಮಲೆನಾಡು ಮಿತ್ರ ವೃಂದದ ಈ ಕಾರ್ಯಕ್ರಮ ಸೊಗಸಾಗಿ ಆಯೋಜನೆ ಆಗಿದೆ. ಬೆಂಗಳೂರಲ್ಲಿ ಮಲೆನಾಡು ಜನರು ಬದುಕು ಕಟ್ಟಿಕೊಂಡು ಎಲ್ಲರೂ ಸೇರಿ ಒಂದೊಳ್ಳೆ ಕಾರ್ಯಕ್ರಮ ಮಾಡಿದ್ದಾರೆ. ಇಲ್ಲಿನ ಜನರ ಪ್ರೀತಿ ವಿಶ್ವಾಸಕ್ಕೆ ನಾನು ಚಿರಋಣಿ ಎಂದರು.
ಅಡಿಕೆ ಮಲೆನಾಡು ಜನರಿಗೆ ಬದುಕು ನೀಡಿದೆ. ಮಲೆನಾಡಿಗರು ಬೆಂಗಳೂರಲ್ಲಿ ಎಲ್ಲರ ವಿಶ್ವಾಸ ಗಳಿಸಿದ್ದಾರೆ. ಎಲ್ಲರೂ ಈ ಕಡೆ ಬಂದ ಕಾರಣ ಊರಲ್ಲಿ ಮುದುಕ ಮುದುಕಿ ಇದ್ದಾರೆ. ಮಲೆನಾಡಲ್ಲಿ ಭೂಮಿ ಮಾರಾಟ ಮಾಡಬೇಡಿ. ನೀವೇ ವಿಶ್ರಾಂತಿ, ನೆಮ್ಮದಿ ಬೇಕು ಎಂದಾಗ ಬನ್ನಿ. ಅರ್ಹರನ್ನು ಸನ್ಮಾನ ಮಾಡಿ ಗೌರವಿಸಿದ್ದೀರಿ ಧನ್ಯವಾದಗಳು ಎಂದರು.
ಮಲೆನಾಡಲ್ಲಿ ಕೃಷಿಗೆ ಒಳ್ಳೆ ಡಿಮ್ಯಾಂಡ್ ಇದೆ. ಮಲೆನಾಡು ಪ್ರತಿಭಾವಂತರ ನಾಡು. ಕರುನಾಡು,ದೇಶಕ್ಕೆ ಸಾವಿರಾರು ಸಾಧಕರನ್ನು ನೀಡಿದೆ. ಈಗಲೂ ಪ್ರತಿಭೆಗೆ ಜನ್ಮ ನೀಡುತ್ತಿದೆ. ಸಹ್ಯಾದ್ರಿ ಸಂಘ, ಮಲೆನಾಡು ಮಿತ್ರ ವೃಂದದಂತಹ ಸಂಘಟನೆಗಳು ಎಲ್ಲರನ್ನು ಸೇರಿಸುವ ಕೆಲಸ ಮಾಡುತ್ತಿವೆ ಎಂದರು.
ಪ್ರದೀಪ್ ಹೆಗ್ಗೋಡು ಅಧ್ಯಕ್ಷೀಯ ನುಡಿ ಆಡಿ ಕಾರ್ಯಕ್ರಮಕ್ಕೆ ಸಹಕಾರ ನೀಡಿದ ಸರ್ವರಿಗೂ ಅಭಿನಂದನೆಗಳನ್ನು ಸಲ್ಲಿಸಿದರು.
ಖ್ಯಾತ ನಿರೂಪಕಿ ಸ್ನೇಹಾ ನೀಲಪ್ಪಗೌಡ ಕಾರ್ಯಕ್ರಮ ನಿರೂಪಣೆ ಮಾಡಿದರು. ಮಲೆನಾಡು ಮಿತ್ರ ವೃಂದದ ಎಲ್ಲಾ ಪದಾಧಿಕಾರಿಗಳು, ಸದಸ್ಯರು ಹಾಜರಿದ್ದರು.

ಸಾಂಸ್ಕೃತಿಕ ಕಾರ್ಯಕ್ರಮದ ಝಲಕ್..!

ಮಲೆನಾಡು ಮೂಲದ ಖ್ಯಾತ ಗಾಯಕಿ ಭಾಗ್ಯಶ್ರೀ ಗೌಡ, ಹಾಗೂ ತಂಡದವರಿಂದ ಗೀತ ಗಾಯನ ಕಾರ್ಯಕ್ರಮ., ಮಲೆನಾಡು ಭಾಷೆಯ ಕಿರು ನಗೆ ನಾಟಕವನ್ನು ಗುತ್ತುಳಿಕೆ ಕೇಶವ್ ತಂಡ ನಡೆಸಿಕೊಟ್ಟರು.
ಅಶೀಶ್ ದೇವಾಡಿಗ ತಂಡದವರಿಂದ ಸ್ಯಾಕ್ಸೋಫೋನ್ ಹಾಗೂ ಕೊಳಲು ವಾದನ ಎಲ್ಲರ ಗಮನ ಸೆಳೆಯಿತು. ನಾಡಗೀತೆಯನ್ನು ಫಿಲಂ ಫೇರ್ ಮತ್ತು ರಾಜ್ಯ ಪ್ರಶಸ್ತಿ ವಿಜೇತ ಗಾಯಕಿ ಡಾ.ಶಮಿತ ಮಲ್ನಾಡ್ ಇವರು ನಡೆಸಿಕೊಟ್ಟರು.

ಸಾಧಕರಿಗೆ ಪ್ರಶಸ್ತಿ, ಸನ್ಮಾನದ ಸಂಭ್ರಮ 

ಮಲೆನಾಡು ಮಿತ್ರ ಪ್ರಶಸ್ತಿ-2025 ಅನ್ನು ಬಿ.ಕೆ.ಸುಮಿತ್ರ ಖ್ಯಾತ ಗಾಯಕಿ ಹಾಗೂ ಮಲೆನಾಡು ಸಾಧಕ ಪ್ರಶಸ್ತಿ-2025 ಅನ್ನು ಅಚ್ಚುತ್ ಗೌಡ ಉದ್ಯಮ ಕ್ಷೇತ್ರ, ರಿತುಪರ್ಣ ಶಿಕ್ಷಣ ಹಾಗೂ ಸಾಧನೆ ಕ್ಷೇತ್ರ, ರೆಹಮತ್ ಹೊಸನಗರ ಕೃಷಿ ಕ್ಷೇತ್ರಕ್ಕೆ ನೀಡಿ ಗೌರವ ನೀಡಲಾಯಿತು. ಇದೇ ವೇಳೆ ಕಾರ್ಯಕ್ರಮಕ್ಕೆ ಸಹಕಾರ ನೀಡಿ ಗೌರವಿಸಲಾಯಿತು.

Categories
ಬೆಂಗಳೂರು

ಸಾರಿಗೆ ನೌಕರರ ಮುಷ್ಕರಕ್ಕೆ ಹೈಕೋರ್ಟ್ ನಿಂದ ಮತ್ತೆ ಶಾಕ್..!!

ಸಾರಿಗೆ ನೌಕರರ ಮುಷ್ಕರಕ್ಕೆ ಹೈಕೋರ್ಟ್ ನಿಂದ ಮತ್ತೆ ಶಾಕ್..!!
– ಹೈಕೋರ್ಟ್ ತಡೆಯಾಜ್ಞೆ ಮತ್ತೆ 2 ದಿನ ಬ್ರೇಕ್
– ನಾಳೆಯಿಂದ ಎಂದಿನಂತೆ ಬಸ್ ಸಂಚಾರ

NAMMUR EXPRESS NEWS
ಬೆಂಗಳೂರು : ಸಾರಿಗೆ ಮುಷ್ಕರ ಪ್ರಶ್ನಿಸಿ ಹೈಕೋರ್ಟ್ ಗೆ ಸಲ್ಲಿಸಲಾಗಿದ್ದಂತ ಸಾರ್ವಜನಿಕ ಹಿತಾಸಕ್ತಿಯ ಅರ್ಜಿಯನ್ನು ಇಂದು ವಿಚಾರಣೆ ನಡೆಸಲಾಯಿತು. ವಾದ-ಪ್ರತಿವಾದವನ್ನು ಆಲಿಸಿದಂತ ಹೈಕೋರ್ಟ್ ನ್ಯಾಯಪೀಠವು ಸಾರಿಗೆ ನೌಕರರ ಮುಷ್ಕರಕ್ಕೆ ಮತ್ತೆ ಎರಡು ದಿನ ಬ್ರೇಕ್ ಹಾಕಿದೆ.

ಇಂದು ಸಾರಿಗೆ ಮುಷ್ಕರ ಪ್ರಶ್ನಿಸಿ ಸಲ್ಲಿಸಿದ್ದಂತ ಪಿಐಎಲ್ ಅನ್ನು ಹೈಕೋರ್ಟ್ ವಿಭಾಗೀಯ ನ್ಯಾಯಪೀಠದಲ್ಲಿ ವಿಚಾರಣೆ ನಡೆಸಿತು. ಈ ವೇಳೆ ಮುಷ್ಕರದಿಂದಾಗಿ ಜನಸಾಮಾನ್ಯರಿಗೆ ತೊಂದರೆಯಾಗಿದೆ ಎಂಬುದಾಗಿ ಎಜಿ ಕೋರ್ಟ್ ಗಮನಕ್ಕೆ ತಂದರು. ಈ ಸಂದರ್ಭದಲ್ಲಿ ಹೈಕೋರ್ಟ್ ನ್ಯಾಯಪೀಠವು ರಾಜಿ ಸಂಧಾನದ ಮಾತುಕತೆ ಏನಾಗಿದೆ ಎಂಬುದಾಗಿ ಪ್ರಶ್ನಿಸಿತು. ಇಲ್ಲಿಯವರೆಗೆ ನಡೆಸಿದ ಮಾತುಕತೆ ವಿವರಗಳನ್ನು ಎಜೆ ಹೈಕೋರ್ಟ್ ನ್ಯಾಯಪೀಠಕ್ಕೆ ನೀಡಿದರು. ಅಲ್ಲದೇ ಇಂಡಸ್ಟ್ರಿಯಲ್ ಡಿಸ್ಪ್ಯೂಟ್ ಕಾಯ್ದೆಯಂತೆ ಸಂಧಾನ ಸಭೆ ನಡೆಸಲಾಗ್ತಿದೆ ಎಂಬುದಾಗಿ ತಿಳಿಸಿದರು.

ಈ ವೇಳೆ ಸಾರಿಗೆ ಸಂಘಟನೆಗಳ ವಕೀಲರಿಗೆ ನ್ಯಾಯಾಂಗ ನಿಂದನೆಯ ಎಚ್ಚರಿಕೆಯನ್ನು ಹೈಕೋರ್ಟ್ ನೀಡಿತು. ಕಾರಣ ಇಂದು ಮುಷ್ಕರ ನಿಲ್ಲಿಸುವಂತೆ ಆದೇಶದ ನಡುವೆಯೂ ಸಾರಿಗೆ ಸಂಚಾರ ಸ್ಥಗಿತಗೊಳಿಸಿದ್ದಕ್ಕೆ ಸಿಜೆ ವಿಭು ಬಕ್ರು, ನ್ಯಾಯಮೂರ್ತಿ ಸಿ ಎಂ ಜೋಶಿ ಅವರಿದ್ದ ಹೈಕೋರ್ಟ್ ನ್ಯಾಯಪೀಠವು ಕೆಂಡಾಮಂಡಲವಾಯಿತು. ಅಲ್ಲದೇ ಮುಷ್ಕರ ನಿಲ್ಲಿಸಲಾಗಿದೆಯೇ ಎಂಬುದಾಗಿ ಪ್ರಶ್ನಿಸಿತು.

ಹೈಕೋರ್ಟ್ ನ್ಯಾಯಪೀಠದ ಪ್ರಶ್ನೆಗೆ ಸಾರಿಗೆ ನೌಕರರ ಸಂಘಟನೆಗಳ ಪರ ವಕೀಲರು ಇಲ್ಲ ಎಂದಾಗ ಗರಂ ಆಯಿತು. ಈ ವಾದ-ಪ್ರತಿವಾದವನ್ನು ಆಲಿಸಿದಂತ ಹೈಕೋರ್ಟ್, ಮುಷ್ಕರಕ್ಕೆ ನೀಡಿದ್ದಂತ ತಡೆಯಾಜ್ಞೆಯನ್ನು 2 ದಿನ ವಿಸ್ತರಣೆ ಮಾಡಿ ಆದೇಶಿಸಿದೆ.
ಎಸ್ಮಾ ಜಾರಿಯಾದರೂ ಮುಷ್ಕರ ನಡೆಸುವುದು ಕಾನೂನು ಬಾಹಿರವಾದದ್ದು. ಜನರಿಗೆ ನಿಮ್ಮ ಮುಷ್ಕರದಿಂದ ಸಮಸ್ಯೆ ಆಗಬಾರದು ಎಂಬುದಾಗಿ ಹೇಳಿ ನಾಲ್ಕು ಸಾರಿಗೆ ನಿಮಗಳ ನೌಕರರ ಸಂಘಕ್ಕೆ ಹೈಕೋರ್ಟ್ ನೋಟಿಸ್ ಜಾರಿಗೊಳಿಸಿತು. ಅಲ್ಲದೇ ವಿಚಾರಣೆಯನ್ನು ಆಗಸ್ಟ್.7ಕ್ಕೆ ಮುಂದೂಡಿದೆ.

Categories
ಬೆಂಗಳೂರು

ಕರಿಯ-2 ಸಿನೆಮಾ ಖ್ಯಾತಿಯ ನಟ ಸಂತೋಷ್ ಬಾಲರಾಜ್ ನಿಧನ

ಕರಿಯ-2 ಸಿನೆಮಾ ಖ್ಯಾತಿಯ ನಟ ಸಂತೋಷ್ ಬಾಲರಾಜ್ ನಿಧನ
– ಕುಮಾರಸ್ವಾಮಿ ಲೇಔಟ್​ನ ಸಾಗರ್ ಅಫೋಲೋ ಆಸ್ಪತ್ರೆಯಲ್ಲಿ ಸಾವು
– ಸಂತೋಷ್ ಬಾಲರಾಜ್ ಜಾಂಡಿಸ್ ನಿಂದ ಬಳಲುತ್ತಿದ್ದರು

NAMMUR EXPRESS NEWS
ಬೆಂಗಳೂರು : ಸ್ಯಾಂಡಲ್ ವುಡ್ ನಟ ಸಂತೋಷ್ ಬಾಲರಾಜ್ (34) ನಿಧನರಾಗಿದ್ದಾರೆ. ಅನಾರೋಗ್ಯದಿಂದ ನಟ ಸಂತೋಷ್ ಬಾಲರಾಜ್ ಬಳಲುತ್ತಿದ್ದರು ಇದೀಗ ಅವರು ಇಂದು ನಿಧನರಾಗಿದ್ದಾರೆ. ನಟ ಸಂತೋಷ್ ಬಾಲರಾಜ್ ಜಾಂಡಿಸ್ ನಿಂದ ಬಳಲುತ್ತಿದ್ದರು. ಇತ್ತೀಚಿಗೆ ಚಿಕಿತ್ಸೆಗಾಗಿ ಬೆಂಗಳೂರಿನ ಬನಶಂಕರಿ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು.

ಆದರೆ ಸಂತೋಷ್ ಬಾಲರಾಜ್ ಚಿಕಿತ್ಸೆ ಫಲಕಾರಿಯಾಗದೆ ಇಂದು ಸಾವನ್ನಪ್ಪಿದ್ದಾರೆ.

ಕಿರಿಯ ವಯಸ್ಸಿಗೆ ಜಾಂಡೀಸ್​ನಿಂದ ನಟ ಸಂತೋಷ್ ಬಾಲರಾಜ್ ಬಳಲುತ್ತಿದ್ದರು. ಹೀಗಾಗಿ 34 ವಯಸ್ಸಿನ ನಟ ಸಂತೋಷ್ ಬಾಲರಾಜ್ ಕುಮಾರಸ್ವಾಮಿ ಲೇಔಟ್​ನ ಸಾಗರ್ ಅಫೋಲೋ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಆದ್ರೆ, ಜಾಂಡೀಸ್​ನಿಂದಾಗಿ ನಟ ಸಂತೋಷ್ ಕೋಮಗೆ ಹೋಗಿದ್ದರು. ಇದೀಗ ಚಿಕಿತ್ಸೆ ಫಲಕಾರಿಯಾಗದೆ ಸಂತೋಷ್ ಬಾಲ್ರಾಜ್ ಸಾವನಪ್ಪಿದ್ದಾರೆ.

2 ದಿನಗಳ ಹಿಂದೆ ಸಂತೋಷ್ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದರು. ಸಂತೋಷ್ ಬೇಗ ಚೇತರಿಸಿಕೊಳ್ಳಲಿ ಅಂತ ಆಪ್ತರು, ಕುಟುಂಬ ವರ್ಗ ಪ್ರಾರ್ಥಿಸುತ್ತಿತ್ತು. ಇನ್ನೂ, ಸಂತೋಷ್ ಬಾಲ್​ರಾಜ್ ಅವರು ಅಮ್ಮನ ಜೊತೆಗೆ ವಾಸವಾಗಿದ್ದರು. ನಟನ ಅಪ್ಪ ಅನೇಕಲ್ ಬಾಲರಾಜ್ ದರ್ಶನ್​ಗೆ ಕರಿಯ ಸಿನಿಮಾ ಮಾಡಿದ್ದರು. ಕರಿಯ-2 ಕೆಂಪ, ಗಣಪ, ಬರ್ಕ್ಲಿ, ಸತ್ಯ ಸಿನಿಮಾಗಳಲ್ಲಿ ಸಂತೋಷ್ ನಾಯಕ ನಟನಾಗಿ ಅಭಿನಯಿಸಿದ್ದಾರೆ.

Categories
ಬೆಂಗಳೂರು

ಕರ್ನಾಟಕ ಔಷಧ ತಯಾರಕರ ಸಂಘದ ಗೌರವ ಕಾರ್ಯದರ್ಶಿಯಾಗಿ ತೀರ್ಥಹಳ್ಳಿಯ ಶ್ರೀಧರ ಶೆಟ್ಟಿ

ಕರ್ನಾಟಕ ಔಷಧ ತಯಾರಕರ ಸಂಘದ ಗೌರವ ಕಾರ್ಯದರ್ಶಿಯಾಗಿ ತೀರ್ಥಹಳ್ಳಿಯ ಶ್ರೀಧರ ಶೆಟ್ಟಿ
– ಶ್ರೀಧರ ಶೆಟ್ಟಿಯವರಿಗೆ ನಮ್ಮೂರ್ ಎಕ್ಸ್ ಪ್ರೆಸ್ ಕಡೆಯಿಂದ ಅಭಿನಂದನೆಗಳು

NAMMUR EXPRESS NEWS
ಬೆಂಗಳೂರು: ಕರ್ನಾಟಕ ರಾಜ್ಯ ಔಷಧ ತಯಾರಕರ ಸಂಘದ ಗೌರವ ಕಾರ್ಯದರ್ಶಿ ಸ್ಥಾನಕ್ಕೆ ತೀರ್ಥಹಳ್ಳಿ ಮೂಲದ ಯಶಸ್ವಿ ಉದ್ಯಮಿಗಳು, ನೀಮಸ್ ಫಾರ್ಮಾಸ್ಯುಟಿಕಲ್ಸ್‌ನ ವ್ಯವಸ್ಥಾಪಕ ನಿರ್ದೇಶಕರೂ ಆದ ಶ್ರೀಧರ ಶೆಟ್ಟಿ ಅವರನ್ನು ಆಯ್ಕೆ ಮಾಡಲಾಗಿದೆ. ಶ್ರೀಧರ್ ಶೆಟ್ಟಿ N.K.D.P.M.A ಯ ಗೌರವ ಕಾರ್ಯದರ್ಶಿಗಳಾಗಿ ಈಗಾಗಲೇ ಸೇವೆ ಸಲ್ಲಿಸಿದ್ದು ಈಗ ಔಷಧ ಉದ್ಯಮದ ಅತ್ಯಂತ ಗೌರವಾನ್ವಿತ ಸ್ಥಾನಕ್ಕೆ ಅವರು ಆಯ್ಕೆಗೊಂಡಿರುವುದು ಅವರ ನಾಯಕತ್ವಕ್ಕೆ ಸಾಕ್ಷಿಯಾಗಿದೆ.
K.D.P.M.A ಗೌರವ ಕಾರ್ಯದರ್ಶಿಗಳಾಗಿ ಆಯ್ಕೆ ಆಗಿರುವ ಶ್ರೀಧರ ಶೆಟ್ಟರನ್ನು ಅವರ ಆತ್ಮೀಯರು, ಹಿತೈಷಿಗಳು ಅಭಿನಂದಿಸಿ ಶುಭ ಹಾರೈಸಿದ್ದಾರೆ.

ಶ್ರೀಧರ ಶೆಟ್ಟಿಯವರಿಗೆ ನಮ್ಮೂರ್ ಎಕ್ಸ್ ಪ್ರೆಸ್ ಕಡೆಯಿಂದ ಅಭಿನಂದನೆಗಳು