Categories
ಕೊಪ್ಪ ಚಿಕ್ಕಮಗಳೂರು ತೀರ್ಥಹಳ್ಳಿ ಮಲ್ನಾಡ್ ಶಿವಮೊಗ್ಗ

ಮಲ್ನಾಡ್ ಟಾಪ್ ನ್ಯೂಸ್

ಮಲ್ನಾಡ್ ಟಾಪ್ ನ್ಯೂಸ್

ಇರಾನ್ ಯುದ್ಧ ದಲ್ಲಿ ಸಿಲುಕಿದ ಕೊಪ್ಪದ ಹುಡುಗ!
– ಗಡಿಕಲ್ ಸಮೀಪದ ಹುಡುಗ ನಾಪತ್ತೆ: ಪೋಷಕರ ಆಕ್ರೋಶ

ಡೀಸೆಲ್ ಸೋರಿಕೆ: ಉರಿದು ಹೋದ ಸರ್ಕಾರಿ ಬಸ್!
– ಚಿಕ್ಕಮಗಳೂರಲ್ಲಿ ರಸ್ತೆ ಮಧ್ಯ ನಿಂತ ಬಸ್

ಮೋದಿ ವಿರುದ್ಧಬರಹ: ಬಿಂದು ಗೌಡ ವಿರುದ್ಧ ತೀರ್ಥಹಳ್ಳಿಯಲ್ಲಿ ಕೇಸ್!
– ತೀರ್ಥಹಳ್ಳಿ ಬಿಜೆಪಿ ಯುವ ಮೋರ್ಚಾದಿಂದ ದೂರು

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಕೊಪ್ಪ: ಇರಾನ್ ಅಮೇರಿಕಾ ಯುದ್ಧ ಇದೀಗ ವಿಶ್ವದಲ್ಲಿ ಭಾರೀ ಆತಂಕಕ್ಕೆ ಕಾರಣ ಆಗಿರುವ ನಡುವೆ ಕಳೆದ ಐದು ತಿಂಗಳಿನಿಂದ ಮಾರ್ಚಂಟ್ ನೇವಿಯಲ್ಲಿ ಉದ್ಯೋಗದಲ್ಲಿದ್ದ ಹಿರೇಕೂಡಿಗೆ ಗ್ರಾಮದ ನಿಶ್ಚಿತ್ ಎನ್ನುವ ಹೆಸರಿನ ಯುವಕ ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧದಲ್ಲಿ ಸಿಲುಕಿರುವ ಘಟನೆ ಇದೀಗ ಬೆಳಕಿಗೆ ಬಂದಿದೆ.

ಪರಿಣಾಮವಾಗಿ ನಿಶ್ಚಿತ್ ಕುಟುಂಬಸ್ಥರು ಆತಂಕಕ್ಕೀಡಾಗಿದ್ದಾರೆ. ಯುದ್ಧದ ವರದಿ ಬಿತ್ತರಗೊಳ್ಳುತ್ತಿದ್ದಂತೆ ನಿಶ್ಚಿತ್ ಅವರ ಪೋಷಕರು ಆತನನ್ನು ಸಂಪರ್ಕಿಸಲು ಪ್ರಯತ್ನಿಸಿದ್ದಾರೆ. ಆದರೆ ಯಾವುದೇ ರೀತಿಯ ಸಂಪರ್ಕ ಲಭ್ಯವಾಗಿಲ್ಲ ಎನ್ನುವ ಸಂಗತಿ ತಿಳಿದುಬಂದಿದೆ.

ಇದರಿಂದಾಗಿ ಅಲ್ಲಿ ನಿಶ್ಚಿತ್ ಅವರ ಪರಿಸ್ಥಿತಿ ಏನಾಗಿದೆ ಎನ್ನುವುದರ ಕುರಿತು ಯಾವುದೇ ರೀತಿಯ ಮಾಹಿತಿ ಸಿಗುತ್ತಿಲ್ಲ. ಅಲ್ಲದೆ ಸ್ಥಳೀಯ ಪೊಲೀಸ್ ಇಲಾಖೆ ಕೂಡ ಯಾವುದೇ ಅಧಿಕೃತ ಮಾಹಿತಿಯನ್ನು ನೀಡದಿರುವುದು ಪೋಷಕರ ಆತಂಕವನ್ನು ಮತ್ತಷ್ಟು ಹೆಚ್ಚಿಸಿದೆ.

ಈ ಹಿನ್ನೆಲೆಯಲ್ಲಿ ನಿಶ್ಚಿತ್ ಅವರ ಪೋಷಕರು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಮೊರೆ ಹೋಗಿದ್ದಾರೆ. ಕೇಂದ್ರ ಸರ್ಕಾರ ಮಧ್ಯಸ್ಥಿಕೆ ವಹಿಸಿ ನಿಶ್ಚಿತ್ ನನ್ನು ಸುರಕ್ಷಿತವಾಗಿ ಭಾರತಕ್ಕೆ ಕರೆ ತರಬೇಕು ಎಂದು ಕುಟುಂಬಸ್ಥರು ಮನವಿ ಮಾಡಿಕೊಂಡಿದ್ದಾರೆ ಎನ್ನುವ ಮಾಹಿತಿ ಲಭಿಸಿದೆ.

ಡೀಸೆಲ್ ಸೋರಿಕೆ: ಉರಿದು ಹೋದ ಸರ್ಕಾರಿ ಬಸ್!

ಚಿಕ್ಕಮಗಳೂರು: ಸರ್ಕಾರಿ ಬಸ್ ಡೀಸೆಲ್ ಸೋರಿಕೆಯಾಗಿ ಹೊತ್ತಿ ಉರಿದ ಘಟನೆ ಚಿಕ್ಕಮಗಳೂರಿನ ಬೇಲೂರು ರಸ್ತೆಯಲ್ಲಿರುವ ಜೂನಿಯರ್ ಕಾಲೇಜಿನ ಬಳಿ ನಡೆದಿದೆ. ಚಿಕ್ಕಮಗಳೂರಿನಿಂದ ಹಾಸನಕ್ಕೆ ತೆರಳುತ್ತಿದ್ದ ಸರ್ಕಾರಿ ಬಸ್ ವೊಂದು ಡೀಸೆಲ್ ಸೋರಿಕೆಯಾಗಿ, ಬಿಸಿಲಿನ ಬೇಗೆಗೆ ಹೊತ್ತಿ ಉರಿದಿದೆ.

ಬಸ್ ನಲ್ಲಿ 32 ಜನ ಪ್ರಯಾಣಿಕರಿದ್ದು, ಚಾಲಕನ ಮುನ್ನೆಚ್ಚರಿಕೆಯಿಂದಾಗಿ, ಎಲ್ಲರೂ ಬೆಂಕಿ ಕಾಣಿಸಿಕೊಳ್ಳುತ್ತಿದ್ದಂತೆ ಇಳಿದುದರ ಪರಿಣಾಮವಾಗಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎನ್ನುವ ಮಾಹಿತಿ ಲಭಿಸಿದೆ.‌ ವಿಷಯ ತಿಳಿದ ತಕ್ಷಣ ಸ್ಥಳಕ್ಕೆ ಆಗಮಿಸಿದ ಅಗ್ನಿಶಾಮಕದಳದ ಸಿಬ್ಬಂದಿಗಳು ಬೆಂಕಿಯನ್ನು ನಂದಿಸಿದರು ಎನ್ನುವ ಸಂಗತಿ ತಿಳಿದುಬಂದಿದೆ.‌

ಮೋದಿ ವಿರುದ್ಧಬರಹ: ಬಿಂದು ಗೌಡ ವಿರುದ್ಧ ತೀರ್ಥಹಳ್ಳಿಯಲ್ಲಿ ಕೇಸ್!
– ತೀರ್ಥಹಳ್ಳಿ ಬಿಜೆಪಿ ಯುವ ಮೋರ್ಚಾದಿಂದ ದೂರು

ತೀರ್ಥಹಳ್ಳಿ: ಪ್ರತಿನಿತ್ಯ ಜಾಲತಾಣಗಳಲ್ಲಿ ಬಿಂದು ಸಿರ ಎಂಬ ಫೇಸ್ ಬುಕ್ ಹಾಗೂ ಇನ್ನಿತರ ಜಾಲತಾಣಗಳಲ್ಲಿ ಹೆಸರಾಂಕಿತ ಬಿಂದು ಗೌಡ ಎಂಬ ಮಹಿಳೆ ನಮ್ಮ ದೇಶದ ಪ್ರಧಾನಿಯವರ ಫೋಟೋ ಬಳಸಿ ಅವಹೇಳನವಾಗಿ ಪೋಸ್ಟ್ ಮಾಡಿದ್ದಲ್ಲದೇ ಸಮಾಜದಲ್ಲಿ ಘನತೆಯುಳ್ಳ ಅನೇಕ ವ್ಯಕ್ತಿಗಳ ಹಾಗೂ ನಮ್ಮ‌ ದೇಶದ ಸಂಸ್ಕೃತಿ ವಿರುದ್ಧ ಕೆಟ್ಟಾಕೊಳಕ ಪದಗಳಿಂದ ಅವಮಾನಿಸಿ ದಿನನಿತ್ಯ ಹರಿಬಿಡುತ್ತಿದ್ದಾಳೆ.

ಇವುಗಳನ್ನ ಓದಿದವರಿಂದ ಬೈಗುಳ ಕೇಳಿಸಿಕೊಳ್ಳದೇ ದಿನ ನೆಮ್ಮದಿ ಸಿಗದ ಬಿಂದು ಗೌಡ ಅಲಿಯಾಸ್ ಬಿಂದು ಸಿರ ವಿರುದ್ಧ ಕೊನೆಗೂ ತೀರ್ಥಹಳ್ಳಿಯಲ್ಲಿ FIR ದಾಖಲಾಗಿದೆ. ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ ಸಂತೋಷ್ ದೇವಾಡಿಗ, ಪ್ರಧಾನ ಕಾರ್ಯದರ್ಶಿಗಳಾದ ಮಹಾಂತ್ ಗೌಡ, ಪ್ರದೀಪ್ ಗಬಡಿ,ಅವರು ಕಾನೂನಿನ ದಾರಿ ಹಿಡಿದು, ಕೋರ್ಟ್ ಮುಖಾಂತರ ಆದೇಶ ತಂದು, ತೀರ್ಥಹಳ್ಳಿ ಪೊಲೀಸ್ ಠಾಣೆಯಲ್ಲಿ FIR ದಾಖಲಿಸಿದ್ದಾರೆ.

Categories
ಮಾಹಿತಿ ಸುದ್ದಿ ರಾಜ್ಯ ರಾಷ್ಟ್ರೀಯ ವಾರ್ತೆ

ಪೆಟ್ರೋಲ್, ಡೀಸೆಲ್ ಬೆಲೆ ಹೆಚ್ಚಾಗುತ್ತಾ..?

ಪೆಟ್ರೋಲ್, ಡೀಸೆಲ್ ಬೆಲೆ ಹೆಚ್ಚಾಗುತ್ತಾ..?
– ಇರಾನ್ ಯುದ್ಧದ ಕಾರ್ಮೋಡ: ಎಲ್ಲಾ ದೇಶಕ್ಕೂ ಎಫೆಕ್ಟ್
– ಪೆಟ್ರೋಲ್, ಡೀಸೆಲ್ ದರಗಳು ಲೀಟರ್ ಗೆ 5 -8 ರೂ. ಹೆಚ್ಚಳ?

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ನವ ದೆಹಲಿ: ಇರಾನ್ ದೇಶವು ಪ್ರತಿಕಾರವಾಗಿ ಎಂಕೆಡಿ ವಿಯೋಮ್ ಎನ್ನುವ ತೈಲ ಟ್ಯಾಂಕರ್ ಮೇಲೆ ಡ್ರೋನ್ ಮೂಲಕ ದಾಳಿ ನಡೆಸಿದ ಘಟನೆ ಕಳೆದೆರಡು ದಿನಗಳ ಹಿಂದೆ ಸಂಭವಿಸಿತ್ತು. ಪರಿಣಾಮವಾಗಿ ತೈಲ ಸಾಗಾಟ ಕಡಿಮೆಗೊಳ್ಳುವ ಸಾಧ್ಯತೆಯಿದ್ದು, ಬೆಲೆ ಏರಿಕೆಯಾಗುವ ಸಂಭವವಿದೆ ಎಂಬ ಅಭಿಪ್ರಾಯಗಳು ಕೇಳಿ ಬರುತ್ತಿದ್ದವು.

ಇದೀಗ ಸಾರ್ವಜನಿಕರ ಕಲ್ಪನೆಯಂತೆ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಏರಿಕೆ ಕಾಣುತ್ತಿದ್ದು, ಇದರ ಜೊತೆಗೆ ದೇಶದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ದರಗಳು ಕೂಡ ಹೆಚ್ಚಳವಾಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ.‌ ನಮ್ಮ ಭಾರತವು ಒಟ್ಟು ಕಚ್ಚಾ ತೈಲದ ಅಗತ್ಯತೆಗಿಂತ ಶೇಕಡ 80ರಷ್ಟು ಹೆಚ್ಚಿನ ಭಾಗವನ್ನು ಬೇರೆ ದೇಶಗಳಿಂದ ಆಮದು ಮಾಡಿಕೊಳ್ಳುತ್ತಿರುವ ಹಿನ್ನೆಲೆಯಲ್ಲಿ, ಜಾಗತಿಕ ಮಾರುಕಟ್ಟೆಯಲ್ಲಿ ತೈಲ ಬೆಲೆಯಲ್ಲಿ ಬದಲಾವಣೆ ಉಂಟಾದಲ್ಲಿ ಅದು ದೇಶದ ಬೆಲೆಗಳ ಮೇಲೂ ಪರಿಣಾಮ ಬೀರಲಿದೆ ಎಂದು ಹೇಳಲಾಗುತ್ತಿದೆ.‌

ಆರ್ಥಿಕ ತಜ್ಞರು “ಇತ್ತೀಚೆಗೆ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಶೇಕಡ ಹತ್ತರಷ್ಟು ಏರಿಕೆಯಾಗಿರುವುದರ ಕುರಿತು ವರದಿಗಳು ಪ್ರಕಟಗೊಂಡಿದೆ. ಇದರ ಪರಿಣಾಮ ಭಾರತದ ಮೇಲು ಬೀರಲಿದ್ದು ಪೆಟ್ರೋಲ್ ಮತ್ತು ಡೀಸೆಲ್ ದರಗಳು ಲೀಟರ್ ಗೆ ಐದು ರೂಪಾಯಿಯಿಂದ ಎಂಟು ರೂಪಾಯಿಗೆ ಹೆಚ್ಚಳವಾಗುವ ಸಾಧ್ಯತೆ ಇದೆ” ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

ಭಾರತ ದೇಶಕ್ಕೆ ತೈಲವನ್ನು ಪೂರೈಸುವ ದೇಶಗಳಲ್ಲಿ ಸೌದಿ ಅರೇಬಿಯಾ ಕೂಡ ಒಂದಾಗಿದ್ದು, ಅಲ್ಲಿನ ತೈಲ ಸಂಸ್ಕರಣಾಗಾರಗಳಲ್ಲಿ ಯಾವುದೇ ರೀತಿಯ ತೊಂದರೆ ಉಂಟಾದರೆ, ಇದರಿಂದಾಗಿ ಉತ್ಪಾದನೆ ಸ್ಥಗಿತಗೊಂಡರೆ ಜಾಗತಿಕ ತೈಲ ಪೂರೈಕೆಯಲ್ಲಿ ವ್ಯತ್ಯಾಸಗಳು ಉಂಟಾಗಿ, ಬೆಲೆಗಳು ಮತ್ತಷ್ಟು ಏರಿಕೆಯಾಗುವ ಸಾಧ್ಯತೆಗಳಿರುತ್ತವೆ ಎನ್ನುತ್ತಾರೆ ವಿಶ್ಲೇಷಕರು.

ತೈಲ ದರದ ಏರಿಕೆಯಿಂದಾಗಿ ಸರಕು ಸಾಗಣೆ ವೆಚ್ಚ, ತರಕಾರಿ, ಹಾಲು ಮತ್ತು ದಿನಸಿ ಪದಾರ್ಥಗಳ ಬೆಲೆಗಳು ಸಹ ಏರಿಕೆ ಕಾಣಲಿದ್ದು ಇದು ಮಧ್ಯಮ ವರ್ಗದ ಕುಟುಂಬಗಳ ಮೇಲೆ ಆರ್ಥಿಕ ಹೊರೆಯನ್ನು ಹೆಚ್ಚಿಸಲಿದೆ ಎನ್ನಲಾಗಿದೆ. ಅಷ್ಟೇ ಅಲ್ಲದೆ ಇದು ನೇರವಾಗಿ ದೇಶದ ಹಣದುಬ್ಬರದ ಮೇಲು ತೀವ್ರತರವಾದ ಪ್ರಭಾವ ಬೀರುತ್ತದೆ.‌ ಈ ಹಿನ್ನೆಲೆಯಲ್ಲಿ ಆರ್ಥಿಕ ಸ್ಥಿರತೆಗೆ ಸವಾಲುಗಳು ಎದುರಾಗಿ, ಹೂಡಿಕೆದಾರರಲ್ಲಿ ಆತಂಕ ಸೃಷ್ಟಿಯಾಗಿ, ಷೇರು ಮಾರುಕಟ್ಟೆಯಲ್ಲೂ ಅಸ್ಥಿರತೆ ಕಂಡು ಬರಲಿದೆ. ಇದಕ್ಕೆ ಸಂಬಂಧಿಸಿದಂತೆ ದೇಶದ ಪ್ರಜೆಗಳ ಗಮನ ಸರ್ಕಾರ ಕೈಗೊಳ್ಳುವ ಕ್ರಮಗಳ ಮೇಲೆ ಕೇಂದ್ರೀಕರಿಸಿದೆ.|

Categories
ಕ್ರೀಡಾ ಸುದ್ದಿ ತೀರ್ಥಹಳ್ಳಿ ಪ್ರತಿಭೆಗಳು ಮಲ್ನಾಡ್ ಶಿವಮೊಗ್ಗ

ಥೈಲ್ಯಾಂಡಿನಲ್ಲಿ ಕ್ಲೀಯೋನ್ ಫ್ಯಾಬೀಯೋ ಮಾರ್ಟೀಸ್ ಸಾಧನೆ

ಥೈಲ್ಯಾಂಡಿನಲ್ಲಿ ಕ್ಲೀಯೋನ್ ಫ್ಯಾಬೀಯೋ ಮಾರ್ಟೀಸ್ ಸಾಧನೆ
– ತೀರ್ಥಹಳ್ಳಿಯ ಇಂದಿರಾನಗರದಲ್ಲಿರುವ ಸೈಂಟ್ ಮೇರಿಸ್ ಆಂಗ್ಲ ಮಾಧ್ಯಮ ಶಾಲೆಯ ವಿದ್ಯಾರ್ಥಿ
– ಎಂ ಜೆ ಸ್ಕೂಲ್ ಓಫ್ ಮಾರ್ಟಿಯಲ್ ಆರ್ಟ್ಸ್ ಮೂವರು ಮಕ್ಕಳ ಸಾಧನೆ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ತೀರ್ಥಹಳ್ಳಿ: ಥೈಲ್ಯಾಂಡಿನ ರತನ್ ಬುಂದಿತ್ ವಿಶ್ವವಿದ್ಯಾನಿಲಯದಲ್ಲಿ ಏರ್ಪಡಿಸಿದ್ದ ಅಂತರರಾಷ್ಟ್ರೀಯ ಕರಾಟೆ ಚಾಂಪಿಯನ್ ಶಿಪ್ ನಲ್ಲಿ ತೀರ್ಥಹಳ್ಳಿಯ ಇಂದಿರಾನಗರದಲ್ಲಿರುವ ಸೈಂಟ್ ಮೇರಿಸ್ ಆಂಗ್ಲ ಮಾಧ್ಯಮ ಶಾಲೆಯ ನಾಲ್ಕನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಕ್ಲೀಯೋನ್ ಫ್ಯಾಬಿಯೋ ಮಾರ್ಟಿಸ್ ಅವರು ಭಾರತ ದೇಶವನ್ನು ಪ್ರತಿನಿಧಿಸಿ, ಅತ್ಯುತ್ತಮ ಪ್ರದರ್ಶನವನ್ನು ನೀಡುವ ಮೂಲಕ ಒಂದು ಚಿನ್ನ ಮತ್ತು ಒಂದು ಬೆಳ್ಳಿ ಪದಕಕ್ಕೆ ಕೊರಳೊಡ್ಡಿದ್ದಾರೆ.

ಕ್ಲೀಯೋನ್ ಅವರು ಎಂ.ಜೆ. ಸ್ಕೂಲ್ ಆಫ್ ಮಾರ್ಷಿಯಲ್ ಆರ್ಟ್ಸ್ ಕರಾಟೆ ಶಾಲೆಯ ವಿದ್ಯಾರ್ಥಿಯಾಗಿದ್ದು, ದೊಡ್ಡಮನೆಕೇರಿಯ ನಿವಾಸಿಗಳಾದ ಕ್ಲೇವನ್ ಮತ್ತು ಮಾರ್ಟಿಸ್ ದಂಪತಿಗಳ ಪುತ್ರರಾಗಿದ್ದಾರೆ. ಕರ್ನಾಟಕದಿಂದ ಭಾರತ ದೇಶವನ್ನು ಪ್ರತಿನಿಧಿಸಿ, ತಮ್ಮ ಸಾಧನೆಯ ಮೂಲಕ ಮಲೆನಾಡಿಗೆ ಕೀರ್ತಿಯನ್ನು ತಂದ ಕ್ಲೀಯೋನ್ ಅವರಿಗೆ ತೀರ್ಥಹಳ್ಳಿಯ ಸೈಂಟ್ ಮೇರಿಸ್ ಶಾಲೆಯ ಆಡಳಿತ ಮಂಡಳಿ, ಮುಖ್ಯ ಶಿಕ್ಷಕರು ಮತ್ತು ಶಿಕ್ಷಕ ವೃಂದದವರು ಹೃದಯಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ.

ಮೂವರು ಮಕ್ಕಳ ಸಾಧನೆಗೆ ಎಲ್ಲೆಡೆ ಪ್ರಶಂಸೆ

ಥೈಲ್ಯಾಂಡಿನ ರತನ್ನ ಬುಂದಿತ್ ಯೂನಿವರ್ಸಿಟಿಯಲ್ಲಿ ಫೆ.15ರಂದು ನಡೆದ ಅಂತರ ರಾಷ್ಟ್ರೀಯ ಕರಾಟೆ ಚಾಮಿನ್ಶಿಪ್ನಲ್ಲಿ ತೀರ್ಥಹಳ್ಳಿ ಎಂ ಜೆ ಸ್ಕೂಲ್ ಓಫ್ ಮಾರ್ಟಿಯಲ್ ಆರ್ಟ್ಸ್ ನ ಮೂವರು ವಿದ್ಯಾರ್ಥಿಗಳು, ಕರ್ನಾಟಕ ಕರಾಟೆ ಅಸೋಸಿಯೇಷನ್ ವತಿಯಿಂದ ಭಾರತವನ್ನು ಪ್ರತಿನಿಧಿಸಿ, ಅದರಲ್ಲಿ ತೀರ್ಥಹಳ್ಳಿ ಪಟ್ಟಣದ ಸೊಪ್ಪುಗುಡ್ಡೆ ಮಹಾಬಲಾ ಜೋಯ್ಸ್ ದಂಪತಿಗಳ ಪುತ್ರಿ ಸಾನ್ವಿ ಜೋಯ್ಸ್ 1 ಬಂಗಾರ 1ಬೆಳ್ಳಿ , ದೊಡ್ಡಮನೆಕೇರಿ ಕ್ಲೇವನ್ ಮಾರ್ಟಿಸ್ ದಂಪತಿಗಳ ಪುತ್ರ ಕ್ಲೀಯೋನ್ ಫ್ಯಾಬೀಯೋ ಮಾರ್ಟೀಸ್ ಒಂದು ಬಂಗಾರ ಹಾಗೂ ಒಂದು ಬೆಳ್ಳಿ, ಕುವೆಂಪು ಲೇಔಟ್ ರವಿನಂದನ್ ದಂಪತಿಗಳ ಪುತ್ರ ರಾಹುಲ್ ಭಾರಧ್ವಜ್ 2 ಬೆಳ್ಳಿ ಪದಕಗಳೊಂದಿಗೆ, ತಾಲ್ಲೂಕು, ಜಿಲ್ಲೆ, ಕರ್ನಾಟಕ ಹಾಗೂ ದೇಶಕ್ಕೆ ಕೀರ್ತಿ ತಂದಿರುತ್ತಾರೆ.

Categories
ಉತ್ತರ ಕನ್ನಡ ಪ್ರಶಸ್ತಿ ರಾಜ್ಯ

ಉತ್ತರ ಕನ್ನಡ ಜಿಲ್ಲಾ ಪ್ರಮುಖ ಸುದ್ದಿ

ಉತ್ತರ ಕನ್ನಡ ಜಿಲ್ಲಾ ಪ್ರಮುಖ ಸುದ್ದಿ

ಬಂಗಾರಮಕ್ಕಿ ಕ್ಷೇತ್ರಕ್ಕೆ ಕ್ರಿಕೆಟಿಗ ಕೆ.ಎಲ್. ರಾಹುಲ್ ಭೇಟಿ
– ಮಲೆನಾಡಿನ ಪ್ರಸಿದ್ಧ ಕಾರಣಿಕ ಕ್ಷೇತ್ರದ ಮಹಿಮೆ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಹೊನ್ನಾವರ: ಭಾರತೀಯ ಅಂತರಾಷ್ಟ್ರೀಯ ಕ್ರಿಕೆಟ್ ತಂಡದ ತಾರೆ ಹಾಗೂ ಕನ್ನಡಿಗ ಕೆ.ಎಲ್. ರಾಹುಲ್ ಅವರು ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಸುಪ್ರಸಿದ್ಧ ಪುಣ್ಯಕ್ಷೇತ್ರವಾದ ಗೆರುಸೊಪ್ಪಾದ ಬಂಗಾರಮಕ್ಕಿಗೆ ಭಾನುವಾರ ಭೇಟಿ ನೀಡಿ ದೇವರ ಆಶೀರ್ವಾದ ಪಡೆದರು.

ಕ್ಷೇತ್ರಕ್ಕೆ ಆಗಮಿಸಿದ ಅವರು, ಇಲ್ಲಿನ ಆರಾಧ್ಯ ದೈವ ಶ್ರೀ ವೀರಾಂಜನೇಯ ಸ್ವಾಮಿಗೆ ವಿಶೇಷ ಪೂಜೆ ಸಲ್ಲಿಸಿದರು. ನಂತರ ಕ್ಷೇತ್ರದ ಧರ್ಮದರ್ಶಿಗಳಾದ ಶ್ರೀ ಮಾರುತಿ ಗುರೂಜಿಯವರನ್ನು ಖುದ್ದಾಗಿ ಭೇಟಿ ಮಾಡಿದ ರಾಹುಲ್, ಅವರೊಟ್ಟಿಗೆ ಕೆಲ ಹೊತ್ತು ಸಮಾಲೋಚನೆ ನಡೆಸಿ, ಆಶೀರ್ವಾದ ಪಡೆದುಕೊಂಡರು. ಸ್ಟಾರ್ ಕ್ರಿಕೆಟಿಗನ ಭೇಟಿ ಕ್ಷೇತ್ರದ ಭಕ್ತರು ಹಾಗೂ ಅಭಿಮಾನಿಗಳಲ್ಲಿ ಸಂತಸ ಮೂಡಿಸಿದೆ.

ನವ ದೆಹಲಿಯಲ್ಲಿ ಚಿನ್ನ ಗೆದ್ದ ಕನ್ನಡದ ಹುಡುಗ!
– ಸಮರ್ಥ್ ಜೆ ರಾವ್ ಅವರಿಗೆ ಅಖಿಲ ಭಾರತ ನಾಗರಿಕ ಸೇವಾ ಚೆಸ್ ಪಂದ್ಯಾವಳಿಯಲ್ಲಿ ಪ್ರಶಸ್ತಿ

ನವದೆಹಲಿ: ಅಂತಾರಾಷ್ಟ್ರೀಯ ಚೆಸ್ ಕ್ರೀಡಾಪಟು ಸಮರ್ಥ್ ಜೆ ರಾವ್ ಅವರು ನವದೆಹಲಿಯ ತ್ಯಾಗರಾಜ್ ಸ್ಟೇಡಿಯಂನಲ್ಲಿ ಇತ್ತೀಚಿಗೆನಡೆದ ಅಖಿಲ ಭಾರತ ನಾಗರಿಕ ಸೇವಾ ಚೆಸ್(AICS2025-26) ಪಂದ್ಯಾವಳಿಯಲ್ಲಿ ಪ್ರಾದೇಶಿಕ ಕ್ರೀಡಾ ಮಂಡಳಿ ಬೆಂಗಳೂರು ತಂಡವನ್ನು ಪ್ರತಿನಿಧಿಸಿ ಭಾಗವಹಿಸಿದರು.

ತಂಡ ಚಾಂಪಿಯನ್‌ಶಿಪ್‌ನಲ್ಲಿ ಅವರು 6 ಸುತ್ತುಗಳಲ್ಲಿ 5.5 ಅಂಕಗಳನ್ನು ಗಳಿಸಿದರು ಮತ್ತು ಅವರ ತಂಡ 13ನೇ ಸ್ಥಾನವನ್ನು ಪಡೆದುಕೊಂಡಿತು. ವೈಯಕ್ತಿಕ ಚಾಂಪಿಯನ್‌ಶಿಪ್‌ನಲ್ಲಿ, ಸಮರ್ಥ್ 9 ಸುತ್ತುಗಳಲ್ಲಿ 7 ಅಂಕಗಳನ್ನು ಗಳಿಸಿ ಅಂತಿಮ ಶ್ರೇಯಾಂಕದಲ್ಲಿ 5ನೇ ಸ್ಥಾನವನ್ನು ಪಡೆದರು.

ಇದಲ್ಲದೆ, ಅವರು ಅತ್ಯುತ್ತಮ ವಿಶೇಷ ಸಾಮರ್ಥ್ಯವುಳ್ಳ ಆಟಗಾರನಿಗೆ ನೀಡಲಾಗುವ ಚಿನ್ನದ ಪದಕವನ್ನು ಗೆದ್ದಿದ್ದಾರೆ. ಸಮರ್ಥ್ ಅವರ ಈ ಸಾಧನೆಯು ಅವರ ಕಠಿಣ ಪರಿಶ್ರಮ ಮತ್ತು ಚೆಸ್ ಆಟದ ಬಗ್ಗೆ ಅವರ ಸಮರ್ಪಣೆಗೆ ಸಾಕ್ಷಿಯಾಗಿದೆ. ಅವರ ಈ ಯಶಸ್ಸು ಕರ್ನಾಟಕ ರಾಜ್ಯಕ್ಕೆ ಮತ್ತು ಪ್ರಾದೇಶಿಕ ಕ್ರೀಡಾ ಮಂಡಳಿ ಬೆಂಗಳೂರಿಗೆ ಹೆಮ್ಮೆ ತಂದಿದೆ.

Categories
ಚಿಕ್ಕಮಗಳೂರು ಮಲ್ನಾಡ್ ಶೃಂಗೇರಿ

ಶೃಂಗೇರಿ ಟಾಪ್ ನ್ಯೂಸ್

ಶೃಂಗೇರಿ ಟಾಪ್ ನ್ಯೂಸ್

ಶೃಂಗೇರಿ ಸರ್ಕಾರಿ ಆಸ್ಪತ್ರೆ ಅವ್ಯವಸ್ಥೆ ವಿರುದ್ಧ ಹೋರಾಟ!

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಶೃಂಗೇರಿ:
ಶೃಂಗೇರಿ ತಾಲ್ಲೂಕಿನ ಸರ್ಕಾರಿ ಆಸ್ಪತ್ರೆಯಲ್ಲಿನ ಅವ್ಯವಸ್ಥೆ ಮತ್ತು ವೈದ್ಯರ ಕೊರತೆಗೆ ಸಂಬಂಧಿಸಿದಂತೆ ಸೋಮವಾರದಂದು ಬಿಜೆಪಿ ಪಕ್ಷದ ವತಿಯಿಂದ ಪ್ರತಿಭಟನೆಯನ್ನು ನಡೆಸಲಾಯಿತು.

ಶೃಂಗೇರಿ ತಾಲೂಕಿನಲ್ಲಿ ವೈದ್ಯರ ಕೊರತೆಯಿಂದಾಗಿ ಜನರಿಗೆ ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ದೊರಕುತ್ತಿಲ್ಲ, ಅಲ್ಲದೆ ಅವ್ಯವಸ್ಥೆಯಿಂದಾಗಿ ಕಾಯಿಲೆ ವಾಸಿಯಾಗುವ ಬದಲು, ಉಲ್ಬಣಗೊಳ್ಳುವಂತಹ ಪರಿಸ್ಥಿತಿ ನಿರ್ಮಾಣವಾದಂತಿದೆ. ಇದಕ್ಕೆ ಸಂಬಂಧಿಸಿದಂತೆ ಕೆಲವು ತಿಂಗಳುಗಳ ಹಿಂದೆ ಪ್ರತಿಭಟನೆಯನ್ನು ನಡೆಸಲಾಗಿತ್ತು.

ಈ ಹಿನ್ನೆಲೆಯಲ್ಲಿ ಸಂಬಂಧಿತ ಇಲಾಖೆಯು 2 ತಿಂಗಳುಗಳ ಕಾಲ ಸಮಯಾವಕಾಶವನ್ನು ಕೇಳಿತ್ತು.‌ ಆದರೆ, ಆಸ್ಪತ್ರೆಗೆ ಸಂಬಂಧಿಸಿದಂತೆ ಈ 5 ತಿಂಗಳಲ್ಲಿ ಯಾವುದೇ ರೀತಿಯ ಬದಲಾವಣೆ ಕಂಡುಬಾರದಿರುವ ಕಾರಣ ಪುನಃ ಪ್ರತಿಭಟನೆ ಮಾಡಲಾಗಿದೆ ಎಂದು ಬಿಜೆಪಿ ಪಕ್ಷದ ಪ್ರಮುಖರಾದ ಬಿಜೆಪಿ ಪಕ್ಷದ ತಾಲ್ಲೂಕು ಅಧ್ಯಕ್ಷರಾದ ಉಮೇಶ್ ತಲಗಾರು, ನೂತನ್ ಕುಮಾರ್, ವೇಣುಗೋಪಾಲ್, ಹರೀಶ್ ಶೆಟ್ಟಿ, ಶೃಂಗೇರಿ ಶಿವಣ್ಣ, ರಾಘವೇಂದ್ರ ಹಂಚಲಿ, ಅಂಗುರ್ಡಿ ದಿನೇಶ್ ಸೇರಿದಂತೆ ಇತರರು ತಿಳಿಸಿದ್ದಾರೆ.

• ಶೃಂಗೇರಿಯಲ್ಲಿ 2 ದಿನಗಳ ಅವರೇಬೇಳೆ ಮೇಳ

ಶೃಂಗೇರಿ: ಶೃಂಗೇರಿಯಲ್ಲಿ ಇದೇ ಮೊದಲ ಬಾರಿಗೆ, ಮಾರ್ಚ್ 3ರ ಮಂಗಳವಾರ ಹಾಗೂ 4ರ ಬುಧವಾರದಂದು ಕಾಳಿಕಾಂಬ ರಸ್ತೆಯಲ್ಲಿರುವ ಈಡಿಗರ ಭವನದಲ್ಲಿ ಅವರೇಬೇಳೆ ಮೇಳ ಮತ್ತು ಜೀವನಶೈಲಿ ಪ್ರದರ್ಶನವನ್ನು ಶ್ರೀಸಾಯಿ ಇವೆಂಟ್ಸ್ ವತಿಯಿಂದ ಹಮ್ಮಿಕೊಳ್ಳಲಾಗಿದೆ.

ಅವರೇಬೇಳೆಯಿಂದ ತಯಾರಿಸಲಾದ ವಿವಿಧ ಬಗೆಯ ರುಚಿಕರ ಖಾದ್ಯಗಳ ಸವಿಯೊಂದಿಗೆ, ಸೀರೆಗಳು ಕುರ್ತಾಗಳು, ಆಭರಣಗಳು, ಜರ್ಮನ್ ಸಿಲ್ವರ್ ಪೂಜಾ ಸಾಮಗ್ರಿಗಳು, ಸುಂದರ ಕಸೂತಿಯುಳ್ಳ ಕೈಚೀಲಗಳು, ಚನ್ನಪಟ್ಟಣದ ಗೊಂಬೆಗಳು, ಪ್ರಸಾಧನ ವಸ್ತುಗಳು ಶೇಕಡ 20 ರಿಂದ ಶೇಕಡ 70ರಷ್ಟು ರಿಯಾಯಿತಿ ದರದಲ್ಲಿ ಲಭ್ಯವಿದೆ. ಜೊತೆಗೆ ಹಳೆಯ ರೇಷ್ಮೆಸೀರೆಗಳನ್ನು ನೀಡಿದಲ್ಲಿ, ಒಳ್ಳೆ ಬೆಲೆ ಕೂಡ ನೀಡಲಿದ್ದಾರೆ. ಈ ಸುವರ್ಣಕಾವಕಾಶವನ್ನು ಸದುಪಯೋಗಪಡಿಸಿಕೊಳ್ಳಿ ಎಂದು ಶ್ರೀಸಾಯಿ ಇವೆಂಟ್ಸ್ ಅವರು ಪ್ರಕಟಣೆಯ ಮೂಲಕ ತಿಳಿಸಿದ್ದಾರೆ.

Categories
ತೀರ್ಥಹಳ್ಳಿ ಮಲ್ನಾಡ್ ಶಿವಮೊಗ್ಗ

ತೀರ್ಥಹಳ್ಳಿ ಮುಜುರಾಯಿ ದೇವಸ್ಥಾನ ಅರ್ಚಕರ–ಆಗಮಿಕರ ಒಕ್ಕೂಟದ ಸರ್ವ ಸದಸ್ಯರ ಸಭೆ

ತೀರ್ಥಹಳ್ಳಿ ಮುಜುರಾಯಿ ದೇವಸ್ಥಾನ ಅರ್ಚಕರ–ಆಗಮಿಕರ ಒಕ್ಕೂಟದ ಸರ್ವ ಸದಸ್ಯರ ಸಭೆ
– 168 ಮುಜರಾಯಿ ದೇವಾಲಯಗಳ ಅರ್ಚಕರ ಸಮಾಗಮ
– ಒಂದು ವರ್ಷದಲ್ಲಿ ಸಂಘಟನೆ ಅಭಿವೃದ್ಧಿ ಕೆಲಸ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ತೀರ್ಥಹಳ್ಳಿ: ತೀರ್ಥಹಳ್ಳಿ ತಾಲೂಕು ಮುಜುರಾಯಿ ದೇವಸ್ಥಾನ ಅರ್ಚಕರ–ಆಗಮಿಕರ ಒಕ್ಕೂಟದ ಸರ್ವ ಸದಸ್ಯರ ಸಭೆ ತೀರ್ಥಹಳ್ಳಿಯ ಗಾಯತ್ರಿ ಮಂದಿರದಲ್ಲಿ ಯಶಸ್ವಿಯಾಗಿ ನಡೆಯಿತು. ಈ ಸಭೆಯಲ್ಲಿ ಒಕ್ಕೂಟದ ಕಾರ್ಯದರ್ಶಿಗಳಾದ ದರ್ಶನ್ ಬಾಯರ್ ಅವರು ಎಲ್ಲರನ್ನು ಸ್ವಾಗತಿಸಿ, ಪ್ರಾಸ್ತಾವಿಕ ನುಡಿಯಲ್ಲಿ ಒಕ್ಕೂಟವು ಕಳೆದ ಒಂದು ವರ್ಷದಲ್ಲಿ ನಡೆದು ಬಂದ ಹಾದಿ ಹಾಗೂ ಕೈಗೊಂಡ ಕಾರ್ಯಚಟುವಟಿಕೆಗಳನ್ನು ವಿವರಿಸಿದರು.

ಸಂಘಟನಾ ಕಾರ್ಯದರ್ಶಿಯಾದ ರಾಕೇಶ್ ಭಟ್ ಅವರು ನಿರೂಪಣೆ ಮಾಡುತ್ತಾ, ಪ್ರತಿ ತಿಂಗಳು ಶ್ರೀ ರಾಮಚಂದ್ರಪುರ ಮಠದ ಆವರಣದಲ್ಲಿ ಸಭೆ ಸೇರಿ ಅರ್ಚಕರ ಕುಂದುಕೊರತೆಗಳನ್ನು ನಿವಾರಿಸಲು ಪ್ರಯತ್ನಿಸುತ್ತಿರುವುದಾಗಿ ತಿಳಿಸಿದರು. ಈ ಹಿಂದೆ ಒಕ್ಕೂಟದ ಉದ್ಘಾಟನೆಗೆ ಆಗಮಿಸಿದ್ದ ಜಿಲ್ಲಾಧ್ಯಕ್ಷರು ಹಾಗೂ ರಾಜ್ಯ ಕಾರ್ಯದರ್ಶಿಗಳಾದ ಕೆ ಎಸ್ ಎನ್ ದೀಕ್ಷಿತ್ ಅವರ ಮಾರ್ಗದರ್ಶನದಲ್ಲಿ ಸಂಘಟನೆಯು ಹಲವು ದಿಟ್ಟ ಹೆಜ್ಜೆಗಳನ್ನು ಇಟ್ಟಿದೆ ಎಂದರು.

ಕಾರ್ಯಕ್ರಮದಲ್ಲಿ ಅರ್ಚಕರಿಗೆ ಐಡಿ ಕಾರ್ಡ್ ವಿತರಣೆ, ತಸ್ತಿಕ್ ಹಣ ವಿತರಣೆ, ತಾತ್ಕಾಲಿಕ ನೇಮಕಾತಿ ಪತ್ರ ನೀಡಿಕೆ, ಡಿಬಿಟಿ ಅರ್ಜಿ ಸಲ್ಲಿಕೆ ಹಾಗೂ ಹೊಸ ನೇಮಕಾತಿ ಪ್ರಕ್ರಿಯೆ ಮುಂತಾದ ಕಾರ್ಯಗಳು ನಡೆದಿರುವುದಾಗಿ ತಿಳಿಸಿದರು. ತಾಲೂಕು ಒಕ್ಕೂಟದ ಅಧ್ಯಕ್ಷರಾದ ರಾಘವೇಂದ್ರ ಭಟ್ ಅವರು ಮಾತನಾಡಿ, ಸಂಘಟನೆಯ ಮುಂದಿನ ಯೋಜನೆಗಳನ್ನು ವಿವರಿಸಿ, ಒಕ್ಕೂಟದ ಬಲವರ್ಧನೆಗಾಗಿ ವಾರ್ಷಿಕ ಸದಸ್ಯತ್ವ ಶುಲ್ಕ ಸಂಗ್ರಹಿಸಲು ಎಲ್ಲರ ಸಹಕಾರ ಕೋರಿದರು.

168 ಮುಜರಾಯಿ ದೇವಾಲಯ: ತೀರ್ಥಹಳ್ಳಿ ತಾಲೂಕಿನಲ್ಲಿ ಸುಮಾರು 168 ಮುಜರಾಯಿ ದೇವಾಲಯಗಳು ಇರುವುದಾಗಿ ತಿಳಿಸಿ, ಒಕ್ಕೂಟದ ವತಿಯಿಂದ ರಕ್ತದಾನ ಶಿಬಿರ ಏರ್ಪಡಿಸುವುದಾಗಿ ತಿಳಿಸಿದರು. ಅನಾರೋಗ್ಯ ಪೀಡಿತ ಹಾಗೂ ಶುಭ–ಅಶುಭ ಸಂದರ್ಭಗಳಲ್ಲಿ ಅರ್ಚಕರಿಗೆ ನೆರವಾಗಲು ದಾನಿಗಳ ಸಹಕಾರ ಕೋರಿದರು.

ಶೀಘ್ರದಲ್ಲೇ ಜಿಲ್ಲಾ ಒಕ್ಕೂಟದ ಸಮಾವೇಶ ನಡೆಯಲಿದ್ದು, ಅದನ್ನು ಯಶಸ್ವಿಗೊಳಿಸಲು ಎಲ್ಲ ಸದಸ್ಯರ ಸಹಭಾಗಿತ್ವ ಕೋರಿದರು. ಇದೇ ಸಂದರ್ಭದಲ್ಲಿ 2ನೇ ಹಂತದ ಐಡಿ ಕಾರ್ಡ್‌ಗಳನ್ನು ವಿತರಿಸಲಾಯಿತು. ಕೊನೆಯಲ್ಲಿ ಸರ್ವರಿಗೂ ವಂದನೆ ಸಲ್ಲಿಸಲಾಯಿತು. ಸಭೆಯಲ್ಲಿ ಅರವಿಂದ್ ಅಕ್ಲಾಪುರ, ಹರೀಶ್ ಡಿ.ಬಿ., ನಾಗರಾಜ್ ಹೋರಣೆಬೈಲು ಮುಂತಾದ ಅರ್ಚಕರು ಉಪಸ್ಥಿತರಿದ್ದರು.

Categories
ಅಡಿಕೆ-ದರ ಮಲ್ನಾಡ್ ಮಾಹಿತಿ

ಮಲೆನಾಡು ಅಡಿಕೆ ದರ

ಮಲೆನಾಡು ಅಡಿಕೆ ದರ

03-03-2026

ಸರಕು : 56100-78600-95240

ಬೆಟ್ಟೆ : 50109-63000-64599

ರಾಶಿ : 48009-55600-57259

ಗೊರಬಲು : 26019-37300-41299

Categories
ಕರಾವಳಿ ಕುಂದಾಪುರ

ವಂಡ್ಸೆ ಜಡ್ಡು ಮನೆಯಲ್ಲಿ ಕಟೀಲು ಯಕ್ಷಗಾನ ಸಂಭ್ರಮ!

ವಂಡ್ಸೆ ಜಡ್ಡು ಮನೆಯಲ್ಲಿ ಕಟೀಲು ಯಕ್ಷಗಾನ ಸಂಭ್ರಮ!
– ಪ್ರಧಾನ ಅರ್ಚಕ ವಂಶಸ್ಥ ಪ್ರಸನ್ನ ಅಸರಣ್ಣ, ಕಟೀಲು ಮೇಳದ ಪ್ರಬಂಧಕ ಜನಾರ್ಧನ್ ಕೊಕ್ಕಡ, ದೈವ ಪಾತ್ರಿ ಸೀನ ಪೂಜಾರಿ ಅವರಿಗೆ ಗೌರವ
– ಕಲಾಭಿಮಾನಿಗಳನ್ನು ರಂಜಿಸಿದ ಕಟೀಲು ಮೇಳದ ಕಲಾವಿದರು

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ವಂಡ್ಸೆ (ಕುಂದಾಪುರ): ಕಟೀಲು ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ಯಕ್ಷಗಾನ ಮಂಡಳಿ ಕಟೀಲು ಇವರಿಂದ ಶ್ರೀಮತಿ ಲಕ್ಷ್ಮಿ ಮತ್ತು ಮುತ್ತ ಪೂಜಾರಿ ಶ್ರೀ ತಾಯಿ ನಿಲಯ ವಂಡ್ಸೆ ಜಡ್ಡು ಮನೆಯ ವಠಾರದಲ್ಲಿ ಶ್ರೀಮತಿ ಆಶಾ ಮತ್ತು ಮಂಜುನಾಥ್ ಪೂಜಾರಿ ಹಾಗೂ ಮಕ್ಕಳ ಹರಕೆ ಬಯಲಾಟದಲ್ಲಿ ಪ್ರಧಾನ ಅರ್ಚಕ ವಂಶಸ್ಥರಾದ ಪ್ರಸನ್ನ ಅಸರಣ್ಣ ಹಾಗೂ ಸೇವಾ ಕರ್ತರ ಪೂಜ್ಯ ಗೌರವ ಸಮರ್ಪಣೆ ಮಾಡಲಾಯಿತು.

ಗಣ್ಯ ಉಪಸ್ಥಿತಿಯಲ್ಲಿ ಕಟೀಲು ಮೇಳದಲ್ಲಿ ಹಲವಾರು ವರ್ಷಗಳ ಕಾಲ ವಿವಿಧ ವೇಷಗಳನ್ನು ತನ್ನದೇ ವಿಶಿಷ್ಟ ಶೈಲಿಯಲ್ಲಿ ಪೂರೈಸಿ ಕಲಾಭಿಮಾನಿಗಳನ್ನು ರಂಜಿಸಿ ಪ್ರಸ್ತುತ ಕಟೀಲು ಮೇಳದ ಪ್ರಬಂಧಕರಾದ ಜನಾರ್ಧನ್ ಕೊಕ್ಕಡ ಹಾಗೂ ಕುಟುಂಬದ ದೈವ ಪಾತ್ರಿಗಳು ಹಲವಾರು ವರ್ಷಗಳಿಂದ ಶ್ರೀ ಸ್ವಾಮಿ ಮೂಡುರ ಹೈಗುಳಿ, ಮಾಸ್ತಿ, ಪಂಜುರ್ಲಿ, ಚಿಕ್ಕು ಗರಡಿ ದೈವಸ್ಥಾನ ಕುಂಟನೇರ್ಲ್ ದೈವಗಳ ಸೇವೆ ನಿರಂತರವಾಗಿ ಮಾಡುತ್ತಾ ಬಂದಿರುವ ಸೀನ ಪೂಜಾರಿ ಇವರಿಗೆ ಕುಟುಂಬದ ಪರವಾಗಿ ಗೌರವ ಪೂರ್ವಕ ಸನ್ಮಾನ ಮಾಡಲಾಯಿತು.

ಸೇವಾ ಕರ್ತರು ಹಾಗೂ ಸನ್ಮಾನಿತರು ಮತ್ತು ಕುಟುಂಬಕರಿಗೆ ಕಟೀಲು ತಾಯಿ ಭ್ರಮರಂಬೆಯ ಆಶೀರ್ವಚನ ನೀಡುವುದರ ಮೂಲಕ ಶುಭ ಕೋರಿ ಹರಸಿದರು. ನಂತರ ಕ್ಷೇತ್ರಕಥೆ ಸಾರುವ ಕಟೀಲು ಕ್ಷೇತ್ರ ಮಹಾತ್ಮೆ ಪ್ರಸಂಗವನ್ನು ಸಹಸ್ರಾರು ಜನರ ಪ್ರೇಕ್ಷಕರ ಮುಂದೆ ವಿಜೃಂಭಣೆಯಿಂದ ಯಕ್ಷಗಾನ ಹರಕೆ ಬಯಲಾಟ ನೆರವೇರಿತು.

Categories
ಮಾಹಿತಿ ಸುದ್ದಿ ರಾಜ್ಯ

ಚಂದ್ರಗ್ರಹಣ ಮಾಟ ಮಂತ್ರ ಯಂತ್ರ ಪ್ರಯೋಗ ಎಚ್ಚರ..!! ಭಯ ಬೇಡ ಹೀಗೆ ಮಾಡಿ

ಚಂದ್ರಗ್ರಹಣ ಮಾಟ ಮಂತ್ರ ಯಂತ್ರ ಪ್ರಯೋಗ ಎಚ್ಚರ..!! ಭಯ ಬೇಡ ಹೀಗೆ ಮಾಡಿ

ಹೋಳಿ ಹುಣ್ಣಿಮೆ ಚಂದ್ರಗ್ರಹಣದ ಸೂತಕದ ಸಮಯದಲ್ಲಿ ಪಠಿಸಬೇಕಾದ ಮಂತ್ರಗಳು

ಹುಣ್ಣಿಮೆಯ ದಿನವನ್ನು ಭಗವಾನ್ ಚಂದ್ರನ ಪ್ರಾಬಲ್ಯದ ದಿನವೆಂದು ಪರಿಗಣಿಸಲಾಗುತ್ತದೆ. ಅದಕ್ಕಾಗಿಯೇ ಹುಣ್ಣಿಮೆಯ ದಿನದಂದು ದೈವಿಕ ಶಕ್ತಿಗಳ ಶಕ್ತಿ ಹೆಚ್ಚಾಗಿರುತ್ತದೆ ಮತ್ತು ಯಾವುದೇ ದುಷ್ಟ ಶಕ್ತಿಗಳು ನಮಗೆ ಹಾನಿ ಮಾಡಲು ಸಾಧ್ಯವಿಲ್ಲ ಎಂದು ಹೇಳಲಾಗುತ್ತದೆ. ಮತ್ತು ಅದಕ್ಕಾಗಿಯೇ ಹೋಳಿಹುಣ್ಣಿಮೆಯ ದಿನದಂದು ಎಲ್ಲಾ ದೇವಾಲಯಗಳಲ್ಲಿ ವಿಶೇಷ ಅಭಿಷೇಕಗಳು ಮತ್ತು ಪೂಜೆಗಳನ್ನು ಮಾಡಲಾಗುತ್ತದೆ. ಅಂತಹ ಹುಣ್ಣಿಮೆಯ ದಿನದಂದು ಚಂದ್ರಗ್ರಹಣ ಸಂಭವಿಸುತ್ತದೆ.

ಶ್ರೀ ಕ್ಷೇತ್ರ ಕಟೀಲು ದುರ್ಗಾಪರಮೇಶ್ವರೀ ದೇವಸ್ಥಾನ
ಅನುಭವಿಕ ಶ್ರೇಷ್ಠ ವಿದ್ಯೆಗಳನ್ನು ಬೋಧಿಸುವ
ದೈವಜ್ಞ ಪ್ರಧಾನ್ ತಾಂತ್ರಿಕ್ ಜ್ಞಾನೇಶ್ವರ್ ರಾವ್ ತಂತ್ರಿ
ನಿಮ್ಮ ಜೀವನದ ಯಾವುದೇ ಗುಪ್ತ,ಪ್ರೀತಿ-ಪ್ರೇಮ ದಾಂಪತ್ಯ,ವೈವಾಹಿಕ,ವ್ಯವಹಾರಿಕ ಎಂತಹ ಸಮಸ್ಯೆಗಳೇ ಇದ್ದರೂ ಆ ಸಮಸ್ಯೆಗಳಿಗೆ ದೈವಿಕ ವಿಧಿವಿಧಾನದ ಶಾಸ್ತ್ರೋವಾದ ಮಾರ್ಗವನ್ನು ಕೆಲವೇ ಗಂಟೆಯಲ್ಲಿ ಪೋನಿನ ಮೂಲಕ ಶಾಶ್ವತವಾಗಿ ಪರಿಹಾರ ತಿಳಿಸಿಕೊಡುತ್ತಾರೆ  ತಪ್ಪದೆ ಕರೆ ಮಾಡಿ 85489 98564

ಚಂದ್ರಗ್ರಹಣದ ಸಮಯದಲ್ಲಿ ನಾವು ಮಾಡುವ ಪೂಜೆಯು ಅಸಾಧಾರಣ ಶಕ್ತಿಯನ್ನು ಹೊಂದಿರುತ್ತದೆ ಮತ್ತು ವಿಶೇಷವಾಗಿ ಮಂತ್ರಗಳ ಪೂಜೆಯು ಕೋಟಿ ಬಾರಿ ಪ್ರಯೋಜನಕಾರಿಯಾಗಿದೆ ಎಂದು ಹೇಳಲಾಗುತ್ತದೆ. ಹುಣ್ಣಿಮೆಯೊಂದಿಗೆ ಹೊಂದಿಕೆಯಾಗುವ ಅಂತಹ ವಿಶೇಷ ಚಂದ್ರನ ದಿನದಂದು, ಚಂದ್ರಗ್ರಹಣದ ಸಮಯದಲ್ಲಿ ನಾವು ಪಠಿಸಬೇಕಾದ ಒಂದು ಮಂತ್ರವಿದೆ, ಅದು ನಮಗೆ ಚಂದ್ರನ ಅನುಗ್ರಹವನ್ನು ತರುತ್ತದೆ ಮತ್ತು ನಾವು ಕೇಳಿದ ವರವನ್ನು ನೀಡುತ್ತದೆ. ಈ ಮಂತ್ರದ ಕುರಿತಾದ ಈ ಪೋಸ್ಟ್‌ನಲ್ಲಿ , ಅಂತಹ ಮಂತ್ರ ಪೂಜೆಯ ಬಗ್ಗೆ ನಾವು ನೋಡಲಿದ್ದೇವೆ.

ಚಂದ್ರ ಗ್ರಹಣ ಮಂತ್ರ

ಮಾರ್ಚ್ 3, ಮಂಗಳವಾರ ಚಂದ್ರಗ್ರಹಣ
2026ರ ಮೊದಲ ಚಂದ್ರಗ್ರಹಣವು ಫಾಲ್ಗುಣ ಮಾಸದ ಹುಣ್ಣಿಮೆಯ ದಿನ, ಅಂದರೆ ಮಾರ್ಚ್ 3, ಮಂಗಳವಾರದಂದು ಸಂಭವಿಸಲಿದೆ. ಈ ಚಂದ್ರಗ್ರಹಣ ಮಧ್ಯಾಹ್ನ 03:23ಕ್ಕೆ ಆರಂಭವಾಗಿ ಸಂಜೆ 06:47ರವರೆಗೆ ಇರಲಿದೆ. ಗ್ರಹಣದ ಮಧ್ಯಕಾಲ ಸಂಜೆ 05:04 ಆಗಿರುತ್ತದೆ. ಅಂದರೆ, ಈ ಗ್ರಹಣದ ಒಟ್ಟು ಅವಧಿ 3 ಗಂಟೆ 24 ನಿಮಿಷಗಳು. ಈ ಗ್ರಹಣವು ಭಾರತದಲ್ಲಿ ಗರಿಷ್ಠ 52 ನಿಮಿಷಗಳ ಕಾಲ ಗ್ರಸ್ತೋದಯ ರೂಪದಲ್ಲಿ ಕಾಣಿಸಿಕೊಳ್ಳಲಿದೆ.

ನೀವು ಯಾವುದೇ ರೀತಿಯ ಗ್ರಹಣ ಪೂಜೆಯನ್ನು ಮಾಡಲು ಬಯಸುತ್ತೀರೋ, ಗ್ರಹಣದ ಆರಂಭ ಮತ್ತು ಅಂತ್ಯದ ನಡುವೆ ನೀವು ಅದನ್ನು ಮಾಡಬಹುದು. ಜ್ಯೋತಿಷ್ಯಶಾಸ್ತ್ರದ ಪ್ರಕಾರ, ಮಂತ್ರ ಪೂಜೆಯನ್ನು ಮಾಡಲು ಬಯಸುವವರು ಗ್ರಹಣದ ಉತ್ತುಂಗದ ಸಮಯದಲ್ಲಿ ಅದನ್ನು ಮಾಡಿದರೆ ಹೆಚ್ಚಿನ ಪ್ರಯೋಜನಗಳನ್ನು ಪಡೆಯುತ್ತಾರೆ ಎಂದು ಹೇಳಲಾಗುತ್ತದೆ. ಆದ್ದರಿಂದ, ಚಂದ್ರಗ್ರಹಣ ಪ್ರಾರಂಭವಾದ ನಂತರ, ನೀವು ಈ ಮಂತ್ರ ಪೂಜೆಯನ್ನು ನಿಮಗೆ ಸಾಧ್ಯವಾದ ಯಾವುದೇ ಸಮಯದಲ್ಲಿ ಮಾಡಬಹುದು.

ಈ ಮಂತ್ರವನ್ನು ಪಠಿಸಲು ಯಾವುದೇ ನಿರ್ಬಂಧಗಳಿಲ್ಲ. ಈ ಮಂತ್ರವನ್ನು ಪಠಿಸುವುದಕ್ಕೆ ಯಾವುದೇ ಅಶುದ್ಧತೆಯಿಲ್ಲ. ನೀವು ಮನೆಯಲ್ಲಿ ಮಾಂಸಾಹಾರಿ ಆಹಾರವನ್ನು ಸೇವಿಸಿದ್ದರೂ ಸಹ ನೀವು ಈ ಮಂತ್ರವನ್ನು ಪಠಿಸಬಹುದು. ಸಣ್ಣ ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಯಾರಾದರೂ ಈ ಮಂತ್ರವನ್ನು ಪಠಿಸಬಹುದು. ನೀವು ಯಾವುದೇ ಸ್ಥಳದಿಂದ ಈ ಮಂತ್ರವನ್ನು ಪಠಿಸಬಹುದು. ನೀವು ಯಾವುದೇ ದಿಕ್ಕಿಗೆ ಮುಖ ಮಾಡಿ ಈ ಮಂತ್ರವನ್ನು ಪಠಿಸಬಹುದು. ಈ ಮಂತ್ರವನ್ನು ಪಠಿಸುವಾಗ, ನೀವು ನೆಲದ ಮೇಲೆ ಕುಳಿತುಕೊಳ್ಳಬಾರದು, ಬದಲಾಗಿ ಚಾಪೆಯನ್ನು ಹರಡಿ ಅದರ ಮೇಲೆ ಕುಳಿತು ಪಠಿಸಬೇಕು ಎಂಬುದನ್ನು ನೆನಪಿಡಿ.

ಈ ಮಂತ್ರವನ್ನು 20 ನಿಮಿಷಗಳ ಕಾಲ ಜಪಿಸಬೇಕು ಎಂಬುದನ್ನು ನೆನಪಿಡಿ. ಸಂಖ್ಯೆಗೆ ಮಿತಿಯಿಲ್ಲ. ನೀವು ಚಂದ್ರನನ್ನು ಯೋಚಿಸುತ್ತಾ 20 ನಿಮಿಷಗಳ ಕಾಲ ಈ ಮಂತ್ರವನ್ನು ಜಪಿಸಬೇಕು. ಈ ಮಂತ್ರವನ್ನು ಜಪಿಸುವ ಮೊದಲು, ನೀವು ಚಂದ್ರನಿಗೆ ನಿಮಗೆ ಯಾವ ವರ ಬೇಕು ಅಥವಾ ನೀವು ಯಾವ ಆಸೆಯನ್ನು ಈಡೇರಿಸಲು ಬಯಸುತ್ತೀರಿ ಎಂದು ಹೇಳಿ ನಂತರ ಈ ಮಂತ್ರವನ್ನು ಜಪಿಸಲು ಪ್ರಾರಂಭಿಸಬೇಕು. ಮಂತ್ರವನ್ನು ಜಪಿಸಿದ ನಂತರ, ನೀವು ಮತ್ತೆ ಚಂದ್ರನನ್ನು ಯೋಚಿಸಬೇಕು ಮತ್ತು ನಿಮ್ಮ ಆಸೆಯನ್ನು ಪುನರಾವರ್ತಿಸಬೇಕು ಮತ್ತು ಅದು ಶೀಘ್ರದಲ್ಲೇ ಈಡೇರಲಿ ಎಂದು ಪ್ರಾರ್ಥಿಸಬೇಕು.

ಓಂ ಸೋಮಾಯ ನಮಃ ಈ ಮಂತ್ರವನ್ನು 108 ಬಾರಿ ಜಪ ಮಾಡಿ

ಚಂದ್ರ ಮೂಲ ಮಂತ್ರ

“ಓಂ ಹ್ರೀಂ ವಂ ಚಂದ್ರ ದೇವಾಯ ನಮಃ”

ಮತ್ತು ಶತ್ರುವಿನ ತಾಂತ್ರಿಕ ಭಾದೆ ದೂರ ಮಾಡಲಿಕ್ಕೆ

||ಓಂ ಐಂ ಹ್ರೀಂ ಕ್ಲೀಂ
ಶ್ರೀ ಶತ್ರುವಿಧ್ವಂಸನಿ ಸ್ವಾಹಾ||

ಮಾರ್ಚ್ 3 ರಂದು ಸಂಭವಿಸಲಿರುವ ಚಂದ್ರಗ್ರಹಣದ ಸೂತಕವು ಬೆಳಗ್ಗೆ 09:06 ರಿಂದ ಆರಂಭವಾಗಿ ಸಂಜೆ 06:47 ರವರೆಗೆ ಇರುತ್ತದೆ. ಅಂದರೆ, ಸೂತಕದ ಒಟ್ಟು ಅವಧಿ 9 ಗಂಟೆ 41 ನಿಮಿಷಗಳು. ಆದರೆ, ಮಕ್ಕಳು, ವೃದ್ಧರು ಮತ್ತು ಅನಾರೋಗ್ಯ ಪೀಡಿತರಿಗೆ ಸೂತಕದ ನಿಯಮಗಳು ಮಧ್ಯಾಹ್ನ 02:56 ರಿಂದ ಸಂಜೆ 06:46 ರವರೆಗೆ ಮಾತ್ರ ಅನ್ವಯವಾಗುತ್ತವೆ.

ಚಂದ್ರಗ್ರಹಣದ ಸಮಯದಲ್ಲಿ ನಾವು ಮನೆಯಲ್ಲಿ ಮಾಡಬಹುದಾದ ಮಂತ್ರ ಪೂಜೆಯು ಅತ್ಯಂತ ಪ್ರಯೋಜನಕಾರಿಯಾಗಿದೆ. ಆದ್ದರಿಂದ, ಚಂದ್ರಗ್ರಹಣದ ಸಮಯದಲ್ಲಿ ಈ ಮಂತ್ರವನ್ನು ಪಠಿಸುವುದರಿಂದ, ಭಗವಾನ್ ಚಂದ್ರನನ್ನು ಸ್ಮರಿಸುವುದರಿಂದ ನಾವು ವರವನ್ನು ಪಡೆಯಬಹುದು ಎಂದು ಹೇಳುವ ಮೂಲಕ ಈ ಪೋಸ್ಟ್ ಅನ್ನು ಮುಕ್ತಾಯಗೊಳಿಸುತ್ತೇವೆ.

ಲೇಖನ:
ಧಾರ್ಮಿಕಚಿಂತಕರು ಮತ್ತು ಸಲಹೆಗಾರರು
ಶ್ರೀ ಕ್ಷೇತ್ರ ಕಟೀಲು ದುರ್ಗಾಪರಮೇಶ್ವರೀ ದೇವಸ್ಥಾನ
ದೈವಜ್ಞ ಪ್ರಧಾನ್ ತಾಂತ್ರಿಕ್ ಜ್ಞಾನೇಶ್ವರ್ ರಾವ್ ತಂತ್ರಿ ಜ್ಯೋತಿಷ್ಯಶಾಸ್ತ್ರತಜ್ಞರು 8548998564

Categories
ಕೊಪ್ಪ ಮಲ್ನಾಡ್ ಶಿವಮೊಗ್ಗ ಹೊಸನಗರ

ಟಾಪ್ ನ್ಯೂಸ್ ಮಲ್ನಾಡ್

ಟಾಪ್ ನ್ಯೂಸ್ ಮಲ್ನಾಡ್

ಕೊಪ್ಪ: ಚೀಲಗಳಲ್ಲಿ ಗೋವಿನ ಕಳೆಬರ ಪತ್ತೆ: ಪ್ರತಿಭಟನೆ
– ಶಿವಮೊಗ್ಗ: ಕೊಲೆಯಾದ ಬಾಲಕನ ಕುಟುಂಬಕ್ಕೆ ವಿಜಯೇಂದ್ರ ಸಾಂತ್ವನ
– ಹೊಸನಗರ: ಕಳೆ ನಾಶಕ ಸೇವಿಸಿದ್ದ ಯುವಕ ಚಿಕಿತ್ಸೆ ಫಲಿಸದೆ ಸಾವು!

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಕೊಪ್ಪ: ರಸ್ತೆಯ ಪಕ್ಕದಲ್ಲಿ ನಾಲ್ಕು ಚೀಲಗಳಲ್ಲಿ ಗೋವಿನ ಕಳೆಬರ ಪತ್ತೆಯಾಗಿರುವ ಘಟನೆ ತೀರ್ಥಹಳ್ಳಿ ಮತ್ತು ಕೊಪ್ಪ ರಾಷ್ಟ್ರೀಯ ಹೆದ್ದಾರಿಯ ನಡುವೆ ಇರುವ ಶಿವಪುರದಲ್ಲಿ ನಡೆದಿದೆ. ಎರಡು ತಿಂಗಳ ಹಿಂದೆ ಕೂಡ ಇದೇ ರೀತಿ ಗೋವಿನ ಕಳೆಬರವನ್ನು ಹಾಕಲಾಗಿತ್ತು ಎನ್ನುವ ಸಂಗತಿ ಕೂಡ ಈ ಹಿನ್ನೆಲೆಯಲ್ಲಿ ಬೆಳಕಿಗೆ ಬಂದಿದೆ.

ಇಂತಹ ಘಟನೆಯಿಂದಾಗಿ ತೀವ್ರ ಆಕ್ರೋಶಗೊಂಡಿರುವ ಭಜರಂಗದಳದವರು ಸೋಮವಾರ ರಾಷ್ಟ್ರೀಯ ಹೆದ್ದಾರಿಯ ನಡುವೆ ಕುಳಿತು ಅರ್ಧ ಗಂಟೆಗಳಿಗೂ ಹೆಚ್ಚಿನ ಕಾಲ ಪ್ರತಿಭಟನೆಯನ್ನು ನಡೆಸಿದರು. ಮಾಹಿತಿ ಲಭಿಸುತ್ತಿದ್ದಂತೆ ಸ್ಥಳಕ್ಕೆ ಆಗಮಿಸಿದ ಕೊಪ್ಪ ಪೊಲೀಸರು, ರಸ್ತೆಯನ್ನು ತಡೆಗಟ್ಟಿ ಪ್ರತಿಭಟನೆಯನ್ನು ನಡೆಸುವುದರಿಂದ ಮುಂದಾಗುವ ಪರಿಣಾಮದ ಕುರಿತು ಪ್ರತಿಭಟನಾಕಾರರಿಗೆ ಮನವರಿಕೆ ಮಾಡಿಸುವ ಮೂಲಕ, ಸಮಾಧಾನಪಡಿಸಿದರು ಎನ್ನಲಾಗಿದೆ.

ಈ ಸಂದರ್ಭದಲ್ಲಿ ಪ್ರತಿಭಟನಾಕಾರರು “ಪದೇ ಪದೇ ಇದೇ ರೀತಿಯ ಘಟನೆ ನಡೆಯುತ್ತಿರುವುದರಿಂದ ಈ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಿ, ಆರೋಪಿಗಳನ್ನು ಪತ್ತೆ ಹಚ್ಚಿ ಸೂಕ್ತ ಕ್ರಮ ಕೈಗೊಳ್ಳಬೇಕು” ಎಂದು ಪೊಲೀಸರಿಗೆ ಆಗ್ರಹಪಡಿಸಿದರು ಎನ್ನುವ ಸಂಗತಿ ತಿಳಿದುಬಂದಿದೆ.

ಕಳೆ ನಾಶಕ ಸೇವಿಸಿದ್ದ ಯುವಕ ಚಿಕಿತ್ಸೆ ಫಲಿಸದೆ ಸಾವು

ಹೊಸನಗರ: ರಿಪ್ಪನ್‌ಪೇಟೆ ಸಮೀಪದ ಕಗ್ಗಲಿ ಗ್ರಾಮದ ಯುವಕ ರಾಕೇಶ್ ಕಳೆನಾಶಕ ಸೇವಿಸಿ ಚಿಕಿತ್ಸೆ ಫಲಿಸದೇ ಮೃತಪಟ್ಟಿರುವ ದುರ್ಘಟನೆ ವರದಿಯಾಗಿದೆ. ಫೆಬ್ರವರಿ 24ರಂದು ಮನೆ ಸಮೀಪದ ಅಡಿಕೆ ತೋಟದಲ್ಲಿ ರಾಕೇಶ್ ವಿಷ ಸೇವಿಸಿ ಕುಸಿದುಬಿದ್ದಿದ್ದನ್ನು ಗಮನಿಸಿದ ಕುಟುಂಬಸ್ಥರು ಮತ್ತು ಸ್ಥಳೀಯರು ತಕ್ಷಣವೇ ಅವರನ್ನು ರಿಪ್ಪನ್‌ಪೇಟೆ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಪ್ರಾಥಮಿಕ ಚಿಕಿತ್ಸೆ ನೀಡಿದರು.

ಬಳಿಕ ಹೆಚ್ಚಿನ ಚಿಕಿತ್ಸೆಗಾಗಿ ಶಿವಮೊಗ್ಗದ ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಮಾರ್ಚ್ 2ರ ರಾತ್ರಿ 1.20ರ ಸುಮಾರಿಗೆ ರಾಕೇಶ್ ಮೃತಪಟ್ಟಿದ್ದಾರೆ. ದೂರಿನ ಪ್ರಕಾರ, ರಾಕೇಶ್ ಸುಮಾರು ಒಂದೂವರೆ ತಿಂಗಳ ಹಿಂದೆ ಬೈಕ್‌ನಿಂದ ಬಿದ್ದು ತಲೆಗೆ ಗಂಭೀರ ಪೆಟ್ಟು ಮಾಡಿಕೊಂಡಿದ್ದರು.

ಈ ಹಿನ್ನೆಲೆ ಅವರಿಗೆ ಶಿವಮೊಗ್ಗದ ಮ್ಯಾಕ್ಸ್ ಆಸ್ಪತ್ರೆ ಹಾಗೂ ಮಂಗಳೂರಿನ ಏನಪೋಯ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡಲಾಗಿತ್ತು. ಅಪಘಾತ ಸ್ವತಃ ಸಂಭವಿಸಿದ್ದರಿಂದ ಈ ಕುರಿತು ಯಾವುದೇ ದೂರು ದಾಖಲಾಗಿರಲಿಲ್ಲ. ಚಿಕಿತ್ಸೆಯ ಬಳಿಕ ರಾಕೇಶ್ ಮನೆಗೆ ಮರಳಿದ್ದರೂ, ಮಾನಸಿಕವಾಗಿ ಮಂಕಾಗಿದ್ದು, ಹೆಚ್ಚಿನ ಸಮಯ ಮೌನವಾಗಿಯೇ ಕಳೆಯುತ್ತಿದ್ದರು ಎಂದು ಕುಟುಂಬಸ್ಥರು ತಿಳಿಸಿದ್ದಾರೆ.

ಇದೇ ಅವಧಿಯಲ್ಲಿ ಮನೆಯ ಬಚ್ಚಲು ಮನೆಯಲ್ಲಿ ಜಾರಿ ಬಿದ್ದು ಮತ್ತೆ ತಲೆಗೆ ಏಟು ಮಾಡಿಕೊಂಡಿದ್ದ ಘಟನೆ ಕೂಡ ನಡೆದಿದೆ ಎನ್ನಲಾಗಿದೆ. ಈ ಎಲ್ಲ ಘಟನೆಗಳನ್ನು ಮನಸ್ಸಿಗೆ ಹಚ್ಚಿಕೊಂಡಿದ್ದ ರಾಕೇಶ್ ಫೆಬ್ರವರಿ 24ರಂದು ಮಧ್ಯಾಹ್ನ ಸುಮಾರು 1 ಗಂಟೆಯ ವೇಳೆಗೆ ಅಡಿಕೆ ತೋಟದಲ್ಲಿ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾರೆ.

ಶಿವಮೊಗ್ಗದಲ್ಲಿ ಕೊಲೆ: ಕುಟುಂಬಕ್ಕೆ ಸಾಂತ್ವನ ಹೇಳಿದ ವಿಜಯೇಂದ್ರ

ಶಿವಮೊಗ್ಗ: ಶಿವಮೊಗ್ಗದ ಸೂಳೆಬೈಲಿನಲ್ಲಿ ಅಪ್ರಾಪ್ತ ದುಷ್ಕರ್ಮಿಗಳಿಂದ ಹತ್ಯೆಯಾದ ಎಸ್.ಎಸ್.ಎಲ್.ಸಿ ವಿದ್ಯಾರ್ಥಿ ಸಂಕೇತ್ ಅವರ ಮನೆಗೆ ರಾಜ್ಯ ಬಿಜೆಪಿ ಅಧ್ಯಕ್ಷ ವಿಜಯೇಂದ್ರ ಮತ್ತು ಬಿಜೆಪಿ ನಾಯಕರು ತೆರಳಿ, ಇನ್ನೂ ತೀವ್ರ ಆಘಾತದಲ್ಲಿರುವ ಅವರ ದುಃಖತಪ್ತ ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿದರು.

ಹಲ್ಲೆಯ ಸಂದರ್ಭದಲ್ಲಿ ಗಾಯಗೊಂಡಿದ್ದ ಮತ್ತೋರ್ವ ವಿದ್ಯಾರ್ಥಿ ಗಿರೀಶ್ ಅವರ ಮನೆಗೂ ತೆರಳಿ, ಆತನಿಗೂ, ಆತನ ಕುಟುಂಬದವರಿಗೂ ಧೈರ್ಯ ತುಂಬಲಾಯಿತು. ನಾಗರಿಕ ಸಮಾಜ ಬೆಚ್ಚಿ ಬೀಳುವಂತೆ, ಅಪ್ರಾಪ್ತರೇ ಕೊಲೆ ಮಾಡುವಷ್ಟರ ಮಟ್ಟಿಗೆ ಪರಿಸ್ಥಿತಿ ಬಿಗಡಾಯಿಸಿದ್ದು, ಮತ್ತೆ ಇಂತಹ ಘಟನೆಗಳು ಮರುಕಳಿಸದಂತೆ ಎಲ್ಲಾ ಅಗತ್ಯ, ಕಟ್ಟುನಿಟ್ಟಿನ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಪೊಲೀಸ್ ಮತ್ತು ರಾಜ್ಯ ಸರ್ಕಾರಕ್ಕೆ ವಿಜಯೇಂದ್ರ ಅಗ್ರಹಿಸಿದ್ದಾರೆ.