Categories
ಉಡುಪಿ ಕರಾವಳಿ ಪುತ್ತೂರು ಬೆಳ್ತಂಗಡಿ ಮಂಗಳೂರು

ಕರಾವಳಿ ಟಾಪ್ ನ್ಯೂಸ್

ಕರಾವಳಿ ಟಾಪ್ ನ್ಯೂಸ್

• ಪುತ್ತೂರು: ಪುರೋಹಿತರ ಮೇಲೆ ಹಲ್ಲೆ
• ಬೆಳ್ತಂಗಡಿ: ಕ್ರೈನ್ ಢಿಕ್ಕಿ; ವ್ಯಕ್ತಿ ಸಾವು
• ಮೂಡಬಿದರೆ: ಶಾರ್ಟ್ ಸರ್ಕ್ಯೂಟ್ ನಿಂದ ತೆಂಗಿನಮರ, ಗಿಡಗಳ ನಾಶ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್

•ಪುತ್ತೂರು: ಪುರೋಹಿತರ ಮೇಲೆ ಹಲ್ಲೆ

ಪುತ್ತೂರು: ಪೂಜೆಗೆ ಸಂಬಂಧಿಸಿದ ಕಾರ್ಯಕ್ರಮವೊಂದನ್ನು ಮುಗಿಸಿಕೊಂಡು, ತಮ್ಮ ಕಾರಿನಲ್ಲಿ ತೆರಳುತ್ತಿದ್ದ ಪುರೋಹಿತರ ಮೇಲೆ ಅಪರಿಚಿತರು ದಾಳಿ ನಡೆಸಿದ ಘಟನೆ, ಕಬಕ ಗ್ರಾಮದಲ್ಲಿ ನಡೆದಿದೆ. ಹಲ್ಲೆಗೊಳಗಾದ ಪುರೋಹಿತರನ್ನು ವಿದ್ಯಾಪುರ ನಿವಾಸಿ ಗಣೇಶ್ ಎಂದು ಗುರುತಿಸಲಾಗಿದೆ. ಮನೆಯೊಂದರಲ್ಲಿ ಏರ್ಪಡಿಸಿದ್ದ ಪೂಜಾ ಕಾರ್ಯಕ್ರಮವನ್ನು ಮುಗಿಸಿ ವಿದ್ಯಾಪುರಕ್ಕೆ ತೆರಳಿದ್ದು, ರಸ್ತೆಯ ಪಕ್ಕದಲ್ಲಿದ್ದ ಮನೆಯೊಂದರಲ್ಲಿ ಕಾರ್ಯಕ್ರಮ ನಡೆಯುತ್ತಿದ್ದು, ಜನದಟ್ಟಣೆಯ ನಡುವೆ ಮಗವೊಂದು ಕಾರಿನ ಬಳಿ ಬಂದಿದೆ.

ಗಣೇಶ್ ಅವರು ಕಾರನ್ನು ನಿಧಾನವಾಗಿ ಚಲಾಯಿಸುತ್ತಿದ್ದು, ಮಗು ಬಂದಿರುವುದನ್ನು ಗಮನಿಸಿ, ಕಾರು ನಿಲ್ಲಿಸಿ ಕೆಳಗೆ ಇಳಿದಿದ್ದಾರೆ ಎನ್ನಲಾಗಿದೆ. ಈ ಸಂದರ್ಭದಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬರು ಮಗುವಿಗೆ ಕಾರು ತಾಗಿಸಿದ್ದಾರೆ ಎಂದು ಸುಳ್ಳು ಅಪವಾದವನ್ನು ಹೊರೆಸಿ, ಅವಾಚ್ಯ ಶಬ್ದಗಳಿಂದ ಬೈದು, ಗಣೇಶ್ ಅವರ ಮೇಲೆ ದಾಳಿ ನಡೆಸಿ, ಜೀವ ಬೆದರಿಕೆ ಹಾಕಿದ್ದಾರೆ ಎನ್ನುವ ಮಾಹಿತಿ ಲಭಿಸಿದೆ. ಈ ಹಿನ್ನೆಲೆಯಲ್ಲಿ ಗಣೇಶ್ ಭಟ್ ಅವರು ಪೊಲೀಸರಿಗೆ ದೂರು ನೀಡಿದ್ದು, ದೂರಿನ ಆಧಾರದ ಮೇಲೆ ಪುತ್ತೂರು ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

• ಬೆಳ್ತಂಗಡಿ: ಕ್ರೈನ್ ಢಿಕ್ಕಿ; ವ್ಯಕ್ತಿ ಸಾವು

ಬೆಳ್ತಂಗಡಿ: ಕ್ರೈನ್ ವೊಂದು ದ್ವಿಚಕ್ರ ವಾಹನದ ಹಿಂಭಾಗಕ್ಕೆ ಢಿಕ್ಕಿ ಹೊಡೆದು ವ್ಯಕ್ತಿಯೊಬ್ಬರು ಮೃತಪಟ್ಟ ಘಟನೆ, ಬೆಳಾಲು ಪೇಟೆಯಲ್ಲಿ ನಡೆದಿದೆ. ಮೃತವ್ಯಕ್ತಿಯನ್ನು ಬಳಂಜ ಗ್ರಾಮದ ಜಯ ಮೇಸ್ತ್ರಿ ಎಂದು ಗುರುತಿಸಲಾಗಿದೆ. ಜಯ ಅವರು ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದು, ರಬ್ಬರ್ ಟ್ಯಾಪಿಂಗ್ ಕೆಲಸ ಮಾಡುತ್ತಿದ್ದರು ಎನ್ನಲಾಗಿದೆ. ಮಾಹಿತಿ ಲಭಿಸುತ್ತಿದ್ದಂತೆ ಆಗಮಿಸಿದ ಬೆಳ್ತಂಗಡಿ ಸಂಚಾರಿ ಠಾಣಾ ಪೊಲೀಸರು ಸ್ಥಳದ ಪರಿಶೀಲನೆಯನ್ನು ನಡೆಸಿದರು. ಬಳಿಕ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ತಾಲ್ಲೂಕು ಸರ್ಕಾರಿ ಆಸ್ಪತ್ರೆಗೆ ರವಾನಿಸಿದರು. ಘಟನೆಗೆ ಸಂಬಂಧಿಸಿದಂತೆ ಬೆಳ್ತಂಗಡಿ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

•ಮೂಡಬಿದರೆ: ಶಾರ್ಟ್ ಸರ್ಕ್ಯೂಟ್ ನಿಂದ ತೆಂಗಿನಮರ ಗಿಡಗಳ ನಾಶ

ಮೂಡಬಿದರೆ: ಶಾರ್ಟ್ ಸರ್ಕ್ಯೂಟ್ ನಿಂದಾಗಿ ಬೆಂಕಿ ಅವಘಡ ಸಂಭವಿಸಿರುವ ಘಟನೆ, ಇರುವೈಲು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೆಂಪುಗುಡ್ಡೆ ಎನ್ನುವಲ್ಲಿ ನಡೆದಿದೆ. ಕಾಲೂರು ರಾಜೇಶ್ ಪುಜಾರಿ ಎನ್ನುವವರಿಗೆ ಸೇರಿದ ಜಾಗದಲ್ಲಿ ಈ ಅನಾಹುತ ಎದುರಾಗಿದೆ ಎನ್ನಲಾಗಿದೆ. ಪರಿಣಾಮವಾಗಿ ತೋಟದಲ್ಲಿದ್ದ ಕೆಲವು ತೆಂಗಿನಮರಗಳು, ಗಿಡಗಳು ಸುಟ್ಟು ಬೂದಿಯಾಗಿವೆ. ಮಾಹಿತಿ ಲಭಿಸುತ್ತಿದ್ದಂತೆ ಸ್ಥಳಕ್ಕೆ ಧಾವಿಸಿದ ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಬೆಂಕಿಯನ್ನು ನಂದಿಸುವಲ್ಲಿ ಯಶಸ್ವಿಯಾದರು.

Categories
inspiration ಪ್ರತಿಭೆಗಳು ಮಲ್ನಾಡ್ ರಾಜ್ಯ ಸಿನಿಮಾ

ಭಾರತ ಚಿತ್ರರಂಗದಲ್ಲಿ ಅಜನೀಶ್ ಮಿಂಚಿಂಗ್..!

ಭಾರತ ಚಿತ್ರರಂಗದಲ್ಲಿ ಅಜನೀಶ್ ಮಿಂಚಿಂಗ್..!
ಕಾಂತಾರ ಮೂಲಕ ಸಂಗೀತದ ಮೋಡಿ ಮಾಡಿದ ಮಲೆನಾಡ ಮಾಂತ್ರಿಕ
ಶಿವಮೊಗ್ಗ ಜಿಲ್ಲೆ ಭದ್ರಾವತಿ ಹುಡುಗನ ಸಾಧನೆಯ ಪಯಣ
ಅಪ್ಪನ ಆರ್ಕೆಸ್ಟ್ರಾ ನೋಡಿ ಮಗ ಸಂಗೀತ ಸಾಧಕನಾಗಿದ್ದು ರೋಚಕ

ಕಾಂತಾರ ಮೂಲಕ ಸಂಗೀತದ ಮೋಡಿ ಮಾಡಿದ ಮಲೆನಾಡ ಮಾಂತ್ರಿಕ ಶಿವಮೊಗ್ಗ ಜಿಲ್ಲೆ ಭದ್ರಾವತಿ ಹುಡುಗ ಅಜನೀಶ್ ಲೋಕನಾಥ್. ಅಜನೀಶ್ ಲೋಕನಾಥ್ ಅವರು 20 ನವೆಂಬರ್ 1986ರಲ್ಲಿ ಭದ್ರಾವತಿಯಲ್ಲಿ ಜನಿಸಿದರು. ತಂದೆ ಖ್ಯಾತ ಸಂಗೀತ ನಿರ್ದೇಶಕ ಲೋಕನಾಥ್. ಅಜ್ಜಿ ಮತ್ತು ತಾಯಿ ಕೂಡ ಗಾಯಕರಾಗಿದ್ದ ಕಾರಣ ಅಜನೀಶ್ ಅವರ ಮೇಲೆ ಸಂಗೀತದ ಪ್ರಭಾವ ಅಧಿಕವಾಗಿತ್ತು. ಭದ್ರಾವತಿಯ ವಿಶ್ವೇಶ್ವರಯ್ಯ ಶಾಲೆಯಲ್ಲಿ ಪ್ರಾಥಮಿಕ ಹಾಗೂ ಪೇಪರ್ ಟೌನ್ ನಲ್ಲಿ ಪ್ರೌಢ ಶಿಕ್ಷಣ ಪಡೆದ ಇವರು ಮನೆಯಲ್ಲಿ ತಂದೆಯ ಬಳಿ ಸಂಗೀತ ಅಭ್ಯಾಸ ಮಾಡುತ್ತಿದ್ದರು. ತಂದೆಯೇ ಮೊದಲ ಸಂಗೀತದ ಗುರು ಆದರು. ಸಂಗೀತದ ಹೆಚ್ಚಿನ ಕಲಿಕೆಗಾಗಿ ಲೋಕನಾಥ್ ಅವರು ಮಗನನ್ನು ಶಿವಮೊಗ್ಗದ ಸ್ಕೌಟ್ ಭವನದಲ್ಲಿ ತರಗತಿ ನಡೆಸುತ್ತಿದ್ದ ಸಂಗೀತ ಶಿಕ್ಷಕ ರಾಜು ಮಾಸ್ತರ್ ಅವರ ಬಳಿ ಕಳಿಸಿದರು. ಇಲ್ಲಿ ಅಜನೀಶ್ ಪಾಶ್ಚಾತ್ಯ ಮತ್ತು ಶಾಸ್ತ್ರೀಯ ಸಂಗೀತವನ್ನು ಕಲಿತರು.

ಕೆ. ಕಲ್ಯಾಣ್ ಗರಡಿಯಲ್ಲಿ ಬೆಳೆದ ಅಜನೀಶ್
ಬಾಲ್ಯದಲ್ಲಿ ತಂದೆಯ ಸಂಗೀತ ಕಛೇರಿಗಳಲ್ಲಿ ಕೀಬೋರ್ಡ್ ನುಡಿಸುತ್ತಿದ್ದ ಅಜನೀಶ್ ಬೆಂಗಳೂರಿಗೆ ಬಂದು ತಂದೆಯ ಸ್ನೇಹಿತರ ಮನೆಯಲ್ಲಿ ಉಳಿದುಕೊಂಡು ಪಕ್ಕಾ ವಾದ್ಯಗಾರರಾಗಿ ಕಾರ್ಯಕ್ರಮಗಳನ್ನು ನೀಡಿದರು. ಆಗ ಇವರಿಗೆ ಕೆ. ಕಲ್ಯಾಣ್ ಅವರ ಗರಡಿ ಲಭಿಸಿತು. ಅಜನೀಶ್ ಅವರ ಸಂಗೀತ ಸಂಯೋಜನೆಯ ಮೊದಲ ಚಿತ್ರ ‘ಶಿಶಿರ’. ಬಳಿಕ ನಾಗತಿಹಳ್ಳಿ ಚಂದ್ರಶೇಖರ್ ಅವರ ‘ ನನ್ನ ಲೈಫ್ ಅಲ್ಲಿ’ ಚಿತ್ರಕ್ಕೂ ಸಂಗೀತ ಸಂಯೋಜನೆ ಮಾಡಿದರು. ಇದನ್ನು ಗುರುತಿಸಿದ ರಕ್ಷಿತ್ ಶೆಟ್ಟಿ ಅವರು ತಮ್ಮ ಕಿರುಚಿತ್ರವೊಂದಕ್ಕೆ ಅವಕಾಶ ನೀಡಿದರು.ಬಳಿಕ ‘ಉಳಿದವರು ಕಂಡಂತೆ’ ಚಿತ್ರಕ್ಕೆ ಸಂಗೀತ ನಿರ್ದೇಶನದ ಜವಾಬ್ದಾರಿ ನೀಡಿದರು.ನಂತರ ಅಜನೀಶ್ ಹಿಂತಿರುಗಿ ನೋಡಿದ್ದಿಲ್ಲ. ಇದಕ್ಕೂ ಮೊದಲು ಅವರಿಗೆ ಮಾಧ್ಯಮದವರು ನೀಡುವ ಕೆ.ಆರ್.ಪುರಂ ಪ್ರಶಸ್ತಿ ಲಭಿಸಿತ್ತು.

ಕಿರಿಕ್ ಪಾರ್ಟಿ, ರಂಗಿ ತರಂಗದ ಮೂಲಕ ಹೊಸ ಎಂಟ್ರಿ!
ವಾಸ್ಕೋಡಿಗಾಮ, ಸಿನಿಮಾ ಮೈ ಡಾರ್ಲಿಂಗ್, ಇಷ್ಟಕಾಮ್ಯ, ರಂಗಿತರಂಗ, ಕಿರಿಕ್ ಪಾರ್ಟಿ, ಡಾ.ಶಿವರಾಜಕುಮಾರ್ ಅವರ ಅಭಿನಯದ ಶ್ರೀಕಂಠ ಹೀಗೆ ಸಾಲು ಸಾಲು ಚಿತ್ರಗಳಿಗೆ ಸಂಗೀತ ಸಂಯೋಜನೆ ಮತ್ತು ನಿರ್ದೇಶನ ಮಾಡಿದರು. ಸಂಗೀತದ ಎಲ್ಲಾ ಪ್ರಕಾರಗಳಲ್ಲೂ ನಿರ್ದೇಶನ ಮಾಡಬೇಕೆಂಬುದು ಅಜನೀಶ್ ಅವರ ಕನಸು. ಇವರ ಸಂಗೀತ ನಿರ್ದೇಶನದ ಮೆಚ್ಚಿನ ಚಿತ್ರ ಇಷ್ಟಕಾಮ್ಯ.

Categories
ಬೆಂಗಳೂರು ಮಲ್ನಾಡ್ ರಾಜ್ಯ

ಶುರುವಾಗಲಿದೆ ಗುಡುಗು ಸಹಿತ ಮಳೆ!

ಶುರುವಾಗಲಿದೆ ಗುಡುಗು ಸಹಿತ ಮಳೆ!
– ಒಂದು ವಾರ ಕಾಲ ಪೂರ್ವ ಮುಂಗಾರು ಚುರುಕು
– ಬೆಂಗಳೂರು ಸೇರಿ ಎಲ್ಲೆಡೆ ಮಳೆ: ಜನರಿಗೆ ಇಲಾಖೆ ಮಾಹಿತಿ

ಬೆಂಗಳೂರು: ರಾಜ್ಯದಲ್ಲಿ ಪೂರ್ವ ಮುಂಗಾರು ಚುರುಕಾಗಿದ್ದು 22 ಜಿಲ್ಲೆಗಳಲ್ಲಿ ಗುಡುಗು, ಮಿಂಚು ಸಹಿತ ಒಂದು ವಾರ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಈಗಾಗಲೇ ಬೆಂಗಳೂರು ಸೇರಿ ಹಲವೆಡೆ ಮಳೆ ಆಗುತ್ತಿದೆ. ಕರ್ನಾಟಕ ಸಹಿತ ದಕ್ಷಿಣ ಭಾರತದ ಮೇಲೆ ಮುಂದಿನ ಕೆಲವು ದಿನ ಹವಾಮಾನ ಬದಲಾವಣೆಯ ಅಲೆ ಅಪ್ಪಳಿಸಲಿದೆ ಎಂದು ಭಾರತ ಹವಾಮಾನ ಇಲಾಖೆ ಎಚ್ಚರಿಸಿದೆ. ಎರಡು ದಿನಗಳ ಕಾಲ ಗರಿಷ್ಠ ಉಷ್ಣಾಂಶ ದಾಖಲಾದರೂ ಸಾಧಾರಣ ಮಳೆ ಮುಂದುವರಿಯಲಿದೆ. ಮೇ 8ರ ನಂತರ ಬೆಂಗಳೂರು ಸೇರಿದಂತೆ 18 ಜಿಲ್ಲೆಗಳಲ್ಲಿ ಮಳೆಯಾಗಲಿದೆ ಎಂದು ತಿಳಿಸಿದೆ. ಮೇ 6 ಮತ್ತು 7 ರಂದು ಬೆಂಗಳೂರು ನಗರ ಮತ್ತು ಗ್ರಾಮಾಂತರ ಎರಡರಲ್ಲೂ 30 ರಿಂದ 40 ಕಿ.ಮೀ ವೇಗದ ಗಾಳಿ ಸಹಿತ ಹಗುರದಿಂದ ಮಳೆಯಾಗಲಿದೆ.

ಕರಾವಳಿ ಕರ್ನಾಟಕದಲ್ಲಿ ದಕ್ಷಿಣ ಕನ್ನಡ, ಉಡುಪಿ, ಉತ್ತರ ಕನ್ನಡ ಮೋಡ-ಬಿಸಿಲಿನ ವಾತಾವರಣ ಇರಲಿದ್ದು ಬಹುತೇಕ ಒಣ ಹವೆ ಮುಂದುವರಿಯಲಿದೆ. ಘಟ್ಟ ಪ್ರದೇಶದ ಒಂದೆರಡು ಕಡೆ ಸಣ್ಣ ಮಳೆ ಸಾಧ್ಯ. ಮುಂದಿನ 2-3 ದಿನ ಇದೇ ವಾತಾವರಣ ಮುಂದುವರಿದು ಮೇ ಎರಡನೇ ವಾರದಲ್ಲಿ ಕರಾವಳಿಯಲ್ಲಿ ಉತ್ತಮ ಮಳೆ ಆಗುವ ಮುನ್ಸೂಚನೆ ಇದೆ. ಕೊಡಗು, ಹಾಸನ, ಚಿಕ್ಕಮಗಳೂರು ಮತ್ತು ಶಿವಮೊಗ್ಗ ಕರಾವಳಿಗೆ ಹೊಂದಿಕೊಂಡ ತಾಲ್ಲೂಕುಗಳಲ್ಲಿ ಅಲ್ಲಲ್ಲಿ ಸಣ್ಣ ಪ್ರಮಾಣದ ಮಳೆ ಆಗುವ ಸಾಧ್ಯತೆ ಇದೆ. ವಿಶೇಷವಾಗಿ ವಾರ ಕಾಲ ಕೊಡಗು ಜಿಲ್ಲೆಯಲ್ಲಿ ಮಳೆ ಆಗುವ ಮುನ್ಸೂಚನೆ ಇದ್ದು, ಕಾಫಿ ತೋಟ ಮತ್ತು ಕೃಷಿ ಚಟುವಟಿಕೆ ನಡೆಸುವವರು ಹವಾಮಾನ ಬದಲಾವಣೆಗೆ ತಕ್ಕಂತೆ ತಮ್ಮ ಯೋಜನೆ ಹಾಕಿಕೊಳ್ಳಬೇಕಿದೆ.

ದಕ್ಷಿಣ ಒಳನಾಡು ಜಿಲ್ಲೆಗಳಾದ ದಾವಣಗೆರೆ, ಚಾಮರಾಜನಗರ ಮತ್ತು ಮೈಸೂರು ಜಿಲ್ಲೆಗಳ ಕೆಲವೆಡೆ ತುಂತುರು ಮಳೆ ಆಗುವ ಸಾಧ್ಯತೆ ಇದೆ. ಮೇ 5 ಮತ್ತು ಮೇ 6 ರಿಂದ 9ರ ನಡುವೆ ಮೈಸೂರು, ಮಂಡ್ಯ, ಚಿಕ್ಕಬಳ್ಳಾಪುರ, ಕೋಲಾರ, ತುಮಕೂರು, ರಾಮನಗರ, ಚಾಮರಾಜನಗರ, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು ಮತ್ತು ವಿಜಯನಗರ ಜಿಲ್ಲೆಗಳ ಒಂದೆರಡು ಕಡೆ 64.5 ಮಿ.ಮೀ ಮೀರುವ ಭಾರೀ ಮಳೆ ಆಗುವ ಸಾಧ್ಯತೆ ಇದೆ. ಇದರ ಜೊತೆಗೆ ಗುಡುಗು-ಮಿಂಚು ಮತ್ತು 30-40 ಕಿ.ಮೀ ವೇಗದ ಚಂಡಮಾರುತ ಸಹ ಇರಲಿದ್ದು, ದಕ್ಷಿಣ ಒಳನಾಡಿನ ಒಂದೆರಡು ಕಡೆ ಗುಡುಗು ಸಹಿತ ಮಳೆ ಆಗಲಿದೆ ಎಂದು ರಾಜ್ಯ ಮುನ್ಸೂಚನೆ ವರದಿ ಹೇಳಿದೆ.

ಉತ್ತರ ಒಳನಾಡಿನ ಬಾಗಲಕೋಟೆ, ವಿಜಯಪುರ, ಬೆಳಗಾವಿ, ಬಿದರ, ಕಲಬುರಗಿ, ರಾಯಚೂರು, ಯಾದಗಿರಿ, ಕೊಪ್ಪಳ, ಬಳ್ಳಾರಿ ಬಹಳಷ್ಟು ಜಿಲ್ಲೆಗಳಲ್ಲಿ ಈ ವಾರ ಅಧಿಕ ಬಿಸಿಲಿನ ಒಣ ಹವೆ ಮುಂದುವರಿಯಲಿದೆ. ಹಾವೇರಿ, ಗದಗ ಮತ್ತು ಧಾರವಾಡ ಜಿಲ್ಲೆಗಳ ಕೆಲವೆಡೆ ತುಂತುರು ಮಳೆ ಆಗಬಹುದು. ಉತ್ತರ ಒಳನಾಡಿನಲ್ಲಿ ಮುಂದಿನ 5 ದಿನ ಗರಿಷ್ಠ ತಾಪಮಾನದಲ್ಲಿ ದೊಡ್ಡ ಬದಲಾವಣೆ ಇರುವುದಿಲ್ಲ ಎಂದಿದೆ.

Categories
ಚಿಕ್ಕಮಗಳೂರು ಮಲ್ನಾಡ್ ರಾಜಕೀಯ

ಜೀವರಾಜ್ ವಿರುದ್ಧ ಎಫ್ಐರ್: ಹೈಕೋರ್ಟ್ ತಡೆ!

ಜೀವರಾಜ್ ವಿರುದ್ಧ ಎಫ್ಐರ್: ಹೈಕೋರ್ಟ್ ತಡೆ!
– ಮತ್ತೆ ರಾಜೇಗೌಡರಿಗೆ ಸೋಲು: ಮುಂದೇನಾಗುತ್ತೆ?
– ಜೀವರಾಜ್ ಅಭಿಮಾನಿಗಳ ಸಂತಸ

ಶೃಂಗೇರಿ: ಅಂಚೆ ಮತ ಎಣಿಕೆಯಲ್ಲಿ ಹಿನ್ನಡೆ ಅನುಭವಿಸಿದ್ದ ರಾಜೇಗೌಡ ಅವರಿಗೆ ಕೋರ್ಟ್ ಅಲ್ಲಿ ಮತ್ತೊಂದು ಹಿನ್ನಡೆ ಆಗಿದೆ. ಡಿ.ಎನ್.ಜೀವರಾಜ್ ಅವರು ಮತಪತ್ರಗಳನ್ನು ತಿದ್ದಿರುವ ಆರೋಪದ ಬಗ್ಗೆ ದಾಖಲಾಗಿದ್ದ ದೂರು ಹೈಕೋರ್ಟ್ ಅಲ್ಲಿ ವಜಾಗೊಂಡಿದೆ. ಶನಿವಾರದಂದು ಉಚ್ಚ ನ್ಯಾಯಾಲಯದ ಆದೇಶದ ಮೇರೆಗೆ ಶೃಂಗೇರಿ ವಿಧಾನಸಭಾ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಅಂಚೆ ಮತ ಮರು ಎಣಿಕೆ ನಡೆದಿದ್ದು, ಡಿ.ಎನ್.ಜೀವರಾಜ್ ಅವರ ವಿರುದ್ಧ ಮತಪತ್ರಗಳನ್ನು ತಿದ್ದಿರುವ ಆರೋಪ ಮಾಡಲಾಗಿತ್ತು. ಇದಕ್ಕೆ ಸಂಬಂಧಿಸಿದಂತೆ ಚುನಾವಣಾಧಿಕಾರಿ ವೇದಮೂರ್ತಿ, ಜೀವರಾಜ್ ಮತ್ತು ಜಿಲ್ಲಾಧಿಕಾರಿ ಕೆ‌.ಎನ್.ರಮೇಶ್ ವಿರುದ್ಧ ಚಿಕ್ಕಮಗಳೂರು ನಗರ ಪೊಲೀಸ್ ಠಾಣೆಯಲ್ಲಿ ಏಜೇಂಟ್ ಆಗಿದ್ದ ಸುಧೀರ್ ಕುಮಾರ್ ಮುರೊಳ್ಳಿ ಅವರು ಎಫ್ಐಆರ್ ದಾಖಲಿಸಿದ್ದರು.

ಡಿ.ಎನ್.ಜೀವರಾಜ್ ಅವರು ವಿಜೇತರಾಗಿರುವ ಸಂಗತಿ ಘೋಷಣೆಯಾದ ಕೆಲವೇ ಗಂಟೆಗಳಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಟಿ.ಡಿ.ರಾಜೇಗೌಡ ಅವರ ಮತ ಎಣಿಕೆ ಏಜೆಂಟ್ ಆಗಿರುವ ಸುಧೀರ್ ಕುಮಾರ್ ಮುರೊಳ್ಳಿ ಅವರು ಮತಪತ್ರ ತಿದ್ದಿರುವ ಕುರಿತು ದೂರು ನೀಡಿದ್ದು, ದೂರಿನ ಆಧಾರದ ಮೇಲೆ ಎಫ್ಐಆರ್ ದಾಖಲಿಸಲಾಗಿತ್ತು.ಆದರೆ ಈ ವಿಚಾರವಾಗಿ ಕಾಂಗ್ರೆಸ್ ಗೆ ಮತ್ತೊಮ್ಮೆ ಮುಖಭಂಗವಾಗಿದ್ದು, ಮೂವರ ವಿರುದ್ಧ ದಾಖಲಾಗಿದ್ದ ಎಫ್ಐಆರ್ ಗೆ ಉಚ್ಚ ನ್ಯಾಯಾಲಯವು ತಡೆಯಾಜ್ಞೆಯನ್ನು ವಿಧಿಸಿದೆ. ಅಲ್ಲದೆ ಈ ಪ್ರಕರಣದ ಮುಂದಿನ ತನಿಖೆ ಮತ್ತು ಕಾನೂನು ಪ್ರಕ್ರಿಯೆಗಳು ಉಚ್ಚ ನ್ಯಾಯಾಲಯದ ನಿರ್ದೇಶನದಂತೆ ನಡೆಯಲಿವೆ ಎನ್ನುವ ಸಂಗತಿ ತಿಳಿದುಬಂದಿದೆ.

Categories
ಕರಾವಳಿ ದಕ್ಷಿಣ ಕನ್ನಡ ಪುತ್ತೂರು ಮಂಗಳೂರು

ಕರಾವಳಿ ಟಾಪ್ ನ್ಯೂಸ್

ಕರಾವಳಿ ಟಾಪ್ ನ್ಯೂಸ್

• ಪುತ್ತೂರು: ಆತ್ಮಹತ್ಯೆಗೆ ಶರಣಾದ ಆಟೋ ಚಾಲಕ
• ಬೆಳ್ತಂಗಡಿ: ಅಕ್ರಮ ಮರಳುಗಾರಿಕೆ; ಪೊಲೀಸರ ವಶಕ್ಕೆ
• ಬ್ರಹ್ಮಾವರ: ಮನೆಗೆಲಸಕ್ಕೆ ಬಂದಿದ್ದ ಮಹಿಳೆಯಿಂದ ಚಿನ್ನಾಭರಣ ಕಳುವು

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್

• ಪುತ್ತೂರು: ಆತ್ಮಹತ್ಯೆಗೆ ಶರಣಾದ ಆಟೋ ಚಾಲಕ

ಪುತ್ತೂರು: ಆಟೋ ಚಾಲಕರೊಬ್ಬರು ಆತ್ಮಹತ್ಯೆ ಮಾಡಿಕೊಂಡ ಘಟನೆ, ಸೋಮವಾರ ಬೆಳಿಗ್ಗೆ ಶಿರಾಡಿ ಗ್ರಾಮದ ಅಡ್ಡಹೊಳೆಯಲ್ಲಿ ನಡೆದಿದೆ. ಮೃತ ವ್ಯಕ್ತಿಯನ್ನು ಅನಿತೋಟ ನಿವಾಸಿ ಹರಿದಾಸ ಎಂದು ಗುರುತಿಸಲಾಗಿದೆ. ಹರಿದಾಸ ಅವರು ಭಾನುವಾರದಂದು ರಾತ್ರಿ ಊಟ ಮಾಡಿ ಮನೆಯಲ್ಲಿ ಮಲಗಿದ್ದರು. ಸೋಮವಾರ ಬೆಳಿಗ್ಗೆ ಮನೆಯವರು ನೋಡಿದಾಗ ಅವರು ಮನೆಯಲ್ಲಿರದೆ ನಾಪತ್ತೆಯಾಗಿದ್ದರು. ಇದರಿಂದ ಆತಂಕಗೊಂಡ ಹರಿದಾಸ ಮನೆಯವರು ಸುತ್ತಮುತ್ತಲೂ ಹುಡುಕಾಟ ನಡೆಸಿದಾಗ 20ಮೀಟರ್ ದೂರದಲ್ಲಿರುವ ಮರಕ್ಕೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಆತ್ಮಹತ್ಯೆಗೆ ಕಾರಣವೇನು ಎನ್ನುವುದು ಸ್ಪಷ್ಟವಾಗಿ ತಿಳಿದುಬಂದಿಲ್ಲ.

• ಬೆಳ್ತಂಗಡಿ: ಅಕ್ರಮ ಮರಳುಗಾರಿಕೆ; ಪೊಲೀಸರ ವಶಕ್ಕೆ

ಬೆಳ್ತಂಗಡಿ: ಫಲ್ಗುಣಿ ನದಿಯಲ್ಲಿ ಅಕ್ರಮ ಮರಳುಗಾರಿಕೆ ನಡೆಯುತ್ತಿರುವ ಖಚಿತವಾದ ಮಾಹಿತಿ ಬಂದ ಹಿನ್ನೆಲೆಯಲ್ಲಿ ವೇಣೂರು ಠಾಣೆಯ ಪೊಲೀಸರು ಪಿಎಸ್ಐ ಓಮನಾ ಅವರ ನೇತೃತ್ವದಲ್ಲಿ ದಾಳಿ ನಡೆಸಿದ ಘಟನೆ, ನಿಟ್ಟಡೆ ಗ್ರಾಮದ ಬರ್ಕಜೆಯ ಬಳಿ ನಡೆದಿದೆ. ನೌಶದ್ ಮತ್ತು ಸದಾಶಿವ ಎನ್ನುವ ಇಬ್ಬರು ವ್ಯಕ್ತಿಗಳು ಫಲ್ಗುಣಿ ನದಿಯಿಂದ ಅಕ್ರಮವಾಗಿ ಮರಳನ್ನು ತೆಗೆದು, ಅದನ್ನು ಪಿಕಪ್ ವಾಹನದಲ್ಲಿ ತುಂಬಿಸಿಕೊಂಡು ಸಾಗಾಟ ಮಾಡಲು ಸಿದ್ಧತೆ ನಡೆಸಿದ್ದರು ಎನ್ನಲಾಗಿದೆ. ಪೊಲೀಸರು ಆಗಮಿಸುತ್ತಿದ್ದಂತೆ ಆರೋಪಿಗಳು ಅಲ್ಲಿಂದ ಪರಾರಿಯಾಗಿದ್ದು, ಪಿಕಪ್ ವಾಹನವನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಎನ್ನುವ ಮಾಹಿತಿ ಲಭಿಸಿದೆ. ಘಟನೆಗೆ ಸಂಬಂಧಿಸಿದಂತೆ ವೇಣೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಬ್ರಹ್ಮಾವರ: ಮನೆಯ ಕೆಲಸಕ್ಕೆಂದು ಆಗಮಿಸಿದ ಮಹಿಳೆಯೊಬ್ಬರು ಚಿನ್ನಾಭರಣ ಕಳುವು ಮಾಡಿರುವ ಘಟನೆ, ಹೇರೂರು ಗ್ರಾಮದಲ್ಲಿ ನಡೆದಿದೆ. ಲತಾ ಎನ್ನುವ ಮಹಿಳೆಯು ಹೇರೂರು ಗ್ರಾಮದಲ್ಲಿ ವಾಸವಾಗಿದ್ದ ವೃದ್ಧೆಯೊಬ್ಬರನ್ನು ನೋಡಿಕೊಳ್ಳಲು ಆಕೆಯ ಮನೆಯಲ್ಲೇ ಉಳಿದುಕೊಂಡಿದ್ದರು ಎನ್ನಲಾಗಿದೆ. ಈ ಸಂದರ್ಭದಲ್ಲಿ ಲತಾ ಮನೆಯಲ್ಲಿದ್ದ 29 ಗ್ರಾಂ ತೂಕದ ಸುಮಾರು 3.5ಲಕ್ಷ ರೂಪಾಯಿಗಳಷ್ಟು ಬೆಲೆಬಾಳುವ ಚಿನ್ನಾಭರಣವನ್ನು ಕಳುವು ಮಾಡಿ, ಅದನ್ನು ಅಡವಿಟ್ಟಿರುವ ಕುರಿತು ಮಾಹಿತಿ ಲಭಿಸಿದೆ. ಚಿನ್ನವನ್ನು ಬಿಡಿಸಿಕೊಡುವುದಾಗಿ ನಂಬಿಸಿ, ಈ ರೀತಿಯ ಕೃತ್ಯವನ್ನು ಎಸಗಿದ್ದಾಳೆ ಎನ್ನುವ ಸಂಗತಿ ತಿಳಿದುಬಂದಿದೆ. ಇದಕ್ಕೆ ಸಂಬಂಧಿಸಿದಂತೆ ಆಶಾ ಪೂಜಾರಿ ಎನ್ನುವವರು ಪೊಲೀಸರಿಗೆ ದೂರು ನೀಡಿದ್ದು, ದೂರಿನ ಆಧಾರದ ಮೇಲೆ ಬ್ರಹ್ಮಾವರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

Categories
ರಾಜಕೀಯ ರಾಜ್ಯ

ದೇಶದ ರಾಜಕೀಯದಲ್ಲಿ ಈಗ ಹೊಸ ಅಲೆ!

ದೇಶದ ರಾಜಕೀಯದಲ್ಲಿ ಈಗ ಹೊಸ ಅಲೆ!
– ಹೊಸ ಪಕ್ಷ ಸ್ಥಾಪಿಸಿ ಗೆದ್ದ ರಿಯಲ್ ಹೀರೋ ವಿಜಯ್
– ದೀದಿ ಹಳೆ ಭರವಸೆಗಳಿಗೆ ಬೆಂಕಿ ಇಟ್ಟ ಬಂಗಾಳ ಜನ
– ಕೇರಳ ಉಳಿಸಿಕೊಂಡ ಕಾಂಗ್ರೆಸ್ ಪಡೆ

ಪಂಚರಾಜ್ಯಗಳ 2026ರ ವಿಧಾನಸಭಾ ಚುನಾವಣೆಯ ಫಲಿತಾಂಶ ಸೋಮವಾರದಂದು ಪ್ರಕಟಗೊಂಡಿದ್ದು, ದೇಶದ ರಾಜಕೀಯದ ದಿಕ್ಕನ್ನೇ ಬದಲಿಸಿದೆ. ಅಲ್ಲದೆ ದೇಶದಲ್ಲಿ ಹೊಸ ಅಲೆ ಸೃಷ್ಟಿ ಮಾಡಿದೆ. ದೇಶದ ಅನೇಕ ಭಾಗಗಳಲ್ಲಿ ಅಚ್ಚರಿಯ ಫಲಿತಾಂಶಗಳು ಘೋಷಣೆಯಾಗಿದ್ದು, ಪರಂಪರಾನುಗುತವಾಗಿ ಬಂದಿದ್ದ ಬಲಿಷ್ಠ ಪಕ್ಷಗಳಿಗೆ ಹಿನ್ನಡೆಯುಂಟಾಗಿ, ಹೊಸ ರಾಜಕೀಯ ಪಕ್ಷಗಳು ಉದಯಿಸಿರುವುದು ಮತದಾರರ ನಿರೀಕ್ಷೆಯನ್ನು ಮೀರಿಸಿದೆ. ಅಲ್ಲದೆ ಯುವ ಜನತೆ ಈ ಚುನಾವಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ಯಾವ ರಾಜ್ಯದಲ್ಲಿ ಏನೇನು?

ಪಶ್ಚಿಮ ಬಂಗಾಳ ಮತ್ತು ಅಸ್ಸಾಂ ರಾಜ್ಯಗಳಲ್ಲಿ ಬಿಜೆಪಿ ಪಕ್ಷವು ಭರ್ಜರಿ ಗೆಲುವನ್ನು ಸಾಧಿಸಿ, ಅಧಿಕಾರವನ್ನು ಪಡೆದುಕೊಂಡಿದ್ದರೆ, ಪುದುಚೇರಿಯಲ್ಲಿ ಬಿಜೆಪಿ ನೇತೃತ್ವದ ಎನ್.ಡಿ.ಎ ಮೈತ್ರಿಕೂಟ ಮತ್ತೊಮ್ಮೆ ಅಧಿಕಾರದ ಗದ್ದುಗೆಯನ್ನು ಏರಿದೆ. ತಮಿಳುನಾಡು ರಾಜ್ಯದಲ್ಲಿ ಖ್ಯಾತ ತಮಿಳು ನಟ ವಿಜಯ್ ನೇತೃತ್ವದ ಟಿವಿಕೆ ಪಕ್ಷ ಉತ್ತಮ ಪ್ರದರ್ಶನವನ್ನು ನೀಡಿ, ಗೆಲುವಿನ ನಗೆ ಬೀರುವ ಮೂಲಕ ಅಚ್ಚರಿಯನ್ನುಂಟು ಮಾಡಿದೆ. ಕೇರಳ ರಾಜ್ಯದಲ್ಲಿ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಪಕ್ಷವು ಸ್ಪಷ್ಟವಾದ ಬಹುಮತಗಳೊಂದಿಗೆ ದಿಗ್ವಿಜಯವನ್ನು ಸಾಧಿಸಿದೆ.‌ ಈ ಬಾರಿಯ ಪಂಚರಾಜ್ಯ ಚುನಾವಣಾ ಫಲಿತಾಂಶವು ರಾಜ್ಯದ ರಾಜಕೀಯದಲ್ಲಿ ನೂತನ ಅಧ್ಯಾಯವನ್ನು ಆರಂಭಿಸಿದ್ದು, ಪರಿವರ್ತನೆಗೆ ಅವಕಾಶವನ್ನು ಕಲ್ಪಿಸಿಕೊಟ್ಟಿದೆ.

ದೀದಿ ಕೈ ತಪ್ಪಿದ ಪಶ್ಚಿಮ ಬಂಗಾಳ

ಪಶ್ಚಿಮ ಬಂಗಾಳದಲ್ಲಿ ಒಟ್ಟು 293 ಕ್ಷೇತ್ರಗಳಿದ್ದು, ಬಿಜೆಪಿ ಪಕ್ಷವು 2೦6 ಸ್ಥಾನಗಳನ್ನು ಪಡೆದುಕೊಳ್ಳುವುದರ ಮೂಲಕ ವಿಜಯಶಾಲಿಯಾಗಿದ್ದು, ಟಿಎಂಸಿ ಪಕ್ಷವು 81, ಕಾಂಗ್ರೆಸ್ 2 ಮತ್ತು ಇತರೆ ಪಕ್ಷಗಳು 3 ಸ್ಥಾನಗಳನ್ನು ಪಡೆದುಕೊಂಡಿದೆ. ಹಾಗೆಯೇ ಅಸ್ಸಾಂ ರಾಜ್ಯದಲ್ಲಿ ಒಟ್ಟು 126 ಕ್ಷೇತ್ರಗಳಿದ್ದು ಬಿಜೆಪಿ 82 ಸ್ಥಾನಗಳನ್ನು ಪಡೆದುಕೊಂಡು ಅಲ್ಲಿಯೂ ತನ್ನ ಗೆಲುವಿನ ನಗೆ ಬೀರಿದೆ, ಇನ್ನುಳಿದಂತೆ ಕಾಂಗ್ರೆಸ್ 19 ಮತ್ತು ಇತರೆ ಪಕ್ಷಗಳು 22 ಸ್ಥಾನಗಳನ್ನು ಪಡೆದುಕೊಂಡಿವೆ.

ಪುದುಚೇರಿಯಲ್ಲಿ ಬಿಜೆಪಿ ಗೆಲುವು

ಪುದುಚೇರಿಯಲ್ಲಿ ಒಟ್ಟು 30 ಕ್ಷೇತ್ರಗಳಿದ್ದು, ಬಿಜೆಪಿ ನೇತೃತ್ವದ ಎನ್ ಡಿಎ ಪಕ್ಷವು 16 ಸ್ಥಾನಗಳನ್ನು ಪಡೆದು ವಿಜಯ ಸಾಧಿಸಿದೆ, ಹಾಗೆಯೇ ಡಿಎಂಕೆ 5 ಸ್ಥಾನಗಳನ್ನು, ಕಾಂಗ್ರೆಸ್ 3 ಸ್ಥಾನಗಳನ್ನು ಮತ್ತು ಟಿವಿಕೆ 2 ಸ್ಥಾನಗಳನ್ನು ಪಡೆದುಕೊಂಡಿವೆ.

ತಮಿಳುನಾಡಲ್ಲಿ ಗೆದ್ದ ವಿಜಯ್ ಪಾರ್ಟಿ!

ತಮಿಳುನಾಡಿನಲ್ಲಿ ಒಟ್ಟು 234 ಕ್ಷೇತ್ರಗಳಿದ್ದು, ಟಿವಿಕೆ ಪಕ್ಷವು 107 ಮತಗಳನ್ನು ಪಡೆದು ಅಚ್ಚರಿಯ ಫಲಿತಾಂಶವನ್ನು ನೀಡಿದೆ. ಉಳಿದಂತೆ ಡಿಎಂಕೆ 60ಸ್ಥಾನಗಳನ್ನು, ಎಐಡಿಎಂಕೆ 47 ಸ್ಥಾನಗಳನ್ನು, ಕಾಂಗ್ರೆಸ್ 5 ಸ್ಥಾನಗಳನ್ನು ಗಳಿಸಿವೆ.

ಕೇರಳದಲ್ಲಿ ಮತ್ತೆ ಕೈ ಮೇಲು!

ಕೇರಳ ರಾಜ್ಯದಲ್ಲಿ 140 ಕ್ಷೇತ್ರಗಳಿದ್ದು ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಪಕ್ಷವು 102 ಮತಗಳನ್ನು ಪಡೆದುಕೊಳ್ಳುವುದರ ಮೂಲಕ ವಿಜಯಶಾಲಿಯಾಗಿದ್ದು, ಎಲ್ ಡಿ ಎಫ್ 35 ಸ್ಥಾನಗಳನ್ನು ಮತ್ತು ಎನ್ ಡಿ ಎ 3 ಸ್ಥಾನಗಳನ್ನು ಪಡೆದುಕೊಂಡಿದೆ.

Categories
inspiration ಪ್ರತಿಭೆಗಳು ರಾಜ್ಯ ಸಿನಿಮಾ

ಜೀರೋದಿಂದ ಬಾಲಿವುಡ್ ಹೀರೋ ಆದ ಯಶ್!

ಜೀರೋದಿಂದ ಬಾಲಿವುಡ್ ಹೀರೋ ಆದ ಯಶ್!
– ಧಾರಾವಾಹಿ ಮೂಲಕ ಬಣ್ಣದ ಜಗತ್ತಿಗೆ ಎಂಟ್ರಿ!
– ನಟನೆ ಕಲೆ ಜತೆಗೆ ಲಕ್ ಕೈ ಹಿಡಿಯಿತು
– ಭಾರತದ ದೊಡ್ಡ ಹೀರೋಗಳ ಸಾಲಿನಲ್ಲಿ ಈಗ ಯಶ್

ಕನ್ನಡ ಚಿತ್ರರಂಗದ ಖ್ಯಾತಿಯನ್ನು ವಿಶ್ವ ಮಟ್ಟಕ್ಕೆ ಕೊಂಡೊಯ್ದ ಕನ್ನಡದ ಹೆಮ್ಮೆಯ ಕಲಾವಿದ ಯಶ್. ಸಿನಿಮಾಕ್ಕೆ ಸಂಬಂಧಿಸಿದಂತೆ ಯಾವುದೇ ಹಿನ್ನೆಲೆಯಿಲ್ಲದೆ, ಮಧ್ಯಮ ವರ್ಗದ ಕುಟುಂಬದಲ್ಲಿ ಬೆಂಗಳೂರು ಮಹಾನಗರ ಸಾರಿಗೆಯ ಬಸ್ ಡ್ರೈವರ್ ಮತ್ತು ಸಾಮಾನ್ಯ ಗೃಹಿಣಿಯೊಬ್ಬರ ಮಗನಾಗಿದ್ದ ನವೀನ್ ಕುಮಾರ್ ಗೌಡ ಎನ್ನುವ ಹೆಸರಿನ ಯುವಕ ರಾಕಿಂಗ್ ಸ್ಟಾರ್ ಯಶ್ ಆಗಿದ್ದೇ ಒಂದು ಸಿನಿಮಾ ಕಥೆ ತರ ಇದೆ. ನವೀನ್ ಕುಮಾರ್ ರಾಕಿ ಭಾಯ್ ಆಗಿ ಪ್ರಪಂಚದಾದ್ಯಂತ ಗುರುತಿಸಿಕೊಳ್ಳುವುದರ ಹಿಂದಿದೆ ಅವರ ಕಠಿಣ ಪರಿಶ್ರಮ, ನೈಜ ಪ್ರತಿಭೆ ಮತ್ತು ಕಲೆಯ ಕುರಿತ ಅವರಲ್ಲಿದ್ದ ಅತಿಯಾದ ಶ್ರದ್ದೆ, ಕೆಲಸದ ಮೇಲಿನ ಗೌರವ.

ಬಾಲ್ಯದಿಂದಲೇ ನಟನೆಯ ಹುಚ್ಚು!

1986ರ ಜನವರಿ 8ರಂದು ಹಾಸನದಲ್ಲಿ ಜನಿಸಿದ ಯಶ್ ಅವರಿಗೆ ಬಾಲ್ಯದಿಂದಲೇ ನಟನೆಯ ಹುಚ್ಚು. ತಂದೆ ತಾಯಿಗಳಿಬ್ಬರೂ ಅಣ್ಣಾವ್ರ ಅಭಿಮಾನಿಗಳಾಗಿದ್ದು, ಅಭಿನಯದೆಡೆಗೆ ನವೀನ್ ಕುಮಾರ್ ಗೆ ಇದ್ದ ಸೆಳೆತಕ್ಕೆ ಮತ್ತಷ್ಟು ಸ್ಪೂರ್ತಿ ನೀಡಿತು.

ಪಿಯುಸಿಯಿಂದಲೇ ನಟನೆ, ನೃತ್ಯ ಆಸಕ್ತಿ!

ಅರುಣ್ ಕುಮಾರ್ ಮತ್ತು ಪುಷ್ಪಾ ದಂಪತಿಗಳು ಮಗನ ಕನಸಿಗೆ ಉತ್ತೇಜನ ನೀಡಿದರೆ, ತಂಗಿ ನಂದಿನಿ ಅಣ್ಣನ ಕಲಾ ಪ್ರತಿಭೆಗೆ ಸಂಪೂರ್ಣವಾಗಿ ಸಹಕಾರ ನೀಡಿದರು. ಶಾಲಾ ಕಾಲೇಜು ದಿನಗಳಲ್ಲೇ ಯಶ್ ಅವರು ರಂಗಭೂಮಿ, ನಟನೆ, ನೃತ್ಯಗಳಲ್ಲಿ ತೊಡಗಿಸಿಕೊಂಡರು. ಪಿಯುಸಿ ಬಳಿಕ ಬಿಎ ಪದವಿ ವೇಳೆ ಬಿ.ವಿ.ಕಾರಂತರ ಬೆನಕ ತಂಡವನ್ನು ಸೇರಿಕೊಂಡರು. ನಟನೆಯ ತರಬೇತಿಯ ಬಳಿಕ ಅವಕಾಶವನ್ನು ಅರಸಿ ಗಾಂಧಿನಗರಕ್ಕೆ ಬಂದರು.

ಧಾರಾವಾಹಿ ಮೂಲಕ ಬಣ್ಣದ ಜಗತ್ತಿಗೆ ಎಂಟ್ರಿ!

ನಂದಗೋಕುಲ, ಪ್ರೀತಿ ಇಲ್ಲದ ಮೇಲೆ ಮೊದಲಾದ ಧಾರಾವಾಹಿಗಳ ನಂತರ 2007ರಲ್ಲಿ ತೆರೆಕಂಡ ‘ಜಂಭದ ಹುಡುಗಿ’ ಚಿತ್ರದಲ್ಲಿನ ಸಣ್ಣದೊಂದು ಪಾತ್ರದ ಮೂಲಕ ಕನ್ನಡ ಚಿತ್ರರಂಗವನ್ನು ಪ್ರವೇಶಿಸಿದರು. ಪೂರ್ಣಪ್ರಮಾಣದ ನಾಯಕರಾಗಿ ಗುರುತಿಸಿಕೊಂಡಿದ್ದು, 2008ರಲ್ಲಿ ಬಿಡುಗಡೆಗೊಂಡ ‘ಮೊಗ್ಗಿನ ಮನಸು’ ಚಿತ್ರದ ಮೂಲಕ. ಆ ನಂತರ ಯಶ್ ಹಿಂತಿರುಗಿ ನೋಡಿದ್ದಿಲ್ಲ. ಅವರ ನಿಜವಾದ ಸಾಧನೆ ಈಗ ಎಲ್ಲರ ಮುಂದಿದೆ.

ನವೀನ್ ಕುಮಾರ್ ಯಶ್ ಆಗಿ ಬೆಳೆದ ಹಾದಿ ಸುಗಮವಾಗಿರಲಿಲ್ಲ!

ನವೀನ್ ಕುಮಾರ್ ಯಶ್ ಆಗಿ ಬೆಳೆದ ಹಾದಿ ಸುಗಮವಾಗಿರಲಿಲ್ಲ. ತಮ್ಮದೇ ಆದ ಕಲಾಪ್ರತಿಭೆ, ಅಭಿನಯದ ಶೈಲಿಯ ಮೂಲಕ ಕನ್ನಡಿಗರ ಪ್ರೀತಿ, ಹಾರೈಕೆ, ಆಶೀರ್ವಾದಕ್ಕೆ ಪಾತ್ರರಾದರು. ಫಲವಾಗಿ ಫಿಲಂ ಫೇರ್, ಸೈಮಾ, ಝಿ ಕನ್ನಡ ವಾಹಿನಿಯ ಹೆಮ್ಮೆಯ ಕನ್ನಡಿಗ ಸೇರಿದಂತೆ ಹಲವಾರು ಪ್ರಶಸ್ತಿಗಳಿಗೆ ಭಾಜರಾದರು. ನಂದಗೋಕುಲ ಧಾರಾವಾಹಿಯಲ್ಲಿ ಪಾತ್ರವನ್ನು ನಿರ್ವಹಿಸುತ್ತಿದ್ದಾಗ, ತಮ್ಮ ಸಹೋದರಿಯಾಗಿ ಪಾತ್ರ ಮಾಡುತ್ತಿದ್ದ ರಾಧಿಕಾ ಪಂಡಿತ್ ಅವರಲ್ಲಿ ಪ್ರೇಮಾಂಕುರವಾಯಿತು. ನಾಯಕ ನಟನಾಗಿ ಅಭಿನಯಿಸಿದ ಮೊದಲ ಚಿತ್ರ ‘ಮೊಗ್ಗಿನ ಮನಸು’ ಚಿತ್ರದ ನಾಯಕಿಯನ್ನು ತಮ್ಮ ನಿಜ ಜೀವನದ ನಾಯಕಿಯನ್ನಾಗಿಸಿಕೊಂಡರು. ಕನ್ನಡಿಗರೇ ಮೆಚ್ಚಿದ ಈ ಜೋಡಿಯು 2016ರಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿರಿಸಿತು. ಆರತಿಗೊಬ್ಬ ಮಗಳು, ಕೀರ್ತಿಗೊಬ್ಬ ಮಗ ಎಂಬ ಹಿರಿಯರ ಮಾತಿನಂತೆ ಐರಾ ಎಂಬ ಹೆಣ್ಣು ಮಗುವನ್ನು, ಯಥರ್ವ ಎಂಬ ಗಂಡು ಮಗುವನ್ನು ಪಡೆದ ಇವರದು ಸುಖಿ ಕುಟುಂಬ.

ಬಾಲಿವುಡ್ ಎಂಟ್ರಿ ಆದ ಯಶ್..!

ಕೆಜಿಎಫ್ ಮತ್ತು ಕೆಜಿಎಫ್ 1 ಇವರ ಸಿನಿಮಾ ಜರ್ನಿಯನ್ನು ಬಾಲಿವುಡ್ ಕಡೆಗೆ ತೆಗೆದುಕೊಂಡು ಹೋಯಿತು. ಯಶ್ ಅವರ ಬಹುನಿರೀಕ್ಷಿತ ಚಿತ್ರ ಟಾಕ್ಸಿಕ್ ಇದೇ ವರ್ಷ ಮಾರ್ಚ್ 19ರಂದು ಜಗತ್ತಿನಾದ್ಯಂತ ಬಿಡುಗಡೆಗೊಳ್ಳಲಿದೆ. ರಾಮಾಯಣ ಎಂಬ ಸಿನಿಮಾದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. ಹತ್ತಾರು ದೊಡ್ಡ ಸಿನಿಮಾ ಕೈಯಲ್ಲಿವೆ. ಇದೆ ನೋಡಿ ಸಕ್ಸಸ್ ಅಂದ್ರೆ. ಕನಸು ಕಂಡವರೆಲ್ಲಾ ಕನಸು ಮಾತ್ರ ಕಾಣ್ತಾರೆ. ಆದರೆ ಅದನ್ನು ಸಾಧಿಸಿ ತೋರಿಸಿದವರಲ್ಲಿ ಯಶ್ ಕೂಡ ಒಬ್ಬರು. ಯಶ್ ಅವರ ಜೀವನ ಸ್ಟೋರಿ ಇವತ್ತಿನ ಯುವ ಜನತೆಗೆ ನಿಜಕ್ಕೂ ಮಾದರಿ.

Categories
ತೀರ್ಥಹಳ್ಳಿ ಮಲ್ನಾಡ್ ಶಿವಮೊಗ್ಗ

ಮೇಲಿನಕುರುವಳ್ಳಿಯ ಶ್ರೀಮಾರಿಕಾಂಬ ದೇವಸ್ಥಾನದಲ್ಲಿ ಅದ್ದೂರಿ ಕರಗ ಮಹೋತ್ಸವ

ಮೇಲಿನಕುರುವಳ್ಳಿಯ ಶ್ರೀಮಾರಿಕಾಂಬ ದೇವಸ್ಥಾನದಲ್ಲಿ ಅದ್ದೂರಿ ಕರಗ ಮಹೋತ್ಸವ
– ಶ್ರೀಮಾರಿಕಾಂಬ ದೇವಿಗೆ ತುಂಗಾ ನದಿಯಿಂದ ತುಂಗಾ ತೀರ್ಥವನ್ನು ತಂದು ಅಭಿಷೇಕ
– ಮೇ 4ರಿಂದ 6ರವರೆಗೆ 53ನೇ ವರ್ಷದ ಕರಗ ಮಹೋತ್ಸವ

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್

ತೀರ್ಥಹಳ್ಳಿ: ಮೇಲಿನಕುರುವಳ್ಳಿಯ ಶ್ರೀಮಾರಿಕಾಂಬ ದೇವಸ್ಥಾನದಲ್ಲಿ ಅಷ್ಟಭುಜ ಶ್ರೀಮಾರಿಕಾಂಬ ದೇವಿಯ ಸನ್ನಿಧಾನದಲ್ಲಿ 53ನೇ ವರ್ಷದ ಕರಗ ಮಹೋತ್ಸವವನ್ನು ಮೇ 4ರ ಸೋಮವಾರದಿಂದ ಮೇ 6ರ ಬುಧವಾರದವರೆಗೆ ಹಮ್ಮಿಕೊಳ್ಳಲಾಗಿದೆ. ಇದರ ಅಂಗವಾಗಿ ವಿವಿಧ ಧಾರ್ಮಿಕ ಆಚರಣೆಗಳು ನಡೆಯಲಿದ್ದು, ಮೊದಲ ದಿನವಾದ ಮೇ4ರ ಸೋಮವಾರದಂದು ಬೆಳಿಗ್ಗೆ 7:00ಗಂಟೆಗೆ ಶ್ರೀಮಾರಿಕಾಂಬ ದೇವಿಗೆ ತುಂಗಾ ನದಿಯಿಂದ ತುಂಗಾ ತೀರ್ಥವನ್ನು ತಂದು ಅಭಿಷೇಕ ಮಾಡಲಾಗುತ್ತದೆ.

10:೦೦ಗಂಟೆಗೆ ಚಂಡಿಕಾ ಹೋಮ ನಡೆಯಲಿದ್ದು, 12:30ಕ್ಕೆ ಪೂರ್ಣಾಹುತಿ, ಮಹಾಮಂಗಳಾರತಿಯ ಬಳಿಕ ಆಗಮಿಸಿದ ಭಕ್ತಾದಿಗಳಿಗೆ ಪ್ರಸಾದ ವಿನಿಯೋಗ ಮತ್ತು ಅನ್ನ ಸಂರ್ಪಣೆಯನ್ನು ಏರ್ಪಡಿಸಲಾಗಿದೆ. ಸಂಜೆ 6:೦೦ಗಂಟೆಗೆ ಶ್ರೀಮಾರಿಕಾಂಬ ದೇವಿಯ ಉತ್ಸವ ಮೂರ್ತಿ ಮೆರವಣಿಗೆಯಲ್ಲಿ ತುಂಗಾ ನದಿಗೆ ಹೊರಟು, ಕರಗ ಜೋಡಣೆ ಮಾಡಿ ಶ್ರೀದೇವಿಯ ಸನ್ನಿಧಿಗೆ ತರಲಾಗುತ್ತದೆ. ಬಳಿಕ ಮಹಾಮಂಗಳಾರತಿ ಮತ್ತು ಪ್ರಸಾದ ವಿನಿಯೋಗ ನೆರವೇರಲಿದೆ. ದಿನಾಂಕ 5ರ ಮಂಗಳವಾರದಂದು ಬೆಳಿಗ್ಗೆ 7:00ಗಂಟೆಗೆ ದೇವಿಯ ಸನ್ನಿಧಾನದಿಂದ ತುಂಗಾ ನದಿಗೆ ಹೊರಟು ಹರಕೆಯನ್ನು(ಅಗ್ನಿಕುಂಡ) ತಂದು ಶ್ರೀದೇವಿಗೆ ಸಮರ್ಪಿಸಿ, ಬಳಿಕ ಮಹಾಮಂಗಳಾರತಿ ಮತ್ತು ಪ್ರಸಾದ ವಿನಿಯೋಗ ನಡೆಯಲಿದೆ.

ಸಂಜೆ 5:00ಗಂಟೆಗೆ ಪ್ರತಿ ಭಕ್ತಾದಿಗಳ ಮನೆಯಿಂದ ತಂಬಿಟ್ಟು ದೀಪ ಸೇವೆಯನ್ನು ತಂದು ಶ್ರೀಮಾರಿಕಾಂಬ ದೇವಿಗೆ ವಿಶೇಷ ಪೂಜೆಯನ್ನು ನೆರವೇರಿಸಲಾಗುತ್ತದೆ. ಮಹಾಮಂಗಳಾರತಿ, ಪ್ರಸಾದ ವಿನಿಯೋಗದ ನಂತರ ಸಂಜೆ 7:30ಕ್ಕೆ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜರುಗಲಿದೆ. ಕೊನೆಯ ದಿನವಾದ ಮೇ6ರ ಬುಧವಾರದಂದು ಬೆಳಿಗ್ಗೆ 8:೦೦ಗಂಟೆಗೆ ಶ್ರೀಮಾರಿಕಾಂಬ ದೇವಿಗೆ ಹರಕೆಯನ್ನು ಒಪ್ಪಿಸಲಾಗುತ್ತದೆ. ಮಧ್ಯಾಹ್ನ 12:30ಕ್ಕೆ ಸಾರ್ವಜನಿಕ ಅನ್ನ ಸಂತರ್ಪಣೆ ನಡೆಯಲಿದ್ದು, ಸಂಜೆ 6:00ಗಂಟೆಗೆ ಆಚರಣೆಯ ಪ್ರಮುಖ ಭಾಗವಾದ ಕರಗ ಮೆರವಣಿಗೆ ನಡೆಯಲಿದ್ದು, ಶ್ರೀಮಾರಿಕಾಂಬ ದೇವಿಯ ಮೂರ್ತಿಯನ್ನು ತುಂಗಾ ನದಿಯಲ್ಲಿ ವಿಸರ್ಜಿಸಲಾಗುತ್ತದೆ. ಈ ಧಾರ್ಮಿಕ ಕಾರ್ಯಕ್ರಮಕ್ಕೆ ಭಕ್ತಾದಿಗಳು ಅಧಿಕ ಸಂಖ್ಯೆಯಲ್ಲಿ ತನು ಮನ ಮತ್ತು ಧನದ ಸಹಕಾರದೊಂದಿಗೆ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ, ಶ್ರೀದೇವರುಗಳ ಮುಡಿ ಗಂಧ ಪ್ರಸಾದವನ್ನು ಸ್ವೀಕರಿಸಿ ಶ್ರೀಮಾರಿಕಾಂಬ ದೇವಿಯ ಮತ್ತು ನಾಗದೇವರ ಕೃಪೆಗೆ ಪಾತ್ರರಾಗಬೇಕೆಂದು ಕೋರಲಾಗಿದೆ.

Categories
ಮಾಹಿತಿ ಸುದ್ದಿ ರಾಜ್ಯ

ಯುವ ಜನರ ಉದ್ಯೋಗ ನುಂಗುತ್ತೆ AI ರಾಕ್ಷಸ!

ಯುವ ಜನರ ಉದ್ಯೋಗ ನುಂಗುತ್ತೆ AI ರಾಕ್ಷಸ!
– ಜಾಣ್ಮೆ, ತಾಳ್ಮೆ, ಕೌಶಲ್ಯ ಇದ್ದರಷ್ಟೇ ಮುಂದೆ ಕೆಲಸ
– ದೇಶದಲ್ಲಿ ಉದ್ಯೋಗ ಹಾಹಾಕಾರ ಶುರು..?!

ನವದೆಹಲಿ: 2026ಕ್ಕೆ ಬಹುತೇಕ ರಾಷ್ಟ್ರಗಳಿಗೆ ಎ. ಐ ಎಂಟ್ರಿ ಆಗಲಿದೆ. ಇದು ಲಕ್ಷ ಲಕ್ಷ ಉದ್ಯೋಗವನ್ನು ಕಸಿದುಕೊಳ್ಳಲಿದೆ. ಜತೆಗೆ ಅನೇಕ ಮಾರುಕಟ್ಟೆ ಪತನಕ್ಕೂ ಕಾರಣವಾಗಲಿದೆ. Ai ಅಂದರೆ ಕೃತಕ ಬುದ್ದಿಮತ್ತೆ. ಅಂದರೆ ಮನುಷ್ಯ ಯೋಚನೆ ಮಾಡುವ ಜ್ಞಾನ ಅದೇ ಸಾಫ್ಟ್ವೇರ್ ಅಥವಾ ತಂತ್ರಜ್ಞಾನ ಕೊಡುತ್ತೆ. ಇಲ್ಲಿ ಗಮನಿಸಬೇಕಾದ ವಿಚಾರ ಎಂದರೆ ಆರ್ಟಿಫಿಷಿಯಲ್ ಇಂಟೆಲಿಜೆಂಟ್ ಮೂಲಕ ಯಾವುದೇ ಕಠಿಣ ಕೆಲಸ ಸುಲಭ ಅಗಲಿದೆ. ನಿರುದ್ಯೋಗ, ಅಪರಾಧ, ಸಂಸಾರಿಕ ಕಲಹ ಹೆಚ್ಚಲಿದೆ. ದೇಶ, ರಾಜ್ಯ ಬಿಕ್ಕಟ್ಟಿಗೆ ಸಿಲುಕಲಿವೆ. ಲಕ್ಷ ಲಕ್ಷ ಸುರಿದು ಓದಿರುವ ಯುವ ಜನತೆಗೆ ಉದ್ಯೋಗ ಅವಕಾಶ ಕಷ್ಟ ಆಗುವ ಸಾಧ್ಯತೆ ಹೆಚ್ಚಿದೆ ಎನ್ನುತ್ತಿವೆ ಸಂಶೋಧನೆಗಳು.

ನಾವು ಈಗ ಮಾಡುತ್ತಿರುವ ಕೆಲಸ ಇಲ್ಲವಾಗಬಹುದು!

ನಾವು ಇಂದು ಮಾಡುತ್ತಿರುವ ಬಹುತೇಕ ಕೆಲಸಗಳು ಇನ್ನು ಕೇವಲ ಎರಡು-ಮೂರು ವರ್ಷಗಳಲ್ಲಿ ಇತಿಹಾಸದ ಪುಟ ಸೇರಲಿವೆ ಎನ್ನುತ್ತಿದ್ದಾರೆ ವಿಶ್ವಪ್ರಸಿದ್ಧ Al ತಜ್ಞ ಡಾ. ರೋಮನ್ ಯಾಂಪೋಲ್ಸಿ. ಇತ್ತೀಚಿನ ವರದಿಗಳ ಪ್ರಕಾರ, 2027ರ ವೇಳೆಗೆ ಆರ್ಟಿಫಿಶಿಯಲ್ ಜನರಲ್ ಇಂಟೆಲಿಜೆನ್ಸ್ ಜಗತ್ತನ್ನು ಆಳಲಿದ್ದು, ಅದರ ಪರಿಣಾಮವಾಗಿ ಇಂದಿನ ಶೇ. 99ರಷ್ಟು ಉದ್ಯೋಗಗಳು ಇಲ್ಲವಾಗಲಿವೆ ಎಂಬ ಆತಂಕಕಾರಿ ಮುನ್ಸೂಚನೆ ನೀಡಿದ್ದಾರೆ.

AGI ಅಂದರೆ ಏನು? ಈ ಬದಲಾವಣೆ ಯಾಕೆ..?

ಸಾಮಾನ್ಯ AI ಕೇವಲ ದತ್ತಾಂಶಗಳನ್ನು ವಿಶ್ಲೇಷಿಸಿದರೆ, AGI ಮನುಷ್ಯನಿಗಿಂತಲೂ ವೇಗವಾಗಿ ಯೋಚಿಸುವ, ಕಲಿಯುವ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯ ಹೊಂದಿರುತ್ತದೆ. ಡಾ. ರೋಮನ್ ಪ್ರಕಾರ, ಐದು ವರ್ಷಗಳ ಒಳಗೆ ಕಂಪ್ಯೂಟರ್‌ಗಳು ಮನುಷ್ಯ ಮಾಡಬಲ್ಲ ಪ್ರತಿಯೊಂದು ಡಿಜಿಟಲ್ ಕೆಲಸವನ್ನೂ ಅತ್ಯಂತ ನಿಖರವಾಗಿ ಮಾಡಲಿವೆ. ಇದರಿಂದಾಗಿ ಡೇಟಾ ಎಂಟ್ರಿ, ಗ್ರಾಫಿಕ್ ಡಿಸೈನ್, ಮಿಷನ್ ಲೆರ್ನಿoಗ್, ಸಾಫ್ಟ್ವೆರ್ ಡೆವಲಪ್ಮೆಂಟ್, ಮೆಕ್ಯಾನಿಸಮ್, ಕೋಡಿಂಗ್ ಮತ್ತು ಅಕೌಂಟಿಂಗ್‌ನಂತಹ ಕ್ಷೇತ್ರಗಳಲ್ಲಿ ಮಾನವನ ಅಗತ್ಯವೇ ಇಲ್ಲದಂತಾಗಬಹುದು. ಆದರೆ ಜಾಣ್ಮೆ, ತಾಳ್ಮೆ, ಕೌಶಲ್ಯ, ಪರಿಶ್ರಮ, ಪ್ರಾಮಾಣಿಕತೆ ಇದ್ದರಷ್ಟೇ ಕೆಲಸ ಸಿಗಬಹುದು. ಯಾಕೆಂದ್ರೆ ಯಾವುದೇ ಕೆಲಸಕ್ಕೆ ಒಬ್ಬ ಮಾಸ್ಟರ್ ಬೇಕೇ ಬೇಕು.

ಮತ್ತೆ ಕೃಷಿ, ಆಹಾರದತ್ತ ಹೊರಳುತ್ತಾ ಭಾರತ?

ಎಲ್ಲಾ ಉದ್ಯೋಗಗಳು ಹೋದರೂ, ಮನುಷ್ಯನ ಸಹಜ ಸಂವೇದನೆ ಮತ್ತು ತಾಂತ್ರಿಕ ನಿಯಂತ್ರಣ ಅಗತ್ಯವಿರುವ ಉದ್ಯೋಗಗಳು ಉಳಿಯಲಿವೆ. ಜತೆಗೆ ಸೇವಾ ಮತ್ತು ಉತ್ಪಾದನಾ ಕ್ಷೇತ್ರದಲ್ಲಿ ದೊಡ್ಡ ಹೊಡೆತ ಆಗಲ್ಲ. ಆದರೆ ಐಟಿ ಮತ್ತು ಡಿಜಿಟಲ್ ಕ್ಷೇತ್ರದಲ್ಲಿ ದೊಡ್ಡ ಮಟ್ಟದಲ್ಲಿ ಬದಲಾವಣೆ ಆಗಲಿದೆ ಎನ್ನಲಾಗಿದೆ. ಈಗಾಗಲೇ ಬೆಂಗಳೂರು ಸೇರಿ ದೊಡ್ಡ ದೊಡ್ಡ ನಗರಗಳಲ್ಲಿ ಉದ್ಯೋಗ ಹಾಹಾಕಾರ ಶುರುವಾಗಿದೆ. ಭಾರತ ಒಂದು ಕಾಲದಲ್ಲಿ ವಿಶ್ವದಲ್ಲಿ ಆಹಾರ ಸಾಮಗ್ರಿ, ಕೃಷಿಯಲ್ಲಿ ಮುಂಚೂಣಿ ದೇಶ. ಆದರೆ ಈಗ ಅದು ಕಡಿಮೆ ಆಗಿದೆ. ಇದೀಗ ಮತ್ತೆ ಕೃಷಿ, ಆಹಾರದತ್ತ ಆಕರ್ಷಣೆ ಹೆಚ್ಚಾಗಿದೆ.

ಉದ್ಯೋಗ ಸಮಸ್ಯೆ ಭೀಕರ.. ಭೀಕರ!

Ai ಇಂದ ತಾಂತ್ರಿಕವಾಗಿ ದೇಶ ಮುಂದುವರಿಯುತ್ತಿದೆ ಎನ್ನುವುದನ್ನು ಸೂಚಿಸಿದ್ದರೂ ಕೂಡ, ಇದರಿಂದಾಗಿ ದೇಶದಲ್ಲಿ ಮತ್ತೊಂದು ರೀತಿಯ ಸಮಸ್ಯೆ ತಲೆದೋರುತ್ತಿದೆ. ಹಿಂದಿನ ಕಾಲದಲ್ಲಿ ಕಟ್ಟಡಗಳನ್ನು ಕಟ್ಟಲು ಮತ್ತು ಹೊಲ-ಗದ್ದೆಗಳಲ್ಲಿ ಕೆಲಸ ಮಾಡಲು ನೂರಾರು ಜನ ಕಾರ್ಮಿಕರ ಅವಶ್ಯಕತೆ ಇರುತ್ತಿತ್ತು. ಯಂತ್ರಗಳು ಆವಿಷ್ಕಾರಗೊಂಡ ಹಿನ್ನೆಲೆಯಲ್ಲಿ ನೂರಾರು ಜನರ ಬದಲಿಗೆ ಒಂದು ಯಂತ್ರ ಕಾರ್ಯನಿರ್ವಹಿಸಲು ಆರಂಭಿಸಿತು.

ಈಗ ಎಐ ಎನ್ನುವುದು ಅದರ ಮುಂದುವರಿದ ಭಾಗದಂತಿದೆ. ಇದು ತಂತ್ರಜ್ಞಾನ ಕ್ಷೇತ್ರದಲ್ಲಿ ಹೆಚ್ಚು ಅಳವಡಿಕೆಯಾಗುತ್ತಿರುವುರಿಂದ ಸಾವಿರಾರು ಇಂಜಿನಿಯರ್ ಗಳು ಕೆಲಸದಿಂದ ವಂಚಿತರಾಗುತ್ತಿರುವುದು ದುರಂತ. ಈಗಾಗಲೇ ಕೆಲವು ಜನ ಉದ್ಯೋಗಾವಕಾಶವನ್ನು ಕಳೆದುಕೊಂಡಿದ್ದು, ಭವಿಷ್ಯದ ಬಗ್ಗೆ ಚಿಂತಿತರಾಗಿದ್ದಾರೆ.‌ ಇದು ಹೀಗೆಯೇ ಮುಂದುವರಿದು ಎಲ್ಲೆಡೆ ಎಐ ಅಳವಡಿಕೆಯಾದಲ್ಲಿ ನಿರುದ್ಯೋಗದ ಪ್ರಮಾಣ ಮತ್ತಷ್ಟು ತೀವ್ರಗೊಳ್ಳಲಿದೆ ಎನ್ನುವ ಆತಂಕಕಾರಿ ಸಂಗತಿ ಎಲ್ಲೆಡೆ ವ್ಯಾಪಿಸಿದೆ.

ಐಟಿ ಕ್ಷೇತ್ರಕ್ಕೆ ಭಾರೀ ಹೊಡೆತ!

ವರದಿಗಳ ಪ್ರಕಾರ ಎಐ ನಿಂದ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಾತ್ರ ನಿರುದ್ಯೋಗ ಸಮಸ್ಯೆ ತಲೆದೋರಲಿದ್ದು, ವಾಣಿಜ್ಯ, ಶಿಕ್ಷಣ, ಕಲೆ ಮತ್ತು ಸೃಜನಾತ್ಮಕ ವೃತ್ತಿಗಳಲ್ಲಿ ತೊಡಗಿಸಿಕೊಂಡವರಿಗೆ ಯಾವುದೇ ರೀತಿಯ ನಿರುದ್ಯೋಗ ಸಮಸ್ಯೆ ಎದುರಾಗುವುದಿಲ್ಲ. ಎಐ ನಿಂದಾಗಿ ಉದ್ಯೋಗ ಕಳೆದುಕೊಂಡವರು, ‘ಮರಳಿ ಮಣ್ಣಿಗೆ’ ಎನ್ನುವ ಮಾತಿನಂತೆ ತಮ್ಮ ಮೂಲ ಸ್ಥಾನಗಳಿಗೆ ಹಿಂತಿರುಗಿ ಹಳೆಯ ಪದ್ಧತಿಯಾದ ಆರೋಗ್ಯಕರ ಮತ್ತು ನೆಮ್ಮದಿಯುತವಾದ ಕೃಷಿ ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳುವ ಸಾಧ್ಯತೆ ಇದೆ.

Categories
ಚಿಕ್ಕಮಗಳೂರು ಮಲ್ನಾಡ್ ರಾಜ್ಯ

ನಾಲ್ವರು ಮಕ್ಕಳ ಜೀವ ತೆಗೆದ ಬಾತು ಕೋಳಿ!

ನಾಲ್ವರು ಮಕ್ಕಳ ಜೀವ ತೆಗೆದ ಬಾತು ಕೋಳಿ!
– ಚಿಕ್ಕಮಗಳೂರಲ್ಲಿ ನಾಲ್ವರು ಮಕ್ಕಳ ದುರಂತ ಅಂತ್ಯ
– ಕೆರೆಯಲ್ಲಿದ್ದ ಬಾತು ಕೋಳಿ ಹಿಡಿಯಲು ಹೋಗಿ ದುರಂತ
– ಬೇಸಿಗೆ ರಜೆ ಇದೆ.. ಮಕ್ಕಳ ಬಗ್ಗೆ ಹುಷಾರ್

ನಮ್ಮೂರ್ ಎಕ್ಸ್ ಪ್ರೆಸ್ ನ್ಯೂಸ್
ಚಿಕ್ಕಮಗಳೂರು: ಬಾತು ಕೋಳಿ ಹಿಡಿಯಲು ಹೋಗಿ ನಾಲ್ಕು ಜನ ಮಕ್ಕಳು ನೀರುಪಾಲಾಗಿ ಸಾವನ್ನಪ್ಪಿರುವ ಘಟನೆ ಚಿಕ್ಕಮಗಳೂರಿನ ಅರಳಗುಪ್ಪೆ ಗ್ರಾಮದ ಕಾರಂಜಿ ಕೆರೆಯಲ್ಲಿ ನಡೆದಿದೆ.‌ ಬೇಸಿಗೆ ರಜೆಯ ಪ್ರಯುಕ್ತ ಸಂಬಂಧಿಕರ ಮನೆಗೆ ಬಂದಿದ್ದ ಮಕ್ಕಳು, ಸಮಯ ಕಳೆಯಲು ತಿರುಗಾಡಲೆಂದು ಕಾರಂಜಿ ಕೆರೆಗೆ ಹೋಗಿದ್ದ ಸಂದರ್ಭದಲ್ಲಿ, ಬಾತುಕೋಳಿಯನ್ನು ಹಿಡಿಯಲು ಹೋಗಿ ನೀರಿಗೆ ಬಿದ್ದು, ನಾಲ್ವರು ಮಕ್ಕಳು ದುರಂತ ಅಂತ್ಯ ಕಂಡಿದ್ದಾರೆ.

ಮೃತಪಟ್ಟ ಮಕ್ಕಳನ್ನು ಮಹಾದಿಯಾ, ಅರುನುಸ್, ನಾಯುಸ್ ಮತ್ತು ಅಬ್ದುಲ್ ರೆಹಮಾನ್ ಎಂದು ಗುರುತಿಸಲಾಗಿದೆ. ಅವರೊಂದಿಗೆ ತೆರಳಿದ್ದ ನಾಲ್ಕು ವರ್ಷದ ಮಗು ಅರ್ಮಾನ್ ನೀರಿಗೆ ಬಿದ್ದು ಗಂಭೀರ ಸ್ಥಿತಿಯಲ್ಲಿತ್ತು. ತಕ್ಷಣ ಅವನನ್ನು ರಕ್ಷಿಸಿ, ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಯಿತು ಎನ್ನಲಾಗಿದೆ.
ಮಾಹಿತಿ ಲಭಿಸುತ್ತಿದ್ದಂತೆ ಗ್ರಾಮಾಂತರ ಠಾಣೆಯ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ, ಪರಿಶೀಲನೆಯನ್ನು ನಡೆಸಿದರು ಎನ್ನುವ ಮಾಹಿತಿ ಲಭಿಸಿದೆ. ಘಟನೆಗೆ ಸಂಬಂಧಿಸಿದಂತೆ ಅರಳಗುಪ್ಪೆ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.